Kushindulula Watachi

26 Ichi dichadiña mazanvu awakakuhemba kuchiisu:+ mudi aKora, mwafumini Meshelemiya+ mwana kaKore wahadi anyana kaAsafi awamayala. 2 Nawa awa diwu adiña anyana kaMeshelemiya awamayala: Wedi wadiña Zekariya, wamuchiyedi Yediyayeli, wamuchisatu Zebadiya, wamuchiwana Yatiniyeli, 3 wamuchitanu Elami, wamu 6 Yehohanani, wamu 7 Eliyeho Enayi. 4 Nawa Obedi Edomi wadiña nanawa anyana awamayala: Wedi wadiña Shemaya, wamuchiyedi Yehozabadi, wamuchisatu Yowa, wamuchiwana Sakari, wamuchitanu Netaneli, 5 wamu 6 Amiyeli, wamu 7 Isakari nawa wamu 8 Pewuletayi. Ichi dichamukiswililiwu Obedi Edomi kudi Nzambi.

6 Nawa mwanindi Shemaya wavweli anyana awamayala adiña anyuuli achisaka chakukatata yawu, muloña adiña amayala añovu nawa ashikilamu. 7 Anyana kaShemaya awamayala adiña: Otini, Refayeli, Obedi niElizabadi; niamanakwindi aElihu naSemakiya niwena adiña amayala ashikilamu. 8 Awa ejima adiña anyana kaObedi Edomi awamayala; wena nianyanawu awamayala kushilahu niamanakwawu adiña amayala ashikilamu nawa atelela kuzata mudimu, ejima adiña kukabadi kaObedi Edomi, adiña 62. 9 Nawa Meshelemiya+ wadiña nawanyana awamayala niamanakwindi, amayala ashikilamu 18. 10 Nawa Hosa wahadi anyana kaMerari awamayala wadiña nawanyana awamayala. Shimiri diyi wadiña nlomboli* hela chakwila hidiyi wadiña wediku, tata yindi wamutondeli kwikala nlomboli, 11 wamuchiyedi Hilikiya, wamuchisatu Tebaliya, wamuchiwana Zekariya. Anyana kaHosa awamayala niamanakwindi ejima hamu adiña 13.

12 Munawa mazanvu awakakuhemba kuchiisu, akulumpi janyikala adiña nanyidimu neyi yazatileña amanakwawu, nyidimu yakukalakela hetala daYehova. 13 Dichi ana alema niabula kulema asakwili nayinjikijilu+ kwesekeja nanyitaña yawu, kulonda eluki muntu wukutambula chiisu-hichiisu. 14 Kufumahu, chinjikijilu chakumusela chaholokeleli hadi Shelemiya. Kutalisha hadi mwanindi Zekariya wadiña mukakulejana maana washinshika, chasakwiliwu nayinjikijilu, chinjikijilu chindi chaholokeleli kukabeta kakuchimunswa. 15 Chinjikijilu chaObedi Edomi chaholokeleli kukabeta kakuchidiilu, nawa anyanindi awamayala+ ayinkeli mudimu wakutala jinkalaña. 16 Yinjikijilu yaShupimi niHosa+ yaholokeleli kumujika, kwakwihi naChiisu chaShaleketi kumukwakwa weneni wakanduka kwadiña izanvu dawanhembi datalashanini nezanvu dikwawu dawanhembi; 17 kumusela kwadiña aLevi 6; kukabeta kakuchimunswa, kwawanikileña awana hefuku-hefuku nawa kukabeta kakuchidiilu nikwena kwawanikileña awana hefuku-hefuku; ilaña kujinkalaña kwawanikileña+ ayedi-ayedi; 18 kwitala dayishimi kumujika, kwawanikileña awana kumukwakwa weneni+ nawa kwitala dayishimi kwawanikileña ayedi. 19 Awa diwu adiña mazanvu awakakuhemba kuchiisu kufuma mudi anyana awamayala avweliwu kudi aKora nikudi aMerari.

20 Kudi aLevi, Ahiya diyi wadiña namudimu wakutala yisweku yayuma yalema yamwitala daNzambi walala niyisweku yayuma yadiña nakujilikawu.*+ 21 Anyana kaLadani awamayala, dikwila nawu anyana kawaGeshoni awamayala akukabadi kaLadani, anlomboli jayisaka yakutata yawu akukabadi kaLadani mukaGeshoni, Yehiyeli+ 22 nianyana kaYehiyelayi, Zetami nimanakwindi Yoweli. Wenawa adiña namudimu wakutala yisweku yayuma yalema yamwitala daYehova.+ 23 Mudi aAmuramu, aIzihari, aHebironi niaUziyeli,+ 24 Shebuweli mwana kaGeshomu, Geshomu mwana kaMosi, diyi wadiña nlomboli wakutala jinkalaña. 25 Amanakwindi, adiña amuchisaka chaEliyezeri+ adiña, Rehabiya,+ Yeshaya, Yorami, Zikiri niShelomoti. 26 Iwu Shelomoti hamu niamanakwindi adiña namudimu wakutala yisweku yayuma yalema yadiña nakujilikawu,+ yajilikileñawu kudi Mwanta Davidi,+ kudi anlomboli janyitaña yawu,+ antwamina amakombakaji, antwamina ajinkulakaji nikudi akulumpi janjita. 27 Yuma yasendeliwu kufuma kunjita+ niyapuupiliwu,+ ayijilikili kulonda awahishi nachu itala daYehova; 28 niyuma yejima yajilikiliwu kudi Samweli mukakumona jakumbidi,+ kudi Sawulu mwana kaKishi, kudi Abineri+ mwana kaNeri nikudi Yowabi+ mwana kaZeruwiya.+ Chuma chejima chajilikiliyi muntu achakameneneña kudi Shelomiti niamanakwindi.

29 Mudi aIzihari,+ Kenaniya hamu nianyanindi awamayala ayinkeli nyidimu yaambukaku hanji yetala daNzambi yakwikala ayilolu niansompeshi+ jawaIsarela.

30 Mudi aHebironi,+ Hashabiya hamu niamanakwindi, amayala ashikilamu 1,700, diwu alombweleña aIsarela mwiluña dakumujika waYodani nakulombola mudimu wejima waYehova nimudimu wamwanta. 31 Mudi aHebironi, Yeriya+ diyi wadiña nlomboli* yawaHebironi kwesekeja nandonda yachisaka chakukatata yawu. Muchaaka chamu 40 chachiyuulu chaDavidi,+ akeñakeñeli amayala añovu, ashikilamu nawa ayiwanini hakachi kawu kuYazeri+ muGiliyadi. 32 Nawa kuvula kwawamanakwindi, amayala ashikilamu, adiña 2,700, anlomboli janyitaña yawu. Dichi Mwanta Davidi wayinkeli mudimu wakulombola aRubeni, aGadi nimuchidi wachibalu waweni Manasi, kutalisha hansañu yejima yaNzambi walala ninsañu yejima yamwanta.