Nehemiya

9 Jino halikumbi lyakusokesa 24 lyakakweji wakusokesa 7, vaIsalele valikungulwilile hamwe. Valijilikile kulya, vavwalile vikeleyi nakulishikila mavu.+ 2 VaIsalele valihandunwine kuvatu vaze vapwile vakumafuchi eka,+ kaha vemanyine nakulitavila jishili javo nakwambulula milonga yavakakuluka javo.+ 3 Vemanyine muvihela vyavo, kaha vavatangililile helu mukanda waJishimbi+ jaYehova Kalunga kavo hajola jitatu,* kaha hajola jikwavo jitatu valitavilile jishili javo nakulifukula kuli Yehova Kalunga kavo.

4 Jino Yeshuwa, naMbanyi, naKatamiyele, naShevanyiya,+ naMbunyi, naSheleviya, naMbanyi mukwavo, naKenanyi vemanyine hautenda+ wavaLevi, kaha vatambakanyine namazu akukanguka kuli Yehova Kalunga kavo. 5 Kaha Yeshuwa, naKatamiyele, naMbanyi, naHashavaneya, naSheleviya, naHochiya, naShevanyiya, naPetahiya vaze vapwile vaLevi vambile ngwavo: “Imanenu, alisenunga Yehova Kalunga kenu haya myaka yosena.*+ Ove Kalunga ketu, vatu ava valise lijina lyove lize vatela kukisula nakwalisa.

6 “Ove yove Yehova+ uka wove, ove watengele melu namayongomena atwamamo, namavu navyuma vyatwamaho, natulungalwiji navyuma vyatwamamo. Ove yove weji kuhananga kuyoya vyuma vyosena, kaha mayongomena amwilu eji kulifukulanga kuli ove. 7 Ove yove Yehova Kalunga wamuchano, ove wasakwile Apalama+ nakumufumisa muUle+ nganda yavaKalateya nakumuluka lijina ngwove Apalahama.+ 8 Wamumwene ngwove wakushishika+ shikaho walikashile nenyi lushiko lwakumuhana lifuchi lyavaKanane, navaHete, navaAmole, navaPeliji, navaYevuse, navaNgilingashe mangana akalihane vana*+ venyi. Kaha walamine lushiko lwove mwomwo wapwa uwakwoloka.

9 “Wamwene omu vayanjile vakakuluka jetu muEjipitu,+ wevwile miteto yavo kuKalungalwiji Uchila. 10 Walingile vinjikizo, navyuma vyakukomwesa kuli Fwalo, navangamba jenyi, navatu vosena vamulifuchi+ mwomwo watachikijile ngwove vanalingi vyuma vyavipi+ kuli vakakuluka jetu. Wafumakanyishile lijina lyove, kaha noholili hanga lyafumakanyina.+ 11 Wahandunwine meya akalungalwiji hameso avakakuluka jetu, ngocho vazaukile hamavu akuma.+ Kaha vaka-kole javo wavambilile hakajinga kwijiva nge lilolwa vanambili hamwambe.+ 12 Jino namusana wavatwaminyinyine napanda yalivwi, kaha naufuku wavatwaminyinyine napanda yakakahya mangana uvamunyikile mujila vatelele kuya.+ 13 Wejile haPili yaShinai,+ wahanjikile navo kufuma mwilu,+ kaha wavahanyine mazu akuyula akwoloka, najishimbi jamuchano, najindongi jamwenemwene.+ 14 Wavajimbwilile Sambata+ yove yajila nakuvahana jishimbi najindongi kuhichila muli ngamba yove Mose. 15 Omu vevwile zala, wavahanyine vyakulya kufuma mwilu,+ kahomu vevwile lipwila, wavahanyine meya kufuma mulilolwa.+ Kaha wavalwezele vengile mulifuchi nakuliheta, lifuchi lize walishingile* kuvahana.

16 “Oloze vakakuluka jetu valikangile,+ vakakamishile michima*+ yavo, kaha kavononokele jishimbi joveko. 17 Vakanyine kwivwilila,+ kaha kavanukile vilinga vyove vyakukomwesa vize wavalingilileko, vakakamishile michima* yavo nakutongola twamina mangana avatwaminyine vakinduluke muundungo muEjipitu.+ Oloze ove wapwa uKalunga muka-kukonekela,* wakutetela,* wakeke, wakushipwokela kukwata utenu, wazangi yakwilila yayinene,+ kaha kawavombile nyimako.+ 18 Omu valitengelele vavene mwanangombe wakuzuzulula nakwamba ngwavo, ‘Ou ikiye Kalunga kenu uze amilowele mulifuchi lyaEjipitu,’+ nakulinga vyuma vyavipi, 19 ove kawavasezele mupamboko mwomwo yakeke yove yayinene.+ Panda yalivwi yize yavatwaminyinyine mujila namusana kayafumine helu lyavoko, kaha panda yakakahya yize yavatwaminyinyine mujila naufuku kayafumine hali vakikoko.+ 20 Wavahanyine shipilitu yove yivahane mangana,+ wavahanyine mana yove,+ nakuvahana nawa meya omu vevwilenga lipwila.+ 21 Wavahanyinenga vyakulya mupambo hamyaka 40,+ kaha kavakalikijile chuma numba chimweko. Uvwalo wavo kawapulikileko,+ kaha mahinji avo nawa kawajimbileko.

22 “Kaha wavahanyine mawangana navatu veka naveka, wavapangilile misuka yamavu,+ ngocho vahetele lifuchi lyaShihone,+ nalifuchi lyamwangana Heshevone,+ nalifuchi lyaOnge+ mwangana waMbashane. 23 Jino wavulishile vana vavo kwijiva nge vatanganyika vamwilu.+ Kaha wavatwalile mulifuchi lize washikile vakakuluka javo mangana vengilemo nakuliheta.+ 24 Ngocho vana vavo vengililemo nakuliheta,+ kaha wafungulwile vaKanane+ vaze vatwaminenga mulifuchi nakuvahana mumavoko avo. Wavahanyine vamyangana navatu vamulifuchi mangana vavalinge mweshomwo vasakile. 25 Vatambwile jinganda jakukingiwa,+ namavu awilo,+ najizuvo jakuzala navyuma vyamwaza vyakulisezaseza, namashima, namande amivinyo, namilive,+ namitondo yeka yamihako. Ngocho valilenga nakwikuta, kaha vatohwele. Valihizumwinenga mwomwo yakuwaha chove.

26 “Oloze kavononokeleko, valikangile kuli ove+ nakuseza Jishimbi jove.* Vajihile vapolofweto jove vaze vapwile nakuvahuhumuna kachi vavakindulwise kuli ove. Kaha valingilenga vilinga vyavipi vyakukusaula.+ 27 Ngocho wavahanyine mumavoko avaka-kole javo+ mangana vavayanjisenga.+ Omu vapwilenga nakuyanda, valililenga kuli ove, kahove wavevwilenga mwilu. Kaha mukeke yove yayinene, wavahanyinenga vaka-kuvalwila mangana vavapululule mumavoko avaka-kole javo.+

28 “Oloze omu vatwaminenga mukuunda, vaputukile cheka kulinga vyuma vyavipi kumeso ove,+ kaha wavahanyine mumavoko avaka-kole javo mangana vavayanjise.+ Omu vahilukilenga cheka kuli ove nakutwa kawelele,+ wavevwilenga mwilu watwama nakuvalwila mapapa kakavulu mwomwo yakeke yove yayinene.+ 29 Numba tuhu wavahuhumwine mangana valamenga Jishimbi jove, oloze valikangile nakukana kulama jishimbi jove.+ Vahokwele jindongi jove jize najihasa kuhana mutu kuyoya kachi nge mwajikavangiza.+ Valipambwilenga nakukakamisa michima yavo, kaha vakanyinenga kwivwilila. 30 Wavatalililenga chikoki+ hamyaka yayivulu, wavahuhumwinenga nashipilitu yove kuhichila muli vapolofweto jove, oloze vakiko vakanyine kwivwilila, ngocho wavahanyine mumavoko avaka-mafuchi eka.+ 31 Kaha mukeke yove yayinene kawavasezele chipwe kuvanongesako+ mwomwo ove wapwa uKalunga wakutetela,* wakeke.+

32 “Ngocho jino ove Kalunga ketu, Kalunga wangolo, wakwivwisa woma, ove muka-kulama lushiko lwove, muka-kusolola zangi yakwilila,+ kanda naulelesa vihuli tunamononga navamyangana jetu, navilolo jetu,+ navapilishitu jetu,+ navapolofweto jetu,+ navakakuluka jetu, navatu jove vosena kufuma kumakumbi avamyangana javaAsulya+ nakuheta nakulikumbi lyaleloko. 33 Ove kawahengeseleko havihuli vyosena evi tunamononga. Unapunga uwakushishika, oloze etu yetu tunalinginga mwamupi.+ 34 Vamyangana jetu, navilolo jetu, navapilishitu jetu, navakakuluka jetu kavalamine Jishimbi jove, chipwe kwivwilila kumazu ove akwanukisa aze wavahuhumwineko. 35 Numba omu vatwaminenga muwangana wavo nakulivwisa kuwaha vyuma vyamwaza wavahanyine nakutwama mulifuchi lyalinene lyawilo, vakiko kavakuzachililileko,+ kaha kavasezele nawa vilinga vyavo vyavipiko. 36 Lelo jino tunapu tuvandungo+ mulifuchi lize wahanyine vakakuluka jetu kachi valyenga mihako yalyo navyuma vyamwaza vyatwamamo. 37 Oloze jimbuto jamulifuchi eli jinapu javamyangana vaze uneche vatuyule mwomwo yajishili jetu.+ Kaha vali nawata hali etu nahavimuna jetu nakulinga mweshomwo vanasake. Ngocho tuli nakumona vihuli vyavivulu.

38 “Mwomwo yavyumevi tunavuluka, natulikasa lushiko lwakuzama mbe+ nakulusoneka, kaha vilolo jetu, navaLevi, navapilishitu jetu+ navahakako tutachikijilo twavo.”