Bena Isalele bakalekela kabidi Yehowa ne kutuadijabu kutendelela nzambi ya dishima. Pavua bena Amona balue kubunda bena Isalele bua kubaluisha, nzambi ya dishima eyi kayakabambuluisha to. Bena Isalele bakakenga munda mua bidimu bia bungi. Ndekelu wa bionso bakambila Yehowa ne: ‘Tudi benze mpekatu. Bua luse tusungilaku mu bianza bia bena lukuna betu.’ Bena Isalele bakanyangakaja mpingu yabu ne kutuadijabu kutendelela Yehowa kabidi. Yehowa kavua musue kubamona batungunuka ne kukenga to.

Bakasungula Yefeta tshilobo tshia mvita kampanda bua kulombola bantu mu mvita bua kuluangana ne bena Amona. Wakambila Yehowa ne: ‘Wewe mutuambuluishe mu mvita eyi, ndi nkulaya ne: pandi ngalukila kumbelu, nenkupeshe muntu wa kumpala wa mu nzubu muanyi walua bua kusambakena nanyi.’ Yehowa wakateleja disambila dia Yefeta, kumuambuluishaye bua kutshimuna mvita.

Pavua Yefeta mualukile kumbelu, muntu wa kumpala uvua mulue kusambakena nende uvua muanende wa bakaji, umuepele mulela. Uvua wenda uja maja wimba ngoma. Yefeta uvua mua kuenza tshinyi? Wakavuluka mulayi wende, kuambaye ne: ‘Aka! Muananyi wa bakaji, udi munyingalaje muoyo wanyi. Mvua mulaye Yehowa. Bua kukumbaja mulayi eu, ndi ne bua kukutuma bua kumuenzela mudimu ku ntenta wa tshitendelelu mu Shilo.’ Kadi muanende wakamuambila ne: ‘Tatu, biwikala uvua mulaye Yehowa bualu, udi ne bua kubukumbaja. Tshindi ndomba ntshia ne: ngenza koku ngondo ibidi ku mikuna ne balunda banyi ba bakaji. Pashishe nenye.’ Muana wa Yefeta wakenza mudimu ku ntenta wa tshitendelelu ne lulamatu luonso bua matuku ende onso a muoyo. Tshidimu tshionso balunda bende bavua baya ku Shilo bua kumumona.

Muakuidi Munene Eli uvua ne bana ba balume babidi bavua benza mudimu wa buakuidi ku ntenta wa tshitendelelu. Dia umue divua Hofeni ne dia mukuabu Pinehasa. Kabavua batumikila mikenji ya Yehowa to, ne bavua benzela bena mu tshisamba tshiabu malu mabi menemene. Pavua bena Isalele batumina Yehowa milambu, Hofeni ne Pinehasa bavua badiangatshila minyinyi ya mimpe menemene. Eli uvua mumvue bivua bana bende benza abi, kadi kakenza bualu nansha bumue to. Yehowa uvua mua kulekela malu a nunku enda anu enzeka anyi?

Nansha muvua Samuele muana bikole kudi Hofeni ne Pinehasa, kakalonda dikasa diabu to. Samuele uvua usankisha Yehowa bikole. Dikutu dikuabu pavua Samuele mulale butuku, wakumvua muntu umubikila. Yeye kujuka, kuyaye kudi Eli lubilu, kuambaye ne: ‘Mmeme eu!’ Kadi Eli wakamuambila ne: ‘Tshiena mukubikile to. Pingana ulale.’ Samuele wakapingana bua kulala. Pashishe bakamubikila kabidi. Pakumvua Samuele muntu umubikila musangu muisatu, Eli wakashisha kujingulula ne: Yehowa ke uvua ubikila Samuele. Nanku wakambila Samuele ne: wewe mumvue muntu mukubikile kabidi, wambe ne: ‘Akula Yehowa. Muena mudimu webe udi uteleja.’

Samuele wakapingana bua kulala. Pashishe wakumvua muntu umubikila: ‘Samuele! Samuele!’ Kuandamunaye ne: ‘Akula, bualu muena mudimu webe udi uteleja.’ Yehowa kumuambila ne: ‘Ambila Eli ne: ndi mmupesha dinyoka yeye ne dîku diende. Mmumanye ne: bana bende badi benza malu mabi ku ntenta wanyi wa tshitendelelu, kadi kena wenza bualu nansha bumue to.’ Mu dinda, Samuele wakakangula biibi bia ku ntenta wa tshitendelelu anu muvuaye wenza pa tshibidilu. Uvua utshina bua kuambila muakuidi munene tshivua Yehowa muambe. Kadi Eli wakamubikidisha, kumukonkaye ne: ‘Muananyi, Yehowa mmukuambile tshinyi? Ngambile malu onso.’ Ke Samuele kuambila Eli malu onso.

Pavua Samuele wenda ukola, Yehowa uvua anu nende. Bena Isalele bonso ba nseke yonso ya tshisamba tshijima bavua bamanye ne: Yehowa uvua musungule Samuele bua ikale muprofete ne mulumbuluishi.