Kapetulu 41

Vanyike Vaze Veji Kwivwisanga Kalunga Kuwaha

UNO mukushinganyeka chove ngwove kanyike muka wahano hamavu uze evwishile chikuma kuwaha Yehova?— Mwanenyi Yesu. Mana tushimutwile vyuma alingile Yesu numba Ise wamwilu evwenga kuwaha.

Tanga yaYesu yapwile kuchihela vatambukilenga makumbi atatu kufuma kuYelusalema kuze kwapwile tembele yaYehova. Yesu avulukilenga eyi tembele ngwenyi “zuvo yaTata.” Yesu natanga yenyi vayilenga kuYelusalema hamwaka hamwaka kuPaseka.

Mwaka umwe, omu Yesu apwile namyaka 12, tanga yenyi hinayikinduluka kwimbo omu chakumine chilika chaPaseka. Jino omu vatulile hakachi mangana vasavale, vamwene ngwavo Yesu kapwile hali vatanga javo namasepa javoko. Hahaze vene Maliya naYosefwe vakindulukile kuYelusalema nakutondatonda Yesu. Unashinganyeka ngwove apwile kulihi?—

Yesu vamuwanyine mutembele. Apwile nakwivwilila kuli valongeshi nakuvehwojola. Kaha akumbulwilenga nawa vihula vyosena vize vamuhulishilenga. Vosena valikomokelele hakukumbulula chenyi chamwaza. Unamono jino vyuma vyalingishile Kalunga evwile Mwanenyi kuwaha, ngwetu?—

Maliya naYosefwe vevwile nakumichima yavo hwo omu vawanyine Yesu. Oloze Yesu kwenyi kalizakaminyineko. Ejivile ngwenyi tembele hichihela chamwaza kutwama. Shikaho avehwile ngwenyi: ‘Kamwatachikijileko ngwenu ngwatela kupwa muzuvo yaTata nyi?’ Yesu atachikijile ngwenyi tembele yapwile zuvo yaKalunga, ngocho azangile kutwamamo.

Kufumaho Maliya naYosefwe vamumbachile Yesu wamyaka yakusemuka 12, nakukinduluka nenyi kuNazaleta. Unashinganyeka ngwove Yesu amwenenga ngachilihi visemi jenyi?— Mbimbiliya yalumbununa ngwayo ‘ononokelenga kuli vakivo.’ Uno echi chalumbununa ika?— Akavangijilenga vyosena vamulwezelenga visemi jenyi. Alingilenga vyuma vamutuminenga, vyakufwana nge kuya nakuswita meya.—Luka 2:41-52.

Achishinganyeke hachumechi: Yesu ononokelenga visemi jenyi vakuhona kukupuka mwosena numba tuhu ikiye apwile wakukupuka mwosena. Kutala echi chevwishile Kalunga kuwaha nyi?— Mukiko vene, mwomwo Mazu aKalunga alweza vanyike ngwawo: “Ononokenunga kuli visemi vyenu.” (Wavaka-Efwesu 6:1) Nayove nawa unahase kwivwisa Kalunga kuwaha nge nawononokanga visemi jove ngana muze alingile Yesu.

Jila yikwavo nawa muhasa kwivwishilamo Kalunga kuwaha shina kulwezako vakwenu mujimbu waKalunga. Vatu vamwe vanahase kwamba ngwavo kachatamoko kuli vanyike vavandende kwambulula mujimbu waKalunga. Oloze omu vatu vamwe vasakile kukanyisa vanyike kwambulula mujimbu waKalunga, Yesu avambile ngwenyi: ‘Kanda muchitange muMazu-vasoneka ngwavo, mutunwa twavakemba munalovoka kwalisa?’ (Mateu 21:16) Shikaho, nge tunasake kaha twatela kulwezako vakwetu ngwetu Yehova apwa hiKalunga wamwaza chikuma. Kaha Kalunga mwevwa kuwaha chikuma nge natulinga ngocho.

Uno kuli natuhasa kulinangwila vyuma vyaKalunga vize tunahase kulweza vatu?— Tunahase kulinangulavyo kuhichila muchilongesa chaMbimbiliya chahazuvo. Oloze tunahase kulinangula vyavivulu kuze veji kuliwanyinanga vatu jaKalunga nakulilongesa. Uno natuhasa kwijiva ngachilihi vatu jaKalunga?—

Uno vatu kana veji kulinganga ika kukukunguluka chavo? Kutala veji kunangulanga vyamuMbimbiliya nyi? Uno veji kuyitanga nakuyishimutwila tahi? Eyi yikiko jila yakwivwilila kuli Kalunga, nyi mweka?— Kukukunguluka chavaka-Kulishitu kukiko twatela kwivwa vyuma ahanjika Kalunga, ngwetu?— Nyi ngachilihi nge vatu navamba ngwavo kawatela kukavangiza vyuma yahanjika Mbimbiliyako? Kutala unahase kumona vatu kana kupwa hivatu jaKalunga nyi?—

Achishinganyeke hachuma chikwavo nawa echi. Mbimbiliya yamba ngwayo vatu jaKalunga navakapwa “valijina lyenyi.” (Vilinga 15:14) Hakuwana nge Kalunga lijina lyenyi ikiye Yehova, tunahase kuhulisa vatu twivwenga nge navakivo Kalunga kavo Yehova. Nge navamba ngwavo chiku, kaha twatachikiza ngwetu kaveshi vatu jenyiko. Vatu jaKalunga vatela nawa kwambulwilanga vakwavo vyaWangana waKalunga. Vatela kusololanga zangi yavo vazanga Kalunga hakukavangiza jishimbi jenyi.—WaYowano 1, 5:3.

Nge watachikizako vatu vamwe veji kulinganga vyumevi, kaha watela kukunguluka navo nakulemesa Kalunga. Watela kwivwililanga kanawa hakukunguluka kanechi nakukumbulula vihula navahulisa. Omu mukiko alingile Yesu omu apwile muzuvo yaKalunga. Nge naulinganga vyosenevi, kaha nawivwisa Kalunga kuwaha ngana muze alingile Yesu.

Kutala unahase kuvulukako vanyike veka vamuMbimbiliya vaze vevwishile Kalunga kuwaha?— Chimoteu ikiye asolwele chakutalilaho chamwaza. Ise ketavilile Yehovako. Oloze naye Yunese nakakayenyi Lowise vakivo vapwile vaka-kwitava. Chimoteu avevwilililenga, kaha alinangwile vyaYehova.

Kaposetolo Paulu atambukilile chikungulwilo chapwile kuchihela atwaminenga Chimoteu oho Chimoteu te hanakoloko lyehi. Paulu amwene omu Chimoteu asakile kuzachila Yehova. Ngachize Paulu alwezele Chimoteu mangana valinunge hamwe mukuzachila Kalunga. Kweshokwo vayilenga valwezelenga vatu vyaYesu naWangana waKalunga.—Vilinga 16:1-5; WaChimoteu 2, 1:5; 3:14, 15.

Kutala muMbimbiliya mwatwama kaha vyakutalilaho vyavanyike vamalunga vevwishile Kalunga kuwaha tahi?— Chiku. Tala chakutalilaho chakanyike kapwevo wakaIsalele uze evwishile Kalunga kuwaha. Mushimbu yenyi, vaSulya navaIsalele kavalinwishilenga meyako. Likumbi limwe vaSulya valwile jita navaIsalele kaha hinavambata uze kanyike wapwevo nakumutwala muufunge. Vamutwalile kuzuvo yamukulwane wamaswalale, Namane. Kuze jino vamutengele ngamba yapwevo lyaNamane.

Namane avijile musongo wambumba. Ndotolo naumwe pimbi ahashile kumuka ou musongo kana. Oloze uze mwanapwevo wakaIsalele atachikijile ngwenyi ngamba yaKalunga wakulipwila vavuluka ngwavo kapolofweto nahase kumuka. Namane napuwenyi kavapwile vaka-kulemesa Yehovako. Kutala uze kanyike atelele kuvalweza vyapwile mumuchima wenyi tahi? Ove kachi walingile ngachili?—

Uze kanyike wapwevo avalwezele ngwenyi: ‘Kachi nge Namane mwaya kuli kapolofweto kaYehova muIsalele, kaha mwakamuka mbumba yenyi.’ Namane evwilile mazu ayou kanyike wapwevo, kaha ayile kuli kapolofweto kaYehova. Omu alingile vyuma amulwezele kapolofweto, Namane alikangwile kwijiva ngungungu. Echi chalingishile Namane kupwa muka-kulemesa Kalunga wamuchano.—Vamyangana 2, 5:1-15.

Kutala nausaka nayove kukafwako mutu umwe alinangule vyaYehova navyuma nahase kulinga ngana muze alingile uze mwanapwevo tahi?— Iya unahase kukafwa?— Vatu vamwe kavashinganyeka chikupu ngwavo vatela kuvakafwako. Oloze unahase kuhanjika navo vyuma vyamwaza eji kulinganga Yehova. Pamo vanahase kukwivwilila. Nge naulinga ngocho, kaha ijiva ngwove Kalunga mwevwa kuwaha.

Vishina vikwavo vyakukolezeza vakweze vevwilenga chipepa kuzachila Kalunga unahase kuviwana hali Samu 122:1; 148:12, 13; Muka-kwambulula 12:1; WaChimoteu 1, 4:12; naWavaHepeleu 10:23-25.

[Mivwimbimbi halifwo 213]

Yesu evwishile ngachilihi Kalunga kuwaha shimbu achipwile kanyike?

[Muvwimbimbi halifwo 215]

Vyuma muka asakile kulinga Chimoteu numba tuhu Ise kapwile muka-kwitavako?

[Muvwimbimbi halifwo 216]

Nyi mwanapwevo wakaIsalele evwishile ngachilihi Kalunga kuwaha?