Kapetulu 33

Yesu Nahase Kutukinga

UNO washinganyeka ngwove omu Yesu alingile hanakolo lyehi nakwijiva mujila vamukingililemo te achili kanyike, kutala alombele kuli Yehova nakumusakwilila tahi?— Uno washinganyeka nawa ngwove omu akolele Yesu asakwililile Maliya naYosefwe hakumulweza ngwavo vamukingile te achili kanyike hakumuchinyishila kuEjipitu tahi?—

Oholili Yesu keshi kembako kaha nawa katwama hano hamavu ngana muze apwileko. Vatu vamwe vachili nakushinganyeka nge Yesu achili lika kemba uze ali mwakulila vimuna, ngwetu?— Unjiho wakusolola vishinganyeka vyavo weji kusolokanga halwola lwaKulisimasi. Nauwana vanazezeleka chipwe kulamika hajimbango mivwimbimbi yaYesu yakumusolola kemba.

Uno wetavila ngwove Yesu kwatwama numba tuhu keshi hano hamavuko nyi?— Yesu vamusangwile kuvafu, kaha oholili hiMwangana wamulemu mwilu. Jino washinganyeka ngwove Yesu nahase kulinga ngachilihi numba akinge vaze veji kumuzachilanga?— Chakutalilaho, Yesu omu apwile hamavu, asolwele chikupu mwakukingila vaze vamuzanga. Mana tutale omu alingile likumbi limwe natumbaji twenyi omu vapwile muwato.

Likumbi jino hichingoloshi, kaha Yesu napunga nakunangula musana wosena kuChijiva ChakuNgalileya chachinene chikuma chakuheta kafwe jikilomita 20 muusuku, kaha muwihi jikilomita 12. Ngocho, Yesu himwalweza tumbaji twenyi ngwenyi: “Tuzaukenu tuyenu musali yachijiva.” Shikaho vasunwine wato nakuzauka chijiva. Yesu jino nazeye chikuma, kahomu unasunuka wato himwaya nakusavala kutongo yakunyima oku mutwe nasachila hamusau chipwe ngwetu hapilo. Kashimbu kakandende kaha woho himutulo.

Tumbaji twenyi hanga chivatona mangana vazaule wato. Kukuputuka kavamwene ukaluko, oloze kashimbu kakandende kaha hinakwiza peho yayinene chikuma nakukatula makimba amanene. Makimba jino hinawaputuka kuliveta hawato nakwingisa meya muwato.

Tumbaji jino vevwile woma ngwavo navavomba. Oloze Yesu kevwile womako. Ikiye kwenyi hanga nasavalila tulo kutongo yawato. Tumbaji twenyi jino hikuya nakumuhindula ngwavo: ‘Ove Mulongeshi, Ove Mulongeshi, tuyovole natuvomba.’ Yesu jino hikuhinduka nakuunjisa peho namakimba ngwenyi: “Hola kulu, unda.”

Hahaze vene peho hinayitula, nachijiva hinachiunda. Vaze tumbaji valikomokelele mukanwa hululu! Mwomwo kanda vachimoneho lyehi chuma chakukomwesa nganako. Kaha hinavalihwojola ngwavo: ‘Unwou himutu muka venyou, wakulinga mwahanjikila peho nameya, kaha hinavimwononoka?’—Luka 8:22-25; Mako 4:35-41.

Uno yove ngwove Yesu apwa iya?— Ikiyenyi watachikiza okwo eji kuwananga ngolo joseneji jajinene ngana?— Tumbaji twenyi te kavatelele kwivwa woma okunyi vali naYesuko, mwomwo kapwile mutu wanganaveneko. Yesu alingilenga vyuma vyakukomwesa vize mutu naumwe pimbi nahase kuvilinga. Mana ngukulweze chuma chikwavo nawa alingile Yesu omwo kwejile peho yeka yayinene.

Likumbi lyeka nachingoloshi omu Yesu alwezele tumbaji twenyi vazauke cheka muwato vayenga musali yachijiva. Yesu hikuya kupili kwakuhona vyema uka wenyi nakulomba kuli Ise, Yehova Kalunga.

Tumbaji twenyi vengilile muwato nakuputuka kuzaula. Oloze nakushimbula chiku peho hinayiputuka kuhuhwa chikuma. Lwola kana lwapwile lwola lwaufuku. Vaze malunga chivatwalaho lika kuzaula. Oloze vapwile nakulishina kaha, wato kutambuka chikuma chiku mwomwo yapeho yili nakuhuhwa chikuma. Wato uli nakutengatenga namakimba kaha meya nawa ali nakwingila muwato. Vaze malunga vali nakusaka kachi vahete kutunda oloze kuhasa chiku.

Yesu achili kupili uka wenyi. Kuze kupili ashimbwileko chikuma. Oloze himwamona ngwenyi tumbaji twenyi vali muponde yamakimba amanene. Ngocho, himwashikumuka kufuma kupili apwanga nakwiza kungenge yachijiva. Yesu mwasaka jino kukafwa tumbaji twenyi, kaha hikuputuka kutambuka hameya nakuya kuli vakivo.

Uno vyuma muka navisoloka nge naweseka kutambuka hameya?— Unahase kujiminyina chipwe kunwina jindondo. Oloze Yesu pimbi mwomwo akwechi ngolo jakulipwila. Yesu himwatambuka tunda yayisuku hameya nakuya kuze kuli wato. Omu kwaputukile kucha, tumbaji twenyi hinavamona Yesu ali nakwiza kuli vakivo nakutambuka hameya. Oloze vakivo kufwelela vyuma vali nakumona chiku, ngocho vevwile woma chikuma nakuputuka kutetumuka. Yesu jino himwavalweza ngwenyi: “Likolezezenu, yami vene, kanda mwivwa womako.”

Kaha jino omu nalingi Yesu muwato ngolongo, nayize peho vene hipimbi. Tumbaji twenyi hivanalikomokela cheka. Hinavalimbila kumahinji aYesu ngwavo: “Mwamuchano vene, Ove uMwanaKalunga.”—Mateu 14:22-33; Yowano 6:16-21.

Kutala kachi kachawahile kupwa hashimbu yize nakumona vyuma vyosena vize alingile Yesuko nyi?— Uno watachikiza vyuma vyalingishile Yesu numba alinge vyuma vyakukomwesa tahi?— Yesu azangile chikuma tumbaji twenyi nakusaka kuvakafwa. Chikwavo nawa asolwele ngolo jenyi jajinene jize mwakazachisa kulutwe mwaMuka-kuyula muWangana waKalunga.

Namakumbi ano nawa, Yesu eji kuzachisanga ngolo jenyi mangana akinge tumbaji twenyi kuli Satana uze asaka kuvahonesa kwambulwila vakwavo vatu Wangana waKalunga. Oloze Yesu keshi kuzachisa ngolo jenyi mangana akinge tumbaji twenyi kuhona kuviza chipwe kuvoka kumisongo yavoko. Numba navaposetolo jaYesu vosena kutwala muze vafwile. Yakova ndumbwaYowano vamujihile, kaha Yowano yavene vamuhakile mukamenga.—Vilinga 12:2; Kusoloka 1:9.

Chochimwe namakumbi ano nawa, numba vatu vazachila Yehova chipwe pimbi, vosena veji kuvizanga nakufwa. Oloze omu mwakaputuka kuyula Yesu mwaMwangana wafulumende yaKalunga, vyuma navikalumuka. Kakweshi mutu mwakevwa womako mwomwo Yesu mwakazachisa ngolo jenyi nakukisula vosena vaze veji kumwononokanga.—Isaya 9:6, 7.

Visoneka vikwavo vyasolola ngolo jajinene atwama najo Yesu uze vatongola kuli Kalunga kupwa Muka-kuyula muWangana waKalunga shina: Ndanyele 7:13, 14; Mateu 28:18; naWavaka-Efwesu 1:20-22.

[Mivwimbimbi halifwo 172]

Uno Yesu weji kumushinganyeka ngwove apwa mwangana wangolo tahi nyi ngwove apwa kemba?

[Muvwimbimbi halifwo 173]

Yesu ali nakuhanjika ika kupeho namakimba?

[Muvwimbimbi halifwo 174]

Yesu alingilile ika vyuma vyakukomwesa?

[Muvwimbimbi halifwo 176]

Yesu eji kukinganga ngachilihi tumbaji twenyi makumbi ano?