Chilongesa 7

Kupandama Kwakamwihi naKalunga Mukulomba

Mwomwo ika chapwila chachilemu kulombanga makumbi osena? (1)

Kuli iya watela kulomba, kaha mujila muka? (2, 3)

Vihande muka vyakwoloka watela kuhaka mukulomba? (4)

Shimbu muka watela kulomba? (5, 6)

Uno Kalunga eji kwivwililanga kukulomba chosena tahi? (7)

1. Kulomba chapwa kuhanjika chakulinyisa kuli Kalunga. Watela kulombanga kuli Kalunga makumbi osena. Ngocho mukalivwa kupwa uwakupandama chikuma kuli ikiye ngana mwasepa lyove uze wazanga. Yehova apwa wamunene chikuma kaha wangolo nawa, oloze eji kwivwililanga kukulomba chetu! Uno weji kulombanga kuli Kalunga makumbi osena?—Samu 65:2; Wavaka-Tesolonyika 1, 5:17.

2. Kulomba hijila yetu yikwavo yakulemeselamo Kalunga. Ngocho, twatela kulombanga kaha kuli Kalunga, Yehova. Omwo Yesu apwilenga hano hamavu, alombelenga shimbu yosena kuli Ise, keshi kuli mutu wekako. Nayetu mukiko twatela kulinga. (Mateu 4:10; 6:9) Chipwe ngocho, kulomba chetu chosena twatela kuchivulukila mulijina lyaYesu. Echi cheji kusololanga nge tuvaka-kuvumbika kahela kaYesu kaha nawa twafwelela mundando yakusokola ahanyine mwachimuna wakuvatula.—Yowano 14:6; WaYowano 1, 2:1, 2.

3. Kuhanjika chetu kuli Kalunga hakulomba chatela kupwa chakufuma kumuchima. Katwatela kulomba mazu akulamina chimweza mumutwe chipwe kukavangiza kulomba vasoneka mumukandako. (Mateu 6:7, 8) Tunahase kulomba kala mweshomwo mujila yakalemesa tunalilongesela kupwamo, hakala lwola, nakweshokwo tuli. Kalunga nahase kwivwa nakulomba chauholela chamumichima yetu. (Samwele 1, 1:12, 13) Chapwa chamwaza kuhengama kwauka wove kwakuzeneka vyema nge musaka kulomba chaha uka.—Mako 1:35.

4. Vyuma muka watela kulomba? Kala cheshocho chuma chinakwate hausendo wove naikiye. (Wavaka-Fwilipi 4:6, 7) Kulomba chakutalilaho chatulweza nge tulombenga halijina lyaYehova nakujina chenyi. Tunahase kulomba mangana atuhane navyuma vyakumujimba, nakutukonekela milonga yetu yashili, nakutukafwa kuhonesa vyeseko. (Mateu 6:9-13) Katwatela kulomba vyuma twafwila kahako. Twatela kulombanga kaha vyuma vize vyaya mwaya muchima waKalunga.—WaYowano 1, 5:14.

5. Unahase kulomba kala heshoho naukulwezela muchima wove kusakwilila chipwe kumwalisa Kalunga. (Mijimbu 1, 29:10-13) Watela kulomba omwo mupwa naukalu chipwe nge lufwelelo lwove luli mukukaluwa. (Samu 55:22; 120:1) Chapwa chakutamo kulombanga shimbu kanda uputuke kulya vyakulya. (Mateu 14:19) Yehova atulweza tupwenganga nakulomba “makumbi osena.”—Wavaka-Efwesu 6:18.

6. Twatela kulomba, chikumanyi nge tunavulumuna mulonga washili waunene. Halwola kanelu twatela kulembelela Yehova mangana atutetele nakutukonekela. Kalunga ‘eji kukonekelanga’ nge milonga yetu yashili natuyitavila nakuyiseza chikupu.—Samu 86:5; Vishimo 28:13.

7. Yehova eji kwivwililanga kaha kukulomba chavatu vakwoloka. Hakusaka mangana kulomba chove vachivwilile kuli Kalunga, watela kweseka chikuma nangolo jove josena kukavangizanga jishimbi jenyi. (Vishimo 15:29; 28:9) Watela kupwa wakulinyisa hakulomba. (Luka 18:9-14) Watela kuzata kweseka navyuma vize weji kulombanga. Echi nachikasolola nge wapwa umutu walufwelelo kaha vyuma vize weji kuhanjikanga vyapwa vyamwenemwene. Kuvanga unalingi ngocho numba jino Yehova akakumbulule kulomba chove.—WavaHepeleu 11:6.