Kapetulu 8

Kwatwama Veka Vatuhambakana Etu Ngolo

NGWAFWELELA nawitavila ngwove kwatwama vatu vaze vapwa vavalemu chikuma chipwe ngwetu vangolo chikuma kuhambakana yove nayami. Uno iya unashinganyeka ngwove apwa wangolo chikuma kuhambakana yetu?— Yehova Kalunga. Nyi ngachilihi Mwanenyi, uze apwa Mulongeshi Wamunene? Uno naikiye atuhambakana nyi?— Eyo, atuhambakana chikupu.

Yesu apwilenga mwilu naKalunga. Apwile MwanaKalunga wakushipilitu chipwe ngwetu kangelo. Uno Kalunga atengele navangelo veka chipwe ngwetu vana venyi veka vakushipilitu tahi?— Mukiko vene, atengele vavavulu chikuma. Ava vangelo navakivo nawa vatwama nangolo chikuma kutuhambakana yetu.—Samu 104:4; Ndanyele 7:10.

Nawanuka lijina lyakangelo uze ahanjikile kuli Maliya?— Apwile Ngavalyele. Ngavalyele alwezele Maliya ngwenyi mwana mwakasema mwakapwa MwanaKalunga. Kalunga anungulwile kuyoya chaMwanenyi wakushipilitu nakuchihaka mujimo lyaMaliya mangana Yesu akasemuke nge kemba hamavu.—Luka 1:26, 27.

Uno chuma kana wachifwelela tahi nyi? Uno wafwelela chikupu ngwove Yesu apwilenga mwilu naKalunga tahi?— Mukiko vene, mwomwo Yesu ivene achitavilile. Jino Yesu atachikijile ngachilihi vyuma kanevi? Pamo omu Yesu apwile kanyike, Maliya amunangwilenga vyuma amulwezele Ngavalyele. NaYosefwe nawa pamo alwezelenga Yesu ngwenyi Kalunga ikiye apwile Ise.

Yesu omu vamumbapachishile, Kalunga ahanjikile mwilu ngwenyi: ‘Ou ikiye Mwanami.’ (Mateu 3:17) Kaha nawa haufuku uze shimbu kanda Yesu afwenga, alombele ngwenyi: “Ove Tata, Ove ngutohwese nayOve lyavene hamwe naupahu uze ngwapwilenga nawo nayOve hamwe shimbu apwile mavu achili kanda.” (Yowano 17:5) Eyo, Yesu alombele akinduluke cheka mwilu akatwame naKalunga. Uno mwahasa kuya nakutwama ngachilihi cheka mwilu?— Kuhasa kuya nakutwama cheka mwilu kuvanga Yehova Kalunga amwalumune cheka kupwa kangelo chipwe ngwetu mutu wakushipilitu uze kavamona namesoko.

Jino nangusaka kukuhulisa chihula chachilemu. Kutala vangelo vosena vapwa vamwaza tahi? Unashinganyeka ngwove ngachilihi?— Hashimbu yimwe, vangelo vosena vapwilenga vamwaza. Mwomwo Yehova ikiye avatengele, kaha nawa vyuma atenga Yehova vyosena vyapwa vyamwaza chikupu. Oloze kangelo umwe alyalumwine ivene nakupwa wamupi. Uno chapwile ngachilihi ngocho?

Hakusaka twijive omwo chapwile, twatela kukinduluka cheka kunyima halwola luze Kalunga atengele lunga napwevo vakulivanga, Alama naEve. Vatu vamwe veji kwambanga ngwavo echi chihande chapwa hichishimo chize valinga chakutaka. Oloze Mulongeshi Wamunene atachikijile ngwenyi chihande kana chapwa chamuchano.

Omu Kalunga atengele Alama naEve, avahakile mulitepa lyamwaza vavulukile ngwavo Etene. Litepa kana lyapwile Palachise. Ngachize, vatelele kupwa navana vavavulu, nakutunga tanga yayinene nakutwama muPalachise haya myaka yosena. Oloze kwapwile chuma chimwe chachilemu vatelele kulinangula. Chuma kana chikiko vene echi tunashimutwilaho lyehi. Tutale nge natuhasa kuchanuka.

Yehova alwezele Alama naEve ngwenyi vanahase kulya tuhu mihako yakumitondo yosena yapwile muze mulitepa. Oloze avakanyishile kaha kulya kumutondo umwe. Kalunga avalwezele vyuma navikavasolokela nge navakalya kumutondo kana. Avalwezele ngwenyi: ‘Navakafwa chakufwa.’ (Kuputuka 2:17) Uno chuma muka vatelele kulinangula vaAlama naEve?—

Vatelele kulinangula kwononoka. Muchano vene kuyoya chapendamina hakwononoka kuli Yehova Kalunga! Kachatelemoko kuli vaAlama naEve kuhanjika kaha hakanwa ngwavo navamwononokanga. Oloze vatelele kuchisolola muvilinga vyavo. Kachi nge vamwononokele Kalunga, kachi vasolwele nge vamuzanga nakusaka apwenga Muka-kuvayula. Kaha nawa kachi vayoyele muPalachise haya myaka yosena. Jino chasolwele ika omu valile kuze kumutondo?—

Chasolwele nge kavasakwililile Kalunga havyuma vyosena avahanyineko. Kachi nge wapwile yove, kutala kachi wamwononokele Yehova nyi?— Hakavanga vaAlama naEve vamwononokele Kalunga. Oloze kwapwile umwe avahambakanyine ngolo, uze ongele Eve. Amulingishile alikange kuli Yehova. Uno iya venyou?—

Mbimbiliya yamba ngwayo kwapwile linoka umwe ahanjikile kuli Eve. Oloze nganomu watachikiza lyehi, linoka keshi kuhanjikako. Nyi ahashile kuhanjika ngachilihi?— Kangelo umwe alingishile linoka asoloke nge ikiye apwile nakuhanjika. Oloze ou kangelo ikiye apwile nakuhanjika. Ou kangelo aputukile kushinganyeka vyuma vyavipi. Asakile kachi Alama naEve vamulemesenga ikiye. Asakile ngwenyi vamwononokenga ikiye. Asakile kutambula chihela chaKalunga.

Ngachize, ou kangelo wamupi aluwanganyishile vishinganyeka vyaEve. Azachishile linoka, nakulweza Eve ngwenyi: ‘Kalunga kamilwezele muchanoko. Kamweshi kufwako nge namulya kumutondo kanou. Namukapwa namangana nge Kalunga.’ Uno nge wapwile yove, kachi wetavilile vyuma ahanjikile tahi?—

Eve jino aputukile kuzanga vyuma vize kavamuhanyine kuli Kalungako. Alile muhako wakumutondo uze vamukanyishile. Kaha nawa ahanyineko lunga lyenyi. Alama kafwelelele vyuma ahanjikile uze linokako. Oloze azangile chikuma Eve kuhambakana Kalunga. Ngachize, naikiye alile kuze kumutondo.—Kuputuka 3:1-6; WaChimoteu 1, 2:14.

Vyuma muka vyafumineho?— Alama naEve vapwile jino vatu vakuhona kukupuka mwosena, kaha vashinakajiwile nakufwa. Hakupwa jino vakuhona kukupuka mwosena, navana vavo vosena nawa vapwile vakuhona kukupuka mwosena, kaha navakivo vashinakajiwile, nakufwa. Kalunga kalyongeleko! Muchano vene, kuyoya chapendamina hakwononokela Kalunga. (Wavaka-Loma 5:12) Mbimbiliya yatulweza ngwayo uze kangelo ongele Eve, vamuvuluka ngwavo Satana Liyavolo, kaha nawa vangelo vakwavo vaze valumukile kupwa vavapi vavavuluka ngwavo vandemone.—WaYakova 2:19; Kusoloka 12:9.

Jino unevwishisa ovyo vyalingishile uze kangelo wamwaza vatengele kuli Kalunga kupwa wamupi tahi?— Mwomwo aputukile kushinganyeka vyuma vyavipi. Asakile naikiye apwenga wamulemu chikuma. Atachikijile ngwenyi Kalunga alwezele Alama naEve vaseme vana, shikaho asakile vosena vakamulemesenga ikiye. Ngachize Liyavolo asaka vatu vosena valikange kuli Yehova. Kaha nawa afwila kutuhungumwisa navishinganyeka vyavipi.—WaYakova 1:13-15.

Liyavolo eji kwambanga ngwenyi mutu naumwe pimbi azanga Yehova. Ikiye ngwenyi yove nayami Kalunga katwamuzangako, kaha navyuma eji kutulwezanga Kalunga katwasaka kuvilingako. Eji kwambanga nawa ngwenyi tweji kwononokanga Yehova kuvanga kaha nge tuli nakutwama kanawa. Kutala Liyavolo ahanjika mwakwoloka tahi? Uno mukiko twapwa vene ngocho nyi?

Mulongeshi Wamunene ambile ngwenyi Liyavolo apwa muka-makuli! Yesu asolwele nge azangile chikuma Yehova hakumwononokela. Kaha nawa Yesu kononokele Kalunga halwola luze kaha apwile nakutwama kanawako. Amwononokelenga shimbu yosena, nahalwola luze amwenenga ukalu mukuyoya chenyi. Alyononwene kuli Yehova swi nakukufwa chenyi. Echi chikiko chalingishile naKalunga numba amusangule apwenga nakuyoya haya myaka yosena.

Shikaho, iya jino nawamba ngwove apwa muka-kole wetu wamunene?— Weka wauchi shina Satana Liyavolo. Unahase kumumona tahi?— Pimbi, kaweshi kuhasa kumumonako! Chipwe ngocho, twatachikiza vene ngwetu kwatwama, kaha atuhambakana ngolo nawa. Jino iya ahambakana Liyavolo ngolo?— Yehova Kalunga ikiye chikupu amuhambakana. Ngachize, tunatachikiza kanawa jino ngwetu Kalunga nahase kutukinga.

Tanga vyaUze kaha twatela kulemesa: Lushimbi lwamuchivali 30:19, 20; Yoshuwa 24:14, 15; Vishimo 27:11; Mateu 4:10.

[Muvwimbimbi halifwo 47]

Vyuma muka vize pamo Maliya naYosefwe valwezelenga Yesu?

[Muvwimbimbi halifwo 48, 49]

Vyuma muka vize kachi vyalingishile Alama naEve kuyoya haya myaka yosena muPalachise?

[Muvwimbimbi halifwo 50]

Iya alingishile linoka numba ahanjike kuli Eve?

[Mivwimbimbi halifwo 50]

Vyuma muka vyasolokele kuli Alama naEve omu valikangile kuli Kalunga?