Wavaka-Loma
5 Shikaho hakuwana nge vanatuvulukila lyehi kwoloka mwomwo yalufwelelo,+ tutwamenunga mukuunda* naKalunga kuhichila muli Mwata wetu Yesu Kulishitu,+ 2 muli ikiye mukiko vene tunahashila kwingila mulikoji lyalinene eli tulimo jino hakupwa nalufwelelo.+ Kaha tuwahililenu* halutalililo lwakukatambula upahu waKalunga. 3 Keshi hali echi kahako, oloze tuwahililenu* nawa shimbu tuchili nakumona luyando,+ hakuwana nge tunatachikiza ngwetu luyando lweji kunehanga lukakachila,+ 4 kaha lukakachila lweji kunehanga uselewa waKalunga,+ kaha uselewa waKalunga weji kunehanga lutalililo,+ 5 kaha lutalililo kana kalweshi kukatutwala kukupayako,*+ mwomwo zangi yaKalunga vanayihingunwina lyehi mumichima yetu kuhichila mushipilitu yajila yize vatuhana.+
6 Mwomwo shimbu twapwile tuvakuhehela,+ Kulishitu afwilile vaka-kuzamukila Kalunga halwola luze vatongola. 7 Mwomwo chapwa chachikalu kufwila mutu wakwoloka, oloze mutu nahase pamo kuhamuka nakufwila mutu wamwaza. 8 Oloze Kalunga asolola lyehi zangi yenyi kuli etu, mwomwo shimbu twapwilenga tuvaka-shili, Kulishitu atufwilile.+ 9 Shikaho, hakuwana nge vanatuvulukila jino kwoloka hamanyinga enyi,+ ngocho nachihambakana chikumanyi kutulwila kuutenu kuhichila muli ikiye.+ 10 Mwomwo omu twapwilenga tuvaka-kole vatuwanyishile naKalunga kuhichila mukufwa chaMwanenyi,+ jino hakuwana nge vanatuwanyisa lyehi, ngocho nachihambakana chikumanyi kutulwila kuhichila mukuyoya chenyi. 11 Keshi ngocho kahako, oloze tuli nakuwahilila nawa muli Kalunga kuhichila muli Mwata wetu Yesu Kulishitu, muze vanatuwanyishila jino naKalunga.+
12 Shikaho, nge muze shili yengilile mukaye kuhichila muli mutu umwe nakufwa nawa kuhichila mushili,+ ngocho kufwa chatanda kuli vatu vosena mwomwo vosena valingile shili—.+ 13 Mwomwo shili yapwilenga mukaye shimbu kanda kupwenga Jishimbi, oloze shili kaveshi kuyivulukila mutuko nge jishimbi jauchiko.+ 14 Chipwe ngocho, kufwa chapwilenga nakuyula nge mwangana kufuma vene kuli Alama nakuheta kuli Mose, nahali vaze vene vazenekele kulinga shili nge muze azombokele Alama jishimbi, ou vanafwanyisa kuli uze apwile nakwiza.+
15 Oloze wana kawalyeseka hamwe navilinga vyakuhengako. Hakuwana nge vilinga vyakuhenga vyayauze mutu umwe vavavulu vafwile, kahanyi likoji lyalinene lyaKalunga nawana wenyi wakanyombo uze wejile nalikoji lyalinene kuhichila muli mutu umwe+ Yesu Kulishitu, vyambwambumukile chikuma havatu vavavulu.+ 16 Kaha nawa, nganyo yafumine hawana wakanyombo kayalyeseka navyuma vyafumine hashili alingile mutu umweko.+ Mwomwo kusopesa chize chejile hakuhenga chimwe,+ chanehele kupayisa, oloze wana uze wejile havilinga vyakuhenga vyavivulu, walingishile vatu vavavulukile kwoloka.+ 17 Mwomwo kachi nge kuvilinga vyakuhenga vyayauze mutu umwe, kufwa chayulile nge mwangana kuhichila muli mutu uze,+ kahanyi vaze veji kusolwelanga likoji lyalinene lyalivulu, nawana wakanyombo wauvulu wavilinga vyakwoloka,+ navahambakana chikumanyi kuyula nge vamyangana+ mukuyoya, kuhichila muli mutu umwe, Yesu Kulishitu.+
18 Ngocho ngana omu vapayishile vatu vosena hakuhenga chimwe kaha,+ mukiko nawa vatu vosena+ navavavulukila kwoloka chakutwala kukuyoya hamulimo wakwoloka wamutu umwe kaha.+ 19 Mwomwo nge muze vavalingishile vavavulu kupwa vaka-shili+ hakulikanga chayauze mutu umwe, mukiko nawa munavavalingisa vavavulu kupwa vakwoloka hakwononoka chayauze mutu umwe.+ 20 Kaha Jishimbi jejile nakupwako mangana vilinga vyakuhenga vivule.+ Oloze kuze yavulilile shili kukiko kwavulilile chikuma nalikoji lyalinene nawa. 21 Mwomwo yaka? Mangana nge muze shili yayulile nge mwangana mukufwa,+ mukiko nawa nalikoji lyalinene munaliyula nge mwangana kuhichila mukwoloka chakutwala kukuyoya chahaya myaka yosena muli Mwata wetu Yesu Kulishitu.+