Chilongesa 2
Kalunga Ikiye Iya?
Kalunga wamuchano iya, kaha lijina lyenyi ikiye iya? (1, 2)
Atwama namujimba wakufwana ngachilihi? (3)
Vilinga vyenyi vika vize vyapwa vyakulitulaho? (4)
Uno twatela kuzachisa makombelo akusonga navifwanyisa omwo natumulemesanga tahi? (5)
Jijila muka jivali jize tunahase kulinangwilamo vyuma vyakuvuluka Kalunga? (6)
1. Vatu veji kulifukulanga kuvyuma vyavivulu. Oloze Mbimbiliya yatulweza ngwayo kwatwama Kalunga WAMUCHANO umwe kaha. Ikiye atangile vyuma vyosena vyatwama mwilu nahano hamavu. Hakupwa ikiye atuhana kuyoya, ngocho ikiye kaha Uka wenyi twatela kulemesa.—Wavaka-Kolinde 1, 8:5, 6; Kusoloka 4:11.
2. Kalunga atwama najivulukiso jajivulu jize veji kumuvulukanga, oloze akwechi lijina limwe kaha. Lijina kana likiko YEHOVA. MujiMbimbiliya jajivulu, lijina lyaKalunga valifumisamo nakushishisamo jivulukiso jakuvuluka ngwavo MWATA chipwe KALUNGA. Oloze omwo Mbimbiliya vayisonekele, lijina lyakuvuluka ngwavo Yehova mulyapwile mapapa 7,000!—Kulovoka 3:15; Samu 83:18.
3. Yehova akwechi mujimba, oloze kawapwa ngana wayetuko. “Kalunga Ikiye Shipilitu,” muyahanjika Mbimbiliya. (Yowano 4:24) Kuyoya chamujimba washipilitu chazomboka chikuma hakuyoya chayetu. Kakweshi mutu naumwe amumona lyehi Kalungako. Yehova atwama mwilu, oloze eji kumonanga vyuma vyosena. (Samu 11:4, 5; Yowano 1:18) Nyi shipilitu yapwa chuma muka? Ikiko kayapwa mutu ngana mwaKalungako. Oloze, japwa ngolo jaKalunga jize jeji kuzatanga.—Samu 104:30.
4. Mbimbiliya yatulweza omwo apwa Yehova. Yasolola ngwayo vilinga vyenyi vyakulitulaho vyapwa zangi, chiyulo, mangana, nangolo. (Lushimbi lwamuchivali 32:4; Isaya 40:26; WaYowano 1, 4:8) Mbimbiliya yatulweza nawa ngwayo apwa muka-kutetela, walikoji, muka-kukonekela, muka-kuhana, muka-kutalila vatu chikoki. Etu, ngana mwavana vakwononoka, twatela kumulondezeza ikiye.—Wavaka-Efwesu 5:1, 2.
5. Uno twatela kufukamina chipwe kulomba kumakombelo akusonga, mivwimbimbi, chipwe vifwanyisa omwo natumulemesanga nyi? Nduma! (Kulovoka 20:4, 5) Yehova ngwenyi twatela tumulemesenga ikiye kaha. Upahu wenyi keshi kukauhana kuli weka, chipwe kukala chuma chekako. Makombelo akusonga kawatwama nangolo jakutukafwako.—Samu 115:4-8; Isaya 42:8.
6. Natuhasa ngachilihi kumutachikiza Kalunga kanawa? Jila yimwe yapwa yize yakushishika vyuma vize atangile nakushinganyeka chikuma havyuma tunahase kulinangula kufuma kuvyuma kana. Vyuma atanga Kalunga vyeji kutulweza ngwavyo ikiye akwechi ngolo jajinene namangana. Zangi yenyi tweji kuyimonanga muvyuma vyosena vize atenga. (Samu 19:1-6; Wavaka-Loma 1:20) Jila yikwavo yize tunahase kulinangwilamo vyuma vyakuvuluka Kalunga yapwa yize yakulilongesanga Mbimbiliya. Mumukanda kanou Kalunga atulweza vyuma vyavivulu vyakuvuluka omwo apwa. Atulweza nawa nakujina chenyi navyuma vize asaka etu kupwanga nakulinga.—Amose 3:7; WaChimoteu 2, 3:16, 17.
[Mivwimbimbi halifwo 5]
Tweji kulinangulanga vyaKalunga kufuma kuvyuma vize atangile namu-Mbimbiliya nawa