Pakaya bena Isalele mu tshimenga tshia Yeliko, bakasombela kua mukaji kampanda, diende Lahaba. Mukalenge wa Yeliko wakamanya bualu abu, ke kutumaye basalayi kua Lahaba. Lahaba wakasokoka batentekedi babidi abu ku tshisasa tshia nzubu, ne kutumaye basalayi kua tshianana. Wakambila batentekedi ne: ‘Nennuambuluishe bualu ndi mumanye ne: Yehowa udi nenu, ne nenutshimune buloba ebu. Nuenu mua kusua, njadikilayi ne: nenupandishe bena mu dîku dianyi.’

Batentekedi bakambila Lahaba ne: ‘Tudi tukujadikila ne: kabakuenzela muntu nansha umue wa mu nzubu muebe bibi to.’ Bakamuambila ne: ‘Suika muonji mukunze ku dididishi, nunku bena mu dîku diebe nebapanduke.’

Lahaba wakapuekeshila batentekedi aba ku dididishi ne muonji. Bakaya ku mikuna ne kusokomabu munkatshi mua matuku asatu kumpala kua kupinganabu kudi Yoshua. Pashishe bena Isalele bakasabuka musulu wa Yadene ne kudilongololabu bua kukuata buloba. Yeliko uvua tshimenga tshia kumpala tshivuabu batshimune. Yehowa wakabambila bua bende batshinyunguluka musangu umue ku dituku munkatshi mua matuku asambombo. Mu dituku dia muanda mutekete, bakatshinyunguluka misangu muanda mutekete. Pashishe bakuidi bakela mpungi, ne basalayi bakela lubila lukole ne muabu muonso. Bimanu bia tshimenga kupukabi! Kadi nzubu wa Lahaba uvua muibakilaku wakashala muimane. Lahaba ne bena mu dîku diabu bakapanduka bualu wakeyemena Yehowa.

Lumu lua Yeliko luakatangalaka mu bisamba bikuabu mu Kanâna. Bamfumu babu bakangata dipangadika dia kudisangisha bua kuluisha bena Isalele. Kadi bena Gibeona bakalua bobu ne tshipatshila tshikuabu. Bakaya kudi Yoshua bavuale bilamba bisunsuke, kumuambilabu ne: ‘Tudi bafume ku buloba bua kule. Tudi bumvue lumu lua Yehowa ne malu onso avuaye munuenzele mu Ejipitu ne mu Moaba. Tushindikila ne: kuakutuluisha to, nunku netulue bena mudimu benu.’

Yoshua wakitaba bivuabu bamuambile ne kulayaye bua kubenga kubaluisha. Matuku asatu pashishe, wakajingulula ne: kabavua bafume ku buloba bua kule to. Bavua ba mu buloba bua Kanâna. Ke Yoshua kuebeja bena Gibeona ne: ‘Bua tshinyi nuvua batushime?’ Bakandamuna ne: ‘Tuvua ne buôwa! Tudi bamanye ne: Yehowa Nzambi wenu udi unuluila mvita. Nuenu mua kusua kanutushipi to.’ Yoshua wakakumbaja tshivuaye mulaye, kubalekelaye ne muoyo.

Katupa kakese, bakalenge batanu bena Kanâna ne biluilu biabu bakalua bua kuluisha bena Gibeona. Yoshua ne tshiluilu tshiende bakenda butuku bujima bua kubasungila. Mvita yakatuadija patshiatshia pa dituku diakalonda. Bena Kanâna bakatuadija kunyema nseke yonso. Miaba yonso ivuabu banyema, Yehowa uvua ubalokeshila mabue manene a mvula. Ke Yoshua kulombaye Yehowa bua imanyike dîba. Bua tshinyi uvua mulombe Yehowa bua kuenza nanku pabi dîba kadivua dianji kuimana musangu mukuabu? Bualu Yoshua uvua mueyemene Yehowa. Dîba diakimana dituku dijima too ne pavua bena Isalele batshimune bakalenge bena Kanâna ne biluilu biabu.