Bulengele bua mu mutshima budi ne mushinga udi kauyi ujimina

MUENA KRISTO MUKUABU MUKULAKAJE WA LULAMATU WAKAMBA NE: “BANSONGALUME BATU BABUEJAKAJA BULENGELE BUA MPALA NE NGIKADILU MUIMPE.”

Bulelela, bidimu bikadi bipite bungi bidi bantu bangata bulengele bua mpala ne mushinga munekesha, ne misangu mivule bitu bibafikisha ku dipepeja ngikadilu mimpe ya mu mutshima. Pabi, Mufuki wetu yeye utu utangila mudi mu mitshima yetu, nansha tuetu bikale ne mibidi ya mushindu kayi. Etshi ntshilejilu tshimpe tshitambe tshidiye utuleja, tshia mushindu muimpe wa kumona malu. Bible udi uleja muakamba Nzambi nkayende ne: “Yehowa kena utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima.”​—1 Samuele 16:7.

Bulengele bua mpala bua bushuwa mbua kudi Nzambi, ne Dîyi diende didi dileja se: bua muntu kuikalaye ne mushinga wa bungi, udi nangananga ne bua kuikala ne ngikadilu mimpe ya mu nyuma. Bible udi wamba ne: “Bulenga bua mpala budi bushima. Buimpe bua kuisu budi tshianana. Mukaji udi utshina [Yehowa] ke wa kutumbisha!” (Nsumuinu 31:30, MMM) Bushuwa, bulenga bua mpala budi mua kusokoka bubi bua mu mutshima wa muntu. (Esetê 1:10-12; Nsumuinu 11:22) Nansha mudi bulenga bua mpala mua kujimina mu bungi bua matuku, bulenga bua mu mutshima, mmumue ne: ngikadilu mimpe ya muntu, budi buobu mua kutungunuka, kushala kashidi.

Nanku mbitambe buimpe bua kuikala ne ngikadilu bu mudi: dinanga, disanka, ditalala, lutulu, bulenga, buimpe, ditabuja, bupole-malu ne didikanda. (Galatia 5:22, 23) Mushindu’eu ke utudi mua kupeta bulengele bua mu mutshima budi buobu ne mushinga wa bungi.​—1 Petelo 3:3, 4.

Udi musue balue kukutangila anyi?

Nansha mudi malu manyanguke lelu, udi mua kupeta disanka didi difumina ku dimanya dijalame didi Bible ufila pa bidi bitangila Nzambi, Bukalenge buende ne malu malenga adiye mulongoluele bantu. Biwikala musue kumanya malu makuabu anyi musue balue kukutangila bua kulonga nebe Bible kuyi ufuta mfranga, udi mua kuebeja Bantemu ba muaba uudi peshi kufundila Association “Les Témoins de Jéhovah”, B.P. 634 Limete, Kinshasa, République démocratique du Congo.