YOWELI
1 Izu daYehova denjili kudi Yoweli* mwana kaPetuweli nawu:
2 “Tiyenu chumichi, enu akulumpi,
Nawa tiyililenu nakanañachima, enu ejima mwashakamaña mwituña.*
Komana chuma chamuchidiwu chamwekanahu dehi mumafuku enu
Hela mumafuku awankakulula jenu?+
3 Muyilejichu anyanenu,
Nawa anyanenu niwena akayileji anyanawu,
Anyanawu niwena akaleji ikiñu dikahiñahu.
4 Yuma yashiyahu tuboola twakisañanaña, anayidii kudi mukanka watuboola;+
Nawa yashiyahu mukanka watuboola, anayidii kudi tuboola twakadi mpuula;
Nawa yashiyahu tuboola twakadi mpuula, anayidii kudi tuboola twafwa hakuda.+
5 Hindukenu, enu akakusheta,+ nawa dilenu!
Dilenu makumbu, enu akakunwa vinyu ejima,
Muloña vinyu yatowala anayifumishi mutunwa twenu.+
6 Muloña muza wunenzi mwituña dami, wañovu nawa wakukañanya kuchinda.+
Mazewu awu himazewu amutupa,+ nawa nyibaña yawu hinyibaña yamutupa.
7 Wunakisañani muvinyu wami nawa wunashiyi mutondu wami wachikuyu kwachishinji,
Nakuyihula chikupu nikuyinatola,
Nakushiya nyitayi yawu to-o.
9 Mwitala daYehova mwosi mulambu wambutu+ nimulambu wavinyu;+
Atupristu, akakumukalakela Yehova, anakudila.
10 Iha anadikisañani, iseki dinakudila;+
Muloña mbutu anayikisañani, vinyu yayiha yinoomi chawu-u, manji anamani.+
11 Andimi anakameni, akakukalakala anyivinyu anakudila makumbu,
Muloña watidiku nibali;
Muloña yakuda yamwiha yinakisiki.
12 Muvinyu wunoomi,
Mutondu wachikuyu wunalepi.
Mutondu wapomegiranati, wamukoma niwaapo,
Nyitondu yejima yamwiha yinoomi chawu-u;+
Muloña muzañalu wunabalumuki nsonyi mukachi kawantu.
Enu akakumukalakela Nzambi yami, iñilenu, kaamenu wufuku wejima iku munavwali yisasa;
Muloña mulambu wambutu+ niwavinyu+ anawulekeshi dehi kwitala daNzambi yenu.
14 Bidikenu* nenu antu ashakami chakadi kuda; tambikenu antu kukupompa kweneni kwajila.+
Pompeshenu akulumpi hamu, kushilahu niantu ejima ashakamaña mwituña,
Kwitala daYehova Nzambi yenu+ nakulomba wukwashu kudi Yehova.
15 Oyihuñu muloña wanodu ifuku!
Muloña ifuku daYehova didi kwakwihi,+
Nawa dakenza neyi kujilumuka kunakufuma kudi Wañovu Jejima!
16 Komana yakuda hiyanayifumishi kumesu etuku?
Nawa muzañalu nikutiya kuwaha hiyanajifumishi mwitala daNzambi yetuku?
17 Mbutu* jinoomini mwishina damafosholu awu.
Mujinkalaña mwosi yuma.
Jinkalaña jambutu anajisandi, muloña mbutu jinoomi.
18 Niyimuna yinakwaaba!
Nyikanka yawañombi yinakululuta, muloña yidana munyenvu!
Nawa nyikanka yanyikoku yinakukabakana.
19 Nakatambika kudi eyi, eyi Yehova;+
Muloña kesi kanochi munyenvu wamwisaña,
Nawa muzuzu wunakisañani nyitondu yejima yamumpata.
20 Nianyama amwisaña anakutalila kudi eyi,
Muloña tuloña twamenji tunoomi
Nawa kesi kanadii munyenvu wamwisaña.”
2 “Vumishenu luseñu muZiyona!+
Bidikenu kabobobu kanjita hampidi yami yajila.
2 Hiifuku damwidima nawa dakwiyila,+
Ifuku damavu nikwiyila kwasweja,+
Neyi chejeji chakumacha chichayaña nakutoñeka hamapidi.
Kudi antu amavulu nawa añovu;+
Kanda kwikaleñahu dehi amuchidiwuku,
Nawa hikwakekalahu cheñi amuchidiwuku
Mwakahita yaaka yamakiñu ejima.
3 Kumbidi yawu kwekala kesi kwochanaña
Kunyima yawu kwekala nyizuzu yakisañanaña.+
Ituña didi hambidi yawu didi neyi itempa daEdeni,+
Ilaña kunyima yawu kudi isaña dakadi chuma,
Nawa kwosi chuma chinateli kupulukaku.
4 Amwekanaña neyi chamwekanaña tuwalu,
Nawa atemukaña neyi tuwalu twanjita.+
5 Lushindu lwawu lwatiyakanaña neyi makalu anakuhita lufuchi hewulu damapidi,+
Neyi chatotokaña kesi kanakwocha ntotu.
Adi neyi antu añovu anaditanjiki kunjita.+
6 Antu akwaaba hamuloña wawena.
Kumesu awu ejima kukudihomba.
7 Alukukaña neyi akakuzuña njita,
Akandamaña mpwembu neyi amashidika,
Muntu-himuntu wedaña munjila yindi
Nawa hiyafumaña munjila jawuku.
8 Hiyadishinjikaña wumu namukwawuku;
Muntu-himuntu watwalekañahu kwenda munjila yindi.
Neyi yitwa yanjita yidimbwishahu amakwawu,
Anashali atwalekañahu.
9 Atemukilaña mumusumba, atemukilaña hampwembu.
Akandamaña hamatala, eñililaña hamawindu* neyi ikombi.
10 Ituña dayizaalaña nawa mawulu akankaña.
Itena nikakweji jineyili,+
Nawa tutumbwa tunaleki kutoñeka.
11 Yehova wakabidika nezu dahewulu kumesu awamashidika indi,+ muloña njita yindi yeneni chikupu.+
Muloña owu wunakushimuna izu Dindi hichilobu;
Muloña ifuku daYehova deneni nawa dakutiyisha woma nankashi.+
Hinyi wunateli kuumika hanidi ifuku?”+
12 Yehova nahoshi nindi: “Hela tuhu yinu mpinji, funtenu kudi ami nanyichima yenu yejima,+
Nakushakama chakadi kuda,+ kudila nikutwa makumbu.
13 Tabulenu nyichima yenu,+ bayi yakuvwala yenuku,+
Nawa funtenu kudi Yehova Nzambi yenu,
Muloña wukweti wushona* niluwi, hazuwaña swayiku+ nawa wavulisha kukeña kwakashinshi,+
Nawa wakahimpa yitoñojoka yindi* yakuleta kukala.
14 Wuneluki hinyi hadaha wukubalumuka nakuhimpa yitoñojoka*+
Nakuyinka nkisu,
Kulonda mulambuli mulambu wambutu nimulambu wavinyu kudi Yehova Nzambi yenu?
15 Vumishenu luseñu muZiyona!
Bidikenu* nenu antu ashakami chakadi kuda; tambikenu antu kukupompa kweneni kwajila.+
16 Pompeshenu antu; jilikenu chipompelu.+
Pompeshenu akulumpi; pompeshenu anyana ninyikeki yinakwamwa.+
Kalemba ediki mukapeka kindi kamukachi nawa kankaña niyena ediki mukapeka kindi.
17 Atupristu, akakumukalakela Yehova, adilili
Hakachi kekeeki dahawiñililu nakameña,+ nakuhosha nawu:
‘Eyi Yehova, yitiyili antu jeyi wushona;
Bayi wilisha wuswana weyi wiikali chuma chakuseha,
Nakuleka nyuza yiyiyuuleñaku.
Muloñadi antu chikuhoshelawu nawu, “Nzambi yawu wudi kudihi?”’+
18 Dichi Yehova wakafwila chikupu kukiña ituña dindi
Nikutiyila antu jindi wushona.+
19 Yehova wakayakula antu jindi nindi:
‘Ichi inakuyitemeshela mbutu, vinyu yayiha nimanji,
Nawa mukwikuta chikupu;+
Hinakayilishahu cheñi kwikala chuma chakusawula munyuzaku.+
20 Wakukabeta kakuchimunswa nakamutemwina kwakulehi nanenu;
Nakamutemwina kwituña dominina dashala kwamahembi,
Njita yindi yakumbidi* yakatalisha dakaluñalwiji kakumusela*
Ninjita yindi yakunyima yakatalisha dakaluñalwiji kakumujika.*
21 Eyi ituña, bayi wutiya womaku.
Zañalalaku nikutiya kuwaha, muloña Yehova wakela yuma yamaneni.
22 Enu anyama amwisaña, bayi mutiya womaku,
Muloña maluña amwisaña akudiishilamu yimuna mwakekala munyenvu,+
Nawa nyitondu yakasoña nyikaabu;+
Mutondu wachikuyu niwamuvinyu yatela kusoña chikupu.+
23 Enu anyana kaZiyona, zañalalenu nikutiya kuwaha muloña waYehova Nzambi yenu;+
Muloña wakayinka nvula yakusambila yashikila,
Nawa wakayinokeshela nvula yeneni,
Nvula yakusambila ninvula yakukumishaku, neyi chichadiña hakusambila.+
24 Hamawuhulilu hakenzala mbutu yakupepa,
Nawa mumawukamwinu mwakenzala vinyu yayiha nimanji.+
25 Nawa nakayifweta hayaaka
Yinadii mukanka watuboola, tuboola twakadi mpuula, tuboola twafwa hakuda nituboola twakisañanaña,
Mashidika ami amavulu inayitemesheleli.+
26 Chakadi nikujina mwakada nakwikuta,+
Nawa mwakashimeka ijina daYehova Nzambi yenu,+
Wunayilili yuma yakuhayamisha;
Antu jami hiyakayitiyishahu cheñi nsonyiku.+
27 Nawa mwakeluka nenu ami nidi mukachi kaIsarela+
Nawa nenu yami Yehova Nzambi yenu,+ kwosi mukwawuku!
Antu jami hiyakayitiyishahu cheñi nsonyiku.
28 Kufumahu nakahuñunwina spiritu yami+ hadi antu ejima,
Anyanenu awamayala niawambanda akaprofweta,
Akulumpi jenu akalota yilota,
Nawa anyikwenzi jenu awamayala akamona yimwenu.+
29 Cheñi, mumafuku wenowu, nakahuñunwina spiritu yami
Nihadi anduñu jami awamayala niawambanda.
31 Henohu ifuku daYehova deneni nawa dakutiyisha woma kanda dinzi+
Itena dakabalumuka mwidima nawa kakweji kakabalumuka mashi.+
32 Dichi muntu wejima wukutambika hejina daYehova akamwamwina;+
Muloña haMpidi yaZiyona nimuYerusalema mwakekala owu akapuluka,+ neyi chahoshayi Yehova,
Ayipuluka atambikayi Yehova.”
3 “Muloña tiyenu! munowu mafuku nawa hanoyu mpinji,
Neyi nafuntishi dehi ankoli amuYuda niamuYerusalema,+
2 Nakapompesha hamu ninyuza yejima
Nakuyikunkumwishila kuChinekineki chaYehoshafati.*
Nakasompa nawu kwenoku+
Kwimenaku antu jami niIsarela wuswana wami,
Muloña ayipalañesheleli munyuza,
Nawa adanzañeneni ituña dami hakachi kawu.+
3 Muloña antu jami ayisakulaña nachinjikijilu;+
Akuhimpa kansi weyala nachivumbi
Nawa akulandisha kansi wamumbanda navinyu yakunwa.
4 Nawa, eyi Tira niSidoni ninenu maluña ejima aFilisitiya,
Munakukeñadi kudi ami?
Kudi chuma chimunakukeña kunfweta hachuma chatama chinayikoña?
Neyi munakunfweta,
Nukunyakala swayi-swayi kuleta wufwetu wenu hanyitu yenu.+
5 Chineli munasendi siliva yami niwuru,+
Nawa munaleti maheta ami amawahi nankashi mutembeli jenu;
6 Nawa antu amuYuda nimuYerusalema munayilandishi kudi aGiriki,+
Kulonda muyitwali kwakulehi neluña dawu;
7 Inakuyisañumuna kulonda afumi kwiluña kumwayilandishili,+
Nawa nukuyifweta hachuma chimunakoñi.
8 Inakulandisha anyanenu awamayala niawambanda kudi antu amuYuda,+
Nawa wena akayilandisha kudi antu akuSheba, kumuza wakwakulehi;
Muloña Yehova yomweni diyi wunachihoshi.
9 Bidikenu chumichi munyuza nenu:+
‘Diloñeshenu* kuzuña njita! Sañumunenu ayilobu!
Amashidika ejima aswini mukamwihi, yilekenu ayi!+
10 Yitwa yenu yakudima nachu yichilenu mpoku jatubali niyitwa yenu yakukunkula nachu yichilenu mayoña.
Wazeya ahoshi nindi: “Nikweti ñovu.”
11 Enu nyuza yejima yanyeñumuka, twayenu mukwashani, pompenu hamu!’”+
Eyi Yehova, kunidi iluña wuleteliku antu jeyi añovu.*
12 “Nyuza ayisañumuni kulonda yinzi kuChinekineki chaYehoshafati;
Muloña kwenoku dikunukushakama nakusompesha nyuza yejima yanyeñumuka.+
13 Zuyenu chikwakwa, muloña mbutu yinahi dehi.
Kunkumukenu mudatoli, muloña muwukamwinu wavinyu munenzali.+
Mwakuhembela vinyu munakusumpoka, muloña kutama kwawu kunasweji.
14 Mazaza nimazaza adi muchinekineki chakusompela,
Muloña ifuku daYehova didi kwakwihi nachinekineki chakusompela.*+
15 Itena nikakweji jakeyila,
Nawa tutumbwa twakaleka kutoñeka.
16 Nawa Yehova wakabuluma muZiyona,
Wakanyamuna izu dindi muYerusalema.
Nawa iwulu niiseki jakakanka;
Ilaña Yehova wakekala chiswamu chawantu jindi,+
Mpwembu yawantu jaIsarela.
17 Nawa dihimwakeluka nenu yami Yehova Nzambi yenu, washakama muZiyona, mpidi yami yajila.+
18 Hanodu ifuku mapidi akavwa vinyu yatowala,+
Kutupidi kwakapwapumuka mayeli,
Nawa tuloña twamuYuda twejima twakahita menji.
Mwitala daYehova mwakedika kaseloki,+
Nawa kakatukumwina Chinekineki chaNyitondu yaNyizenzi.
19 Ilaña Ejipitu wakashala kwamahembi,+
Nawa Edomi wakekala isaña dakadi chuma,+
Muloña wayuma yatama yinayikoñiwu antu amuYuda,+
Eni ituña mwapwekeshañawu mashi akadi muloña.+
20 Ilaña muYuda akashakamañamu mpinji yejima,
NimuYerusalema akashakamañamu kushika nikumakiñu ejima.+
21 Nakamona mashi awu nami adana muloña,* inamweneña nami adi namuloña;+
Nawa Yehova wakashakama muZiyona.”+
Daya mukwila nawu, “Yehova Diyi Nzambi.”
Hela “iseki.”
Iwu himumbanda wabula kukaamahu dehi neyala.
Hela “nfumwindi.”
MuchiHeberu, “dimanyekenu.”
Hela “etenu hantulu jenu.”
MuchiHeberu, “jilikenu.”
Hela hekwawu, “yikuyu yooma.”
Hela “heseki.”
Hela “hanjanina.”
Hela “himuwahi.”
Hela “kuditoñesha.”
Hela “kuditoñesha.”
MuchiHeberu, “jilikenu.”
MuchiHeberu, “chamesu.”
Dikwila nawu, “Kaluñalwiji Kafwa.”
Dikwila nawu, Kaluñalwiji kaMeditereniyani.
Hela “nakahana yimwenu.”
Daya mukwila nawu, “Yehova Diyi Nsompeshi.”
MuchiHeberu, “Dijilikenu.”
Hela “ayilobu jeyi.”
Hela “chakufuukwila.”
Hela “muloña wamashi.”