Chilongesa 9
Vangamba jaKalunga Vatela Kupwa Vatoma
Mwomwo ika twatela kupwa vatoma muvyuma vyosena? (1)
Chalumbununa ika kupwa vatoma kushipilitu? (2)
kupwa vatoma mutwamiso? (3)
kupwa vatoma muvishinganyeka? (4)
kupwa vatoma kumujimba? (5)
Hanjikiso muka yamajilo yize twatela kulihendako? (6)
1. Yehova Kalunga apwa utoma kaha nawa wakujila. Asaka vatu jenyi vaka-kumulemesa vapwenganga lika vatoma—kushipilitu, mutwamiso, muvishinganyeka, nakumujimba. (WaPetulu 1, 1:16) Kupwanga lika vatoma kumeso aKalunga, chasaka kukilikita nangolo. Tuli mulifuchi lyamajilo. Tukwechi mulimo wakuhonesa jitato jetu jakulinganga vyuma vyakuhenga. Oloze kanda natuzeyako.
2. Kutoma chakuShipilitu: Nge tuli nakusaka kuzachila Yehova, kaha kanda natukakavangizanga lika kulongesa chamukwitava chamakuli chipwe visemwa vyachoko. Tulovokenu mukwitava chamakuli nakuzeneka kuchikundwiza mukala jila. (Wavaka-Kolinde 2, 6:14-18; Kusoloka 18:4) Omwo natulinga hitunalilongesa lyehi muchano waKalunga, twatela jino kuzangama kuchina navakatuhungumwisa kuvatu vaka-kulongesa makuli.—WaYowano 2, 10, 11.
3. Twamiso Yitoma: Yehova asaka vaka-kumulemesa kusololanga twamiso yavaka-Kulishitu vamuchano makumbi osena. (WaPetulu 1, 2:12) Eji kumonanga vyuma vyosena tweji kulinganga, numba vyamukusweka. (WavaHepeleu 4:13) Twatela kulihenda kuujila nakuvijililo vyeka vyamajilo vyavatu vaka-mavu.—Wavaka-Kolinde 1, 6:9-11.
4. Kutoma Chamuvishinganyeka: Nge michima yetu nayizala mbe navishinganyeka vitoma, vyamwaza, kaha natwamiso yetu yinahase kupwa yitoma. (Wavaka-Fwilipi 4:8) Oloze nge natushinganyekanga vyuma vyavipi, kaha navikatukokela kuvilinga vyakuhuka. (Mateu 15:18-20) Twatela kusosoloka kuvyuma vyakuhemahema vize vinahase kupihisa michima yetu. Tunahase kuzalisa michima yetu navishinganyeka vitoma hakulinangulanga Mazu aKalunga.
5. Kutoma chakumujimba: Vaka-Kulishitu vatela kulama mijimba yavo nauvwalo wavo kupwa vitoma mwomwo veji kumwimanyinangako Yehova. Twatela kusana kumavoko hakufuma kuvimbushu, nahakulya nahakukwata vyakulya. Nge kawatwama nachimbushu chambwendeko, kaha majilo eji kufumanga mujimo twatela kuwavumbika mumavu. (Lushimbi lwamuchivali 23:12, 13) Kulilama vatoma kumujimba cheji kunehanga kulikangula chakumujimba chamwaza. Kanda yamuka-Kulishitu yatela kupwa yaunyoji kaha yitoma mukachi nakuweluka. Yatela kuhana chakutalilaho chamwaza kuli vatu vamundandanda.
6. Hanjikiso Yitoma: Vangamba jaKalunga vatela shimbu yosena kuhanjikanga mwamuchano. Vaka-makuli kaveshi kukaswana Wangana waKalungako. (Wavaka-Efwesu 4:25; Kusoloka 21:8) Vaka-Kulishitu kavazachisa lilimi lyalipiko. Kaveshi kwivwilila chipwe kusapula chakuhaka seya nakuhanjika vihande vyamajiloko. Vapwa vakulipwila hali vakwavo kumilimo yavo chipwe kumashikola namuchitungilo mwomwo yahanjikiso yavo yitoma.—Wavaka-Efwesu 4:29, 31; 5:3
[Mivwimbimbi halifwo 18, 19]
Vangamba jaKalunga vatela kupwa vatoma muvyuma vyosena