Maku
12 Kuhiñahu, watachikili kuyileja nayakutalilahu nindi: “Iyala wumu wadimini itempa danyivinyu, wakolekeliku ikoli nikupunda imuwukamwinu wavinyu nawa watuñiliku nikaposhi; nkumininaku wadishiyili mumakasa awakwakudima nawa yena wayili kwituña dacheñi. 2 Chilaaka chakwaañula chichashikili, watemesheli nduñu kudi akwakudima kulonda yatambulihu nyikabu yamwitempa danyivinyu. 3 Ilaña akwakudima amukwatili nakumweta nawa amufuntishilimu makasakasa. 4 Watemesheliku nduñu mukwawu, niyena amweteli kumutu nikumutukola. 5 Watemesheliku cheñi mukwawu, iwu amujahili nawa amakwawu amavulu atemesheliyi, ayeteli, amakwawu ayijahili. 6 Dichi washalili hohu nawumu, yowu mwanindi akeñayi nankashi. Nkumininaku, niyena wamutemesheli kudi akwakudima, nawa watoñojokeli nindi, ‘Mwanami yena dinu akumulemesha.’ 7 Ilaña owu akwakudima ahosheli mulwawu nawu, ‘Iwu diyi nswana. Tumujahenu nawa wuswana wukwikala wetu.’ 8 Dichi amukwatili nakumujaha nawa amunatilili hanji yetempa danyivinyu. 9 Hanu dinu chumanyi chakelayi mwini itempa danyivinyu? Wakenza nakuyijaha akwakudima nawa itempa danyivinyu wakadihana kudi acheñi. 10 Komana kanda mutañeñahu dehi iyi nsona yahosha nawu: ‘Ilola dadiwiliwu akwakutuña, dinekali dehi ilola damwiwombu dahewulu.* 11 Komana kanda mutañeñahu dehi nawu ‘idi ilola dinafumi kudi Yehova nawa dakuhayamisha kumesu etu’?”
12 Chatiyiliwu mazu ahosheliyi, akeñeleña nawu amukwati* ilaña atiyili woma wezaza dawantu, muloña elukili nawu wateneneña wena muchakutalilahu chashimwiniyi. Dichi amushiyili nawa ayili.
13 Kuhiñahu, amutemesheleli aFwarisi amu hamu nawakwakumulondela Herodi kulonda amwinki muloña namazu akuhoshayi. 14 Chashikiliwu, amulejeli nawu: “Ntañishi, tweluka netu wahoshaña mwalala nawa hiwakeñaña wukwashu kudi muntuku, muloña hiwatalaña antu kumesuku, ilaña watañishaña njila yaNzambi muchalala. Komana nshimbi yeteja* kuhana musonku kudi Kesari tahindi nehi? 15 Tuhani tahindi nehi?” Yena chelukiliyi wunfwikiji wawu, wayilejeli nindi: “Muloñadi chimunakuñesekela? Nletelenu denari niyitali.” 16 Dichi wena amuleteleli denari yimu, yena wayihwili nindi: “Indi iwu mutu ninsona jidi aha, janyi?” Wena amwakwili nawu: “JaKesari.” 17 Yesu wayilili nindi: “Yuma yaKesari, mwinkenu Kesari nawa yuma yaNzambi, mwinkenu Nzambi.” Dichi ahayamini nanochu chayakwiliyi.
18 Kuhiñahu, aSadusi ahoshaña nawu hikwekala kusañukaku, enjili nakumwihula nawu: 19 “Ntañishi, Mosi watusonekeleli nindi, neyi mana kwamuntu yafwa nawa yashiya mumbanda chakadi kuvwalilamu mwana, manakwindi watela kumusumbula owu mumbanda nakumuvwalilamu manakwindi anyana. 20 Kwadiña amayala 7 evumu dimu. Watachi wasumbwili mumbanda, ilaña owu iyala wafwili chakadi kuvwalilamu mwana. 21 Kuhiñahu, wamuchiyedi wamusumbwili owu mumbanda, ilaña niyena wafwili chakadi kuvwalilamu mwana nawa wamuchisatu niyena chochimu. 22 Dichi wejima wawu 7 afwili chakadi kuvwalilamu mwana. Nkumininaku, owu mumbanda niyena wafwili. 23 Hanu dinu hakusañuka, hinyi wakekala mwini mumbanda? Muloña wejima wawu 7 amusumbwilihu.” 24 Yesu wayakwili nindi: “Enu dinu mwajimbelamu, muloña himweluka Nsona hela ñovu yaNzambiku. 25 Hakusañuka kufuma mudi afu, amayala hiyakasumbulañaku nawa ambanda niwena hiyakasumbukañaku, ilaña akekala neyi chekalawu añelu mwiwulu. 26 Kutalisha hansañu yawafu akasañulawu, komana kanda mutañeñahu dehi munsañu yahosha hachiputa mumukanda waMosi, mwahosheliyi Nzambi nayena nindi: ‘Ami yami Nzambi yaAbarahama, Nzambi yaIsaka nawa Nzambi yaYakoba’ tahindi? 27 Yena hiNzambi yawantu amomi, bayi afwaku. Enu mwajimbelamu chikupu.”
28 Wumu hakachi kawansoneki wenjili nawa watiyili anakuditaadikisha, ilaña chamweniyi nindi Yesu nayakuli chiwahi, wamwihwili nindi: “Lushimbinyi lwabadika* hanshimbi jejima?” 29 Yesu waakwili nindi: “Lwatachi dilu ilu, ‘Tiyaku, Eyi Isarela, Yehova Nzambi yetu hiYehova wumu hohu, 30 nawa keñaku Yehova Nzambi yeyi namuchima weyi wejima, nawumi* weyi wejima, nayitoñojoka yeyi yejima niñovu jeyi jejima.’ 31 Lushimbi lwamuchiyedi dilu ilu, ‘Keñaku mukwenu neyi chiwadikeña eyi aweni.’ Hikudi lushimbi lukwawu lwabadika ijiku.” 32 Nsoneki wamulejeli nindi: “Ntañishi, wunahoshi chiwahi kwesekeja nachalala, ‘Yena diyi Wumu hohu, hikudi mukwawu wudi neyi yenaku’; 33 nawa kumukeña namuchima wejima, nayitoñojoka yejima, nañovu jejima nikukeña mukwenu muntu neyi chiwadikeña eyi aweni, kwalema kubadika nyilambu yejima yakushita ninyilambu yayimuna.” 34 Hohenohu, Yesu chelukiliyi nindi naakuli chiwahi, wamulejeli nindi: “Hiwudi kwakulehi naWanta waNzambiku.” Ilaña kwosi muntu niwumu wadiña nañovu yakumwihula cheñiku.
35 Hela chochu, Yesu chatañishileñayi mutembeli, wehwili nindi: “Hanu dinu, muloñadi ansoneki chahoshelañawu nawu Kristu himwana kaDavidi? 36 Chamwoneneniwu Davidi naspiritu yajila, wahosheli yomweni nindi, ‘Yehova wamulejeli Mwanta wami nindi: “Shakamaku kuchikasa chami chachidiilu sampu nashi ayilumbu jeyi mwishina danyendu yeyi.”’ 37 Davidi yomweni wamutenaña nindi Mwanta, hanu dinu, nateli kwikala ñahi mwanindi?”
Nawa izaza deneni dawantu datiyili kuwaha kumutiyilila. 38 Chatañishileñayi watwalekelihu nakuhosha nindi: “Babalenu nawansoneki akeñaña kwendujola iku anavwali nyinkukumba nawa akeñaña nawu ayimusheña muyisankanu, 39 mumasinagogi nimwena akeñaña kushakama hayitwamu yakumbidi* nimumaluña alema hakuda yakuda yamelela. 40 Adaña maheta awambanda anfwila nawa alombaña lombe-e kulonda ayimoni kudi antu. Awa antu akayibabesha chikupu.”
41 Yesu washakamini kwakwihi nayikasha yamali nawa watalileña izaza dawantu chidombilileña mali muyikasha yamali, dichi akwamaheta amavulu adiña nakuumbilamu mawayawaya amavulu. 42 Kuhiñahu mumbanda nfwila kazweñi wenjili nakuumbilamu tumawayawaya twanyanya tuyedi twapela wuseya nankashi.* 43 Dichi watambikili atumbanji twindi nakuyileja nindi: “Inakuyileja chalala nami iwu mumbanda nfwila kazweñi nombilimu mali amavulu kubadika ejima anombili mali muyikasha yamali. 44 Muloña wejima wawu anombilimu mali anafumishiwu hamaheta awu, ilaña iwu mumbanda hela chakwila hikazweñi, nombilimu mali ejima adiñayi nawu akuhandilamu.”