Kapetulu 10

Ngolo Atwama Najo Yesu Hali Vandemone

NAWANUKA ovyo vyalingishile numba kangelo umwe waKalunga apwenga Satana Liyavolo tahi?— Chuma chamulingishile numba alikange kuli Kalunga shina asakile ngwenyi vamulemese. Uno kwapwile vangelo veka vakavangijile Satana tahi?— Eyo, kuvapwile. Mbimbiliya yavavuluka ngwayo ‘vangelo jaSatana,’ chipwe vandemone.—Kusoloka 12:9.

Uno ava vene vangelo vavapi chipwe vandemone vafwelela muli Kalunga tahi?— Mbimbiliya yamba ngwayo, ‘Vandemone vetavila ngwavo Kalunga kwatwama.’ (WaYakova 2:19) Oloze vali nakumwivwanga woma chikuma. Mwomwo vatachikiza ngwavo Kalunga mwakavanongesa havyuma vyavipi vali nakulinganga. Uno vyuma muka vali nakuhengesa?—

Mbimbiliya yamba ngwayo vangelo kana vasezele vihela vyavo mwilu nakwiza hamavu nakulyalumuna vatu. Valingile ngocho mwomwo vasakile kulisavala namapwevo vamwaza vahano hamavu. (Kuputuka 6:1, 2; WaYuta 6) Uno kulisavala chapwevo nalunga wachijiva nyi?—

Kulisavala chapwevo nalunga chalumbununa pwevo nalunga kusavala hamwe mujila yakulipwila. Kaha kufumaho pwevo mwemita, kaha kemba hikukola mujimo. Oloze chapwa chakuhenga kuli vangelo kulisavala namapwevo. Kalunga asaka ngwenyi lunga napwevo vaze valimbata vakivo kaha vatela kulisavala, mangana nge kemba nasemuka, vakamulame kuli vaze vene valunga napwevo.

Omu vangelo vavwalile mijimba yautu nakulisavala namapwevo vahamavu, vasemene vakemba vaze vapwile vikishikishi omu vakolele. Vapwile vikenya, kaha vapwile nakuvulumunanga vatu. Shikaho Kalunga anehele livaji nakunongesa vaze vikishikishi hamwe navatu vavapi vosena. Oloze alwezele Nowa atunge wato waunene wakuyowelamo vatu vavandende vaze valingilenga mwakwoloka. Mulongeshi Wamunene ambile ngwenyi vyuma vyalingiwile haLivaji vyapwa vyavilemu ngocho twatela kuvyanukanga.—Kuputuka 6:3, 4, 13, 14; Luka 17:26, 27.

Unejiva ovyo vyasolokele kuli vaze vangelo vavapi omu lyejile lize Livaji?— Vazulile yize mijimba yautu valitungililile vavene nakukinduluka cheka mwilu. Kavapwile cheka vangelo jaKalungako, oloze vapwile jino hivangelo jaSatana chipwe ngwetu vandemone. Jino vyuma muka vyalingiwile kuli vaze vana vavo vapwile vikishikishi?— Vosena vafwile kuLivaji. Navatu veka vosena vaze vahonene kwononoka kuli Kalunga vafwile.

Kufuma vene kushimbu yaLivaji, Kalunga ketavishile ava vandemone valyalumune cheka nakupwa namijimba yautuko. Numba tuhu katweshi kuhasa kuvamona nameso etuko, oloze vandemone vafwila kutangula vatu kulinga vyuma vyavipi. Vali nakuneha lamba kuvatu nyi kuya muze, mwomwo vavahangile mwilu nakuvambila hano hamavu.

Uno watachikiza ovyo twahonena kumona vandemone hano hamavu tahi?— Mwomwo vatwama namijimba yashipilitu. Oloze twejiva ngwetu kuvatwama chikupu. Mbimbiliya yamba ngwayo Satana ali ‘nakuhungumuna vatu hamavu,’ kaha vandemone jenyi vakivo vali nakumukafwa kulinga ngocho.—Kusoloka 12:9, 12.

Kutala nayetu vanahase kutuhungumuna kuli Liyavolo navandemone jenyi nyi?— Eyo, vanahase nge katwazangamineko. Oloze katwatela kwivwa womako. Mulongeshi Wamunene ahanjikile ngwenyi: ‘Liyavolo keshi kuhasa kunguhungumwisako.’ Shikaho nge natupandama kuli Kalunga, kaha mwatukinga kuli Liyavolo navandemone jenyi.—Yowano 14:30.

Chapwa chachilemu kuli etu kwijiva vyuma vyavipi vasaka vandemone kutweseka ngwavo tulinge. Achishinganyekeho kanawa. Uno vyuma muka vyavipi valingile vandemone omu vejile hano hamavu?— Shimbu kanda kupwenga Livaji, ava vangelo valisavalilenga namapwevo, chuma chize chapwile chakuhenga kuchilinga kuli vangelo. Namakumbi ano nawa, vangelo veji kuwahililanga nge vatu navahona kukavangiza jishimbi jaKalunga jakanyisa kulisavala chalunga napwevo. Mana nguchikuhulise, Uno veya kaha vatela kulisavala?— Unahanjika mwakwoloka, kuvanga kaha vaze valimbata.

Makumbi ano vakweze vamalunga navava vamapwevo veji kulisavalanga, oloze chuma kana chapwa chakuhenga. Mbimbiliya yahanjika nge lunga atwama ‘namujimba wenyi’ chipwe ngwetu usonyi wenyi. (VyavaLevi 15:1-3) Kaha napwevo nawa atwama nausonyi wenyi. Yehova atengele ou usonyi wapwevo nalunga nakwamba nge vaze valimbata kaha vakivo vatela kulivwisawo kuwaha. Vandemone veji kwivwanga kuwaha nge vatu navalinga vyuma vize akanyisa Yehova. Chakutalilako, vandemone veji kwivwanga kuwaha nge kanyike walunga nayou wapwevo navalihemesa kuusonyi wavo. Etu ngwetu katwasaka kwivwisa vandemone kuwahako, nyi mweka?—

Kuli chuma chikwavo nawa chize vasaka vandemone oloze ajinda Yehova. Wachijiva chuma kana?— Chikiko ulyanyi. (Samu 11:5) Ulyanyi wapwa vilinga vyaukenya vyakuvulumuna vatu. Anuka ngwove evi vikiko valingilenga vikishikishi, vana vavandemone.

Vandemone nawa vasaka kwivwisa vatu woma. Shimbu jimwe veji kulilingisanga kupwa nge hivatu vaze vafwa lyehi. Vanahase kulondezeza namazu avatu vaze vafwa lyehi. Eyi yikiko jila vandemone veji kwongelangamo vatu vavavulu mangana vashinganyeke nge vafu vapwa vavatonyi, kaha vanahase kuhanjika navatu. Mukiko vene, vandemone veji kulingisanga vatu vavavulu vafwelele muvakulu.

Shikaho twatela kuzangama kuchina navatuhungumuna kuli Satana navandemone jenyi. Mbimbiliya yatuhuhumuna ngwayo: ‘Satana eji kulyalumunanga nakusoloka nge kangelo wamwaza, kaha navangamba jenyi nawa mukiko veji kulinganga vene ngocho.’ (Wavaka-Kolinde 2, 11:14, 15) Chikupu vene vandemone vapwa vavapi. Tuchishishike kanawa tuwane omu vanahase kutulingisa mangana tuvalondezeze.

Uno vatu veji kulinangwilanga kulihi vyaulyanyi navyuma vyauvumbi, navyuma vyavandemone, navyavakulu?— Veji kuvitalanga havisaji vyamivwimbimbi, nahajikopyuta nahajiInternet, kaha nahakutanganga mikanda yimwe yahanjika havyuma kana. Uno kutalanga vyuma kana chinahase kutulingisa tupandame kuli Kalunga tahi nyi kuli Liyavolo navandemone jenyi? Ove ngwove ngachilihi?—

Uno ove ngwove iya asaka etu kwivwilila nakutalanga vyuma vyavipi?— Satana navandemone jenyi. Jino ove nayami twatela kulinga vyuma muka?— Twatela kutanga, nakwivwilila nakutalanga vyuma vyamwaza vize vinahase kutukafwa kuzachila Yehova. Unahase kwanukako vyuma vimwe vyamwaza vize tunahase kulinga?—

Nge natulinganga vyuma vyamwaza, kaha katwatela kwivwanga woma vandemoneko. Yesu atwama nangolo kuhambakana vandemone, kaha veji kumwivwanga woma. Likumbi limwe vandemone vahanjikile kuli Yesu ngwavo: “Uneza nakutunongesa tahi?” (Mako 1:24) Kutala katweshi kukawahililako omu Yesu mwakanongesa Satana navandemone jenyi?— Olozenyi oholyapwa twatela kwijiva ngwetu Yesu mwatukinga kuvandemone kachi nge natupandama kuli ikiye nakuli Ise wamwilu.

Tutange vyuma twatela kulinga hali WaPetulu 1, 5:8, 9 naWaYakova 4:7, 8.

[Muvwimbimbi halifwo 57]

Vyuma muka vyavipi valingile ava vangelo?

[Muvwimbimbi halifwo 58]

Uno mwomwo ika lamba linatohwela chikuma hano hamavu kuhambakana kushikulu?

[Muvwimbimbi halifwo 60]

Vyuma muka vinahase kusoloka nge natutalanga vyuma vyaulyanyi?

[Muvwimbimbi halifwo 61]

Vyuma muka vyamwaza twatela kulinganga?