EZERA

1 Muchaaka chatachi chachiyuulu chaMwanta Kirusi+ wakuPeresi, hakwila mazu aYehova ahosheliyi kuhitila mudi Yeremiya+ ashikijewi, Yehova wasañumwini muchima* waMwanta Kirusi wakuPeresi kulonda abidiki mbila mwahitili wanta windi wejima. Nawa iyi mbila wayisonekeli+ nimumukanda nindi:

2 “Ichi dichinahoshiyi Mwanta Kirusi wakuPeresi nindi, ‘Yehova Nzambi yamawulu nanyinki mawanta ejima ahamaseki+ nawa nanyinki mudimu wakumutuñila itala muYerusalema,+ musumba wamuYuda. 3 Muntu wejima hakachi kanenu antu jindi ejima, Nzambi yindi ekali nayena nawa akanduki kuYerusalema, musumba wamuYuda nakutuñulula itala daYehova Nzambi yaIsarela, hiNzambi walala, wadiña netala muYerusalema.* 4 Ñiinza wejima,+ kwejima kudiyi, amukwashiku kudi antuñi nindi* nakumwinka siliva niwuru, yuma niyimuna hamu nimulambu wakudikeñela wetala daNzambi walala+ dadiña muYerusalema.’”

5 Kuhiñahu, anlomboli janyitaña yawaYuda niyawaBenjamini, atupristu niaLevi, muntu wejima asañumwiniwu muchima kudi Nzambi walala, wadiloñesheli kukanduka nakuya nakutuñulula itala daYehova dadiña muYerusalema. 6 Antuñi nawu ejima, ayikwashiliku nakuyinka* yipwepu yasiliva niyawuru, yuma, yimuna niyuma yikwawu yalema wuseya, kubombela hanyilambu yejima yakudikeñela.

7 Mwanta Kirusi waleteli niyuma yamwitala daYehova yasendeliyi Nebukaneza muYerusalema nakuyitenteka mwitala danzambi yindi.+ 8 Mwanta Kirusi wakuPeresi wamulejeli Mitiredati mukakuhemba maheta nindi yaleti yumiyi nakumuchindilayu aSheshibazari*+ nyuuli waYuda.

9 Ichi dichayichindiliwu: yuma yawuru 30 yakutuña neyi yimpaaya,* yuma yasiliva 1,000 yakutuña neyi yimpaaya, yuma yikwawu 29, 10 yeña 30 yanyanya yakunama yawuru, yeña 410 yanyanya yakunama yasiliva niyuma yikwawu 1,000. 11 Yipwepu yejima yawuru niyasiliva yadiña 5,400. Sheshibazari waleteli yuma yejimiyi hayifumishileñawu ankoli+ muBabiloni nakuyitwala kuYerusalema.

2 Nawa awa diwu antu akukabeta enjili kufuma hadi antu atwaliliwu muwunkoli,+ atwaliliyi Mwanta Nebukaneza wakuBabiloni muwunkoli kuBabiloni+ nawa owu afuntili kuYerusalema nikuYuda mukuhita kwampinji, muntu-himuntu wayili kumusumba windi,+ 2 owu enjili hamu naZerubabeli,+ Yeshuwa,+ Nehemiya, Seraya, Reyelaya, Modekayi, Bilishani, Misipari, Bigivayi, Rehumi niBayana.

Iku dikuvula kwawaIsarela awamayala:+ 3 anyana kaParoshi adiña 2,172; 4 anyana kaShefatiya adiña 372; 5 anyana kaAra+ adiña 775; 6 anyana kaPahati Mowabi,+ amudi anyana kaYeshuwa naYowabi adiña 2,812; 7 anyana kaElami+ adiña 1,254; 8 anyana kaZatu+ adiña 945; 9 anyana kaZakayi adiña 760; 10 anyana kaBani adiña 642; 11 anyana kaBebayi adiña 623; 12 anyana kaAzigadi adiña 1,222; 13 anyana kaAdonikami adiña 666; 14 anyana kaBigivayi adiña 2,056; 15 anyana kaAdini adiña 454; 16 anyana kaAteri, amudi Hezekiya adiña 98; 17 anyana kaBezayi adiña 323; 18 anyana kaYora adiña 112; 19 anyana kaHashumi+ adiña 223; 20 anyana kaGibari adiña 95; 21 anyana akuBetelemi adiña 123; 22 amayala akuNetofa adiña 56; 23 amayala akuAnatoti+ adiña 128; 24 anyana kaAzimaveti adiña 42; 25 anyana akuKiriyati Yeyarimi, kuKefira nikuBeyeroti adiña 743; 26 anyana akuRama+ nikuGeba+ adiña 621; 27 amayala akuMikimasi adiña 122; 28 amayala akuBeteli niAyi+ adiña 223; 29 anyana kaNebo+ adiña 52; 30 anyana kaMagibishi adiña 156; 31 anyana kaElami mukwawu adiña 1,254; 32 anyana kaHarimi adiña 320; 33 anyana akuLodi, kuHadidi nikuOno adiña 725; 34 anyana akuYeriku adiña 345; 35 anyana kaSenaya adiña 3,630.

36 Atupristu:+ anyana kaYedaya+ amwitala daYeshuwa+ adiña 973; 37 anyana kaImeri+ adiña 1,052; 38 anyana kaPashihuri+ adiña 1,247; 39 anyana kaHarimi+ adiña 1,017.

40 ALevi:+ anyana kaYeshuwa niKadimiyeli,+ amudi anyana kaHodaviya adiña 74. 41 Añimbi:+ anyana kaAsafi+ adiña 128. 42 Awa diwu anyana kawakakuhemba kuchiisu:+ anyana kaShalumi, anyana kaAteri, anyana kaTalimoni,+ anyana kaAkubi,+ anyana kaHatita nianyana kaShobayi, ejima hamu adiña 139.

43 Ambuña ahatembeli:*+ anyana kaZiha, anyana kaHasufa, anyana kaTabawoti, 44 anyana kaKerosi, anyana kaSiyaha, anyana kaPadoni, 45 anyana kaLebana, anyana kaHagaba, anyana kaAkubi, 46 anyana kaHagabi, anyana kaSalimayi, anyana kaHanani, 47 anyana kaGideli, anyana kaGahari, anyana kaReyaya, 48 anyana kaRezini, anyana kaNekoda, anyana kaGazami, 49 anyana kaUza, anyana kaPaseya, anyana kaBesayi, 50 anyana kaAsina, anyana kaMeyuni, anyana kaNefusimi, 51 anyana kaBakibuki, anyana kaHakufa, anyana kaHarihuri, 52 anyana kaBaziluti, anyana kaMehida, anyana kaHarisha, 53 anyana kaBarikosi, anyana kaSisera, anyana kaTema, 54 anyana kaNeziya nianyana kaHatifa.

55 Anyana kawambuña aSolomoni: anyana kaSotayi, anyana kaSofereti, anyana kaPeruda,+ 56 anyana kaYayalahi, anyana kaDarikoni, anyana kaGideli, 57 anyana kaShefatiya, anyana kaHatili, anyana kaPokereti Hazebayimi nianyana kaAmi.

58 Ambuña ahatembeli* ejima kushilahu nianyana kawambuña aSolomoni adiña 392.

59 Awa diwu antu afumini kuTeli Mela, kuTeli Harisha, kuKirubi, kuAdoni nikuImeri, ilaña akañenyi kwiluka yisaka yakukatata yawu nikwafuminiwu, neyi chakwila adiña aIsarela hela nehi:+ 60 anyana kaDelaya, anyana kaTobaya, anyana kaNekoda, ejima hamu adiña 652. 61 Nawa mudi anyana kawatupristu awamayala mwadiña awa: anyana kaHabaya, anyana kaHakozi,+ anyana kaBazilayi, owu wasumbwili mumbanda mudi anyana kaBazilayi+ wakuGiliyadi nawa Bazilayi wadituumbili ijina dachisaka chañodindi. 62 Awa antu akeñakeñeli nsañu yasonekawu kulonda eluki ndonda yachisaka chawu, ilaña ayiwanini wanyi, dichi ayifumishili hamudimu wawupristu.*+ 63 Nguvulu* wayilejeli nindi bayi ada yuma yajila chikupuku,+ sampu kunekali kapristu wakwihula Urimi naTumimi.+

64 Chipompelu chejima chadiña nawantu 42,360,+ 65 kufumishaku anduñu jawu awamayala niawambanda adiña 7,337; adiña ninawañimbi awamayala niawambanda 200. 66 Tuwalu twawu twadiña 736, yingongavalu yawu yadiña 245, 67 angameli awu adiña 435 niayimbuulu awu adiña 6,720.

68 Chashikiliwu kwitala daYehova muYerusalema, anlomboli amakwawu anyitaña ahanini nyilambu yakudikeñela+ yetala daNzambi walala kulonda adituñulwili* heluña dadu.+ 69 Kwesekeja nayuma yadiñawu nayu, ahanini madirakima* awuru 61,000, mamina*+ asiliva 5,000 ninyinkukumba 100 yawatupristu kuchisweku chayuma yalema yamudimu. 70 Nawa atupristu, aLevi, antu amakwawu, añimbi, akakuhemba kuchiisu niambuña ahatembeli* ashakamini munyisumba yawu niaIsarela ejima ashalilihu ashakamini munyisumba yawu.+

3 Kakweji kamu 7+ chikashikili henohu aIsarela* adi dehi munyisumba yawu, adipompesheli hamu muYerusalema nayitoñojoka yimu. 2 Yeshuwa+ mwana kaYehozadaki hamu niakwawu atupristu niZerubabeli+ mwana kaSheyalitiyeli+ niamanakwindi, anyamukili nakumutuñila Nzambi yaIsarela kameña kulonda alambwileñahu nyilambu yakushita neyi chasonekawu muNshimbi jaMosi+ muntu waNzambi walala.

3 Dichi atuñili kameña heluña hikadiña hakusambila hela chakwila atiyileña woma antu amumatuña adikumashanini nawu,+ nawa atachikili kulambula nyilambu yakushita kudi Yehova, nyilambu yakushita+ yantetemena niyamelela. 4 Kufumahu, ekalili naChawija chaYisolu* kwesekeja nachasonekawu,+ nawa hefuku-hefuku alambwileña nyilambu yakushita kwesekeja nakuvula kwanyilambu yakeñekeleña hefuku-hefuku.+ 5 Kuhiñahu, alambwili mulambu wakushita+ wakulambula mpinji yejima ninyilambu yahatukweji twatuha+ ninyilambu yayawija+ yejima yajila yaYehova yahayilaaka, kushilahu ninyilambu yahanineñawu antu ejima kudi Yehova chakudikeñela.+ 6 Kufuma hefuku datachi dakakweji kamu 7,+ atachikili kumulambula Yehova nyilambu yakushita, hela chakwila haniyi mpinji chikuku chatembeli yaYehova adiña kanda achaali.

7 Anoneli mali nakwinka akakuketula malola+ niakawukalawenu+ nawa ahanini yakuda, yakunwa nimanji kudi eni Sidoni niaTira muloña aleteli nyitondu yanyisida kufuma kuLebanoni nakwinza kuYopa+ kuzatisha kaluñalwiji, kwesekeja nalusesa lwayinkeliwu kudi Mwanta Kirusi wakuPeresi.+

8 Muchaaka chamuchiyedi hanyima yakwila anenzi dehi kwitala daNzambi walala kuYerusalema, mukakweji kamuchiyedi, Zerubabeli mwana kaSheyalitiyeli, Yeshuwa mwana kaYehozadaki niamanakwawu ejima, atupristu, aLevi niantu ejima owu enjili kuYerusalema kufuma muwuduñu,+ atachikili kuzata mudimu. Atondeli aLevi kutachikila hadi adiña nayaaka 20 nakuya hewulu kulonda ekali atupitawu akutala mudimu wakwitala daYehova. 9 Dichi Yeshuwa, anyanindi awamayala niamanakwindi, Kadimiyeli nianyanindi awamayala, anyana kaYuda awamayala adibombeli hamu nawanyana kaHenadadi awamayala,+ anyanawu awamayala niamanakwawu aLevi kulonda ataleña antu anakuzata mudimu mwitala daNzambi walala.

10 Chelili akakutuña anaali dehi chikuku chatembeli yaYehova,+ hohenohu atupristu avwalili yakuvwala yawupristu iku adi najimpuña,+ niaLevi anyana kaAsafi awamayala iku adi nayifwoyu, emeni nakumuhameka Yehova kwesekeja nalushimbi lwaMwanta Davidi waIsarela.+ 11 Nawa atachikili kwimba nakuditambwila+ nakumuhameka nikumusakilila Yehova, “muloña himuwahi; kukeña kwindi kwakashinshi kwakukeña Isarela kwahaya nyaaka.”+ Kufumahu, antu ejima abidikili nezu datiyakana nakumuhameka Yehova muloña chikuku chetala daYehova achaalili. 12 Atupristu amavulu, aLevi nianlomboli janyitaña, akulumpi amweni chadiña itala dadikulu,+ adilili makumbu chamweniwu chikuku chanidi itala anakuchaala, iku antu amakwawu amavulu anakudikuwa namuzañalu.+ 13 Dichi antu akañenyi kwaambula mazu awantu adikuwileña namuzañalu namazu awantu adilileña, muloña antu abidikileña chikupu chakwila mazu atiyakeneña kwakulehi.

4 Ayilumbu jaYuda niBenjamini+ chatiyiliwu nawu antu afuntili kufuma muwunkoli+ anakumutuñila Yehova Nzambi yaIsarela tembeli, 2 hohenohu ayili kudi Zerubabeli nikudi anlomboli janyitaña yawu nakuyila nawu: “Tutuñilenu hamu nenu itala; muloña twadifukulaña* kudi Nzambi yenu+ neyi chimwelaña enu nawa twamulambulaña nyilambu kufuma tuhu mumafuku aMwanta Esahadoni+ wakuAsiriya, watuleteli kunu.”+ 3 Ilaña Zerubabeli niYeshuwa hamu nianlomboli amakwawu anyitaña yawaIsarela ayilejeli nawu: “Enu himukweti lusesa lwakutuña hamu nanetu itala daNzambi yetuku,+ muloña yetu hohu nkawetu tukumutuñila Yehova Nzambi yaIsarela itala kwesekeja nachinatulejiyi Mwanta Kirusi wakuPeresi.”+

4 Dichi antu amunodu ituña atwalekelihu kuzeyesha* antu amuYuda nikuyifuntisha hanyima mumudimu wakutuña.+ 5 Enkeli akakulejana maana majika kanwa* kulonda ayimakeni nakuluwañesha yuma yakeñeleñawu kwila+ mumafuku ejima aMwanta Kirusi wakuPeresi kushika nikuchiyuulu chaDariyusi+ mwanta wakuPeresi. 6 Kukutachika kwachiyuulu chaAhasuwerusi, asonekeli mukanda wakwinka muloña antu ashakamineña muYuda nimuYerusalema. 7 Nawa mumafuku aMwanta Atazakisheshi wakuPeresi, Bishilami, Mitiredati, Tabeyeli niamabwambu jindi amakwawu amusonekeleli mwanta Atazakisheshi mukanda; owu mukanda awubalumwini mwidimi dachiAramayiki,+ nakuwusoneka kuzatisha nsona jachiAramayiki.*

8 * Rehumi mukulumpi wawayilolu janfulumendi ninsoneki Shimishayi asonekeli mukanda kudi Mwanta Atazakisheshi kutalisha hadi Yerusalema neyi chinashimuni mazu analondelihu: 9 (Wafumini kudi Rehumi mukulumpi wawayilolu janfulumendi ninsoneki Shimishayi niamabwambu jawu amakwawu, dikwila nawu ansompeshi niayinlonda awanguvulu, ansoneki, antu akuEreki,+ akuBabiloni, antu ashakamineña muSusa,+ dikwila nawu aElami,+ 10 kushilahu ninyuza yikwawu yatwaliliwu muwunkoli kudi Asinapari muneni nawa alemesheliwu nakuyishakamisha munyisumba yaSamariya,+ nawa amakwawu wayishakamishili mwiluña daMwishinadi daKaloña.)* Dichi 11 iyi diyi nsañu yadiña mumukanda wamutemesheleliwu:

“Kudi eyi Mwanta Atazakisheshi, tambwilaku mukanda kufuma kudi etu ambuñeyi, amayala ashakamaña mwiluña daMwishinadi daKaloña: Dichi 12 eyi mwanta ilukaku chumichi neyi aYuda afumini kudi eyi nakwinza kunu kudi etu anashiki dehi kuYerusalema. Anakutuñulula musumba wenzala nayilwilu yakudikaña niyatama nawa hiyakumanisha kutuña mpwembu+ nikuwahisha yikuku. 13 Dichi eyi mwanta, ilukaku chumichi, neyi iwu musumba akuwutuñulula nawa mpwembu jawu akujimanisha kujituñulula, antu hiyakuhanaña nyisonku,+ nyilambu hela nyisonku yahamukwakwaku, nawa chumichi chikuletesha mali akehi muyisweku yawanyanta yayuma yalema. 14 Chineli twatambulaña wufwetu kufuma kuchipañu nawa hitunakukeña netu yuma yaneyi mwanta yikisikiku, dichi tunatemeshi wunu mukanda kulonda eyi mwanta wiluki chumichi, 15 kulonda wukeñakeñi mumukanda mwasonekawu nsañu yawankakulula jeyi.+ Muniwu mukanda mwasonekawu nsañu, wukuwanamu nsañu yakwila nawu iwu musumba wenzala nawakakudikaña, akoñaña yuma yatama kudi anyanta nikutubeta, nawa muniwu musumba dimwashakamineña antu asañumwineña antu kudikaña nanfulumendi kufuma kushankulu. Dihafumini iwu musumba awujilumuni.+ 16 Tunakukuleja eyi mwanta netu neyi iwu musumba akuwutuñulula nawa mpwembu jawu akujimanisha, eyi hiwakekala nawuswa* wakuyuula iluña didi Mwishinadi daKaloñaku.”+

17 Mwanta watemesheli mazu kudi Rehumi mukulumpi wawayilolu janfulumendi nikudi nsoneki Shimishayi nikudi amabwambu jawu amakwawu owu ashakamineña muSamariya nikwiluña dejima daMwishinadi daKaloña nindi:

“Kolenu mwani! 18 Mukanda wumwatutemeshela* anawutañi* chiwahi kumesu ami. 19 Naleja ambuñami kulonda akeñakeñi iyi nsañu, nawa awana nawu kufuma tuhu kunyaaka antu muniwu musumba adiña nakwimakena anyanta nawa mwadiña kudikaña niyilwilu yatama.+ 20 MuYerusalema mwadiña anyanta asweja ñovu ayuulileña iluña dejima daMwishinadi daKaloña nawa awa anyanta ayinkeleña nyisonku, nyilambu ninyisonku yahamukwakwa. 21 Dichi, hanenu lushimbi lwakulekesha owu amayala kuzata mudimu kulonda musumba abuli kuwutuñulula sampu ami nahani lushimbi. 22 Bayi mushintajala kwila chumichiku, kulonda yuma yamwanta abuli kuyikisañana cheñi.”+

23 Dichi, chamanishiliwu tuhu kutaña nsañu yadiña mumukanda waMwanta Atazakisheshi kumesu aRehumi, kumesu ansoneki Shimishayi nikumesu awamabwambu jawu, ayili swayi-swayi kuYerusalema kudi aYudeya nawa azatishili ñovu jawu kulonda ayilekeshi. 24 Hohenohu dihemeneni mudimu wakwitala daNzambi dadiña muYerusalema; nawa iwu mudimu wemeni kushika nimuchaaka chamuchiyedi chachiyuulu chaMwanta Dariyusi wakuPeresi.+

5 Kufumahu, kaprofwetu Hagayi+ nikaprofwetu Zekariya+ mwijikulu aIdo+ aprofweteli kudi aYudeya adiña muYuda nimuYerusalema mwijina daNzambi yaIsarela owu wadiña nawena. 2 Haniyi mpinji Zerubabeli+ mwana kaSheyalitiyeli niYeshuwa+ mwana kaYehozadaki dihatachikiliwu kutuñulula itala daNzambi+ dadiña muYerusalema; nawa atuprofwetu twaNzambi adiña hamu nawena nawa ayikwashileña.+ 3 Hanoyu mpinji, Tatenayi nguvulu weluña daMwishinadi daKaloña* hamu niShetabozenayi niakwawu enjili kudi wena nakuyihula nawu: “Hinyi wayinkeli lushimbi lwakutuñulula idi itala nikumanisha iwu mudimu?”* 4 Kuhiñahu, ayihwili nawu: “Amayala anakuzatila hanidi itala majina awu anyi?” 5 Ilaña Nzambi wayitalileña* akulumpi jawaYudeya+ nawa hiyayilekesheli kuzataku, sampu nichamutemesheleliwu Dariyusi mazu nawa kushika nimpinji yafuntishiliyi Dariyusi mukanda kutalisha haniyi nsañu.

6 Iyi diyi nsañu yadiña mumukanda wamutemesheleliwu Mwanta Dariyusi kudi Tatenayi nguvulu weluña daMwishinadi daKaloña hamu niShetabozenayi niakwawu, ayinlonda awanguvulu eluña daMwishinadi daKaloña; 7 atemesheli nsañu kudi yena nawa awa diwu mazu asonekeliwu:

“Kudi Mwanta Dariyusi:

“Kuwunda kwiikali naneyi! 8 Eyi mwanta ilukaku neyi etu twaya kukabeta kaYuda kwitala daNzambi muneni nawa twawana itala anakudituña namalola amaneni, nawa nyalachi anakuyaala mumbañu. Antu anakuzata mudimu neyena nawa mudimu wunakwenda chikupu muloña anakuzata nañovu. 9 Kufumahu, twahanjeka nawakulumpi jawu nakuyihula netu: ‘Hinyi wayinkeli lushimbi lwakutuñulula idi itala nikumanisha iwu mudimu?’*+ 10 Twayihula nimajina awu kulonda tukulejiwu nawa kulonda tusoneki majina awamayala anakulombola.

11 “Ichi dichatwakulawu nawu: ‘Etu tudi ambuña aNzambi yamawulu niiseki, nawa tunakutuñulula itala datuñiliwu dehi kunyima, odu datuñiliwu nikudimanisha+ kudi mwanta wabadika waIsarela. 12 Hela chochu, hamuloña wakwila ankakulula jetu amuzuwishili Nzambi yamawulu,+ wayihanini muchikasa chaMwanta Nebukaneza+ wakuBabiloni, mwini Kalideya, owu wahumwini adinu itala+ nikusenda antu nakuyitwala muwunkoli kuBabiloni.+ 13 Ilaña, muchaaka chatachi chachiyuulu chaMwanta Kirusi wakuBabiloni, Mwanta Kirusi wahanini lushimbi lwakutuñulula adinu itala.+ 14 Kubombelahu, Mwanta Kirusi wasendeli yuma yawuru niyasiliva mutembeli yakuBabiloni, yamwitala daNzambi oyu yasendeliyi Nebukaneza mutembeli muYerusalema nakuyileta kutembeli yakuBabiloni.+ Iyi yuma wayihanini kudi iyala wejina daSheshibazari,*+ owu elishiliwu kwikala nguvulu+ kudi Kirusi. 15 Kirusi wamulejeli nindi: “Sendaku iyi yuma. Yaña, wuyitenteki mutembeli yidi muYerusalema, nawa itala daNzambi adituñulwilili heluña hidadiña hakusambila.”+ 16 Kufumahu, iwu Sheshibazari wenjili nawa waalili yikuku yetala daNzambi+ didi muYerusalema. Nawa idi itala achidi kudituña kufuma hanoyu mpinji kushika nikulelu, ilaña kanda dimani.’+

17 “Dichi neyi eyi mwanta wunamoni neyi ichi chuma chidi chiwahi, temeshaku muntu ayi nakukeñakeña nsañu muchisweku chawanta chayuma yalema chidi muBabiloni, kulonda eluki neyi chakwila Mwanta Kirusi wahanini lushimbi lwakutuñulula adina itala daNzambi muYerusalema.+ Nawa mwejima mukufuukulayi mwanta haniyi nsañu atuleji.”

6 Dichi Mwanta Dariyusi wahanini lushimbi nawa akeñakeñeli muyisweku* mwatentekeliwu yuma yalema muBabiloni. 2 Kufumahu, awanini muvuñilu mwitala dakiñewa kuEkibatana, kukabeta kaMediya nawa asonekeli iwu mukanda mwadiña mazu akwila nawu:

3 “Muchaaka chatachi chachiyuulu chaMwanta Kirusi, Mwanta Kirusi wahanini lushimbi kutalisha hetala daNzambi muYerusalema+ nindi: ‘Itala adituñululi kulonda diikali iluña dakulambwilahu nyilambu, nawa yikuku yadu atela kuyaala. Kuleha kwadu kwiwulu datela kwikala makyubiti 60,* muwihi makyubiti 60,+ 4 akadituñi nanyisululu yisatu yamalola amaneni nimusululu wumu wanyalachi;+ nawa mali akufweta kuniyi yuma akafumi mwitala damwanta.+ 5 Nawa yuma yawuru niyasiliva yamwitala daNzambi yasendeliyi Nebukaneza kufuma mutembeli yadiña muYerusalema nakuyileta kuBabiloni+ ayifuntishi kulonda akayishi mwiluña dayu mutembeli muYerusalema nawa akayitenteki mwitala daNzambi.’+

6 “Dichi eyi Tatenayi nguvulu weluña daMwishinadi daKaloña,* hamu niShetabozenayi niamabwambu jenu, ayinlonda awanguvulu amwiluña daMwishinadi daKaloña,+ bayi muya kwokuku. 7 Bayi muluwañesha mudimu wetala daNzambiku. Nguvulu wawaYudeya niakulumpi jawaYudeya akatuñulula adina itala daNzambi heluña hidadiña hakusambila. 8 Kubombelahu, ilu dilushimbi lwinnakuhana hachimwatela kuyila awa akulumpi jawaYudeya hakutuñulula adina itala daNzambi: Mali akufuma muchisweku chawanta chayuma yalema,+ dikwila nawu hanyisonku yatambwiliwu mwiluña daMwishinadi daKaloña, atela kuyihana swayi-swayi kudi awa amayala kulonda atwalekihu kuzata mudimu chakadi kuleka.+ 9 Nawa yuma yejima yinakukeñeka, anyana kañombi ayizamba,+ anyikoku ayizamba+ nianyana kanyikoku+ anyilambu yakushita yakumulambula Nzambi wamwiwulu, hela tidiku,+ muñwa,+ vinyu+ nimanji+ muyinkeña, kwesekeja nachikahoshawu atupristu adi muYerusalema. Mwatela kutwalekahu kuyinka hefuku-hefuku chakadi kuleka, 10 kulonda atwalekihu kulambula nyilambu yamuzañaleshaña Nzambi yamawulu nikumulombelaku mwanta nianyanindi awamayala.+ 11 Nahani ninilu lushimbi nami, muntu wejima wakafumpa ilu lushimbi, kwitala dindi akaholiku mwalachi nawa owu muntu akamunyamuni nakumukasilaku,* nawa itala dindi akadibalumuna nakwikala musalanyi* wawantu ejima muloña wanichi chiluwa. 12 Nawa Nzambi wunelishi ijina dindi kushakama mwenomu,+ akajilumuni mwanta wudi wejima niantu akafwila kufumpa ilu lushimbi nikukisañana adina itala daNzambi didi muYerusalema. Ami Dariyusi nahani ilu lushimbi. Chumichi chizatiki swayi-swayi.”

13 Kuhiñahu, Tatenayi nguvulu weluña daMwishinadi daKaloña, hamu niShetabozenayi+ niakwawu anyakeli kwila mwejima mwashimwiniyi Mwanta Dariyusi. 14 Nawa akulumpi jawaYudeya atwalekelihu kutuña nawa mudimu wayileña hambidi,+ muloña ayikolesheli namazu aprofweteliyi kaprofwetu Hagayi+ niZekariya+ mwijikulu aIdo. Amanishili kutuña itala kwesekeja nalushimbi lwaheniyi Nzambi yaIsarela+ nikwesekeja nalushimbi lwaKirusi+ niDariyusi+ niMwanta Atazakisheshi+ wakuPeresi. 15 Amanishili kutuña idi itala hefuku damuchisatu dakakweji kaAdari,* muchaaka chamu 6 chachiyuulu chaMwanta Dariyusi.

16 Kufumahu, aIsarela, atupristu, aLevi+ niantu amakwawu afumini muwunkoli, ahanini idi itala daNzambi namuzañalu. 17 Nawa hakuhana idi itala daNzambi, antu aleteli ayizamba awañombi 100, ayizamba anyikoku 200, anyana kanyikoku 400 nawa aleteli niayizamba awampembi 12 amulambu wahanshidi yawaIsarela ejima, kwesekeni nakuvula kwanyichidi yaIsarela.+ 18 Nawa atondeli atupristu mumazanvu awu niaLevi mumazanvu awu kulonda azateña mudimu waNzambi muYerusalema,+ kwesekeja nachasonekawu mumukanda waMosi.+

19 Nawa antu afumini muwunkoli, ekalili naChipandakenu hefuku damu 14 dakakweji katachi.+ 20 Atupristu niaLevi ejima wawu aditookesheli,+ dichi wejima wawu adiña akadi majilu; ajahili chimuna wamulambu waChipandakenu wawantu ejima afumini muwunkoli, wawakwawu atupristu niwawu awenawu. 21 Kuhiñahu, aIsarela owu afumini muwunkoli adiili owu chimuna hamu namuntu wejima wadibombeli nawu nawa wadaambwili kumajilu awakanyuza amunodu ituña kulonda adifukuleña* kudi Yehova Nzambi yaIsarela.+ 22 Nawa ekalili naChawija chaMankendi Akadi Iluñi+ hadi mafuku 7 namuzañalu chikupu, muloña Yehova wayikojejeli kuzañalala nawa welishili muchima wamwanta wakuAsiriya kuyitiya kuwaha+ chakwila wayikwashiliku* mumudimu wetala daNzambi walala, Nzambi yaIsarela.

7 Hanyima yayumiyi, mumpinji yachiyuulu chaMwanta Atazakisheshi+ wakuPeresi, Ezera*+ wafuntili. Wadiña mwana kaSeraya,+ Seraya mwana kaAzariya, Azariya mwana kaHilikiya,+ 2 Hilikiya mwana kaShalumi, Shalumi mwana kaZadoki, Zadoki mwana kaAhitubi, 3 Ahitubi mwana kaAmariya, Amariya mwana kaAzariya,+ Azariya mwana kaMerayoti, 4 Merayoti mwana kaZerahiya, Zerahiya mwana kaUzi, Uzi mwana kaBuki, 5 Buki mwana kaAbishuwa, Abishuwa mwana kaFinihasi,+ Finihasi mwana kaEleyazari,+ Eleyazari mwana kaAroni+ kapristu muneni. 6 Yeniwu Ezera wafumini kuBabiloni. Wadiña mukakukopolola* welukili chikupu* Nshimbi jaMosi,+ jahaniniyi Yehova Nzambi yaIsarela. Mwanta wamwinkeli yuma yejima yalombeliyi, muloña chikasa chaYehova Nzambi yindi chadiña hadi yena.

7 AIsarela amakwawu, atupristu, aLevi,+ añimbi,+ akakuhemba kuchiisu+ niambuña ahatembeli,*+ akandukili nakuya kuYerusalema muchaaka chamu 7 chachiyuulu chaMwanta Atazakisheshi. 8 Nawa Ezera wenjili kuYerusalema mukakweji kamuchitanu, muchaaka chamu 7 chachiyuulu chamwanta. 9 Wanyamukili kuBabiloni hefuku datachi dakakweji katachi nawa washikili muYerusalema hefuku datachi dakakweji kamuchitanu, muloña chikasa chachiwahi chaNzambi yindi chadiña hadi yena.+ 10 Ezera waloñesheli muchima windi* kulonda akeñakeñi Nshimbi jaYehova nikujizatisha+ nikudizisha kuleja kwayu niwunsompeshi muIsarela.+

11 Iyi diyi nsañu yadiña mumukanda wahaniniyi Mwanta Atazakisheshi kudi kapristu Ezera nawa mukakukopolola,* wadiza* chikupu kuleja kwaYehova ninshimbi jindi jayinkeliyi aIsarela:

12 * “Ami Atazakisheshi+ mwanta wawanyanta, kudi eyi kapristu Ezera, mukakukopolola* Nshimbi jaNzambi yamawulu: Kuwunda kwakweni kwiikali naneyi. Nawa ichi 13 nahani lushimbi nami muntu wejima hadi antu jaIsarela niatupristu awu niaLevi mwahita wanta wami wunakukeña kuya hamu naneyi kuYerusalema, watela kuya.+ 14 Muloña ami mwanta hamu niantu jami 7 akakunleja maana tunakutumi kulonda wuyi nakutala neyi Nshimbi jaNzambi yeyi jiwukweti,* anakujilondela muYuda nimuYerusalema, 15 nikutwala siliva niwuru yinnahani ami mwanta mukudikeñela hamu nawantu jami akakunleja maana kudi Nzambi yaIsarela, washakamaña muYerusalema. 16 Wusendi nisiliva niwuru yejima yiwunakutambula* mwahita kabeta kejima kaBabiloni, hamu nichawaana chahanañawu antu niatupristu mukudikeñela kwitala daNzambi yawu didi muYerusalema.+ 17 Nawa munawa mali wakanyakali kulandamu ayizamba awañombi,+ ayizamba anyikoku,+ anyana kanyikoku,+ hamu ninyilambu yawu yambutu+ ninyilambu yawu yavinyu,+ nawa wakalambuli yumiyi hakameña kakwitala daNzambi yeyi muYerusalema.

18 “Nawa yuma yejima yiwakamona neyi yidi chiwahi kuyila kudi eyi niamanakweyi, mwatela kuyila kuzatisha siliva niwuru yakashalahu, kwesekeja nankeñelu yaNzambi yenu. 19 Nawa yuma yejima yakakwinkawu yakuzata nachu mudimu wakwitala daNzambi yeyi, wakayitwali kumesu aNzambi kuYerusalema.+ 20 Nawa yuma yikwawu yejima yiwatela kuhana yakakeñekaña kwitala daNzambi yeyi, wakahani yumoyu kufuma muchisweku chawanta chayuma yalema.+

21 “Ami Mwanta Atazakisheshi, nahani lushimbi kudi ejima akakuhemba yuma yalema mwiluña daMwishinadi daKaloña* nami, yuma yejima yikuyilombayi kapristu Ezera,+ mukakukopolola* Nshimbi jaNzambi yamawulu, mwatela kwila mwenomu swayi-swayi, 22 kushika kuntalenta* jasiliva 100, yipimu yansaba* 100 yatidiku, nyilondu* yavinyu 100,+ nyilondu yamanji 100+ nimuñwa+ wakukañanya kupima. 23 Dichi yuma yejima yinashimuniyi Nzambi yamawulu yinakundami kwitala daNzambi yamawulu,+ ayizati neyena kulonda kuzuwa kubuli kwinza mwahita wanta wamwanta nihadi anyanindi.+ 24 Nawa nayileji cheñi nami, atupristu niaLevi, akakwimba yisanji,+ akakuhemba kuchiisu, ambuña ahatembeli*+ niakakukalakela hanidi itala daNzambi, bayi muyifwetesha musonku wudi wejima hela mulambu+ hela musonku wahamukwakwaku.

25 “Nawa eyi Ezera, kwesekeja namaana iwukweti afuma kudi Nzambi,* tondaku ayilolu amuchota niansompeshi akusompesha antu ejima adi mwiluña daMwishinadi daKaloña, ejima eluka nshimbi jaNzambi yeyi. Nawa muntu wejima wabula kwiluka iji nshimbi, watela kumudizishaju.+ 26 Muntu wejima wabulaña kulondela Nshimbi jaNzambi yeyi nilushimbi lwamwanta atela kumusompesha chakadi kulaba, kulonda eluki neyi chakwila watelela kufwa, kumuhaña, kumufwetesha hela kumukasa.”

27 Yehova Nzambi yawankakulula jetu ashimekewi, wunashi mumuchima wamwanta chuma chakuwahisha itala daYehova muYerusalema!+ 28 Nawa yena nammwekesheli kukeña kwakashinshi kumesu amwanta+ nikumesu awakakumuleja maana+ nikumesu awayilolu ejima amwanta añovu. Dichi nahamukili* muloña chikasa chaYehova Nzambi yami chadiña hadi ami, nawa mukachi kawaIsarela natondelimu amayala akulombola* akukanduka hamu nanami kuYerusalema.

8 Dichi, awa diwu adiña anlomboli janyitaña nindonda yayisaka yasonekeliwu yakandukili nakuya hamu nanami kufuma kuBabiloni mumpinji yachiyuulu chaMwanta Atazakisheshi:+ 2 mudi anyana kaFinihasi,+ mwafumini Geshomu; mudi anyana kaItamari,+ mwafumini Danyeli; mudi anyana kaDavidi, mwafumini Hatushi; 3 mudi anyana kaShekaniya, amudi anyana kaParoshi, mwafumini Zekariya, nawa yena wadiña nawamayala 150 asonekeliwu; 4 mudi anyana kaPahati Mowabi,+ mwafumini Eliyeho Enayi mwana kaZerahiya, nawa yena wadiña nawamayala 200; 5 mudi anyana kaZatu,+ mwafumini Shekaniya mwana kaYahaziyeli, nawa wadiña nawamayala 300; 6 mudi anyana kaAdini,+ mwafumini Ebedi mwana kaYonatani, nawa yena wadiña nawamayala 50; 7 mudi anyana kaElamu,+ mwafumini Yeshaya mwana kaAtaliya, nawa yena wadiña nawamayala 70; 8 mudi anyana kaShefatiya,+ mwafumini Zebadiya mwana kaMikayeli, nawa yena wadiña nawamayala 80; 9 mudi anyana kaYowabi, mwafumini Obadiya mwana kaYehiyeli, nawa yena wadiña nawamayala 218; 10 mudi anyana kaBani, mwafumini Shelomiti mwana kaYosifiya, nawa yena wadiña nawamayala 160; 11 mudi anyana kaBebayi,+ mwafumini Zekariya mwana kaBebayi, nawa yena wadiña nawamayala 28; 12 mudi anyana kaAzigadi,+ mwafumini Yohanani mwana kaHakatani, nawa yena wadiña nawamayala 110; 13 mudi anyana kaAdonikami,+ owu akumininiku, awa diwu adiña majina awu: Elifeleti, Yeyeli niShemaya, nawa wena adiña nawamayala 60; 14 nawa mudi anyana kaBigivayi,+ mwafumini Utayi niZabudi, nawa wena adiña nawamayala 70.

15 Nayipompesheli kukaloña kaya kuAhava+ nawa twateekeleli kwenoku hadi mafuku asatu. Ilaña chinashinshikili hakachi kanowu antu niatupristu, hinamwenihu kaLeviku. 16 Dichi natambikili Eliyezeri, Ariyeli, Shemaya, Elinatani, Yaribi, Elinatani, Natani, Zekariya niMeshulami, amayala adiña nakulombola nawa natambikili niYoyaribi niElinatani owu adiña akakutañisha. 17 Kuhiñahu, nayinkeli lushimbi kutalisha hadi Ido nlomboli wamwiluña datenañawu nawu Kasifiya. Nayilejeli nami amuleji Ido niamanakwindi, ambuña ahatembeli* adiña muKasifiya kulonda atuleteli akakukalakala kwitala daNzambi yetu. 18 Chineli chikasa chachiwahi chaNzambi yetu chadiña hadi etu, aleteli iyala mukamaana kufuma hadi anyana avweliwu kudi Mahili+ mwijikulu aLevi mwana kaIsarela. Ijina daniwu iyala wadiña Sherebiya+ nianyanindi niamanakwindi, ejima hamu adiña amayala 18; 19 niHashabiya hamu naYeshaya mwini Merari,+ amanakwindi nianyanindi, ejima hamu adiña amayala 20. 20 Nawa kwadiña ambuña ahatembeli* 220 enkeliwu mudimu kudi Davidi niayilolu wakukalakela aLevi, owu ejima asonekeliwu mumukanda hamajina.

21 Kufumahu, nayilejeli nami ashakami chakadi kuda kukaloña kaAhava, kulonda tudizozi kumesu aNzambi yetu nikumulomba kulonda atulomboli halwendu lwetu, etu nianyanetu kushilahu niyuma yetu yejima. 22 Natiyili nsonyi yakumulomba mwanta amashidika niakakwendela hatuwalu kulonda atukiñi kudi ayilumbu halwendu, muloña twamulejeli mwanta netu: “Chikasa chachiwahi chaNzambi yetu chidi hadi antu ejima anakumukeñakeña,+ ilaña ñovu jindi nikuzuwa kwindi jidi hadi antu ejima anakumushiya.”+ 23 Dichi twashakamini chakadi kuda nawa twamulombeli Nzambi hachumichi, dichi yena watiyilili kukulemba kwetu.+

24 Ichi naambuli akulumpi jawatupristu 12, aSherebiya naHashabiya+ kushilahu niamanakwawu 10. 25 Kufumahu, nayipiminini siliva niwuru niyuma, yawaana yahaniniwu kwitala daNzambi kudi mwanta nikudi akakumuleja maana niatupristu indi niaIsarela ejima adiñahu.+ 26 Dichi nayipiminini mumakasa awu ntalenta* jasiliva 650, yuma yasiliva 100 yalemeni ntalenta jiyedi, ntalenta jawuru 100, 27 yeña yanyanya yakunama yawuru 20 yalemeni madariki* 1,000, niyuma yiyedi yawuneñu wawuwahi, wuchinana wakejima nawa iyi yuma yalemeni wuseya neyi wuru.

28 Kuhiñahu, nayilejeli nami: “Enu mudi ajila kudi Yehova+ niyuma niyena yajila, nawa siliva niwuru himulambu wakudikeñela kudi Yehova Nzambi yawankakulula jenu. 29 Yihembenu chiwahi sampu munayipimini kumesu awakulumpi jawatupristu nikumesu awaLevi niawayilolu akunyitaña yawaIsarela muYerusalema,+ mutupeka* twamwitala daYehova.” 30 Nawa atupristu niaLevi asendeli siliva niwuru niyuma yayipimininiwu kulonda ayileti kuYerusalema kwitala daNzambi yetu.

31 Nkumininaku, twafumini kukaloña kaAhava+ hefuku damu 12 dakakweji katachi+ nakuya kuYerusalema nawa chikasa chaNzambi yetu chadiña hadi etu, nawa watwamwinini muchikasa chachilumbu nikudi antu atubelaminini munjila. 32 Dichi twenjili kuYerusalema+ nawa twashakaminiku mafuku asatu. 33 Kufumahu, hefuku damuchiwana, twapimini siliva niwuru niyipwepu mwitala daNzambi+ yetu nawa twayihanini kudi Meremoti+ mwana kakapristu Uraya. Meremoti wadiña naEleyazari mwana kaFinihasi nawa adiña hamu nawaLevi, Yozabadi+ mwana kaYeshuwa niNowadiya mwana kaBinuyi.+ 34 Yuma yejima ayichindili nikuyipima, nawa asonekeli kulema kwayuma yejima. 35 Antu afumineña muwunkoli mwituña dacheñi, alambwili nyilambu yakushita kudi Nzambi yaIsarela, ayizamba awañombi 12+ awaIsarela ejima, ayizamba anyikoku 96,+ anyana kanyikoku ayizamba 77 niayizamba awampembi 12+ amulambu wahanshidi. Yejimiyi yadiña yamulambu wakushita wakumulambula Yehova.+

36 Kuhiñahu, twahanini nshimbi jamwanta+ kudi añimeni jamwanta nikudi anguvulu amwiluña daMwishinadi daKaloña,*+ nawa wena akwashili antu niitala daNzambi walala.+

9 Nawa chelili tuhu yumiyi yinazatiki dehi, ayilolu anwanini nakunleja nawu: “Antu jaIsarela niatupristu niaLevi hiyanadaambuli kudi antu amumatuña adikumashana nawu nikuyilwilu yawu yawuzondu,+ yawaKenani, yawaHiti, yawaPerizi, yawaYebusi, yawaAmoni, yawaMowabi, yawaEjipitu+ niyawaAmoriku.+ 2 Anasumbuli anyana awambanda aniyi nyuza kulonda ekali añodi jawu niañodi jawanyanawu awamayala.+ Dichi wena, anyana*+ ajila, anadibombi nawantu amumatuña.+ Ayilolu niayinlonda awanyuuli diwu anasweji kuvulumuna nankashi muniyi nshidi.”

3 Dichi chinatiyili tuhu iyi nsañu, natabwili chakuvwala chami nichakuvwala chami chakadi makasa nawa nabwitili nsuki jikwawu jakumutu wami niwevu wami nawa nashakamini iku maana anankumi. 4 Kuhiñahu, antu ejima alemesheleña* mazu aNzambi yaIsarela, apompeli nakunyeñumuka muloña antu afumini muwunkoli hiyadiña ashinshikaku. Haniyi mpinji, nadiña nashakama iku maana anankumi sampu nichashikili mpinji yakulambwilahu mulambu wambutu wamelela.+

5 Nawa hampinji yakulambula mulambu wambutu wamelela,+ nanyamukili hinashakamini iku naneñi nawa iku chakuvwala chami nichakuvwala chami chakadi makasa chakutabula. Kuhiñahu, nafukamini nakwolwela makasa ami kudi Yehova Nzambi yami. 6 Dichi nahosheli nami: “Eyi Nzambi yami, natiyi nsonyi nawa nasawuki hakufumbula mesu ami kudi eyi, eyi Nzambi yami, muloña yiluwa yetu yinavuli kubadika nihanyitu yetu nawa nshidi jetu jinasweji kuvula kushika nimumawulu.+ 7 Kufuma mumafuku awankakulula jetu kushika nikulelu, nshidi jetu jinaswejeliku;+ nawa hamuloña wayiluwa yetu, etu, anyanta jetu niatupristu etu, anatuhani kumakasa awanyanta jamatuña, kumpoku yakabali,+ muwunkoli+ nawa anatuhani kulonda atupuupi+ nikututiyisha nsonyi, neyi chichidi dalelu.+ 8 Ilaña ichi, eyi Yehova Nzambi yetu, hanahiti kapinji kantesha kufuma hiwatutiya kuwaha nakutupulwisha etu twashalahu nikutwinka chifulu chakiñewa mwiluña deyi dajila,+ kulonda tuzañalali, eyi Nzambi yetu, nikutunookesha chantesha muwuduñu wetu. 9 Muloña hela chakwila etu tudi anduñu,+ eyi Nzambi yetu hiwunatushiyi chisayikila muwuduñu wetuku; ilaña wunatumwekesheli kukeña kwakashinshi kumesu awanyanta jaPeresi,+ nakutwinka cheñi ñovu kulonda tutuñi itala daNzambi yetu,+ kuwahisha hidakisika nikutukiña* muYuda nimuYerusalema.

10 “Ilaña ichi, eyi Nzambi yetu, tukuhosha netudi hanyima yayumiyi? Muloña tunashiyi nshimbi jeyi, 11 jiwatwinkeli kuhitila mudi ambuñeyi atuprofwetu, nakuhosha neyi: “Ituña dimunakuya nakutambula kulonda diikali iheta denu, hiituña damajilu muloña wamajilu awantu amumatuña, muloña wayilwilu yawu yawuzondu+ yinenzeshiwu mwituña kufuma kunsa yimu nakushika kunsa yikwawu. 12 Dichi, bayi muhana anyanenu awambanda kudi anyanawu awamayalaku, nawa bayi mwiteja anyanawu awambanda kuyisumbula kudi anyanenu awamayalaku;+ nawa bayi mwakafwila kuleta kuwunda hakachi kenu nawena hela kufwila chihandilu chawuku,+ kulonda mwakekali nañovu nikuda yuma yayiwahi yamunidi ituña nawa mwakayishilidu anyanenu awamayala dakekali iheta dawu haya nyaaka.’ 13 Nawa hanyima yayuma yejima yinatumwekeni muloña wayilwilu yetu yatama nihamuloña wanshidi yetu yasweja, eyi Nzambi yetu, hiwunatukoñi kwesekeja nakuluwa kwetuku,+ nawa wuneteji amakwawu hakachi ketu kupuluka,+ 14 hanu dinu tufumpi cheñi nshimbi jeyi nikusumbwañana nawantu akoñaña iyi yuma yawuzondu?+ Komana chumichi hichikukuletesha eyi kutuzuwila nankashi nakutujilumuna wejima wetu chakadi kushiyahu hela wumu hadi etu ashalahuku, tahindi? 15 Eyi Yehova Nzambi yaIsarela, eyi waloña,+ muloña etu twashalahu tunapuluki kushika nikwifuku dalelu. Talaña, ichi tudi kumesu eyi nanshidi jetu, hela chakwila hichikutwesheka kwimana kumesu eyi nanichi chitudiku.”+

10 Halombeleñayi+ Ezera nikusolola nshidi yindi, nakudila iku nakaami chebwambu heseki kumbidi yetala daNzambi walala, izaza deneni dawamayala, ambanda nianyana kaIsarela apompeli nakumunyeñumuka, muloña antu atwileña makumbu. 2 Kuhiñahu, Shekaniya mwana kaYehiyeli, Yehiyeli+ mwana kaElami,+ wamwilili Ezera nindi: “Hitunamwekeshi kashinshi kudi Nzambi yetu nanochu chitunasumbuli* ambanda akwacheñi anafumi hadi antu akwituñaku.+ Hela chakwila chidi mwenimu, Nzambi nateli kuyila mwamuwahi aIsarela. 3 Dichi tutiyañanenu chitiyañenu naNzambi yetu+ kulonda tufuntishi ambanda ejima nianyana anavwaliki kudi wena, kwesekeja nachinashimuniyi Yehova niantu alemesha* nshimbi yaNzambi yetu.+ Twilenu kwesekeja naNshimbi. 4 Nyamukaku, muloña yeyi watela kutala iyi nsañu nawa etu tudi naneyi. Kolaku nawa koñakumu.”

5 Hohenohu, Ezera wanyamukili nawa wayisanyikishili akulumpi jawatupristu, aLevi niaIsarela ejima kwila kwesekeja namwahosheliwu.+ Dichi asanyikili. 6 Kufumahu, Ezera wanyamukili kufuma kumbidi yetala daNzambi walala nakuya mukapeka* kaYehohanani mwana kaEliyashibi. Hela chakwila wayili mwenomu, hadiilihu yakuda hela kunwa menjiku, muloña wadilileña hamuloña wakubula kushinshika kwawantu afumini muwunkoli.+

7 Kuhiñahu, abidikili mwahita Yuda yejima nimuYerusalema mwejima nawu antu ejima afumini muwunkoli apompi hamu kuYerusalema; 8 nawa kwesekeja namunafuukuliwu ayilolu niakulumpi, muntu wejima wabulili kwinza hanyima yamafuku asatu, ateleleli kumutambula* yuma yindi yejima nikumuhaña hachipompelu chawantu afumini muwunkoli.+ 9 Dichi amayala ejima akumuchidi waYuda niBenjamini apompeli hamu kuYerusalema mumafuku asatu, dikwila nawu, mukakweji kamu 9, hefuku damu 20 dakakweji. Antu ejima ashakamini mulubanza lwetala daNzambi walala iku anakuzaala, muloña waniyi nsañu nihamuloña wanvula yeneni.

10 Kuhiñahu, kapristu Ezera wanyamukili nawa wahosheli nindi: “Munamwekeshi kashinshi wanyi nanochu chimunasumbuli ambanda akwacheñi,+ dichi kunshidi yaIsarela munabombeliku nshidi yikwawu. 11 Ichi dinu shimunenu nshidi jenu kudi Yehova Nzambi yawankakulula jenu nawa mwili nkeñelu yindi. Daambulenu nawantu akwituña ninanawa añodi jenu akwacheñi.”+ 12 Hohenohu, chipompelu chejima chaakwili nezu datiyakana nawu: “Himudimu wetu wakwila kwesekeja namuwunahoshi. 13 Hela chochu, antu amavulu nawa chinu hichilaaka chanvula. Chikutwesheka kwimana hanji wanyi, nawa iyi nsañu hiyikumana mwifuku dimu hela mumafuku ayediku, muloña tunadikañi chikupu muniyi nsañu. 14 Mwani, ayilolu jetu emeniku chipompelu chejima;+ nawa antu ejima adi munyisumba yetu asumbula ambanda akwacheñi akenzi hampinji yakayilejawu, hamu nawakulumpi niansompeshi amusumba-himusumba, sampu tunafwomoni kuzuwa kwaNzambi yetu kunatuzuwiliyi muloña waniyi nsañu.”

15 Hela chochu, Yonatani mwana kaAsaheli niYahazeya mwana kaTikiva akaanini iyi yitoñojoka, ilaña aLevi aMeshulami naShabetayi+ wena etejeli mwahosheliwu. 16 Ilaña antu afumini muwunkoli akoñeli kwesekeja nachaditejeliwu; nawa kapristu Ezera ninyitu yanyitaña yawu, ejima atondeliwu hamajina, apompeli kwakankawawu hefuku datachi dakakweji kamu 10 kulonda atali haniyi nsañu; 17 nawa hefuku datachi dakakweji katachi, amanishili kutala hansañu yawamayala ejima asumbwili ambanda akwacheñi. 18 Nawa awanini nawu anyana awamayala amakwawu avweliwu kudi atupristu, asumbwili ambanda akwacheñi:+ mudi anyana kaYeshuwa+ mwana kaYehozadaki niamanakwindi, mwadiña Mayaseya, Eliyezeri, Yaribi niGedaliya. 19 Ilaña akanini* nawu akuhaña añodi jawu, nawa chineli adiña namuloña, alambwili mukoku wachizamba muloña wanshidi jawu.+

20 Mudi anyana kaImeri,+ mwadiña Haneni niZebadiya; 21 nawa mudi anyana kaHarimi,+ mwadiña Mayaseya, Elija, Shemaya, Yehiyeli niUzaya; 22 nawa mudi anyana kaPashihuri,+ mwadiña Eliyowenayi, Mayaseya, Ishimayeli, Netaneli, Yozabadi niEleyasa. 23 Nawa mudi aLevi, mwadiña Yozabadi, Shemeyi, Kelaya (dikwila nawu, Kelita), Petahiya, Yuda niEliyezeri; 24 nawa mudi añimbi, mwadiña Eliyashibi; nawa mudi akakuhemba kuchiisu, mwadiña Shalumi, Telemi niUri.

25 Nawa mudi Isarela, amudi anyana kaParoshi,+ mwadiña Ramiya, Iziya, Malikiya, Miyamini, Eleyazari, Malikiya niBenaya; 26 nawa mudi anyana kaElami,+ mwadiña Mataniya, Zekariya, Yehiyeli,+ Abidi, Yeremoti niElija; 27 nawa mudi anyana kaZatu,+ mwadiña Eliyowenayi, Eliyashibi, Mataniya, Yeremoti, Zabadi niAziza; 28 nawa mudi anyana kaBebayi,+ mwadiña Yehohanani, Hananiya, Zabayi niAtilayi; 29 nawa mudi anyana kaBani, mwadiña Meshulami, Maluki, Adaya, Yashubi, Sheyali niYeremoti; 30 nawa mudi anyana kaPahati Mowabi,+ mwadiña Adina, Kelali, Benaya, Mayaseya, Mataniya, Bezaleli, Binuyi niManasi; 31 nawa mudi anyana kaHarimi,+ mwadiña Eliyezeri, Ishiya, Malikiya,+ Shemaya, Shimeyoni, 32 Benjamini, Maluki, niShemariya; 33 mudi anyana kaHashumi,+ mwadiña Matenayi, Matatahi, Zabadi, Elifeleti, Yeremayi, Manasi niShimeyi; 34 nawa mudi anyana kaBani, mwadiña Mayadayi, Amuramu, Uweli, 35 Benaya, Bedeya, Keluhi, 36 Vaniya, Meremoti, Eliyashibi, 37 Mataniya, Matenayi niYayasu; 38 nawa mudi anyana kaBinuyi, mwadiña Shimeyi, 39 Shelemiya, Natani, Adaya, 40 Makinadebayi, Shashayi, Sharayi, 41 Azareli, Shelemiya, Shemariya, 42 Shalumi, Amariya niYosefu; 43 nawa mudi anyana kaNebo, mwadiña Yeyeli, Matitiya, Zabadi, Zebina, Yadayi, Yoweli niBenaya. 44 Awa ejima asumbwili ambanda akwacheñi,+ nawa ahañili añodi jawu hamu nianyanawu awamayala.+