Kapetulu 45
Wangana Wakalunga Chuma Muka? Mwakusolwela Ngwetu Twasake Wizenga
KUTALA wejiva kulomba chize Yesu anangwile tumbaji twenyi tahi?— Nge kawachijivako kaha tunahase kuchitanga muMbimbiliya hali Mateu 6:9-13. Kulomba kanechi vavuluka vavavulu ngwavo Kulomba chaMwata chatwama namazu akwamba ngwavo: “Wangana wove wize.” Jino watachikiza omu walumbunukila Wangana waKalunga tahi?—
Mwangana apwa muka-kuyula lifuchi chipwe ngalila yimwe. Kaha chiyulo chenyi vachivuluka ngwavo wangana. Oloze mumafuchi amwe twamina wafulumende vamuvuluka ngwavo pulesindeti. Nyi Muka-kuyula fulumende yaKalunga vamuvuluka ngwavo iya?— Vamuvuluka ngwavo ikiye Mwangana. Evi vikiko vavulukila fulumende yaKalunga ngwavo Wangana.
Unatachikizou vasakwile kuli Yehova Kalunga kupwa Mwangana mufulumende Yenyi nyi?— Asakwile Mwanenyi Yesu Kulishitu. Mwomwo ika ahambakanyina kala muka-kuyula wakusakula kuvatu?— Mwomwo Yesu azanga chikuma Ise, Yehova. Kaha nawa shimbu yosena eji kulinganga vyuma vyakwoloka.
Mbimbiliya yahanjikile chimweza vyakusemuka chaYesu shimbu kanda asemuke muMbetelema kaha yalumbununa nawa ngwayo mwakapwa Muka-kuyula uze wakusakula kuli Kalunga. Tutange chishina kana hali Isaya 9:6, 7. Vasonekaho ngana ngwavo: ‘Kuli etu kunasemuka mwana, vanatuhane mwana walunga, wangana naukapwanga hachifwiji chenyi, kaha lijina lyenyi navakamuvulukanga ngwavo . . . Ikiye Mwangana wakuunda. Wangana wenyi nakuunda navikayanga nakuvula chakuzeneka kukakuma.’
Unejiva jino vyuma vanamuvulukila Muka-kuyula muWangana waKalunga ngwavo, “Mwangana” ngwetu?— Yesu vamuvuluka ngwavo “Mwangana,” Muka-kuyula uze mwakayula Wangana waKalunga. Yesu apwa nawa MwanaMwangana Wamunene, Yehova. Yehova atongola Yesu kupwa Mwangana wafulumende Yenyi, yize nayikayula hamavu hamyaka likombakaji. (Kusoloka 20:6) Kufuma hakumumbapachisa, Yesu aputukile “kwambulula mazu ngwenyi, Pihililenu nakwalumuka, mwomwo wangana wamelu uli kwakamwihi, shikaho.”—Mateu 4:17.
Mwomwo ika ambilile Yesu ngwenyi Wangana uli kwakamwihi?— Avalwezele ngocho mwomwo vapwile hamwe naMwangana uze mwakayula mwilu. Evi vikiko Yesu alwezelele vatu ngwenyi: “Wangana waKalunga uli muli enu.” (Luka 17:21) Uno mwivwa ngachilihi kupwa hakamwihi naMwangana uze vatongola kuli Yehova, uze unahase nakumeneka?—
Achingulweze, uno mulimo muka waulemu azachile Yesu hano hamavu?— Yesu akumbulwile chihula kanechi ngwenyi: ‘Chatela kuli Ami kwambulula mujimbu wamwaza wawangana waKalunga namumembo eka nawa, mwomwo chikiko vene vanangutumina.’ (Luka 4:43) Oloze Yesu atachikijile ngwenyi keshi kuhasa kwambulula mujimbu uka wenyi kahako. Uno unashinganyeka ngwove alingile ika?—
Yesu ayilenga navatu mumulimo kanou nakuvalongesa mwakwambulwila. Vatu vatete kulongesa vapwile vaposetolo 12 vaze asakwile. (Mateu 10:5, 7) Uno Yesu alongesele kaha vaposetolo jenyi tahi? Chiku. Mbimbiliya yamba ngwayo Yesu alongesele navatu veka nawa vayenga nakwambulula. Kutwala muze, atumine tumbaji twenyi 70 kuya vavali vavali nakwambulula. Uno vayile nakwambulula ika kuvatu?— Yesu avalwezele ngwenyi: “Kavambulilenunga ngwenu, Wangana waKalunga uneza lyehi kwakamwihi nayenu.” (Luka 10:9) Omu mukiko vatu valinangwile vyafulumende yaKalunga.
Kushikulu, kala mwangana wamuhya wamuIsalele atambukililenga hachimbulu nakulisolola kuvatu. Omu mukiko mwalinga naYesu nawa haungeji wenyi wamakumishilo wakuya kuYelusalema. Unamono, Yesu ali nakuya nakupwa Muka-kuyula muWangana waKalunga. Uno vatu vali nakusaka ngwavo apwenga Mwangana wavo tahi?—
Eyo, mwomwo omu Yesu ali nakutambuka hachimbulu, lizavu lyavatu hinaliputuka kwala mahina mujila mangana ahiteho. Veka nawa hinavapamuna viputa nakuvyala mujila. Echi chili nakusolola nge vatu vali nakusaka chikupu Yesu kupwa Mwangana wavo. Kaha hinavatambakana nawa ngwavo: “Vamukisulenga MwanganOu mweza mulijina lyaYehova!” Oloze kwapwile vamwe vaze kavawahililileko. Vatwamina vamwe vamukwitava hikumulweza Yesu ngwavo, ‘Lweza tumbaji twove vahole kulu.’—Luka 19:28-40
Omu mwahichile makumbi atanu, Yesu hinavamukasa nakumutwala munganda yaPondeu Pilatu mangana vakamusopese. Vaka-kole jaYesu hinavamuvangijikila ngwavo ali nakulivuluka ngwenyi ikiye mwangana, kaha nawa ngwavo nafumbukila fulumende yavaLoma. Pilatu hikwihula Yesu mangana alumbunune nakanwa kenyi. Oloze Yesu himwamulweza ngwenyi keshi nakusaka kutambula fulumendeko. Kaha himwalweza jino Pilatu ngwenyi: “Wangana wami kaweshi wakuli vaka-mavuko.”—Yowano 18:36.
Pilatu himwalovoka nakulweza vatu ngwenyi kawanyine mulonga navulumuna Yesuko. Oloze oholyapwa vatu kaveshi nakusaka ngwavo Yesu apwenga Mwangana wavoko. Shikaho, kaveshi nakusaka vamwecheko. (Yowano 18:37-40) Pilatu hakukumisa kuhanjika cheka naYesu, himwamona jino ngwenyi navimwe napihisa Yesu vyauchi. Kufumaho, Pilatu himwalovola Yesu kuweluka nakwamba ngwenyi: “Talenu mwangana wenu ou!” Oloze vatu hikutambakana ngwavo: ‘Mufumise! Mufumise! Vamusukike kuchitondo!’
Pilatu himwavehula ngwenyi: ‘Namusaka mwangana wenu ngumusukikise kuchitondo?’ Kaha vapilishitu vavalemu hikukumbulula ngwavo: “Katweshi namwangana wekako, kuvanga Kesale kaha.” Achishinganyeke michima kana vapwile nayo ava vatu ocho kupihya! Vaze vapilishitu vamichima yayipi vasowangijile vatu vamwalumukile Yesu.—Yowano 19:1-16.
Omu mukiko chili namakumbi ano nawa. Vatu vavavulu kavazanga Yesu kupwa Mwangana wavoko. Vanahase kulivuluka ngwavo vafwelela Kalunga, oloze kavasaka Kalunga chipwe Kulishitu kuvalweza vyakulingako. Vasaka kaha jifulumende javo jahano hamavu.
Nyi yetu? Jino twatela kwivwa ngachilihi hakulinangula vyaWangana waKalunga navyuma vyamwaza vize naukaneha?— Twatela kumuzanga Kalunga, ngwetu?— Jino natuhasa kusolola ngachilihi ngwetu twamuzanga kaha twasake Wangana waKalunga wizenga mangana utuyule?—
Tunahase kuchisolola hakukavangiza chakutalilaho chaYesu. Uno vyuma muka alingile Yesu vyakusolola nge amuzangile Yehova?— Yesu alumbunwine ngwenyi: “Ngweji kulinganga vyumevi vyakumwivwisa kuwaha.” (Yowano 8:29) Eyo, Yesu ejile hamavu ‘nakulinga mwayile muchima waKalunga’ “nakumanyisa milimo yenyi.” (WavaHepeleu 10:7; Yowano 4:34) Achitale havyuma alingile Yesu shimbu kanda aputuke mulimo wakwambulula.
Yesu ayile kuli Yowano Muka-kumbapachisa vatu kuKalwiji Yotau. Omu vengilile mumeya, Yowano ajimikile Yesu mumeya nakumutufulamo. Unejiva ovyo Yowano ambapachishilile Yesu nyi?—
Yesu ikiye alwezele Yowano ngwenyi amumbapachise. Jino twatachikiza ngachilihi ngwetu Kalunga ikiye asakile Yesu vamumbapachise?— Tunejiva ngocho mwomwo Yesu hakufuma mumeya evwile lizu lyaKalunga mwilu nalyamba ngwalyo: “Ove yove Mwanami, yove vene ngwazanga, yove vene ngweji kwivwilanga kuwaha.” Kaha nawa Kalunga atumine shipilitu yenyi yajila yakufwana nge katela yejile hali Yesu. Shikaho Yesu hakumumbapachisa chasolwele nge asakile jino kuzachila Yehova mukuyoya chenyi chosena, chipwe ngwetu haya myaka yosena.—Mako 1:9-11.
Oholyapwa uchili ukanyike. Jino naukalinga ika nge unakolo?— Kutala naukalondezeza Yesu nakukumbapachisa nayove nawa tahi?— Watela kukalinga ngocho mwomwo Mbimbiliya yahanjika ngwayo akusela ‘chakutalilaho mangana ukavangizenga mujitambo jenyi.’ (WaPetulu 1, 2:21) Omu navakakumbapachisa, hakiko naukasolola jino nge uli nakusaka vakuyule kuWangana waKalunga. Oloze kuzachila Kalunga kachakumina halumbapachiso kahako.
Twatela kwononoka nawa vyuma anangwile Yesu. Eyo, Yesu ambile ngwenyi katwatela kupwa “vamuli vaka-mavuko.” Jino nge natundupukila muvyuma vyalifuchi, kutala tunahase kwamba ngwetu tuli nakumwononoka nyi? Yesu navaposetolo jenyi vasosolokele kuvyuma vyalifuchi. (Yowano 17:14) Kaha vyuma vyeka vika valingilenga?— Vapwile nakwambulwila vatu mujimbu waWangana waKalunga. Ou ukiko wapwile mulimo waulemu mukuyoya chavo. Uno nayetu tunahase kuzata mulimo kana tahi?— Mukiko vene, tunahase kuuzata kweseka namwaya mazu tweji kulombanga ngwetu Wangana waKalunga wizenga.
Tanga Visoneka vikwavo evi vyalumbununa vyuma tunahase kulinga mangana tusolole ngwetu twasake Wangana waKalunga wizenga: Mateu 6:24-33; 24:14; naWaYowano 1, 2:15-17; 5:3.
[Muvwimbimbi halifwo 232]
Mulimo muka ejilile Yesu hano hamavu?
[Mivwimbimbi halifwo 235]
Mwomwo ika vatu vanalumwina vishinganyeka vyavo vyakusaka Yesu apwenga Mwangana wavo?
[Muvwimbimbi halifwo 236]
Yesu vamumbapachishilile ika, kaha nawa Kalunga asolwele ngachili ngwenyi etavilile lumbapachiso kana?
[Mivwimbimbi halifwo 237]
Kulihi tunahase kuya nakwambulwila vatu mujimbu waWangana waKalunga?