NEHEMIYA

1 Awa diwu mazu aNehemiya*+ mwana kaHakaliya: Mukakweji kaKisilevi,* muchaaka chamu 20, nadiña muShushani*+ musumba wakiñewa.* 2 Hayina mpinji Haneni,+ wumu hadi amanakwami wenjili kufuma kuYuda hamu nawamayala amakwawu, nawa nayihwili chinakuhandawu aYudeya apulukili muwunkoli+ nihansañu yaYerusalema. 3 Aakwili nawu: “Antu anashali mukabeta owu anabuli kukwatawu wunkoli anakukabakana nankashi nikusawuka.+ Mpwembu jaYerusalema anajihumoni+ niyiisu yayu anayochi nakesi.”+

4 Chinatiyili tuhu awa mazu, nashakamini heseki nawa natachikili kudila nikudishona hadi mafuku amavulu. Natwalekelihu kushakama chakadi kuda+ nawa nalombeleña kumesu aNzambi yamawulu. 5 Nahosheli nami: “Eyi Yehova, Nzambi yamawulu, Nzambi wabadika nawa wakutiyisha woma chikupu, washikijaña chitiyañenu nawa wamwekeshaña kukeña kwakashinshi kudi antu akukeña nawa ahembaña nshimbi jeyi,+ 6 mwani, hinukushimunaña nshidi jinakuvulumuniwu aIsarela, mesu eyi atoni nawa wuteñeleki itu deyi kulonda wutiyilili kukulomba kunukulomba ami kambuñeyi kudi eyi dalelu, mwaana niwufuku+ kutalisha hansañu yawambuñeyi aIsarela. Wejima wetu tunavulumuni, ami niamwitala datata yami.+ 7 Chakadi nikujina, tunakoñi chuma chatama nankashi+ muloña hitunahembi kuleja kweyi, mazu eyi awunsompeshi ninshimbi jeyi jiwamwinkeli kambuñeyi Mosiku.+

8 “Mwani, anukaku mazu iwamulejeli* kambuñeyi Mosi neyi: ‘Neyi mubula kwikala ashinshika, nakayipalañeshela mukachi kawantu.+ 9 Ilaña neyi mukufunta kudi ami nawa mukuhemba nshimbi jami nikujilondela, hela chakwila antu jenu akapalañana akekala kwakumina mawulu, nakayifumisha kwenoku+ nakuyileta kwiluña dinnatondi kushaku ijina dami.’+ 10 Hiyambuñeyi nawa hiyantu jeyi iwunakuuli nañovu jeyi jabadika ninachikasa cheyi chañovu.+ 11 Eyi Yehova, mwani teñelekaku itu deyi kulonda wutiyilili kukulomba kwanami kambuñeyi nikukulomba kwawambuñeyi atiyaña kuwaha kwakama ijina deyi, nawa nalembi, nkwashi ami kambuñeyi kulonda yuma yinwahili dalelu, nawa mwanta yantiyili wushona.”+

Hanoyu mpinji nadiña kaseya kamwanta.+

2 Mukakweji kaNisani,* muchaaka chamu 20+ chachiyuulu chaMwanta Atazakisheshi,+ atentekeli vinyu kumesu indi, nawa neyi chinelileña mpinji yejima, nanoneli vinyu nakumwinka mwanta.+ Ilaña kanda nidihombeñahu dehi kumesu indiku. 2 Dichi mwanta wañilili nindi: “Wunadihombelidi ñana henohu wakata wanyi? Namoni kudi chuma chinakukuneñesha kumuchima.” Hohenohu natiyili woma nankashi.

3 Kufumahu, namulejeli mwanta nami: “Mwanta ahandi yaaka yayivulu! Nukubuliladi kudihomba henohu musumba mwajiikawu ankakulula jami anawushiyi kwamahembi nawa yenzelu yaniwu musumba niyena anayochi nakesi?”+ 4 Kuhiñahu, mwanta wanlejeli nindi: “Wunakukeñadi?” Hohenohu nalombeli kudi Nzambi yamawulu.+ 5 Hohenohu, namwilili mwanta nami: “Neyi chumichi chinakutiyishi eyi mwanta kuwaha nawa neyi ami kambuñeyi wunantiyi kuwaha, ntemeshi kuYuda, kumusumba kwajiikawu ankakulula jami kulonda nakawutuñululi.”+ 6 Kuhiñahu, mwanta wahosheli nanami iku ñodindi* nashakami kwakwihi nayena, nindi: “Lwendu lweyi lukwikala lwamafuku añahi? Nawa wakafunta mpinjinyi?” Dichi mwanta watiyili kuwaha kuntemesha,+ nawa namulejeli mpinji yinakafunta.+

7 Kufumahu, namwilili mwanta nami: “Neyi chumichi chinakutiyishi eyi mwanta kuwaha, nyinki nyikanda yakwinka anguvulu amwiluña daMwishinadi daKaloña,*+ kulonda akañiteji kuhita mwiluña dawu mukuwunda nichinakashika kuYuda. 8 Wunyinki nimukanda wakwinka Asafi mukakuhemba Nyitondu yaMwanta,* kulonda akanyinki nyitondu yakusoñamu nyikambu yakuyenzelu yaMpwembu+ yaKwitala* ninyalachi yakumpwembu jamusumba+ niyakwitala kunakaya.” Dichi mwanta wanyinkeli iyi nyikanda,+ muloña chikasa chachiwahi chaNzambi yami chadiña hadi ami.+

9 Nkumininaku, nashikili kudi anguvulu amwiluña daMwishinadi daKaloña, nayinkeli nyikanda yamwanta. Mwanta wantemesheli hamu nawakulumpi awamashidika niakakwendela hatuwalu. 10 Chelili Sambalati+ wakuHoroni nichilolu* Tobaya+ mwini Amoni+ atiyi iyi nsañu, atiyili kutama nankashi hakutiya nawu kudi muntu wunenzi nakuyilila antu jaIsarela chuma chachiwahi.

11 Chimwahitili mpinji, nayili kuYerusalema nawa nashakaminiku mafuku asatu. 12 Nanyamukili nawufuku hamu niamayala antesha inadiña nawu, nawa hinalejelihu muntu hela wumu chuma chashiliyi Nzambi mumuchima wami chakumwilila Yerusalemaku. Hinadiñahu nawanyama amakwawuku, nadiña hohu nakanyama inendeleleñahu. 13 Nawa nedikili nawufuku nakuhita muChiisu chaChinekineki,+ nahitilili kumbidi yaKaseloki kaKapela Weneni nakuya kuChiisu chaNyilumba yaMawuti,+ nakutalatala chadiña mpwembu jaYerusalema jahumwiniwu niyenzelu yawu yocheliwu nakesi.+ 14 Nawa napandakeni nakuya kuChiisu chaKaseloki+ niKwijiya daMwanta, ilaña hikwadiña iluña deneni dakuhitila kanyama inendeleleñahuku. 15 Ilaña natwalekelihu kuya nawufuku ndo-o nikuchinekineki,*+ nawa natalatalileña mpwembu. Dichi nafuntili nawa neñililili kuChiisu chaChinekineki, kufumahu nafuntili.

16 Ayinlonda awanyuuli+ hiyelukili kunayili hela chuma chinelileñaku, muloña aYudeya, atupristu, antu alema, ayinlonda awanyuuli niakanyidimu ejima nadiña kanda niyileji chuma hela chimu. 17 Nkumininaku, nayilejeli nami: “Munamoni kukala kwasweja kutudi naku, ochu Yerusalema chinashaliyi kwamahembi nichinochiwu yenzelu yaniwu musumba nakesi. Dichi, twayenu tutuñululi mpwembu jaYerusalema kulonda iku kusawuka kubuli kutwalekahu.” 18 Kufumahu, nayilejeli chikasa chaNzambi yami chachiwahi chichadiña hadi ami+ nimazu anlejeliyi mwanta.+ Chatiyiliwu mwenimu, ahosheli nawu: “Twayenu tutuñi.” Dichi adikolesheli awenawu* kulonda azati mudimu wawuwahi.+

19 Chelili Sambalati wakuHoroni, chilolu* Tobaya+ mwini Amoni+ niGeshemi mwini Arabiya+ atiyi iyi nsañu, atachikili kutusupisha+ nikutusawula nawu: “Munakwiladi? Munakudikaña namwanta tahindi?”+ 20 Ilaña nayakwili nami: “Nzambi yamawulu Diyi wukutukwasha kulonda yuma yituwahili,+ nawa etu ambuñindi tukutuña; ilaña enu himukweti iseka hela lusesa hela chuma chakuyanukilahu muYerusalemaku.”+

3 Eliyashibi+ kapristu muneni hamu niamanakwindi atupristu atachikili kutuña Chiisu chaNyikoku.+ Achijilikili*+ nawa ashiliku yenzelu; achijilikili kushika nikuKaposhi kaMeya+ ndo-o nikuKaposhi kaHananeli.+ 2 Nawa kufuma hadi wena, amayala amuYeriku+ diwu alondelelihu kutuña; nawa kufuma hadi wena, Zakuri mwana kaImiri diyi walondelelihu kutuña.

3 Anyana kaHasenaya awamayala atuñili Chiisu Chanshi;+ ashiliku nyalachi+ niyenzelu, tupatishu ninyikomenu. 4 Nawa kufuma hadi wena, halondeleli Meremoti+ mwana kaUraya, Uraya mwana kaHakozi, wazatili mudimu wakuwahisha, nawa kufuma hadi wena, halondeleli Meshulami+ mwana kaBerekiya, Berekiya mwana kaMeshezabeli, wazatili mudimu wakuwahisha, nawa kufuma hadi wena, halondeleli Zadoki mwana kaBayana, wazatili mudimu wakuwahisha. 5 Nawa kufuma hadi wena, halondeleli eni Tekowa,+ azatili mudimu wakuwahisha, ilaña amayala awu alema hiyadizozeli* kulonda azati iwu mudimu wawankaaka jawuku.

6 Yoyada mwana kaPaseya niMeshulami mwana kaBesodeya aloñesheli Chiisu chaMusumba waWukulu;+ ashiliku nyalachi niyenzelu, tupatishu ninyikomenu. 7 Kufuma hadi wena, halondeleli Melatiya mwini Gibeyoni+ niYadoni mwini Meronoti, azatili mudimu wakuwahisha, amayala amuGibeyoni niMizipa+ owu alombweleñawu kudi* nguvulu wamwiluña daMwishinadi daKaloña.*+ 8 Kufuma hadi wena, halondeleli Uziyeli mwana kaHarihaya, wumu wahadi achiji awuru, wazatili mudimu wakuwahisha. Nawa kufuma hadi yena, halondeleli Hananiya, wumu wahadi akakweñula manji evumba dadiwahi,* wazatili mudimu wakuwahisha; nawa aalili chisesa chamalola muYerusalema ndo-o nikuMpwembu Yeneni.+ 9 Nawa kufuma hadi wena, halondeleli Refaya mwana kaHuri, chilolu wachibalu chankambi yaYerusalema, wazatili mudimu wakuwahisha. 10 Nawa kufuma hadi wena, halondeleli Yedaya mwana kaHarumafu, wazatili mudimu wakuwahisha, wazatilili kumbidi yetala dindi, nawa kufuma hadi yena, halondeleli Hatushi mwana kaHashabineya, wazatili mudimu wakuwahisha.

11 Malikiya mwana kaHarimi+ niHashubi mwana kaPahati Mowabi+ awahishili mbadi* yikwawu, kushilahu niKaposhi kamaOveni.*+ 12 Nawa kufuma hadi wena, halondeleli Shalumi mwana kaHaloheshi, chilolu wachibalu chankambi yaYerusalema, wazatili mudimu wakuwahisha, hamu nawanyanindi awambanda.

13 Hanuni niantu amuZanowa+ awahishili Chiisu chaChinekineki;+ achituñili nawa ashiliku yenzelu, tupatishu ninyikomenu nawa awahishili mpwembu yadiña makyubiti* 1,000 yashikili kuChiisu chaNyilumba yaMawuti.+ 14 Malikiya mwana kaRekabi, chilolu wankambi yaBetihakeremi,+ wawahishili Chiisu chaNyilumba yaMawuti; wachituñili nawa washiliku yenzelu, tupatishu ninyikomenu.

15 Shaluni mwana kaKolihoze, chilolu wankambi yaMizipa,+ wawahishili Chiisu chaKaseloki;+ wachituñili nawa wachibutili hewulu, washiliku yenzelu, tupatishu ninyikomenu nawa wawahishili nimpwembu Yejiya+ daKaloña Kanyanya kadiña kukamwihi Netempa daMwanta+ kushika nikuMankenka akunkumuka+ kufuma kuMusumba waDavidi.+

16 Kufuma hadi yena, hahiñili Nehemiya mwana kaAzibuki, chilolu wachibalu chankambi yaBetizuri,+ wazatili mudimu wakuwahisha kufuma kumbidi yaMaluña Akujiikahu aDavidi+ nakushika nikwijiya+ datuñiliwu ndo-o niKwitala dawaAkañovu.

17 Kufuma hadi yena, hahiñili aLevi azatili mudimu wakuwahisha: Rehumi mwana kaBani; nawa wahiñili hadi yena wadiña Hashabiya, chilolu wachibalu chankambi yaKeyila,+ wazatili mudimu wakuwahisha kwimenaku nkambi yindi. 18 Kufuma hadi yena, hahiñili amanakwawu azatili mudimu wakuwahisha: Bavayi mwana kaHenadadi, chilolu wachibalu chankambi yaKeyila.

19 Nawa kufuma hadi yena, hahiñili Ezeri mwana kaYeshuwa,+ chilolu waMizipa, wawahishileña mbadi yikwawu yadiña kumbidi nahakukandukila hakuya Kwahembeleleñawu Yitwa yaNjita Hakonekela Mpwembu.+

20 Kufuma hadi yena, hahiñili Baruki mwana kaZabayi,+ wazatili nañovu nawa wawahishili mbadi yikwawu, kufuma Hakonekela Mpwembu nakushika nikuwiñililu wetala daEliyashibi+ kapristu muneni.

21 Kufuma hadi yena, hahiñili Meremoti+ mwana kaUraya, Uraya mwana kaHakozi, wawahishili mbadi yikwawu, kufuma kuwiñililu wetala daEliyashibi nakushika kwakumina itala daEliyashibi.

22 Kufuma hadi yena, hahiñili atupristu, amayala ankambi yaYodani,*+ azatili mudimu wakuwahisha. 23 Kufuma hadi wena, hahiñili Benjamini niHashubi, azatilili mudimu wakuwahisha kumbidi yamatala awu. Kufuma hadi wena, hahiñili Azariya mwana kaMayaseya, Mayaseya mwana kaAnaniya, wazatili mudimu wakuwahisha kwakwihi netala dindi. 24 Kufuma hadi yena, hahiñili Binuyi mwana kaHenadadi, wawahishili mbadi yikwawu, kufuma kwitala daAzariya nakushika Hakonekela Mpwembu+ ndo-o nikwiwombu.

25 Kufuma hadi yena, hahiñili Palali mwana kaUzayi, wazatilili mudimu wakuwahisha kumbidi yaHakonekela Mpwembu nikumbidi yakaposhi kedika Kwitala*+ daMwanta, kahewulu kekala muLubanza lwawaAnhembi.+ Kufuma hadi yena, hahiñili Pedaya mwana kaParoshi.+

26 Nawa ambuña ahatembeli*+ owu ashakamineña muOfeli+ azatili mudimu wakuwahisha kushika nikumbidi yaChiisu chaMenji+ kumusela nikumbidi yakaposhi kedika mumpwembu.

27 Kufuma hadi wena, hahiñili eni Tekowa+ azatili mudimu wakuwahisha mbadi yikwawu, kufuma kumbidi yakaposhi keneni kedikili mumpwembu kushika nikumpwembu yaOfeli.

28 Atupristu azatili mudimu wakuwahisha hewulu daChiisu chaTuwalu,+ kapristu-hikapristu wawahishilili kumbidi yetala dindi.

29 Kufuma hadi wena, hahiñili Zadoki+ mwana kaImeri, wazatilili mudimu wakuwahisha kumbidi yetala dindi.

Nawa kufuma hadi yena, hahiñili Shemaya mwana kaShekaniya, nhembi wakuChiisu chakuMusela,+ wazatili mudimu wakuwahisha.

30 Kufuma hadi yena, hahiñili Hananiya mwana kaShelemiya niHanuni mwana kaZalafi weyala wamu 6, awahishili mbadi yikwawu.

Kufuma hadi yena, hahiñili Meshulami+ mwana kaBerekiya, wazatilili mudimu wakuwahisha kumbidi yakapeka kindi.

31 Kufuma hadi yena, hahiñili wumu wahadi achiji awuru, wazatili mudimu wakuwahisha kushika kwitala dawambuña ahatembeli*+ nidawakakulanda nakulandulula, kumbidi yaChiisu chaKutalatala ndo-o nikukapeka kahewulu kakwiwombu.

32 Nawa achiji awuru niakakulanda nakulandulula azatilili mudimu wakuwahisha hakachi kakapeka kahewulu kakwiwombu naChiisu chaNyikoku.+

4 Chelili tuhu Sambalati+ atiyi nindi tunakutuñulula mpwembu, wazuwili nikuhila* nankashi, nawa watwalekelihu kusupisha aYudeya. 2 Nawa iku wudi hamu nawalunda nindi ninjita yaSamariya, wahosheli nindi: Indi awa aYudeya azeya anakwiladi? Akuzata iwu mudimu nkawawu tahindi? Akulambula nyilambu? Komana akumanisha iwu mudimu mwifuku dimu? Komana akutwesha kubalumuna malola asukuma adi hanyilumba yanswadi ekali neyi chadiñawu hakusambila?+

3 Dichi Tobaya+ mwini Amoni+ wemeni kwakwihi nayena, wahosheli nindi: “Hela neyi mumbu yakandama hampwembu yamalola yinakutuñawu, yikushikena dakuhumuka.”

4 Eyi Nzambi yetu, tiyaku, muloña anakutusawula,+ ilishaku kasawuntu kawu kayifuntili awenawu+ nawa wuyihani mwituña dawunkoli neyi yuma yakupuupa. 5 Nawa bayi wubuta muloña wawu hela kujima nshidi yawu kumesu eyiku,+ muloña anayihoshi antuñi mazu akasawuntu.

6 Dichi twatwalekelihu kutuña mpwembu, mpwembu yejima twayinuñili hamu nikuyituñulula kushika hakachi nakuya mwiwulu, nawa antu atwalekelihu kusha muchima hamudimu.

7 Chelili tuhu Sambalati, Tobaya,+ aArabiya,+ aAmoni niaAshidodi+ atiyi nawu mudimu wakuwahisha mpwembu jaYerusalema wunakuya hambidi nawa hamaluña hashalashala anakujikekahu, azuwili chikupu. 8 Akasili kafuta nakudipompesha hamu kulonda azuñi naYerusalema nikuluwañesha yuma muniwu musumba. 9 Ilaña twalombeli kudi Nzambi yetu nawa muloña wanawa antu, twashiliku anhembi akutukiña mwaana niwufuku.

10 Hela chochu, antu amuYuda ahosheleña nawu: “Ñovu yawakakuzata nyidimu* yinamani, nawa kudi nswadi jajivulu nankashi; hitukutwesha kutuñulula mpwembuku.”

11 Nawa ayilumbu jetu atwalekelihu kuhosha nawu: “Henohu kanda eluki chuma chitunakukeña kwila hela kutumona, tukuyilukuka nakuyijaha nawa mudimu wukwimana.”

12 Mpinji yejima neyi aYudeya adikumashanini nawu anenzi mumusumba, atulejeleña nakufuntisha-funtishahu* nawu: “Akenza nakutulukuka kufuma kutubadi twejima.”

13 Dichi nashili amayala mumaluña abula kuswamanyika kwakunkumuka nankashi kunyima yampwembu, nawa nayishili muyisaka-muyisaka iku anakwati mpoku jawu jatubali, mayoña nimata awu anyikunji. 14 Chinamweni woma wadiñawu nawu, hohenohu nanyamukili nakuleja antu alema,+ ayinlonda awanyuuli niantu ejima nami: “Bayi muyitiya womaku.+ Anukenu Yehova, wabadika nawa wakutiyisha woma chikupu;+ yizuñilenuku amanakwenu, anyanenu awamayala niawambanda, añodi jenu nimatala enu.”

15 Dichi ayilumbu jetu chatiyiliwu nawu tuneluki chuma chinakwilawu nawa Nzambi walala naluwañeshi kafuta kawu, wejima wetu twafuntili nakuzata kumpwembu. 16 Kufuma tuhu hanodu ifuku, chibalu chimu chawantu jami awamayala chadiña nakuzata mudimu+ ilaña chibalu chikwawu chadimanyekeli namayoña, jinkebu, mata anyikunji nituhuma twayikuñu.* Nawa ayilolu+ emeni kunyima yaamwitala daYuda ejima 17 atuñileña mpwembu. Antu asendeleña yiteli, azatileña mudimu chikasa chimu iku anakwati chitwa chanjita kuchikasa chikwawu. 18 Nawa ntuñi wejima wadimanyekeli mpoku yakabali hambunda iku nakutuña, nawa kukamwihi nanami kwemeni wakuvumisha luseñu.+

19 Kufumahu, nalejeli antu alema niayinlonda awanyuuli niantu ashalilihu nami: “Mudimu wampwembu weneni nankashi, nawa tunatandami hampwembu hana wumu-hana wumu. 20 Neyi mutiya chivumina chaluseñu, mwatela kupompa kutudi. Nzambi yetu wukutuzuñilaku.”+

21 Dichi twatwalekelihu kuzata iku chibalu chawantu amakwawu anakwati mayoña, kufuma hankunku yakucha kushika nihamwekeni tutumbwa. 22 Hayoyenoyu mpinji, nayilejeli antu nami: “Lejenu amayala ejima, iyala-hiiyala hamu namukakumukalakela, ashakami muYerusalema wufuku wejima, kulonda atuhembeña nawufuku nawa azateña namwaana.” 23 Dichi wejima wetu, ami, amanakwami, akakunkalakela+ nianhembi anlondeleleña hitwavuulili yakuvwala yetuku, nawa muntu-himuntu wadiña nachitwa chindi chanjita muchikasa chindi chachidiilu.

5 Hela chochu, amayala niañodi jawu ayabilili nankashi akwawu aYudeya.+ 2 Amakwawu ahosheleña nawu: “Tudi amavulu nawanyanetu awamayala niawambanda. Tunakukeñakeña yakuda hakwila tudii kulonda tutwalekihu kuhanda.” 3 Amakwawu nawu: “Tunakukwatishilamu maha etu, matempa etu anyivinyu nimatala etu kulonda twiikali nayakuda mumpinji yanzala yakapwelendendi.” 4 Antu amakwawu niwena ahosheleña nawu: “Tunakongoli* mali nakukwatishilamu maha etu nimatempa etu anyivinyu kulonda tuhani mulambu wamwanta.+ 5 Tudi evumu dimu nawa mashi etu wowamu nawamanakwetu,* nawa anyanetu adi neyi anyanawu; hela chochu twatela kuhana anyanetu awamayala niawambanda muwuduñu. Nawa anyanetu amakwawu awambanda adi dehi muwuduñu.+ Ilaña hitukweti ñovu yakukañesha chumichiku, muloña maha etu nimatempa etu anyivinyu anekali dehi awantu acheñi.”

6 Nazuwili nankashi chinatiyili mwaabu wawu ninawa mazu. 7 Dichi natoñojokelihu mumuchima haniyi nsañu, nawa antu alema niayinlonda awanyuuli nayinkeli muloña nakuyila nami: “Wejima wenu munakukanjikija amanakwenu kuyishilahu yuma yikwawu.”+

Kubombelahu, napompesheli izaza deneni dawantu muloña wawena. 8 Nawa nayilejeli nami: “Kwesekeja nahakumina ñovu jetu, tunalandululi amanakwetu aYudeya alandishiliwu kunyuza; ilaña ichi munakukeña kulandisha amanakwenu,+ komana atelela kuyilandisha cheñi kudi etu?” Hohenohu amweneni kwanzo-o, nawa hiyadiñahu namazu akuhoshaku. 9 Kufumahu, nahosheli nami: “Chuma chimunakwila chachiwahi wanyi. Komana kwila mwenda nakumutiya Nzambi+ yetu woma kulonda akanyuza, ayilumbu jetu, abuli kutuhosha kasawuntu nehi? 10 Nawa ami niamanakwami, kubombelahu niakakunkalakela tunakuyikongwesha* wena mali niyakuda. Mwani tuleki iku kukongwesha kwakukeña netu atushileñahu.+ 11 Mwani, yifuntishilenu dodalelu maha awu,+ matempa awu anyivinyu, matempa awu anyiolivi nimatala awu, kushilahu niyamunkulakaji yamali, yambutu, yavinyu yayiha niyamanji, yuma yimunakuyikanjikija nenu ayishileñahu.”

12 Chatiyiliwu yumiyi, ahosheli nawu: “Tunakuyifuntishila iyi yuma yejima nawa hitukulombahu chuma kudi wenaku. Tukwila mwejima muwunahoshi.” Dichi natambikili atupristu nawa twayisanyikishili owu amayala ejima kulonda ashikiji ichi chikaninu. 13 Cheñi, nalukumwini mwipakumuna dahantulu yachakuvwala chami nawa nahosheli nami: “Munjila yoyimu, Nzambi walala alukumuni mwitala dindi nimumaheta indi muntu wejima wukubula kushikija ichi chikaninu, nawa munjila yoyimu, niyena amulukumuni nakumushiya chakadi chuma.” Chipompelu chejima chichatiyili awa mazu chahosheli nachu: “Ameni!”* Dichi amuhamekeli Yehova, nawa antu elili kwesekeja nachakaniniwu.

14 Kubombelahu, kufuma tuhu hefuku dantondeliyi kwikala nguvulu+ yawu mwituña daYuda, kutachika muchaaka chamu 20+ nakushika muchaaka chamu 32+ chachiyuulu chaMwanta Atazakisheshi,+ yaaka 12, ami niamanakwami hitwadiilihu yakuda yenkañawu nguvuluku.+ 15 Ilaña anguvulu adiñahu henohu ami kanda, akabishileña nankashi antu nawa ayitambwileña mashekeli* 40 asiliva akulandamu mankendi hefuku-hefuku. Akakuyikalakela niwena adiña nakumwesha antu yihuñu. Ilaña ami hinelilihu chumichiku,+ muloña namutiyaña Nzambi woma.+

16 Kubombelahu, ninami nakwatiliku kuniwu mudimu wampwembu, nawa hitwadiñahu nehaku;+ akakunkalakela ejima apompeli kwenoku nakuzata mudimu. 17 AYudeya niayinlonda awanyuuli adiileña kumesa yami adiña 150, kushilahu dinu niantu enjili kudi etu kufuma munyuza. 18 Hefuku-hefuku, anloñesheleleña* ñombi wumu wachizamba, anyikoku 6 amawahi nankashi nituda, nawa chimwahita mafuku 10, atwinkeleña vinyu yashiyashana yayivulu nankashi. Hela chadiña muniyi njila, hinakeñelihu nami anyinkeña yakuda yenkañawu nguvuluku, muloña antu adiña dehi nakuzata mudimu wakola. 19 Eyi Nzambi yami, ñanukeña munjila yayiwahi, muloña wayuma yejima yinayilili awa antu.+

6 Dichi chelili tuhu Sambalati, Tobaya,+ Geshemi mwini Arabiya+ niayilumbu jetu ejima ayileji nawu ami natuñululi dehi mpwembu+ nawa kwosi hamaluña hanashalashaliku (hela chakwila hayina mpinji nachidiña kanda nishimu yenzelu muyiisu yampwembu),+ 2 hohenohu aSambalati naGeshemi antemesheleli awa mazu nawu: “Inzaku tutiyañani mpinji yitukabulakana hamu munyikala yamuChana chaChinekineki chaOno.”+ Ilaña adiña hohu nakunkasila kafuta kulonda añili chatama. 3 Dichi nayitemesheleli antemesha nakuyileja nami: “Inakuzata mudimu weneni nankashi, hinukutwesha kukunkumukila okuku. Muloñadi chinukwimikila mudimu nakwinza kudi enu?” 4 Antemesheleli nsañu yoyimu kapampa kawana, nawa hanawa mapampa ejima, ami nayakwileña mwomumu.

5 Kufumahu, Sambalati wantemesheleli mukakumukalakela kwinza nakunleja nsañu yoyimu kapampa kamuchitanu, iku wudi namukanda wakuvuñulula muchikasa chindi. 6 Asonekelimu nawu: “Kudi nsañu yinatiyakani munyuza, nawa Geshemi+ niyena nakuhosha haniyi nsañu, nawu eyi niaYudeya munakukasa kafuta kakudikaña.+ Dichinaleteshi mutuñululeña mpwembu; nawa kwesekeja naniyi nsañu yinatiyakani, eyi yeyi wukwikala mwanta wawu. 7 Nawa wunatondi atuprofwetu kulonda akutiyakeshi muYerusalema mwejima nawu, ‘MuYuda mudi mwanta!’ Nawa ichi dinu mwanta akumulejamu iyi nsañu. Dichi inzaku, kulonda tuhanjekeli hamu iyi nsañu.”

8 Ilaña ami, namutemesheleli awa mazu nami: “Nsañu yejima yiwunashimuni yakutwamba; wunakuhosha hohu yuma yiwunakutoñojoka.”* 9 Muloña wejima wawu akeñeleña hohu kututiyisha woma, chahosheliwu nawu: “Makasa awu akuzeya, nawa akuleka kuzata mudimu.”+ Dichi, inakulomba nami koleshaku makasa ami.+

10 Kufumahu, nayili kwitala daShemaya mwana kaDelaya, Delaya mwana kaMehetabeli hadiñayi kwenoku iku nadenzeleli. Wañilili nindi: “Tutiyañani mpinji yitukubulakana kwitala daNzambi walala, mutembeli, nawa twenzeli yenzelu yatembeli, muloña anakwinza nakukujaha. Anakwinza wufuku nakukujaha.” 11 Ilaña ami nahosheli nami: “Komana iyala wudi neyi ami nateli kutemuka? Komana iyala wudi neyi ami nateli kwiñila mutembeli nawa yahanda?+ Nukwiñilamu wanyi!” 12 Dichi nelukili nami Nzambi hidiyi wunamutemeshiku, ilaña aTobaya naSambalati+ diwu ananlobeli kudi yena kulonda ahoshi awa mazu awuprofwetu hadi ami. 13 Anlombeleli kudi yena kulonda antiyishi woma nikunvulumwisha, ekali nahakuntamishila ijina kulonda ansawuli.

14 Eyi Nzambi yami, anukaku iyi yuma yinakoñi aTobaya+ naSambalati niNowadiya kaprofwetu wamumbanda niatuprofwetu amakwawu adiña nakuntiyisha woma mpinji yejima.

15 Dichi mpwembu yamanini hefuku damu 25 dakakweji kaEluli,* mumafuku 52.

16 Ayilumbu jetu ejima chachitiyiliwu nawa nyuza yejima yitwadikumashanini nayu chiyamweniwu chumichi, atiyili nsonyi chikupu,+ nawa elukili nawu iwu mudimu wunamani nawukwashu waNzambi yetu. 17 Munowu mafuku, antu alema+ amuYuda atemesheleña nyikanda yayivulu kudi Tobaya, nawa Tobaya wadiña nakuyakula. 18 Antu amavulu muYuda asanyikili nawu akumwovwahilaña, muloña wadiña muku waShekaniya mwana kaAra,+ nawa mwanindi Yehohanani wasumbwili mwana kaMeshulami+ mwana kaBerekiya. 19 Cheñi, mpinji yejima adiña nakunleja yuma yayiwahi yelileñayi nawa niyena amulejeleña yuma yinahosheleña. Kufumahu, Tobaya wadiña nakuntemeshela nyikanda yakuntiyisha woma.+

7 Chelili tuhu mpwembu yimani kuyituñulula,+ nashiliku yenzelu;+ nawa natondeli akakuhemba kuchiisu,+ añimbi+ niaLevi.+ 2 Kufumahu, namutondeli manakwami Haneni+ kwikala mukulumpi wakwakamena Yerusalema, hamu naHananiya mukulumpi waMpwembu,+ muloña wadiña iyala akuhweleleliwu nankashi nawa wamutiyileña Nzambi walala+ woma kubadika antu amakwawu amavulu. 3 Dichi nayilejeli nami: “Yiisu yaYerusalema bayi ayenzununa henohu itena kanda dishiki mwiwuluku,* nawa henohu achidi emana nakuhemba, atela kwenzela yenzelu nikuyipata. Nawa tondenu antu amuYerusalema ekali anhembi, amakwawu atela kwikala hamaluña hanayinkiwu kuhemba nawa amakwawu atela kwikala kumbidi yamatala awu.” 4 Dichi musumba wadiña watandumuka nawa weneni, mwadiña antu antesha+ nawa matala ayituñulwili wanyi.

5 Ilaña Nzambi yami washili mumuchima wami yitoñojoka yakupompesha hamu antu alema niayinlonda awanyuuli niantu kulonda niyisoneki kwesekeja nandonda yayisaka yawu.+ Kuhiñahu, nawanini mukanda mwasonekawu ndonda yayisaka yawantu asambilili kwinza, nawa nawanini asonekamu nawu:

6 Nawa awa diwu antu akukabeta enjili kufuma hadi antu atwaliliwu muwunkoli, atwaliliyi Mwanta Nebukaneza+ wakuBabiloni muwunkoli+ nawa owu afuntili kuYerusalema nikuYuda mukuhita kwampinji, muntu-himuntu wayili kumusumba windi,+ 7 owu enjili hamu naZerubabeli,+ Yeshuwa,+ Nehemiya, Azariya, Rayamiya, Nahamani, Modekayi, Bilishani, Misipereti, Bigivayi, Nehumi niBayana.

Iku dikuvula kwawaIsarela awamayala:+ 8 anyana kaParoshi adiña 2,172; 9 anyana kaShefatiya adiña 372; 10 anyana kaAra+ adiña 652; 11 anyana kaPahati Mowabi,+ amudi anyana kaYeshuwa naYowabi+ adiña 2,818; 12 anyana kaElami+ adiña 1,254; 13 anyana kaZatu adiña 845; 14 anyana kaZakayi adiña 760; 15 anyana kaBinuyi adiña 648; 16 anyana kaBebayi adiña 628; 17 anyana kaAzigadi adiña 2,322; 18 anyana kaAdonikami adiña 667; 19 anyana kaBigivayi adiña 2,067; 20 anyana kaAdini adiña 655; 21 anyana kaAteri, amudi Hezekiya adiña 98; 22 anyana kaHashumi adiña 328; 23 anyana kaBezayi adiña 324; 24 anyana kaHarifi adiña 112; 25 anyana kaGibeyoni+ adiña 95; 26 amayala akuBetelemi nikuNetofa adiña 188; 27 amayala akuAnatoti+ adiña 128; 28 amayala akuBeti Azimaveti adiña 42; 29 amayala akuKiriyati Yeyarimi,+ kuKefira nikuBeyeroti+ adiña 743; 30 amayala akuRama nikuGeba+ adiña 621; 31 amayala akuMikimasi+ adiña 122; 32 amayala akuBeteli+ niAyi+ adiña 123; 33 amayala akuNebo yikwawu adiña 52; 34 anyana kaElami mukwawu adiña 1,254; 35 anyana kaHarimi adiña 320; 36 anyana akuYeriku adiña 345; 37 anyana akuLodi, kuHadidi nikuOno+ adiña 721; 38 anyana kaSenaya adiña 3,930.

39 Atupristu:+ anyana kaYedaya amwitala daYeshuwa adiña 973; 40 anyana kaImeri adiña 1,052; 41 anyana kaPashihuri+ adiña 1,247; 42 anyana kaHarimi+ adiña 1,017.

43 ALevi:+ anyana kaYeshuwa, akuKadimiyeli,+ amudi anyana kaHodeva adiña 74. 44 Añimbi:+ anyana kaAsafi+ adiña 148. 45 Akakuhemba kuchiisu:+ anyana kaShalumi, anyana kaAteri, anyana kaTalimoni, anyana kaAkubi,+ anyana kaHatita nianyana kaShobayi, adiña 138.

46 Ambuña ahatembeli:*+ anyana kaZiha, anyana kaHasufa, anyana kaTabawoti, 47 anyana kaKerosi, anyana kaSiya, anyana kaPadoni, 48 anyana kaLebana, anyana kaHagaba, anyana kaSalimayi, 49 anyana kaHanani, anyana kaGideli, anyana kaGahari, 50 anyana kaReyaya, anyana kaRezini, anyana kaNekoda, 51 anyana kaGazami, anyana kaUza, anyana kaPaseya, 52 anyana kaBesayi, anyana kaMeyuni, anyana kaNefushesimi, 53 anyana kaBakibuki, anyana kaHakufa, anyana kaHarihuri, 54 anyana kaBaziliti, anyana kaMehida, anyana kaHarisha, 55 anyana kaBarikosi, anyana kaSisera, anyana kaTema, 56 anyana kaNeziya nianyana kaHatifa.

57 Anyana kawambuña aSolomoni:+ anyana kaSotayi, anyana kaSofereti, anyana kaPerida, 58 anyana kaYeyala, anyana kaDarikoni, anyana kaGideli, 59 anyana kaShefatiya, anyana kaHatili, anyana kaPokereti Hazebayimi nianyana kaAmoni. 60 Ambuña ahatembeli*+ ejima kushilahu nianyana kawambuña aSolomoni adiña 392.

61 Awa diwu antu afumini kuTeli Mela, kuTeli Harisha, kuKirubi, kuAdoni nikuImeri, ilaña akañenyi kwiluka yisaka yakukatata yawu nikwafuminiwu, neyi chakwila adiña aIsarela hela nehi:+ 62 anyana kaDelaya, anyana kaTobaya, anyana kaNekoda, ejima hamu adiña 642. 63 Nawa mudi atupristu mwadiña awa: anyana kaHabaya, anyana kaHakozi,+ anyana kaBazilayi, owu wasumbwili mumbanda mudi anyana kaBazilayi+ wakuGiliyadi nawa Bazilayi wadituumbili ijina dakuchisaka chañodindi. 64 Awa antu akeñakeñeli nsañu yasonekawu kulonda eluki ndonda yachisaka chawu, ilaña ayiwanini wanyi, dichi ayifumishili hamudimu wawupristu.*+ 65 Nguvulu*+ wayilejeli nindi bayi ada yuma yajila chikupuku,+ sampu kunekali kapristu wakwihula Urimi naTumimi.+

66 Chipompelu chejima chadiña nawantu 42,360,+ 67 kufumishaku anduñu jawu awamayala niawambanda+ adiña 7,337; adiña ninawañimbi awamayala niawambanda+ 245. 68 Tuwalu twawu twadiña 736, yingongavalu yawu yadiña 245, 69 angameli awu adiña 435 niayimbuulu awu adiña 6,720.

70 Anlomboli amakwawu anyitaña ahanini yawaana kumudimu.+ Nguvulu* wahanini kuchisweku chayuma yalema madirakima* awuru 1,000, yeña yakunama 50 ninyinkukumba+ 530 yawatupristu. 71 Anlomboli amakwawu akunyitaña ahanini madirakima awuru 20,000 nimamina* asiliva 2,200 kuchisweku chayuma yalema yamudimu. 72 Nawa antu anashali ahanini madirakima awuru 20,000, mamina asiliva 2,000 ninyinkukumba 67 yawatupristu.

73 Nawa atupristu, aLevi, akakuhemba kuchiisu, añimbi,+ antu amakwawu, ambuña ahatembeli* niaIsarela ejima ashalilihu ashakamini munyisumba yawu.+ Chashikileña kakweji kamu 7,+ aIsarela adiña ashakama dehi munyisumba yawu.+

8 Kufumahu, antu ejima adipompesheli hamu nayitoñojoka yoyimu mulubanza lwamusumba kumbidi yaChiisu chaMenji,+ nawa amulejeli Ezera+ mukakukopolola* kuleta mukanda waNshimbi jaMosi,+ jayinkeliwu aIsarela+ kudi Yehova. 2 Dichi hefuku datachi dakakweji kamu 7, kapristu Ezera waleteli Nshimbi kwizaza dawamayala,+ ambanda niantu ejima atela kutiyilila nakanañachima.+ 3 Nawa wawutañili nezu datiyakana+ mulubanza lwamusumba kumbidi yaChiisu chaMenji, kudi amayala, ambanda niantu ejima atela kutiyishisha, kufuma hakusela kwetena nakushika itena mwiwulu; dichi antu atiyilili nakanañachima+ kumukanda waNshimbi. 4 Nawa Ezera mukakukopolola* wemeni hachinañamu chanyitondu chatuñiliwu kulonda achizatishi haniku kupompa; nawa kuchikasa chindi chachidiilu kwemeni Matitiya, Shema, Anaya, Uriya, Hilikiya niMayaseya; nawa kuchikasa chindi chachimunswa kwadiña Pedaya, Mishayeli, Malikiya,+ Hashumi, Hashibadana, Zekariya niMeshulami.

5 Ezera wabakwili mukanda iku antu ejima anakumumona, muloña wadiña hewulu dawantu ejima. Chawubakwiliyi, antu ejima emeni. 6 Kuhiñahu, Ezera wamuhamekeli Yehova Nzambi walala, Wabadika. Hohenohu antu ejima aakwili nawu, “Ameni!* Ameni!”+ nawa anyamwini makasa mwiwulu. Kufumahu, abandamini nakudifukula kudi Yehova chamesu heseki. 7 Nawa aLevi adiña nakulumbulwila antu+ Nshimbi iku antu saña emena. Alevi wenawa adiña Yeshuwa, Bani, Sherebiya,+ Yamini, Akubi, Shabetayi, Hodiya, Mayaseya, Kelita, Azariya, Yozabadi,+ Hanani niPelaya. 8 Nawa atwalekelihu kutaña nezu datiyakana nsañu yadiña mumukanda, muNshimbi jaNzambi walala, adiña nakuyilumbulula chiwahi nikulumbulula chiwahi mwatalisha mazu. Dichi akwashili antu kutiyishisha nsañu yatañileñawu.*+

9 Nawa Nehemiya, owu wadiña nguvulu* hanoyu mpinji, Ezera+ kapristu nawa mukakukopolola,* kushilahu niaLevi adizishileña antu, alejeli antu ejima nawu: “Ifuku dalelu hiifuku dajila kudi Yehova Nzambi yenu.+ Bayi mudishona hela kudilaku.” Muloña antu ejima adiña nakudila chatiyiliwu mazu amuNshimbi. 10 Wayilejeli nindi: “Yenu, kadenu yakuda yayiwahi chikupu* nikunwa yatowala, nawa antu amakwawu anabuli muyitemesheli yakuda;+ muloña dalelu hiifuku dajila kudi Nzambi yetu. Nawa bayi muneñaku, muloña muzañalu waYehova diyi mpwembu* yenu.” 11 Nawa aLevi awundishileña antu ejima nawu: “Mwenenuhu! muloña dalelu hiifuku dajila, nawa bayi muneñaku.” 12 Dichi antu ejima ayili nakuda, kunwa nikutemesha yakuda nawa atwalekelihu kuzañalala chikupu,+ muloña atiyishishili mazu ayilejeliwu.+

13 Nawa hefuku damuchiyedi, anlomboli jawantu ejima akunyitaña, atupristu niaLevi apompeli nakumunyeñumuka Ezera mukakukopolola* kulonda atiyishishi chikupu mazu amuNshimbi. 14 Kufumahu, awanini muNshimbi asonekamu nawu Yehova washimwini kuhitila mudi Mosi nindi aIsarela atela kushakama muyisolu* hampinji yachawija mukakweji kamu 7,+ 15 nawa nawu atela kushimuna nikubidika+ mwahita nyisumba yawu yejima nimwahita Yerusalema nawu: “Yenu kwiluña damapidi mwakaleti nyitayi yikweti mafu yakunyitondu yanyiolivi, yamanji, yakalafulu, yayibuubu niyanyikoma ninyitayi yikweti mafu yakunyitondu yikwawu kulonda mutuñi yisolu, kwesekeja nachasonekawu.”

16 Dichi antu edikili nawa aleteli nyitayi kulonda adituñili yisolu, muntu-himuntu washili hewulu detala dindi, kushilahu nimumalubanza awu, mumalubanza etala daNzambi walala,+ mulubanza lwamusumba lwaChiisu chaMenji+ nimulubanza lwamusumba lwaChiisu chaEfuremu.+ 17 Muloña wachumichi, chipompelu chejima chafumini muwunkoli chatuñili yisolu nawa ashakamineña muyisolu, azañaleli chikupu,+ muloña aIsarela hiyelilihu chuma chamuchidiwuku, kufuma tuhu mumafuku aYoshuwa+ mwana kaNuni kushika nihanidi ifuku. 18 Nawa hefuku-hefuku, atañileña mumukanda waNshimbi jaNzambi walala,+ kufuma hefuku datachi kushika hefuku dakukumishaku. Kuhiñahu, ekalili nachawija hadi mafuku 7, nawa kwadiña kupompa kweneni kwajila hefuku damu 8, kwesekeja nachichakeñekeleña.+

9 Hefuku damu 24 danaka kakweji, aIsarela apompeli hamu; ashakamini chakadi kuda iku anavwali yisasa nawa anadisukwili lunkuñu.+ 2 Dichi antu asemukili kudi aIsarela, adaambwili hadi añiinza ejima,+ nawa anyamukili nakushimuna nshidi jawu niyiluwa yawatata jawu.+ 3 Kuhiñahu, emeni hamaluña awu nawa atañili nezu datiyakana mumukanda waNshimbi+ jaYehova Nzambi yawu hadi maora asatu;* nawa hadi maora amakwawu asatu, ashimwineña nshidi jawu nikudibuka kudi Yehova Nzambi yawu.

4 Yeshuwa, Bani, Kadimiyeli, Shebaniya,+ Buni, Sherebiya, Bani niKenani emeni hachinañamu+ chawaLevi chazanduka, nawa amudililili Yehova Nzambi yawu nezu datiyakana. 5 Nawa awa aLevi, Yeshuwa, Kadimiyeli, Bani, Hashabineya, Sherebiya, Hodiya, Shebaniya niPetahiya ahosheli nawu: “Imanenu kulonda mumushimeki Yehova Nzambi yenu haya nyaaka nanyaaka.*+ Nawa ahameki ijina deyi dalema, odu datuumbakana kubadika nkisu jejima nikuhameka kwejima.

6 “Yeyi Yehova nkaweyi hohu;+ waleñeli mawulu, chalala, iwulu damawulu niyuma yejima yekalamu,* iseki niyuma yejima yekalahu, nituluñalwiji niyuma yejima yekalamu. Nawa yuma yejimiyi wayihembaña kulonda yitwalekihu nawa yuma yekala mumawulu* yinakudibuka kudi eyi. 7 Yeyi Yehova Nzambi walala, wamutondeli Abarama+ nawa wamufumishili muUri+ yawaKalideya nawa wamutuumbili neyi Abarahama.+ 8 Wamweni neyi muchima windi wadiña washinshika kudi eyi,+ dichi watiyañeni nindi chitiyañenu chakumwinka ituña dawaKenani, aHiti, aAmori, aPerizi, aYebusi niaGirigashi, nikudihana kudi anyanindi;*+ nawa welili muwakanini, muloña eyi waloña.

9 “Dichi eyi wamweni ankakulula jetu chakabakeniwu muEjipitu,+ nawa watiyili mwaabu wawu kuKaluñalwiji Kachinana. 10 Kufumahu, wamumwekesheleli Fwaru niambuñindi ejima niantu ejima amwituña dindi+ yinjikijilu niyihayamisha, muloña eyi welukili neyi adivwimbili+ nawantu jeyi. Watuumbakesheli ijina deyi dinatwalekihu nikulelu.+ 11 Nawa waambwili kaluñalwiji hakachi hamesu awu, chakwila azambukili hakaluñalwiji heseki dooma,+ nawa antu ayikumpishileña wayinatilili mumanyiñi neyi ilola dinanatiliwu mumenji anakubwankañila.+ 12 Namwaana wayilombweleña nachishimi cheevu, nawa nawufuku wayilombweleña nachishimi chakesi, kulonda chiyitoñekeleña munjila yatela kuyawu.+ 13 Wasulukili haMpidi yaSinayi+ nawa wahosheli nawu kufuma mwiwulu,+ wayinkeli wunsompeshi waloña, nshimbi jachalala,* nshimbi jajiwahi nikuleja.+ 14 Wayilejeli Sabata yeyi yajila+ nawa wayinkeli kuleja, nshimbi nilushimbi kuhitila mudi kambuñeyi Mosi. 15 Wayinkeli yakuda* kufuma mwiwulu hatiyiliwu nzala+ nawa wayidishilili menji mwilola hatiyiliwu mpwila,+ nawa wayilejeli kwiñila nikutambula ituña diwasanyikili* kuyinka.

16 “Ilaña ankakulula jetu, wena adivwimbili+ nawa achinchikili,*+ hiyatiyilileña kuleja kweyiku. 17 Akaanini kutiyilila,+ nawa hiyanukili yuma yakuhayamisha mukachi kawuku, ilaña wena achinchikili* nawa atondeli nlomboli wakuyilombola kulonda afunti muwuduñu muEjipitu.+ Ilaña eyi wudi Nzambi wanyakalaña kwanakena,* wukweti wushona* niluwi, hiwazuwaña swayiku, wukweti kukeña kwakashinshi+ nawa hiwayuumbili chisayikilaku.+ 18 Hela chakwila adituñilili chifwikija wachikuñu* wamwana kañombi nawa ahosheleña nawu, ‘Iwu diyi Nzambi yenu wayifumishili muEjipitu,’+ nawa akoñeli yuma yayivulu yakasawuntu, 19 hela chadiña mwenimu, muloña waluwi lweyi lwasweja, eyi hiwayuumbili chisayikila mwisañaku.+ Chishimi cheevu hichafumini hadi wena namwaana nakuleka kuyilombola munjilaku, hela chishimi chakesi hichafumini hadi wena nawufuku nakuleka kuyitoñekela munjila yatela kuyawuku.+ 20 Nawa wayinkeli spiritu yeyi yayiwahi kulonda yiyikwashi kwikala nakashinshi,+ hiwayikiishili manina eyiku,+ nawa wayinkeleña menji neyi anatiyi mpwila.+ 21 Muloña hadi yaaka 40, wayinkeleña yakuda mwisaña.+ Akaankililihu chuma wanyi. Yakuvwala yawu hiyatabokelihuku,+ nawa nyendu yawu yananinihu wanyi.

22 “Wayinkeli mawanta niantu, nakuyanzañana muyibalu-muyibalu,+ dichi atambwili ituña daSihoni,+ dikwila nawu, ituña damwanta wakuHeshiboni,+ kushilahu niituña daOgi+ mwanta wakuBashani. 23 Nawa wavulishili anyanawu awamayala neyi tutumbwa twamumawulu.+ Kufumahu, wayileteli mwituña diwakanini ankakulula jawu neyi dimu mwatela kwiñilawu nikuditambula kwikala dawu.+ 24 Dichi anyanawu awamayala eñililimu nawa atambwili idi ituña,+ nawa eyi wayimikili mushindu aKenani+ hamesu awu, ashakamineña munidi ituña. Anyanta jawu niantu amunidi ituña, wayihanini mumakasa awu, nakuyila mwejima mwakeñeliwu. 25 Nawa atambwili nyisumba yakiñewa+ niituña dawushi,+ nawa atambwili matala mwenzala yuma yayiwahi yejima yanyichidi yashiyashana, mashima akwimba dehi, matempa anyivinyu,+ matempa anyiolivi ninyitondu yayivulu nankashi yasoñaña nyikaabu. Dichi adiili, ekutili nawa atoheli, nawa azañaleli muloña wakuwaha kweyi kwasweja.

26 “Hela chochu, alekeli kwovwahila, adikañili naneyi+ nawa alekeli kulondela Nshimbi jeyi.* Ajahili atuprofwetu tweyi ayisoñamishileña kulonda ayifuntishi kudi eyi, nawa akoñeli yuma yayivulu yakasawuntu.+ 27 Muloña wachumichi, wayihanini mumakasa awakankunyi nawu,+ owu atwalekelihu kuyikabisha.+ Ilaña wena adiña nakukwaabila hakabakeneñawu, eyi wadiña nakutiya mumawulu. Nawa hamuloña waluwi lweyi lwasweja, wadiña nakuyitemeshela akakuyamwina kulonda ayipulwishi mumakasa awayilumbu jawu.+

28 “Ilaña neyi yuma yinayiwahili, adiña nakukoña cheñi yuma yatama kumesu eyi,+ eyi wadiña nakuyihana mumakasa awayilumbu jawu nawa wena adiña nakuyikabisha.*+ Kufumahu, adiña nakufunta kudi eyi nakulomba kulonda wuyikwashi,+ eyi wadiña nakutiya mumawulu nawa wayipulwishileña mpinji yejima muloña waluwi lweyi lwasweja.+ 29 Hela chakwila eyi wukuyisoñamisha kulonda atachiki kwovwahila Nshimbi jeyi cheñi, wena adiña nakudivwimba nikukaana kutiyilila kukuleja kweyi. Nawa afumpileña nshimbi+ jeyi, jinateli kuhandisha muntu neyi ajovwahila.+ Ilaña akufutaleleli nawa adikañili naneyi,* akaanini kutiyilila. 30 Wadiwunjikili nawena+ hadi yaaka yayivulu nawa watwalekelihu kuyisoñamisha naspiritu yeyi kuhitila mudi atuprofwetu tweyi, ilaña wena akaanini kutiyilila. Nkumininaku, wayihanini mumakasa awantu akumatuña+ adikumashanini nawu. 31 Nawa muloña waluwi lweyi lwasweja, hiwayijilumwini+ hela kuyuumba chisayikilaku, muloña eyi wudi Nzambi wukweti wushona* niluwi.+

32 “Dichi dinu, eyi Nzambi yetu, Nzambi wabadika, mukañovu nawa wakutiyisha woma chikupu, eyi wunahembi chitiyañenu cheyi nikumwekesha kukeña kwakashinshi,+ bayi wudiwula makabi ejima anatuwani etu, anyanta jetu, ayilolu jetu,+ atupristu etu,+ atuprofwetu+ etu, ankakulula jetu niantu jeyi ejima kufuma mumafuku awanyanta aAsiriya+ kushika nikuleluku. 33 Eyi wunamwekeshi kuloña muyuma yejima yinatumwekeni, muloña wunamwekeshi kashinshi; ilaña etu yetu tunakoñi mwatama.+ 34 Ilaña anyanta jetu, ayilolu jetu, atupristu etu niankakulula jetu, hiyanovwahili Nshimbi jeyi hela kuhemba kuleja kweyi hela yanukishu* yeyi yiwayisoñamishili nachuku. 35 Hela chakwila adiña mumawanta awu nawa adiluñishileña yuma yayiwahi yayivulu yiwayinkeli nawa adiña mwituña deneni dawushi diwayinkeli, ilaña hiyakukalakeleleliku,+ nawa hiyalekeli kukoña yilwilu yawu yatamaku. 36 Dichi yetu anu lelu dinu, anduñu,+ eñañi, anduñu mwituña diwenkeli ankakulula jetu kulonda adeña nyikaabu yidimu niyuma yayiwahi yidimu. 37 Yakuda yayivulu yidimu yawanyanta iwunatondi neyi atuyuuleña muloña wanshidi jetu.+ Anakuyuula nyijimba yetu niyimuna yetu mwejima munakeñiwu, dichi tunakabakani nankashi.

38 “Dichi hamuloña wayuma yejimiyi, tukutiyañana chitiyañenu+ chakola nakuchisoneka, nawa ayilolu jetu, aLevi etu niatupristu etu+ akulamikaku chilamiku.”

10 Owu etejeli chumichi kuhitila mukulamikaku chilamiku+ adiña:

9 Nawa aLevi adiña: Yeshuwa mwana kaAzaniya, Binuyi wahadi anyana kaHenadadi awamayala, Kadimiyeli,+ 10 niamanakwawu aShebaniya, Hodiya, Kelita, Pelaya, Hanani, 11 Mayika, Rehobi, Hashabiya, 12 Zakuri, Sherebiya,+ Shebaniya, 13 Hodiya, Bani niBeninu.

14 Anlomboli jawantu adiña: Paroshi, Pahati Mowabi,+ Elami, Zatu, Bani, 15 Buni, Azigadi, Bebayi, 16 Adoniya, Bigivayi, Adini, 17 Ateri, Hezekiya, Azuri, 18 Hodiya, Hashumi, Bezayi, 19 Harifi, Anatoti, Nebayi, 20 Magipiyashi, Meshulami, Heziri, 21 Meshezabeli, Zadoki, Yaduwa, 22 Pelatiya, Hanani, Anaya, 23 Hosheya, Hananiya, Hashubi, 24 Haloheshi, Piliha, Shobeki, 25 Rehumi, Hashabina, Mayaseya, 26 Ahiya, Hanani, Anani, 27 Maluki, Harimi niBayana.

28 Antu amakwawu ashalilihu, dikwila nawu, atupristu, aLevi, akakuhemba kuchiisu, añimbi, ambuña ahatembeli* niantu ejima adaambwili kudi antu amumatuña adikumashanini nawu kulonda alondeleña Nshimbi jaNzambi walala,+ hamu nawañodi jawu, anyanawu awamayala niawambanda, ejima eluka yuma nawa atiyishishaña yuma,* 29 adibombeli hamu nawanakwawu, antu jawu alema, nawa adikasili neshiñu ninakusanyika, nawu akulondelaña Nshimbi jaNzambi walala, jahaniniwu kuhitila mudi Mosi kambuña aNzambi walala, nawa nawu akuhembaña chikupu kuleja kwejima kwaYehova Mwanta wetu, wunsompeshi windi ninshimbi jindi. 30 Hitwakasumbwisha anyanetu awambanda kudi antu amwituña ditwadikumashana naduku, nawa anyanetu awamayala+ hiyakasumbula anyanawu awambandaku.

31 Neyi antu amumatuña itwadikumashana nawu akaleta yuma niyakuda yidi yejima nakulandisha hefuku daSabata, hitwakalanda chuma chidi chejima kudi wena haSabata+ hela hefuku dikwawu dajilaku.+ Nawa kuyakuda yetu yamuchaaka chamu 7+ tukakwataku wanyi nawa hitwakatambula mukudi wudi wejimaku.+

32 Cheñi, tunakudikana netu hamuntu-hamuntu tukuhanaña chipimu chamuchisatu chalushekeli* hachaaka-hachaaka lwakuzatisha kumudimu wakwitala* daNzambi yetu,+ 33 kulonda akameneña iyi yuma: mankendi akulunjeka,*+ mulambu wambutu+ wakulambula mpinji yejima, mulambu wakushita wakulambula mpinji yejima hajiSabata,+ hatukweji twatuha,+ yawija yatoñolawu,+ yuma yajila, mulambu wahanshidi+ kulonda abuti hanshidi yawaIsarela nikwakamena nyidimu yejima yakwitala daNzambi yetu.

34 Cheñi nawa, tukuzatisha yinjikijilu kulonda twiluki mpinji yatela kuletawu nchawa atupristu, aLevi niantu kwitala daNzambi yetu kwesekeja nanyitaña hachaaka-hachaaka, kulonda ayibutuleña hakameña kaYehova Nzambi yetu, kwesekeja nachasonekawu muNshimbi.+ 35 Hachaaka-hachaaka, tukuletaña cheñi kwitala daYehova+ nyikaabu yinasambili kuha yamwituña detu ninyikaabu yinasambili kuha yakunyitondu yanyikaabu yashiyashana, 36 kubombelahu niawedi awanyanetu awamayala niayimuna+ yetu, kwesekeja nachasonekawu muNshimbi, niawedi akumataña etu niakumayinda etu. Tukayileta kwitala daNzambi yetu, kudi atupristu azatilaña hetala daNzambi yetu.+ 37 Nawa, twatela kuleta kudi atupristu kutupeka twakuhembelamu* twakwitala daNzambi yetu+ wuña wetu watachi wanseki,+ yawaana yetu, nyikaabu yakunyitondu yejima yashiyashana,+ vinyu yayiha nimanji,+ hamu niyamwikumi kufuma mwituña detu nakuyitwala kudi aLevi,+ muloña aLevi diwu atambulaña jamwikumi munyisumba yetu yejima mwekala nyidimu yawundimi.

38 Nawa atupristu, anyana kaAroni awamayala, atela kwikala hamu nawaLevi hanakutambulawu aLevi yamwikumi; nawa aLevi atela kuhana chamwikumi kufuma hayamwikumi kwitala daNzambi yetu,+ kutupeka* twamunkalaña. 39 Muloña kutupeka twakuhembelamu,* diku hohu kwatela kuletawu aIsarela nianyana kawaLevi awamayala yawaana+ yambutu, vinyu yayiha nimanji,+ nawa dikudi yuma yamwiluña dajila, kushilahu niatupristu akalakalaña, akakuhemba kuchiisu niañimbi. Hitwamba kaleka kwakamena itala daNzambi yetuku.+

11 Dichi ayilolu jawantu, ashakamineña muYerusalema;+ ilaña antu ejima anashali azatishili yinjikijilu+ kulonda chisaka chimu hayisaka 10 achitwali nakushakama muYerusalema, musumba wajila, nawa yisaka yinashali 9, yashakamini munyisumba yikwawu. 2 Kubombelahu, antu akiswilili amayala ejima adihanini kuya nakushakama muYerusalema.

3 Nawa awa diwu anlomboli akukabeta ashakamini muYerusalema. (AIsarela ejima anashali, atupristu, aLevi, ambuña ahatembeli*+ nianyana awamayala avweliwu kudi ambuña aSolomoni,+ ashakamini munyisumba yikwawu yamuYuda, muntu-himuntu heluña dindi mumusumba windi.+

4 Nawa antu amakwawu akumuchidi waYuda niwaBenjamini ashakamini muYerusalema.) Mudi antu akuYuda mwafumini Ataya mwana kaUziya, Uziya mwana kaZekariya, Zekariya mwana kaAmariya, Amariya mwana kaShefatiya, Shefatiya mwana kaMahalaleli, Mahalaleli wumu wahadi anyana kaPerezi awamayala,+ 5 niMayaseya mwana kaBaruki, Baruki mwana kaKolihoze, Kolihoze mwana kaHazaya, Hazaya mwana kaAdaya, Adaya mwana kaYoyaribi, Yoyaribi mwana kaZekariya, Zekariya mwana kamukaShela. 6 Anyana kaPerezi ejima ashakamineña muYerusalema adiña amayala ashikilamu 468.

7 Nawa awa diwu antu akumuchidi waBenjamini: Salilu+ mwana kaMeshulami, Meshulami mwana kaYowedi, Yowedi mwana kaPedaya, Pedaya mwana kaKolaya, Kolaya mwana kaMayaseya, Mayaseya mwana kaItiyeli, Itiyeli mwana kaYeshaya, 8 nawa kufuma hadi yena, hahiñili Gabayi niSalayi, ejima hamu adiña 928; 9 nawa Yoweli mwana kaZikiri diyi wadiña kalama kawu, nawa Yuda mwana kaHasenuwa diyi wadiña chinlonda chindi wakutala musumba.

10 Mudi atupristu: Yedaya mwana kaYoyaribi, Yakini,+ 11 Seraya mwana kaHilikiya, Hilikiya mwana kaMeshulami, Meshulami mwana kaZadoki, Zadoki mwana kaMerayoti, Merayoti mwana kaAhitubi,+ nlomboli wetala* daNzambi walala, 12 niamanakwawu azatileña mudimu wakwitala, ejima adiña 822. Nawa Adaya mwana kaYerohami, Yerohami mwana kaPelaliya, Pelaliya mwana kaAmizi, Amizi mwana kaZekariya, Zekariya mwana kaPashihuri,+ Pashihuri mwana kaMalikiya, 13 niamanakwindi, anlomboli janyitaña, ejima hamu adiña 242. Nawa Amashiya mwana kaAzareli, Azareli mwana kaAhizayi, Ahizayi mwana kaMeshilemoti, Meshilemoti mwana kaImeri, 14 niamanakwawu amakwawu adiña añovu, amayala ahamuka, ejima hamu adiña 128; nawa kalama kawu wadiña Zabidiyeli, wamuchisaka chaya mpuhu.

15 Nawa mudi aLevi: Shemaya+ mwana kaHashubi, Hashubi mwana kaAzirikami, Azirikami mwana kaHashabiya, Hashabiya mwana kaBuni; 16 niaShabetayi+ naYozabadi,+ amudi anlomboli jawaLevi, owu adiña namudimu wakutala nyidimu yahanji yetala daNzambi walala; 17 niMataniya,+ mwana kaMika, Mika mwana kaZabidi, Zabidi mwana kaAsafi,+ mukakulombola mudimu wakwimba, watumbwilileña tumina twakuhameka hakulomba,+ niBakibukiya, wamuchiyedi hadi amanakwindi niAbida mwana kaShamuwa, Shamuwa mwana kaGalali, Galali mwana kaYedutuni.+ 18 ALevi ejima adiña mumusumba wajila adiña 284.

19 Nawa akakuhemba kuchiisu adiña Akubi, Talimoni+ niamanakwawu ahembeleña muyiisu, ejima hamu adiña 172.

20 AIsarela ejima anashali, atupristu niaLevi adiña munyisumba yikwawu yejima yamuYuda, muntu-himuntu wadiña mwiluña dindi daswaniniyi.* 21 Ambuña ahatembeli*+ ashakamineña muOfeli,+ nawa Ziha niGishipa diwu adiña akulumpi akutala ambuña ahatembeli.*

22 Kalama wawaLevi muYerusalema wadiña Uzi, Uzi mwana kaBani, Bani mwana kaHashabiya, Hashabiya mwana kaMataniya,+ Mataniya mwana kaMayika, wahadi anyana kaAsafi awamayala, añimbi; diyi wadiña mukulumpi wakutala mudimu wakwitala daNzambi walala. 23 Muloña kwadiña lushimbi lwayishililiku+ mwanta, nawa añimbi ayitoñweleli yuma yakuyinka kwesekeja nayuma yakeñekeleña hefuku-hefuku. 24 Nawa Petahiya mwana kaMeshezabeli, Meshezabeli wahadi anyana kaZera awamayala, Zera mwana kaYuda, diyi wadiña mukakuleja mwanta maana* hansañu yejima yakundamini antu.

25 Iyi diyi nyikala nimpata yayu mwashakamineña antu, antu amakwawu amuYuda ashakamineña muKiriyati Ariba+ nimumatawuni* anyeñumukiliku, muDiboni nimumatawuni anyeñumukiliku, muYekabizeyeli+ nimumatawuni anyeñumukiliku, 26 muYeshuwa, muMolada,+ muBetipeleti,+ 27 muHazari Shuwali,+ muBeyerisheba nimumatawuni* anyeñumukiliku, 28 muZikilagi,+ muMekona nimumatawuni* anyeñumukiliku, 29 muEnirimoni,+ muZora+ nimuYarimuti, 30 muZanowa,+ muAdulami nimunyikala yawu, muLakishi+ nimumaha awu nimuAzeka+ nimumatawuni* anyeñumukiliku. Ashakamini* muBeyerisheba ndo-o nikuChinekineki chaHinomi.+

31 Nawa antu akumuchidi waBenjamini adiña muGeba,+ muMikimashi, muAyiya, muBeteli + nimumatawuni* anyeñumukiliku, 32 muAnatoti,+ muNobu,+ muAnaniya, 33 muHazori, muRama,+ muGitayimi, 34 muHadidi, muZeboyimi, muNebalati, 35 muLodi nimuOno,+ chinekineki chawakawukalawenu. 36 Nawa mazanvu amakwawu awaLevi afumini muYuda, ayilejeli kushakama mwiluña daBenjamini.

12 Awa diwu atupristu niaLevi ayili hamu naZerubabeli+ mwana kaSheyalitiyeli+ niYeshuwa:+ Seraya, Yeremiya, Ezera, 2 Amariya, Maluki, Hatushi, 3 Shekaniya, Rehumi, Meremoti, 4 Ido, Ginetoyi, Abiya, 5 Miyamini, Mayadiya, Biliga, 6 Shemaya, Yoyaribi, Yedaya, 7 Salilu, Amoki, Hilikiya niYedaya. Awa diwu adiña anlomboli awatupristu niamanakwawu mumafuku aYeshuwa.

8 ALevi adiña Yeshuwa, Binuyi, Kadimiyeli,+ Sherebiya, Yuda niMataniya,+ walombweleña tumina twakusakilila hamu nawamanakwindi. 9 Nawa amanakwawu aBakibukiya naUni emeneña iku anaditalashani nawu hazatileñawu nyidimu yakuhemba.* 10 Yeshuwa wavweli Yoyakimi, Yoyakimi wavweli Eliyashibi+ nawa Eliyashibi wavweli Yoyada.+ 11 Yoyada wavweli Yonatani nawa Yonatani wavweli Yaduwa.

12 Mumafuku aYoyakimi, awa diwu adiña atupristu, anlomboli janyitaña: Meraya, wamwimeneneñaku Seraya;+ Hananiya, wamwimeneneñaku Yeremiya; 13 Meshulami, wamwimeneneñaku Ezera;+ Yehohanani, wamwimeneneñaku Amariya; 14 Yonatani, wamwimeneneñaku Malukayi; Yosefu, wamwimeneneñaku Shebaniya; 15 Edina, wamwimeneneñaku Harimi;+ Helikayi, wamwimeneneñaku Merayoti; 16 Zekariya, wamwimeneneñaku Ido; Meshulami, wamwimeneneñaku Ginetoni; 17 Zikiri, wamwimeneneñaku Abiya;+ . . . ,* wamwimeneneñaku Miniyamini; Pilitayi, wamwimeneneñaku Mowadiya; 18 Shamuwa, wamwimeneneñaku Biliga;+ Yehonatani, wamwimeneneñaku Shemaya; 19 Matenayi, wamwimeneneñaku Yoyaribi; Uzi wamwimeneneñaku Yedaya;+ 20 Kalayi, wamwimeneneñaku Salayi; Eberi, wamwimeneneñaku Amoki; 21 Hashabiya, wamwimeneneñaku Hilikiya; Netaneli, wamwimeneneñaku Yedaya.

22 Anlomboli janyitaña yawaLevi adiñaku mumafuku aEliyashibi, Yoyada, Yohanani niYaduwa+ ayisonekeli niatupristu niwena ayisonekeli, kushika nikuchiyuulu chaDariyusi mwini Peresi.

23 ALevi adiña anlomboli janyitaña yawu, ayisonekeli mumukanda wansañu yanyaaka, kushika nimumafuku aYohanani mwana kaEliyashibi. 24 Anlomboli jawaLevi adiña Hashabiya, Sherebiya niYeshuwa+ mwana kaKadimiyeli,+ nawa amanakwawu emeneña nakuditalashana nawu iku anakuhameka nikusakilila kwesekeja nanshimbi jaDavidi+ muntu waNzambi walala, iku izanvu dawanhembi-iku izanvu dawanhembi. 25 Mataniya,+ Bakibukiya, Obadiya, Meshulami, Talimoni niAkubi+ adiña akakuhemba kuchiisu,+ ahembeleña tupeka twakuhembelamu twadiña kwakwihi nayiisu. 26 Adiña nakukalakala mumafuku aYoyakimi mwana kaYeshuwa,+ Yeshuwa mwana kaYozadaki nimumafuku anguvulu Nehemiya nikapristu Ezera+ mukakukopolola.*

27 Hakuhana mpwembu yaYerusalema, ayikeñakeñeli aLevi kumaluña ejima kwashakamineñawu nawa ayileteli kuYerusalema kulonda enzi nakuyihana namuzañalu, natumina twakusakilila+ ninayifwoyu, yisanji yanyonji ninatudada. 28 Nawa añimbi adizishawu* apompeli hamu kufuma munkambi,* mumaluña anyeñumuka Yerusalema yejima, kufuma munyikala yaweni Netofa,+ 29 kufuma kuBetigiligali+ nikufuma mumpata jaGeba+ nijaAzimaveti,+ muloña añimbi atuñili nyikala muYerusalema yejima. 30 Nawa atupristu niaLevi aditookesheli awenawu, nawa atookesheli antu,+ yiisu+ nimpwembu.+

31 Kufumahu, naleteli ayilolu amuYuda hewulu dampwembu. Kuhiñahu, natondeli mazanvu amaneni ayedi awakakwimba tumina twakusakilila nimukanka wawantu akuyilondela hanyima, nawa izanvu dimu dahitilili kuchidiilu hampwembu nakuya kuChiisu chaNyilumba yaMawuti.+ 32 Hoshaya nichibalu chimu chawayilolu amuYuda ayilondeleleña hanyima, 33 hamu naAzariya, Ezera, Meshulami, 34 Yuda, Benjamini, Shemaya niYeremiya. 35 Adiña hamu nawanyana awamayala avweliwu kudi atupristu iku adi najimpuña:+ Zekariya mwana kaYonatani, Yonatani mwana kaShemaya, Shemaya mwana kaMataniya, Mataniya mwana kaMikaya, Mikaya mwana kaZakuri, Zakuri mwana kaAsafi,+ 36 niamanakwindi aShemaya, Azareli, Milalayi, Gilalayi, Mayayi, Netaneli, Yuda niHaneni, iku adi nayisanji yaDavidi+ muntu waNzambi walala. Nawa Ezera+ mukakukopolola* watwamininiku hambidi yawu. 37 Chahitiliwu kuChiisu chaKaseloki,+ emakeni nakuhitakana Mankenka+ aMusumba waDavidi+ kuhitila kwakandukila mpwembu hewulu Detala daDavidi ndo-o nikuChiisu chaMenji+ kumusela.

38 Izanvu dikwawu dawakakwimba tumina twakusakilila, dahitilili kukabadi kakwawu,* nawa ami nadilondeleli hamu nachibalu chikwawu chawantu, twahitilili hampwembu hewulu daKaposhi kamaOveni*+ ndo-o nikuMpwembu Yeneni+ 39 nihewulu daChiisu chaEfuremu+ ndo-o nikuChiisu chaMusumba waWukulu+ nikushika kuChiisu Chanshi,+ Kaposhi kaHananeli,+ Kaposhi kaMeya, ndo-o nikuChiisu chaNyikoku;+ nawa enjili nakwimena kuChiisu chawaNhembi.

40 Awa mazanvu ayedi awakakwimba tumina twakusakilila emeni kwitala daNzambi walala hadi mpinji yeneni; dichinelili ninami nichibalu chawayinlonda awanyuuli inadiña nawu, 41 niatupristu aEliyakimi, Mayaseya, Miniyamini, Mikaya, Eliyowenayi, Zekariya niHananiya, iku adi najimpuña, 42 niMayaseya, Shemaya, Eleyazari, Uzi, Yehohanani, Malikiya, Elami niEzeri. Nawa añimbi alombweleñawu kudi Izirahiya embili nañovu.

43 Hanodu ifuku, alambwili nyilambu yayivulu nawa azañaleli,+ muloña Nzambi walala wayizañalesheli chikupu. Ambanda nianyana niwena azañaleli,+ chakwila muzañalu wadiña muYerusalema watiyakeneni kwakulehi.+

44 Hanodu ifuku, atondeli amayala kulonda ataleña nkalaña+ jayawaana,+ nyikaabu yakusambila+ nijamwikumi.+ Muniji nkalaña, dimwapompesheleleñawu yakuda yafumineña mumaha anyisumba yakwinka atupristu niaLevi, kwesekeja naNshimbi.+ MuYuda mwadiña kuzañalala muloña wawatupristu niaLevi+ adiña nakukalakala. 45 Nawa atachikili kuzata nyidimu yaNzambi yawu nimudimu wakutookesha, nawa dichelili niañimbi niakakuhemba kuchiisu, kwesekeja nanshimbi jaDavidi nijamwanindi Solomoni. 46 Muloña kunyima mumafuku aDavidi niaAsafi, kwadiña akulumpi* awakakwimba alombweleña añimbi nitumina twakuhameka nitwakusakilila kudi Nzambi.+ 47 Nawa mumafuku aZerubabeli+ nimumafuku aNehemiya, aIsarela ejima ahanineña yawaana kudi añimbi+ niakakuhemba kuchiisu,+ kwesekeja nayuma yakeñekeleña hefuku-hefuku. Nawa aambwileñahu yawaana yakwinka aLevi,+ nawa aLevi niwena aambwileñahu yawaana yakwinka amuchisaka chaAroni.

13 Hanodu ifuku, mukanda waMosi awutañili iku antu anakutiyaku,+ nawa awanini hasonekawu nawu kwosi mwini Amoni hela mwini Mowabi+ watela kwiñila muchipompelu chaNzambi walalaku,+ 2 muloña hiyayinkeli aIsarela yakuda* nimenjiku, ilaña ayilobeleli kudi Balami kulonda ayishiñi.+ Hela chochu, Nzambi yetu wabalumwini ishiñu kwikala nkisu.+ 3 Chatiyiliwu tuhu Nshimbi, atachikili kwaambula antu ejima akuyisaka yakwacheñi*+ mudi aIsarela.

4 Ilaña, henohu chumichi kanda, Eliyashibi,+ ntaña yaTobaya,+ diyi wadiña kapristu watalileña tupeka twakuhembelamu* twamwitala* daNzambi+ yetu. 5 Wamuloñesheleli kapeka keneni kakuhembelamu,* kazatishileñawu kunyima kushamu mulambula wambutu, manaña evumba dadiwahi, yipwepu niyamwikumi yambutu, yavinyu yayiha niyamanji,+ jayinkeleñawu aLevi,+ añimbi niakakuhemba kuchiisu hamu nayawaana yawatupristu.+

6 Nawa mpinji yejimiyi, hinadiña muYerusalemaku, muloña nayili kudi mwanta muchaaka chamu 32+ chachiyuulu chaMwanta Atazakisheshi+ wakuBabiloni; nawa mukuhita kwampinji, namulombeli mwanta nami añiiteji kufumahu. 7 Dichi nayili kuYerusalema nawa namweni chuma chatama chakoñeliyi Eliyashibi+ chakumuloñeshela Tobaya+ kapeka kakuhembelamu, mulubanza lwetala daNzambi walala. 8 Chumichi chantiyishili kutama nankashi, dichi nanatili yuma yaTobaya yejima hanji yadiña mukapeka kakuhembelamu.* 9 Kufumahu, nahanini nshimbi nawa awahishili mutupeka twakuhembelamu.* Kuhiñahu, nafuntishilimu yipwepu yamwitala daNzambi walala,+ hamu namulambu wambutu nimanaña evumba dadiwahi.+

10 Nawa nawanini nawu aLevi+ hiyanakuyinka yakuda yatela kuyinkawuku,+ dichi aLevi niañimbi azatileña mudimu adiyilili, iwu kwiha dindi, iwu kwiha dindi.+ 11 Dichi nayizuwilili ayinlonda awanyuuli+ nami: “Muloñadi itala daNzambi walala chiyanalekeliwu kudakamena?”+ Kufumahu, nayipompesheli hamu nakuyifuntisha muyifulu yawu. 12 Nawa aYuda ejima aleteli yamwikumi+ yambutu, yavinyu yayiha niyamanji mutupeka twakuhembelamu.+ 13 Kuhiñahu, kapristu Shelemiya, Zadoki mukakukopolola* niPedaya kaLevi nayinkeli mudimu wakutala tupeka twakuhembelamu, nawa Hanani mwana kaZakuri, Zakuri mwana kaMataniya, diyi wadiña chinlonda chawu, muloña awa amayala adiña ayishindamena. Diwu adiña namudimu wakwanzañena amanakwawu yuma.

14 Eyi Nzambi yami, ñanukeña+ hachumichi, nawa bayi wujima muyitoñojoka yeyi kukeña kwakashinshi kwinnamwekesheli itala deyi ninyidimu yaduku.*+

15 Munowu mafuku, namweni antu amuYuda anakudatola vinyu mumawukamwinu avinyu haSabata,+ anakuleta nyilumba yambutu nikuyisha hayimbuulu, nawa anakuleta vinyu, nyivinyu, yikuyu niyuma yakulandisha yanyichidi yejima muYerusalema hefuku daSabata.+ Dichi nayisoñamishili kubula kulandisha yuma hadina ifuku.* 16 Nawa akaTira ashakamineña mumusumba, aleteleña inshi niyuma yashiyashana yakulandisha, nakuyilandisha kudi antu amuYuda nimuYerusalema haSabata.+ 17 Dichi nayizuwilili antu alema amuYuda nawa nayilili nami: “Munakukoñeladi ichi chuma chatama, chakwila munakujilola niifuku daSabata? 18 Komana ichi chuma hidichakoñeli niankakulula jenu, chaletesheli Nzambi yetu aleti iku kukala kwejima hadi etu nihadi iwu musumbaku? Ichi dinu munakumuletesha Nzambi yasweji kumuzuwila Isarela nanochu chimunakujilola Sabata.”+

19 Dichi kuyiisu yaYerusalema chikwatachikili kwila mwidima henohu Sabata kanda, nalejeli antu nami enzeli yenzelu. Nawa nashimwini nami bayi ayenzununaku sampu Sabata yinahiti dehi. Anhembi jami amakwawu nayishili kuyiisu kulonda kubuli kwikala akwiñija yuma yakulandisha hefuku daSabata. 20 Dichi akakulanda nakulandulula niakakulandisha nyichidi yejima yayuma, akaamini hanji yaYerusalema kamu hela kayedi. 21 Kufumahu nayisoñamishili nawa nayilili nami: “Munakukaaminadi kumbidi yampwembu? Neyi mwakachihiñishihu cheñi, mwakammona kutama.” Kufuma hohenohu, hiyenjilihu cheñi hefuku daSabataku.

22 Nawa nayilejeli aLevi nami atela kuditookeshaña mpinji yejima nikwinza nakuhemba yiisu kulonda ahembeña ifuku daSabata kwikala dajila.+ Eyi Nzambi yami, ñanukeña nihachumichi, nawa ntiyili luwi kwesekeja nakukeña kweyi kwakashinshi kwasweja.+

23 Munowu mafuku, namweni niaYudeya asumbwili* ambanda+ aAshidodi,+ aAmoni niaMowabi.+ 24 Chibalu chimu chawanyanawu ahosheleña idimi dawaAshidodi niidimi dawantu amboka-mboka, ilaña hosi niwumu welukili kuhosha idimi dawaYudeyaku. 25 Dichi, nayizuwilili nikuyishiña nawa neteli amayala amakwawu+ nikuyibwita nsuki jawu nakuyisanyikisha mwijina daNzambi nami: “Bayi musumbwisha anyanenu awambanda kudi anyanawu awamayalaku, nawa bayi mwiteja anyanawu awambanda kusumbuka kudi anyanenu awamayala hela kudi enu aweniku.+ 26 Komana ichi chuma hidichamukojejeli niSolomoni Mwanta waIsarela kuvulumunaku, tahindi? Munyuza yejima himwadiñahu mwanta wudi neyi yenaku;+ nawa amukeñeli kudi Nzambi yindi,+ chakwila Nzambi wamutondeli kwikala mwanta waIsarela yejima. Ilaña ambanda akwacheñi amuletesheli niyena kuvulumuna.+ 27 Ichi chuma chimunakoñi chawuzondu chakusumbula ambanda akwacheñi+ nakwikala abula kushinshika kudi Nzambi yetu, chakuhayamisha nankashi!”

28 Wumu wahadi anyana kaYoyada+ mwana kaEliyashibi+ kapristu muneni, wekalili muku waSambalati+ wakuHoroni. Dichi namutemwini kumesu ami.

29 Eyi Nzambi yami, yanuki nawa yibabeshi nanochu chinatamishiwu mudimu wawupristu+ nichitiyañenu chawupristu nichawaLevi.+

30 Nawa nayitookesheli kukutama kwejima kwaditamishiliwu nawantu akwacheñi, nawa atupristu niaLevi nayinkeli nyidimu, iwu namudimu windi, iwu namudimu windi,+ 31 nawa natanjikili mpinji yakuletelahu nchawa+ ninyikaabu yinasambili kuha.

Eyi Nzambi yami,+ ñanukeña munjila yayiwahi.