Chihande 70

Yona naIshi Wamunene

TALOU lunga ali mumeya. Ali muukalu waunene, nyi chiku? Ou ishi kalinwaha amumine! Unamwijiva ou lunga kana? Ikiye Yona. Tutalenu vyamwingishile muukalu waunene ngana.

Yona hikapolofweto kaYehova. Shimbu yayindende kufuma hakufwa chakapolofweto Elisha, Yehova mwalweza Yona ngwenyi: ‘Yako kulimbo lyalinene lyaNyineve. Kupihya chavo chinatoho, kaha ukavalwezecho.’

Oloze Yona kasakile ayengako. Kaha hikunyina muwato wakuya kweka, keshi kuNyineveko. Yehova kevwile kuwaha hakuchina chaYonako. Ngocho, mwahuhwisa peho yayinene. Hinayitohwa nakusaka yijimike wato. Vaka-kutambukisa wato woma unavakwate, nakuputuka kuteta kutulunga twavo vavakafwe.

Kutwala muze Yona mwavalweza ngwenyi: ‘Ngweji kulemesa Yehova, Kalunga atengele melu namavu. Ngunakuchina kuzata mulimo angulwezanga Yehova kulinga.’ Vaka-kutambukisa wato ngwavo: ‘Tukulinge muka numba peho yitule?’

Yona ngwenyi: ‘Ngumbilenu mukalungalwiji, kaha kalungalwiji mwatula cheka.’ Vaze malunga kavate kumumbila, oloze omu peho yanyamanganda yinasweze, hinavamumbata Yona nakumumbila mukalungalwiji. Peho yanyamanganda hikutula, nakalungalwiji kulu cheka.

Omu Yona ali nakujimina kwishi yameya, ishi wamunene hikumumina. Oloze kufwa chiku. Hamakumbi atatu, musana naufuku, ali mujimo lyaishi. Yona mwalikonekela hakuhona kwononoka Yehova nakuya kuNyineve. Unejiva chuma mwalinga?

Yona mwalomba kuli Yehova amukafwe. Jino Yehova hikulingisa ishi asajile Yona kutunda. Kufumaho Yona hikuya kuNyineve. Unwechi kacheshi nakutunangula kulema chakulinga vyuma vyosena mwamba Yehovako nyi?

Mukanda wamuMbimbiliya waYona.