Yehowa wakambila Samuele ne: ‘Ndaku ku nzubu kua Yishai. Umue wa ku bana bende ba balume ke walua mukalenge wa Isalele.’ Nunku Samuele wakaya kua Yishai. Pakamonaye muanende muanabute, wakadiambila ne: ‘Nsongalume eu ke yeye.’ Kadi Yehowa wakambila Samuele ne: ki nyeye to. Yehowa wakamba kabidi ne: ‘Meme ndi mmona tshidi mu muoyo wa muntu, kadi ki nganu tshimuenekelu tshiende to.’

Yishai wakatuadila Samuele bana bende bakuabu basambombo. Kadi Samuele wakamba ne: ‘Yehowa ki mmusungule nansha umue wa kudibu to. Udiku ne bana bakuabu anyi?’ Ke Yishai kumuambila ne: ‘Ndi ne muana mukuabu, wanyi wa mukala, diende n’Davidi. Udi pambelu udisha mikoko yanyi.’ Pakabuela Davidi mu nzubu, Yehowa wakambila Samuele ne: ‘nyeye au!’ Ke Samuele kupongoluela Davidi manyi pa mutu, kumuelaye manyi bua alue mukalenge wa Isalele.

Panyima pa matuku, bena Isalele kuyabu kuluangana ne bena Peleshete bavua ne tshilobo tshia mvita tshivuabu babikila ne: Goleyata, tshivua tshibaluila mvita. Goleyata uvua uyobola bena Isalele ku dituku ne ku dituku. Kuelaye lubila wamba ne: ‘Ntuminayi muntu tuluangane nende. Yeye muntshimune, netulue bapika benu. Kadi meme mumutshimune, nuenu nenulue bapika betu.’

Davidi wakaya ku tshitudilu tshia basalayi ba bena Isalele bua kupesha bana babu ba balume bavua basalayi biakudia. Kumvuaye bivua Goleyata wamba, ke yeye kuamba ne: ‘Meme ndi nya kuluangana nende!’ Mukalenge Shaula kumuambilaye ne: ‘Kadi si utshidi muana mutekete.’ Davidi kumuandamuna ne: ‘Yehowa neangambuluishe.’

Shaula wakapesha Davidi bia mvita biende bua abivuale, kadi Davidi wakamuambila ne: ‘Tshiena nkumbana bua kuluangana muvuale bia mvita ebi to.’ Davidi wakangata ndundu wende wa kukupa nende mabue, kupuekaye ku musulu. Kusungulaye mabue atanu mafinunuke ne kuelaye mu nsapu wende. Pashishe Davidi kunyema mutangile kudi Goleyata. Tshilobo atshi tshiakamuela lubila ne: ‘Luila apa muana wetu. Nendishe nyunyi ya muulu ne nyama ya tshisuku munyinyi webe.’ Kadi Davidi kakumvua buôwa to. Wakamuela pende dîyi ne: ‘Wewe udi ulua kundi ne muele ne difuma, kadi meme ndi ndua kuudi mu dîna dia Yehowa. Kuena utuluisha tuetu to, kadi udi uluisha Nzambi. Muntu yonso udi muaba eu neamone ne: Yehowa udi ne bukole bua bungi kupita muele anyi difuma. Neakufile wewe mujima mu bianza bietu.’

Davidi wakangata dibue, kudielaye mu ndundu wende, ne kudikupaye ne bukole buende buonso. Yehowa wakamuambuluisha, ke dibue edi kupatukadi ne kututadi Goleyata mu mpala wende. Tshilobo tshiakadishinda, kufuatshi. Ke bena Peleshete kunyemabu bua kababashipi to. Utuku weyemena Yehowa anu bu Davidi anyi?

Panyima pa Davidi mumane kushipa Goleyata, mukalenge Shaula wakamuteka ku mutu kua tshiluilu tshiende. Davidi wakatshimuna mvita ya bungi, kumanyikaye bikole. Dîba dionso divua Davidi upingana ufumina ku mvita, bantu bakaji bavua bapatuka benda baja maja bimba ne: ‘Shaula mmushipe binunu, kadi Davidi yeye mmushipe makumi a binunu!’ Shaula wakumvuila Davidi mukawu, kujingaye bua kumushipa.

Davidi uvua mumanye kuimba lunzenze bimpe menemene. Dituku dikuabu pavuaye wimbila Shaula lunzenze, Shaula wakamukupa difuma. Davidi wakepela difuma diakamue, kuasadi mu tshimanu. Pashishe, Shaula wakakeba bua kumushipa misangu mikuabu ya bungi. Ndekelu wa bionso Davidi wakanyema, kuyaye kusokoma mu tshipela.

Shaula wakangata basalayi 3 000, kuyaye wenda ukeba Davidi. Yeye kubuela anu mu nyongolo muvua Davidi ne bantu bende basokome. Bantu ba Davidi kumuambilabu ku ditshi ne: ‘Eu ke mpunga wa wewe kushipa Shaula.’ Davidi kubembela Shaula, kukosaye luzembe lua muzabi wende. Shaula kavua mumanye to. Pashishe Davidi wakumvua bibi menemene bua muvuaye kayi munemeke mukalenge uvua Yehowa muele manyi eu. Kakanyishila bantu bende bua kuluishabu Shaula nansha. Kuelaye mene Shaula lubila wamba ne: uvua mua kuikala mumushipe pavuaye mupete mpunga apu. Shaula uvuaku mushintulule mushindu wende wa kumona Davidi anyi?

Tòo. Shaula wakatungunuka ne kukeba Davidi. Butuku bukuabu, Davidi ne Abishai muana wa muanabu bakabuela mu tshitudilu tshia Shaula bitekete bitekete. Nansha Abinê mulami wa Shaula uvua pende mulale. Ke Abishai kuamba ne: ‘Eu ke mpunga muimpe! Ndekela mmushipe.’ Davidi wakamuandamuna ne: ‘Yehowa neatangile bualu buende. Tuangate anu difuma diende ne dibungu diende dia mâyi tuye.’

Davidi wakabanda pa mukuna uvua pabuipi uvua mutangilangane ne tshitudilu tshia Shaula. Wakela dîyi ne: ‘Abinê bua tshinyi kuvua mulame mukalenge webe? Dibungu dia mâyi ne difuma dia Shaula biepi?’ Shaula wakajingulula ne: dîyi adi divua dia Davidi, ke kuambaye ne: ‘Uvua ne mpunga wa kunshipa, kadi kuena munshipe to. Ndi mumanye ne: newikale mukalenge wa Isalele.’ Ke Shaula kupingana kuende. Kadi ki mbena mu dîku diende bonso bavua bakine Davidi to.