“Sakulenu . . . Owo Namuzachilanga”

1. Hakusaka tupwenga nakuwahilila chamwenemwene, vyuma muka twatela kulinga, kaha mwomwo ika? (Isaya 48:​17, 18)

HAKUWANA nge Setu wamwilu atuzanga chikuma, ngocho asaka tulivwise kuwaha oholyapwa nakulutwe. (Kwambu. 3:​12, 13) Numba tuhu atutenga nauhashi wakulinga vyuma, oloze katutenga nauhashi wakuliyula etu vavene, chipwe wakulitungila etu vavene jishimbi jahanjika havyuma vyakwoloka navyakuhengako. (Kwambu. 8:9; Yele. 10:23) Atachikiza ngwenyi, hakusaka tupwenga nakuwahilila chamwenemwene, twatela kumuzachila nakuyoya nawa kweseka namwaya jishimbi jenyi.—Tangenu Isaya 48:​17, 18.

2. Vyuma muka Satana asaka ngwenyi tufwelele, kaha vyuma muka alinga Yehova kutalisa kumakuli kana?

² Satana asaka tufwelele ngwenyi, tunahase kupwa vakuwahilila chakuzeneka kututwaminyina kuli Yehova, kaha nawa ngwenyi vatu vanahase kuliyula vavene. (Kupu. 3:​4, 5) Yehova etavisa vatu valiyule vavene hakatando kakandende mangana asolole ngwenyi vyuma ahanjikile Satana vyapwile vyamakuli. Chikupu vene, tunalimwena nameso etu kapu ngwetu vyuma ahanjikile Satana vyamakuli. Chipwe ngocho, Visoneka vyavuluka vyakutalilaho vyamalunga namapwevo vaze vapwile vakuwahilila hakuzachila Yehova. Mutu apwile wakuwahilila chikuma havatu kana shina Yesu Kulishitu. Tuvangilenu kushimutwila havyuma vyalingishile Yesu asakule kuzachila Yehova. Kufumaho, natukekesa ovyo Setu wamwilu atelamo kumulemesa. Natushimutwila nawa havyuma vimwe vyatulingisa tusakule kuzachila Yehova.

VYUMA VYALINGISHILE YESU ASAKULE KUZACHILA YEHOVA

3. Vyuma muka Satana asakile kuhana Yesu, kaha Yesu asakwile kulinga ika?

³ Omu Yesu apwile hano hamavu, apwile nalisesa lyakusakula owo atela kuzachila. Nakushimbula chiku kufuma haze Yesu vamumbapachishile, Satana alwezele Yesu ngwenyi mwamuhana mawangana osena ahano hamavu kachi nge Yesu mwamulemesa kamwe kaha kunahu. Yesu ambile kuli Satana ngwenyi: “Fumaha, ove Satana! Mwomwo vasoneka ngwavo: ‘Lemesanga Yehova Kalunga kove, ikiye kaha watela kuzachilanga mulimo wajila.’” (Mateu 4:​8-10) Mwomwo ika Yesu asakwililile kuzachila Yehova? Tushimutwilenu havyuma vimwe vyamulingishile alinge ngocho.

4-5. Vyuma muka vimwe vyalingishile Yesu asakule kuzachila Yehova?

⁴ Chuma chachilemu chalingishile Yesu asakule kuzachila Ise Yehova shina, kumuzanga chikuma. (Yowa. 14:31) Kaha nawa Yesu eji kuzachilanga Yehova, mwomwo atachikiza ngwenyi hichuma chakwoloka atela kulinga mutu. (Yowa. 8:​28, 29; Kuso. 4:11) Atachikiza nawa ngwenyi kuli Yehova kukiko kwafuma kuyoya, kaha atamo kumufwelela, kaha nawa apwa muka-kuhana. (Samu 33:4; 36:9; Yako. 1:17) Yehova nahanjikanga vyuma vyamuchano hali Yesu, kaha nawa amuhana vyuma vyosena atwama navyo. (Yowa. 1:14) Oloze Satana ikiye aneha kufwa, kaha nawa apwa muka-makuli, uze atwama nalifwi namuchima wakulizanga ivene. (Yowa. 8:44) Hakuwana nge Yesu atachikijile muchano kanou, ngocho kashinganyeka kulikanga kuli Yehova ngana muze alingile Satanako.—Fwili. 2:​5-8.

⁵ Chuma chikwavo chalingishile Yesu asakule kuzachila Yehova shina, ashinganyekele havyuma vyamwaza navifumamo. (Hepe. 12:2) Kaha nawa atachikijile ngwenyi, nge mwatwalaho lika kupwa wakushishika, kaha mwajilika lijina lyaIse nakuneha nawa jila yakufumishilamo kuyanda chosena chize aneha Liyavolo.

VYUMA VYALINGISA YEHOVA ATENGAMO KUMULEMESA

6-7. (a) Mwomwo ika vatu vavavulu makumbi ano kavazachila Yehovako? (b) Mwomwo ika Yehova atelamo kumulemesa?

⁶ Vatu vavavulu makumbi ano kavazachila Yehovako, mwomwo kavatachikiza vilinga vyenyi vyamwazako, kaha nawa kavatachikiza vyuma avalingilako. Omu mukiko chapwile nakuvatu vakuAtene vaze kaposetolo Paulu ambulilile.—Vili. 17:​19, 20, 30, 34.

⁷ Paulu alumbunwinyine vatu vaze vapwile nakumwivwilila ngwenyi, Kalunga wamuchano “eji kuhananga vatu vosena kuyoya nakuhwima navyuma vyosena.” Ambile nawa ngwenyi: “Twayoya, tweji kutambukanga, kaha nawa twapwako mwomwo yaikiye.” Hakuwana nge Kalunga apwa Tengi, ngocho “kumutu umwe aloweleko miyachi yavatu yosena.” Shikaho, atamo chikupu kumulemesa.—Vili. 17:​25, 26, 28.

8. Chuma muka chize Kalunga kalingako, kaha asolola ngachilihi ngwenyi atuzanga chikuma?

⁸ Hakuwana nge Yehova apwa Tengi kaha nawa Mwata wavyuma vyakutenga vyosena, ngocho nge nasake nahase kutushinjila tumuzachile. Oloze kalinga ngochoko. Yehova asolola unjiho wauvulu uze wasolola nge kwatwama, kaha nawa atuzanga chikuma mutu himutu. Asaka tuzachise uhashi wetu wakushinganyeka haunjiho kana, mangana tulisakwile etu vavene kumuzachila. Asaka vatu vosena vapwenga masepa jenyi haya myaka. (Chimo. 1, 2:​3, 4) Echi chikiko chalingisa Yehova atulongese mangana tunangule vakwetu vyuma ajina, nakuvalweza vyuma vyamwaza mwakalingila vatu. (Mateu 10:​11-13; 28:​19, 20) Atuhana vikungulwilo navakulwane muvikungulwilo vaze veji kutuzakamanga.—Vili. 20:28.

9. Uno Yehova asolola ngachilihi zangi yenyi?

⁹ Zangi yaYehova tweji kuyimwenanga mujila eji kuzakaminangamo vaze vasakula kukana kupwako chenyi. Achishinganyekenu hachuma chino: Putu vene kushikulu, vatu vavavulu vanasakulanga kuyoya kweseka najishimbi javo kutalisa kuvyuma vashinganyeka ngwavo vyakwoloka navyevi vyakuhenga. Chipwe ngocho, Yehova navahane vyuma vize navivakafwa vatwaleho lika kuyoya nakulivwisacho kuwaha. (Mateu 5:​44, 45; Vili. 14:​16, 17) Yehova avahana uhashi wakupwa namasepa, nakupwa natanga, nakulivwisa kuwaha nganyo yamilimo yavo. (Samu 127:3; Kwambu. 2:24) Unjiho kana wasolola hatoma nge Setu wamwilu azanga vatu vosena. (Kulo. 34:6) Tushimutwilenu jino havyuma vimwe vize vyatulingisa tusakule kuzachila Yehova, nomwo eji kukisulanga vaze vasakula kumuzachila.

VYUMA VYATULINGISA TUSAKULE KUZACHILA YEHOVA

10. (a) Chuma muka chachilemu chatulingisa tuzachile Yehova? (Mateu 22:37) (b) Munanganyala ngachilihi kumuchima waYehova wakutalilila chikoki? (Samu 103:​13, 14)

¹⁰ Ngana mwaYesu, nayetu chuma chachilemu chatulingisa tuzachile Yehova shina kumuzanga chikuma. (Tangenu Mateu 22:37.) Kutachikiza vilinga vyaYehova cheji kutulingisanga tupandame kuli ikiye. Chakutalilaho, achishinganyekenu omwo Yehova natutalililanga chikoki. Omu vaIsalele valikangile kuli ikiye, avalembelelele ngwenyi: “Sezenu jijila jenu jajipi.” (Yele. 18:11) Yehova atachikiza ngwenyi katwakupukako, kaha nawa twapwa kaha tulukungu. (Tangenu Samu 103:​13, 14.) Shikaho, nge namushinganyekanga hamuchima waYehova wakutalilila chikoki, nahavilinga vyeka vyamwaza atwama navyo, kaha nachimikunyula mumuzachile haya myaka.

11. Vyuma muka vikwavo vyatulingisa tusakule kuzachila Setu wamwilu?

¹¹ Kutachikiza ngwetu chapwa chakwoloka kuzachila Yehova hichuma chikwavo chatela kutulingisa tumuzachile. (Mateu 4:10) Kaha nawa twatachikiza ngwetu nge natutwalaho lika kuzachila Yehova, kaha nachitesamo vyuma vyamwaza. Nge natupwa vakushishika, kaha natujilika lijina lyaYehova, nakusolola nawa ngwetu Liyavolo apwa wamakuli, nakwivwisa nawa Setu kuwaha kumuchima. Nge oholyapwa natusakula kuzachila Yehova, kaha natukahasa kukamuzachila haya myaka.—Yowa. 17:3.

12-13. Vyuma muka tunalinangula kuli Jane naPam?

¹² Tunahase kuzanga chikuma Yehova nahalwola tuchili tuvanyike. Zangi kana nayikatwalaho lika numba nge tunashinakaja. Talenu hachakutalilaho chaJane naPam vaze vapwa vasongo namutu.a Jane apwile namyaka yakusemuka 11 kaha Pam apwile namyaka yakusemuka 10 omu vaputukile kulinangula Mbimbiliya. Numba tuhu visemi javo kavasakile kulinangula Mbimbiliyako, oloze Jane naPam vavetavishile kulikata naVinjiho jaYehova, chikalu kaha nge navayanga kuchachi hamwe kaha natanga yavo kusongo yachalumingo. Jane ambile ngwenyi: “Vyuma vyamuMbimbiliya vangunangwile Vinjiho vyangukafwile ngulihende kuujila nakufungulula cheseko chakungushinjila ngunwenga maundu akupendesa.”

¹³ Omu mwahichile myaka yayindende, vosena vavali vapwile vaka-kwambulula. Kufumaho, vaputukile kuzata upayiniya oku nawa vali nakuzakama visemi javo vatushinakaji. Omu Jane anukilenga vyuma ahichilemo, ambile ngwenyi: “Ngunamono omwo Yehova eji kuzakamanga masepa jenyi, kaha chikupu vene kweseka naWaChimoteu 2, 2:​19, ‘Yehova atachikiza vaze vanapu venyi.’” Chikupu vene, Yehova eji kuzakamanga vaze navasakula kumuzanga nakumuzachila.

14. Tunahase kuhakwila ngachilihi lijina lyaYehova? (Talenu nawa mivwimbimbi.)

¹⁴ Twasaka kuhakwila lijina lyaYehova. Achishinganyekenu hachakutalilaho chino: Muli nasepa lyenu walikoji, kaha nawa muka-kuhana, uze nawa akwechi muchima wakukonekela. Jino likumbi limwe namwivwa vatu vali nakuhanjika hali sepa lyenu kupwa himutu waukenya, kaha nawa wakuhona kushishika. Uno namulinga ngachilihi? Tunafwelela namumuhakwila. Chochimwe nawa, nge Satana navaka-kumukundwiza navasaka kuhanjika vyuma vyamakuli hali Yehova, kaha tweji kuhanjikanga vyuma vyamuchano hali Yehova nakuhakwila lijina lyenyi. (Samu 34:1; Isa. 43:10) Tweji kusololanga ngwetu twasaka kuzachila Yehova namuchima wetu wosena kuhichila muvyuma tweji kuhanjikanga navize tweji kulinganga.

15. Uno kaposetolo Paulu anganyalile ngachilihi hakwalumunako vyuma alitomenenene? (Wavaka-Fwilipi 3:​7, 8)

¹⁵ Tweji kulisuulanga kwalumunako vyuma twalitomena mukuyoya mangana tuzachile Yehova mujila etavila chipwe mangana tumuzachile chikuma. Chakutalilaho, kaposetolo Paulu asakwileho kuhona kumuvumbika mungalila mangana akavangize Kulishitu nakuzachila Yehova. (Ngale. 1:14) Echi chamulingishile vamukisule nakupwa nakutokwa chakukayula mwilu hamwe kaha naKulishitu. Paulu kaliveyele hakusakula kuzachila Yehovako, ngocho nayetu katweshi kukaliveyako.—Tangenu Wavaka-Fwilipi 3:​7, 8.

16. Vyuma muka tunalinangula kuli Julia? (Talenu nawa mivwimbimbi.)

¹⁶ Nge natuhakanga kuzachila Yehova kulutwe, kaha mwatukisula oholyapwa nakulutwe nawa. Talenu hachakutalilaho chandumbwetu Julia. Shimbu kanda alinangule muchano, apwilenga mulizavu lyavaka-kwimba kuchachi kufuma vene halwola apwile kanyike. Mutu uze alinangula chikuma mukwimba, amwene uhashi apwile nawo Julia, kaha amunangwile. Nakushimbula chiku, Julia ayile puho chikuma, kaha ayilenga nakwimbila kuvihela vyapuho chikuma. Omu Julia apwile kushikola yapuho chikuma yavaka-kwimba myaso, mukwavo muvatangilililenga aputukile kushimutwila nenyi hali Kalunga, nakumulumbunwina ngwenyi Kalunga lijina lyenyi ikiye Yehova. Nakushimbula chiku, Julia aputukile kulinangula Mbimbiliya mapapa kavali muchalumingo. Kutwala muze, asakile kuhaka mangana kukuzachila Yehova mukuyoya chenyi, keshi kufwila kuya fuma mumyasoko. Kusakula chuma kana kachapwile chachashiko. Ambile ngwenyi: “Vatu vavavulu vangulwezelenga ngwavo ngunakwenyeka wana wami. Oloze ami ngwasakile kuzachisa kuyoya chami hakuzachila chikuma Yehova.” Uno makumbi ano Julia eji kwivwanga ngachilihi kutalisa kuvyuma alitomenenene kulinga myaka yakuzomboka 30 kunyima? Ambile ngwenyi: “Kangwalizakaminako, kaha nawa ngwafwelela ngwami kulutwe Yehova mwakatesamo vyuma vyosena wafwila muchima wami.”—Samu 145:16.

TWALENUHO LIKA KUZACHILA YEHOVA

17. Uno kutachikiza ngwetu tuli nakuyoyela mumakumbi akukuminyina nachikafwa ngachilihi vaze vasakula kuzachila Kalunga navaze kanda valinge ngocho?

¹⁷ Tachikizenu ngwenu tuli nakuyoyela mumakumbi akukuminyina. Kaposetolo Paulu asonekele ngwenyi: “Kunasale ‘katando kakandende chikuma,’ kaha ‘ou ali nakwiza mwaheta, keshi kushimbulako.’” (Hepe. 10:37) Uno chuma kana nachitukafwa ngachilihi? Tachikizenu ngwenu, lwola lunakehe lyehi lwavatu kusakula kuzachila Yehova. (Koli. 1, 7:29) Kaha nge tunasakula lyehi kuzachila Kalunga, twatachikiza ngwetu vyeseko vize tunahase kuhitamo navipwa kaha “[vya]katando kakandende chikuma.”

18. Uno Yesu naYehova vasaka etu tulinge ika?

¹⁸ Yesu akolezezele vatu vapwenga tumbaji twenyi nakutwalaho lika kumukavangiza. (Mateu 16:24) Shikaho, nge tunazachilanga Yehova hamyaka yayivulu, kaha tufwilenu kutwalaho lika kulinga ngocho. Twatela kuzata nangolo mangana tutwaleho lika kuyoya kweseka navyuma twalitomenenene vyakuzachila Yehova. Chinahase kupwa chachikalu kulinga ngocho. Oloze nge natutwalaho lika kuzachila Yehova, kaha mwatukisula nakupwa vakusuuluka oholyapwa nakulutwe nawa.—Samu 35:27.

19. Vyuma muka tunalinangula kuli Gene?

¹⁹ Vatu vamwe vashinganyeka ngwavo kuzachila Yehova chasakiwa kulisuula chikuma. Kachi nge mwapwa muvakweze, kutala mwashinganyeka ngwenu kuli vyuma vimwe namuhona kulivwisa kuwaha mwomwo yakuzachila Yehova tahi? Ndumbwetu wamukweze Gene ambile ngwenyi: “Ngwevwilenga nge kupwa Chinjiho chaYehova unapu undungo. Chasolokele nge vakwetu vanyike vaze ngwakolele navo hamwe valivwishilenga kuwaha vyuma vyakufwana nge kupwa kuviwanyino, chipwe kulisesembwa chipwe kuhema jivindiyo jaulyanyi. Oloze ami lwola lwami lwosena lwapwilenga kaha lwakuya kukukunguluka namuwande.” Uno vishinganyeka kana vyalingishile Gene aputuke kulinga ika? Ambile ngwenyi: “Ngwaputukile kuyoya chiyoyelo chachipi. Numba tuhu ngwalivwishile kuwaha hakatando kakandende, oloze chiyoyelo kana kachangulingishile ngupwenga nakuwahilila chakwililako. Ngwaputukile kushinganyeka hamuchano wamuMbimbiliya uze ngwamwene kupwa wamokomoko, kaha ngwasakwile jino kuzachila Yehova namuchima wami wosena. Kufuma vene halwola kana, ngwamwene jino ngwami Yehova akumbulwilenga kulomba chami chosena.”

20. Vyuma muka twatela kufwila kulinga?

²⁰ Muka-kwimba jisamu ambile kuli Yehova ngwenyi: “Awahilila mutu uze unasakula nakumupandamisa kuli ove mangana atwamenga muchipango chove.” (Samu 65:4) Shikaho, tutwalenuho lika kuzachila Yehova ngana muze alingile Yoshuwa uze ahanjikile ngwenyi: “Ami navava vakuzuvo yami natuzachilanga Yehova.”—Yoshu. 24:15.