Yoshua mumane kulombola bantu ba Yehowa munkatshi mua bidimu bia bungi, wakafua ne bidimu 110. Bidimu bia bungi patshivuaye ne muoyo, bena Isalele bavua batendelela Yehowa. Kadi pakafua Yoshua, bakatuadija kutendelela mpingu anu bu bena Kanâna. Bu muvua bena Isalele kabayi batungunuke ne kulonda Yehowa, wakalekela mukalenge wa bena Kanâna diende Yabina ubakoleshila nsombelu. Bena Isalele bakalomba Yehowa diambuluisha. Ke Yehowa kubapesha mulombodi mupiamupia, diende Balaka. Yeye ke uvua ne bua kuambuluisha bantu bua bapingane kudi Yehowa.

Debola, muprofete mukaji wakabikidisha Balaka. Uvua ne mukenji wa kudi Yehowa wa kumuambila wa ne: ‘Angata bantu balume binunu 10, uye nabu bua kutuilangana ne tshiluilu tshia Yabina ku kasulu ka Kishona. Neutshimune Sisela, mfumu wa tshiluilu tshia Yabina kuntu aku.’ Balaka wakambila Debola ne: ‘Nenye, kadi anu tuetu baye nebe.’ Debola wakamba ne: ‘Netuye nebe. Kadi umanye ne: ki nguewe washipa Sisela to. Yehowa mmuambe ne: muntu mukaji kampanda ke wamushipa.’

Debola wakabanda ne Balaka ne tshiluilu tshiende ku mukuna wa Tabô bua kudilongolola bua mvita. Diakamue pakumvua Sisela bualu abu, wakasangisha matempu ende a mvita ne biluilu biende muinshi mu tshibandabanda. Debola wakambila Balaka ne: ‘Lelu ndituku dikala Yehowa ne bua kukupesha ditshimuna.’ Balaka ne bantu bende binunu 10 bakatuadija kupueka mukuna bua kutuilangana ne tshiluilu tshia Sisela tshivua ne bukole.

Pashishe Yehowa wakenza bua kasulu ka Kishona kuwule ne mâyi. Matempu a mvita a Sisela akajama mu bitotshi. Sisela wakalekela ditempu diende ne kutuadijaye kunyema. Balaka ne basalayi bende bakatshimuna tshiluilu tshia Sisela, kadi Sisela wakapanduka! Wakanyema ne kuyaye kusokoma mu ntenta wa mukaji kampanda diende Yaele. Mukaji eu wakamupesha mabele a kunua, pashishe kumubuikidijaye mbulankete. Muluanganyi wa mvita uvua mutshioke eu wakalala tulu tukole. Pashishe Yaele wakasemena bitekete bitekete kudiye, yeye kumupopela mpopo wa ku ntenta ku mutu, yeye kufua.

Balaka wakalua bua kukeba Sisela. Yaele wakapatuka mu ntenta wende ne kuambaye ne: ‘Buela munemu, nenkuleje muntu uudi ukeba.’ Balaka wakabuela munda ne kumonaye Sisela mudiolole mufue. Balaka ne Debola bakimba misambu batumbisha Yehowa bua muvuaye muambuluishe bena Isalele bua kutshimuna bena lukuna babu. Bena Isalele bakasomba mu ditalala mu bidimu 40 biakalonda.

Tshikondo tshivua tshiyole tshia nzala mu Isalele, muena Isalele kampanda diende Naomi wakaya mu buloba bua Moaba ne bayende ne bana bende ba balume babidi. Pashishe bayende wa Naomi wakafua. Muanende wa balume umue wakasela Luta, mukuabu kusela Ôpa, bakaji bena Moaba. Bia dibungama, mu kupita kua matuku, bana ba Naomi aba bakafua.

Pakumvua Naomi ne: tshiyole tshia nzala tshivua tshijike mu Isalele, wakapangadija bua kupingana kuabu. Luta ne Ôpa bakenza nende luendu, kadi patshivuabu mu njila, Naomi wakabambila ne: ‘Nuvua bakaji ba bikadilu bimpe kudi bana banyi ne nuvua kabidi ne bikadilu bimpe kundi meme mamuenenu. Ndi musue bua banusele kabidi. Nunku pinganayi ku Moaba.’ Kadi bobu bakamuambila ne: ‘Tuetu tudi bakunange! Katuena basue kukushiya to.’ Naomi wakatungunuka ne kubambila bua baye. Ndekelu wa bionso, Ôpa wakaya, kadi Luta wakashala. Naomi wakamuambila ne: ‘Ôpa nyeye eu upingana mu tshisamba tshiabu ne kudi nzambi yabu. Pingana nende, uye ku nzubu kua mamuebe.’ Kadi Luta wakamuambila ne: ‘Tshiakukushiya to. Tshisamba tshienu netshikale tshisamba tshietu, ne Nzambi webe neikale Nzambi wanyi.’ Udi wela meji ne: Naomi uvua mua kuikala mudiumvue bishi bua mêyi a Luta aa?

Luta ne Naomi bakafika mu Isalele ku ntuadijilu kua dinowa dia orje. Dimue dituku, Luta wakaya bua kuangulula bishadile bia ntete mu budimi bua muntu kampanda diende Boaza, muana wa Lahaba. Boaza wakumvua ne: Luta uvua muena Moaba uvua mushale mulamate Naomi. Wakambila bena mudimu bende bua kushiya ndambu mukuabu wa ntete mu budimi bua Luta alue kuangulula.

Dilolo adi, Naomi wakebeja Luta ne: ‘Uvua muangulule ntete mu budimi bua nganyi lelu?’ Luta wakandamuna ne: ‘Mu budimi bua muntu kampanda diende Boaza.’ Naomi wakamuambila ne: ‘Boaza mmulela wa bayanyi. Tungunuka kuangulula ntete mu budimi buende abu pamue ne bakaji bakuabu. Newikale mu bukubi muntu amu.’

Luta wakatungunuka ne kuangulula ntete mu budimi bua Boaza too ne pakajika dinowa. Boaza wakamona muvua Luta muenze mudimu mukole, kabidi ne muvuaye mukaji wa bikadilu bilenga. Tshikondo atshi, mulume yeye mufue kayi muanji kulela, mulela wende uvua ne bua kusela mukajende. Nunku Boaza wakasela Luta. Bakalela muana wa balume, kumuinyikabu ne: Obeda, wakalua nkambua wa mukalenge Davidi. Balunda ba Naomi bakasanka bikole. Bakamba ne: ‘Kumpala Yehowa uvua mukupeshe Luta uvua mukuenzele malu mimpe, kadi mpindieu mmukupeshe muikulu. Yehowa atumbishibue.’