Kapetulu 17

Vyuma Vyeji Kutwivwisanga Kuwaha

TUVOSENA twasaka kupwa vakuwahilila, nyi ngachilihi?— Oloze vatu vavavulu kavapwa vakuwahililako. Uno wejiva ovyo vyavahonesa kupwa vakuwahilila tahi?— Mwomwo kavalinangula vyuma vyeji kunehanga kuwahililako. Vakivo veji kushinganyekanga nge kupwa navyuma vyavivulu chikiko cheji kunehanga kuwahilila. Oloze numba vapwa navyuma kana, kuwahilila chavo kacheshi kushimbulako.

Mulongeshi Wamunene avulukile vyuma vyavilemu vinahase kuneha kuwahilila. Ambile ngwenyi: “Kuhana cheji kwivwisanga chikuma kuwaha kuhambakana kutambula.” (Vilinga 20:35, NW) Uno vyuma muka vinahase kutulingisa kupwa vakuwahilila?— Vyapwa kuhananga vakwenu vyuma nakuvalingilangako nawa vyuma vimwe. Uno watachikiza ngocho tahi?—

Achishinganyekeho kanawa. Uno Yesu alumbunwine ngwenyi mutu uze navahana wana keshi kuwahililako nyi?— Pimbi, kalumbunwine ngochoko. Ngunejiva ngwami nayove wasaka kutambula mawana?— Eyo, omu mukiko asaka mutu himutu. Tuvosena tweji kwivwanga kuwaha nge natutambula vyuma vyamwaza.

Oloze Yesu ambile ngwenyi kuhana cheji kunehanga kuwahilila. Uno iya ahana vyuma vyavivulu kuvatu kuhambakana vatu vosena?— Apwa Yehova Kalunga.

Mbimbiliya yamba ngwayo Kalunga “eji kuhananga vosena kuyoya nakuhwima navyuma vyosena.” Eji kunokesanga vula nakutuhana musana mangana vimbuto vikole numba jino tuwane kulya. (Vilinga 14:17; 17:25) Evi vikiko Mbimbiliya yamuvulukila Yehova ngwayo “Kalunga wakuwahilila”! (WaChimoteu 1, 1:11, NW) Kuhana vyuma kuvatu hichuma chimwe cheji kwivwisanga kuwaha Kalunga. Nayetu nawa natwivwanga kuwaha nge natuhananga vakwetu.

Jino vyuma muka natuhasa kuhana vakwetu? Uno ove ngwove vyuma muka?— Shimbu jimwe wana wakuhana vakwetu weji kufwikanga jimbongo jajivulu. Wana wamuchitanda wasaka kuulanda najimbongo. Shikaho nge uli nakusaka kuhana wana wangachize, kaha watela kulamako jimbongo numba uhase kulanda wana kana.

Olozenyi keshi wana wosena valinga wakulanda muchitandako. Chakutalilako, nge kunazumu chikuma, mutu nahase kuhana mukwavo meya atuta mangana anwenga nakukumisa lipwila. Nge nauhana meya kumutu uze nafu lipwila, kaha nauwahilila mwomwo yakuhana chove.

Pamo likumbi limwe namukatwa chindanda navanoko. Namukevwa kuwaha. Uno mwivwa kuwaha kulya chindanda chosena uka wove nyi mwivwa kuwaha kuhanako vakwenu?— Muchano vene muhanako namasepa jove valyengako. Kutala unakushinganyeka kulinga ngocho likumbi limwe nyi?—

Mulongeshi Wamunene navaposetolo jenyi vosena vatachikijile kuwahilila chatwama mukuhana. Uno unejiva chuma vahanyinenga vatu?— Chuma vahanyine chapwile chamwaza chikuma mukaye kosena! Valinangwile muchano waKalunga, kaha vawazanyine kuvakwavo. Vambulwilenga mujimbu wamwaza chakuzeneka kuvafweta jimbongo.

Kaposetolo Paulu nasepa lyenyi Luka valiwanyine napwevo umwe uze apwile muka-kuzumbula nachisambo. Vamuwanyine kulwiji. VaPaulu naLuka vayile kuze kulwiji mwomwo vevwile ngwavo kwapwile chihela chakulemesela Kalunga. Kahomu vaheteleko, vawanyine mapwevo vali nakulomba.

Kaha Paulu aputukile kwambulwila vaze mapwevo mujimbu wamwaza waYehova Kalunga naWangana wenyi. Pwevo umwe Luchiya apwile nakwivwilila kanawa kuvyuma apwile nakuhanjika Paulu. Kufumaho, Luchiya asakile alingeko chuma chimwe chakusolola nge azangile chikuma mujimbu wamwaza uze vamwambulwilile. Kaha avalembelelele vaPaulu naLuka ngwenyi: “Kachi nge munangumono ngwenu, ngumuka-kufwelela kuli Mwata, ingilenu muzuvo yami mutwamengamo.” Kaha avambachile nakuya navo kuzuvo yenyi.—Vilinga 16:13-15.

Luchiya awahililile hakumutambukila kuli vangamba jaKalunga kuzuvo yenyi. Avazangile mwomwo vamunangwile mujimbu waYehova naYesu, nomwo vatu navakayoya haya myaka yosena. Awahililile chikuma, ngachize avahanyine kulya nakuvahana chihela chamwaza chakuhwimina. Shikaho zumbu yaLuchiya yamulingishile awahilile. Echi chikiko twatela kwanukanga shimbu yosena. Shimbu jimwe mutu nahase kutulweza ngwenyi tuhane wana. Oloze nge etu vavene katwasuulukile hakuhana wana wetuko, kaha katweshi kuwahililako.

Chakutalilako, twambenga ngwetu uli namaswiti ove akulya. Kaha jino nangukulweza ngwami uhaneko mukwenu naikiye alyenga, kutala nauwahilila kumuhanako nyi?— Nyi ngachilihi nge uli namaswiti halwola muliwana nasepa lyove wazanga chikuma, kutala kaweshi kuhasa kuwahililako nge muhanako sepa lyove namuchima wove wosena?—

Shimbu jimwe twasaka kuhana vyosena tuli navyo kuli mukwetu uze twazanga chikuma. Omu mukiko twatela kwivwanga nge tuli nazangi yakuzanga chikuma Kalunga.

Mulongeshi Wamunene atachikijileko pwevo umwe wakuhutwa uze azangile chikuma Kalunga. Amumwene mutembele kuYelusalema. Apwile kaha najimbongo jajindende jivali; jikiko kaha vene apwile najo kunahu. Kaha ahakilemo josena muchikasha chamawana, chipwe ngwetu wana wakutembele. Naumwe amulwezele kulinga ngocho wauchi. Vatu vavavulu muze mutembele kavatachikijile vyuma alingile uze pwevoko. Zangi yenyi yakuzanga Yehova namuchima wenyi wakufwila kuhana vikiko vyamulingishile numba ahane jimbongo josena apwile najo. Eyo, kuhana chenyi chamulingishile awahilile. —Luka 21:1-4.

Kwatwama jijila jajivulu jakuhanyinamo wana. Kutala unahase kuvulukako jijila jimwe nyi?— Kachi nge natuhananga wana namichima yetu yosena, kaha natuwahililanga. Echi chikiko atulweza Mulongeshi Wamunene ngwenyi: “Hanenunga kuli vakwenu.” (Luka 6:38) Kachi nge natuhananga kuli vakwetu, kaha natuvevwisanga kuwaha. Kaha natupwanga lika vakuwahilila chikuma.

Tutange jino Visoneka vikwavo vyahanjika hakuhana chize cheji kunehanga kuwahilila, Mateu 6:1-4; Luka 14:12-14; Wavaka-Kolinde 2, 9:7.

[Muvwimbimbi halifwo 92]

Mwomwo ika Yehova apwila “Kalunga wakuwahilila”?—NW

[Muvwimbimbi halifwo 93]

Uno chimwe chilihi nachihasa kukulingisa kupwa uwakuwahilila, kuhanako vakwenu chindanda chove tahi nyi kulya kaha uka wove?

[Muvwimbimbi halifwo 94]

Uno vyuma muka ali nakuhanjika Luchiya kuli Paulu naLuka?

[Muvwimbimbi halifwo 94]

Mwomwo ika Luchiya nawahilila hakuzumbula Paulu naLuka?

[Muvwimbimbi halifwo 96]

Mwomwo ika ou tuliwe awahililile hakuhana jimbongo josena jize apwile najo?