Chilongesa 3

Watela Kulinangula vyaKalunga

Hakusaka upwenga sepa lyaKalunga, watela kulinangula vyaikiye. Kutala masepa jove vejiva lijina lyove nakulizachisa tahi? Mukiko vene. NaKalunga nawa anakusaka wijive lijina lyenyi nakulizachisa. Kalunga lijina lyenyi ikiye Yehova. (Samu 83:18; Mateu 6:9) Watela nawa kulinangula vyuma azanga nevi ajinda. Watela kwijiva masepa jenyi navaka-kole jenyi. Cheji kumbatanga lwola hakwijiva omu apwa mutu. Mbimbiliya yamba ngwayo chapwa chamangana kuwananga lwola lwakulinangula vyaYehova.—Wavaka-Efwesu 5:15, 16.

Masepa jaKalunga veji kulinga vyuma vyeji kumwivwisanga kuwaha. Achishinganyeke hali masepa jove. Uno vanahase kutwalaho nakupwa masepa jove nge weji kuvalinga mwamupi nakulinga nawa vyuma vajinda, tahi? Kwakusukusuku! Chochimwe nawa, nge unakusaka kupwa sepa lyaKalunga, kaha watela kulinga vyuma navimwivwisa kumuchima kuwaha.—Yowano 4:24.

Keshi kala kwitava chosenako nachihasa kukulingisa upwenga sepa lyaKalunga. Yesu, uze apwa sepa lyaKalunga chikuma, ahanjikile vyajijila jivali. Jila imwe yakuhweka kaha yikwechi vatu vavavulu. Jila kana yinakuya kukunonga. Jila yikwavo yakupalakana kaha yili navatu vavandende kaha vanakutambukamo. Eyi jila yinakuya kukuyoya chahaya myaka yosena. Echi chalumbununa nge, hakusaka usepa naKalunga, mutu atela kulinangula jila yakwoloka yakumulemeselamo.—Mateu 7:13, 14.