Chilongesa 16

Kusakula Chove Chakuzachila Kalunga

Vika watela kulinga numba upwenga sepa lyaKalunga? (1, 2)

Mukalihana ngachilihi kuli Kalunga? (1)

Shimbu muka vatela kukakumbapachisa? (2)

Nauhasa ngachilihi kupwa nangolo jakutwalaho lika kupwa wakushishika kuli Kalunga? (3)

1. Hakusaka kupwa usepa lyaKalunga, watela kupwa nachinyingi chamwaza chamuchano wamuMbimbiliya (WaChimoteu 1, 2:3, 4), kufwelela vyuma unalinangula (WavaHepeleu 11:6), kwecha shili jove (Vilinga 17:30, 31), nakwalumuna kuyoya chove. (Vilinga 3:19) Jino zangi yove yakumuzanga Kalunga yatela kukulingisa kulihana kuli ikiye. Chikiko kulumbununa nge mukulomba chove chaha uka wove watela kumulweza ngwove uli nakulihana mangana ulingenga mwaya muchima wenyi.—Mateu 16:24; 22:37.

2. Hakukumisa kulihana chove kuli Kalunga, vatela kukumbapachisa. (Mateu 28:19, 20) Kumbapachisa chapwa kulweza vatu vosena ngwove unalihane kuli Yehova. Ngocho lumbapachiso lwapwa lwavaze kaha vanahase kusakula kuzachila Kalunga. Hakumumbapachisa mutu, mujimba wenyi watela kujimina wose mumeya mbwi.a—Mako 1:9, 10; Vilinga 8:36.

3. Hanyima yakulihana, Yehova mwakakwitavila ukalingenga kweseka nalushiko lwove. (Samu 50:14; Muka-kwambulula 5:4, 5) Liyavolo mweseka akuhonese kumuzachila Yehova. (WaPetulu 1, 5:8) Oloze pandamanga kuli Yehova mukulomba. (Wavaka-Fwilipi 4:6, 7) Linangulenga Mazu enyi likumbi hilikumbi. (Samu 1:1-3) Lamata chikuma kuchikungulwilo. (WavaHepeleu 13:17) Hakulinganga vyuma vyosena evi, mukapwa nangolo jakutwalaho lika uwakushishika kuli Kalunga. Mukahasanga jino kulinga vyuma vyosena vize asaka ove kulinga haya myaka yosena!

[Kwinyikila chamwishi]