Matewu

27 Chikwelili budidi, akulumpi jawatupristu niakulumpi jawantu amushakaminini Yesu hampuña kulonda amujahi. 2 Chamukasiliwu, amutwalili nakumuhana kudi nguvulu Pilatu.

3 Dichi Yudasi owu wamufukejeleli, chamweniyi nindi anafuukulihu kumujaha Yesu, chamukatili nankashi kumuchima nawa wafuntishili mali asiliva 30 kudi akulumpi jawatupristu niakulumpi jawantu, 4 nakuhosha nindi: “Navulumuna chinafukejela muntu waloña.”* Wena amwilili nawu: “Oyu nsañu yinatukundami wanyi, eyi aweni wumoni chiwukwila!” 5 Dichi wanatili owu mali asiliva mutembeli hakudiyila nikudiyila. Kuhiñahu wayili nakudikudika. 6 Ilaña akulumpi jawatupristu anoneli owu mali asiliva nakuhosha nawu: “Hichetejewa kusha awa mali mwiluña dajila dakuhembela maliku, muloña himali amashi.” 7 Chelili anatiyañani dehi, azatishili owu mali nakulandamu mpata yamukwakuwumba yakujiikamu enyi. 8 Dichi oyu mpata nikulelu ayitenaña nawu Mpata yaMashi. 9 Mazu ahosheliwu kuhitila mudi kaprofwetu Yeremiya ashikijeweli, akwila nawu: “Dichi anoneli mali asiliva 30, wuseya watoñweliwu kumulandisha nachu owu iyala, wuseya wakumulandilahu watoñweliwu kudi anyana kaIsarela amakwawu, 10 nawa alandilimu mpata yamukwakuwumba, kwesekeja nachanlejeliyi Yehova.”

11 Dichi Yesu wemeni kumesu anguvulu nawa nguvulu wamwihwili nindi: “Yeyi Mwanta wawaYudeya tahindi?” Yesu wamwakwili nindi: “Mwomwenomu muwunahoshi.” 12 Ilaña chamwinkeleñawu muloña kudi akulumpi jawatupristu niakulumpi, yena wamweneni kwanzo-o. 13 Kuhiñahu Pilatu wamwihwili nindi: “Komana yuma yejima yinakushimunawu hiwunakuyitiyaku, tahindi?” 14 Ilaña yena hamwakwiliku, wamweneni kwanzo-o chakwila nguvulu wahayamini nankashi.

15 Hachawija nichawija, nguvulu wombileñaku muntu akasawu mukaleya* wejima akeñeleñawu kudi izaza dawantu. 16 Hanoyu mpinji, mukaleya mwadiña mbanji akasiliwu ateneneñawu nawu Baraba. 17 Chapompeliwu hamu, Pilatu wayihwili nindi: “Hinyi imunakukeña nenu niyuumbiliku, Baraba tahindi Yesu atenañawu nawu Kristu?” 18 Muloña Pilatu welukili nindi amuhanini kudi yena muloña amutiyilili ichima. 19 Cheñi, hampinji yashakaminiyi hachitwamu chakusompela, ñodindi wamutemesheleli mazu akwila nindi: “Bayi wukoña chuma chidi chejima hadi owu muntu waloñaku, muloña ami dalelu nakabakani nankashi muchilota hamuloña wanowu muntu.” 20 Ilaña akulumpi jawatupristu niakulumpi ashinjilili mazaza awantu kulonda alombi nawu Baraba amuumbiku, ilaña Yesu amujahi. 21 Nguvulu wayihwili nindi: “Hadi awa ayedi, wumu yodihi imunakukeña nenu niyuumbiliku?” Wena aakwili nawu: “Baraba.” 22 Pilatu wayihwili nindi: “Indi Yesu atenañawu nawu Kristu nimwili ñahi?” Wejima wawu ahosheli nawu: “Mujahilenu hamutondu!” 23 Yena wayihwili nindi: “Muloñadi? Chumanyi chatama chinakoñiyi?” Wena aswejeli nikubidika nawu: “Mujahilenu hamutondu!”

24 Pilatu chamweniyi nindi nakañanyi nawa antu anasweji kuleta ipumba, wanoneli menji nakwisukila hamesu ezaza dawantu, nakuhosha nindi: “Ami hinikweti muloña wamashi aniwu muntuku. Enu aweni mumoni chimukwila.” 25 Hanoyu mpinji antu ejima amwilili nawu: “Mashi indi ekali hadi etu nianyanetu.” 26 Dichi wayuumbililiku Baraba, ilaña Yesu amuvupoleli yikoti, kuhiñahu wamuhanini kudi mashidika kulonda amujahili hamutondu.

27 Kuhiñahu, mashidika anguvulu amutwalili Yesu mwitala danguvulu, apompesheli izaza damashidika dejima nawa amunyeñumukili. 28 Chamuvuuliliwu, amuvwikili ihina dichinana nge-e, 29 atuñili chibaaba chanyiña nakumuvwika kumutu nawa amukwatishili iteti muchikasa chindi chachidiilu. Atachikili kumufukamina nakumusupisha nawu: “Kolaku, eyi Mwanta wawaYudeya!” 30 Amufwijilili mazeñi nawa amutambwili iteti nakumweta nachu kumutu. 31 Nkumininaku, hanyima yakumusupisha, amuvuulili ihina nakumuvwika yakuvwala yindi yahewulu, kuhiñahu amutwalili nakumupopela hamutondu.

32 Chayileñawu, awanini iyala wejina daShimona wakuKireni. Dichi owu iyala amushinjilili nawu yasendi mutondu wakumuyandishilahu* Yesu. 33 Chashikiliwu kwiluña datenañawu nawu Gologota, chaya mukwila nawu Chaañu, 34 amwinkeli vinyu yakubomba nayuma yalula nawu yanwi; ilaña chayitompeliyi, wakaanini kuyinwa. 35 Chamupopeleliwu hamutondu, adanzañeneni yakuvwala yindi yahewulu kuhitila mukusakula natuyinjikijilu, 36 ashakamini kwenoku nakumuhemba. 37 Cheñi nawa, hewulu damutu windi asonekelihu muloña wamwinkeliwu nawu: “Iwu diyi Yesu Mwanta wawaYudeya.”

38 Kuhiñahu, atupondu ayedi ayipopeleli hanyitondu kwakwihi nayena, wumu kuchidiilu chindi, mukwawu nawa kuchimunswa chindi. 39 Antu ahitileña niwena atachikili kumusupisha nakupukumuna nyitu yawu 40 nakuhosha nawu: “Eyi wunateli kusanda tembeli nakuyituña cheñi mumafuku asatu, daamwini eyi aweni! Neyi wudi mwana kaNzambi, sulukaku hamutondu wakuyandishila!”* 41 Akulumpi jawatupristu niansoneki niakulumpi niwena atachikili kumusupisha nakuhosha nawu: 42 “Wamwinineña akwawu; ilaña nakañanyi kudaamwina yomweni! Diyi Mwanta waIsarela; mulekenu yasuluki hamutondu wakuyandishila,* nawa tukumukuhwelela. 43 Wamukuhwelela Nzambi; mulekenu yamwamwini neyi nakumukeña, muloña wahosheli nindi, ‘Ami nidi Mwana kaNzambi.’” 44 Niatupondu apopeleliwu kwakwihi nayena niwena amusupishileña.

45 Kufuma haora yamu 6,* kwelili mwidima munodu iluña dejima kushika nihaora yamu 9.* 46 Kwakwihi naora yamu 9, Yesu wabidikili nezu datiyakana nindi: “Eli, Eli, lama sabakatani?” chaya mukwila nawu, “Nzambi yami, Nzambi yami, wunanshiyilidi nkawami?” 47 Chatiyiliwu awa mazu, antu amu emeni kwenoku atachikili kuhosha nawu: “Iwu muntu nakutambika Elija.” 48 Hohenohu wumu hakachi kawu wayili lufuchi nakunona siponja* nakuyitumpika muvinyu yabatuka nakuyisha kwiteti nakumwinka nindi yanwi. 49 Ilaña amakwawu ahosheli nawu: “Mulekenu! Tutali neyi Elija wukwinza nakumwamwina.” 50 Cheñi Yesu wabidikili nezu datiyakana, hohenohu wafwili.

51 Hayoyenoyu mpinji, ihina dakujika mwiluña dajila databukili hayedi kufuma kwiwulu nakushika kwishina, kwadiña mutentanshi nimalola abalokeli. 52 Majamu* niwena enzunukili, nyijimba yayivulu yawafu akwakujila afwili dehi yajiikokeli 53 ayimweni kudi antu amavulu. (Nawa antu afumineña kumajamu hanyima yakwila Yesu anamusañuli dehi, eñilili mumusumba wajila.) 54 Ilaña mukulumpi wamashidika ninowu adiñayi nawu amuhembeleña Yesu, amweni mutentanshi niyuma yamwekeneña, atiyili woma nankashi nawa ahosheli nawu: “Chalala iwu wadiña Mwana kaNzambi.”

55 Nawa ambanda amavulu ayili hamu naYesu kufuma kuÑaliliya kulonda amukalakeli, emeni hahalehi chanti nakutala; 56 hakachi kanawa ambanda hadiña Mariya Mandaleni niMariya mama yaYakoba naYosesi niñoda Zebedewu mama yawanyana awamayala.

57 Chikwelili melela, kwenjili samaheta wafumini kuAramateya, ijina dindi Yosefu, owu wekalili niyena kambanji kaYesu. 58 Iwu iyala wayili kudi Pilatu nakulomba mujimba waYesu. Dichi Pilatu walejeli amashidika nindi amwinki mujimba. 59 Yosefu wanoneli mujimba nakuwuvuñila mwihina dadiwahi dakadi majilu, 60 kuhiñahu, wawushili mwijamu dindi* dadiha dapokweliyi mwilola. Chelili kuchiisu chejamu* nalañumwiniku dehi ilola deneni, wafuminiku. 61 Ilaña Mariya Mandaleni niMariya mukwawu ashalili kwenoku nawa ashakamini kwakwihi nejamu.

62 Yumiyi yamwekeni hefuku Dakuloñesha* Sabata. Hefuku dalondelelihu, akulumpi jawatupristu nawaFwarisi adipompesheli hamu kudi Pilatu, 63 nakuhosha nawu: “Mwanta, tunaanuki mazu ahosheliyi ona mukwakuluwañesha antu hadiñayi wamumi nindi, ‘Neyi munahiti dehi mafuku asatu akamusañula.’ 64 Dichi, lejaku antu ayi nakuhemba ijamu kushika nihefuku damuchisatu, kuchiina atumbanji twindi akenda kamwiyamu nakuleja antu nawu, ‘Anamusañuli dehi kufuma mudi afu!’ Nawa iku kutwamba kwakukuminaku kwakabadika kutama kutwamba kwakusambila.” 65 Pilatu wayilili nindi: “Sendenu anhembi kulonda akahembi ijamu. Yenu mwakadihembi ijamu chikupu.” 66 Dichi wena ayili, kwijamu akolesheliku chikupu nawa ashiliku anhembi.