Bukalenge bua bisa dikumi bia Isalele buvua ne bakalenge babi ba bungi, kadi Ahaba uvua umue wa ku bavua babi menemene. Wakasela mukaji mubi uvua utendelela Bâla. Dîna diende divua Yezabele. Ahaba ne Yezabele bavua buwuje Isalele mujima ne ntendelelu wa Bâla ne bashipe baprofete ba Yehowa. Yehowa wakenza tshinyi? Wakatuma muprofete Eliya bua kuambila Ahaba bualu kampanda.

Eliya wakambila mukalenge Ahaba ne: bu muvuaye wenza malu mabi, mvula kavua ne bua kuloka mu Isalele to. Bidimu bipite pa bisatu, biakudia kabiakatoloka to; ne bantu bavua ne nzala. Pashishe Yehowa wakatuma kabidi Eliya kudi Ahaba. Mukalenge Ahaba kumuambila ne: ‘Wewe udi mukebeshi wa bimvundu! Ke buebe bubi abu.’ Eliya kumuandamuna ne: ‘Ki mmeme udi mukebeshe minanga eyi to. Wewe ke udi muyikebeshe bua ditendelela diebe dia Bâla. Tuenze diteta. Sangisha bantu ne baprofete ba Bâla pa lusongo lua mukuna wa Kâmele.’

Bantu bakadisangisha pa mukuna. Eliya kuamba ne: ‘Akajayi meji enu. Bikala Yehowa ke Nzambi mulelela, numulonde. Bikalabi ne: m’Bâla, mulondayi. Ndi ngela diteta edi: Baprofete 450 ba Bâla balongolole mulambu, babikile nzambi wabu; meme panyi nendongolole mulambu ne nembikile Yehowa. Nzambi wandamuna ne kapia, ke Nzambi mulelela.’ Bantu bakitaba.

Baprofete ba Bâla bakalongolola mulambu. Kubikilabu nzambi wabu dituku dijima bamba ne: ‘Bâla wetu tuandamune!’ Bu muvuaye kayi mubandamune, Eliya wakatuadija kuseka Bâla wamba ne: ‘Mubikilayi ne dîyi dikole. Pamuapa mmulale, bikengela muntu amubishe.’ Baprofete ba Bâla bakatungunuka ne kumubikila too ne ku dilolo. Kadi kavua anu mubandamune to.

Eliya wakateka mulambu wende pa tshioshelu, kuelaye mâyi pa tshioshelu tshijima. Kusambilaye wamba ne: ‘Yehowa wanyi, enzaku bua bantu aba bamanye ne: wewe udi Nzambi mulelela.’ Musangu umue Yehowa kutuma kapia kafumina mu diulu bua kuosha mulambu. Bantu bakela mbila ne: ‘Yehowa ke Nzambi mulelela!’ Eliya kuamba ne: ‘Kanulekedi baprofete ba Bâla banyema to!’ Dituku adi, bakashipa baprofete ba Bâla 450.

Pakamona Eliya kaditutu kakese pa mutu pa mbuu, wakambila Ahaba ne: ‘Mvula mukole ukadi pa kuloka. Longolola ditempu diebe, upingane kuebe.’ Matutu akafiikisha kuulu, lupepele kututa, ne mvula mukole kutuadija kuloka. Ndekelu wa bionso minanga yakajika. Ahaba wakaya lubilu lukole ne ditempu diende. Yehowa wakambuluisha Eliya bua kunyema bikole kupita ditempu adi! Kadi ntatu ya Eliya yonso ivuaku mijike anyi? Tumonayi.

Pakumvua Yezabele tshivua tshifikile baprofete ba Bâla, wakafiika munda bikole. Yeye kutumina Eliya mukenji ne: ‘Malaba neufue anu mudi baprofete ba Bâla bafue.’ Eliya wakumvua buôwa bua bungi, kunyemenaye mu tshipela. Wakasambila ne: ‘Yehowa, tshiena musue kabidi kuikala ne muoyo to. Mfue nansha kufua.’ Bu muvua Eliya mutshioke bikole, wakalala muinshi mua mutshi.

Muanjelu mukuabu kuluaye kumubisha umuambila ne bulenga buonso ne: ‘Juka udie.’ Eliya kumona diampa dia tshijengu pa mabue a kapia, ne mulondo wa mâyi. Yeye kudia, kunua, kulalaye kabidi. Muanjelu au kumubisha kabidi wamba ne: ‘Diaku. Mbimpe upete bukole bua kuenza luendu.’ Ke Eliya kudia kabidi. Pashishe kuenzaye luendu lua matuku 40, munya ne butuku, too ne ku mukuna wa Holeba. Kuntu aku, Eliya wakabuela mu nyongolo bua kulala. Kadi Yehowa wakayukila nende wamba ne: ‘Eliya, udi wenza tshinyi muaba eu?’ Eliya kumuandamuna ne: ‘Bena Isalele mbabenge kukumbaja tshivuabu bakulaye. Mbupule bioshelu biebe ne mbashipe baprofete bebe. Mpindieu badi bakeba kunshipa panyi.’

Yehowa wakamuambila ne: ‘Ndaku wimane pa mukuna.’ Tshia kumpala, lupepele lukole luakadituta ku nyongolo. Tshibidi, buloba buakakanka bikole, pashishe kapia kutema. Ndekelu wa bionso, Eliya wakumvua dîyi ditekete dia panshi panshi. Yeye kudijika muzabi wende ku mêsu, kupatukaye mu nyongolo. Pashishe Yehowa kumuebeja bua tshinyi uvua munyeme. Eliya wakamuambila ne: ‘Anu meme nkayanyi ke udi mushale.’ Kadi Yehowa wakamuambila ne: ‘Kuena nkayebe to. Kudi bantu 7 000 mu Isalele batshidi bantendelela. Ndaku uteke Elisha muprofete pa muaba webe.’ Diakamue Eliya wakaya kuenza tshivua Yehowa mumuambile. Kuenaku umona ne: wewe wenza tshidi Yehowa ukulomba bua kuenza neakuambuluishe pebe anyi? Eyowa, neakuambuluishe. Tumone bualu buvua buenzeke pavuaku minanga.