Chilongesa 14

Omwo Liuka lyaVinjiho jaYehova Valilongesa

Shimbu muka vaputukile Vinjiho jaYehova vamakumbi ano? (1)

Kukunguluka chaVinjiho jaYehova veji kuchilinga ngachilihi? (2)

Jimbongo jakuzachisa veji kujiwananga ngachilihi? (3)

Veya veji kutwaminyinanga muchikungulwilo hichikungulwilo? (4)

Kukunguluka muka chachinene valinga hamwaka hamwaka? (5)

Mulimo muka watwamaho haofesi yavo yayinene nahajiofesi jamitango? (6)

1. Vinjiho jaYehova vamakumbi ano vaputukile muji 1870. Hakavanga vavavulukilenga ngwavo vaka-Kulilongesa Mbimbiliya. Oloze mu 1931 valilukile lijina lyamuMazu-vasoneka ngwavo Vinjiho jaYehova. (Isaya 43:10) Liuka kana lyaputukile navatu vavandende, oloze oholyapwa linakulu nakuheta kujimiliyoni jaVinjiho, vaze vali nakuzata mulimo wakwambulula mujimbu mumafuchi akuhambakana 230.

2. Vikungulwilo vyavivulu vyaVinjiho jaYehova vyakunguluka mapapa katatu muchalumingo. Vali nakukulomba wizenga kukala kukunguluka kana. (WavaHepeleu 10:24, 25) Vyosena vize vanangula vyapendamina kaha haMbimbiliya. Kukunguluka chosena veji kuchisokololanga nakuchisoka nakulomba. Hakukunguluka chachivulu veji kwimbanga “namyaso yaShipilitu” yakufuma kumichima. (Wavaka-Efwesu 5:18, 19) Vatu veji kwingilanga wana kaha kaveshi kuhitamo nakutambula jimbongoko.—Mateu 10:8.

3. Vikungulwilo vyavivulu vyakungulukila muZuvo yaWangana. Kakavulu japwa jizuvo jajashi jakutunga kuli Vinjiho vaka-kuzata mulimo wakulisakila. Kaweshi kukamonaho makombelo akusonga, jikulusu, chipwe vyuma vyakufwana ngana haZuvo yaWanganako. Jimbongo vazachisa jafuma kuwana wakulisakila. Vaze vasaka kuhana wana, kwatwama chikasha vahakako.—Wavaka-Kolinde 2, 9:7.

4. Muvikungulwilo vyosena, mwatwama vakulwane, mokomoko tulama. Vakivo veji kutwaminyinanga mulimo wakulongesa muchikungulwilo. (WaChimoteu 1, 3:1-7; 5:17) Veji kuvakafwanga kuli vaka-kuzata muchikungulwilo. (WaChimoteu 1, 3:8-10, 12, 13) Malunga kana ava kavavazezula helu lyavosena vaze vatwama muchikungulwiloko. (Wavaka-Kolinde 2, 1:24) Kavavavuluka jivulukiso jakulipwilako. (Mateu 23:8-10) Kaveshi kuvwala vyuma vyakulihandununa navakwavoko. Kavavafweta jimbongo hamulimo vazatako. Vakulwane veji kuzakamanga vyuma vyachikungulwilo vyakushipilitu mwakuchisakula kumichima yavo. Vanahase kuvendejeka nakutwaminyina mulwola lwaluyando.—WaYakova 5:14-16; WaPetulu 1, 5:2, 3.

5. Vinjiho jaYehova vatwama nawa nakukunguluka chachinene chachihanda chipwe chalifuchi hamwaka hamwaka. Halwola kanelu vikungulwilo vyavivulu vyeji kwizanga hamwe kupolongalamu yakulipwila yajindongi jamuMbimbiliya. Kumbapachisa chatumbaji vavahya chapwa hichihanda chize cheji kupwangako lika hakukunguluka chachihanda chipwe chalifuchi.—Mateu 3:13-17; 28:19, 20.

6. Jiofesi jajinene jakaye kosena jaVinjiho jaYehova jatwama muNew York. Kukiko kwatwama Lizavu lyaKutwaminyina, zango yavakulwane vakulindunuka vaze vatala havikungulwilo vyamukaye kosena. Kuli nawa jiofesi jamitango jakuhambakana 100 mwahita kaye kosena. Havihela kanevi, vaka-kuzata milimo yakulisakila vali nakukafwanga mumilimo yakutunga nakutumanga mikanda yaMbimbiliya. Vali nakutwaminyinanga nawa namulimo wakwambulula mujimbu. Ikaze muhonena kuya nakutambukila ofesi yamutango yize yili kwakamwihi nayove?