Pavuaku minanga, Yehowa wakambila Eliya ne: ‘Ndaku ku Salefata. Mukaji mukamba udi kuntuaku neakupeshe biakudia.’ Pakafika Eliya ku tshibuelelu tshia tshimenga wakamona mukaji mukamba mupele wangula nkunyi. Yeye kumulomba dikopo dia mâyi. Pavuaye uya bua kumuangatshila mâyi, Eliya wakamubikila wamba ne: ‘Ntuadila koku tshipese tshia diampa.’ Kadi mukaji mukamba au wakamuambila ne: ‘Tshiena ne diampa nansha dimue dia kukupesha to. Ndi anu ne ndambu wa bukula ne ndambu wa mafuta bua kulamba biakudia bikese bianyi ne muananyi.’ Kadi Eliya wakamuambila ne: ‘Yehowa mmulaye ne: wewe mungenzele diampa, bukula buebe ne mafuta biudi nabi kabiakujika too ne paloka mvula kabidi.’

Ke mukaji mukamba au kuya kuende, kuenzelaye muprofete wa Yehowa diampa. Anu mukavua Yehowa mulaye, mukaji mukamba au ne muanende bavua anu ne biakudia mu tshikondo tshia minanga atshi. Dibungu diende dia bukula ne dia mafuta bivua anu tente.

Pashishe bualu bua dikema buakenzeka. Muana wa mukaji mukamba au wakatuadija kusama bikole, kufuaye. Mamu au kusengelelaye Eliya bua amuambuluishe. Eliya kuangata muana mu maboko ende, kubandaye nende ku nzubu wa kuulu. Yeye kumuladika pa bulalu, kusambilaye ne: ‘Yehowa, pingaja koku muoyo wa muana eu.’ Udi mumanye bua tshinyi bualu buvua Eliya ulomba Yehowa bua kuenza abu buvua bua dikema anyi? Bualu anu mutudi bamanye, tshikondo atshi kakuvua muntu nansha umue ukavua mubike ku lufu to. Kabidi, mamu au ne muanende kabavua bena Isalele to.

Muoyo wa muana wakapingana, kutuadijaye kueyela! Eliya wakambila mukaji mukamba ne: ‘Tangila! Muanebe nyeye eu ne muoyo.’ Mamu au wakasanka bikole, kuambilaye Eliya ne: ‘Udi bushuwa muntu wa Nzambi. Ndi ngamba nanku bualu udi wamba malu anu adi Yehowa ukuambila bua kuamba.’

Mukalenge Ahaba uvua umuenena budimi kampanda bua tumuma tua mvinyo pa dididishi dia dibalasa diende divua mu Yizelele. Budimi abu buvua bua Nabota. Ahaba uvua ujinga kupeta budimi ebu, ne uvua ukeba bua Nabota amusumbishabu. Kadi Nabota wakabenga kumusumbishabu bualu kuvua mukenji wa Yehowa uvua ukandika kusumbisha buloba buvua muntu mupiane. Ahaba uvuaku munemeke Nabota bua bualu buimpe buvuaye muenze ebu anyi? Tòo. Ahaba wakafika munda bikole. Bivua bimutonde bikole, kupangaye mua kujuka pa bulalu, kubengaye too ne bua kudia.

Yezabele mukaji wa Ahaba uvua mukalenge mukaji mubi wakamuambila ne: ‘Wewe udi mukalenge wa Isalele. Udi mua kupeta tshintu tshionso tshiudi musue. Nenkupetele budimi abu.’ Wakafundila bakulu ba mu tshimenga mikanda, ubambila bua bafunde Nabota bua mudiye muele Nzambi mulawu, ne bamushipe ne mabue. Bakulu bakenza tshivua Yezabele mubambile, pashishe Yezabele wakambila Ahaba ne: ‘Nabota ukadi mufue. Budimi bukadi buebe.’

Yezabele ukavua mushipe kabidi bantu ba bungi bavua kabayi ne bualu, kavua mushipe anu Nabota to. Uvua mushipe bantu ba bungi bavua banange Yehowa. Uvua utendelela mpingu ne wenza malu mabi makuabu. Yehowa uvua umona malu mabi onso avua Yezabele wenza. Uvua mua kuenza nende tshinyi?

Ahaba wakafua; pakapita bidimu muanende Yeholama wakalua mukalenge. Yehowa wakatuma muntu mukuabu dîna diende Yehu bua kupesha Yezabele ne bena mu dîku diende dinyoka.

Yehu wakabanda mu ditempu diende mutangile ku Yizelele, muaba uvua Yezabele musombele. Yeholama wakalua pende mu ditempu bua kusambakena ne Yehu, kumuebejaye ne: ‘Kudi ditalala pankatshi petu anyi?’ Yehu wakamuandamuna ne: ‘Kakuena mua kuikala ditalala patshidi mamuebe Yezabele wenza malu mabi to.’ Yeholama wakajinga kukudimuna ditempu diende bua kunyema. Kadi Yehu wakasa Yeholama mukete, yeye kufua.

Pashishe Yehu wakaya ku dibalasa dia Yezabele. Pavua Yezabele mumvue ne: uvua wenda ulua, wakadipenta, kulongololaye nsuki, kushalaye mumuindile ku dididishi dia nzubu wende wa kuulu. Pavua Yehu mufike, wakamuakidila bibi be! Yehu wakela dîyi kudi bena mudimu ba Yezabele bavua bimane pabuipi nende wamba ne: “Mukupayi panshi!” Bakasakila Yezabele, kupatukilaye ku dididishi, kudikumaye panshi, kufuaye.

Panyima pa bualu abu, Yehu wakashipa bana ba balume ba Ahaba 70, kumbushaye ntendelelu wa Bâla mu buloba. Kuenaku umona ne: Yehowa mmumanye malu onso, kabidi ne: udi upesha bantu badi benza malu mabi dinyoka mu tshikondo tshiakanyine anyi?