Mose wakasomba mu Midiyana bidimu 40. Yeye kusela, kulela bana. Dimue dituku pavuaye udisha mikoko yende pabuipi ne Mukuna wa Sinai, wakamona bualu bua dikema. Kamutshi ka mêba kalakuka kapia, kadi kakayi kuoshika! Pakasemena Mose pabuipi bua kumona bua tshinyi kavua kalakuka kapia, wakumvua dîyi difumina mu kamutshi aku diamba ne: ‘Mose! Kusemenyi kabidi pabuipi to. Kopola sandala yebe, bualu udi muimane mu buloba bua tshijila.’ Yehowa ke uvua wakula ku diambuluisha dia muanjelu.

Bu muvua Mose mumvue buôwa, wakasokoka mpala wende. Dîyi diakamuambila ne: ‘Ndi mumone dikenga dia bena Isalele. Nembapandishe kudi bena Ejipitu ne nenye nabu mu buloba buimpe. Wewe ke muntu wapatula bantu banyi mu Ejipitu.’ Kuenaku mumone ne: bualu ebu buvua ne bua kuikala bukemeshe Mose anyi?

Mose wakamukonka ne: ‘Ntshinyi tshingambila bantu pangebejabu ne: nnganyi udi mukutume?’ Nzambi wakamuandamuna ne: ‘Ubambile ne: Yehowa, Nzambi wa Abalahama, Nzambi wa Izaka, ne Nzambi wa Yakoba mmuntume kunudi.’ Pashishe Mose wakamuebeja ne: ‘Kadi bantu bobu kabayi banteleje, nengenze tshinyi?’ Yehowa wakapesha Mose bijadiki bivua bileja ne: Yeye uvua ne bua kumuambuluisha. Wakambila Mose bua kukupa dikombo diende panshi. Nunku dikombo adi diakandamuka nyoka! Pakakuata Mose nyoka au ku mukila, wakandamuka kabidi dikombo. Yehowa wakamuambila ne: ‘Paudi wenza tshishima etshi, netshileje ne: meme ke udi mukutume.’

Mose wakamba ne: ‘Tshitu ngakula bimpe to.’ Yehowa wakamulaya ne: ‘Nenkuambile tshia wewe kuamba, ne nentume muanenu Alona bua akuambuluishe.’ Bu muvua Mose mumanye ne: Yehowa uvua nende, wakangata mukajende ne bana bende, kupinganabu mu Ejipitu.

Bakenzeja bena Isalele ku bukole bua kuenza mudimu mukole bu bapika. Yehowa wakatuma Mose ne Alona bua kuambilabu Palô mukenji eu: ‘Lekela bantu banyi baye kuntendelela mu tshipela.’ Palô wakandamuna ne lutambishi ne: ‘Tshiena nteleja tshidi Yehowa wamba to, ne tshiakulekela bena Isalele bua baye to.’ Pashishe Palô wakabenzeja kabidi midimu mikole menemene ku bukole. Yehowa uvua musue kupesha Palô dilongesha. Udiku mumanye muvuaye mumupeshadi anyi? Wakatuma bipupu dikumi mu Ejipitu. Yehowa wakambila Mose ne: ‘Palô kena unteleja to. Mu dinda, neikale ku Musulu wa Nile. Ndaku kudiye umuambile ne: bu mudiye kayi mulekele bantu banyi bua baye, mâyi onso a mu musulu wa Nile neandamuke mashi.’ Mose wakatumikila, kuyaye kudi Palô. Palô uvua mutangile pavua Alona ututa dikombo pa musulu wa Nile ne mâyi andamuka mashi. Musulu wakatuadija kununka, mishipa kufuayi, ne kakuvua mâyi mimpe a kunua mu musulu wa Nile to. Palô wakatungunuka amu ne kubenga bua kulekela bena Isalele bua baye.

Matuku muanda mutekete pashishe, Yehowa wakatuma kabidi Mose kudi Palô ne mukenji eu ne: ‘Wewe kuyi mulekele bantu banyi bua baye, ndimba neyuwule mu Ejipitu tente.’ Alona wakela dikombo diende muulu, ndimba kutuadijayi kuwula mu buloba. Bantu bakapeta ndimba mu nzubu yabu, pa malalu abu, ne mu malongo abu. Ndimba ivua miaba yonso! Palô wakambila Mose bua alombe Yehowa bua imanyike tshipupu etshi. Palô wakalaya ne: uvua ne bua kulekela bena Isalele bua baye. Nunku Yehowa wakimanyika tshipupu atshi, ne bena Ejipitu bakunguija ndimba mifue mishiki ne mishiki. Buloba buakatuadija kununka. Kadi musangu eu kabidi Palô kakalekela bantu aba bua baye to.

Pashishe Yehowa wakambila Mose ne: ‘Alona udi ne bua kukuma dikombo diende mu buloba, ne lupuishi nelulue tumue, anyi tuishi tukese tudi tusumangana.’ Diakamue tumue tuakatampakana miaba yonso. Bamue bantu ba Palô bakamuambila ne: ‘Tshipupu etshi ntshia kudi Nzambi.’ Kadi Palô kavua anu mulekele bena Isalele bua baye to.