Yonatana muanabute wa Shaula uvua muena mvita wa dikima. Davidi wakamba ne: Yonatana uvua ne lubilu mupite nyunyi wa mukanku ne uvua ne bukole mupite nyama wa ntambue. Dituku dikuabu Yonatana wakamona basalayi 20 ba bena Peleshete pa mukuna. Ke yeye kuambila mumuambuidi wa bia mvita ne: ‘Netubele mvita anu Yehowa yeye mutupe tshimanyinu kampanda. Bena Peleshete bobu batubikile, apu netubabunde.’ Bena Peleshete bakela lubila ne: ‘Luayi tuluangane!’ Nunku balume babidi abu bakabanda ku mukuna, kutshimunabu basalayi abu.

Bu muvua Yonatana muanabute wa Shaula, yeye ke uvua ne bua kumupingana mu bukalenge. Kadi Yonatana uvua mumanye ne: Yehowa uvua musungule Davidi bua kuluaye mukalenge wa Isalele; nansha nanku kavua mumumvuile mukawu to. Yonatana ne Davidi bakalua balunda ba dikema! Bakalayangana bua kukubangana ne kuakuilangana. Yonatana wakapesha Davidi muzabi wende, muele wa mvita, difuma ne mukaba wende bu tshimanyinu tshia bulunda buabu.

Pavua Davidi wenda unyema Shaula, Yonatana wakamulonda, kumuambilaye ne: ‘Ikala mukole, wikale ne dikima. Yehowa mmukusungule bua wikale mukalenge. Nansha tatu mmumanye nanku.’ Udi musue pebe kuikala ne mulunda muimpe bu Yonatana anyi?

Misangu ya bungi Yonatana uvua uteka muoyo wende mu njiwu bua kuambuluisha mulunda wende. Uvua mumanye ne: mukalenge Shaula uvua ukeba kushipa Davidi, ke yeye kuambila tatuende ne: ‘Wewe mushipe Davidi netshikale mpekatu; ki mmuenze bualu bubi nansha bumue to.’ Shaula wakafiikila Yonatana munda. Bidimu ndambu pashishe, Shaula ne Yonatana bakafua pamue mu mvita.

Yonatana mumane kufua, Davidi wakakeba Mefibosheta muanende. Pakatuilangana Davidi ne Mefibosheta, wakamuambila ne: ‘Bu muvua tatuebe mulunda wanyi wa pa muoyo, nenkutabalele matuku ebe onso a muoyo. Neusombele mu dibalasa dianyi ne neudie ku mêsa anyi.’ Davidi kakapua mulunda wende Yonatana muoyo to.

Pakafua Shaula, Davidi wakalua mukalenge. Uvua ne bidimu 30. Pakavuaye ne ndambu wa bidimu mu bukalenge, butuku kampanda pavuaye kuulu kua dibalasa diende, wakamona mukaji mukuabu muimpe kumona. Bakambila Davidi ne: dîna diende divua Beta-sheba ne uvua mukaji wa musalayi kampanda diende Uliya. Davidi wakabikidisha Beta-sheba kuende. Yeye kulala nende, Beta-sheba kuimitaye. Davidi wakajinga kusokoka tshivuaye muenze atshi. Kuambilaye mfumu wa basalayi bende bua bateke Uliya mu mulongo wa kumpala mu mvita, ne bamushiye bapingane panyima. Pakashipabu Uliya mu mvita, Davidi wakasela Beta-sheba.

Kadi Yehowa uvua mumone malu mabi onso avua menzeke au. Wakenza tshinyi? Yehowa wakatuma muprofete Natana kudi Davidi. Natana kumuambila ne: ‘Muntu mubanji kampanda uvua ne mikoko ya bungi, ne muntu mupele uvua anu ne kana ka mukoko kamue kavuaye munange bikole. Muntu mubanji wakangata kana kamue ka mukoko ka mupele aku.’ Davidi wakafiika munda, kuambaye ne: ‘Muntu mubanji au mmukumbanyine lufu!’ Natana kumuambila ne: ‘Muntu mubanji au nguewe!’ Biakatonda Davidi bikole, yeye kuambila Natana ne: ‘Ndi muenzele Yehowa mpekatu.’ Davidi ne bena mu dîku diende bakapeta ntatu ya bungi bua mpekatu wende au. Yehowa wakanyoka Davidi, kadi wakamuanyishila bua kushala ne muoyo bualu uvua muena bululame ne budipuekeshi.

Davidi uvua musue kuibakila Yehowa ntempelo, kadi Yehowa wakasungula muanende Solomo bua kuibaka ntempelo au. Davidi wakatuadija kulongoluela Solomo bintu wamba ne: ‘Mbimpe ntempelo wa Yehowa ikale muimpe mutambe. Solomo utshidi muana, kadi nemmuambuluishe bua apete bintu bionso bidi bikengedibua.’ Davidi wakafila makuta ende a bungi bua mudimu wa dibaka au. Kukebayi benji ba mudimu bapiluke. Wakasangisha or ne arjan, ne kulombeshaye mitshi ya sedre ku Tulo ne ku Sidona. Pakavua Davidi pa kufua, wakaleja Solomo mua kuibaka ntempelo. Wakamba ne: ‘Yehowa mmungambile bua nkufundile malu aa. Yehowa neakuambuluishe. Kuikadi ne buôwa to. Ikala mukole, utuadije mudimu.’