Pakapita matuku, bena Isalele bakela kabidi Yehowa nyima, bobu kutuadija kutendelela nzambi ya dishima. Munkatshi mua bidimu muanda mutekete, bena Midiyana bavua banyenga bena Isalele bimuna biabu ne banyangakaja bia pa madimi. Bena Isalele bavua banyemena mu nyongolo ne ku mikuna bua kusokoma bena Midiyana. Bakalomba Yehowa bua abapandishe. Nunku Yehowa wakatuma muanjelu kudi nsongalume mukuabu dîna diende Gideona. Muanjelu wakamuambila ne: ‘Yehowa mmukusungule bua wikale tshilobo tshia mvita.’ Gideona wakamuebeja ne: ‘Ndi mua kupandisha Isalele mushindu kayi? Meme ndi muntu wa patupu.’

Mmushindu kayi uvua Gideona mua kumanya ne: Yehowa uvua mumusungule? Wakateka miosa ya mikoko panshi, kuambilaye Yehowa ne: ‘Biobi bienzeke ne: mu dinda miosa ya mikoko eyi mmibole ne lumuma kadi panshi ponso pume, nemmanye ne: udi musue bua mpandishe bena Isalele.’ Bualu bua dikema, mu dinda miosa ya mikoko ivua ne lumuma, kadi buloba buobu buvua bume! Kadi Gideona wakalomba kabidi bua ne: mu dinda divua dilonda, miosa ya mikoko ikale miume kadi buloba buikale buobu ne lumuma. Pavua bualu abu buenzeke, Gideona wakashisha kutuishibua ne: Yehowa uvua mumusungule. Ke yeye kusangisha basalayi bende bua kuya kuluangana ne bena Midiyana.

Yehowa wakambila Gideona ne: ‘Nengenze bua bena Isalele batshimune. Kadi bu muudi ne basalayi ba bungi menemene, nudi mua kuela meji ne: nudi batshimune mvita ku bukole buenu nuenu nkayenu. Ambila muntu yonso udi ne buôwa apingane kuende.’ Nunku basalayi binunu 22 bakapingana ku mabu, basalayi binunu 10 kushalabu. Pashishe Yehowa wakamba ne: ‘Kutshidi anu basalayi ba bungi menemene. Ndaku nabu ku kasulu ka mâyi, ubambile bua banue mâyi. Neulame anu basalayi badi banua mâyi eku benda batangila baluishi.’ Anu basalayi 300 ke bavua banua mâyi benda bakenzakana. Yehowa wakalaya ne: basalayi bakese aba ke bavua ne bua kutshimuna basalayi binunu 135 ba bena Midiyana.

Butuku abu, Yehowa wakambila Gideona ne: ‘Dîba dia kuluangana ne bena Midiyana diakumbanyi!’ Gideona wakapesha basalayi bende mpungi ya nsengu ne milondo minene mikale ne bimunyi bisokoka munda muayi. Wakabambila ne: ‘Ntangilayi, ne nuenze anu mundi ngenza.’ Gideona wakela mpungi, kutayishaye mulondo wende, kukupakajaye tshimunyi tshiende muulu, ne kuelaye dîyi dikole wamba ne: ‘Muele wa mvita wa Yehowa ne wa Gideona!’ Basalayi bende bonso 300 bakenza pabu nanku. Bena Midiyana bakumvua buôwa kutuadijabu kunyemakana nseke yonso mbilu ya dikema. Mu tshimvundu atshi, bakatuadija kushipangana bobu nkayabu. Musangu eu kabidi, Yehowa wakambuluisha bena Isalele bua kutshimunabu baluishi babu.

Muena Isalele kampanda dîna diende Elekana uvua ne bakaji babidi, Hana ne Penina, kadi uvua munange Hana bikole. Penina uvua useka Hana misangu yonso bualu Hana kavua ne bana to, kadi Penina yeye uvua ne bana ba bungi. Tshidimu tshionso, Elekana uvua uya ne dîku diende bua kutendelela ku ntenta wa tshitendelelu ku Shilo. Musangu mukuabu pavuabu kuntu aku, wakamona ne: mukajende Hana uvuaye munange uvua mubungame bikole. Wakamuambila ne: ‘Hana wanyi, kudidi to. Meme ndi nebe. Ndi mukunange.’

Panyima pa matuku, Hana wakadiyila nkayende bua kusambila. Uvua udila anu kudila pavuaye usengelela Yehowa bua amuambuluishe. Wakamulaya ne: ‘Yehowa, wewe mumpeshe muana wa balume, nenkupeshaye, ne neakuenzele mudimu matuku ende onso a muoyo.’

Muakuidi Munene Eli wakamona Hana ushikunkila, kuelaye meji ne: uvua mukuatshike. Hana wakamuandamuna ne: ‘Tòo, mukalenge wanyi, tshiena mukuatshike to. Ndi ne bualu budi buntonde, ndi mbuambila Yehowa.’ Eli wakalua kumona ne: uvua muele meji bibi, kumuambilaye ne: ‘Nzambi akupeshe tshiudi ukeba.’ Hana wakadiumvua musulakane, kualukilaye. Tshidimu tshijima katshiyi tshianji kukumbana, wakapeta muana wa balume, kumuinyikaye ne: Samuele. Anji fuanyikijabi, Hana uvua mua kuikala ne disanka bungi kayi?

Hana kavua mupue bualu buvuaye mulaye Yehowa muoyo to. Diakamue pavuaye mulekeshe Samuele dibele, wakaya nende bua enze mudimu ku ntenta wa tshitendelelu. Kuambilaye Eli ne: ‘Muana wa balume umvua mulombe Yehowa nyeye eu. Ndi mmusombeshaye matuku ende onso a muoyo.’ Elekana ne Hana bavua baya kutangila Samuele tshidimu tshionso, bamutuadila muzabi mupiamupia wa kawuyi maboko. Yehowa wakapesha Hana bana bakuabu basatu ba balume ne ba bakaji babidi.