Kapetulu 47

Munatuhasa Kutachikijila Ngwetu Alamangetone Ili Hakamwihi

WEJIVA omwo chapwa chinjikizo ngwetu?— Mukapetulu 46 twalinangulangamo chinjikizo ahanyine Kalunga chakusolola nge keshi kukenyeka cheka kaye nalivajiko. Navaposetolo nawa vahulishile Yesu chinjikizo chakutachikijilaho kupwako chenyi nomu kukuma chakaye, chipwe ngwetu tulingilo twavyuma nachikapandama hakamwihi.—Mateu 24:3.

Hakuwana nge Yesu mwakapwa mwilu, chatelemo kumana kuvalweza kaha chinjikizo chakusolola nge naputuka jino kuyula. Ngocho, Yesu alwezele tumbaji twenyi vyuma vatela kukamona navisoloka hano hamavu. Omu navakamona vyuma kanevi, nachikalumbununa nge naputuka jino kuyula mwilu mwaMwangana.

Hakunangula tumbaji twenyi vamone omu chalema kupwa vakutona, Yesu avalwezele ngwenyi: ‘Talenu mukuyu namitondo yosena. Heshoho nayisokolwela, mweji kumonanga, kahenu vavene munatachikiza ngwenu, nonga yinahete lyehi kwakamwihi.’ Nayove watachikiza kanawa nge nonga ili hakamwihi. Hakumona vyuma ahanjikile Yesu vili nakusoloka, kaha watela kutachikiza ngwove Alamangetone ili hakamwihi.—Luka 21:29, 30.

Halifwo lino nalyeli linakavangizaho, natumona mivwimbimbi yavyuma vize ahanjikile Yesu ngwenyi navikapwa chinjikizo chakusolola nge Wangana waKalunga unapandama. Omu navikasoloka vyuma vyosenevi, Kulishitu, Muka-kuyula muWangana waKalunga mwakenyeka jifulumende josena ngana muze twalinangulanga muKapetulu 46.

Tala kanawa hamivwimbimbi yili hamafwo avali anafumuko ngana, numba jino tuyishimutwile. Tanga vyuma uli nakumona hali eyi mivwimbimbi mumukanda waMateu 24:6-14 naLuka 21:9-11. Achitale nawa jinambala jajindende vanasoneka hamuvwimbimbi himuvwimbimbi. Eji jinambala jikiko jili kumaputukilo ajipalangalafu jize jili nakulumbununa eyi mivwimbimbi. Mana tutale kanawa jino nge chinjikizo ambile Yesu chili nakutesamo makumbi ano.

(1) Yesu ambile ngwenyi: “Namukevwa majita namangwavo akuvuluka majita. . . . Vaka-lifuchi limwe navakafumbukila vaka-lifuchi likwavo, vaka-wangana umwe nawa navakafumbukila vaka-wangana ukwavo.” Kutala wevwaho lyehi mangwavo akuvuluka majita tahi?— Jita yakaye yatete yasolokele mumwaka wa 1914 kuheta namu 1918, kaha kwapwile nawa yamuchivali yasolokele mu 1939 swi naku 1945. Oloze kushikulu kakwapwile jijita jakaye kosenako! Oholyapwa jino kaye kosena kwijiva jijita kaha. Chili nakusoloka jino nge hakumbi hakumbi vali nakuvuluka kaha mijimbu yajijita hajiTV, havisaji, namumapapilo amijimbu.

(2) Yesu ambile nawa ngwenyi: ‘Nakukapwa myaka yazala kweka nakweka.’ Nganomu unejiva, vatu vamwe vali nakutwamanga nazala. Eyo, hakumbi hakumbi vatu vavavulu vali nakufwa kuzala mwomwo yakuhona vyakulya.

(3) Yesu ambile nawa ngwenyi: ‘Nakukapwa misongo yavihita kweka nakweka.’ Wejiva omwo wapwa musongo wachihita?— Musongo wachihita wapwa himusongo uze weji kujihanga vatu vavavulu. Musongo umwe wachihita vavuluka ngwavo lipwema lyakuSpain wejile nakujiha vatu vakuheta ku 20 miliyoni mumwaka umwe kaha. Makumbi ano kuli jino musongo waluwanga vavuluka ngwavo AIDS uze pamo naujiha chikuma vatu kuhambakana vaze tunavuluka. Kaha nawa kuli misongo yeka yize yili nakujihanga vatu vavavulu hamwaka hamwaka yakufwana nge kasa, musongo wamuchima, nayeka yayivulu.

(4) Yesu avalwezele chinjikizo chikwavo nawa ngwenyi: ‘Nakukapwa mindenda kweka nakweka.’ Uno mindenda wayitachikiza tahi?— Mindenda yeji kunyikisanga mavu. Jizuvo jeji kushiukanga, kaha kakavulu navatu veji kufwanga. Kufuma vene mumwaka wa 1914, kunapunga mindenda yayivulu mwaka himwaka. Wevwaho lyehi mijimbu yakuvuluka mindenda tahi?—

(5) Yesu ahanjikile chinjikizo chikwavo ngwenyi ‘upi naukavula chikuma.’ Evi vikiko tuli nakumwena wiji naulyanyi chikuma. Vatu kwosena vali nawoma wakuvevila vyuma vyavo. Kumyaka yosena kakwapwile ulyanyi nauhwanga nganou uliko makumbi anoko.

(6) Yesu ahanjikile chinjikizo chachilemu ngwenyi: “Kahou mujimbu kana wamwaza wawangana navakawambulula kumafuchi osena nakupwa unjiho kuli vaka-mafuchi osena, numbanyi kukuma chamyaka yino chikeze.” (Mateu 24:14) Nge nayove naumona ngwove mujimbu kanou wapwa chikupu ‘mujimbu wamwaza,’ kaha watela kuwambulwila vakwenu. Omu mukiko nauhasa kwazana mumulimo wakutesamo echi chinjikizo kana.

Vatu vamwe vanahase kwamba ngwavo vyuma ahanjikile Yesu kuvyapwilenga nakumwaka. Oloze kumyaka vyuma kanevi kavyasolokelenga vyosena halwola lwolumwe mumafuchi osenako. Kutala unejiva jino omwo chalumbunukila echi chinjikizo nyi?— Chalumbununa nge omu natumona vyosenevi vili nakusoloka, kaha twatela kwijiva ngwetu kano kaye kakapi kalinwaha vashishiseho lifuchi lyaKalunga lyalihya.

Hakuvalweza echi chinjikizo kana, Yesu avulukile nawa nangonde yakulipwila mumwaka. Ambile ngwenyi: “Lombenunga mangana kuchina chenu chikazeneke kupwa hamwaka wachishika.” (Mateu 24:20) Ove unashinganyeka ngwove atalishile mulihi hamazu kana awa?—

Achishinganyeke jino nge mutu mwasaka kuchina ponde mungonde yayipi. Vyuma muka vinahase kusoloka?— Numba tuhu nge mwahasa kuchina, oloze nachipwa chachikalu. Nachipihya chikupu nge mutu mwafwa mwomwo yakuhungama namilimo yeka, nyi mweka?—

Unamono chishina apwile nakulumbununa Yesu hakuvuluka ngwenyi mutu katela kuvandamina ngonde yachishika numbanyi achineko, ngwetu?— Apwile nakutulweza nge katwatela kuchelewa kuzachila Kalunga nakusolola zangi yetu twamuzanga mwomwo tunatachikiza ngwetu Alamangetone ili hakamwihi. Nge natuchelewa, kaha katweshi kupwa nalwola lwakuzachila Yehovako. Ngocho natulifwana navatu vamumakumbi aLivaji lyalinene vaze vevwile mujimbu waNowa oloze kavengilile muwatoko.

Jino natushimutwila navikasoloka hanyima yajita yayinene yaAlamangetone. Kaha nawa natulinangula vyuma mwakatuwahishila Kalunga etu tunamuzange oholyapwa nakumuzachila.

Visoneka vinakavangizaho navikiko nawa vyasolola nge Alamangetone ili hakamwihi: WaChimoteu 2, 3:1-5; naWaPetulu 2, 3:3, 4.

[Mivwimbimbi halifwo 244-246]

Chilongesa muka anangwile Yesu omu apwile nakuhanjika vyamutondo wamukuyu?

[Muvwimbimbi halifwo 249]

Uno Yesu apwile nakunangula ika hakuhanjika vyakuchina hamwaka wachishika?