KUCHINDA

1 Nawa Yehova wahosheli naMosi mwisaña daSinayi,+ mwitenti dakubulakena,+ hefuku datachi dakakweji kamuchiyedi, muchaaka chamuchiyedi kufuma hafuminiwu mwituña daEjipitu.+ Wamulejeli nindi: 2 “Chindaku+ izaza dawaIsarela* dejima hamuntu-hamuntu* kwesekeja nayisaka yawu, nanyitaña yawu ninamajina awamayala ejima. 3 Eyi niAroni musoneki ejima adi nayaaka 20 kuya hewulu+ kwesekeja namazanvu awu,* anateli kukalakala mudimu wawushidika muIsarela.

4 “Hamuchidi-hamuchidi, wusendihu iyala wumu; iyala-hiiyala wakekala nlomboli yamutaña wawu.+ 5 Awa diwu majina awamayala imwakemana nawu: mudi Rubeni, Elizuri+ mwana kaShedeyuri; 6 mudi Simiyoni, Shelumiyeli+ mwana kaZurishadayi; 7 mudi Yuda, Nashoni+ mwana kaAminadabi; 8 mudi Isakari, Netaneli+ mwana kaZuwari; 9 mudi Zebuluni, Eliyabi+ mwana kaHeloni; 10 mudi anyana kaYosefu awamayala: kufuma mudi Efuremu,+ Elishama mwana kaAmihudi; kufuma mudi Manasi, Gamaleli mwana kaPedazuri; 11 mudi Benjamini, Abidani+ mwana kaGideyoni. 12 mudi Dani, Ahiyezeri+ mwana kaAmishadayi; 13 mudi Asheri, Pagiyeli+ mwana kaOkirani; 14 mudi Gadi, Eliyasafi+ mwana kaDeyuweli; 15 mudi Nafitali, Ahira+ mwana kaEnani. 16 Awa diwu antu atambikiliwu hezaza dawantu. Diwu anlomboli+ anyichidi yawatata jawu, dikwila nawu anlomboli* amakombakaji awaIsarela.”+

17 Dichi Mosi naAroni asendeli awa amayala atondeliwu hamajina. 18 Apompesheli izaza dawantu dejima hefuku datachi dakakweji kamuchiyedi kulonda ayisoneki muntu-himuntu hejina dindi, hachisaka chindi nikwesekeja nanyitaña yawu, ejima adiña nayaaka 20 kuya hewulu,+ 19 neyi chamulejeliwu Mosi kudi Yehova. Dichi wayisonekeleli mwisaña daSinayi.+

20 Anyana kaRubeni awamayala, dikwila nawu anyana kawedi waIsarela,+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili hamuntu-hamuntu, 21 nawa antu ejima asonekeliwu kumuchidi waRubeni adiña 46,500.

22 Anyana kaSimiyoni+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili hamuntu-hamuntu, 23 nawa antu ejima asonekeliwu kumuchidi waSimiyoni adiña 59,300.

24 Anyana kaGadi+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 25 nawa antu ejima asonekeliwu kumuchidi waGadi adiña 45,650.

26 Anyana kaYuda+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 27 nawa antu ejima asonekeliwu kumuchidi waYuda adiña 74,600.

28 Anyana kaIsakari+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 29 nawa ejima asonekeliwu kumuchidi waIsakari adiña 54,400.

30 Anyana kaZebuluni+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 31 nawa ejima asonekeliwu kumuchidi waZebuluni adiña 57,400.

32 Anyana kaYosefu, kufuma mudi Efuremu+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 33 nawa ejima asonekeliwu kumuchidi waEfuremu adiña 40,500.

34 Anyana kaManasi+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 35 nawa ejima asonekeliwu kumuchidi waManasi adiña 32,200.

36 Anyana kaBenjamini+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 37 nawa ejima asonekeliwu kumuchidi waBenjamini adiña 35,400.

38 Anyana kaDani+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 39 nawa ejima asonekeliwu kumuchidi waDani adiña 62,700.

40 Anyana kaAsheri+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 41 nawa ejima asonekeliwu kumuchidi waAsheri adiña 41,500.

42 Anyana kaNafitali+ ayisonekeli hamajina-hamajina, hachisaka-hachisaka nikwesekeja nanyitaña yawu. Amayala ejima adiña nayaaka 20 kuya hewulu ashikililimu kukalakala mudimu wawushidika ayichindili, 43 nawa ejima asonekeliwu kumuchidi waNafitali adiña 53,400.

44 Awa ejima ayisonekeli kudi aMosi naAroni nikudi anlomboli 12 awaIsarela, muntu-himuntu wemeneneñaku mutaña windi. 45 AIsarela ejima adiña nayaaka 20 kuya hewulu ashikililimu kukalakala mudimu wawushidika muIsarela, ayisonekeli kwesekeja nanyitaña yawu, 46 nawa antu ejima asonekeliwu adiña 603,550.+

47 Ilaña aLevi+ hiyayisonekeli kwesekeja namwaya muchidi wawatata jawuku.+ 48 Dichi Yehova wamulejeli Mosi nindi: 49 “Muchidi wawaLevi hohu diwu iwukubula kusoneka nawa bayi wuyichindila hamu nawakwawu aIsarelaku.+ 50 Wutondi aLevi kulonda ahembeña tabanaka yaWunsahu,+ yipwepu yayu yejima niyuma yayu yejima.+ Asendeña tabanaka niyipwepu yayu yejima,+ dihakukalakelañawu+ nawa akunyeñumwisha chilombu chawu kutabanaka.+ 51 Mpinji yejima yinakukeña kusendawu tabanaka, aLevi diwu atela kuyilemuna;+ nawa neyi tabanaka anakukeña kuyilema, aLevi diwu atela kuyilema. Muntu wejima* abula kwitejawu wakaswina kwakwihi, atela kumujaha.+

52 “KaIsarela wejima watela kulemena itenti dindi muchilombu chinamutoñweliwu, iyala wejima kwesekeja nezaza dindi danyichidi* yisatu+ kwesekeja namazaza awu.* 53 Nawa aLevi atela kunyeñumwisha chilombu chawu kutabanaka yaWunsahu kulonda nakabuli kuhilila izaza dawaIsarela;+ nawa aLevi diwu atela kwikala namudimu wakuhemba tabanaka* yaWunsahu.”+

54 Antu jaIsarela elili yuma yejima yamulejeliwu Mosi kudi Yehova. Elili mwomwenomu.

2 Dichi Yehova wayilejeli aMosi naAroni nindi: 2 “AIsarela atela kuteekela heluña hanatoñweliwu izaza dawu danyichidi yisatu,+ iyala-hiiyala watela kuteekela kwakwihi nampandela yamutaña* windi. Atela kuteeka nakutalisha kwitenti dakubulakena, kwi-i ndo-o.

3 “Izaza danyichidi yisatu damuchilombu chaYuda diwu akuteekelaña kukabadi kakumusela, kwaselelaña itena kwesekeja namazaza awu;* Nashoni+ mwana kaAminadabi diyi nlomboli wawanyana kaYuda awamayala. 4 Amashidika indi asonekeliwu adiña 74,600.+ 5 Muchidi waIsakari diwu akuteekelaña kwakwihi nayena; Netaneli+ mwana kaZuwari diyi nlomboli wawanyana kaIsakari awamayala. 6 Amashidika indi asonekeliwu adiña 54,400.+ 7 Muchidi waZebuluni diwukulondelañahu; Eliyabi+ mwana kaHeloni diyi nlomboli wawanyana kaZebuluni awamayala. 8 Amashidika indi asonekeliwu adiña 57,400.+

9 “Antu ejima asonekeliwu muchilombu chaYuda kulonda akalakaleña mudimu wawushidika adiña 186,400. Awa diwu akutachikilañahu kwidika muchilombu.+

10 “Izaza danyichidi yisatu damuchilombu chaRubeni+ kwesekeja namazaza awu,* dikuteekelaña kukabadi kakuchidiilu; Elizuri+ mwana kaShedeyuri diyi nlomboli wawanyana kaRubeni awamayala. 11 Amashidika indi asonekeliwu adiña 46,500.+ 12 Muchidi waSimiyoni diwu akuteekelaña kwakwihi nayena; Shelumiyeli+ mwana kaZurishadayi diyi nlomboli wawanyana kaSimiyoni awamayala. 13 Amashidika indi asonekeliwu adiña 59,300.+ 14 Muchidi waGadi diwukulondelañahu; Eliyasafi+ mwana kaRuweli diyi nlomboli wawanyana kaGadi awamayala. 15 Amashidika indi asonekeliwu adiña 45,650.+

16 “Antu ejima asonekeliwu muchilombu chaRubeni kulonda akalakaleña mudimu wawushidika adiña 151,450, nawa diwu akwikalaña amuchiyedi kwidika muchilombu.+

17 “Neyi itenti dakubulakena hiyakudibuukisha,*+ chilombu chawaLevi chikwikalaña hakachi kayilombu yikwawu.

“Atela kwenda mundonda yoyimu kwesekeja namuyakuteekelañawu,+ iwu mwiluña dindi, iwu mwiluña dindi, kwesekeja namazaza awu anyichidi yisatu.

18 “Izaza danyichidi yisatu damuchilombu chaEfuremu kwesekeja namazaza awu,* dikuteekelaña kukabadi kakumujika; Elishama+ mwana kaAmihudi diyi nlomboli wawanyana kaEfuremu awamayala. 19 Amashidika indi asonekeliwu adiña 40,500.+ 20 Muchidi waManasi+ diwukulondelañahu; Gamaleli+ mwana kaPedazuri diyi nlomboli wawanyana kaManasi awamayala. 21 Amashidika indi asonekeliwu adiña 32,200.+ 22 Muchidi waBenjamini diwukulondelañahu; Abidani+ mwana kaGideyoni diyi nlomboli wawanyana kaBenjamini awamayala. 23 Amashidika indi asonekeliwu adiña 35,400.+

24 “Antu ejima asonekeliwu muchilombu chaEfuremu kulonda akalakaleña mudimu wawushidika adiña 108,100, nawa diwu akwikalaña amuchisatu kwidika muchilombu.+

25 “Izaza danyichidi yisatu damuchilombu chaDani kwesekeja namazaza awu,* dikuteekelaña kukabadi kakuchimunswa; Ahiyezeri+ mwana kaAmishadayi diyi nlomboli wawanyana kaDani awamayala. 26 Amashidika indi asonekeliwu adiña 62,700.+ 27 Muchidi waAsheri diwu akuteekelaña kwakwihi nayena; Pagiyeli+ mwana kaOkirani diyi nlomboli wawanyana kaAsheri awamayala. 28 Amashidika indi asonekeliwu adiña 41,500.+ 29 Muchidi waNafitali diwukulondelañahu; Ahira+ mwana kaEnani diyi nlomboli wawanyana kaNafitali awamayala. 30 Amashidika indi asonekeliwu adiña 53,400.+

31 “Antu ejima asonekeliwu muchilombu chaDani kulonda akalakaleña mudimu wawushidika adiña 157,600. Awa diwu akwikalaña akukumishaku kwidika muchilombu+ kwesekeja namazaza awu anyichidi yisatu.”

32 Awa diwu aIsarela asonekeliwu kwesekeja nanyitaña yawu; kuvula kwawantu ejima adiña muyilombu asonekeliwu kukalakala mudimu wawushidika adiña 603,550.+ 33 Ilaña aLevi hiyayisonekeli+ hamu nawakwawu aIsarelaku,+ neyi chamulejeliwu Mosi kudi Yehova. 34 AIsarela elili yuma yejima yamulejeliwu Mosi kudi Yehova. Ichi dichiyateekeleñawu kwesekeja namazaza awu anyichidi yisatu+ nawa dichiyanyamukileñawu nakuya,+ muntu-himuntu kwesekeja nachisaka chindi nikwesekeja nanyitaña yawu.

3 Awa diwu adiña mavumu* ayisaka yaAroni niMosi hefuku dahosheliyi Yehova naMosi haMpidi yaSinayi.+ 2 Awa diwu adiña majina awanyana kaAroni awamayala: wedi Nadabi, halondela niAbihu,+ Eleyazari+ niItamari.+ 3 Awa diwu adiña majina awanyana kaAroni awamayala, atupristu awayishiliwu, owu aswanyikiliwu kulonda akalakali mudimu wawupristu.+ 4 Hela chochu, aNadabi naAbihu afwilili kumesu aYehova+ halambwiliwu kesi kabulili kuyitejawu kumesu aYehova mwisaña daSinayi nawa hiyavwalilihu anyanaku. Ilaña Eleyazari+ naItamari+ atwalekelihu kukalakala mudimu wawupristu hamu natata yawu Aroni.

5 Kuhiñahu, Yehova wamulejeli Mosi nindi: 6 “Letaku muchidi waLevi+ kwakwihi nawa wuyimiki kumesu akapristu Aroni kulonda amukalakeleña.+ 7 Akumukalakelaña yena niizaza dejima kwitenti dakubulakena hakukalakalañawu mudimu wawu hatabanaka. 8 Akuhembaña yipwepu+ yejima yamwitenti dakubulakena nikukalakala nyidimu yawu yakukalakela aIsarela hakuzatañawu nyidimu yahatabanaka.+ 9 Wakayihani aLevi kudi Aroni nikudi anyanindi awamayala. Akamwinkawu akekali yawaana yakufuma kudi aIsarela.+ 10 Wumutondi Aroni nianyanindi awamayala kulonda akalakaleña mudimu wawu wawupristu+ nawa muntu wejima* abula kwitejawu wakaswina kwakwihi, atela kumujaha.”+

11 Yehova wamulejeli cheñi Mosi nindi: 12 “Tiyaña! Ami, nanoni aLevi kufuma mukachi kawaIsarela kulonda niyisinsishi hadi awedi ejima* awaIsarela+ nawa aLevi akwikala ami. 13 Muloña awedi ejima ami.+ Hefuku dinajahili awedi ejima mwituña daEjipitu,+ nadijilikilili awedi ejima muIsarela, kutachikila kudi muntu kushika nikudi kanyama.+ Akwikalaña ami. Yami Yehova.”

14 Yehova watwalekelihu kumuleja Mosi mwisaña daSinayi+ nindi: 15 “Sonekaku anyana kaLevi awamayala kwesekeja nanyitaña yawu nikwesekeja nayisaka yawu. Wusoneki iyala wejima, kutachikila adi nakakweji kamu nakuya hewulu.”+ 16 Dichi Mosi wayisonekeli kwesekeja nachashimwiniyi Yehova, neyi chamulejeliwu. 17 Awa diwu majina awanyana kaLevi awamayala: Geshoni, Kohati niMerari.+

18 Awa diwu adiña majina awanyana kaGeshoni awamayala kwesekeja nayisaka yawu: Libini naShimeyi.+

19 Anyana kaKohati awamayala kwesekeja nayisaka yawu, adiña Amuramu, Izihari, Hebironi niUziyeli.+

20 Anyana kaMerari awamayala kwesekeja nayisaka yawu, adiña Mahili+ naMushi.+

Iyi diyadiña yisaka yawaLevi kwesekeja nanyitaña yawu.

21 Mudi Geshoni mwafumini chisaka chawaLibini+ nichisaka chawaShimeyi. Iyi diyadiña yisaka yawaGeshoni. 22 Kuvula kwawantu jawu ejima awamayala asonekeliwu, kutachikila adi nakakweji kamu nakuya hewulu adiña 7,500.+ 23 Yisaka yawaGeshoni yatekeeleleña kunyima yatabanaka+ kukabadi kakumujika. 24 Eliyasafi mwana kaLayeli diyi wadiña nlomboli wawaGeshoni kuchisaka chakukatata yawu. 25 Mudimu wazatileñawu anyana kaGeshoni+ awamayala kwitenti dakubulakena, wadiña wakwakamena tabanaka niitenti,+ chijiku chayu,+ ihina dakwaambula nachu*+ dakuwiñililu wakwitenti dakubulakena, 26 mahina akukudika akujika nachu+ mwakumina lubanza, ihina dakwaambula nachu*+ dakuwiñililu wakulubanza lwanyeñumuka tabanaka nikameña, nyonji yayu ninyidimu yejima yakundama kuniyi yuma.

27 Mudi Kohati mwafumini chisaka chawaAmuramu, chisaka chawaIzihari, chisaka chawaHebironi nichisaka chawaUziyeli. Iyi diyadiña yisaka yawaKohati.+ 28 Kuvula kwawantu ejima awamayala, kutachikila adi nakakweji kamu nakuya hewulu adiña 8,600; awa diwu adiña namudimu wakwakamena iluña dajila.+ 29 Yisaka yawanyana kaKohati awamayala yatekeeleleña kukabadi kakuchidiilu katabanaka.+ 30 Elizafani mwana kaUziyeli+ diyi wadiña nlomboli wayisaka yawaKohati kuchisaka chakukatata yawu. 31 Mudimu wazatileñawu wadiña wakwakamena Chimbañu,+ mesa,+ chakutentekahu manoñu,+ tumeña,+ yipwepu+ yazatishileñawu hakukalakala mwiluña dajila, ihina dakwaambula nachu*+ ninyidimu yejima yakundama kuniyi yuma.+

32 Eleyazari+ mwana kakapristu Aroni, diyi wadiña nlomboli wawaLevi. Yeniwu diyi watalileña antu adiña namudimu wakwakamena nyidimu yamwiluña dajila.

33 Mudi Merari mwafumini chisaka chawaMahili nichisaka chawaMushi. Iyi diyadiña yisaka yaMerari.+ 34 Kuvula kwawantu ejima awamayala asonekeliwu, kutachikila adi nakakweji kamu nakuya hewulu adiña 6,200.+ 35 Zuriyeli mwana kaAbihayili diyi wadiña nlomboli wayisaka yaMerari kuchisaka chakukatata yawu. Atekeeleleña kukabadi kakuchimunswa katabanaka.+ 36 Anyana kaMerari awamayala adiña namudimu wakutala mafuremu+ akutabanaka, nkañalu yayu,+ yishimi yayu,+ mayanda ayu, yipwepu+ yayu yejima ninyidimu yejima yakundama kuniyi yuma,+ 37 kushilahu niyishimi yejima yanyeñumukili lubanza nimayanda ayu,+ mpopu jayu jakwitenti ninyonji yayu.

38 Mosi naAroni nianyanindi awamayala diwu ateekeleleña kumbidi yatabanaka kukabadi kakumusela, kwakwihi netenti dakubulakena kukabadi kwaselelaña itena. Adiña namudimu wakuzatila heluña dajila, diwadiña mudimu wawu wakukalakelaku aIsarela. Muntu wejima* abulili kwitejawu neyi aswina kwakwihi, amujahileña.+

39 Kuvula kwawaLevi ejima awamayala, kutachikila hadi adi nakakweji kamu nakuya hewulu asonekeliwu kudi aMosi naAroni kwesekeja nayisaka yawu neyi chayilejeliwu kudi Yehova, adiña 22,000.

40 Kuhiñahu, Yehova wamulejeli Mosi nindi: “Sonekaku awedi ejima awaIsarela, kutachikila adi nakakweji kamu nakuya hewulu,+ wuyichindi nawa wusoneki ndandanda yamajina awu. 41 Wunnoneli aLevi nakuyisinsisha hadi awedi ejima adi mukachi kawaIsarela+ niyimuna yawaLevi nakuyisinsisha hadi yimuna yawedi yejima yawaIsarela.+ Yami Yehova.” 42 Dichi Mosi wasonekeli awedi ejima mukachi kawaIsarela neyi chamulejeliwu kudi Yehova. 43 Kuvula kwawawedi ejima awamayala asonekeliwu majina, kutachikila adi nakakweji kamu nakuya hewulu, adiña 22,273.

44 Yehova watwalekelihu kumuleja Mosi nindi: 45 “Nonaku aLevi wuyisinsishi hadi awedi ejima adi mukachi kawaIsarela nawa wunoni yimuna yawaLevi wuyisinsishi hadi yimuna yawu nawa aLevi atela kwikala ami. Yami Yehova. 46 Hakwila wuseya wakukuula nachu+ awedi awaIsarela 273 owu anasompokihu hadi aLevi,+ 47 wutambuli mashekeli* atanu akukuula nachu muntu-himuntu+ kwesekeja nalushekeli lwatelela lwamwiluña dajila.* Lushekeli lumu lwadiña namagira* 20.+ 48 Owu mali wakayihani kudi Aroni nianyanindi awamayala akekali wuseya wakukuula nachu ejima anasompokihu hadi wena.” 49 Dichi Mosi watambwili mali akukuula nachu kulonda akuuli antu asompokeli hadi aLevi. 50 Watambwili mali kudi awedi awaIsarela, mashekeli 1,365 kwesekeja nalushekeli lwatelela lwamwiluña dajila. 51 Kufumahu, Mosi wahanini mali akukuula nachu kudi Aroni nikudi anyanindi awamayala kwesekeja nezu daYehova, neyi chamulejeliwu Mosi kudi Yehova.

4 Dichi Yehova wayilejeli aMosi naAroni nindi: 2 “Mwatela kuchinda anyana kaKohati+ awamayala kufuma hadi anyana kaLevi awamayala, kwesekeja nayisaka yawu nikwesekeja nanyitaña yawu, 3 antu ejima adi nayaaka kutachikila ha 30+ nakushika ku 50+ adi mwizanvu dawantu anenkiwu mudimu wakukalakela mwitenti dakubulakena.+

4 “Iwu diwu mudimu wukuzataña anyana kaKohati awamayala mwitenti dakubulakena.+ Himudimu wajila chikupu: 5 Neyi aIsarela hiyakufuma kwiluña dimu nakuya kwiluña dikwawu, Aroni nianyanindi awamayala akeñilaña mwitenti dakubulakena nakunona ihina dakwaambula nachu+ nakubuta hachimbañu+ chaWunsahu. 6 Akabutañahu chakujika nachu chakutuña nachitembi cheyobu* nikushahu ihina dawulombu wabulu nawa akashañaku nyalachi+ yachu yakusendelaku.

7 “Nawa akabutaña ihina dawulombu wabulu hamesa yamankendi akutenteka+ kumesu aNzambi nawa akashañahu yipwepu, makaapu,* yeña yakunama ninyilondu yamulambu wavinyu;+ mankendi akulambula+ mpinji yejima hiyatela kuyifumishahuku. 8 Akatandumwinañahu ihina dawanda wuchinana nge-e nikubutahu chakujika nachu chakutuña nachitembi cheyobu* wamukaluñalwiji nawa akashañaku nyalachi+ yayu yakusendelaku. 9 Kuhiñahu, akanonaña ihina dawulombu wabulu nakubuta hachakutentekahu manoñu+ achejeji, hamu namanoñu achu,+ nzamba yachu, yuma yachu yakukwata nachu kesi+ niyipwepu yachu yejima yamanji jazatishañawu kuchakutentekahu manoñu. 10 Akachivuñilaña hamu nayipwepu yachu yejima hachakujika nachu chakutuña nachitembi cheyobu* nakuchisha hamukambu wakuchisendelahu. 11 Nawa akatandumwinaña ihina dawulombu wabulu hakameña kawuru,+ akabutañahu chuma chakujika nachu chakutuña nachitembi cheyobu* nikushaku nyalachi+ yachu yakusendelaku. 12 Kuhiñahu, akanonaña yipwepu+ yejima yazatishañawu kumudimu wakalakalañawu mpinji yejima mwiluña dajila nakuyisha hehina dawulombu wabulu. Kufumahu, akayibuta nachakujika nachu chakutuña nachitembi cheyobu* nikuyisha hamukambu wakusendelahu.

13 “Akafumisheña mawuti* hakameña+ nakutandumwinahu ihina dawanda wawusombu. 14 Hakameña akashañahu yipwepu yaku yejima yazatishañawu neyi anakukalakela kukameña: jakusendelahu kesi, mafoloku,* mafosholu niyeña yakunama, dikwila nawu yipwepu yejima yakameña;+ nawa akatandumwinañahu chakujika nachu chakutuña nachitembi cheyobu* nawa akashaku nyalachi+ yaku yakusendelaku.

15 “Aroni nianyanindi awamayala atela kumanishañahu dehi kubuta iluña dajila+ niyipwepu yejima yamwiluña dajila neyi aIsarela hiyakunyamuka nakuya. Kuhiñahu, anyana kaKohati awamayala akenzaña nakusenda oyu yuma,+ ilaña hiyatela kukwata kwiluña dajilaku, akenda kafwa.+ Iwu dimudimu wakwitenti dakubulakena wakazatañawu* anyana kaKohati awamayala.

16 “Eleyazari+ mwana kakapristu Aroni diyi wukweti mudimu wakutala manji amumanoñu,+ insensi yevumba dadiwahi,+ mulambu wambutu wakulambula mpinji yejima nimanji akuwayisha nachu.+ Diyi wukweti mudimu wakutala tabanaka yejima niyuma yejima yekalamu, kushilahu niiluña dajila niyipwepu yadu.”

17 Yehova wayilejeli cheñi aMosi naAroni nindi: 18 “Bayi mwakaleka muchidi wayisaka yawaKohati+ kujiya mukachi kawaLeviku. 19 Ilaña mukayilili chumichi kulonda akatwalekihu kuhanda nawa akabuli kufwa muloña wakuswina kwakwihi nayuma yajila chikupu.+ Aroni nianyanindi awamayala akeñilamu nawa muntu-himuntu akamwinka mudimu windi nichiteli chindi. 20 Bayi akeñila mukachi nakumona yuma yajila hela tuhu kuyikewukilaku, akenda kafwa.”+

21 Kuhiñahu, Yehova wamulejeli Mosi nindi: 22 “Watela kuchinda anyana kaGeshoni+ awamayala kwesekeja nanyitaña yawu niyisaka yawu. 23 Wakasoneki antu ejima adi nayaaka kutachikila ha 30 nakushika ku 50 adi mwizanvu dawantu anenkiwu mudimu wakukalakela mwitenti dakubulakena. 24 Iwu diwu mudimu wukuzataña yisaka yawaGeshoni niyiteli yikusendañawu:+ 25 Akusendaña mahina akutabanaka,+ itenti dakubulakena, chakujikahu nichakujika nachu chakutuña nachitembi cheyobu* chidi hewulu dadu,+ ihina dakwaambula nachu* dakuwiñililu wakwitenti dakubulakena,+ 26 mahina akukudika akujika nachu mwakumina lubanza,+ ihina dakwaambula nachu* dakuwiñililu wakulubanza+ lwanyeñumuka tabanaka nikameña, nyonji yayu yakwitenti, yipwepu yayu yejima niyuma yejima yakuzatisha kumudimu wayu. Iwu diwu mudimu wukukalakalañawu. 27 Mudimu wejima niyiteli yawaGeshoni+ akuyitalaña kudi Aroni nianyanindi awamayala; wuyinki iyi yiteli yejima yiikali mudimu wawu. 28 Iwu diwu mudimu wukukalakalaña yisaka yawaGeshoni mwitenti dakubulakena+ nawa nyidimu yawu akuyilombolaña kudi Itamari+ mwana kakapristu Aroni.

29 “Hakwila anyana kaMerari+ awamayala, wakayisoneki kwesekeja nachisaka chawu nikwesekeja nanyitaña yawu. 30 Wakasoneki adi nayaaka kutachikila ha 30 nakushika ku 50, antu ejima adi mwizanvu dawantu anenkiwu mudimu wakukalakela hetenti dakubulakena. 31 Iyi diyi yiteli yikusendañawu+ kumudimu wahetenti dakubulakena: mafuremu akutabanaka,+ nkañalu yayu,+ yishimi yayu,+ mayanda ayu;+ 32 yishimi+ yakulubanza lwanyeñumuka, mayanda ayu,+ mpopu+ jayu jakwitenti ninyonji yayu yakwitenti hamu nayuma yayu yejima nimudimu wejima wakundama kuniyi yuma. Muyiteneña hejina-hejina hakuyinka yiteli yatela kusendawu. 33 Ichi dichikuzataña yisaka yawanyana kaMerari+ awamayala hetenti dakubulakena, akuyilombolaña kudi Itamari mwana kakapristu Aroni.”+

34 Kuhiñahu, Mosi, Aroni nianlomboli+ ezaza dawantu asonekeli anyana kawaKohati+ awamayala kwesekeja nayisaka yawu nikwesekeja nachisaka chakukatata yawu, 35 antu ejima adiña nayaaka kutachikila ha 30 nakushika ku 50 adiña mwizanvu dawantu enkeliwu mudimu wakukalakela mwitenti dakubulakena.+ 36 Kuvula kwawantu ejima asonekeliwu kwesekeja nayisaka yawu adiña 2,750.+ 37 Awa diwu asonekeliwu kufuma muyisaka yawaKohati, ejima akalakeleleña hetenti dakubulakena. Mosi niAroni asonekeli awa antu neyi chashimwiniyi Yehova kuhitila mudi Mosi.+

38 Anyana kaGeshoni+ awamayala ayisonekeli kwesekeja nayisaka yawu nikwesekeja nachisaka chakukatata yawu, 39 antu ejima adiña nayaaka kutachikila ha 30 nakushika ku 50 adiña mwizanvu dawantu enkeliwu mudimu wakukalakela hetenti dakubulakena. 40 Kuvula kwawantu ejima asonekeliwu kwesekeja nayisaka yawu nikwesekeja nachisaka chakukatata yawu adiña 2,630.+ 41 Awa diwu asonekeliwu kufuma muyisaka yawanyana kaGeshoni awamayala, antu ejima akalakeleleña hetenti dakubulakena. Mosi naAroni asonekeli awa antu neyi chayilejeliwu kudi Yehova.+

42 Anyana kaMerari awamayala ayisonekeli kwesekeja nayisaka yawu nikwesekeja nachisaka chakukatata yawu, 43 antu ejima adiña nayaaka kutachikila ha 30 nakushika ku 50 adiña mwizanvu dawantu enkeliwu mudimu wakukalakela hetenti dakubulakena.+ 44 Kuvula kwawantu ejima asonekeliwu kwesekeja nayisaka yawu adiña 3,200.+ 45 Awa diwu asonekeliwu kufuma muyisaka yawanyana kaMerari awamayala, owu asonekeliwu kudi aMosi naAroni neyi chashimwiniyi Yehova kuhitila mudi Mosi.+

46 Mosi, Aroni nianlomboli jawaIsarela ayisonekeli awa aLevi ejima kwesekeja nayisaka yawu nikwesekeja nanyitaña yawu; 47 adiña nayaaka kutachikila ha 30 nakushika ku 50, nawa wejima wawu ayinkeli mudimu wakukalakala nikusenda yiteli yamwitenti dakubulakena.+ 48 Kuvula kwawantu ejima asonekeliwu adiña 8,580.+ 49 Ayisonekeli neyi chayilejeliwu kudi Yehova kuhitila mudi Mosi, muntu-himuntu kwesekeja namudimu wamwinkeliwu nichiteli chindi. Ayisonekeli kwesekeja nachamulejeliwu Mosi kudi Yehova.

5 Yehova wamulejeli cheñi Mosi nindi: 2 “Lejaku aIsarela neyi afumishi muchilombu muntu wejima wudi nambumba,+ muntu wejima wudi nayuma yinakuvwa+ niwejima wunatami muloña wakukwata muntu* wafwa.+ 3 Hela hiiyala hela himumbanda, mwatela kuyifumishamu. Mwatela kuyifumisha muchilombu kulonda abuli kutamisha+ chilombu chejima chawantu innakushakama nawu.”+ 4 Dichi, aIsarela elili mwenimu nawa owu antu ayifumishili muchilombu. AIsarela elili kwesekeja nachamulejeliwu Mosi kudi Yehova.

5 Yehova watwalekelihu kumuleja Mosi nindi: 6 “Lejaku aIsarela neyi, ‘Neyi iyala hela mumbanda akoña nshidi yidi yejima yakoñañawu antu nakumwekesha kubula kushinshika kudi Yehova, yenowu muntu nekali* namuloña.+ 7 Owu muntu watela* kushimuna nshidi+ yinakoñiyi* nikufweta mali ejima kulonda ekali ifutu damuloña windi nawa haniwu wufwetu watela kubombelahu chipimu chamuchitanu chaniwu wuseya.+ Owu mali wukuyihana kudi muntu avulumunayi. 8 Ilaña neyi owu muntu anavulumuniwu hakweti ntaña yindi chikupu wakutambula owu mali efutuku, atela kuyifuntisha kudi Yehova nawa akwikala akapristu, kufumishaku hohu mukoku wachizamba wakubuta nachu hanshidi wakazatishayi kubuta hanshidi yanowu muntu.+

9 “‘Yawaana yajila+ yejima yikulambulañawu aIsarela kudi kapristu, yikwikalaña yindi.+ 10 Yuma yajila yejima yamuntu-himuntu yikwikalaña yindi yomweni. Chuma chejima chikuhanayi muntu kudi kapristu, chikwikalaña chakapristu.’”

11 Yehova watwalekelihu kumuleja Mosi nindi: 12 “Hoshaku nawaIsarela nawa wuyileji neyi, ‘Ichi dichuma chimwatela kwila neyi ñoda muntu ashiya nfumwindi nawa ekala wabula kushinshika kudi yena 13 nawa iyala wacheñi akaama nanowu mumbanda,+ ilaña nfumwindi kuchiluka nehi nawa owu muloña windi kwilukewa nehi, chakwila owu mumbanda naditamishi yomweni ilaña kwosi chinsahu wakumufwisha namuloña nawa hiyanamukwatiku: 14 Hela nfumwindi natiyi mukawu nawa nakujinoka kashinshi kañodindi nanochu chinaditamishiyi yomweni, indi kwiji natiyi mukawu nawa nakujinoka kashinshi kañodindi henohu hanaditamishi yomweniku, 15 nfumwindi watela kumutwala ñodindi kudi kapristu hamu namulambu wañodindi, chipimu chamwikumi chaifa* chawuña walembuluka wabali. Bayi ahuñunwinahu manji hela kushahu manaña evumba dadiwahiku, muloña himulambu wambutu wamukawu, himulambu wambutu wakwanukisha nachu nawu wudi namuloña.

16 “‘Kapristu akamuleti owu mumbanda nakumwimika kumesu aYehova.+ 17 Kapristu akasendi menji ajila muchipwepu chewumba nawa akanoni maseki amutabanaka nakuyisha mumenji. 18 Dichi kapristu akamwimiki owu mumbanda kumesu aYehova. Kuhiñahu, akamukasununi nsuki nawa akamushili mumakasa indi mulambu wambutu wakwanukisha nachu, dikwila nawu, mulambu wambutu wamukawu,+ nawa kapristu akekali namenji alula muchikasa chindi aletaña ishiñu.+

19 “‘Kufumahu, kapristu wakamusanyikisha owu mumbanda nindi: “Neyi kwosi iyala wacheñi iwakaamini nindi henohu wudi mumakasa anfumweyi+ nawa hiwamushiyili nfumweyi nakuditamishaku, dichi awa menji alula aletaña ishiñu akukwila chuma chatama wanyi. 20 Ilaña neyi wamushiyili nfumweyi nakuditamisha eyi aweni henohu wudi mumakasa indi, nawa neyi welili wuvumbi neyala wacheñi+ wabula kwikala nfumweyi—” 21 Dichi kapristu wakamusanyikisha owu mumbanda kusanyika mwabombela ishiñu, nawa kapristu wakamuleja owu mumbanda nindi: “Yehova akwilishi kwikala chuma chakuzatisha hakushiñana hela hakusanyika kudi antu jeyi, hampinji yinakukojejayi Yehova ikata* deyi kukisika* nikunanisha ivumu deyi. 22 Awa menji aletaña ishiñu akwiñila munyijiñwa yeyi kulonda ananishi ivumu deyi nikukisa* ikata* deyi.” Hohenohu owu mumbanda watela kuhosha nindi: “Ameni! Ameni!”*

23 “‘Kufumahu, kapristu watela kusoneka awa mashiñu mumukanda nawa wakayikosa mumenji alula. 24 Kuhiñahu, wakamunwisha mumbanda owu menji alula aletaña ishiñu nawa akeñila mudi yena nakumuletela nyisoñu. 25 Nawa kapristu wakatambula mulambu wambutu wamukawu+ muchikasa chanowu mumbanda nakuwuzuyañesha iku niniku kumesu aYehova. Kufumahu, wakawutwala kwakwihi nakameña. 26 Kapristu wakanona mukonu* wumu wamulambu wambutu wakekali mulambu wakwanukilaku nawa wakawocha kulonda wakakakumuki wishi hakameña.+ Kuhiñahu, wakamunwisha mumbanda menji. 27 Neyi namunwishi dehi owu menji, neyi naditamishi yomweni nawa nekali wabula kushinshika kudi nfumwindi, menji aletaña ishiñu akeñila mudi yena nakumuletela nyisoñu, ivumu dindi dakanana, ikata* dindi dakakisika* nawa wakekala chuma chakuzatisha hakushiñana kudi antu jindi. 28 Ilaña neyi owu mumbanda naditamishi yomweni wanyi nawa wakadi majilu, akamubabesha wanyi nawa wakemitaña nikuvwala anyana.

29 “‘Ilu dilushimbi lwahosha hamukawu,+ neyi mumbanda ashiya nfumwindi nakuditamisha yomweni henohu wudi mumakasa indi, 30 hela neyi iyala atiya mukawu nawa nakujinoka kashinshi kañodindi; watela kumwimika ñodindi kumesu aYehova, nawa kapristu watela kumwila owu mumbanda kwesekeja namwejima mwaya ilu lushimbi. 31 Owu iyala wakekala wakadi muloña, ilaña ñodindi wakalumbulula hamuloña windi.’”

6 Yehova watwalekelihu kumuleja Mosi nindi: 2 “Hoshaku nawaIsarela nawa wuyileji neyi, ‘Neyi iyala hela mumbanda asanyika kusanyika kwadimena kwakwikala kaNaziri*+ kudi Yehova, 3 bayi anwa vinyu hela walwa wukwawuku. Bayi anwa vinega yavinyu hela vinega yawalwaku.+ Bayi anwa yuma yamenji yidi yejima yakutuña kufuma kunyivinyu hela kuda nyivinyu, yituuta hela yoomaku. 4 Mumafuku ejima awuNaziri windi, bayi akada chuma chidi chejima chakumutondu wamuvinyuku, kutachikila kunyivinyu yayisu kushika nikumafulu.

5 “‘Mumafuku ejima awuNaziri windi, kumutu windi bayi kwakahita rezaku.+ Wakatwalekahu kwikala wajila neyi aleka nsuki yakumutu windi kukula sampu mafuku anadihaniyi kumukalakela Yehova anamani. 6 Mumafuku ejima akadihanayi kumukalakela Yehova, bayi akaswina kwakwihi* namuntu* wafwaku. 7 Hela chakwila owu wunafwi hitata yindi hela himama yindi hela himanakwindi hela himuhelindi, bayi aditamisha yomweniku,+ muloña chinjikijilu chawuNaziri windi kudi Nzambi chidi kumutu windi.

8 “‘Wakekalaña wajila kudi Yehova mumafuku ejima awuNaziri windi. 9 Ilaña neyi chakadi kukuhwelela muntu afwila kwakwihi nayena+ nawa atamisha nsuki yachinjikijilu chakudihana kwindi kudi Nzambi,* akatewuli mutu+ windi hefuku dakuditookesha kwindi. Akawutewuli hefuku damu 7. 10 Nawa hefuku damu 8, akatwali tuteela tuyedi hela anyana katupompa* ayedi kudi kapristu kuwiñililu wakwitenti dakubulakena. 11 Kapristu wakanonahu kamu nakukilambula kulonda kakekali mulambu wahanshidi nawa kakwawu wakakilambula kulonda kakekali mulambu wakushita nakubuta hanshidi+ yinakoñiyi owu muntu kutalisha kudi muntu* wafwa. Kuhiñahu dinu kaNaziri akajiliki mutu windi hadodenodu ifuku. 12 Akadihani cheñi yomweni kudi Yehova nakutachika mafuku amaha awuNaziri windi, nawa akaleti mwana kamukoku wachizamba wachaaka chimu kulonda akekali mulambu wamuloña. Hela chochu, mafuku akunyima akayichinda wanyi muloña watamishili wuNaziri windi.

13 “‘Ilu dilushimbi lwahosha hadi kaNaziri: Neyi amanisha mafuku awuNaziri windi,+ akamuleti kuwiñililu wakwitenti dakubulakena. 14 Kwenoku watela kulambula mulambu windi kudi Yehova: mwana kamukoku wumu wachizamba wakadi ihuji wachaaka chimu wamulambu wakushita,+ mwana kamukoku wumu wamukaji wakadi ihuji wachaaka chimu wamulambu wahanshidi,+ mukoku wachizamba wumu wakadi ihuji wamulambu wakuwunda,+ 15 chimpaaya chamankendi* akadi iluñi anjiñumuki epwata hakachi awuña walembuluka wakubomba namanji, mankendi apapalala akadi iluñi akulambwija manji nimulambu wawu wambutu+ ninyilambu yawu yavinyu.+ 16 Dichi kapristu wakaleta yumiyi kumesu aYehova nawa wakalambula mulambu wahanshidi yanowu muntu nimulambu windi wakushita. 17 Wakalambula mukoku wachizamba nakwikala mulambu wakuwunda kudi Yehova hamu nachimpaaya chamankendi akadi iluñi, nawa kapristu wakalambula mulambu wawu wambutu+ nimulambu wawu wavinyu.

18 “‘Kuhiñahu, kaNaziri akatewili nsuki yakumutu+ yawuNaziri windi kuwiñililu wakwitenti dakubulakena, nawa akanoni nsuki yakumutu windi yahembeliyi hampinji yadiñayi kaNaziri nakuyisha hakesi kadi mwishina damulambu wakuwunda. 19 Nawa kapristu akanoni chikasa chakuteleka+ chamukoku wachizamba, dinkendi dimu dakadi iluñi danjiñumuki depwata hakachi kufuma muchimpaaya* nidinkendi dimu dapapalala dakadi iluñi nakujisha mumakasa akaNaziri hanyima yakumutewula nsuki yachinjikijilu chawuNaziri windi. 20 Kuhiñahu, kapristu wakayizuyañesha iku niniku nakwikala mulambu wakuzuyañesha kumesu aYehova.+ Hichuma chajila chakapristu, hamu nebwaambu damulambu wakuzuyañesha nimwendu weseka dajila.+ Hanyima yakwila chumichi, kaNaziri dihu dinu hatela kunwayi vinyu.

21 “‘Ilu dilushimbi lwahosha hadi kaNaziri+ wunasanyiki: Neyi nasanyiki nawa wukutwesha kumulambula Yehova mulambu wabadika hamulambu walambulañayi wawuNaziri windi, dichi watela kusanyika kwesekeja namwaya lushimbi lwawuNaziri windi.’”

22 Kuhiñahu Yehova wamulejeli Mosi nindi: 23 “Lejaku Aroni nianyanindi awamayala neyi, ‘Ichi dichimwatela kukiswila+ antu jaIsarela. Mwakayilejeña nenu:

24 “Yehova akukiswili+ nawa akuhembeña.

25 Chejeji chakumesu aYehova chikutoñekeleña+ nawa akutiyeña kuwaha.

26 Yehova akutaleña naluwi* nikukwinka kuwunda.”’+

27 Nawa zatishenuña ijina dami hakukiswila antu jaIsarela+ kulonda niyikiswileña wena.”+

7 Hefuku damanishiliyi Mosi kutuña tabanaka,+ wayiwayishili+ nikuyijilika hamu nayuma yayu yejima, kameña niyipwepu+ yaku yejima. Chamanishiliyi kuwayisha nikujilika yumiyi,+ 2 anlomboli amuIsarela,+ anlomboli janyitaña yawu alambwileña mulambu. Awa anlomboli anyichidi owu atwaminineña mudimu wakusoneka antu, 3 aleteleña kumesu aYehova mulambu wawu wamatemba 6 akujika hewulu niañombi 12, anlomboli ayedi ahanineña itemba dimu nawa nlomboli-hinlomboli wahanineña ñombi wachizamba wumu.* Aleteli yumiyi kumbidi yatabanaka. 4 Yehova wamulejeli Mosi nindi: 5 “Tambulaku yumiyi kudi wena kulonda ayizatisheña kumudimu wahetenti dakubulakena nawa watela kuyihana kudi aLevi, kudi muntu-himuntu kwesekeja nayuma yinakukeñeka kunyidimu yindi.”

6 Dichi, Mosi watambwili owu matemba niañombi nakuyihana kudi aLevi. 7 Wenkeli anyana kaGeshoni matemba ayedi niañombi awana kwesekeja nayuma yakeñekeleña kunyidimu yawu;+ 8 nawa anyana kaMerari awamayala wayinkeli matemba awana niañombi 8 kwesekeja nayuma yakeñekeleña kunyidimu yawu, Itamari mwana kakapristu Aroni+ diyi wayilombweleña. 9 Ilaña anyana kaKohati awamayala hayinkelihu chuma chidi chejimaku, muloña nyidimu yawu yadiña yakukalakela mwiluña dajila+ nawa asendeleña yuma yajila hamafwiji awu.+

10 Dichi anlomboli alambwili nyilambu yawu hakuhana+ kameña hakiwayishileñawu. Anlomboli chaleteleñawu nyilambu yawu kumbidi yakameña, 11 Yehova wamulejeli Mosi nindi: “Nlomboli-hinlomboli wakalambula mulambu windi wakuhana nachu kameña. Nlomboli wumu hefuku dimu, mukwawu hefuku dikwawu, hadi mafuku akulondashana.”

12 Hefuku datachi, Nashoni+ mwana kaAminadabi wakumuchidi waYuda, diyi walambwili mulambu windi. 13 Mulambu windi wadiña cheña chimu chasiliva chalemeni mashekeli* 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.*+ Yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 14 kaapu* kamu kawuru kalemeni mashekeli 10, kenzeli nainsensi; 15 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 16 mwana kampembi wumu wamulambu wahanshidi;+ 17 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu diwadiña mulambu waNashoni mwana kaAminadabi.+

18 Hefuku damuchiyedi, nlomboli waIsakari Netaneli,+ mwana kaZuwari, diyi walambwili mulambu. 19 Mulambu windi walambwiliyi wadiña cheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 20 kaapu kamu kawuru kalemeni mashekeli 10, kenzeli nainsensi; 21 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 22 mwana kampembi wumu wamulambu wahanshidi;+ 23 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waNetaneli mwana kaZuwari.

24 Hefuku damuchisatu, nlomboli wawanyana kaZebuluni awamayala Eliyabi,+ mwana kaHeloni, 25 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 26 kaapu kamu kawuru kalemeni mashekeli 10, kenzeli nainsensi; 27 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 28 mwana kampembi wumu wamulambu wahanshidi;+ 29 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waEliyabi+ mwana kaHeloni.

30 Hefuku damuchiwana, nlomboli wawanyana kaRubeni awamayala Elizuri,+ mwana kaShedeyuri, 31 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 32 kaapu kamu kawuru kalemeni mashekeli 10, kenzeli nainsensi; 33 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 34 mwana kampembi wumu wamulambu wahanshidi;+ 35 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waElizuri+ mwana kaShedeyuri.

36 Hefuku damuchitanu, nlomboli wawanyana kaSimiyoni awamayala Shelumiyeli,+ mwana kaZurishadayi, 37 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 38 kaapu kamu kawuru kalemeni mashekeli 10, kenzeli nainsensi; 39 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 40 mwana kampembi wumu wamulambu wahanshidi;+ 41 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waShelumiyeli+ mwana kaZurishadayi.

42 Hefuku damu 6, nlomboli wawanyana kaGadi awamayala Eliyasafi,+ mwana kaDeyuweli, 43 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 44 kaapu kamu kawuru kalemeni mashekeli 10, kenzeli nainsensi; 45 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 46 mwana kampembi wumu wamulambu wahanshidi;+ 47 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waEliyasafi+ mwana kaDeyuweli.

48 Hefuku damu 7, nlomboli wawanyana kaEfuremu awamayala Elishama,+ mwana kaAmihudi, 49 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 50 kaapu kamu kawuru kalemeni mashekeli 10, kenzeli nainsensi; 51 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 52 mwana kampembi wumu wamulambu wahanshidi;+ 53 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waElishama+ mwana kaAmihudi.

54 Hefuku damu 8, nlomboli wawanyana kaManasi awamayala Gamaleli,+ mwana kaPedazuri, 55 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 56 kaapu kamu kawuru kalemeni mashekeli 10, kenzeli nainsensi; 57 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 58 mwana kampembi wumu wamulambu wahanshidi;+ 59 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waGamaleli+ mwana kaPedazuri.

60 Hefuku damu 9, nlomboli+ wawanyana kaBenjamini awamayala Abidani,+ mwana kaGideyoni, 61 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 62 kaapu kamu kawuru kalemeni mashekeli 10, kenzeli nainsensi; 63 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 64 mwana kampembi wumu wamulambu wahanshidi;+ 65 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waAbidani+ mwana kaGideyoni.

66 Hefuku damu 10, nlomboli wawanyana kaDani awamayala Ahiyezeri,+ mwana kaAmishadayi, 67 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 68 kaapu kamu kawuru kalemeni mashekeli 10, kenzeli nainsensi; 69 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 70 mwana kampembi wumu wamulambu wahanshidi;+ 71 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waAhiyezeri+ mwana kaAmishadayi.

72 Hefuku damu 11, nlomboli wawanyana kaAsheri awamayala Pagiyeli,+ mwana kaOkirani, 73 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 74 kaapu kamu kawuru kalemeni mashekeli 10, kenzeli nainsensi; 75 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 76 mwana kampembi wumu wamulambu wahanshidi;+ 77 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waPagiyeli+ mwana kaOkirani.

78 Hefuku damu 12, nlomboli wawanyana kaNafitali awamayala Ahira,+ mwana kaEnani, 79 walambwili mulambu windi wacheña chimu chasiliva chalemeni mashekeli 130 nicheña chimu chakunama chasiliva chalemeni mashekeli 70 kwesekeja nalushekeli lwatelela lwamwiluña dajila.+ Iyi yeña yejima yiyedi yenzeli nawuña wawuwahi walembuluka wakubomba namanji kulonda wiikali mulambu wambutu;+ 80 kaapu kamu kawuru kalemeni mashekeli 10, kenzeli nainsensi; 81 mwana kañombi wachizamba wumu, mukoku wachizamba wumu nimwana kamukoku wachizamba wumu wudi nachaaka chimu amulambu wakushita;+ 82 mwana kampembi wumu wamulambu wahanshidi;+ 83 nawa yimuna yamulambu wakuwunda+ yadiña añombi ayedi, anyikoku atanu ayizamba, ampembi atanu ayizamba nianyana kanyikoku ayizamba atanu adi nachaaka chimu. Iwu wadiña mulambu waAhira+ mwana kaEnani.

84 Iwu diwadiña mulambu wakuhana+ nachu kameña wafumini kudi anlomboli amuIsarela hakiwayishileñawu: yeña yasiliva 12, yeña yakunama 12, makaapu* 12 awuru;+ 85 cheña-hicheña chasiliva chalemeni mashekeli 130 nawa cheña-hicheña chakunama chalemeni mashekeli 70. Yipwepu yejima yasiliva yalemeni mashekeli 2,400 kwesekeja nalushekeli lwatelela lwamwiluña dajila;+ 86 makaapu* 12 awuru enzeli nainsensi, kaapu-hikaapu* kalemeni mashekeli 10 kwesekeja nalushekeli lwatelela lwamwiluña dajila. Makaapu ejima awuru alemeni mashekeli 120. 87 Anyama ejima amulambu wakushita adiña, añombi ayizamba 12, anyikoku ayizamba 12, anyana kanyikoku ayizamba 12 adi nachaaka chimu ninyilambu yawu yambutu nianyana kampembi 12 amulambu wahanshidi; 88 nawa anyama ejima amulambu wakuwunda adiña, añombi ayizamba 24, anyikoku ayizamba 60, ampembi ayizamba 60 nianyana kanyikoku ayizamba 60 adi nachaaka chimu. Iwu diwadiña mulambu wakuhana+ nachu kameña hanyima yakukiwayisha.+

89 Mpinji yejima yeñilileñayi Mosi mwitenti dakubulakena nakuhosha naNzambi,*+ watiyileña izu dinakuhosha nayena kufumina hewulu dachifwiku+ chachimbañu chaWunsahu, dafuminineña hakachi kawakerubi+ ayedi. Nzambi wahosheleña nayena.

8 Yehova wamulejeli Mosi nindi: 2 “Hoshaku naAroni nawa wumuleji neyi, ‘Chiwukukwatishaña manoñu, manoñu ejima 7 akutoñekelaña chejeji heluña didi hambidi yachakutentekahu manoñu.’”+ 3 Dichi Aroni welili mwomwenimu: Wakwatishili owu manoñu kulonda atoñekeleña heluña dadiña hambidi yachakutentekahu manoñu+ neyi chamulejeliwu Mosi kudi Yehova. 4 Ichi dichatuñiliwu chakutentekahu manoñu: Achibazili nawuru yakuchila; kutachikila kumwendu wachu nakushika kunkenu jachu, chadiña chawuru yakuchila.+ Ichi chakutentekahu manoñu achituñili kwesekeja nachimwenu+ chamumwekesheleliwu Mosi kudi Yehova.

5 Yehova wamulejeli cheñi Mosi nindi: 6 “Sendaku aLevi hadi aIsarela kulonda wuyitookeshi.+ 7 Ichi dichiwatela kuyitookesha: Wuyisampwili menji akutookesha nachu nshidi nawa atela kutewula mujimba wawu wejima nareza, kukosa yakuvwala yawu nikuditookesha awenawu.+ 8 Kuhiñahu, akusenda mwana kañombi wachizamba+ nimulambu windi wambutu+ wawuña wawuwahi walembuluka wakubomba namanji, nawa eyi wukusenda mwana kañombi wachizamba mukwawu wamulambu wahanshidi.+ 9 Nawa wukutwala aLevi kumbidi yetenti dakubulakena nikupompesha izaza dawaIsarela+ dejima. 10 Neyi wunatwali dehi aLevi kumesu aYehova, aIsarela akunañika makasa awu hadi aLevi.+ 11 Kufumahu, Aroni watela kuyilambula* aLevi kudi Yehova kulonda ekali mulambu wakuzuyañesha+ kufuma hadi aIsarela, nawa akukalakalaña mudimu waYehova.+

12 “Dichi aLevi akunañika makasa awu hanyitu yawañombi ayizamba.+ Ñombi wumu akumulambula ekali mulambu wahanshidi nawa mukwawu ekali mulambu wakumushitila Yehova kulonda abuti nachu hanshidi+ yawaLevi. 13 Nawa wukwimika aLevi kumesu aAroni nikumesu awanyanindi awamayala nakuyilambula* ekali mulambu wakuzuyañesha kudi Yehova. 14 Watela kwaambula aLevi kufuma hadi aIsarela, nawa aLevi akwikala ami.+ 15 Kufumahu, aLevi akwinza nakukalakela hetenti dakubulakena. Ichi dichiwatela kuyitookesha nikuyilambula* kulonda ekali mulambu wakuzuyañesha. 16 Muloña ananyinkiwu kulonda ekali yawaana kufuma hadi aIsarela. Nukuyisenda kulonda ekali ami nakuyisinsisha hadi awedi* ejima awaIsarela.+ 17 Muloña awedi ejima hadi aIsarela nimuntu nikanyama,+ amami. Nadijilikililiwu hefuku dinajahili awedi ejima mwituña daEjipitu.+ 18 Nukusenda aLevi kulonda asinsi awedi ejima hadi aIsarela. 19 Nukuhana aLevi kudi Aroni nikudi anyanindi awamayala kulonda ekali yawaana kufuma hadi aIsarela, kulonda akalakeleñaku aIsarela mudimu hetenti dakubulakena+ nikubuta hanshidi yawaIsarela+ kuchiina chipupu chakenda kenza hadi aIsarela muloña wakwila antu jaIsarela aswina kwakwihi neluña dajila.”

20 Mosi naAroni niizaza dawaIsarela dejima, elili mwenimu kudi aLevi. Kwesekeja namwejima mwamulejeliwu Mosi kudi Yehova kutalisha hadi aLevi, dichayililiwu aLevi kudi aIsarela. 21 Dichi aLevi aditookesheli nikukosa yakuvwala+ yawu. Kuhiñahu, Aroni wayilambwili* kulonda ekali mulambu wakuzuyañesha kudi Yehova.+ Kufumahu, Aroni wabutili hanshidi yawu kulonda ayitookeshi.+ 22 Hanyima yachumichi, aLevi ayili nakukalakala mudimu wawu wahetenti dakubulakena kumesu aAroni nikumesu awanyanindi awamayala. Neyi chamulejeliwu Mosi kudi Yehova kutalisha hadi aLevi, dichayililiwu.

23 Kuhiñahu, Yehova wamulejeli Mosi nindi: 24 “Ichi dichikwilañawu niaLevi: Iyala wejima wudi nayaaka kutachikila ha 25 kuya hewulu, wukwiñilaña mwizanvu dawantu akweti mudimu wakukalakela hetenti dakubulakena. 25 Ilaña chabadikayi yaaka 50, wakafuma munodu izanvu dawakakukalakala nawa hakazatahu cheñiku. 26 Watela kuzatila amanakwindi anakwakamena nyidimu yahetenti dakubulakena, ilaña yena bayi azata mudimu wahetenti dakubulakenaku. Ichi dichiwukwilaña kudi aLevi ninyidimu yawu.”+

9 Yehova wahosheli naMosi mwisaña daSinayi mukakweji katachi+ kamuchaaka chamuchiyedi kufuma hafuminiwu mwituña daEjipitu nindi: 2 “AIsarela akaloñeshi mulambu waChipandakenu+ hampinji yatoñolawu.+ 3 Hefuku damu 14 danonu kakweji hakabwidibwidi,* mwakawuloñeshi hampinji yatoñolawu. Mwakawuloñeshi kwesekeja namwaya nshimbi ninjila jakuwuloñeshelamu.”+

4 Mosi wayilejeli aIsarela kuloñesha mulambu waChipandakenu. 5 Dichi aloñesheli mulambu waChipandakenu mukakweji katachi, hefuku damu 14 dakakweji hakabwidibwidi* mwisaña daSinayi. AIsarela elili mwejima mwamulejeliwu Mosi kudi Yehova.

6 Kwadiña amayala ekalili amajilu muloña wakukwata chibimbi*+ chakwila hiyatwesheli kuloñesha mulambu waChipandakenu hanodu ifukuku. Dichi owu amayala aditwalili awenawu kudi aMosi naAroni hanodu ifuku+ 7 nakumuleja Mosi nawu: “Tudi namajilu muloña wakukwata chibimbi.* Hanu dinu chumichi chinateli kutukañesha ñahi kulambula mulambu kudi Yehova hamu nawaIsarela+ hampinji yawutoñwelawu?” 8 Hohenohu Mosi wayilejeli nindi: “Hembelelenu hanu nitiyi chikunlejayi Yehova hadi enu.”+

9 Kufumahu, Yehova wamulejeli Mosi nindi: 10 “Lejaku aIsarela neyi, ‘Hela chakwila muntu wejima hakachi kenu hela mumakiñu enu akumbidi ekala namajilu muloña wakukwata chibimbi*+ hela aya halwendu lwalulehi, niyena watela kumuloñeshela Yehova mulambu waChipandakenu. 11 Atela kuwuloñesha mukakweji kamuchiyedi,+ hefuku damu 14 hakabwidibwidi.* Atela kuwudiila hamu namankendi akadi iluñi ninamafu alula.+ 12 Bayi akashiyahu mbiji yidi yejima kushika nintetemenaku,+ nawa bayi akakotola ifwaha didi dejima danowu mulambuku.+ Atela kuwuloñesha kwesekeja nalushimbi lwejima lwakundama kuChipandakenu. 13 Neyi owu muntu hakweti majilu hela hanayihu halwenduku, ilaña yena adiwula kuloñesha mulambu waChipandakenu, muntu yenowu akamujahi nakumufumisha hadi antu jindi,*+ muloña waleta wanyi mulambu waYehova hampinji yawutoñwelawu. Owu muntu wakalumbulula hanshidi yindi.

14 “‘Nawa neyi ñiinza nakushakama hamu nanenu, niyena watela kumuloñeshela Yehova+ mulambu waChipandakenu. Watela kuwuloñesha kwesekeja namwaya lushimbi lwaChipandakenu ninjila yachu.+ Kwatela kwikala lushimbi lumu lumukulondelaña wejima wenu, ñiinza nimwenimbu wamwituña.’”+

15 Dichi hefuku datuñiliwu tabanaka,+ ivu dabutili hatabanaka, dikwila nawu hetenti daWunsahu, ilaña namelela, chuma chamwekeneña neyi kesi chatwalekelihu kwimana hatabanaka kushika nintetemena.+ 16 Ichi dichuma chamwekeneña: Namwaana, ivu dabutileñahu nawa nawufuku,+ habutileña chuma chamwekeneña neyi kesi. 17 AIsarela elileña neyi ivu difuma hetenti, hohenohu anyamukileña nakuya,+ nawa heluña hakwimena ivu, aIsarela dihu hateekeleleñawu.+ 18 Neyi Yehova ayileja aIsarela nindi yenuña, anyamukileña nakuya, nawa neyi Yehova ayileja nindi teekenu, ateekeleña.+ Neyi ivu kufuma hatabanaka nehi, atwalekeleñahu nakuteeka. 19 Neyi hadi mafuku amavulu ivu kufuma hatabanaka nehi, aIsarela amwovwahilileña Yehova nawa hiyanyamukileña nakuyaku.+ 20 Mpinji jikwawu, ivu demeneña hatabanaka mafuku antesha. Neyi Yehova ayileja nindi kuya nehi, atwalekeleñahu nakuteeka, nawa neyi Yehova ayileja nindi yenuña, anyamukileña nakuya. 21 Mpinji jikwawu, ivu demeneña hatabanaka kufuma melela kushika nintetemena. Nawa neyi ivu difumahu ntetemena, anyamukileña. Neyi ivu difumahu, hela himwaana hela hiwufuku, anyamukileña.+ 22 Neyi ivu ditwalekahu kwimana hatabanaka, hela hadi mafuku ayedi hela kakweji indi kwiji mafuku amavulu, aIsarela atwalekeleñahu nakuteeka nawa hiyanyamukileñaku. Ilaña neyi difumahu, anyamukileña nakuya. 23 Neyi Yehova ayileja nindi teekenu, ateekeleña, nawa neyi Yehova ayileja nindi yenuña, anyamukileña. Ahembeleña lushimbi lwaYehova kwesekeja nachayilejeliyi Yehova kuhitila mudi Mosi.

10 Kuhiñahu, Yehova wamulejeli Mosi nindi: 2 “Dituñili mpuña+ jiyedi; wujibazi nasiliva yakuchila nawa wujizatisheña hakutambika izaza dawantu nihakuleja antu kufuma muyilombu. 3 Neyi jejima jiyedi ajivumishila hamu, dikwila nawu izaza dawantu dejima anaditambiki kwinza kudi eyi kuwiñililu wakwitenti dakubulakena.+ 4 Ilaña neyi yimu diyinavumishiwu, anyanta hohu, dikwila nawu anlomboli* amakombakaji awaIsarela diwu anatambikiwu kwinza kudi eyi.+

5 “Neyi muvumisha mpuña yinakutiyakana chivumina chinakuhimpika-himpika, dikwila nawu izaza danyichidi dinateekeli kukabadi kumusela+ datela kunyamuka nakuya. 6 Neyi muvumisha mpuña kamuchiyedi yinakutiyakana chivumina chinakuhimpika-himpika, dikwila nawu izaza danyichidi dinateekeli kukabadi kakuchidiilu+ datela kunyamuka nakuya. Ichi dichiyatela kuvumishawu mpuña mpinji yejima neyi izaza didi dejima hidikunyamuka nakuya.

7 “Neyi himukutambika chipompelu kwinza hamu, mwatela kuvumisha mpuña,+ bayi jikweti yivumina yinakuhimpika-himpikaku. 8 Anyana kaAroni awamayala atupristu, diwu akavumishaña mpuña,+ nawa kuzatisha mpuña kwakekala lushimbi lwahaya nyaaka kudi enu nimwakahita makiñu enu ejima.

9 “Neyi munakuya nakuzuña njita mwituña denu nawayilumbu jenu anakuyikabisha, mwatela kuvumisha chivumina chanjita kuzatisha mpuña,+ nawa Yehova Nzambi yenu wakayanuka nikuyipulwisha kudi ayilumbu jenu.

10 “Cheñi, hampinji yakuzañalala,+ dikwila nawu hayawija+ yenu nihakutachika kwatukweji twenu, mwakavumisheña jimpuña hakulambula nyilambu yenu yakushita+ ninyilambu yenu yakuwunda.+ Iji mpuña jakayiletesha enu akayanukeña kudi Nzambi. Yami Yehova Nzambi yenu.”+

11 Dichi, muchaaka chamuchiyedi, mukakweji+ kamuchiyedi, hefuku damu 20 dakakweji, ivu dafumini hatabanaka+ yaWunsahu. 12 AIsarela anyamukili nakufuma mwisaña daSinayi kwesekeja nandonda yakunyamukilamu+ yayilejeliwu, nawa ivu demeneni mwisaña daParani.+ 13 Iyi diyadiña mpinji yatachi yanyamukiliwu kwesekeja nachashimwiniyi Yehova kuhitila mudi Mosi.+

14 Dichi, izaza dawanyana kaYuda awamayala danyichidi yisatu didadiña datachi kunyamuka nakuya kwesekeja namazaza awu,* nawa Nashoni+ mwana kaAminadabi diyi walombweleña idi izaza. 15 Netaneli+ mwana ka Zuwari diyi walombweleña izaza damuchidi wawanyana kaIsakari awamayala. 16 Eliyabi+ mwana kaHeloni diyi walombweleña izaza damuchidi wawanyana kaZebuluni awamayala.

17 Chalemwiniwu+ tabanaka, anyana kaGeshoni+ awamayala nianyana kaMerari+ awamayala owu asendeleña tabanaka, anyamukili nakuya.

18 Kuhiñahu, izaza danyichidi yisatu damuchilombu chaRubeni danyamukili nakuya kwesekeja namazaza awu,* nawa Elizuri+ mwana kaShedeyuri diyi walombweleña idi izaza. 19 Shelumiyeli+ mwana kaZurishadayi diyi walombweleña izaza damuchidi wawanyana kaSimiyoni awamayala. 20 Eliyasafi+ mwana kaDeyuweli diyi walombweleña izaza damuchidi wawanyana kaGadi awamayala.

21 Kufumahu, aKohati owu asendeleña yuma yamwiluña dajila,+ anyamukili nakuya. Tabanaka ateleleli kuyilema hampinji yashikileñawu.

22 Kuhiñahu, izaza danyichidi yisatu damuchilombu chawanyana kaEfuremu awamayala danyamukili nakuya kwesekeja namazaza awu,* nawa Elishama+ mwana kaAmihudi diyi walombweleña idi izaza. 23 Gamaleli+ mwana kaPedazuri diyi walombweleña izaza damuchidi wawanyana kaManasi awamayala. 24 Abidani+ mwana kaGideyoni diyi walombweleña izaza damuchidi wawanyana kaBenjamini awamayala.

25 Kufumahu, izaza danyichidi yisatu damuchilombu chawanyana kaDani awamayala danyamukili nakuya kwesekeja namazaza awu,* idi didu izaza dakumininiku, didakiñileña mazaza ejima, nawa Ahiyezeri+ mwana kaAmishadayi diyi walombweleña idi izaza. 26 Pagiyeli+ mwana kaOkirani diyi walombweleña izaza damuchidi wawanyana kaAsheri awamayala. 27 Ahira+ mwana kaEnani diyi walombweleña izaza damuchidi wawanyana kaNafitali awamayala. 28 Iyi diyadiña ndonda yakunyamukilamu yalondeleleña aIsarela nimazaza awu* neyi hiyakunyamuka nakuya.+

29 Kuhiñahu, Mosi wamulejeli Hobabi mwana kaRuweli*+ mwini Midiyani, muku waMosi nindi: “Tunakuya kwiluña dashimwiniyi Yehova nindi, ‘Nakayinkadu enu.’+ Tuyeña neyi hamu+ nawa tukukwakamena chiwahi, muloña Yehova nayikani aIsarela yuma yayiwahi.”+ 30 Ilaña yena wamulejeli nindi: “Nukuya wanyi. Inakufunta kwituña detu nikudi antaña jami.” 31 Hohenohu Mosi wamulejeli nindi: “Mwani, bayi wutushiyaku, muloña yeyi wuneluki kutunateli kuteekela mwisaña nawa yeyi wunateli kutulombola.* 32 Nawa neyi wukuya hamu nanetu,+ chuma chejima chachiwahi chakatukoñelayi Yehova, chakadi nikujina, twakakukoñelachu nineyi nawa.”

33 Dichi, anyamukili kufuma kumpidi yaYehova+ nakwenda lwendu lwamafuku asatu, nawa chimbañu+ chaYehova chachitiyañenu chatwaminineñaku hambidi yawu halwendu lwamafuku asatu kulonda chiyikeñeli hakunookela.+ 34 Nawa neyi anyamuka kufuma hateekeleleñawu nakuya, ivu daYehova+ dekalileña hewulu dawu namwaana.

35 Mpinji yejima yabuukishileñawu Chimbañu, Mosi wahosheleña nindi: “Nyamukaku, Eyi Yehova,+ palañeshaku ayilumbu jeyi nawa antu ejima akuhela atemuki kufuma kumesu eyi.” 36 Nawa neyi chimbañu achitenteka hamaseki, Mosi wahosheleña nindi: “Eyi Yehova, funtaku kudi makombakaji* awaIsarela+ akadi kutwesha kuchinda.”

11 Dichi antu atachikili kutooba chikupu kumesu aYehova. Yehova chachitiyiliyi, wazuwili nankashi nawa kesi kafumini kudi Yehova nakutachika kuyocha nikujilumuna antu amakwawu ashakamineña hanji yachilombu. 2 Antu chatachikiliwu kumudilila Mosi, wayilombeleliku nakulemba kudi Yehova+ nawa kesi kajimini. 3 Dichi odu iluña adituumbili nawu Tabera,* muloña kesi kafumini kudi Yehova kayocheli.+

4 Izaza dawantu ambukiliku*+ adiña mukachi kawu atachikili kufwila yakuda,+ nawa aIsarela niwena atachikili kudila makumbu cheñi nawu: “Hinyi wukutwinka mbiji?+ 5 Ochitunakwanuka chikupu inshi jitwadiileña chakadi kulanda muEjipitu niyakaka, mahapwa,* liki,* kanyenzi nigaliki!+ 6 Ilaña ichi tunakuuminina.* Kwosi yakuda yacheñi yitunakumonaku, chiña awa manina hohu.”+

7 Dichi, manina+ adiña neyi nteteli yakoriyanda+ nawa amwekeneña neyi deliyumi. 8 Antu amwañeleleñamu nakunonojola manina nakuyihala hamalola akuhalila hela kuyitwa mumayanda. Kuhiñahu, ayitelekeleña mumadehu hela kwochamu mankendi anjiñumuki+ nawa atiyakeneña neyi dinkendi datowala dinalambwijiwu manji. 9 Neyi wuumi wuholokela hachilombu nawufuku, manina niwena aholokeleleñahu.+

10 Mosi watiyili antu anakudila, chisaka-hichisaka, muntu-himuntu hawiñililu wakwitenti dindi. Nawa Yehova wahilili nankashi,+ Mosi niyena watiyili kutama nankashi. 11 Kuhiñahu, Mosi wamwihwili Yehova nindi: “Muloñadi chiwunakunkabishila ami kambuñeyi? Muloñadi chiwunabulili kuntiyila kuwaha hakwila wuntwiki chiteli chakwakamena awa antu ejima?+ 12 Komana yami nayimitili awa antu ejima? Yami nayivweli mwaka wunleji neyi, ‘Yisendeli hantulu yeyi neyi nhembi* chasendañayi mwana wunakuhembayi,’ kulonda niyitwali mwituña diwasanyikili kwinka ankakulula jawu?+ 13 Kudihi kunukuwana mbiji yinukwinka awa antu ejima? Muloña anatwalekihu kundilila nawu, ‘Twinki mbiji tudeña!’ 14 Hinukutwesha kwakamena awa antu ejima nkawamiku; iwu mudimu wunantoheli chikupu.+ 15 Neyi ichi dichiwukuñilaña, mwani njahi chochichi.+ Neyi wunakuntiya kuwaha, bayi wuñiteja kumona yihuñu yikwawuku.”

16 Yehova wamwakwili Mosi nindi: “Mpompesheli amayala 70 hadi akulumpi jawaIsarela, amayala iweluka neyi hiyakulumpi* nawa ayilolu jawantu.+ Wuyitwali kwitenti dakubulakena akemani hamu naneyi kwenoku. 17 Ami nukusuluka+ kulonda nihoshi naneyi kwenoku,+ nukunonahu spiritu+ yidi hadi eyi nakuyisha hadi wena nawa akukukwasha kusenda chiteli chakwakamena awa antu kulonda wubuli kuchisenda nkaweyi.+ 18 Wuyileji antu neyi, ‘Dijilikenu muloña kumadiki+ mwakada mbiji nanochu chimunadilili kumatu+ aYehova nakuhosha nenu: “Hinyi wukutwinka mbiji yitukudaña? Twahandileña chachiwahi muEjipitu.”+ Chalala Yehova wakayinka mbiji nawa mwakada.+ 19 Oyu mbiji mwakayida hohu hadi ifuku dimu hela mafuku ayedi hela mafuku atanu hela mafuku 10 hela mafuku 20 wanyi, 20 ilaña mwakayida hadi kakweji kamukuma sampu yinayizeyeshi chikupu* nawa munatachiki kuyimona neyi yawuzondu,+ muloña enu mwamukaanini Yehova wudi mukachi kenu, nawa mwadilileña kumesu indi nakwila nenu: “Muloñadi chitunafumini muEjipitu?”’”+

21 Kufumahu, Mosi wahosheli nindi: “Amayala inidi nawu akakwenda hamaseki adi 600,000,+ ilaña eyi wunakuhosha neyi, ‘Nakayinka mbiji nawa akayida hadi kakweji kamukuma’! 22 Hela neyi nyikanka yanyikoku niyawañombi yejima akuyijaha, akushikila? Hela neyi inshi jejima jamukaluñalwiji akujikwata, akushikila?”

23 Kuhiñahu, Yehova wamulejeli Mosi nindi: “Komana chikasa chanami Yehova chachihi?+ Ichi wukumona neyi yuma yinnahoshi yikumwekana hela nehi.”

24 Dichi Mosi wedikili nakuleja antu mazu aYehova. Wapompesheli amayala 70 kufuma hadi akulumpi jawantu nawa wayimikili kwitenti+ kwi-i ndo-o. 25 Kufumahu, Yehova wasulukili mwivu+ nakuhosha naMosi+ nawa wanonelihu spiritu+ yadiña hadi yena nakuyisha hadi akulumpi 70, hamuntu-hamuntu. Chelili hohu spiritu yishakami hadi wena, atachikili kwila neyi atuprofwetu,*+ ilaña hiyafuntishilihu cheñi kwila chuma chamuchidiwuku.

26 Kwadiña amayala ayedi ashalili muchilombu. Majina awu adiña aEludadi naMedadi. Dichi spiritu yenjili hadi wena, muloña adiña hakachi kanowu asonekeliwu majina, ilaña hiyayili kwitentiku. Atachikili kwila neyi atuprofwetu muchilombu. 27 Dichi mukwenzi wumu wayili lufuchi nakumuleja Mosi nindi: “Eludadi niMedadi anakwila neyi atuprofwetu muchilombu!” 28 Kuhiñahu, Yoshuwa+ mwana kaNuni, mukakumukalakela Mosi kufuma tuhu kuwukwenzi windi, wahosheli nindi: “Eyi mwanta wami Mosi, yilekeshi!”+ 29 Ilaña Mosi wamulejeli nindi: “Wunakuntiyila ichima tahindi? Bayi wutiya ichimaku, ami nadi kutiya kuwaha neyi antu jaYehova ejima adiña atuprofwetu nawa neyi Yehova washa spiritu yindi hadi wena!” 30 Chimwahitili mpinji, Mosi wafuntili muchilombu hamu nawakulumpi jawaIsarela.

31 Kufumahu, mpepela yafumini kudi Yehova yakunkili nawa yaleteli tuleñami kufuma kukaluñalwiji nawa twaholokeleli kunsa yachilombu+ chejima, kukabadi kamu kwakwihi nalwendu lwakwenda ifuku dimu, nawa kukabadi kakwawu kwakwihi nalwendu lwakwenda ifuku dimu, kunyeñumuka chilombu chejima, nawa twadalili kwakwihi namakyubiti* ayedi kufuma heseki. 32 Dichi, owu mwaana wejima niwufuku wejima kushika nihefuku dalondelelihu, antu adiña nakupompesha tuleñami. Kwosi muntu wanoneli twantesha kubadika hamahomeri 10,* nawa atwanyikileña kunyeñumuka chilombu chejima. 33 Henohu mbiji yichidi kumazewu awu nawa kanda ayitafunyi, Yehova wayizuwilili chikupu antu, nawa Yehova wajahili antu amavulu nankashi.+

34 Dichi odu iluña adituumbili nawu Kibiroti Hatava,*+ muloña kwenoku dikwajiikiliwu antu afwilileña yakuda.+ 35 Kufuma kuKibiroti Hatava antu anyamukili nakuya kuHazeroti, nawa ashakamineña kuHazeroti.+

12 Dichi aMiriyamu naAroni atachikili kumutoobela Mosi muloña wasumbwili mumbanda mwini Kushi.+ 2 Ahosheleña nawu: “Komana Yehova wahoshelaña hohu mudi Mosi tahindi? Komana hahoshelaña nimudi etuku?”+ Nawa Yehova wadiña nakutiyilila.+ 3 Dichi iwu iyala Mosi wadiña wamwovu chikupu*+ kubadika antu ejima adiña hamaseki.

4 Hohenohu Yehova wayilejeli aMosi, Aroni niMiriyamu nindi: “Wejima wenu asatu yenu kwitenti dakubulakena.” Dichi wejima wawu asatu ayili. 5 Nawa Yehova wasulukili muchishimi cheevu+ nakwimana kuwiñililu wakwitenti nawa watambikili aAroni naMiriyamu. Dichi wejima wawu ayedi ayili kumbidi. 6 Yena wayilejeli nindi: “Mwani, tiyenu mazu innakuyileja. Neyi hakachi kenu hadiña kaprofwetu kaYehova, nadi kudimwekesha ami aweni kudi yena muchimwenu+ nawa nadi kuhosha nayena muchilota.+ 7 Ilaña kudi kambuñami Mosi, hichekala mwenomuku! Namukunjiki mudimu wakutala itala dami dejima.*+ 8 Nahoshaña nindi+ kanwa-nakanwa nawa hatooka, bayi nayishimuku; yena wamonaña chamwekanaña Yehova. Dichi muloñadi chimwabulila kutiya woma wakumutoobela kambuñami Mosi?”

9 Dichi Yehova wayizuwilili nawa wayishiyili. 10 Ivu dafumini hetenti, cheliliwu nawu atali! amweni Miriyamu anamweti nambumba yitooka to-o neyi sino.*+ Kuhiñahu, Aroni wabalumukilili kudi Miriyamu nawa wamweni nindi anamweti nambumba.+ 11 Hohenohu Aroni wamwilili Mosi nindi: “Nalembi, eyi mwanta wami! Mwani bayi wutwila chuma chatama muloña wanshidi yitunakoñiku! Tuneli mwawusupi muloña wachuma chitunakoñi. 12 Mwani, bayi wumuleki atwalekihu kwikala neyi mwana wafwa wunavwaliki mwivumu damama yindi nawa wudi nanyisunyi yinatoki kabadi kamuku!” 13 Dichi Mosi wamudililili Yehova nindi: “Eyi Nzambi, mwani muuki! Nalembi!”+

14 Yehova wamwakwili Mosi nindi: “Neyi tata yindi wukumufwijila kumesu indi, komana wukutiya nsonyi hadi mafuku 7 wanyi? Amutwali hanji yachilombu+ kwakankawindi hadi mafuku 7, kufumahu dinu akamufuntishi muchilombu.” 15 Dichi Miriyamu amutwalili hanji yachilombu kwakankawindi hadi mafuku 7,+ nawa antu hiyanyamukili nakuyaku, sampu nichiyamufuntishiliwu Miriyamu muchilombu. 16 Hanyima yachumichi, antu anyamukili nakufuma kuHazeroti+ nakuteekela mwisaña daParani.+

13 Dichi Yehova wamulejeli Mosi nindi: 2 “Temeshaku amayala ayi nakwendesha* ituña daKenani dinnakuyinka aIsarela. Kumuchidi-himuchidi wawankakulula jawu, wusendiku iyala wumu-wumu iwukutemesha, wekala nlomboli+ hakachi kawu.”+

3 Dichi Mosi wayitemesheli kufuma mwisaña daParani+ kwesekeja nachashimwiniyi Yehova. Awa amayala ejima adiña anlomboli* jawaIsarela. 4 Awa dimajina awu: kumuchidi waRubeni, kwafumini Shamuwa mwana kaZakuri; 5 kumuchidi waSimiyoni, kwafumini Shafati mwana kaHori; 6 kumuchidi waYuda, kwafumini Kalebu+ mwana kaYefuna; 7 kumuchidi waIsakari, kwafumini Igali mwana kaYosefu; 8 kumuchidi waEfuremu, kwafumini Hosheya+ mwana kaNuni; 9 kumuchidi waBenjamini, kwafumini Paliti mwana kaRafu; 10 kumuchidi waZebuluni, kwafumini Gadiyeli mwana kaSodi; 11 kumuchidi waYosefu,+ mumuchidi waManasi,+ kwafumini Gadayi mwana kaSusi; 12 kumuchidi waDani, kwafumini Amiyeli mwana kaGemali; 13 kumuchidi waAsheri, kwafumini Seturi mwana kaMikeli; 14 kumuchidi waNafitali, kwafumini Nahibi mwana kaVofisi; 15 kumuchidi waGadi, kwafumini Geyuweli mwana kaMaki. 16 Awa diwu majina awamayala atemesheliyi Mosi kuya nakwendesha ituña. Nawa Mosi wamutuumbili Hosheya mwana kaNuni nindi Yoshuwa.*+

17 Mosi chayitemesheleñayi kuya nakwendesha ituña daKenani, wayilejeli nindi: “Kandukenu muyi kuNegebi, kufumahu dinu mwakakanduki nakuya kwiluña damapidi.+ 18 Mwakatali chidi odu ituña+ nawa mwakamoni neyi antu anakushakamamu akola hela azeya, antesha hela amavulu, 19 nawa mwakamoni neyi odu ituña dadiwahi hela datama nawa neyi nyisumba munakushakamawu hiyilombu hela yakiñewa nampwembu. 20 Cheñi mwakamoni neyi odu ituña dikweti wushi* hela nehi*+ nawa neyi dikweti nyitondu hela nehi. Mwakahamuki+ kulonda mwakasendihu nyikaabu yimu yamunodu ituña.” Ichi chadiña chilaaka mwahilaña nyikaabu yanyivinyu yatachi.+

21 Dichi ayili nawa endesheli ituña kutachikila kwisaña daZini+ kuhita nikuRehobi+ nakushika kuLebo Hamati.*+ 22 Chakandukiliwu nakuya kuNegebi, ashikili kuHebironi+ kwashakamineña Ahimani, Sheshayi niTalimayi,+ aAnaki.+ Musumba waHebironi awutuñileñahu dehi, nawa hahitili yaaka 7 kushika hatuñiliwu musumba waZowani wamuEjipitu. 23 Chashikiliwu muChinekineki chaEshikoli,*+ akunkwili mutayi wadiña nachizokofu chanyivinyu owu wasendeleliwu hamukambu kudi amayala ayedi, kushilahu nimapomegiranati* amakwawu niyikuyu.+ 24 Odu iluña adituumbili nawu Chinekineki chaEshikoli*+ muloña wachizokofu chakunkwiliwu aIsarela kwenoku.

25 Chamanini mafuku 40,+ afuntili kufuma kwayiliwu nakwendesha ituña. 26 Dichi, enjili kudi aMosi naAroni nikudi izaza dawaIsarela dejima mwisaña daParani, kuKadeshi.+ Aleteli nsañu kudi izaza dawantu dejima nawa ayilejeli ninyikaabu yamunodu ituña. 27 Iyi diyi nsañu yaleteliwu kudi Mosi nawu: “Tweñilili mwituña diwatutemesheliku, chalala dasweja mayeli niwuchi,+ nawa iyi diyi nyikaabu+ yamunodu ituña. 28 Hela chochu, antu ashakama munodu ituña akola ninyisumba yawu yakiñewa nawa yamaneni nankashi. Kwenoku twamweni niaAnaki.+ 29 AAmaleki+ anakushakama mwituña daNegebi.+ AHiti, aYebusi+ niaAmori+ anakushakama kwiluña damapidi nawa aKenani+ anakushakama kwakwihi nakaluñalwiji+ nikumukulishu waYodani.”

30 Kuhiñahu, Kalebu wesekeli kumwenesha antu hemeniwu kudi Mosi nakuhosha nindi: “Tuyenu tukanduki chochichi, nawa tunakuhweleli netu tukuditambula odu ituña muloña chalala tunateli kudiimika mushindu.”+ 31 Ilaña amayala ayiliyi nawu hamu ahosheli nawu: “Hitukutwesha kuya nakuzuña nanowu antuku, muloña wena akola kutubadika etu.”+ 32 Nawa atwalekelihu kuyileja aIsarela nsañu yatama+ kutalisha hanodu ituña dayili nakwendeshawu nawu: “Ituña ditwayili nakwendesha hiituña dajilumunaña antu ashakamañamu, nawa antu ejima itwamwenimu, hiyantu ataluka chikupu.+ 33 Nawa mwenomu twamwenimu aNefwili, anyana kaAnaki+ awamayala, avwalawu kudi aNefwili* nawa chitwadesekejeli nawu, etu twadimweni neyi mpasu, niwena dichatumweniwu.”

14 Hohenohu izaza dawantu dejima dadilili nawa antu achishili nakukaloka nikudila wufuku wejima.+ 2 AIsarela ejima atachikili kuyitoobela aMosi naAroni,+ nawa izaza dawantu dejima datachikili kuyihoshola nawu: “Chadi kuwaha neyi twafwilili mwituña daEjipitu hela kufwila mudinu isaña! 3 Hanu dinu muloñadi Yehova chinakututwalilayi munidi ituña nakutujahisha kumpoku yakabali?+ Añodi jetu nianyanetu akayipuupa.+ Komana chikuwaha wanyi etu kufunta kuEjipitu?”+ 4 Nawa adilejeleña mulwawu nawu: “Tutondenu nlomboli kulonda tufunti kuEjipitu!”+

5 Hohenohu aMosi naAroni adibukili chamesu heseki kumesu ezaza dawaIsarela dejima dapompeli. 6 Yoshuwa+ mwana kaNuni niKalebu+ mwana kaYefuna, owu adiña hakachi kanowu endesheli ituña, atabwili yakuvwala yawu, 7 nawa ashimwini iyi nsañu kudi izaza dawaIsarela dejima nawu: “Ituña ditwayili nakwendesha dadiwahi nankashi, hiituña dadiwahi chikupu.+ 8 Neyi Yehova natutiyi kuwaha, chalala wukututwala munidi ituña nawa wukutwinkadu, ituña dasweja mayeli niwuchi.+ 9 Ilaña, bayi mudikaña naYehovaku, nawa bayi mutiya woma antu amunidi ituñaku,+ muloña wena twakayijilumuna.* Kukiñewa kwawu anakwifumishihu dehi, nawa Yehova wudi nanetu.+ Bayi muyitiya womaku.”

10 Hela chochu, izaza dawantu dejima dahosheleña nawu diyasi malola.+ Ilaña kulema kwaYehova kwamwekeni hetenti dakubulakena kudi antu jaIsarela+ ejima.

11 Kufumahu, Yehova wamwilili Mosi nindi: “Indi awa antu akaleka kubula kunlemesha+ kushika mpinjinyi? Nawa akaleka kubula kunkuhwelela kushika mpinjinyi nihanyima yakukoña yinjikijilu yejima hakachi kawu?+ 12 Lekaku niyeti nachipupu kulonda niyijilumuni, nukukwilisha eyi wiikali muza weneni nawa wukweti ñovu chikupu kubadika wena.”+

13 Ilaña Mosi wamulejeli Yehova nindi: “Neyi wukwila mwenimu, dikwila nawu aEjipitu, omu muwafumishili awa antu nañovu jeyi, akutiya,+ 14 nawa akulejaku antu ashakama munidi ituña. Owu antu niwena anatiyi nawu, eyi Yehova wudi hakachi kanawa antu+ nawa wunadimwekeshi kudi wena mesu-namesu.+ Yeyi Yehova, nawa ivu deyi dinemani hewulu dawu. Namwaana, wunakuyilombolaña nachishimi cheevu, nawufuku, wunakuyilombolaña nachishimi chakesi.+ 15 Neyi awa antu ejima wukuyijaha hampinji yimu,* nyuza yinatiyi mpuhu yeyi yikuhosha nawu: 16 ‘Yehova wakañenyi kuyitwala awa antu mwituña dayikaniniyi kuyinka, dichi wayijahilili mwisaña.’+ 17 Dichi dinu Mwani, eyi Yehova, ñovu jeyi jisweji neyi chiwakanini hiwahosheli neyi: 18 ‘Yehova, wabulaña kuzuwa swayi nawa wukweti kukeña kwakashinshi+ chikupu, wanakenaña yiluwa ninshidi, ilaña hakabula kubabesha muntu wukweti muloñaku, muloña wayiluwa yawatata jawantu, wababeshelañamu anyana, ejikulu nianyana kawejikulu awu.’+ 19 Mwani, yanakeni awa antu yiluwa yawu kwesekeja nakukeña kweyi kwakashinshi chikupu, neyi chiwunanakeni awa antu kufuma muEjipitu kushika nikulelu.”+

20 Kuhiñahu, Yehova wahosheli nindi: “Nayanakeni kwesekeja nachiwunahoshi.+ 21 Ilaña, kwesekeja nachinahanda ami, iseki dejima dakenzala nakulema kwaYehova.+ 22 Hela chochu, kwosi muntu wunamoni kulema kwami niyinjikijilu+ yinakoñeli muEjipitu nimwisañaku, ilaña wunatwalekihu kuñeseka+ awa mapampa 10 nawa wunabuli kutiyilila mwizu dami+ 23 wakamona ituña dinakanini ankakulula jawuku. Kwosi muntu niwumu hakachi kanowu anakubula kunlemesha wakamona odu ituñaku.+ 24 Ilaña hamuloña wakwila kambuñami Kalebu+ wadiña namuchima wambukaku, nawa watwalekelihu kunlondela namuchima wejima, chakadi nikujina, nakamwiñija mwituña mwayiliyi nawa anyanindi akaditambula dakekala iheta dawu.+ 25 Chineli aAmaleki niaKenani+ anakushakama muchinekineki, kumadiki mwakabalumuki nakuya mwisaña nawa mwakazatishi njila yaya kuKaluñalwiji Kachinana.”+

26 Kufumahu, Yehova wahosheli naMosi niAroni nindi: 27 “Indi idi izaza dawantu atama dakatwalekahu kuntoobela kushika mpinjinyi?+ Natiyi yuma yinakuntoobelawu+ aIsarela. 28 Yileji neyi, ‘“Kwesekeja nachinahanda ami,” dichinahoshiyi Yehova, “Nukuyikoña enu kwesekeja namazu innatiyi imunakuhosha!+ 29 Enu ejima asonekeliwu mudi nayaaka 20 kuya hewulu, enu ejima munakuntoobela,+ yibimbi yenu yikadimbukila mudinu isaña.+ 30 Kwosi muntu hela wumu hakachi kenu wakeñila mwituña dinasanyikili* nami mwakashakamimuku,+ chiña hohu Kalebu mwana kaYefuna niYoshuwa mwana kaNuni.+

31 “‘“Nawa munidi ituña nakeñijamu anyanenu, owu imwashimuna nenu akayipuupa,+ nawa akeluka ituña dimunakaani.+ 32 Ilaña yibimbi yenu yakadimbukila mudinu isaña. 33 Dichi anyanenu awamayala akekala atubiña mwisaña yaaka 40,+ nawa akalumbulula muloña wayilwilu yenu yakubula kushinshika* sampu nichikadimbuka chibimbi chenu chakukumishaku chahayibimbi yenu mudodinu isaña.+ 34 Akayibabesha hadi yaaka 40 muloña wayiluwa yenu,+ kwesekeja namafuku 40+ imwendesheli odu ituña, ifuku dimu chaaka chimu, ifuku dimu chaaka chimu, kulonda mwakeluki chichatamina kudikaña nanami.*

35 “‘“Ami Yehova, yami innahoshi. Ichi dichuma chinakakoña idi izaza dawantu datama dinadipompeshi hamu nakudikaña nanami: Mudinu isaña dimwakakuminawu nawa dimwakafwilawu.+ 36 Amayala atemesheliyi Mosi kuya nakwendesha ituña nawa akojejeli izaza dawantu kumutoobela hafuntiliwu nansañu yatama kutalisha hanodu ituña,+ 37 amayala wenowu aleteli nsañu yatama kutalisha hanodu ituña, akayeta nawa akafwila kumesu aYehova.+ 38 Ilaña Yoshuwa mwana kaNuni niKalebu mwana kaYefuna, owu adiña hakachi kanowu ayili nakwendesha ituña, chakadi nikujina, akatwalekahu kuhanda.”’”+

39 Mosi chahosheliyi awa mazu kudi aIsarela ejima, antu atachikili kudila nankashi. 40 Kubombelahu, anyamukili ntetemena nankashi kulonda akandami nakuya hewulu dampidi nakuhosha nawu: “Tunadiloñeshi kuya kwiluña dashimwiniyi Yehova, muloña tunavulumuni.”+ 41 Ilaña Mosi wayilili nindi: “Munakumotokeladi munahoshiyi Yehova? Chumichi mukuchitwesha wanyi. 42 Bayi muyakuku, muloña Yehova hadi nanenuku; nawa akuyimika mushindu kudi ayilumbu jenu.+ 43 Muloña aAmaleki nawaKenani anakuyihembelela+ kwenoku nawa mukufwa kumpoku yakabali. Chineli munaleki kumulondela Yehova, dichi Yehova niyena wukwikala nanenu wanyi.”+

44 Hela chochu, hamuloña wakudivwimba kwawu, ayili hewulu dampidi,+ ilaña chimbañu chachitiyañenu chaYehova hichafumini muchilombuku,+ nawa Mosi niyena hafuminimuku. 45 Kuhiñahu, aAmaleki nawaKenani ashakamineña kumpidi, asulukili nakuyeta owu antu nawa ayipalañesheli kushika kuHorima.+

15 Yehova wamulejeli cheñi Mosi nindi: 2 “Hoshaku nawaIsarela wuyileji neyi, ‘Neyi munashiki dehi mwituña dinnakuyinka nami mushakameñamu,+ 3 hampinji yimwakamulambulaña Yehova mulambu wakwocha hakesi kufuma hamukanka wawañombi hela hamukanka wawanyikoku hela wawampembi, hela himulambu wakushita+ hela mulambu wakusanyika kwadimena hela mulambu wakudikeñela+ hela mulambu wakulambula hayawija yahachilaaka,+ kulonda wepuki ivumba dadiwahi* kudi Yehova,+ 4 muntu wunakulambula mulambu windi, watela nikumulambula Yehova mulambu wambutu wawuña wawuwahi walembuluka+ wachipimu chamwikumi chaifa* wakubomba nachipimu chamuchiwana chahini* yamanji. 5 Watela cheñi kulambula vinyu yachipimu chamuchiwana chahini kulonda wiikali mulambu wavinyu, yakawulambuleña hamu namulambu wakushita+ hela hamu namulambu wamwana kamukoku wachizamba wudi wejima. 6 Hela hamu namulambu wamukoku wachizamba, watela kulambula mulambu wambutu wayipimu yiyedi yamwikumi yaifa yawuña wawuwahi walembuluka wakubomba nachipimu chamuchisatu chahini yamanji. 7 Nawa watela kuhana vinyu yachipimu chamuchisatu chahini kulonda yiikali mulambu wavinyu wevumba dadiwahi* kudi Yehova.

8 “‘Ilaña neyi wakalambula ñombi wachizamba wamulambu wakushita+ hela wamulambu wakusanyika+ kwadimena hela wamulambu wakuwunda kudi Yehova,+ 9 owu ñombi wachizamba watela kumulambwila hamu namulambu wambutu+ wayipimu yisatu yamwikumi yaifa yawuña wawuwahi walembuluka wakubomba nachipimu chahafu* chahini yamanji. 10 Watela kulambula cheñi nivinyu yachipimu chahafu* chahini kulonda yiikali mulambu wavinyu+ wakwocha hakesi, wevumba dadiwahi* kudi Yehova. 11 Ichi dichimukwilaña hakulambula ñombi wachizamba wudi wejima hela mukoku wachizamba wudi wejima hela anyana kanyikoku ayizamba adi ejima hela anyana kampembi ayizamba adi ejima. 12 Kwesekeja nakuvula kwayimuna yimwakalambulaña, mwakeleña mwenimu hachimuna-hichimuna kwesekeja nakuvula kwayu. 13 Mwenimbu wejima wavwalikila muIsarela, ichi dichakalambulañayi mulambu wakwocha hakesi, wevumba dadiwahi* kudi Yehova.

14 “‘Neyi ñiinza wunakushakama hamu nanenu hela imwashakamaña nindi mumakiñu enu amavulu, nakukeña kulambula mulambu wakwocha hakesi wevumba dadiwahi* kudi Yehova, watela kwila neyi chimwelaña enu.+ 15 Enu amwizaza dawantu niñiinza wunakushakama hamu nanenu mukwikalaña nalushimbi lumu. Lukwikalaña lushimbi lwahaya nyaaka mumakiñu enu ejima. Ñiinza watela kwikala neyi chimudi enu kumesu aYehova.+ 16 Mukuzatishaña lushimbi lumu nimazu awunsompeshi wowamu enu niñiinza wunakushakama nanenu.’”

17 Yehova watwalekelihu kumuleja Mosi nindi: 18 “Hoshaku nawaIsarela nawa wuyileji neyi, ‘Neyi munashiki dehi mwituña dinnakuyitwalamu 19 nawa muda yakuda* yidi yejima yamunidi ituña,+ mwatela kuhana chawaana kudi Yehova. 20 Mwatela kuhana mankendi anjiñumuki akweti ipwata hakachi akwocha nawuña wenu watachi+ wanseki. Mwakayihani neyi chimunateli kuhana chawaana chinafumi hawuhulilu. 21 Wuña wenu wukwawu watachi wanseki, mwakawuhaneña wakekali chawaana kudi Yehova mwakahita makiñu enu ejima.

22 “‘Neyi muluwañesha nawa mukañanya kulondela iji nshimbi jejima jinamulejiwu Mosi kudi Yehova, 23 jejima jinayilejiyi Yehova kuhitila mudi Mosi kufuma hefuku dayilejeliyi Yehova kushika nikumakiñu enu akumbidi, 24 nawa neyi achikoñeli chakadi kwiluka nawa izaza dawantu hidelukili chumochuku, izaza dawantu dejima datela kulambula mwana kañombi wachizamba kulonda ekali mulambu wakushita wevumba dadiwahi* kudi Yehova hamu namulambu wawu wambutu nimulambu wawu wavinyu neyi chelañawu diikalu+ nimwana kampembi wumu wamulambu wahanshidi.+ 25 Kapristu wakabuta hanshidi yezaza dawaIsarela dejima nawa akayanakena nshidi jawu+ muloña ayikoñeli chakadi kwiluka, nawa aleteli kudi Yehova mulambu wawu wakwocha hakesi nimulambu wawu wahanshidi kumesu aYehova muloña wanshidi yakoñeliwu chakadi kwiluka. 26 Izaza dawaIsarela dejima niñiinza washakamaña hakachi kawu, akayanakena nshidi jawu, muloña antu ejima akoñeli nshidi chakadi kwiluka.

27 “‘Neyi muntu wudi wejima akoña nshidi chakadi kwiluka, akahani mpembi wamukaji wachaaka chimu wamulambu wahanshidi.+ 28 Nawa kapristu wakabuta hanshidi yanowu muntu wunavulumuni kudi Yehova muloña wakukoña nshidi chakadi kwiluka, kulonda akamubutili hanshidi nawa akamwanakena.+ 29 Kutalisha kudi mwenimbu wavwalikila hakachi kawaIsarela niñiinza wunakushakama hakachi kawu, mukuzatishaña lushimbi lolumu kutalisha hanshidi yinakoñiyi muntu chakadi kwiluka.+

30 “‘Ilaña muntu wukukoña nshidi mumushikila,+ hela himwenimbu wavwalikila muIsarela hela hiñiinza, muntu yenowu nakumuhosha Yehova kasawuntu nawa akamujahi nakumufumisha hadi antu jindi. 31 Muloña wakwila nasawuli izu daYehova nikufumpa lushimbi lwindi, owu muntu chiña tuhu+ amujahi.* Chiluwa chindi chidi hadi yomwenindi.’”+

32 Hadiñawu aIsarela mwisaña, awanini iyala nakuchaya nchawa hefuku daSabata.+ 33 Antu amuwanini owu iyala nakuchaya nchawa, amutwalili kudi Mosi naAroni nikwizaza dejima. 34 Amukasili+ nakumuhemba muloña nshimbi hijashimwinihu mwakumwililaku.

35 Kufumahu, Yehova wamulejeli Mosi nindi: “Owu iyala chiña tuhu+ amujahi, nawa izaza dejima datela kumwasa malola hanji yachilombu.”+ 36 Dichi izaza dejima damutwalili owu muntu hanji yachilombu nawa damwasili malola nakumujaha neyi chamulejeliwu Mosi kudi Yehova.

37 Yehova watwalekelihu kumuleja Mosi awa mazu nindi: 38 “Hoshaku nawaIsarela nawa wuyileji neyi atela kusha nzombu kwishina damasiketi ayakuvwala yawu mwakahita makiñu awu ejima nawa akasheñaku wanda wabulu hewulu danzombu yakwishina dasiketi.+ 39 ‘Mwatela kwikala naniji nzombu kunsa, kulonda chimwajimona jiyanukisheña nshimbi jaYehova jejima nikujilondela.+ Bayi mulondela nyichima nimesu enu anakuyitwala kukwila wuvumbi wakuspirituku.+ 40 Chumichi chikuyikwashaña kwanuka nikulondela nshimbi jami jejima nakwikala ajila kudi ami Nzambi yenu.+ 41 Yami Yehova Nzambi yenu wayifumishili mwituña daEjipitu kulonda nidimwekeshi nami yami Nzambi yenu.+ Yami Yehova Nzambi yenu.’”+

16 Kuhiñahu, Kora+ mwana kaIzihari,+ mwana kaKohati,+ mwana kaLevi,+ wanyamukili hamu naDatani niAbirami anyana kaEliyabi+ awamayala niOni mwana kaPileti wahadi anyana kaRubeni awamayala.+ 2 Amunyamukilili Mosi wena hamu nawamayala aIsarela 250, dikwila nawu anlomboli ezaza dawantu, atondeliwu amuchipompelu nawa amayala alema. 3 Dichi adipompesheli hamu nakuyimakena+ aMosi naAroni nakuyileja nawu: “Tunazeyi nakuyitiyilila enu! Izaza dawantu dejima dajila+ nawa Yehova wudi hakachi kawu.+ Hanu dinu, muloñadi chimunakudinyamwina hachipompelu chaYehova?”

4 Mosi chatiyiliyi chumichi, hohenohu wadinatili chamesu heseki. 5 Kuhiñahu, wamulejeli Kora niantu ejima amuhakwilileñaku nindi: “Nantetemena Yehova wakatuleja wekala kukabadi kindi,+ wajila nawa watela kuswina kwakwihi nayena,+ nawa wejima akatondayi+ diyi wakaswina kwakwihi nayena. 6 Wakeli ñana: Eyi Kora niejima anakukuhakwilaku,+ mwakasendi jakusendelahu kesi,+ 7 mwakashihu kesi niinsensi, mwakenzi nayu kumadiki kumesu aYehova nawa iyala akatondawu kudi Yehova,+ diyi wajila. Enu anyana kaLevi+ awamayala munashiki hahalehi nankashi!”

8 Kuhiñahu, Mosi wamulejeli Kora nindi: “Mwani, tiyenu, enu anyana kaLevi awamayala. 9 Enu munamoni nenu hichuma chaswayi kuyaambula kudi Nzambi kufuma hezaza dawaIsarela+ nikuyiteja enu kuswina kwakwihi kulonda muzateña mudimu wahatabanaka yaYehova nikwimana kumesu ezaza dawantu nakuyikalakela tahindi?+ 10 Komana hichuma chaswayi kukuleta eyi hamu niamanakweyi anyana kaLevi awamayala kwakwihi nayena tahindi? Komana munakukeña nimudimu wawupristu tahindi?+ 11 Hamuloña wachumichi, eyi niejima anakukuhakwilaku munapompi hamu, munakudikaña naYehova. Indi Aroni hinyi mwaka mumutoobeli?”+

12 Chimwahitili mpinji, Mosi watemesheli mazu kulonda ayitambiki aDatani naAbirami+ anyana kaEliyabi awamayala, ilaña wena ahosheli nawu: “Tukwinza wanyi! 13 Komana hichuma chanyanya chakutufumisha mwituña dasweja mayeli niwuchi nakutujahila mwisaña?+ Dichi, wunakukeña cheñi wiikali mukwakutuyuula tahindi?* 14 Talaña, hiwunatuleti mwituña mwasweja mayeli niwuchi+ hela kutwinka iha dawuswana hela itempa danyivinyuku. Komana wunakukeña kulokola mesu anawa antu tahindi? Tukwinza wanyi!”

15 Dichi, Mosi wahilili nankashi nakuhosha kudi Yehova nindi: “Bayi wutambwila mulambu wawu wambutuku. Kanda nitambuleñahu dehi chimbuulu hela chimu kudi wena hela kukatishahu muntu hela wumu hakachi kawuku.”+

16 Kuhiñahu, Mosi wamulejeli Kora nindi: “Kumadiki, eyi niejima anakukuhakwilaku mwakenzi nakwimana kumesu Yehova, eyi, wena niAroni. 17 Muntu-himuntu akasendi cheña chindi chakusendelahu kesi, akashihu insensi nawa muntu-himuntu akaleti cheña chakusendelahu kesi kumesu aYehova, dikwila nawu jakusendelahu kesi 250, kushilahu eyi niAroni. Muntu-himuntu nacheña chindi chakusendelahu kesi.” 18 Dichi muntu-himuntu wasendeli cheña chindi chakusendelahu kesi nawa ashilihu kesi niinsensi nakwimana kuwiñililu wakwitenti dakubulakena hamu naMosi niAroni. 19 Kora chapompesheliyi antu jindi amuhakwilileñaku kuwiñililu wakwitenti dakubulakena+ kulonda ayimakeni aMosi naAroni, kulema kwaYehova kwamwekeni kwizaza dawantu dejima.+

20 Dichi Yehova wayilejeli aMosi naAroni nindi: 21 “Daambulenu nakufuma hakachi kanidi izanvu kulonda niyijilumuni mumpinji yimu hohu.”+ 22 Hohenohu, adibukili chamesu heseki nawa ahosheli nawu: “Eyi Nzambi, Nzambi yaspiritu yawantu ejima,*+ nshidi yamuntu wumu diyi yikukuletesha wuhilili izaza dawantu dejima?”+

23 Kufumahu, Yehova wamulejeli Mosi nindi: 24 “Hoshaku nezaza dawantu nawa wuyileji neyi, ‘Fumenu kumatenti aKora, aDatani niaAbirami!’”+

25 Kuhiñahu, Mosi wanyamukili nakuya kudi aDatani naAbirami, nawa akulumpi+ jawaIsarela ayili hamu nindi. 26 Walejeli izaza dawantu nindi: “Mwani, fumenu kumatenti anawa antu atama nawa bayi mukwati kuchuma chidi chejima chanawa antuku, kulonda mubuli kujilumuka muloña wanshidi jawu jejima.” 27 Hohenohu afumini kumatenti aKora, aDatani niaAbirami kumbadi jejima, nawa aDatani naAbirami edikili nakwimana hamawiñililu amatenti awu hamu nawañodi jawu, anyanawu awamayala nianyanawu anyanya.

28 Hohenohu Mosi wahosheli nindi: “Kuhitila muchumichi, mukwiluka nenu Yehova diyi wunantemeshi kukoña yuma yejimiyi, hiyinafumi mumuchima wami ami aweniku:* 29 Neyi awa antu akufwa neyi chafwañawu antu ejima nawa neyi akuyibabesha neyi chababeshañawu antu ejima, dikwila nawu Yehova hidiyi wunantemeshiku.+ 30 Ilaña neyi Yehova wukuyikoña chuma chakwila kanda chimwekaneñahu dehi, iseki denzunuki* nakuyiminya hamu niyuma yawu yejima nawa ayi amomi Mwijamu,* chalala mukwiluka nenu awa antu anamusawuli Yehova.”

31 Chamanishiliyi kuhosha awa mazu ejima, iseki hemeniwu dabalukili hakachi.+ 32 Nawa iseki denzunukili* nakuyiminya hamu nawantu amumatala awu niantu jaKora+ ejima hamu niyuma yawu yejima. 33 Dichi wena niyuma yawu yejima, eñilili amomi Mwijamu* nawa iseki dayibutili chakwila ajilumukilili hakachi kachipompelu.+ 34 AIsarela ejima ayinyeñumukili, chatiyiliwu ochu chakalokeleñawu, atemukili muloña ahosheleña nawu: “Tunatiyi woma netu iseki dakenza katwiminya!” 35 Hohenohu, kesi kafumini kudi Yehova+ nawa kwocheli amayala 250 alambwileña insensi.+

36 Kuhiñahu, Yehova wamulejeli Mosi nindi: 37 “Lejaku Eleyazari mwana kakapristu Aroni afumishi mukesi jakusendelahu kesi,+ muloña jajila. Cheñi, wumuleji neyi kesi yakisandili kwakulehi. 38 Jakusendelahu kesi janawa amayala anakisishi mawumi awu muloña wakukoña nshidi, yajichili jiikali malata apapalala nakuyilamika kukameña,+ muloña ajileteli kumesu aYehova nawa jekalili jajila. Atela kwikala chinjikijilu kudi aIsarela.”+ 39 Dichi kapristu Eleyazari wanoneli jakusendelahu kesi jawuneñu jaleteliwu kudi owu ocheliwu nawa wajichilili nakujilamika kukameña, 40 neyi chamulejeliwu kudi Yehova kuhitila mudi Mosi. Adiña akuyanukishaku aIsarela nawu kwosi muntu abulili kwitejawu* wabulili kwikala wahadi anyana kaAroni awamayala wateleleli kwinza kwakwihi nakwocha insensi kumesu Yehovaku,+ nawa nawu kwosi muntu wateleleli kwikala neyi Kora niantu amuhakwilileñakuku.+

41 Hefuku dalondelelihu, izaza dawaIsarela dejima datachikili kuyitoobela aMosi naAroni,+ nawu: “Enu ayedi munajahi antu jaYehova.” 42 Izaza dawantu chidapompeli hamu nakuyimakena aMosi naAroni, abalumukili nakutalishila kwadiña itenti dakubulakena, nawa cheliliwu nawu atali! amweni ivu dinabuti hetenti nikulema kwaYehova kwamwekeni.+

43 Mosi naAroni ayili kumbidi yetenti dakubulakena,+ 44 nawa Yehova wamulejeli Mosi nindi: 45 “Enu antu, fumenu hakachi kanidi izaza kulonda nidijilumuni mumpinji yimu hohu.”+ Hohenohu, adibukili chamesu heseki.+ 46 Kufumahu, Mosi wamulejeli Aroni nindi: “Nonaku cheña chakusendelahu kesi, wushihu kesi kadi hakameña+ niinsensi nawa wuyi swayi-swayi kwizaza dawantu kulonda wuyibutili hanshidi jawu,+ muloña Yehova nahili. Chipupu chinatachiki dehi!” 47 Hohenohu Aroni wanoneli cheña neyi chamulejeliwu kudi Mosi, wayili lufuchi hakachi kezaza dawantu nawa cheliliyi nindi atali! wamweni chipupu chinatachiki dehi hakachi kawantu. Dichi washili insensi hacheña chakusendelahu kesi nawa watachikili kuyibutila antu hanshidi jawu. 48 Watwalekelihu kwimana hakachi kawantu afwa niamomi, nkumininaku chipupu chalekeli. 49 Antu afwili nachipupu adiña 14,700 kufumishaku owu afwili muloña waKora. 50 Aroni chafuntileñayi kudi Mosi kuwiñililu wakwitenti dakubulakena, chipupu chadiña chamana dehi.

17 Kuhiñahu, Yehova wamulejeli Mosi nindi: 2 “Hoshaku nawaIsarela nawa wutambuli mbwechi yimu-yimu kuchisaka chejima chakukatata yawu kufuma kudi nlomboli wakuchisaka-hichisaka chakukatata yawu,+ jejima hamu jatela kwikala mbwechi 12. Wusoneki ijina damuntu-himuntu hambwechi yindi. 3 Ijina daAroni wudisoneki hambwechi yaLevi, muloña mutu-himutu wachisaka wudi hohu nambwechi yimu yakukatata yawu. 4 Wutenteki iji mbwechi mwitenti dakubulakena kumbidi yaChimbañu chaWunsahu,+ munadimwekeshelaña kudi enu+ mpinji yejima. 5 Mbwechi yamuntu inukutonda+ yikusapuka, nawa nukulekesha kutooba kunakuntoobelawu+ aIsarela, oku kunakuyitoobelawu ninenu nawa.”+

6 Dichi Mosi wahosheli nawaIsarela nawa anlomboli akuyisaka yakukatata yawu ejima amwinkeli mbwechi yimu-yimu, jejima hamu jadiña mbwechi 12 nawa mbwechi yaAroni niyena yadiña hakachi kambwechi jawu. 7 Kuhiñahu, Mosi watentekeli oju mbwechi kumesu aYehova mwitenti daWunsahu.

8 Hefuku dalondelelihu, Mosi cheñililiyi mwitenti daWunsahu, cheliliyi nindi atali! wamweni mbwechi yaAroni yachisaka chaLevi yinasapuki, yinanani mahumba nikukenuka nkenu nawa yinasoñi maamondi aha. 9 Kuhiñahu, Mosi wedishili mbwechi jejima hanji kufuma kumesu aYehova nakujileta kudi antu ejima aIsarela. Ajitalatalili, kuhiñahu muntu-himuntu wanonelihu mbwechi yindi.

10 Kufumahu, Yehova wamulejeli Mosi nindi: “Funtishaku mbwechi yaAroni+ kumbidi yaChimbañu chaWunsahu kulonda ayihembi yiikali chinjikijilu+ kudi anyana akakudikaña+ kulonda kutooba kunakuntoobelawu kumani nawa abuli kufwa.” 11 Hohenohu Mosi welili kwesekeja namwamulejeliwu kudi Yehova. Welili mwomwenomu.

12 Kuhiñahu, aIsarela amulejeli Mosi nawu: “Ichi tukufwa, chalala tukujiya, wejima wetu tukujiya! 13 Muntu wejima wukwinza kwakwihi natabanaka yaYehova wukufwa!+ Komana tukufwaña tuhu chochichi?”+

18 Kufumahu, Yehova wamulejeli Aroni nindi: “Eyi, anyaneyi awamayala nichisaka chakukatata yeyi iwudi nawu, mwakalumbulula hachiluwa chimwakakoña chakufumpa nshimbi jahosha heluña dajila,+ nawa eyi nianyaneyi awamayala iwudi nawu, mwakalumbulula hachiluwa chimwakakoña chakufumpa nshimbi jahosha hamudimu wenu wawupristu.+ 2 Cheñi wuleti kwakwihi amanakweyi akumuchidi waLevi, muchidi wawankakulula jeyi kulonda adibombi hamu naneyi nikukukalakela eyi+ nianyaneyi awamayala kumbidi yetenti daWunsahu.+ 3 Akuzataña nyidimu yawu yakukukalakela eyi ninyidimu yakundama kwitenti dejima.+ Hela chochu, bayi aswina kwakwihi nayipwepu yamwiluña dajila nikukameñaku, kuchiina enu niwena kufwa.+ 4 Akudibomba naneyi nawa akuzataña nyidimu yawu yakundama kwitenti dakubulakena ninyidimu yejima yakwitenti, nawa kwosi muntu* abula kwitejawu watela kuswina kwakwihi nanenuku.+ 5 Muzateña mudimu wenu wamwiluña dajila+ niwakukameña+ kulonda kuzuwa+ kwami kwakabuli kwinza cheñi hadi antu jaIsarela. 6 Ami aweni, nanoni amanakwenu aLevi kufuma hakachi kawaIsarela kulonda ekali chawaana kudi enu.+ Ananyinkiwu ami Yehova kulonda akalakaleña mudimu wahetenti dakubulakena.+ 7 Eyi nianyaneyi awamayala yenu mukweti mudimu wakutala nyidimu yawupristu yakundama kukameña niyamukachi kehina dakujika nachu,+ nawa mukukalakalaña iwu mudimu.+ Nayinki mudimu wawupristu wiikali chawaana chenu, nawa muntu* wudi wejima abula kwitejawu wakaswina kwakwihi, atela kumujaha.”+

8 Yehova wamulejeli cheñi Aroni nindi: “Yeyi innenki mudimu wakutambula yawaana yikunletelañawu.+ Nakwinki eyi nianyaneyi awamayala chibalu chayuma yejima yajila yikuhanañawu aIsarela kwikala iseka deyi dahaya nyaaka.+ 9 Dikwikalaña deyi kufuma hanyilambu yajila yakwocha hakesi: dikwila nawu, kufuma hamulambu wejima wukulambulañawu, kushilahu ninyilambu yawu yambutu,+ nyilambu yawu yahanshidi+ ninyilambu yawu yanyiloña+ yikunlambulañawu. Hichuma chajila chikupu kudi eyi nikudi anyaneyi awamayala. 10 Idi iseka wukudidiilaña+ mwiluña dajila chikupu. Iyala wudi wejima watela kudaku. Dikwikalaña chuma chajila kudi eyi.+ 11 Iyi yuma niyena yikwikalaña yeyi: yawaana yikuhanañawu+ hamu nanyilambu yejima yakuzuyañesha+ yawaIsarela. Nakwinki yumiyi yiikali yeyi hamu nawanyaneyi awamayala, kushilahu nianyaneyi awambanda yiikali iseka deyi dahaya nyaaka.+ Muntu wejima wakadi majilu wudi mwitala deyi watela kudaku.+

12 “Manji ejima asweja kuwaha, vinyu yayiha yejima yasweja kuwaha nimbutu, yuma yejima yatachi+ yanyinkañawu ami Yehova, nakwinkiyu eyi.+ 13 Nyikaabu yejima yikusambilaña kuha mumaha awu, oyu yikunletelañawu ami Yehova, yikwikalaña yeyi.+ Muntu wejima wakadi majilu wudi mwitala deyi watela kudaku.

14 “Chuma chejima* chinahembeliwu mudimu wajila muIsarela, chikwikalaña cheyi.+

15 “Wedi wejima wayuma yayumi,*+ owu wukunletelañawu ami Yehova, hela himuntu hela hikanyama, wukwikalaña weyi. Hela chochu, chakadi nikujina, watela kukuula wedi wamuntu+ nawa watela kukuula niwedi wawanyama amajilu.+ 16 Watela kumukuula nawuseya wakukuula nachu neyi wudi nakakweji kamu kuya hewulu kwesekeja nawuseya watoñolawu wamashekeli*+ asiliva atanu, kwesekeja nalushekeli lwatelela lwamwiluña dajila.* Himagira* 20. 17 Kufumishaku hohu ñombi wachizamba wawedi hela mwana kamukoku wachizamba wawedi hela mpembi wawedi, bayi wuyikuulaku.+ Hiyuma yajila. Watela kusampwila mashi awu hakameña,+ nawa manji awu, watela kuyocha kulonda akakumuki wishi nakwikala mulambu wakwocha hakesi wevumba dadiwahi* kudi Yehova.+ 18 Nawa mbiji yawu yatela kwikala yeyi. Yikwikalaña yeyi neyi chekala ibwaambu damulambu wakuzuyañesha nawa neyi chekala mwendu wachidiilu.+ 19 Yawaana yejima yajila yikunletelañawu ami Yehova+ kudi aIsarela, nakwinkiyu eyi hamu nawanyaneyi awamayala, kushilahu nianyaneyi awambanda iwudi nawu yiikali iseka deyi dahaya nyaaka.+ Ichi hichitiyañenu chamuñwa* chahaya nyaaka hakachi kanami Yehova naneyi nianyaneyi iwudi nawu.”

20 Yehova watwalekelihu kumuleja Aroni nindi: “Mwituña dawaIsarela hiwakekalamu nawuswanaku, nawa mukachi kawu hiwakekalamu neseka dampataku.+ Ami yami iseka deyi niwuswana weyi mukachi kawaIsarela.+

21 “Talaña, nayinki anyana kaLevi awamayala chamwikumi+ chejima muIsarela kulonda chiikaleña wuswana wawu muloña wamudimu wunakukalakalawu, mudimu wahetenti dakubulakena. 22 Antu jaIsarela bayi akaswina cheñi kwakwihi netenti dakubulakenaku, mukunkulwayi akenda kakoña nshidi nakufwa. 23 ALevi diwu akuzataña mudimu wahetenti dakubulakena nawa diwu akalumbulula hachiluwa chawu.+ Bayi akekala nawuswana mukachi kawaIsarelaku.+ Ilu lukwikalaña lushimbi lwahaya nyaaka mumakiñu enu ejima. 24 Muloña nayinki aLevi chamwikumi chahayawaana yikuhanañawu antu jaIsarela, oyu yikunyinkañawu ami Yehova kulonda yiikaleña wuswana wawu. Dihanafumi niyileji nami, ‘Hiyatela kwikala nawuswana mukachi kawaIsarelaku.’”+

25 Kuhiñahu, Yehova wamulejeli Mosi nindi: 26 “Wuyileji aLevi neyi, ‘Mukutambulaña chamwikumi kufuma kudi aIsarela chinnayinki enu kufuma kudi wena kulonda chiikaleña wuswana wenu,+ nawa mukunonañahu chamwikumi chimukufumishaña hachamwikumi nakumwinka Yehova chawaana.+ 27 Nawa chumichi chikwikalaña chawaana chenu, neyi mbutu yinafumi hawuhulilu+ hela neyi vinyu yayivulu yinafumi muwukamwinu wavinyu, hela neyi manji amavulu anafumi muwukamwinu wamanji. 28 Neyi chiikala mwenimu, ninenu mukunyinkaña ami Yehova chawaana chakufuma hayamwikumi yejima yimukutambulaña kudi aIsarela, nawa kufuma hayumiyi, mukumwinkaña kapristu Aroni chawaana chanami Yehova. 29 Mukunyinkaña ami Yehova chawaana chejima chikufumaña hayawaana yejima yayiwahi nankashi yikuyinkañawu enu+ yiikali yuma yajila.’

30 “Nawa wuyileji neyi, ‘Neyi muhana yawaana yayiwahi nankashi, aLevi akuyimonaña neyi mbutu yinafumi hawuhulilu nawa neyi vinyu yinafumi muwukamwinu wavinyu hela neyi manji anafumi muwukamwinu wamanji. 31 Enu niamwitala denu munateli kuyidiila mwiluña didi dejima, muloña hiwufwetu wenu wamudimu wumwakalakalaña hetenti dakubulakena.+ 32 Neyi mukuhanaña chawaana kufuma hayawaana yayiwahi nankashi, himwakakoña nshidiku nawa bayi mujilola yuma yajila yawaIsarelaku, mukunkulwayi mwakenda kafwa.’”+

19 Yehova wayilejeli cheñi aMosi naAroni nindi: 2 “Ilu dilushimbi lunashimuniyi Yehova nindi, ‘Yilejenu aIsarela nenu atela kuyiletela enu ñombi wamukaji wuchinana wamuwahi nawa wakadi ihuji,+ abulahu dehi kukasila mumpaanda. 3 Mwakamuhani kudi kapristu Eleyazari, yena wakamutwala hanji yachilombu nawa akamujahila hamesu indi. 4 Kuhiñahu, kapristu Eleyazari wakanona mashi amakwawu anowu ñombi namunu windi nakuyisampwila kumbidi yetenti dakubulakena+ mapampa 7. 5 Kufumahu, owu ñombi wamukaji akamwocha iku yena nakutalaku. Chitembi chindi, mbiji yindi nimashi indi kushilahu niwusoyi windi akajocha.+ 6 Nawa kapristu wakanona mutondu wamusida, hisopi*+ niwanda wuchinana nge-e nakujinatila mukesi munakochawu ñombi wamukaji. 7 Kuhiñahu, kapristu akakosi yakuvwala yindi nikuwela mumenji,* kufumahu dinu akafunti muchilombu; ilaña kapristu wakekala wamajilu kushika nimelela.

8 “‘Muntu wakwocha ñombi wamukaji, akakosi yakuvwala yindi mumenji nikuwela mumenji,* nawa wakekala wamajilu kushika nimelela.

9 “‘Muntu wakadi majilu, akakuñuli mawuti añombi+ wamukaji nakuyitwala hanji yachilombu kwiluña dawunyonji, nawa akayihembaña kudi izaza dawaIsarela kulonda akayibombeña namenji akutookesha nachu.+ Himulambu wahanshidi. 10 Muntu wakakuñula mawuti añombi wamukaji, akakosi yakuvwala yindi nikwikala wamajilu kushika nimelela.

“‘Ilu lwakekala lushimbi lwahaya nyaaka+ lwakalondelañawu aIsarela niñiinza wunakushakama mukachi kawu. 11 Muntu wejima wakakwata muntu wunafwi, wakekala wamajilu hadi mafuku 7.+ 12 Muntu yenowu watela kuditookesha namenji hefuku damuchisatu, nawa hefuku damu 7 wakekala wakadi majilu. Ilaña neyi abula kuditookesha hefuku damuchisatu, dikwila nawu hefuku damu 7 wakekala wamajilu. 13 Muntu wejima wakakwata chibimbi chamuntu wejima wunafwi nawa abula kuditookesha, dikwila nawu najiloli tabanaka yaYehova,+ nawa muntu yenowu akamujahi nakumufumisha* hadi aIsarela.+ Chineli hiyanamusampwili menji akutookesha nachuku,+ wukutwalekahu kwikala wamajilu. Majilu indi akutwalekahu kwikala hadi yena.

14 “‘Ilu dilushimbi lwakulondela neyi muntu afwila mwitenti: Muntu wejima wukwiñila munodu itenti hela wudi dehi munodu itenti, wakekala wamajilu hadi mafuku 7. 15 Chipwepu chejima chakadi kujikahu chijiku, chakekala chamajilu.+ 16 Muntu wejima wakekala mwisaña wakakwata muntu anajahiwu nampoku yakabali hela chibimbi hela ifwaha damuntu hela hejamu, wakekala wamajilu hadi mafuku 7.+ 17 Owu muntu wamajilu akamusendeli mawuti amakwawu amulambu wahanshidi owu ocheliwu nawa akahuñunwinihu menji anafumi tuhu nakutehunawu adi muchipwepu. 18 Kuhiñahu, muntu wakadi majilu+ wakanona hisopi*+ nakuyitumpika mumenji nakuyisampwila kwitenti, hayipwepu yejima, hadi antu* adiñahu nihadi muntu wakwatili ifwaha hela wakwatili muntu ajahiliwu hela chibimbi hela hejamu. 19 Muntu wakadi majilu wakayisampwila hadi muntu wamajilu hefuku damuchisatu nihefuku damu 7, nawa wakamutookesha kunshidi hefuku damu 7.+ Kufumahu, akakosi yakuvwala yindi nikuwela mumenji, nawa namelela wakekala wakadi majilu.

20 “‘Ilaña muntu wamajilu nawa wakabula kuditookesha, muntu yenowu akamujahi nakumufumisha* mukachi kachipompelu,+ muloña najiloli iluña daYehova dajila. Hiyamusampwila menji akutookesha nachuku, dichi wukweti majilu.

21 “‘Ilu hilushimbi lwawu lwahaya nyaaka lwakalondelañawu: Muntu wunakusampula menji akutookesha nachu+ watela kukosa yakuvwala yindi, nawa muntu wunakwati mumenji akutookesha nachu wukekalaña wamajilu kushika nimelela. 22 Chuma chejima kwakakwata muntu wamajilu, chakekala chamajilu, nawa muntu wakakwata kuchumochu, niyena wakekala wamajilu kushika nimelela.’”+

20 Mukakweji katachi, izaza dawaIsarela dejima denjili mwisaña daZini, nawa antu atachikili kushakama kuKadeshi.+ Kunidi iluña dikwafwililiyi Miriyamu+ nawa dikwamujiikiliwu.

2 Ilaña hikwadiña menji akunwa izazaku,+ dichi adipompesheli hamu nakuyitoobela aMosi naAroni. 3 Antu amubobwesheleña Mosi+ nakuhosha nawu: “Chiña twafwili hohu hafwiliwu amanakwetu kumesu aYehova! 4 Muloñadi chimunaleteli chipompelu chaYehova mudinu isaña kulonda etu niyimuna yetu tufwili munu?+ 5 Nawa muloñadi chimunatufumishili muEjipitu nakutuleta mudinu isaña datama ñana?+ Adinu hiiluña dambutu, yikuyu, nyivinyu nimapomegiranatiku,* nawa mwosi menji akunwa.”+ 6 Kuhiñahu, aMosi naAroni afumini hakachi kachipompelu nakuya kuwiñililu wakwitenti dakubulakena nawa adibukili chamesu heseki, dichi kulema kwaYehova kwamwekeni kudi wena.+

7 Kufumahu, Yehova wamulejeli Mosi nindi: 8 “Nonaku mbwechi, wupompeshi izaza hamu nineyi nimanakweyi Aroni, muleji ilola iku anakutalaku nenu diidishi menji adu, eyi wukuyiidishila menji mwilola nawa winki izaza niyimuna yawu kulonda anwi.”+

9 Dichi Mosi wanoneli mbwechi yadiña kumesu aYehova,+ neyi chamulejeliyi. 10 Kuhiñahu, aMosi naAroni atambikili chipompelu kwinza kumbidi yelola, nawa ayilili nawu: “Tiyenu, enu akakudikaña! Mukukeña tuyiidishili menji munidi ilola?”+ 11 Hohenohu Mosi wanyamwini chikasa chindi kwiwulu nakweta mwilola kapampa kayedi nambwechi yindi, dichi menji amavulu nankashi edikili nawa izaza niyimuna yawu atachikili kunwa menji.+

12 Chimwahitili mpinji, Yehova wayilejeli aMosi naAroni nindi: “Chineli himwankuhwelela nikunjilika hamesu awantu jaIsarelaku, himwakatwala ichi chipompelu mwituña dinakayinkaku.”+ 13 Awa diwu menji akuMeriba*+ kwabobweleliwu aIsarela naYehova, nawa wadijilikili yomweni hakachi kawu.

14 Kufumahu, Mosi watemesheli antemesha kufuma kuKadeshi nakuya kudi mwanta wakuEdomi+ nakumuleja nindi: “Manakweyi Isarela+ nahoshi nindi, ‘Weluka chikupu kukala kwejima kutunahitimu. 15 Ankakulula jetu ayili kuEjipitu,+ twashakamini yaaka yayivulu*+ muEjipitu nawa aEjipitu atukabishileña hamu nawankakulula jetu.+ 16 Nkumininaku, twamudililili Yehova,+ watutiyili nawa watemesheli kañelu+ nakutufumisha muEjipitu, yetu anu muKadeshi, musumba wudi kuñinza yeluña deyi. 17 Mwani twiiteji tuhiti mwituña deyi. Tukuhitila mwiha hela mwitempa danyivinyu wanyi, nawa hitukunwa menji amwishima didi dejimaku. Tukuhitila muMukwakwa waMwanta chakadi kubalumukila kuchidiilu hela kuchimunswa sampu tunahiti mwiluña deyi.’”+

18 Hela chochu, Edomi wamulejeli nindi: “Wukuhitila mwiluña detu wanyi. Neyi wukuhitilamu, nukwinza nampoku yakabali nakukukinkilila.” 19 Ilaña aIsarela amulejeli nawu: “Tukuhitila mumukwakwa weneni, nawa neyi etu niyimuna yetu tukunwa menji eyi, tukufweta.+ Kwosi chuma chikwawu chitunakukeñaku, chiña kuhita+ hohu.” 20 Hohamu wamulejeli nindi: “Wukuhitilamu wanyi.”+ Hohenohu Edomi wenjili nakumubulakana nawantu amavulu niamashidika añovu.* 21 Dichi Edomi wakaanini kumwiteja Isarela kuhitila mwiluña dindi; muloña wachumichi, Isarela wabalumukili nakufuma kudi yena.+

22 Antu jaIsarela, dikwila nawu izaza dawaIsarela dejima danyamukili nakufuma kuKadeshi nawa dashikili kuMpidi yaHori.+ 23 Kufumahu, Yehova wahosheli naMosi niAroni kuMpidi yaHori kwakwihi nañinza yetuña daEdomi nindi: 24 “Aroni akumujiika neyi chajiikiliwu ankakulula jindi.*+ Hakeñila mwituña dinakayinka aIsarelaku, muloña wejima wenu ayedi mwadikañili nanshimbi jami kutalisha kumenji akuMeriba.+ 25 Sendaku Aroni nimwanindi weyala Eleyazari wuyikandamishi hanu haMpidi yaHori. 26 Wumuvuuli Aroni yakuvwala+ yindi nawa wumuvwiki mwanindi weyala Eleyazari+ oyu yakuvwala. Aroni wukufwila kwenoku.”*

27 Mosi welili kwesekeja nachamulejeliwu kudi Yehova, dichi akandamini haMpidi yaHori iku izaza dejima dinakutalaku. 28 Kuhiñahu, Mosi wamuvuulili Aroni yakuvwala yindi nakumuvwikayu Eleyazari mwanindi weyala. Hanyima yachumichi, Aroni wafwilili kwenoku hewulu dampidi.+ Nawa Mosi niEleyazari asulukili hampidi. 29 Izaza dejima chidatiyili nawu Aroni nafwi, itala dejima daIsarela damudilili Aroni hadi mafuku 30.+

21 Mwanta wakuAradi+ mwini Kenani, washakamineña muNegebi, chelili atiyi nindi Isarela nakwinza munjila yaAtarimi, wayili nakumulukuka Isarela nawa wasendelihu antu amakwawu nakuyitwala muwunkoli. 2 Dichi Isarela wasanyikili kudi Yehova nindi: “Neyi wukuyihana awa antu muchikasa chami, chakadi nikujina, nakajilumuna nyisumba yawu.” 3 Hohenohu Yehova watiyilili mwizu daIsarela nakuhana aKenani kudi wena, nawa ayijilumwini hamu ninyisumba yawu. Dichi, idi iluña adituumbili nawu Horima.*+

4 Chiyatwalekelihu nalwendu lwawu lwakufuma kuMpidi yaHori,+ ahitilili njila yaya kuKaluñalwiji Kachinana kulonda anyeñumuki ituña daEdomi,+ antu azeyeli* nankashi muloña walwendu. 5 Nawa antu atwalekelihu kumutoobela Nzambi niMosi+ nawu: “Munatufumishilidi muEjipitu nakutuleta kulonda tufwili mwisaña? Mwosi yakuda nimenji,+ nawa etu tunasekeshi* iyi yakuda yatama.”*+ 6 Dichi Yehova watemesheli tupela twawulembi* hakachi kawantu, nawa twatwalekelihu kusuma antu, chakwila aIsarela amavulu afwili.+

7 Kuhiñahu, antu enjili kudi Mosi nakumwila nawu: “Tunavulumuni chitunamutoobeli Yehova nineyi.+ Tulombeliku kudi Yehova kulonda afumishi itu tupela kudi etu.” Nawa Mosi wayilombeleliku antu.+ 8 Kufumahu, Yehova wamulejeli Mosi nindi: “Chilaku chifwikija chakapela kawulembi* nakukisha kuchishimi. Neyi muntu anamusumi, watela kukitala kulonda abuli kufwa.” 9 Hohenohu, Mosi wachilili kapela kawuneñu+ nawa wakishili kuchishimi,+ dichi elileña neyi muntu anamusumi kudi kapela nawa akitala oku kapela kawuneñu, wahandileña.+

10 Hanyima yachumichi, aIsarela afumini kwenoku nakuteekela muOboti.+ 11 Kuhiñahu, anyamukili kufuma kuOboti nakuteekela kuIye Abarimi,+ mwisaña datalañana naMowabi, kukabadi kakumusela. 12 Anyamukili kufuma kwenoku nakuteekela kuChinekineki* chaZeredi.+ 13 Anyamukili kufuma kwenoku nakuteekela mwiluña daArinoni,+ dekala mwisaña dashika kuñinza yawaAmori, muloña Arinoni hiñinza yaMowabi, yaambula Mowabi nawaAmori. 14 Dichaletesha mukanda waNjita jaYehova kuhosha nawu “Vahebi muSufa niyinekineki* yaArinoni, 15 nimukandu wayinekineki,* washika kumukala waAri nawa wanuñañana nañinza yaMowabi.”

16 Kufumahu, ayili kuBeyeri. Idi didu ishima kwamulejeleliwu Mosi kudi Yehova nindi: “Yipompeshi antu kulonda niyinki menji.”

17 Haniyi mpinji, Isarela wembili aka kamina nindi:

“Eyi ishima, sefukaku! Dimbilenu ishima!

Kuhiñahu, afumini mwisaña nakuya kuMatana, 19 kufuma kuMatana ayili kuNahaliyeli, nawa kufuma kuNahaliyeli ayili kuBamoti.+ 20 Afumini kuBamoti nakuya kuchinekineki chekala mwiluña daMowabi,*+ hewulu daPisiga,+ yatalisha kuYeshimoni.*+

21 Isarela watemesheli antemesha kudi Sihoni, mwanta wawaAmori, nakumwila nindi:+ 22 “Twiiteji tuhiti mwituña deyi. Tukusenuka munjila nakuya mwiha hela mwitempa danyivinyu wanyi. Hitukunwa menji amwishima didi dejimaku. Tukuhitila muMukwakwa waMwanta, sampu tunahiti mwiluña deyi.”+ 23 Hela chochu, Sihoni wamwitejeli wanyi Isarela kuhitila mwiluña dindi. Ilaña, Sihoni wapompesheli antu jindi ejima nakuya nakumulukuka Isarela mwisaña nawa washikili kuYahazi nakutachika kuzuña naIsarela.+ 24 Ilaña Isarela wamushindili nampoku yakabali+ nawa wamutambwili ituña dindi+ kutachikila kuArinoni+ nakushika kuYaboki,+ kwakwihi nawaAmoni, muloña Yazeri+ yadikumashana neluña dawaAmoni.+

25 Dichi Isarela watambwili iyi nyisumba yejima, nawa atachikili kushakama munyisumba yawaAmori,+ muHeshiboni nimumatawuni* ejima anyeñumukiliku. 26 Muloña Heshiboni wadiña musumba waSihoni, mwanta wawaAmori, owu wazuñili namwanta wakuMowabi nakumutambula ituña dindi dejima kushika nikuArinoni. 27 Ichi dichaletesheli kwiikali ichi chishimu chakusupisha chakwila nawu:

“Twayenu kuHeshiboni.

Musumba waSihoni awutuñi nawa awukoleshi chikupu.

28 Muloña kesi kafuma kuHeshiboni, muzuzu wafuma kutawuni* yaSihoni.

Kanochi Ari wakuMowabi, anyanta ayinañaña yaArinoni.

29 Oyihuñu yiwukumona eyi Mowabi! Enu antu jaKemoshi,+ akuyijilumuna!

Waleteshaña anyanindi awamayala kwikala matunduka nianyanindi awambanda kwikala ankoli jaSihoni, mwanta wawaAmori.

31 Dichi Isarela watachikili kushakama mwituña dawaAmori. 32 Kuhiñahu, Mosi watemesheli amayala amakwawu kuya nakwendesha Yazeri.+ Atambwili matawuni* anyeñumukili Yazeri nawa aAmori ashakamineñamu ayitemwinimu. 33 Hanyima yachumichi, abalumukili nakuya njila yaya kuBashani. Nawa mwanta Ogi+ wakuBashani wenjili hamu nawantu jindi ejima nakuyibulakana kulonda azuñi nawu njita muEdireyi.+ 34 Yehova wamulejeli Mosi nindi: “Bayi wumutiya womaku,+ muloña yena niantu jindi ejima, kushilahu niituña dindi nukuyihana muchikasa cheyi,+ nawa wukumwila neyi chiwamwilili Sihoni mwanta wawaAmori, washakamineña muHeshiboni.”+ 35 Dichi amujahili hamu nawanyanindi awamayala niantu jindi ejima, sampu nichayijilumwiniwu antu jindi ejima,+ nawa atambwili ituña dindi.+

22 Kuhiñahu, aIsarela anyamukili nawa ateekeleli muyana yachinkalampata yamuMowabi muYodani mwishinadi daYeriku.+ 2 Dichi Balaki+ mwana kaZipori wamweni yuma yejima yayikoñeliwu aAmori kudi Isarela, 3 nawa Mowabi wayitiyili awa antu woma nankashi muloña adiña amavulu chikupu. Chalala, Mowabi wafwili mutentu muloña wawaIsarela.+ 4 Dichi Mowabi wayilejeli akulumpi amuMidiyani+ nindi: “Ichi dinu, ichi chipompelu chikuda yuma yejima yatunyeñumuka neyi chadañayi ñombi wachizamba matahu mwisaña.”

Balaki mwana kaZipori diyi wadiña mwanta haniyi mpinji. 5 Watemesheli antemesha kudi Balami mwana kaBeyori kuPetori+ kwakwihi naKaloña,* mwituña dawu. Wamutambikili nakumwila nindi: “Tiyaña! Kudi antu anenzi kufuma kuEjipitu. Anataandi mwahita iseki+ dejima* nawa anakushakama kumbidi yami. 6 Dichi mwani, inzaku wunshiñiliku+ awa antu muloña adi nañovu nankashi kubadika ami. Hadaha nukuyimika mushindu nakuyipalañesha mwituña, muloña neluka chikupu nami muntu iwukukiswila, wakiswilewa nawa muntu iwukushiña, washiñewa.”

7 Kufumahu, akulumpi akuMowabi niakulumpi akuMidiyani ayili kudi Balami+ iku anasendi mali mumakasa akuhoñesha nachu nawa amulejelimu mazu ahosheliyi Balaki. 8 Hohenohu Balami wayilejeli nindi: “Kaamenu kunu, nakayileja izu didi dejima dikunlejayi Yehova.” Dichi atulamba akuMowabi ashakamini naBalami.

9 Kuhiñahu, Nzambi wenjili kudi Balami nakumwihula nindi:+ “Indi awa amayala iwudi nawu hiyanyi?” 10 Balami wamwakwili Nzambi walala nindi: “Balaki mwana kaZipori, mwanta wakuMowabi, nantemesheli awa mazu nindi, 11 ‘Tiyaña! Antu anakwinza kufuma kuEjipitu anataandi mwahita iseki dejima.* Inzaku wunshiñiliku awa antu muloña adi nañovu nankashi kumbadika.+ Hadaha nukutwesha kuyimika mushindu nakuyipalañesha mwituña.’” 12 Ilaña Nzambi wamulejeli Balami nindi: “Bayi wuya hamu nawuku. Bayi wuyishiña awa antuku, muloña hiyantu akiswilewa.”+

13 Balami wahindukili ntetemena nakuyileja atulamba twaBalaki nindi: “Funtenu kwituña denu, muloña Yehova nankaanishi kuya hamu nanenu.” 14 Dichi atulamba akuMowabi anyamukili nakufunta kudi Balaki nawa amulejeli nawu: “Balami nakaani kwinza hamu nanetu.”

15 Hela chochu, Balaki watemesheliku cheñi atulamba amavulu nankashi nawa alema kubadika adiña mwizanvu datachi. 16 Ayili kudi Balami nakumuleja nawu: “Awa diwu mazu anahoshiyi Balaki mwana kaZipori nindi, ‘Mwani bayi witeja chuma chidi chejima chikukañeshi kwinza kudi amiku, 17 muloña nukukulemesha nankashi nawa nukwila chuma chejima chiwukunleja neyi niili. Dichi mwani, inzaku wunshiñiliku awa antu.’” 18 Ilaña Balami wayakwili ambuña aBalaki nindi: “Hela neyi Balaki wadi kunyinka itala dindi denzala to-o nasiliva niwuru, hinadi kutwesha kukoña chuma chidi chejima hela chanyanya hela cheneni+ chakubadika hanshimbi jaYehova Nzambi yamiku. 19 Hela chochu, mwani ninenu nawa kaamenu kunu, kulonda niiluki chuma chikwawu chikunlejayi Yehova.”+

20 Kufumahu, Nzambi wenjili kudi Balami nawufuku nawa wamulejeli nindi: “Neyi awa amayala anenzi nakukutambika, yaña hamu nawu. Ilaña wakahosha hohu mazu inakakuleja nami hoshaku.”+ 21 Dichi Balami wahindukili ntetemena nakusha chakushakamahu hachimbuulu chindi* nawa wayili hamu nawatulamba amuMowabi.+

22 Ilaña Nzambi wahilili muloña Balami wetejeli kuya, nawa kañelu kaYehova wemeni munjila kulonda amukañeshi. Dichi Balami wendeleleña hachimbuulu chindi, nawa anhembi jindi ayedi adiña hamu nayena. 23 Nawa chimbuulu chamweniyi kañelu kaYehova nemani munjila iku nakwati mpoku yakabali muchikasa chindi, chimbuulu wasenukili munjila nakuya mwisaña. Ilaña Balami watachikili kumweta chimbuulu kulonda afunti munjila. 24 Kuhiñahu, kañelu kaYehova wemeni munjila yanyanya yadiña hakachi kamatempa ayedi anyivinyu, helili iku mbañu jamalola, iku mbañu jamalola. 25 Chimbuulu chamweniyi kañelu kaYehova, watachikili kudishintakeshela kumbañu nawa washintakesheleli mwendu waBalami kumbañu. Balami watachikili cheñi kumweta chimbuulu.

26 Kañelu kaYehova wayili cheñi kumbidi nawa wemeni hanyiñana hakadi hakubalumukila nakuya kuchidiilu hela kuchimunswa. 27 Chimbuulu chamweniyi kañelu kaYehova, wafukamini heseki, dichi Balami wahilili nankashi nawa watwalekelihu kumweta chimbuulu nakabama kindi. 28 Nkumininaku, Yehova wamuletesheli chimbuulu kuhosha*+ nakumwihula Balami nindi: “Chumanyi chinnakwili mwaka wuñeti aka kapampa kasatu?”+ 29 Balami wamwakwili chimbuulu nindi: “Muloña wunansupishi. Neyi nadiña nampoku yakabali muchikasa chami, mutenowu nakujaha dehi!” 30 Dichi chimbuulu wamwihwili Balami nindi: “Komana hiyami chimbuulu cheyi hiwendelaña muchihandilu cheyi chejima kushika nikuleluku? Nakukoñahu dehi chuma chamuchidiwu?” Yena wamwakwili nindi: “Inehi!” 31 Kuhiñahu, Yehova watonesheli mesu+ aBalami, nawa wamweni kañelu kaYehova nemani munjila iku nakwati mpoku yakabali muchikasa chindi yakuhola dehi. Hohenohu wabandamini nakudifukula.

32 Kufumahu, kañelu kaYehova wamwilili nindi: “Muloñadi chiwuneteli chimbuulu cheyi aka kapampa kasatu? Tiyaña! Yami nenza nakukukañesha, muloña lwendu lweyi lunambukilimu nankeñelu yami.+ 33 Chimbuulu wammona nawa wakeñaña kuntemuka aka kapampa kasatu.+ Neyi chimbuulu wabulaña kusenuka munjila nakuntemuka! Mutenowu nakujaha dehi nakuhandishaku chimbuulu.” 34 Balami wamulejeli kañelu kaYehova nindi: “Navulumuni, muloña hineluka nami yeyi wemanaña munjila kulonda wumbulakaniku. Dichi neyi wunamoni neyi ichi chuma chatama, nukufuntamu.” 35 Ilaña kañelu kaYehova wamulejeli Balami nindi: “Yaña hamu nanawa amayala, ilaña wakahosha hohu mazu inakakuleja nami hoshaku.” Dichi Balami watwalekelihu kuya hamu nawatulamba aBalaki.

36 Balaki chatiyiliyi nindi Balami nenzi, hohenohu wayili nakumukinkilila kumusumba waMowabi wekala kuchikumu chaArinoni, kuñinza yeluña daMowabi. 37 Balaki wamwihwili Balami nindi: “Komana hinatemesheli antu nakukutambikaku? Muloñadi chiwabulilili kwinza kudi ami? Watoñojokeleña neyi ami hinukutwesha kukulemesha chikupuku, tahindi?”+ 38 Balami wamwakwili Balaki nindi: “Ichi nenzi dehi kudi eyi. Hela chochu, wukuñiteja kuhoshahu mazu adi ejima? Neyi wukuñiteja, nukuhosha hohu mazu akunlejayi+ Nzambi.”

39 Dichi Balami wayili hamu naBalaki, nawa ashikili kuKiriyati Huzoti. 40 Balaki walambwili añombi nianyikoku nawa wamutemeshelelihu yimuna yimu Balami niatulamba adiñayi nawu. 41 Nantetemena, Balaki wamukandwishili Balami nakumutwala kuBamoti Bayali, kulonda atweshi kumona antu ejima.+

23 Kufumahu, Balami wamulejeli Balaki nindi: “Tuñaku tumeña+ 7 hadinu iluña, nawa wunloñesheli añombi ayizamba 7 nianyikoku ayizamba 7.” 2 Hohenohu Balaki welili kwesekeja nachahosheliyi Balami. Dichi aBalaki naBalami alambwili ñombi wachizamba hamu namukoku wachizamba hakameña-hikameña.+ 3 Kuhiñahu, Balami wamulejeli Balaki nindi: “Shalaku hanu hadi mulambu weyi wakushita, ami nayi. Hadaha Yehova wukuhosha nanami. Yuma yejima yikunlejayi, nukukulejayu nineyi.” Dichi wakandamini hewulu dakapidi.

4 Kufumahu, Nzambi wahosheli naBalami,+ Balami wamulejeli Nzambi nindi: “Natuña tumeña 7 munyisululu, nawa nalambula ñombi wachizamba hamu namukoku wachizamba hakameña-hikameña.” 5 Yehova wamulejeli Balami+ awa mazu nindi: “Funtaku kudi Balaki, nawa awa diwu mazu iwukuhosha.” 6 Dichi wafuntili nawa wamuwanini Balaki niatulamba ejima amuMowabi anemani kumulambu windi wakushita. 7 Kuhiñahu, Balami watili ichi chishimu nindi:+

‘Twaya wunshiñiliku Yakoba.

Twaya wumuteni kutama Isarela.’+

 8 Nukushiña ñahi antu anabuli kushiñayi Nzambi?

Nawa nukutena ñahi kutama antu anabuli kutenayi Yehova kutama?+

11 Kuhiñahu, Balaki wamwihwili Balami nindi: “Wunankoñelidi chuma chamuchidiwu? Nakuleta kulonda wunshiñiliku ayilumbu jami, ilaña eyi wunayikiswili.”+ 12 Yena wamwakwili nindi: “Komana hinatela hohu kuhosha mazu ananlejiyi+ Yehovaku?”

13 Balaki wamulejeli nindi: “Mwani tuyi hamu kwiluña dikwawu kuwunateli kuyimwena awa antu. Wukuyimona ejima wanyi, ilaña wukumonaku hohu antesha. Wunshiñiliwu kwenoku.”+ 14 Dichi wamutwalili mwisaña daZofimi hewulu daPisiga,+ watuñili tumeña 7 nawa walambwili ñombi wachizamba hamu namukoku wachizamba hakameña-hikameña.+ 15 Kufumahu, Balami wamulejeli Balaki nindi: “Shalaku hanu hadi mulambu weyi wakushita hinnakuya kuna nakuhosha naYena.” 16 Nawa Yehova wamulejeli+ Balami nindi: “Funtaku kudi Balaki, nawa awa diwu mazu iwukuhosha.” 17 Dichi wafuntili kudi yena nawa wamuwanini nakuhembelela kumulambu windi wakushita, nawa wadiña hamu nawatulamba akuMowabi. Balaki wamwihwili nindi: “Yehova nahoshi nindidi?” 18 Kuhiñahu, Balami watili ichi chishimu nindi:+

“Eyi Balaki, imanaku nawa tiyililaku.

Ntiyilili, Eyi mwana kaZipori.

Neyi ahosha chuma, hakachikoñaku?

Neyi ahosha, hakelamuku?+

22 Nzambi nakuyifumisha muEjipitu.+

Kudi wena wudi neyi nseñu jeboñu dañombi.*+

Haniyi mpinji antu anateli kuhosha hadi Yakoba niIsarela nawu:

‘Talenu yuma yinakoñiyi Nzambi!’

25 Balaki wamwilili Balami nindi: “Neyi wukutwesha wanyi kumushiña, komana nikumukiswila bayi wumukiswilaku.” 26 Balami wamulejeli Balaki nindi: “Nakuleja wanyi nami, ‘Nukwila yuma yejima yikuhoshayi Yehova’?”+

27 Balaki wamulejeli Balami nindi: “Mwani twaya nukutwali cheñi kwiluña dikwawu. Hadaha chikumutiyisha Nzambi walala kuwaha kulonda wunshiñiliku iwu muntu kwenoku.”+ 28 Dichi Balaki wamutwalili Balami hewulu daPeyori, yatalisha kuYeshimoni.*+ 29 Kufumahu, Balami wamulejeli Balaki nindi: “Tuñaku tumeña 7 hadinu iluña, nawa wunloñesheli añombi ayizamba 7 nianyikoku ayizamba 7.”+ 30 Dichi Balaki welili kwesekeja nachahosheliyi Balami, nawa walambwili ñombi wachizamba hamu namukoku wachizamba hakameña-hikameña.

24 Balami chamweniyi nindi chinamutiyishi Yehova kuwaha kumukiswila Isarela, hayili cheñi nakukeñakeña ñombu jaletaña kukalaku,+ ilaña wabalumukili nakutalisha mwisaña. 2 Balami chafumbwiliyi mesu indi wamweni Isarela nateeki kwesekeja nanyichidi yindi,+ spiritu yaNzambi yenjili hadi Balami.+ 3 Kufumahu, watili ichi chishimu nindi:+

10 Kuhiñahu, Balaki wamuhililili Balami nankashi. Balaki wasakilili mumakasa indi nakusupisha nawa wamwilili Balami nindi: “Nakutambikili kulonda wunshiñili ayilumbu jami,+ ilaña eyi wunayikiswili aka kapampa kasatu. 11 Dichi yaña kwenu chochichi. Nafwilaña kukulemesha nankashi,+ ilaña talaña, Yehova nakukañeshi kutambwila iku kulema.”

12 Balami wamwilili Balaki nindi: “Komana nayilejeli wanyi antemesha iwatemesheli nami, 13 ‘Hela neyi Balaki wadi kunyinka itala dindi denzala to-o nasiliva niwuru, hinadi kutwesha kukoña chuma chidi chejima chinnakukeña* hela chachiwahi hela chatama chakubadika hanshimbi jaYehovaku? Nayilejeli cheñi wanyi nami nakahosha hohu mazu akanlejayi Yehova’?+ 14 Nawa ichi dinu hinukuya kudi antu jami. Twaya nukuleji chuma chakayilawu antu jeyi kumbidi* kudi awa antu.” 15 Dichi watili ichi chishimu nindi:+

20 Chamumweniyi Amaleki, watwalekelihu nachishimu chindi nindi:

21 Chamweniyi aKeni,+ watwalekelihu nachishimu chindi nindi:

“Iluña muwashakamaña dakiñewa, nawa washakamaña mwilola.

22 Ilaña kwakekala muntu wakwocha Kayini.

Hanu mpinjinyi yikuhitahu hakwila Asiriya akutwali muwunkoli?”

23 Nawa watwalekelihu nachishimu chindi nindi:

“Yayo-o! Hinyi wakapuluka hakakoñayi Nzambi chumichi?

Ilaña niyena akamujilumuna chikupu.”

25 Kuhiñahu, Balami+ wanyamukili nakufunta kumukala wawu. Balaki niyena wayili kwindi.

25 Isarela chashakamineñayi muShitimi,+ aIsarela amakwawu atachikili kwila wuvumbi nawanyana awambanda amuMowabi.+ 2 Awa ambanda atambikili aIsarela kuya nawu hamu kwalambwilileñawu kudi anzambi jawu+ nyilambu, nawa antu atachikili kuda nikudibuka kudi anzambi jawu.+ 3 Dichi Isarela watachikili* kudifukula nawu hamu kudi Bayali wakuPeyori,+ nawa Yehova wamuhililili nankashi Isarela. 4 Yehova wamulejeli Mosi nindi: “Sendaku anlomboli* ejima anakulombola awa antu wuyikudiki kumesu aYehova namwaana wetenda,* kulonda kuzuwa kwaYehova kufumi hadi Isarela.” 5 Kuhiñahu, Mosi walejeli ansompeshi awaIsarela nindi:+ “Wejima wenu muntu-himuntu watela kujaha antu jindi anatachiki* kudifukula kudi Bayali wakuPeyori.”+

6 Ilaña hayoyeniyi mpinji yachidiña nakudililawu kuwiñililu wakwitenti dakubulakena, kaIsarela wumu waleteli mumbanda wakuMidiyani+ kwakwihi nawamanakwindi iku Mosi niizaza dawaIsarela dejima anakutalaku. 7 Finihasi+ mwana kaEleyazari, mwana kakapristu Aroni, chamweniyi chumichi, hohenohu wanyamukili nakufuma hakachi kezaza dawantu nakusenda iyoña muchikasa chindi. 8 Kuhiñahu, wamulondeleli owu iyala kaIsarela mwitenti nawa wayasili wejima wawu ayedi nzwa-a, waasili iyala kaIsarela nimumbanda wamwasili kuyiidi yindi yalusemu. Hohenohu chipupu chenjili hadi aIsarela chalekeli.+ 9 Antu afwili kunichi chipupu adiña 24,000.+

10 Kufumahu, Yehova wamulejeli Mosi nindi: 11 “Finihasi+ mwana kaEleyazari, mwana kakapristu Aroni, nafumishi kuzuwa kwami hadi antu jaIsarela muloña neteji wanyi antu kumwekesha yilwilu yakubula kwikala ashinshika kudi ami hakachi kawu.+ Dichi hinnayijilumuni aIsarelaku, hela chakwila nakeñaña antu kudifukula kudi ami hohu.+ 12 Hela chochu, wumuleji neyi, ‘Inakutiyañana nindi chitiyañenu chakuwunda. 13 Nawa chikwikalaña chitiyañenu chahaya nyaaka chamudimu wawupristu kudi yena nianyanindi akavwalika hambidi yindi,+ muloña weteja wanyi antu kumwekesha yilwilu yakubula kwikala ashinshika kudi ami Nzambi yindi,+ nawa wayibutila antu jaIsarela hanshidi jawu.’”

14 Nawa iyala kaIsarela ajahililiwu hamu namumbanda wakuMidiyani, ijina dindi wadiña Zimiri mwana kaSalu, nlomboli wachisaka chakukatata yawaSimiyoni. 15 Mumbanda wakuMidiyani ajahiliwu, ijina dindi wadiña Kozibi mwana kaZuri;+ wadiña nlomboli wanyitaña yachisaka chakukatata yindi muMidiyani.+

16 Kuhiñahu, Yehova wamulejeli Mosi nindi: 17 “Yikabishi aMidiyani nawa wuyijahi,+ 18 muloña anayikabishi enu nayilwilu yawu yakudimbana yakoñeliwu kudi enu munjila yakudimbana kutalisha hadi Peyori+ nimuloña wachuma chakoñeliyi Kozibi mwana kamwanta wamuMidiyani, muhelawu ajahiliwu+ hefuku denjili chipupu muloña wachuma chamwekeni kutalisha hadi Peyori.”+

26 Chelili chipupu+ chinahiti dehi, Yehova walejeli aMosi naEleyazari mwana kakapristu Aroni nindi: 2 “Chindenu izaza dawaIsarela dejima kutachikila hadi adi nayaaka 20 kuya hewulu kwesekeja nanyitaña yawu, muchindi ejima anateli kukalakala mudimu wawushidika muIsarela.”+ 3 Dichi aMosi nakapristu Eleyazari+ alejeli antu muyana yachinkalampata yamuMowabi+ kuYeriku+ kwakwihi naYodani, nawu: 4 “Chindenu ejima kutachikila hadi adi nayaaka 20 nakuya hewulu, neyi chamulejeliwu Mosi+ kudi Yehova.”

Dichi anyana kaIsarela awamayala afumini mwituña daEjipitu adiña: 5 Rubeni,+ mwana kaIsarela wawedi; anyana kaRubeni awamayala+ adiña: Hanoki, mwafumini chisaka chawaHanoki; Palu, mwafumini chisaka chawaPalu; 6 Hezironi, mwafumini chisaka chawaHezironi; Karimi, mwafumini chisaka chawaKarimi. 7 Iyi diyadiña yisaka yawaRubeni, nawa antu jawu asonekeliwu adiña 43,730.+

8 Mwana kaPalu wadiña Eliyabi. 9 Nawa anyana kaEliyabi awamayala adiña Nemweli, Datani niAbirami. Awa aDatani naAbirami adiña atondewa hakachi kezaza dawantu owu adikañili naMosi+ niAroni hamu nezanvu daKora+ hadikañiliwu naYehova.+

10 Dichi iseki denzunukili* nakuyiminya. Hakwila Kora, wafwilili hamu nawantu amuhakwilileñaku hocheli kesi amayala 250.+ Nawa ekalili chuma chakutusoñamishaku.+ 11 Hela chochu, anyana kaKora awamayala hiyafwiliku.+

12 Anyana kaSimiyoni+ awamayala kwesekeja nayisaka yawu adiña: Nemweli, mwafumini chisaka chawaNemweli; Yamini, mwafumini chisaka chawaYamini; Yakini, mwafumini chisaka chawaYakini; 13 Zera, mwafumini chisaka chawaZera; Shawuli, mwafumini chisaka chawaShawuli. 14 Iyi diyadiña yisaka yawaSimiyoni: adiña 22,200.+

15 Anyana kaGadi+ awamayala kwesekeja nayisaka yawu adiña: Zefoni, mwafumini chisaka chawaZefoni; Hagi, mwafumini chisaka chawaHagi; Shuni, mwafumini chisaka chawaShuni; 16 Ozini, mwafumini chisaka chawaOzini; Erayi, mwafumini chisaka chawaErayi; 17 Arodi, mwafumini chisaka chawaArodi; Areli, mwafumini chisaka chawaAreli. 18 Iyi diyadiña yisaka yawanyana kaGadi awamayala, nawa antu jawu asonekeliwu adiña 40,500.+

19 Anyana kaYuda+ awamayala adiña Eri naOnani.+ Hela chochu, Eri naOnani afwilili mwituña daKenani.+ 20 Nawa anyana kaYuda awamayala kwesekeja nayisaka yawu adiña: Shela,+ mwafumini chisaka chawaShela; Perezi,+ mwafumini chisaka chawaPerezi; Zera,+ mwafumini chisaka chawaZera. 21 Anyana kaPerezi awamayala adiña: Hezironi,+ mwafumini chisaka chawaHezironi; Hamuli,+ mwafumini chisaka chawaHamuli; 22 Iyi diyadiña yisaka yaYuda, nawa antu jawu asonekeliwu adiña 76,500.+

23 Anyana kaIsakari+ awamayala kwesekeja nayisaka yawu adiña: Tola,+ mwafumini chisaka chawaTola; Puva, mwafumini chisaka chawaPuva; 24 Yashubi, mwafumini chisaka chawaYashubi; Shimironi, mwafumini chisaka chawaShimironi. 25 Iyi diyadiña yisaka yaIsakari, nawa antu jawu asonekeliwu adiña 64,300.+

26 Anyana kaZebuluni+ awamayala kwesekeja nayisaka yawu adiña: Seredi, mwafumini chisaka chawaSeredi; Eloni, mwafumini chisaka chawaEloni; Yaheleyeli, mwafumini chisaka chawaYaheleyeli. 27 Iyi diyadiña yisaka yaweni Zebuluni, nawa antu jawu asonekeliwu adiña 60,500.+

28 Anyana kaYosefu+ awamayala kwesekeja nayisaka yawu adiña: Manasi naEfuremu.+ 29 Anyana kaManasi+ awamayala adiña: Makiri,+ mwafumini chisaka chawaMakiri; nawa Makiri wavweli Giliyadi;+ Giliyadi, mwafumini chisaka chawaGiliyadi. 30 Awa diwu adiña anyana kaGiliyadi awamayala: Iyezeri, mwafumini chisaka chawaIyezeri; Heleki, mwafumini chisaka chawaHeleki; 31 Asariyeli, mwafumini chisaka chawaAsariyeli; Shekemi, mwafumini chisaka chawaShekemi; 32 Shemida, mwafumini chisaka chawaShemida; Heferi, mwafumini chisaka chawaHeferi. 33 Zelofehadi mwana kaHeferi havwelihu anyana awamayalaku, wavweli hohu anyana awambanda.+ Majina awanyana kaZelofehadi+ awambanda adiña, Mahila, Nowa, Hogila, Milika niTiriza. 34 Iyi diyadiña yisaka yaManasi, nawa antu jawu asonekeliwu adiña 52,700.+

35 Anyana kaEfuremu+ awamayala kwesekeja nayisaka yawu adiña: Shutela,+ mwafumini chisaka chawaShutela; Bekeri, mwafumini chisaka chawaBekeri; Tahani, mwafumini chisaka chawaTahani. 36 Nawa awa diwu adiña anyana kaShutela awamayala: Erani, mwafumini chisaka chawaErani. 37 Iyi diyadiña yisaka yawanyana kaEfuremu awamayala, nawa antu jawu asonekeliwu adiña 32,500.+ Awa diwu adiña anyana kaYosefu awamayala kwesekeja nayisaka yawu.

38 Anyana kaBenjamini+ awamayala kwesekeja nayisaka yawu adiña: Bela,+ mwafumini chisaka chawaBela; Ashibeli, mwafumini chisaka chawaAshibeli; Ahirami, mwafumini chisaka chawaAhirami; 39 Shefufami, mwafumini chisaka chawaShefufami; Hufami, mwafumini chisaka chawaHufami. 40 Anyana kaBela awamayala adiña aAridi naNayamani:+ Aridi, mwafumini chisaka chawaAridi; Nayamani, mwafumini chisaka chawaNayamani. 41 Awa diwu adiña anyana kaBenjamini awamayala kwesekeja nayisaka yawu, nawa antu jawu asonekeliwu adiña 45,600.+

42 Awa diwu adiña anyana kaDani+ awamayala kwesekeja nayisaka yawu: Shuhami, mwafumini chisaka chawaShuhami. Iyi diyadiña yisaka yaDani kwesekeja nayisaka yawu. 43 Antu asonekeliwu muyisaka yejima yawakaShuhami, adiña 64,400.+

44 Anyana kaAsheri+ awamayala kwesekeja nayisaka yawu adiña: Imina, mwafumini chisaka chawaImina; Ashivi, mwafumini chisaka chawaAshivi; Beriya, mwafumini chisaka chawaBeriya; 45 anyana kaBeriya awamayala adiña: Heberi, mwafumini chisaka chawaHeberi; Malikiyeli, mwafumini chisaka chawaMalikiyeli. 46 Ijina damwana wamumbanda avweliwu kudi Asheri wadiña Sera. 47 Iyi diyadiña yisaka yawanyana kaAsheri awamayala, nawa antu jawu asonekeliwu adiña 53,400.+

48 Anyana kaNafitali+ awamayala kwesekeja nayisaka yawu adiña: Yahezeyeli, mwafumini chisaka chawaYahezeyeli; Guni, mwafumini chisaka chawaGuni; 49 Yezeri, mwafumini chisaka chawaYezeri; Shilemi, mwafumini chisaka chawaShilemi; 50 Iyi diyadiña yisaka yaNafitali kwesekeja nayisaka yawu, nawa antu jawu asonekeliwu adiña 45,400.+

51 Awa diwu aIsarela asonekeliwu, ejima hamu adiña: 601,730.+

52 Hanyima yayumiyi, Yehova wamulejeli Mosi nindi: 53 “Ituña wudanzañani hakachi kanawa antu diikali wuswana wawu kwesekeja nandandanda yamajina.*+ 54 Mazanvu adi nawantu amavulu, watela kuyinka wuswana weneni, nawa mazanvu adi nawantu antesha, watela kuyinka wuswana+ wanyanya. Izanvu-hiizanvu, watela kudinka wuswana wadu kwesekeja nakuvula kwawantu anasonekiwu. 55 Hela chochu, ituña atela kudanzañana kuzatisha chinjikijilu.+ Atela kutambwila wuswana wawu kwesekeja namajina anyichidi yawankakulula jawu. 56 Wuswana-hiwuswana akuwusakula kuzatisha chinjikijilu nakuwuhana kudi mazanvu adi nawantu amavulu nimazanvu adi nawantu antesha.”

57 Awa diwu antu asonekeliwu hadi aLevi+ kwesekeja nayisaka yawu: Geshoni, mwafumini chisaka chawaGeshoni; Kohati,+ mwafumini chisaka chawaKohati; Merari, mwafumini chisaka chawaMerari. 58 Iyi diyadiña yisaka yawaLevi: chisaka chawaLibini,+ chisaka chawaHebironi,+ chisaka chawaMahili,+ chisaka chawaMushi,+ chisaka chawaKohati.+

Kohati wavweli Amuramu.+ 59 Nawa ijina dañoda Amuramu wadiña Yokebedi,+ mwana kaLevi wamumbanda, owu amuvweleleliwu Levi kudi ñodindi muEjipitu. Nawa Yokebedi naAmuramu avweli Aroni, Mosi nimuhelawu Miriyamu.+ 60 Dichi Aroni wavweli Nadabi, Abihu, Eleyazari niItamari.+ 61 Ilaña aNadabi naAbihu afwili muloña alambwili kudi Yehova+ kesi kabulili kuyitejawu.

62 Kuvula kwawantu ejima asonekeliwu adiña 23,000, dikwila nawu amayala ejima adiña nayaaka kutachikila adi nakakweji kamu nakuya hewulu.+ Hiyayisonekeli kufuma hakachi kawaIsarelaku,+ muloña kwosi wuswana wateleleli kuyinkawu kufuma hadi aIsarela.+

63 Awa diwu antu asonekeliwu kudi aMosi nakapristu Eleyazari hayisonekeliwu aIsarela muyana yachinkalampata yamuMowabi kuYeriku kwakwihi naYodani. 64 Ilaña hakachi kanawa antu, hadiña hosi muntu niwumu asonekeliwu kudi aMosi nakapristu Aroni hayichindileñawu aIsarela mwisaña daSinayi.+ 65 Muloña Yehova wahosheli kutalisha hadi wena nindi: “Chakadi nikujina, akafwila mwisaña.”+ Dichi kwosi muntu niwumu wahandiliku, chiña hohu Kalebu mwana kaYefuna niYoshuwa mwana kaNuni.+

27 Kuhiñahu, anyana kaZelofehadi+ awambanda, Zelofehadi mwana kaHeferi, Heferi mwana kaGiliyadi, Giliyadi mwana kaMakiri, Makiri mwana kaManasi, wakuyisaka yaManasi mwana kaYosefu, enjili. Majina awanyanindi awambanda adiña Mahila, Nowa, Hogila, Milika niTiriza. 2 Emeni kumesu aMosi, kumesu akapristu Eleyazari, kumesu awanlomboli+ nikumesu ezaza dawantu dejima kuwiñililu wakwitenti dakubulakena nakuhosha nawu: 3 “Tata yetu wafwilili mwisaña, ilaña wadibombeli wanyi hezanvu dawantu adikañili naYehova, akakumuhakwilaku Kora,+ ilaña wafwili muloña wanshidi yindi yomweni nawa havwelihu mwana weyalaku. 4 Ijina datata yetu dikujiyiladi muchisaka chindi muloña wakwila havwelihu mwana weyalaku? Twinkenu iheta hakachi kawamana kwatata yetu.” 5 Dichi Mosi watwalili muloña wawu kudi Yehova.+

6 Kufumahu, Yehova wamulejeli Mosi nindi: 7 “Anyana kaZelofehadi awambanda anahoshi mwalala. Watela kuyinka iheta hakachi kawamana kwatata yawu diikali wuswana nawa wuswana watata yawu wiikali wawu.+ 8 Nawa wuyileji aIsarela neyi, ‘Neyi iyala afwa chakadi kuvwalahu mwana weyala, wuswana windi mwatela kwinka mwanindi wamumbanda. 9 Ilaña neyi havwelihu mwana wamumbandaku, wuswana windi mwatela kwinka amanakwindi. 10 Nawa neyi wudana amanakwindi, wuswana windi mwatela kwinka amana kwatata yindi. 11 Neyi tata yindi wudana amanakwindi, wuswana windi mwatela kwinka ntaña yindi chikupu wamashi wowamu wamuchisaka chawu, nawa wakawutambula. Awa mazu awunsompeshi akwikala lushimbi kudi aIsarela, neyi chinamulejiwu Mosi kudi Yehova.’”

12 Kuhiñahu, Yehova wamulejeli Mosi nindi: “Kandamaku haniyi mpidi yaAbarimi+ kulonda wumoni ituña dinnakuyinka aIsarela.+ 13 Chiwamona odu ituña, nineyi akukujiika neyi chajiikiliwu ankakulula jeyi,*+ nawa neyi chamujiikiliwu manakweyi Aroni,+ 14 muloña hantoobeleleña izaza dawantu mwisaña daZini, eyi wadikañili nanshimbi jami nawa hiwanjilikili hamesu awu hansañu yakundamini kumenjiku.+ Awa himenji akuMeriba+ kuKadeshi+ mwisaña daZini.”+

15 Dichi Mosi wamwilili Yehova nindi: 16 “Eyi Yehova, Nzambi yaspiritu yawantu* ejima, tondelaku izaza dawantu iyala 17 wukuyilombolaña munyidimu yawu yejima, kulonda izaza daYehova dibuli kwikala neyi anyikoku akadi kabiña.” 18 Dichi Yehova wamulejeli Mosi nindi: “Sendaku Yoshuwa mwana kaNuni, iyala wukweti spiritu nawa wumunañiki chikasa cheyi.+ 19 Kuhiñahu, wumwimiki kumesu akapristu Eleyazari nikumesu ezaza dawantu dejima, nawa wumutondeli hamesu awu+ ekali nlomboli. 20 Wumwinkihu wuswa weyi wumu,*+ kulonda izaza dawaIsarela dejima dimutiyilileña.+ 21 Wukwimanaña kumesu akapristu Eleyazari, owu wukumwihwilañaku kudi Yehova kuhitila mukuzatisha Urimi+ kulonda elukeña munafuukuliyi. Neyi ayileja nindi idikenu, akwidikaña nawa neyi ayileja nindi iñilenu, akwiñilaña, dikwila nawu, yena niaIsarela ejima adiyi nawu kushilahu niizaza dawantu dejima.”

22 Dichi Mosi welili mwejima mwamulejeliwu kudi Yehova. Wamusendeli Yoshuwa nawa wamwimikili kumesu akapristu Eleyazari nikumesu ezaza dawantu dejima, 23 nawa wamunañikili makasa indi nakumutonda kwikala nlomboli+ neyi chahosheliyi Yehova kuhitila mudi Mosi.+

28 Kuhiñahu, Yehova wamulejeli Mosi nindi: 2 “Lejaku aIsarela neyi, ‘Mwanukeña kunlambula mulambu wami, dikwila nawu yakuda yami.* Nyilambu yami yakwocha hakesi yevumba dadiwahi* kudi ami, mwatela kuyilambula hampinji yayu yatoñolawu.’+

3 “Nawa wuyileji neyi, ‘Iwu diwu mulambu wakwocha hakesi wumukumulambulaña Yehova: mpinji yejima, mwakalambulaña hefuku-hefuku anyana kanyikoku ayizamba ayedi akadi ihuji achaaka chimu ekaleña amulambu wakushita.+ 4 Nantetemena, mwakalambuleña mwana kamukoku wachizamba wumu, nawa hakabwidibwidi,*+ mwakalambuleña mwana kamukoku wachizamba mukwawu, 5 mwakamulambuleña hamu nachipimu chamwikumi chaifa* chawuña wawuwahi walembuluka wakubomba namanji akusohola achipimu chamuchiwana chahini* ekali mulambu wambutu.+ 6 Himulambu wakushita+ wevumba dadiwahi* wakulambula mpinji yejima, owu wayilejeliwu kuMpidi yaSinayi kwikala mulambu wakwocha hakesi wakumulambula Yehova, 7 hamu namulambu wawu wavinyu, dikwila nawu mwana kamukoku-himukoku wachizamba,+ mwakamulambuleña hamu nachipimu chamuchiwana chahini. Mwakahuñunwineña walwa mwiluña dajila wakekali mulambu wavinyu wakumulambula Yehova. 8 Nawa hakabwidibwidi,* mwakalambuleña mwana kamukoku wachizamba mukwawu. Mwakamulambuleña hamu namulambu wambutu wowumu ninamulambu wawu wavinyu wowumu neyi chimwakalambulaña nantetemena wakekali mulambu wakwocha hakesi wevumba dadiwahi* kudi Yehova.+

9 “‘Hela chochu, hefuku daSabata,+ mwakalambuleña anyana kanyikoku ayizamba ayedi akadi ihuji achaaka chimu niyipimu yiyedi yamwikumi yaifa yawuña wawuwahi walembuluka wakubomba namanji kulonda akekaleña amulambu wambutu hamu namulambu wawu wavinyu. 10 Iwu diwu mulambu wakushita wumwakalambulaña haSabata hamu namulambu wakushita wakulambula mpinji yejima nimulambu wawu wavinyu.+

11 “‘Hakutachika kwakakweji-hikakweji,* mwakalambulaña kudi Yehova anyana kañombi ayizamba ayedi, mukoku wachizamba wumu nianyana kanyikoku ayizamba 7 achaaka chimu+ akekaleña amulambu wakushita, 12 nawa mwakalambuleña ñombi-hiñombi wachizamba hamu nayipimu yisatu yamwikumi yawuña wawuwahi walembuluka wakubomba namanji kulonda wiikali wamulambu wambutu,+ mwakalambuleña nimukoku wumu wachizamba+ hamu nayipimu yiyedi yamwikumi yawuña wawuwahi walembuluka wakubomba namanji kwikala mulambu wambutu, 13 nawa mwakalambuleña mwana kamukoku-himukoku wachizamba hamu nachipimu chamwikumi chawuña wawuwahi walembuluka wakubomba namanji wakekali wamulambu wambutu, himulambu wakushita wevumba dadiwahi,*+ wakwocha hakesi wakumulambula Yehova. 14 Ñombi wachizamba+ mwakamulambuleña hamu namulambu wawu wavinyu wachipimu chahafu* chahini, mukoku wachizamba+ niyena mwakamulambuleña hamu namulambu wawu wavinyu wachipimu chamuchisatu chahini nawa mwana kamukoku wachizamba+ mwakamulambuleña hamu namulambu wawu wavinyu wachipimu chamuchiwana chahini. Iwu diwu mulambu wakushita wumwakalambulaña hakakweji-hakakweji muchaaka chejima. 15 Cheñi, mwakalambuleña kudi Yehova mwana kampembi wumu kulonda wiikali mulambu wahanshidi kubombela hamulambu wakushita wakulambula mpinji yejima hamu namulambu wawu wavinyu.

16 “‘Mukakweji katachi, hefuku damu 14 dakakweji, dikwikalaña hiifuku daChipandakenu+ chaYehova. 17 Nawa hefuku damu 15 dakanu kakweji, hakekalaña chawija. Antu akadaña mankendi akadi iluñi hadi mafuku 7.+ 18 Hefuku datachi, kwakekalaña kupompa kweneni kwajila. Bayi mwakazata mudimu wudi wejima wakolaku. 19 Mwakalambuleña kudi Yehova anyana kañombi ayedi, mukoku wachizamba wumu nianyana kanyikoku ayizamba 7 achaaka chimu akekali mulambu wakushita wakwocha hakesi. Mwatela kulambula anyama akadi ihuji.+ 20 Nawa mwakayilambuleña hamu nanyilambu yawu yambutu yawuña wawuwahi walembuluka wakubomba namanji,+ wakekaleña yipimu yisatu yamwikumi hañombi wachizamba nawa yipimu yiyedi yamwikumi hamukoku wachizamba. 21 Mwakalambuleña chipimu chimu-chimu chamwikumi hamwana kamukoku-himukoku wachizamba hadi anyana kanyikoku ayizamba 7, 22 kushilahu nimpembi wumu wamulambu wahanshidi wakuyibutila nachu hanshidi jenu. 23 Mwakalambuleña iyi nyilambu kubombela hamulambu wakushita wumwakalambulaña nantetemena mpinji yejima, 24 Mwakalambuleña iyi nyilambu hefuku-hefuku munjila yoyimu hadi makufu 7 kulonda yakekali yakuda,* himulambu wakwocha hakesi wevumba dadiwahi* kudi Yehova. Mwakawulambuleña hamu namulambu wakushita wakulambula mpinji yejima nimulambu wawu wavinyu. 25 Hefuku damu 7, mwakekalaña nakupompa kweneni kwajila.+ Bayi mwakazata mudimu wudi wejima wakolaku.+

26 “‘Neyi himukulambula kudi Yehova+ mulambu wambutu yayiha, hefuku danyikaabu yinasambili kuha,+ mwakekalaña nakupompa kweneni kwajila kwachawija chanyilungu.+ Bayi mwakazata mudimu wudi wejima wakolaku.+ 27 Mwakalambuleña anyana kañombi ayedi ayizamba, mukoku wachizamba wumu nianyana kanyikoku ayizamba 7 achaaka chimu+ wakekali mulambu wakushita wevumba dadiwahi* kudi Yehova, 28 nawa mwakayilambuleña hamu namulambu wawu wambutu wawuña wawuwahi walembuluka wakubomba namanji, wakekaleña yipimu yisatu yamwikumi hañombi-hañombi wachizamba, yipimu yiyedi yamwikumi hamukoku wachizamba wumu, 29 nichipimu chimu-chimu chamwikumi hamwana kamukoku-himukoku wachizamba hadi anyana kanyikoku ayizamba 7, 30 kushilahu nimwana kampembi wumu wakuyibutila nachu hanshidi jenu.+ 31 Mwakayilambuleña kubombela hamulambu wakushita wakulambula mpinji yejima nimulambu wawu wambutu. Awa anyama atela kwikala akadi ihuji+ hamu ninyilambu yawu yavinyu.

29 “‘Hefuku datachi dakakweji kamu 7, mwakekaleña nakupompa kwajila. Bayi mwakazata mudimu wudi wejima wakolaku.+ Hiifuku dimwatela kuvumishilamu mpuña.+ 2 Mwakalambuleña mwana kañombi wumu wachizamba, mukoku wachizamba wumu nianyana kanyikoku ayizamba 7 achaaka chimu, ejima atela kwikala akadi ihuji amulambu wakushita wevumba dadiwahi* kudi Yehova, 3 nawa mwakayilambuleña hamu namulambu wawu wambutu wawuña wawuwahi walembuluka wakubomba namanji, wakekaleña yipimu yisatu yamwikumi yaifa hañombi wachizamba, yipimu yiyedi yamwikumi hamukoku wachizamba, 4 nichipimu chimu-chimu chamwikumi hamwana kamukoku-himukoku wachizamba hadi anyana kanyikoku 7, 5 nimwana kampembi wachizamba wumu kulonda ekali mulambu wahanshidi wakuyibutila nachu hanshidi jenu. 6 Iwu himulambu wakubombela hamulambu wakushita wahakakweji-hakakweji nimulambu wawu wambutu+ nimulambu wakushita wakulambula mpinji yejima nimulambu wawu wambutu,+ hamu nanyilambu yawu yavinyu+ kwesekeja nanshimbi jakuyilambwilamu kulonda ekali mulambu wevumba dadiwahi,* wakwocha hakesi wakumulambula Yehova.

7 “‘Hefuku damu 10 dakanu kakweji, mwakekaleña nakupompa kweneni kwajila+ nawa mwakadikabisheña enu aweni.* Bayi mwakazata mudimu wudi wejimaku.+ 8 Nawa mwakalambuleña mwana kañombi wachizamba wumu, mukoku wachizamba wumu nianyana kanyikoku ayedi ayizamba achaaka chimu, ejima atela kwikala akadi ihuji+ amulambu wakushita wevumba dadiwahi* wakumulambula Yehova. 9 Ninyilambu yawu yambutu yawuña wawuwahi walembuluka wakubomba namanji, wakekaleña yipimu yisatu yamwikumi hañombi wachizamba, yipimu yiyedi yamwikumi hamukoku wumu wachizamba, 10 chipimu chimu-chimu chamwikumi hamwana kamukoku-himukoku wachizamba hadi anyana kanyikoku ayizamba 7, 11 nimwana kampembi wumu wamulambu wahanshidi, kubombela hamulambu wahanshidi wakubuta nachu hanshidi+ nimulambu wakushita wakulambula mpinji yejima nimulambu wawu wambutu hamu ninyilambu yawu yavinyu.

12 “‘Nawa hefuku damu 15 dakakweji kamu 7, mwakekaleña nakupompa kweneni kwajila. Bayi mwakazata mudimu wudi wejima wakolaku, mwakanakaneña chawija chaYehova hadi mafuku 7.+ 13 Nawa mwakalambuleña anyana kañombi ayizamba 13, anyikoku ayizamba 12 nianyana kanyikoku ayizamba 14 achaaka chimu, ejima atela kwikala akadi ihuji+ amulambu wakushita+ wakwocha hakesi wevumba dadiwahi* kudi Yehova. 14 Mwakayilambuleña hamu namulambu wawu wambutu wawuña wawuwahi walembuluka wakubomba namanji, wakekaleña yipimu yisatu yamwikumi hañombi-hañombi wachizamba hadi añombi ayizamba 13, yipimu yiyedi yamwikumi hamukoku-himukoku wachizamba hadi anyikoku ayizamba ayedi, 15 nichipimu chimu-chimu chamwikumi hamwana kamukoku-himukoku wachizamba hadi anyana kanyikoku ayizamba 14, 16 nimwana kampembi wumu wamulambu wahanshidi, kubombela hamulambu wakushita wakulambula mpinji yejima, wamulambu wawu wambutu hamu nimulambu wawu wavinyu.+

17 “‘Nawa hefuku damuchiyedi, mwakalambuleña anyana kañombi ayizamba 12, anyikoku ayizamba ayedi nianyana kanyikoku ayizamba 14 achaaka chimu, ejima atela kwikala akadi ihuji,+ 18 nawa awa añombi ayizamba, anyikoku ayizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 19 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu ninyilambu yawu yavinyu.+

20 “‘Nawa hefuku damuchisatu, mwakalambuleña añombi ayizamba 11, anyikoku ayizamba ayedi nianyana kanyikoku ayizamba 14 achaaka chimu, ejima atela kwikala akadi ihuji,+ 21 nawa awa añombi ayizamba, anyikoku ayizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 22 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu nimulambu wawu wavinyu.+

23 “‘Nawa hefuku damuchiwana, mwakalambuleña añombi ayizamba 10, anyikoku ayizamba ayedi nianyana kanyikoku ayizamba 14 achaaka chimu, ejima atela kwikala akadi ihuji,+ 24 nawa awa añombi ayizamba, anyikoku ayizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 25 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu nimulambu wawu wavinyu.+

26 “‘Nawa hefuku damuchitanu, mwakalambuleña añombi ayizamba 9, anyikoku ayizamba ayedi nianyana kanyikoku ayizamba 14 achaaka chimu, ejima atela kwikala akadi ihuji,+ 27 nawa awa añombi ayizamba, anyikoku ayizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 28 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu nimulambu wawu wavinyu.+

29 “‘Nawa hefuku damu 6, mwakalambuleña añombi ayizamba 8, anyikoku ayizamba ayedi nianyana kanyikoku ayizamba 14 achaaka chimu, ejima atela kwikala akadi ihuji,+ 30 nawa awa añombi ayizamba, anyikoku ayizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 31 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu ninyilambu yawu yavinyu.+

32 “‘Nawa hefuku damu 7, mwakalambuleña añombi ayizamba 7, anyikoku ayizamba ayedi nianyana kanyikoku ayizamba 14 achaaka chimu, ejima atela kwikala akadi ihuji,+ 33 nawa awa añombi ayizamba, anyikoku ayizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 34 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu nimulambu wawu wavinyu.+

35 “‘Hefuku damu 8, mwakekaleña nakupompa kweneni kwajila. Bayi mwakazata mudimu wudi wejima wakolaku.+ 36 Nawa mwakalambuleña ñombi wumu wachizamba, mukoku wumu wachizamba nianyana kanyikoku ayizamba 7 achaaka chimu, ejima atela kwikala akadi ihuji+ amulambu wakushita wakwocha hakesi wevumba dadiwahi* kudi Yehova. 37 nawa iwu ñombi wachizamba, mukoku wachizamba nianyana kanyikoku ayizamba, mwakayilambuleña hamu namulambu wawu wambutu ninyilambu yawu yavinyu kwesekeja nakuvula kwawu nikwesekeja nanshimbi jakuyilambwilamu, 38 nimwana kampembi wumu wamulambu wahanshidi, kubombela hamulambu wakushita wakulambula mpinji yejima nimulambu wawu wambutu hamu nimulambu wawu wavinyu.+

39 “‘Iyi yuma mwakayilambulaña kudi Yehova hayawija yenu yahayilaaka,+ kubombela hanyilambu yenu yakusanyika+ ninyilambu yenu yakudikeñela+ kwikala nyilambu yenu yakushita,+ nyilambu yenu yambutu,+ nyilambu yenu yavinyu+ ninyilambu yenu yakuwunda.’”+ 40 Mosi wayilejeli aIsarela yuma yejima yamulejeliwu kudi Yehova.

30 Kuhiñahu, Mosi walejeli anlomboli*+ anyichidi yaIsarela nindi: “Yehova nahoshi nindi: 2 Neyi iyala amukana+ Yehova hela asanyika kusanyika + kwakudikañesha yomweni* kwila chuma, watela kwila munakaniyi.+ Watela kwila yuma yejima yinakaniyi kwila.+

3 “Nawa neyi mumbanda amukana Yehova hela asanyika kusanyika kwakudikañesha yomweni kwila chuma hachidiyi kansi nawa hachidiyi mwitala datata yindi 4 nawa tata yindi atiya munakaniyi hela kusanyika kunasanyikiyi kwakudikañesha yomweni* kwila chuma ilaña tata yindi abula kumukaanisha, dikwila nawu watela kwila mwejima munakaniyi nawa watela kwila mwejima munasanyikiyi kusanyika kwakudikañesha yomweni kwila chuma. 5 Ilaña neyi tata yindi amukaanisha hanyima yakutiya kukana kunakaniyi hela kusanyika kunasanyikiyi kwakudikañesha yomweni kwila chuma, dikwila nawu owu mumbanda hakela mwokuku. Yehova wakamwanakena muloña tata yindi namukaanishi.+

6 “Hela chochu, neyi asumbuka iku nasanyiki dehi hela neyi nanyakali dehi kukana kwila chuma 7 nawa nfumwindi atiya chumochu ilaña abula kumukaanisha hefuku dinachitiyiyi, dikwila nawu watela kwila munakaniyi hela munasanyikiyi kusanyika kwakudikañesha yomweni kwila chuma. 8 Ilaña neyi nfumwindi amukaanisha hanyima yakutiya chumochu, watela kuhimpa oku kusanyika hela kukana kwanyakeliyi yomweni kukana,+ nawa Yehova wakamwanakena owu mumbanda.

9 “Ilaña neyi ntuluwa hela mumbanda aseñawu asanyika, watela kwila chuma chejima chinasanyikiyi.

10 “Hela chochu, neyi mumbanda akana hela asanyika kusanyika kwakudikañesha yomweni kwila chuma hadiyi mwitala danfumwindi 11 nawa nfumwindi atiya chumochu ilaña abula kumukaanisha hela kumulekesha, dikwila nawu owu mumbanda watela kwila mwejima munakaniyi hela munasanyikiyi kusanyika kwakudikañesha yomweni kwila chuma. 12 Ilaña neyi nfumwindi hefuku datiyiliyi yumoyu wahimpili chikupu oyu yikaninu hela kusanyika kwasanyikiliyi kwakudikañesha kwila chuma, dikwila nawu owu mumbanda hatela kwila mwokuku.+ Nfumwindi nahimpi dehi yumoyu, nawa Yehova wakamwanakena owu mumbanda. 13 Kutalisha kukukana kudi kwejima hela kusanyika kudi kwejima kunabombelimu kusanyika kwakudikañesha kwila chuma, dikwila nawu kwakudibonda kuyuma yimu,* nfumwindi watela kufuukula neyi chakwila ñodindi watela kwila munakaniyi hela nehi. 14 Ilaña neyi hanahiti mafuku amavulu chakadi nfumwindi kumukaanisha, dikwila nawu namwiteji ñodindi kulonda eli mwejima mwakaniniyi hela mwejima mwasanyikiliyi mwakudikañesha kwila chuma. Neteji oyu yuma muloña wamukaanishili wanyi hefuku damutiyiliyi nakukana. 15 Ilaña neyi iyala ahimpa yumoyu hanyima yakwila munahiti dehi mpinji kufuma hefuku dayitiyiliyi, iyala diyi wakekala namuloña wañodindi.+

16 “Iyi diyi nshimbi yamulejeliwu Mosi kudi Yehova kutalisha hadi iyala nañodindi nihadi tata yawantu namwanindi wamumbanda wuchidi kansi nawa wuchidi kushakama mwitala dindi.”

31 Kufumahu, Yehova wamulejeli Mosi nindi: 2 “Wuditendi+ nawaMidiyani+ muloña wayuma yayikoñeliwu aIsarela. Kuhiñahu, akukujiika neyi chajiikiliwu ankakulula jeyi.”*+

3 Dichi Mosi walejeli antu nindi: “Manyekenu amayala hakachi kenu akuya nakuzuña njita nawaMidiyani kulonda mumutendeli Yehova aMidiyani. 4 Hamuchidi wejima wanyichidi yaIsarela, mwatela kusendahu amayala 1,000 akuya kunjita.” 5 Kufuma hamakombakaji aIsarela,+ hamuchidi wejima atondelihu amayala 1,000, dichi amayala ejima amanyekeliwu kulonda ayi nakuzuña njita adiña 12,000.

6 Kufumahu, Mosi wayitemesheli kuya nakuzuña njita, hamuchidi wejima hafumini amayala 1,000, nawa Finihasi+ mwana kakapristu Eleyazari wayili hamu nanawa amashidika, wasendeli muchikasa chindi yipwepu yajila nimpuña janjita.+ 7 Azuñili njita nawaMidiyani neyi chamulejeliwu Mosi kudi Yehova, nawa ajahili amayala ejima. 8 Kubombela hadi antu ajahiliwu, ajahili ninawa anyanta amuMidiyani, Evi, Rekemi, Zuri, Huri niReba, anyanta atanu amuMidiyani. Ajahili niBalami+ mwana kaBeyori nampoku yakabali. 9 Ilaña aIsarela asendeli ambanda nianyana amuMidiyani muwunkoli. Apuupili niyimuna yawu yejima, anyama awu amakwawu ejima nimaheta awu ejima. 10 Nawa nyisumba yawu yejima mwashakamineñawu niyilombu yawu* yejima ayocheli nakesi. 11 Nawa asendeli yuma yejima yapuupiliwu, dikwila nawu antu nianyama. 12 Dichi antu akwatiliwu wunkoli niyuma yapuupiliwu, ayileteli kudi Mosi, kudi kapristu Eleyazari nikwizaza dawaIsarela muchilombu chadiña muyana yachinkalampata yamuMowabi+ kuYeriku kwakwihi naYodani.

13 Kuhiñahu, Mosi, kapristu Eleyazari nianlomboli ejima ezaza dawantu ayili nakuyikinkilila hanji yachilombu. 14 Ilaña Mosi wayihililili akulumpi jamashidika, antwamina amakombakaji niantwamina ajinkulakaji owu afumineña nakuzuña njita. 15 Mosi wayihwili nindi: “Munahandishilidi ambanda ejima? 16 Talenu, hamuloña wamazu ahosheliyi Balami, awa ambanda diwu akojejeli aIsarela abuli kwikala ashinshika+ kudi Yehova muloña adifukwileña kudi nzambi wakutwamba Peyori+ nawa chipupu chenjili hezaza dawantu jaYehova.+ 17 Ichi dinu jahenu anyana awamayala ejima niambanda ejima akaamahu dehi neyala. 18 Ilaña atunkaña ejima abula kukaamahu dehi neyala,+ bayi muyijahaku. 19 Nawa mwatela kuteekela hanji yachilombu hadi mafuku 7. Muntu wejima mukachi kenu wunajahi muntu niwunakwati muntu anajahiwu,+ watela kuditookesha+ hefuku damuchisatu nihefuku damu 7, enu niantu jenu imunakwati wunkoli. 20 Nawa mwatela kutookesha chakuvwala chejima kunshidi, chuma chejima chachitembi, chuma chejima chakutuña namavuji ampembi nichuma chejima chakutuña namutondu.”

21 Kufumahu, kapristu Eleyazari walejeli amashidika ayili nakuzuña njita nindi: “Ilu dilushimbi lwamulejeliwu Mosi kudi Yehova nindi, 22 ‘Wuru, siliva, wuneñu, chikuñu, wufoyu ninsumbu, 23 chuma chejima chinateli kuhita mukesi, mwakachihitishi mukesi kulonda chikekali chakadi majilu. Hela chochu, mwatela cheñi kuchitookesha namenji akutookesha nachu.+ Chuma chejima chinateli kuha nakesi, mwakachihitishi mumenji. 24 Nawa mwakakosi yakuvwala yenu hefuku damu 7 nakwikala akadi majilu, kuhiñahu dinu mwakenzi muchilombu.’”+

25 Yehova wamulejeli cheñi Mosi nindi: 26 “Chindaku yuma yejima yinapuupiwu, wuchindi niantu nianyama ejima akwatiliwu; wuzatili hamu nakapristu Eleyazari nianlomboli janyitaña yezaza dawantu. 27 Mwaambuli mumaseka ayedi yuma yapuupiliwu kulonda iseka dimu mwinki amashidika ayili nakuzuña njita, nawa iseka dikwawu mwinki izaza dawantu dejima.+ 28 Mutambuli musonku wakumwinka Yehova kudi amashidika ayili nakuzuña njita, munonihu wumi* wumu-wumu hamawumi ejima 500, hadi antu, añombi, ayimbuulu nianyikoku. 29 Muwutambuli heseka dawu nawa muwuhani kudi kapristu Eleyazari kulonda wiikali chawaana chaYehova.+ 30 Heseka dinayinkiwu aIsarela, munonihu chuma chimu-chimu hayuma 50, hadi antu, añombi, anyikoku, ayimbuulu nihayimuna yanyichidi yejima, nawa muyihani kudi aLevi+ akalakalaña nyidimu yakundama kutabanaka yaYehova.”+

31 Dichi aMosi nakapristu Eleyazari elili neyi chamulejeliwu Mosi kudi Yehova. 32 Yuma yashalilihu hayuma yapuupiliwu antu ayili nakuzuña njita, yadiña anyikoku 675,000, 33 añombi adiña 72,000, 34 ayimbuulu adiña 61,000. 35 Ambanda* abulili kukaama nawamayala+ adiña 32,000. 36 Iseka denkeliwu antu ayili nakuzuña njita dadiña anyikoku 337,500. 37 Musonku wamwinkeliwu Yehova wadiña anyikoku 675. 38 Añombi adiña 36,000, nawa 72 diwu amwinkeliwu Yehova musonku. 39 Ayimbuulu adiña 30,500, nawa 61 diwu amwinkeliwu Yehova musonku. 40 Antu* adiña 16,000, nawa antu* 32 diwu amwinkeliwu Yehova musonku. 41 Kuhiñahu, Mosi wamwinkeli kapristu Eleyazari+ musonku kulonda wiikali chawaana chaYehova neyi chamulejeliwu Mosi kudi Yehova.

42 Iseka dayinkeliwu aIsarela, odu daambwili Mosi kufuma heseka dawamayala ayili nakuzuña njita, 43 idi iseka dadiña anyikoku 337,500, 44 añombi adiña 36,000, 45 ayimbuulu adiña 30,500, 46 nawa antu* adiña 16,000. 47 Kuhiñahu, Mosi wanonelihu heseka dayinkeliwu aIsarela chuma chimu-chimu hayuma 50, hadi antu nianyama, nawa wayihanini kudi aLevi+ adiña namudimu wakukalakela hatabanaka yaYehova+ neyi chamulejeliwu Mosi kudi Yehova.

48 Kufumahu, amayala atondewa amakombakaji amashidika,+ antwamina amakombakaji niantwamina ajinkulakaji, enjili kudi Mosi, 49 nawa amulejeli Mosi nawu: “Etu ambuñeyi tunachindi amashidika ejima ayili kunjita adi mumakasa etu, nawa hosi niwumu wunajimbali hakachi ketuku.+ 50 Dichi wejima wetu muntu-himuntu aleti yuma yinapuupiyi kulonda yiikali mulambu waYehova, yuma yawuru, maleñi* amutupokosu, makaayi, tuzeya twawanta, tuzeya twakumatu niyingelingeli yikwawu, kulonda tudibutili hanshidi jetu* kumesu aYehova.”

51 Dichi aMosi nakapristu Eleyazari atambwili wuru kudi wena, dikwila nawu yingelingeli yejima. 52 Wuru yejima yatambwiliwu kudi antwamina amakombakaji nikudi antwamina ajinkulakaji yamwinkeliwu Yehova yiikali chawaana, yadiña mashekeli* 16,750. 53 Amayala amashidika ayili nakuzuña njita, wejima wawu muntu-himuntu wasendeli yuma yapuupiliyi yomweni. 54 Mosi nikapristu Eleyazari atambwili wuru yafumini kudi antwamina amakombakaji nikudi antwamina ajinkulakaji nawa ayitwalili mwitenti dakubulakena kulonda yiikali chuma chakuyanukilaku antu jaIsarela kudi Yehova.

32 Dichi anyana kaRubeni+ awamayala nianyana kaGadi+ awamayala adiña nayimuna yayivulu nankashi, nawa amweni nawu mpata yaYazeri+ niyaGiliyadi jadiña mpata jajiwahi kuhembelamu yimuna. 2 Dichi anyana kaGadi awamayala nianyana kaRubeni awamayala ayili kudi Mosi, kudi kapristu Eleyazari nikudi anlomboli ezaza dawantu nakuyila nawu: 3 “Araroti, Diboni, Yazeri, Nimira, Heshiboni,+ Eleyela, Sebami, Nebo+ niBeyoni,+ 4 himpata jashindiliyi Yehova iku aIsarela+ anakutalaku, himpata jajiwahi kuhembelamu yimuna nawa etu ambuñenu tukweti yimuna yayivulu nankashi.”+ 5 Atwalekelihu kuhosha nawu: “Neyi munatutiyi kuwaha, twinkenu etu ambuñenu iji mpata kulonda jiikali iheta detu. Bayi mutuzambwisha Yodaniku.”

6 Kuhiñahu, Mosi wayihwili anyana kaGadi awamayala nianyana kaRubeni awamayala nindi: “Komana amanakwenu akuya kunjita enu saña mwashalila kunu tahindi? 7 Muloñadi chimunakuzeyeshela antu jaIsarela kulonda abuli kuzambukila mwituña dinakuyinkayi Yehova? 8 Ichi dichuma cheliliwu atata jenu hinayitemesheli kufuma kuKadeshi Baraneya kulonda ayi nakutala ituña.+ 9 Chashikiliwu muChinekineki* chaEshikoli+ nawa chamweniwu ituña, azeyesheli antu jaIsarela kulonda abuli kuya mwituña dayikaniniyi Yehova nindi wukuyinka.+ 10 Hanodu ifuku, Yehova wazuwili chikupu chakwila wasanyikili nindi:+ 11 ‘Amayala afumini muEjipitu kutachikila adi nayaaka 20 nakuya hewulu hiyakamona ituña+ dinasanyikili kudi Abarahama, Isaka nikudi Yakobaku,+ muloña hiyananlondeli namuchima wejimaku, 12 chiña hohu Kalebu+ mwana kaYefuna mwini Kenizi niYoshuwa+ mwana kaNuni, muloña ananlondeli ami Yehova namuchima wejima.’+ 13 Dichi Yehova wayizuwilili chikupu aIsarela nawa wayikojejeli kukimboka mwisaña hadi yaaka 40,+ sampu nichamanini ikiñu dejima dakoñeleña yuma yatama kumesu aYehova.+ 14 Talenu, enu akanshidi munakukoña yuma yoyimu yakoñeliwu atata jenu amuletesheli Yehova amuzuwili Isarela. 15 Neyi mukuleka kumulondela, chakadi nikujina, wakayishiya cheñi awa antu mwisaña nawa enu mwakajahisha awa antu ejima.”

16 Enjili cheñi kudi yena nakumwila nawu: “Twiiteji tutuñi kunu mayinda amalola akuhembelamu yimuna yetu ninyisumba yawanyanetu. 17 Ilaña etu tukutwalekahu kudimanyeka kulonda twakazuñi njita+ nawa twakayañahu dehi hambidi yawaIsarela sampu tunayishikiji kwiluña dawu, hakwila anyanetu akashakamaña munyisumba yakiñewa, akekala akiñewa kudi antu ashakamaña mwituña. 18 Hitwakafunta kumataletuku, sampu kaIsarela wejima natambwili mpata kwikala wuswana windi.+ 19 Muloña hitwakatambwila nawu hamu wuswana kwishinadi dikwawu daYodani kuya nikumbidiku, muloña tunatambwili dehi wuswana wetu kumusela waYodani.”+

20 Mosi wayakwili nindi: “Neyi mwakela mwenomu: Sendenu yitwa yanjita muyi kunjita+ kumesu aYehova; 21 nawa neyi wejima wenu mukusenda yitwa yanjita nakuzambuka Yodani kumesu aYehova hanakutemunayi ayilumbu jindi kudi yena+ 22 sampu ituña anadimiki mushindu kumesu aYehova,+ kufumahu dinu mwakafunti+ nawa mwakekala akadi muloña kumesu aYehova nikumesu Isarela. Kuhiñahu, idi ituña dakekala iheta denu kumesu aYehova.+ 23 Ilaña neyi himwakela mwenomuku, mwakavulumuna kudi Yehova. Neyi chiikala mwenomu, mwiluki nenu nshidi jenu jakayishintakesha. 24 Dichi munateli kutuña nyisumba yawanyanenu nimayinda akuhembelamu yimuna+ yenu, ilaña mwatela kwila mumunakani.”

25 Anyana kaGadi awamayala nianyana kaRubeni awamayala amulejeli Mosi nawu: “Etu ambuñeyi twakela muwunakuhosha eyi mwanta wetu. 26 Anyanetu, añodi jetu, yimuna yetu nianyama etu ejima amakwawu akashala kwenoku munyisumba yaGiliyadi,+ 27 ilaña etu ambuñeyi twakazambuka, dikwila nawu iyala wejima wunadimanyeki yitwa yanjita kulonda ayi kunjita kumesu aYehova+ neyi chinahoshiyi mwanta wetu.”

28 Dichi Mosi waheni lushimbi kutalisha hadi wena kudi kapristu Eleyazari, kudi Yoshuwa mwana kaNuni nikudi anlomboli janyitaña yanyichidi yaIsarela. 29 Mosi wayilejeli nindi: “Neyi anyana kaGadi awamayala nianyana kaRubeni awamayala adimanyeka yitwa yanjita nakuzambuka Yodani hamu nanenu kulonda mwakazuñi njita kumesu aYehova, nakwimika mushindu ituña, mwakayinki mpata yaGiliyadi yakekali iheta dawu.+ 30 Ilaña neyi abula kudimanyeka yitwa yanjita nawa abula kuzambuka hamu nanenu, dikwila nawu akashakamaña hamu nanenu mwituña daKenani.”

31 Hohenohu, anyana kaGadi awamayala nianyana kaRubeni awamayala aakwili nawu: “Mwanahoshiyi Yehova kudi etu ambuñeyi dimutukwila. 32 Tukusenda yitwa yanjita nakuzambukila mwituña daKenani+ kumesu aYehova, ilaña maheta itwakaswana akekala munu mwishinadi daYodani.” 33 Dichi Mosi wayinkeli anyana kaGadi awamayala, anyana kaRubeni+ awamayala nichibalu chamuchidi waManasi+ mwana kaYosefu wanta waSihoni+ mwanta wawaAmori niwanta waOgi+ mwanta wakuBashani, dikwila nawu mpata jamunyisumba yadiña munowu maluña ninyisumba yanyeñumukili idi ituña.

34 Nawa anyana kaGadi awamayala atuñili* Diboni,+ Ataroti,+ Aroweri,+ 35 Atiroti Shofani, Yazeri,+ Yogibeha,+ 36 Betinimira+ niBetiharani,+ nyisumba yakiñewa nawa atuñili mayinda amalola akuhembelamu yimuna. 37 Nawa anyana kaRubeni awamayala atuñili Heshiboni,+ Eleyela,+ Kiriyatayimi,+ 38 Nebo+ niBayali Meyoni,+ majina awu ayihimpili niSibima; nawa iyi nyisumba yatuñiliwu ayituumbili majina acheñi.

39 Anyana awamayala avweliwu kudi Makiri+ mwana kaManasi ayili nakulukuka Giliyadi nawa ayitambwili nakupalañeshamu aAmori adiña nakushakamamu. 40 Dichi Mosi wahanini Giliyadi kudi Makiri mwana kaManasi, nawa watachikili kushakamamu.+ 41 Yayiri mwana kaManasi wayili kudi wena nakuyilukuka, watambwili nyikala yawu yamatenti nawa wayituumbili nindi Havoti Yayiri.*+ 42 Noba niyena wayilukukili nawa watambwili Kenati hamu nimatawuni* anyeñumukiliku, nawa wawutuumbili nindi Noba ijina dindi yomweni.

33 Ichi dichendeleñawu antu jaIsarela hafuminiwu mwituña daEjipitu+ kwesekeja namazanvu awu*+ chayilombweleñawu kudi aMosi naAroni.+ 2 Mosi watwalekelihu kusoneka maluña hateekeleleñawu hampinji yayileñawu kwesekeja nachamulejeliwu kudi Yehova, nawa ichi dichendeleñawu kufuma kwiluña dimu nakuya kwiluña dikwawu:+ 3 Anyamukili kufuma kuRamesesi+ mukakweji katachi, hefuku damu 15 dakakweji.+ Hadodenidi ifuku, hanyima yaChipandakenu,+ aIsarela edikili nakuya chakadi kwakama* iku aEjipitu ejima anakutalaku. 4 Haniyi mpinji, aEjipitu adiña nakujiika anyanawu awedi ejima ajahiliwu kudi Yehova hakachi kawu,+ muloña Yehova wasompesheli nikubabesha anzambi jawu.+

5 Dichi aIsarela anyamukili kufuma kuRamesesi nakuteekela kuSukoti.+ 6 Kuhiñahu, anyamukili kufuma kuSukoti nakuteekela kuEtami,+ yadiña kwakumina isaña. 7 Kufumahu, anyamukili kufuma kuEtami nakufunta kukabadi kaPihahiroti yatalañana naBayali Zefoni,+ nawa ateekeleli kwakwihi naMigidoli.+ 8 Kuhiñahu, anyamukili kufuma kuPihahiroti nakuhita hakachi kakaluñalwiji+ nakuya mwisaña+ nawa atwalekelihu kwenda lwendu lwamafuku asatu mwisaña daEtami+ nakuteekela kuMara.+

9 Kufumahu, anyamukili kufuma kuMara nawa ashikili kuElimi. KuElimi kwadiña tuseloki twamenji 12 ninyitondu yanyikoma 70, dichi ateekeleli kwenoku.+ 10 Kuhiñahu, anyamukili kufuma kuElimi nakuteekela kuKaluñalwiji Kachinana. 11 Kufumahu, anyamukili kufuma kuKaluñalwiji Kachinana nakuteekela mwisaña daSini.+ 12 Kuhiñahu, anyamukili kufuma mwisaña daSini nakuteekela kuDofika. 13 Chimwahitili mpinji, anyamukili kufuma kuDofika nakuteekela kuAlushi. 14 Kufumahu, anyamukili kufuma kuAlushi nakuteekela kuRefidimi+ kwabulili menji akunwa antu. 15 Kuhiñahu, anyamukili kufuma kuRefidimi nakuteekela mwisaña daSinayi.+

16 Anyamukili kufuma mwisaña daSinayi nakuteekela kuKibiroti Hatava.+ 17 Kufumahu, anyamukili kufuma kuKibiroti Hatava nakuteekela kuHazeroti.+ 18 Kuhiñahu, anyamukili kufuma kuHazeroti nakuteekela kuRitima. 19 Kufumahu, anyamukili kufuma kuRitima nakuteekela kuRimoni Perezi. 20 Kuhiñahu, anyamukili kufuma kuRimoni Perezi nakuteekela kuLibina. 21 Anyamukili kufuma kuLibina nakuteekela kuRisa. 22 Kuhiñahu, anyamukili kufuma kuRisa nakuteekela kuKehelata. 23 Kufumahu, anyamukili kufuma kuKehelata nakuteekela kuMpidi yaSheferi.

24 Kuhiñahu, anyamukili kufuma kuMpidi yaSheferi nakuteekela kuHarada. 25 Kufumahu, anyamukili kufuma kuHarada nakuteekela kuMakiheloti. 26 Kuhiñahu, anyamukili+ kufuma kuMakiheloti nakuteekela kuTahati. 27 Kufumahu, anyamukili kufuma kuTahati nakuteekela kuTera. 28 Kuhiñahu, anyamukili kufuma kuTera nakuteekela kuMitika. 29 Chimwahitili mpinji, anyamukili kufuma kuMitika nakuteekela kuHashimona. 30 Kufumahu, anyamukili kufuma kuHashimona nakuteekela kuMoseroti. 31 Kuhiñahu, anyamukili kufuma kuMoseroti nakuteekela kuBeneyayakani.+ 32 Nawa anyamukili kufuma kuBeneyayakani nakuteekela kuHori Hagidigadi. 33 Kufumahu, anyamukili kufuma kuHori Hagidigadi nakuteekela kuYotibata.+ 34 Chimwahitili mpinji, anyamukili kufuma kuYotibata nakuteekela kuAbirona. 35 Kuhiñahu, anyamukili kufuma kuAbirona nakuteekela kuEziyoni Geberi.+ 36 Kufumahu, anyamukili kufuma kuEziyoni Geberi nakuteekela mwisaña daZini,+ dikwila nawu Kadeshi.

37 Chimwahitili mpinji, anyamukili kufuma kuKadeshi nakuteekela kuMpidi yaHori,+ kuñinza yetuña daEdomi. 38 Nawa kapristu Aroni wakandamini haMpidi yaHori kwesekeja nachamulejeliwu kudi Yehova nawa wafwilili kwenoku muchaaka chamu 40 kufuma hafuminiwu aIsarela mwituña daEjipitu, mukakweji kamuchitanu, hefuku datachi dakakweji.+ 39 Aroni chafwileñayi haMpidi yaHori wadiña nayaaka 123.

40 Dichi mwanta wakuAradi+ mwini Kenani, washakamineña muNegebi mwituña daKenani, watiyili nawu aIsarela anakwinza.

41 Mukuhita kwampinji, anyamukili kufuma kuMpidi yaHori+ nakuteekela kuZalimona. 42 Kufumahu, anyamukili kufuma kuZalimona nakuteekela kuPunoni. 43 Kuhiñahu, anyamukili kufuma kuPunoni nakuteekela kuOboti.+ 44 Kufumahu, anyamukili kufuma kuOboti nakuteekela kuIyeyabarimi, kuñinza yaMowabi.+ 45 Chimwahitili mpinji, anyamukili kufuma kuIyimi nakuteekela kuDiboni Gadi.+ 46 Kuhiñahu, anyamukili kufuma kuDiboni Gadi nakuteekela kuAlimoni Dibilatayimi. 47 Kufumahu, anyamukili kufuma kuAlimoni Dibilatayimi nakuteekela kumapidi aAbarimi+ kwakwihi naNebo.+ 48 Nkumininaku, anyamukili kufuma kumapidi aAbarimi nakuteekela muyana yachinkalampata yamuMowabi kwakwihi naYodani kuYeriku.+ 49 Atwalekelihu kuteekela kumukulishu waYodani, kutachikila kuBetiyeshimoti kushika nikuAbeli Shitimi,+ muyana yachinkalampata yamuMowabi.

50 Yehova wamulejeli Mosi muyana yachinkalampata yamuMowabi kuYeriku kwakwihi naYodani nindi: 51 “Hoshaku nawaIsarela nawa wuyileji neyi, ‘Munakuzambuka Yodani nakuya mwituña daKenani.+ 52 Mwakatemuni antu ejima ashakamaña munidi ituña akafumi kudi enu nikukisañana yuma yawu yejima yakubaza namalola+ niankishi jawu ejima ayikuñu,*+ nawa mwakakisañani chikupu yinañanaña yawu yejima yajila.+ 53 Nawa mwakatambula idi ituña nakushakamamu, muloña chakadi nikujina, nakayinka idi ituña dakekali iheta denu.+ 54 Mwatela kwanzañana ituña hakachi kayisaka yenu kuzatisha chinjikijilu.+ Izanvu didi nawantu amavulu, mwakadinki wuswana weneni, nawa izanvu didi nawantu antesha, mwakadinki wuswana wantesha.+ Hakaholokela chinjikijilu chamuntu-himuntu, wenowu diwakekala wuswana windi. Mwakatambula mpata yakekali wuswana wenu kwesekeja nanyichidi yawatata jenu.+

55 “‘Neyi antu ashakamaña munidi ituña mwakayitemunamu wanyi kudi enu,+ dikwila nawu antu imwaketeja kushala akekala neyi yuma yakuyilemeka mumesu enu nawa neyi nyiña yakuyilemeka mumbavu jenu. Awa antu akayikabishaña enu mwituña dimwakashakamaña.+ 56 Nawa nakayikoña enu chuma chinafwilileña kuyikoña wena.’”+

34 Nawa Yehova wamulejeli cheñi Mosi nindi: 2 “Yileji aIsarela iji nshimbi neyi: ‘Neyi muneñili dehi mwituña daKenani,+ ituña dakekala wuswana wenu, iji dijakekala ñinza jetuña daKenani.+

3 “‘Ñinza yenu yakukabeta kakuchidiilu, yakatachikila mwisaña daZini nakukulisha Edomi, nawa ñinza yenu yakuchidiilu kumusela, yakatachikila kwakumina Kaluñalwiji kaMuñwa.*+ 4 Ñinza yenu yakabalumuka nakuhita kukabeta kakuchidiilu kumukandu waAkirabimi+ nawa yakaya nakushika kuZini nakukumina kuKadeshi Baraneya.+ Kuhiñahu, yakahita kuHazari Adari+ nakushika kuAzimoni. 5 Iyi ñinza yakabalumuka nakufuma kuAzimoni nawa yakahita muMuhoñi* waEjipitu nakukumina kuKaluñalwiji.*+

6 “‘Ñinza yenu yakukabeta kakumujika yakekala kumukulishu waKaluñalwiji Keneni.* Iyi diyakekala ñinza yenu yakukabeta kakumujika.+

7 “‘Iyi diyakekala ñinza yenu yakukabeta kakuchimunswa: Mwakabaluli ñinza yenu kutachikila kuKaluñalwiji Keneni nakushika kuMpidi yaHori.+ 8 Mwakabaluli ñinza kufuma kuMpidi yaHori nakushika kuLebo Hamati*+ nawa iyi ñinza yakakumini kuZedadi.+ 9 Nawa iyi ñinza yakashika kuZifironi nakukumina kuHazari Enani.+ Iyi diyakekala ñinza yenu yakukabeta kakuchimunswa.

10 “‘Kuhiñahu, mwakabaluli ñinza yenu yakumusela, kutachikila kuHazari Enani nakushika kuShefami. 11 iyi ñinza yakafuma kuShefami nakushika kuRibila kumusela waAyini, nawa ñinza yakakunkumuka nakuhita mukunkumuki wakumusela waKaluñalwiji kaKinereti.*+ 12 Iyi ñinza yikashika kuYodani nakukumina kuKaluñalwiji kaMuñwa.+ Idi didakekala ituña denu+ niñinza jadinyeñumuka.’”

13 Dichi Mosi wayilejeli aIsarela nindi: “Idi didu ituña dimwakanzañana kuzatisha chinjikijilu+ kulonda dakekali iheta denu neyi chinashimuniyi Yehova kudihana kunyichidi 9 namuchidi wachibalu. 14 Muloña muchidi wawaRubeni kwesekeja nachisaka chakukatata yawu, muchidi wawaGadi kwesekeja nachisaka chakukatata yawu nichibalu chamuchidi waManasi atambula dehi wuswana wawu.+ 15 Nyichidi yiyedi namuchidi wachibalu atambula dehi wuswana wawu kumusela kwiluña daYodani kwakwihi naYeriku, kwaselelaña itena.”+

16 Yehova wamulejeli cheñi Mosi nindi: 17 “Awa diwu majina awamayala akayanzañena ituña dakekala denu: kapristu Eleyazari+ niYoshuwa+ mwana kaNuni. 18 Nawa mwakasendi nlomboli wumu-wumu kufuma hamuchidi-himuchidi kulonda akanzañani ituña kulonda dakekali wuswana wenu.+ 19 Awa diwu majina anowu amayala: kumuchidi waYuda,+ kwakafumi Kalebu+ mwana kaYefuna; 20 kumuchidi wawanyana kaSimiyoni awamayala,+ kwakafumi Shemuweli mwana kaAmihudi; 21 kumuchidi waBenjamini,+ kwakafumi Elidadi mwana kaKisiloni; 22 kumuchidi wawanyana kaDani awamayala,+ kwakafumi nlomboli Buki mwana kaYogili; 23 mudi anyana kaYosefu awamayala,+ kumuchidi wawanyana kaManasi awamayala,+ kwakafumi nlomboli Haniyeli mwana kaEfwodi; 24 kumuchidi wawanyana kaEfuremu awamayala,+ kwakafumi nlomboli Kemuweli mwana kaShifitani; 25 kumuchidi wawanyana kaZebuluni awamayala,+ kwakafumi nlomboli Elizafani mwana kaParinaki; 26 kumuchidi wawanyana kaIsakari awamayala,+ kwakafumi nlomboli Palitiyeli mwana kaAzani; 27 kumuchidi wawanyana kaAsheri awamayala,+ kwakafumi nlomboli Ahihudi mwana kaShelomi; 28 kumuchidi wawanyana kaNafitali awamayala,+ kwakafumi nlomboli Pedaheli mwana kaAmihudi.” 29 Awa diwu amayala alejeliyi Yehova kwanzañena aIsarela ituña mwituña daKenani.+

35 Yehova watwalekelihu kumuleja Mosi muyana yachinkalampata yamuMowabi kuYeriku kwakwihi naYodani+ nindi: 2 “Lejaku aIsarela neyi akayinki aLevi nyisumba kulonda akashakameñamu kufuma hawuswana+ wakekalawu nawu, nawa akayinki aLevi maluña akudiishilamu yimuna anyeñumuka oyu nyisumba.+ 3 Akashakamaña munoyu nyisumba, nawa maluña akudiishilamu yimuna akekala ayimuna yawu, yuma yawu nianyama awu amakwawu ejima. 4 Maluña akudiishilamu yimuna amunyisumba imwakenka aLevi akekala makyubiti* 1,000 kufuma kumpwembu kunyeñumuka musumba wejima. 5 Hanji yamusumba, mwakapimi makyubiti 2,000 kukabadi kakumusela, makyubiti 2,000 kukabadi kakuchidiilu, makyubiti 2,000 kukabadi kakumujika nawa makyubiti 2,000 kukabadi kakuchimunswa, musumba wakashali hakachi. Awa diwu akekala maluña awu akudiishilamu yimuna.

6 “Nyisumba yakuswamamu+ yimwakayinka aLevi yakekala 6, yimwakahana kulonda muntu wunajahañani akatemukileñamu,+ kushilahu ninyisumba yikwawu 42. 7 Mwakayinki aLevi nyisumba 48 hamu namaluña awu akudiishilamu yimuna.+ 8 Nyisumba yimwakayinka yakafuma heheta dawaIsarela.+ Izanvu dikweti antu amavulu mwakafumishihu yayivulu, nawa izanvu dikweti antu antesha mwakafumishihu yantesha.+ Izanvu-hiizanvu dakahanihu nyisumba yadu yimu kudi aLevi kwesekeja nawuswana wudakatambwila.”

9 Yehova watwalekelihu kumuleja Mosi nindi: 10 “Hoshaku nawaIsarela nawa wuyileji neyi, ‘Munakuzambukila muYodani mwituña daKenani.+ 11 Mwakaditondeli nyisumba mumwatela kutemukila swayi kulonda yakekali nyisumba yakuswamamu, mwakutemukila muntu wunajahi muntu* chakadi kwiluka.+ 12 Oyu nyisumba yakekala yakuswamamu kuchiina mukakutenda mashi,+ kulonda muntu wunajahañani akabuli kumujaha sampu muloña windi anawunsompi kwizaza dawantu.+ 13 Oyu nyisumba 6 yimwakahana yakekala yakuswamamu. 14 Mwakahani nyisumba yisatu mudinu ishinadi daYodani+ nawa nyisumba yikwawu yisatu mwituña daKenani+ kulonda yakekali nyisumba yakuswamamu. 15 Oyu nyisumba 6 yakekala yakuswamamu aIsarela, ñiinza+ nimwenyi wudi hakachi kenu kulonda mwakatemukileña muntu wunajahi muntu* chakadi kwiluka.+

16 “‘Ilaña neyi muntu amweta mukwawu nachitwa chachikuñu nawa afwa, muntu yenowu himbanji. Mbanji chiña kumujaha hohu.+ 17 Nawa neyi muntu amwasa mukwawu ilola dinateli kujahañana nawa afwa, muntu yenowu himbanji. Mbanji chiña kumujaha hohu. 18 Nawa neyi muntu amweta mukwawu namutondu wunateli kujahañana nawa afwa, muntu yenowu himbanji. Mbanji chiña kumujaha hohu.

19 “‘Mukakutenda mashi diyi wakajaha mbanji. Neyi amubulakana, yoyena diyi wakamujaha. 20 Neyi muntu najahi mukwawu kuhitila mukumushinjika muloña wakumuhela hela amwasa chuma muloña wakumutoñojokela yuma yatama,*+ 21 indi kwiji muloña wakumuhela, amweta mukwawu nachikasa nawa afwa, owu muntu wunamweti chiña kumujaha hohu. Himbanji. Mukakutenda mashi wakajaha mbanji neyi amubulakana.

22 “‘Ilaña neyi chakadi kwiluka nawa chakadi kumuhela wamushinjika hela wamwasa chuma chidi chejima chakadi kumutoñojokela yuma yatama,*+ 23 hela neyi wamuholwela ilola chakadi kumumona nawa wadiña chilumbu chindi wanyi hela hakeñaña kumukatishaku, nawa owu muntu afwa, 24 izaza dawantu datela kusompa hakachi kamuntu wunajahi muntu namukakutenda mashi kwesekeja naniji nshimbi.+ 25 Izaza dawantu datela kupulwisha muntu wunajahañani muchikasa chamukakutenda mashi nakumufuntisha kumusumba wakuswamamu mwatemukililiyi. Watela kushakama munowu musumba sampu kapristu muneni awayishiliwu namanji ajila+ nafwi dehi.

26 “‘Ilaña neyi muntu wunajahañani amotoka ñinza yamusumba wakuswamamu mwatemukililiyi, 27 nawa mukakutenda mashi amuwana hanji yañinza yamusumba wakuswamamu mwatemukililiyi nawa amujaha owu muntu wajahañeni, dikwila nawu hakwikala namuloña wamashiku. 28 Muloña watela kushakama mumusumba windi wakuswamamu sampu kapristu muneni nafwi dehi. Ilaña neyi kapristu muneni nafwi dehi, owu muntu wajahañeni nateli kufunta kwiluña dindi.+ 29 Yumiyi yakekala nshimbi yimwakalondelaña hakusompa mwakahita makiñu enu kumaluña kwejima kumwakashakamaña.

30 “‘Muntu* wejima wakajaha mukwawu atela kumujaha neyi kwikala ayinsahu*+ muloña himbanji;+ ilaña neyi kudi hohu chinsahu wumu, owu muntu akamujaha* wanyi. 31 Bayi mukuula wumi wambanji watelela kufwaku, muloña muntu yenowu chiña tuhu kumujaha.+ 32 Nawa bayi mukuula muntu wunatemukili mumusumba windi wakuswamamu nakumwiteja kutachika kushakama cheñi mwiluña dindi henohu kapristu muneni kanda afwiku.

33 “‘Bayi mutamisha ituña mumunakushakamaku, muloña mashi atamishaña ituña.+ Nawa kwosi chuma chinateli kubuta hamashi anamwañiliwu mwituñaku, chiña hohu namashi anowu wunayimwañi.+ 34 Bayi mutamisha ituña mumunakushakamaku, omu mwinnakushakama; muloña ami Yehova inakushakama mukachi kawantu jaIsarela.’”+

36 Nyitu yayisaka yawanyana kaGiliyadi mwana kaMakiri,+ Makiri mwana kaManasi wakuyisaka yawanyana kaYosefu awamayala enjili nakuhosha kumesu aMosi nikumesu awanlomboli, dikwila nawu nyitu yayisaka yawaIsarela. 2 Ahosheli nawu: “Yehova wakulejeli eyi mwanta wetu kwanzañana ituña kuzatisha chinjikijilu+ kulonda diikali wuswana wawaIsarela; nawa eyi mwanta wetu akulejeli kudi Yehova kuhana wuswana wamanakwetu Zelofehadi kudi anyanindi awambanda.+ 3 Neyi asumbuka nawamayala akumuchidi wukwawu wawaIsarela, dikwila nawu wuswana wanawa anyana awambanda niwena akawutambula kufuma hawuswana wawatata jetu nakuwubombela hawuswana wanowu muchidi kuyakasumbukilawu, kulonda akawutambuli kufuma hawuswana wetu wuyatwinkeliwu kuhitila mukuzatisha chinjikijilu. 4 Neyi Chaaka chaKusubuka+ antu jaIsarela chinashiki dehi, wuswana wanawa anyana awambanda niwena akawubombela hawuswana wanowu muchidi kuyakasumbukilawu, kulonda wuswana wawu akawutambuli kufuma hawuswana wakumuchidi wawatata jetu.”

5 Kuhiñahu, Mosi wayilejeli aIsarela neyi chamulejeliwu kudi Yehova nindi: “Munakuhosha muchidi wawanyana kaYosefu awamayala mwalala. 6 Awa diwu mazu anahoshiwu kudi Yehova kutalisha hadi anyana kaZelofehadi awambanda nindi: ‘Anateli kusumbuka neyala wudi wejima anakeñiwu. Hela chochu, atela kusumbuka hohu neyala wakuchisaka chakumuchidi watata yawu. 7 Kwosi wuswana wawaIsarela watela kutuntujoka kufuma kumuchidi wumu nakuya kumuchidi wukwawuku, muloña aIsarela atela kukakela kuwuswana wakumuchidi wawankakulula jawu. 8 Nawa mwana wamumbanda wejima wudi nawuswana hakachi kanyichidi yaIsarela, watela kusumbuka kudi mwana wakumuchidi watata yindi+ kulonda aIsarela akatwalekihu kuhemba iheta dawuswana wawankakulula jawu. 9 Kwosi wuswana watela kutuntujoka kufuma kumuchidi wumu nakuya kumuchidi wukwawuku, muloña nyichidi yaIsarela yatela kukakela kuwuswana wayu.’”

10 Anyana kaZelofehadi awambanda elili neyi chamulejeliwu Mosi+ kudi Yehova. 11 Dichi Mahila, Tiriza, Hogila, Milika niNowa, anyana kaZelofehadi+ awambanda, asumbukili kudi anyana kawana kwatata yawu. 12 Asumbukili kudi amayala amuchisaka chaManasi mwana kaYosefu kulonda wuswana wawu wutwalekihu kwikala kumuchidi wakuchisaka chatata yawu.

13 Iji diji nshimbi nimazu awunsompeshi ahaniniyi Yehova kudi aIsarela kuhitila mudi Mosi muyana yachinkalampata yamuMowabi kuYeriku+ kwakwihi naYodani.