Mateu

5 Omu amwene aze mayongomena, akandukile hapili. Kahomu alingile natwame lyehi, tumbaji twenyi vejile kuli ikiye. 2 Kaha alokolwele mukanwa kenyi nakuputuka kuvanangula ngwenyi:

3 “Vawahilila vaze vejiva ngwavo vasaka vyuma vyakushipilitu,*+ mwomwo Wangana wamelu unapu wavo.

4 “Vawahilila vaze veji kulishonanga, mwomwo navakavavendejeka.+

5 “Vawahilila vaze vavavwovu michima,+ mwomwo navakaswana mavu.+

6 “Vawahilila vaze veji kwivwanga zala nalipwila+ lyavyuma vyakwoloka, mwomwo navakavekuchisa.+

7 “Vawahilila vaze veji kutetelanga vakwavo,+ mwomwo navakiko navakavatetela.

8 “Vawahilila vaze vatoma mumichima,+ mwomwo navakamumona Kalunga.

9 “Vawahilila vaze veji kunehanga kuunda,*+ mwomwo navakavavuluka ngwavo vana vaKalunga.

10 “Vawahilila vaze vanayanjishila hakulinga vyuma vyakwoloka,+ mwomwo Wangana wamelu unapu wavo.

11 “Mwawahilila enu navasaula+ kuvatu nakumiyanjisa+ nakumivangijikila vyuma vyavipi vyeka navyeka vyosena mwomwo yayami.+ 12 Wahililenu, lisambenu,+ mwomwo fweto+ yenu yinapu yayinene mwilu, mwomwo mukiko vene vayanjishile navapolofweto vaze valivangile kupwako shimbu kanda enu muchisemuke.+

13 “Enu mwapwa mumungwa+ wahamavu, oloze kachi nge mungwa nausamuka, kaha ngolo jawo navajikindulwisa cheka ngachilihi? Kaweshi cheka namulimoko, oloze unapu wakumbila kaha kuweluka+ vaulyatangile kuvatu.

14 “Enu mwapwa mumumunyi wakaye.+ Nganda kayeshi kuswamako nge yili helu lyapili. 15 Vatu kaveshi kuwika linongo nakulifwikilila mumbangoko,* oloze veji kulihakanga hachitumbikilo chalyo, kaha hinalimunyikila vosena vaze vali muzuvo.+ 16 Nayenu nawa, kumunyika chenu chimunyikenga kuvatu+ mangana vamonenga vilinga vyenu vyamwenemwene+ nakumutohwesanga Senu uze ali mwilu.+

17 “Kanda namushinganyeka ngwenu ngwejile nakwenyeka Jishimbi chipwe Mazu aVapolofwetoko. Kangwejile nakuvyenyekako, oloze ngwejile nakuvitesamo.+ 18 Chamuchano vene nangwamba kuli enu ngwami, melu namavu vinahase kuhita, oloze kakweshi sona umwe wamundende, chipwe kamukila kasona kamwe nakakahita kuJishimbiko, kuvanga vyuma vyosena vinasoloka.+ 19 Shikaho, weshowo mwahokola lushimbi lumwe hajishimbi eji jajindende, nakunangula nawa vakwavo valinge mwomumwe, navakamuvuluka ngwavo wamundende kutalisa kuWangana wamelu. Oloze weshowo mwajikavangiza nakujinangula vakwavo nawa, navakamuvuluka ngwavo wamunene kutalisa kuWangana wamelu. 20 Mwomwo nangwamba kuli enu ngwami, kachi nge kwoloka chenu kacheshi kuhambakana chize chavaka-kusoneka navaFwaliseuko,+ kaha chikupu vene kamweshi kukengila muWangana wameluko.+

21 “Mwevwa lyehi muze valwezele vatu vakushikulu ngwavo: ‘Kanda mukajiha mutuko,+ oloze weshowo mwajiha mutu navamusopesa kuzango yakusopela milonga.’+ 22 Oloze aminyi nangwamba kuli enu ngwami, weshowo mwakwachila lika ndumbwenyi utenu+ navamusopesa kuzango yakusopela milonga, kaha ou mwamba ndumbwenyi mazu akasautu navamusopesa kuZango Yakulitulaho, kaha weshowo mwamba ngwenyi, ‘Ove chileya wamokomoko!’ mwalikokela ponde yakumumbila muNgehena*+ yakakahya.

23 “Shikaho, kachi nge uli nakuneha wana wove kulijiko lyakulumbila,+ kaha hakuheta kuze hinawanuka ngwove uli namulonga nandumbwove, 24 seza wana wove kulutwe lwalijiko lyakulumbila, kaha yako. Chatete kalivwasane nandumbwove, numba ukinduluke jino nakuhana wana wove.+

25 “Livwasane washiwashi namutu uze uli nenyi namulonga shimbu uchili nenyi mujila hakuya kuzango yakusopela milonga, kuchina mutu kana mwakutwala kuli muka-kusopesa, kaha muka-kusopesa mwakuhana kuli kapasu, kaha hinavakuhaka mukamenga.+ 26 Chikupu vene nangwamba kuli ove ngwami, kaweshi kulovokamoko kuvanga unafwete kalumbongo kachichele kamakumishilo.*

27 “Mwevwa lyehi muze vambile ngwavo: ‘Kanda mukalinga ukojiko.’+ 28 Oloze aminyi nangwamba kuli enu ngwami, weshowo mwatala lika pwevo+ nakumwivwila peha, nalingi lyehi nenyi ukoji mumuchima wenyi.+ 29 Jino kachi nge liso lyove lyachilyo lili nakukuhukanyisa, litombongonyemo nakulimbila.+ Mwomwo chinawahe kuli ove kutwama chakuzeneka chilyo chimwe chakumujimba wove, kuhambakana mujimba wove wosena kuumbila muNgehena.*+ 30 Kaha nawa kachi nge livoko lyove lyachilyo lili nakukuhukanyisa, livatule nakulimbila.+ Mwomwo chinawahe kuli ove kutwama chakuzeneka chilyo chimwe chakumujimba wove, kuhambakana mujimba wove wosena kuumbila muNgehena.*+

31 “Vambile nawa ngwavo: ‘Weshowo mwalukulula* pwevo lyenyi, amuhane mukanda wakujiha ulo.’+ 32 Oloze aminyi nangwamba kuli enu ngwami, weshowo mwalukulula pwevo lyenyi chakuzeneka mulonga waujila,* mwamulingisa kupwa muka-ukoji nge mwasomboka cheka, kaha weshowo mwambata pwevo vanalukulula mwalinga ukoji.+

33 “Mwevwa lyehi nawa muze valwezele vatu vakushikulu ngwavo: ‘Kanda mukalishinga chakuzeneka kutesamoko,+ oloze tesenumo jishiko jenu kuli Yehova.’*+ 34 Oloze aminyi nangwamba kuli enu ngwami: Kanda mulishinga numba hahandendeko,+ chipwe kulishinga melu nduma, mwomwo apwa litanda lyaKalunga, 35 chipwe kulishinga mavu nduma, mwomwo apwa chitwamo chakulyata mahinji enyi,+ chipwe kulishinga Yelusalema nduma, mwomwo yapwa nganda yaMwangana wamunene.+ 36 Kanda mulishinga mutwe woveko, mwomwo kaweshi kuhasa kwalumuna lukambu numba lumwe kupwa lutoma chipwe lulavako. 37 Oloze lizu lyenu lyakwamba ngwenu ‘Eyo’ lipwenga vene eyo, kaha ‘Nduma,’ lipwenga vene nduma,+ mwomwo cheshocho chakuhakilako kumazu awa chinapu chakufuma kuli uze wakuhuka.+

38 “Mwevwa lyehi muze vambile ngwavo: ‘Liso naliso ndwa, kaha lizo nalizo ndwa.’+ 39 Oloze aminyi nangwamba kuli enu ngwami: Kanda mukalipika namutu wakuhukako, oloze weshowo mwakuveta kulikili lyove lyachilyo, mwalumwine nalikwavo nawa.+ 40 Kaha kachi nge mutu mwasaka kukutwala kuzango yakusopela milonga mangana akutambule uvwalo wove wamukachi, muhane nauvwalo wove wahelu.+ 41 Kachi nge mutu uze ali nawata mwakushinjila ngwenyi uyenga nenyi mayilo* yimwe, yako nenyi jimayilo jivali. 42 Mutu mwakulomba chuma, muhane, kahou mwasaka ngwenyi umulevanyise,* kanda umutalisa nyimako.+

43 “Mwevwa lyehi muze vambile ngwavo: ‘Zangenunga vakwenu+ nakuhunga vaka-kole jenu.’ 44 Oloze aminyi nangwamba kuli enu ngwami: Zangenunga lika vaka-kole jenu+ nakulombelako vaze vali nakumiyanjisa+ 45 mangana mupwenga muvana vaSenu uze ali mwilu,+ mwomwo eji kututwisanga likumbi lyenyi hali vaka-kuhuka nahali vatu vamwaza, nakunokesa vula hali vaka-kwoloka nahali vaka-kuhenga.+ 46 Mwomwo kachi nge namuzanganga kaha vaze vamizanga enu, kaha fweto muka namutambwilaho?+ Uno omu keshi mukiko veji kulinganga navaka-kutambula miteloko nyi? 47 Kachi nge namumenekanga vandumbwenu kaha, chuma muka chakulipwila muli nakulinga? Kumana omu keshi mukiko veji kulinganga navatu vakumafuchi ekako nyi? 48 Shikaho pwenunga muvakukupuka, nganomu Senu wamwilu apwa wakukupuka.+