Chihande 38
Vandoji 12
ACHITALE mihako vanakulika malunga ava. Tala chinjomoto chamihako yamuvinyo ocho kutohwa. Yakumbata kuvanga kumalunga vavali. Tala ojo jikuyu najiloma. Uno mihako yamwaza ngana yafumu kulihi? Yafumu kuKanane. Nawanuka, halwola lumwe kuKanane kukiko vatwamine vaApalahama, Isaka naYakova. Oloze mwomwo yazala yakalombolombo, Yakova natanga yenyi vayile kuEjipitu. Mose jino ali nakukindulwisa vaIsalele kuKanane, hihanahichi lyehi myaka 216. Vali jino mulifuchi lyamupambo lyaKateshe.
MuKanane mwapwile vatu vavapi. Jino Mose himwatuma vandoji 12, ngwenyi: ‘Kawanenu vatu vangahi vatwamamo, kaha nawa nge vangolo. Katalenu nge mavu awilo wavimbuto. Kanda namukavulyama kukaneha mihako yimweko.’
Vaze vandoji hakukinduluka kuKateshe, hinavalweza Mose ngwavo: ‘Hilifuchi lyamwaza.’ Kaha hinavamulweza Mose mihako yimwe vananehe. Oloze vandoji 10 ngwavo: ‘Vatu vakuze vakutakama. Navakatujiha hakuvatambula lifuchi.’
VaIsalele hikuchikima hakwivwa ngocho. Ngwavo: ‘Chamwaza kufwila tuhu muEjipitu chipwe mupambo muno tuli. Tunakuya nakufwa mujita, kaha mapwevo navana vetu navakavakwata undungo. Tusakulenu twamina weka wakushisa Mose tukinduluke kuEjipitu!’
Oloze vandoji vavali vanamufwelela Yehova, kaha vali nakuunjisa vatu. Vakivo vaYoshuwa naKaleve. Vakivo ngwavo: ‘Kuchikima chiku. Yehova ali nayetu. Nachikapwa chachashi kutambula lifuchi.’ Oloze vatu kavate kwivwilila. Hikwamba nakuvajiha vaYoshuwa naKaleve.
Yehova himwapihilila, nakulweza Mose ngwenyi: ‘Vosena vali namyaka yakusemuka kuputukila ha 20 nakutwala helu kaveshi kukengila mulifuchi lyaKananeko. Vamona lyehi visava ngwalingile muEjipitu namupambo, oloze chivakana kungufwelela. Shikaho navakalumbwangila mupambo myaka 40 palanga nomu mwakafwa mutu wakukumishilako. Shina Yoshuwa naKaleve vakivo navakengila mulifuchi lyaKanane.’