Chilongesa 3
Uno Muchano waMbimbiliya Uze Wajimbalile Vauwanyine Cheka Ngachilihi?
Vaka-Kulinangula Mbimbiliya muji 1870
Kaposhi Kakutalila watete, mu 1879
Kaposhi Kakutalila wamakumbi ano
Mbimbiliya yahanjikile chimweza ngwayo, hanyima yakufwa chaKulishitu, vaka-kunangula vamakuli navakakatuka muli vaka-Kulishitu vakulivanga, nakuhingika muchano wamuMbimbiliya. (Vilinga 20:29, 30) Mukuhita chalwola, vyuma kana vyasolokele. Vafutwilenga kunangula chaYesu nakunangula chamukwitava chamakuli. Aha hakiko jino hafumine kwitava chavaka-Kulishitu chamakuli. (WaChimoteu 2, 4:3, 4) Uno twatachikiza ngachilihi ngwetu makumbi ano tuli nakulinangula chikupu vyuma yanangula Mbimbiliya?
Lwola lwaYehova lwahetele lwakusolola cheka muchano. Kalunga ahanjikile chimweza ngwenyi ‘hamyaka yakusongo, chinyingi nachikavula.’ (Ndanyele 12:4) Mu 1870, lizavu lyalindende lyavatu vaze vapwile nakutondatonda muchano vawanyine nge kunangula chachivulu chamujichachi kachapwile chamuVisonekako. Ngocho vaputukile kusandasanda vevwishise kunangula chamuchano chamuMbimbiliya, kaha Yehova avakafwile vevwishise Visoneka.
Vatu vakashishi valinangwilenga Mbimbiliya. Vaze Vaka-Kulinangula Mbimbiliya vazachishile jila yakulinangwilamo yize tuchili nakuzachisa nayetu makumbi ano. Vashimutwililenga hachihande hichihande chamuMbimbiliya. Jino omu vawanyinenga chihande chachikalu kwivwishisa muMbimbiliya, vatondelenga visoneka vyeka vize vyalumbununa chihande kana. Nge vyuma vanawane hachihande kana vinalitombola namwaya Visoneka vyosena, kaha vavisonekelenga. Hakwitavisa Mbimbiliya yililumbunune yivene, vejivile jino kanawa lijina lyaKalunga, naWangana wenyi, navyuma atengelelele vatu namavu, navyuma vyeji kusolokanga kuvatu nge vanafu, nalutalililo lwakusanguka. Vyuma vawanyine vyavasokwele kukunangula chamakuli navisemwa vyavipi.—Yowano 8:31, 32.
Mu 1879 Vaka-Kulinangula Mbimbiliya vamwene jino ngwavo lwola lwahetele lwakulingisa muchano vautachikize kuvatu. Ngachize mumwaka vene uze, vaputukile kusoneka mangazini tuli nakuvulukanga makumbi ano ngwetu Kaposhi Kakutalila Ali Nakuvilika Wangana waYehova. Oholyapwa tuli nakwazana muchano wamuMbimbiliya navatu mumafuchi akuhambakana ha 230, mumalimi akuhambakana ha 600. Kanda lyehi chinyingi chamuchano chivule ngana muchinavulu makumbi anoko!
Vyuma muka vyasolokele kumuchano wamuMbimbiliya omu afwile Kulishitu?
Vyuma muka vinatukafwe numba tuwane cheka muchano wamuMazu aKalunga?