Chihande 98

HaPili yaMilive

OU ALI haPili yaMilive ikiye Yesu. Ava malunga vawana ali navo vaposetolo jenyi. Vakivo vaAndelei nandumbwenyi Petulu, kaha Yakova nandumbwenyi Yowano. Ize unakumona kusongo kuze yikiko tembele yaKalunga muYelusalema.

Hanahichi makumbi avali kufuma haze Yesu atambukanga hamwanachimbulu nakwingila muYelusalema. Jino hano haChivali. Chimene Yesu apwanga kutembele. Kwakuze vapilishitu vasakanga kukwata Yesu vamujihe. Oloze vevwanga woma wakulinga ngocho mwomwo vatu vamuzanga Yesu.

Yesu navavuluka vakulwane vamukwitava ngwenyi: ‘Enu manoka nenu vana vamanoka!’ Kaha Yesu ngwenyi Kalunga mwakavazangamisa havyuma vyavipi vanalingi. Kufumaho Yesu himwaya kuPili yaMilive, kaha vano vaposetolo jenyi vawana vaputukile kumwihula vihula. Unejiva vivali nakumuhula Yesu tahi?

Vaposetolo vanakumwihula vyuma vyakulutwe. Vanatachikiza ngwavo Yesu mwakakumisa upi wosena hano hamavu. Oloze navasaka vejive shimbu navikasoloka vyumevi. Shimbu muka mwakeza cheka Yesu nakuyula mwaMwangana?

Yesu nejiva ngwenyi vaka-kumukavangiza vali hamavu kaveshi kukamumona omu mwakeza kamuchivaliko. Mwomwo mwakapwa mwilu, kaha kaveshi kukahasa kumumona muzeko. Shikaho Yesu mwalweza vaposetolo jenyi vamwe vyuma navikasolwojoka hano hamavu nge naputuka lyehi kuyula mwaMwangana mwilu. Vyuma vika vimwe venyevi?

Yesu ngwenyi nakukapwa jijita jajivulu, vatu vavavulu navakaviza-viza nakufwa zala, uhwanga naukatohwa, kaha nakukapwa namindenda yayinene. Yesu nawa ngwenyi mujimbu wamwaza wawangana waKalunga navakawambulula kwahita mavu kwosena. Uno tunakuvimona vyuma kana navisoloka mushimbu yetu yino tahi? Eyo! Kumana tunahase kufwelela ngwetu Yesu anakuyula mwilu. Kalinwomu vene akumise upi wosena hano hamavu.

Mateu 21:46; 23:1-39; 24:1-14; Mako 13:3-10.