AMOSI
1 Mazu aAmosi* wadiña hakachi kawakakulela nyikoku kuTekowa,+ atambwililiyi muchimwenu kutalisha hadi Isarela mumafuku aMwanta Uziya+ waYuda nimumafuku aYerobowami+ mwana kaYowashi,+ mwanta waIsarela, henohu kunashali yaaka yiyedi hakwila mutentanshi winzi.+ 2 Wahosheli nindi:
“Yehova wakabuluma muZiyona,
Nawa wakanyamuna izu dindi muYerusalema.
Maluña awatubiña akudiishilamu yimuna akadila,
Nawa hewulu dampidi yaKarimeli hakoma.”+
3 “Yehova nahoshi nindi,
‘“Hakudikaña* kwaDamakasa kusatu, hela kuwana, ami nakahimpa wanyi,
Muloña amuhulili Giliyadi nayuma yachikuñu yakuhula nachu.+
5 Nakakotola nyikomenu yaDamakasa;+
Nakakisañana antu ashakamaña muBikati Aveni
Ninowu wunakuyuula* muBeti Edeni;
Nawa antu amuSiriya akaya muwunkoli kuKiri,”+ dichinahoshiyi Yehova.’
6 Yehova nahoshi nindi,
‘“Hakudikaña kwaGaza kusatu,+ hela kuwana, ami nakahimpa wanyi,
Muloña atwalili izanvu dejima dawankoli+ nakudihana kudi Edomi.
7 Dichi nakatemesha kesi hampwembu yaGaza,+
Nawa kakwocha tuposhi twindi twakola.
8 Nakakisañana antu ashakamaña muAshidodi,+
Ninowu wunakuyuula* muAshikeloni;+
Nakamubabesha Ekironi,+
Nawa aFilisitinu anashalihu akajiya,”+ dichinahoshiyi Yehova Mwanta Wabadika.’
9 Yehova nahoshi nindi,
‘Hakudikaña kwaTira kusatu,+ hela kuwana, ami nakahimpa wanyi,
Muloña ahanini izanvu dejima dawankoli kudi Edomi,
Nawa hiyanukili chitiyañenu chawumana kwamuntuku.+
10 Dichi nakatemesha kesi hampwembu yaTira,
Nawa kakwocha tuposhi twindi twakola.’+
11 Yehova nahoshi nindi,
‘Hakudikaña kwaEdomi kusatu,+ hela kuwana, ami nakahimpa wanyi,
Muloña wamukumpishili manakwindi nampoku yakabali,+
Nawa muloña wakaanini kumwekesha luwi;
Nakuzuwa kwindi wayitabolaña chakadi kuleka,
Nawa watwalekañahu kuyihilila.+
13 Yehova nahoshi nindi,
‘“Hakudikaña kwawaAmoni+ kusatu, hela kuwana, ami nakahimpa wanyi,
Muloña abusili ambanda amuGiliyadi adiña namavumu kulonda atoheshi iluña dawu.+
14 Dichi nakakwatisha mpwembu yaRaba nakesi,+
Nawa kakwocha tuposhi twindi twakola,
Nakabobobu kanjita mwifuku danjita,
Nachinjimbi mwifuku dampepela yeneni.
15 Nawa mwanta wawu wakaya muwunkoli hamu nawayilolu jindi,”+ dichinahoshiyi Yehova.’
2 “Yehova nahoshi nindi,
‘“Hakudikaña* kwaMowabi kusatu,+ hela kuwana, ami nakahimpa wanyi,
Muloña wocheli mafwaha amwanta wakuEdomi nakushala kwamawuti.
2 Dichi nakatemesha kesi muMowabi,
Nawa kakwocha tuposhi twakola twaKeriyoti;+
Mowabi wakafwa nepumba,
Nakabobobu kanjita, nachivumina chaluseñu.+
3 Nakafumisha nyuuli* mukachi kindi
Nawa nakajaha ayilolu jindi ejima hamu nayena,”+ dichinahoshiyi Yehova.’
4 Yehova nahoshi nindi,
‘Hakudikaña kwaYuda kusatu,+ hela kuwana, ami nakahimpa wanyi,
Muloña akaanini nshimbi jaYehova,
Nawa hiyovwahilili kuleja kwindiku;+
Ilaña kutwamba kwalondeleliwu ankakulula jawu dikunayiluwañeshi niwena.+
5 Dichi nakatemesha kesi muYuda,
Nawa kakwocha tuposhi twakola twaYerusalema.’+
6 Yehova nahoshi nindi,
‘Hakudikaña kwaIsarela kusatu,+ hela kuwana, ami nakahimpa wanyi,
Muloña alandishaña waloña nasiliva,
Mwana natata yindi elaña wuvumbi nakansi wamumbanda yowumu,
Nakujilola ijina dami dajila.
8 Akaamaña kwakwihi nakameña kejima+ hayakuvwala yatambwiliwu kwikala chuma chakukwatilamu muloña wamukudi;+
Nawa vinyu yanwinañawu kwitala* dawanzambi jawu ayitambwili kudi owu afwetesheliwu.’
9 ‘Ilaña yami nakisañeni mwini Amori kumesu awu,+
Owu wadiña wamulehi neyi nyisida nawa wakola neyi nyikula;
Nakisañeni nyikaabu yindi kwiwulu ninyiji yindi kwishina.+
10 Nayifumishili mwituña daEjipitu,+
Nawa nayendesheli mwisaña yaaka 40,+
Kulonda mutambuli ituña dawaAmori.
11 Nanyamwinihu anyanenu amakwawu awamayala kulonda ekali atuprofwetu+
Nianyikwenzi jenu amakwawu ekali aNaziri.+
Enu antu jaIsarela, komana hidimuku?’ dichinahoshiyi Yehova.
12 ‘Ilaña mwayinkeleña aNaziri vinyu nenu anwi,+
Nawa mwayilejeleña atuprofwetu nenu: “Bayi muprofwetaku.”+
13 Dichi nakayichikila mwiluña denu,
Neyi itemba dinasendi mbutu yinamuniwu chidachikaña yuma yidi mwishina dadu.
14 Watemuka hakamona iluña dakutemukilaku,+
Wakola hakekala cheñi nañovuku,
Nawa kwosi chilobu wakapulwisha wumi windiku.
15 Mukakukwata kuwuta wamukunji hakatwesha kwimanaku,
Mukakutemuka lufuchi hakatwesha kupulukaku,
Nawa mukakwendela hakawalu hakatwesha kupulwisha wumi windiku.
16 Niwasweja kuhamuka hakachi kawayilobu
Wakatemuka nzekesi hanodu ifuku,’+ dichinahoshiyi Yehova.”
3 “Enu antu jaIsarela, tiyenu idi izu dinahoshiyi Yehova hadi enu, kutalisha hachisaka chejima chinafumishili mwituña daEjipitu:
2 ‘Hayisaka yejima yahamaseki nelukahu enu hohu.+
Dichinakayibabeshela hayiluwa yenu yejima.+
3 Komana antu ayedi anateli kwendela hamu chakadi kusambila kutiyañana?*
4 Komana mutupa nateli kubuluma mwisaña hakadi kanyama kanateli kukwatayi?
Komana mwenzi wamutupa* nateli kubuluma muchididi chindi neyi kwosi chinakwatiyi?
5 Komana kada kanateli kufwa mumuhetu hamaseki henohu hosi ikoña?*
Komana muhetu nateli kusahuka chakadi kukwata chuma?
6 Neyi luseñu aluvumisha mumusumba, komana antu hiyazaalañaku?
Neyi yihuñu yimwekana mumusumba, komana Yehova hidiyi wunachikoñiku?
7 Muloña Yehova Mwanta Wabadika hanateli kwila chuma
Chakadi kusolola nsañu yindi yakujinda* kudi ambuñindi atuprofwetuku.+
8 Mutupa nabulumi!+ Hinyi wukubula kutiya woma?
Yehova Mwanta Wabadika nahoshi! Hinyi wukubula kuprofweta?’+
9 ‘Bidikenu chumichi hatuposhi twakola twaAshidodi
Nihatuposhi twakola mwituña daEjipitu.
10 Muloña hiyeluka kwila chuma chaloñaku,” dichinahoshiyi Yehova,
“Owu anakudilumbikila ndombu nikujilumuka mutuposhi twawu twakola.”’
11 Dichi Yehova Mwanta Wabadika nahoshi nindi,
‘Mukankunyi wakakuchika ituña,+
Wakakumanisha ñovu,
Nawa tuposhi tweyi twakola akatubuwa.’+
12 Yehova nahoshi nindi,
‘Neyi kabiña chahukulañayi nyendu yiyedi hela chibalu chetelu kukanwa kamutupa,
Dichakayihukulawu niantu jaIsarela,
Owu anashakami muSamariya hatudidi twalubanji nihayitwamu yayiwahi.’*+
13 ‘Tiyenu nawa soñamishenu* amwitala daYakoba,’ dichinahoshiyi Yehova Mwanta Wabadika, Nzambi wamazaza.
14 ‘Muloña hefuku dinakababesha Isarela hakudikaña* kwindi kwejima,+
Dihinakababesha nitumeña twaBeteli;+
Nseñu jakameña akajiketula nawa jakaholoka hamaseki.+
15 Nakahumuna itala damayinza hamu netala danooña.’
4 “Tiyenu idi izu, enu añombi anyikaji amuBashani,
Adi hampidi yaSamariya,+
Enu ambanda munakwiyila akehelamu+ nawa munakuchika atuzweñi,
Enu mwalejaña anfumu* jenu nenu, ‘Tuletelenu jakunwa!’
2 Yehova Mwanta Wabadika nasanyiki nakujila kwindi nindi,
‘“Tiyenu! Mafuku anakwinza hadi enu hakayinyamunayi nanzambu jakukudikaku mbiji
Nawa enu anashali namayumba.
3 Mwakedikila mumapwata ahambañu, mwakemakana wejima wenu iwu nahindi, iwu nahindi;
Nawa akayinatila kuHarimoni,” dichinahoshiyi Yehova.’
5 Ochenu mulambu wakusakilila nachu wamankendi akweti iluñi;+
Bidikenu chikupu nyilambu yenu yakudikeñela!
Muloña dichuma chimwakeña kwila, enu antu jaIsarela,’ dichinahoshiyi Yehova Mwanta Wabadika.
6 ‘Hakwila ami, nafumishili yakuda kumazewu enu* munyisumba yenu yejima
Nawa nakojejeli yakuda kumana mumatala enu ejima;+
Ilaña himwafuntili kudi amiku,’+ dichinahoshiyi Yehova.
7 ‘Cheñi hinayinokeshelelihu nvula hatukweji tusatu henohu chilaaka chakwaañula kandaku;+
Nanokesheli nvula hamusumba wumu ilaña hawukwawu nehi.
Iluña dimu dikwikala nanvula,
Ilaña iluña dikwawu dinabuli nvula dikuuma.
8 Antu amunyisumba yiyedi hela yisatu atedañileña nakuya mumusumba wumu nakunwa menji,+
Ilaña mpwila hiyamanineñaku;
Hela chochu, himwafuntili kudi amiku,’+ dichinahoshiyi Yehova.
9 ‘Nayeteli nankanza yasweja ninakabuwa.+
Mwadivulishilileña maha nimatempa anyivinyu,
Ilaña tuboola twadiileña nyitondu yenu yanyikuyu niyanyiolivi;+
Ilaña chochimu himwafuntili kudi amiku,’+ dichinahoshiyi Yehova.
10 ‘Natemesheli chipupu mukachi kenu neyi chamuEjipitu.+
Najahili anyikwenzi jenu nampoku yakabali+ nawa natambwili tuwalu twenu.+
Nakojejeli ivumba damuyilombu yenu kununka mumazulu enu;+
Ilaña himwafuntili kudi amiku,’ dichinahoshiyi Yehova.
11 ‘Nayijilumwini
Neyi Nzambi chajilumwiniyi Sodoma naGomora.+
Nawa mwadiña neyi ikunji dinahukuliwu mukesi;
Ilaña himwafuntili kudi amiku,’+ dichinahoshiyi Yehova
12 Dichuma chinakakwila, eyi Isarela.
Muloña chumichi dichinakakwila,
Diloñeshi kudibulakana naNzambi yeyi, eyi Isarela.
13 Muloña tiyenu! Diyi wawumbili mapidi+ nawa waleñeli mpepela;+
Walejaña muntu yitoñojoka Yindi,
Wabalumunaña kucha kwikala mwidima,+
Nawa wadatolaña hayinañanaña yahamaseki;+
Yehova Nzambi wamazaza didu ijina dindi.”
5 “Enu amwitala daIsarela, tiyenu idi izu dinnakuyihoshela neyi mukeña:*
2 ‘Isarela, mujiki,* nadimbuki;
Hakutwesha kwimana cheñiku.
Anamushiyi chisayikila mwituña dindi;
Kwosi wakumunyamunaku.’
3 “Muloña Yehova Mwanta Wabadika nahoshi nindi:
‘Musumba watemeshaña amashidika 1,000 kunjita wakashala na 100.
Nawa wayaña namashidika 100 kunjita wakashala na 10. Ichi dichakayimwekena amwitala daIsarela.’+
4 “Muloña Yehova naleji amwitala daIsarela nindi:
‘Nkeñakeñenu kulonda mutwalekihu kuhanda.+
Bayi muya kuGiligali+ hela kuhitila kuBeyerishebaku,+
Muloña chakadi nikujina, Giligali wakaya muwunkoli,+
Nawa Beteli wakajiya.*
6 Mukeñakeñenu Yehova, mutwalekihu kuhanda,+
Kulonda amwitala daYosefu abuli kuyibutukila neyi kesi,
Nakumwocha Beteli, chakadi wakumujima.
8 Owu waleñeli mukanka watutumbwa twaKima* nimukanka watutumbwa twaKesili,*+
Wabalumunaña mwidima wasweja kwikala ntetemena,
Wabalumunaña mwaana kwiyila neyi wufuku,+
Watambikaña menji amukaluñalwiji
Nakuyiichila hewulu deseki,+
Ijina dindi diyi Yehova.
9 Wakaleta kujilumuka hadi akañovu,
Nakujilumuna maluña akiñewa.
10 Ahelaña antu ayifumbaña kuchiisu chamusumba,
Nawa atiyaña kutama antu ahoshaña chalala.+
11 Chineli mwasonkeshaña kazweñi iha
Nawa mwatambulaña mbutu yindi kulonda yiikali mulambu,+
Himwakatwalekahu kushakama mumatala amalola akusoña imunatuñiku+
Nawa himwakanwaña vinyu yamumatempa anyivinyu amawahi imunatumbiku.+
12 Muloña neluka kuvula kwakudikaña* kwenu
Nikutoha kwanshidi jenu,
Mwakabishaña aloña,
Mwatambulaña majika kanwa,*
Mwadiwulaña wuswa wakazweñi kuchiisu chamusumba.+
13 Dichi, antu akweti kashinshi akamwena nzo-o hayina mpinji,
Muloña yakekala mpinji yayihuñu.+
Dichi Yehova Nzambi wamazaza wukwikala nanenu,
Neyi chimwahoshaña nenu wudi nanenu.+
Hadaha Yehova Nzambi wamazaza
Wukuyitiyila luwi ashalahu aYosefu.’+
16 “Dichi, Yehova Nzambi wamazaza, Yehova, nahoshi nindi:
‘Mumalubanza ejima amusumba mukwikala kudila makumbu,
Nimunyikwakwa yejima akukalokaña nawu, “Yayo, yayo!”
Akutambika andimi kulonda enzi nakudila
Nieluka chikupu kudila kulonda enzi nakudila makumbu.’
17 ‘Mumatempa ejima anyivinyu mukwikala kwamakumbu hohu;+
Muloña ami nukuhita mukachi kenu,’ dichinahoshiyi Yehova.
18 ‘Oyihuñu yikumona antu akeñeshaña ifuku daYehova!+
Chumanyi chimunakukuhwelela kumwekana hefuku daYehova?+
Dakekala mwidima, bayi chejejiku.+
19 Hanodu ifuku mwakekala neyi muntu wunakutemuka mutupa ilaña amuwana kudi bera,
Nawa cheñilayi mwitala dindi nakukundama kumbañu nachikasa, kapela kamusuma.
20 Komana ifuku daYehova hidakekala mwidima, bayi chejejiku?
Komana hidakeyila, bayi kutoñekaku?
21 Nahela nikudiwula yawija yenu,+
Nawa hinatiyaña kuwaha ivumba dakupompa kwenu kwamaneni kwajilaku.
22 Hela tuhu mukunlambula nyilambu yamukuma yakushita ninyilambu yachawaana,
Hinukuzañalala nanyilambu yenuku;+
Nawa hinukutiya kuwaha nyilambu yenu yakuwunda yawanyama anunaku.+
23 Lekenu kunletela ipumba datumina twenu;
Nawa hinnakukeña kutiya tumina twayisanji yenu yanyonjiku.+
24 Lekenu wuñanji wupwapumukeña neyi menji,+
Nikuloña kupwapumukeña neyi kaloña kahitaña menji mpinji yejima.
25 Enu amwitala daIsarela, hayina yaaka 40 yimwadiña mwisaña
Komana mwanletelelihu nyilambu ninyilambu yachawaana?+
26 Ichi dinu mwatela kusenda mwanta wenu Sakuti niKayiwani,*
Ankishi jenu, katumbwa kanzambi yenu, kimwadituñilili enu aweni,
27 Nakayitwala muwunkoli kubadika kuDamakasa,’+ dichinahoshiyi wukweti ijina daYehova Nzambi wamazaza.”+
6 “Oyihuñu yikumona antu adikuhwelela* awenawu muZiyona,
Owu anakudimona nawu akiñewa kumpidi yaSamariya,+
Antu aya mpuhu munyuza yatiyakana,
Kwenzaña amwitala daIsarela!
2 Zambukilenu kuKaline mutali.
Komana wena abadika awa mawanta,
Hela iluña dawu deneni kubadika denu?
4 Akaamaña hatudidi twamazewu anzovu+ nikudolojola muyitwamu,+
Nakuda yizamba yanyikoku yahamukanka nianyana kañombi;*+
5 Asonekaña tumina kwesekeja nachivumina chakadada,*+
Nawa kufwana Davidi, atuñaña yisanji;+
6 Anwinaña vinyu muyeña yakunama+
Nawa adiwayishaña awenawu namanji amawahi nankashi.
Ilaña hiyashaña maana* kuyihuñu yaYosefuku.+
7 Dichi, diwu akekala atachi kuya muwunkoli hadi ankoli,+
Nawa yidika yamapumba yawantu adolojolaña yakamana.
8 ‘Yehova Mwanta Wabadika nadisanyiki yomweni,’+ dichinahoshiyi Yehova Nzambi wamazaza,
‘“Natiyaña kutama kudivwimba kwaYakoba,+
Nahela tuposhi twindi twakola,+
Nawa nukuhana musumba niyuma yenzalamu.+
9 “‘“Nawa neyi antu 10 ashala mwitala, niwena akufwa. 10 Ntaña* yawu wukwinza nakuyisenda nawa wukuyochaña wumu-wumu. Wukufumisha mafwaha awu mwitala; kuhiñahu wukwihula wejima wudi mutupeka twamukachi ketala nindi, ‘Kudihu amakwawu iwudi nawu?’ Yena wukwakula nindi, ‘Inehi!’ Kuhiñahu, wukumuleja nindi, ‘Mwenakuhu! Muloña ayinu hidiyi mpinji yakutena ijina daYehova hela chantiku.’”
11 Muloña Yehova diyi wunakuhana lushimbi,+
Nawa wukuhumuna itala deneni nakushala kwanyilumba,
Nawa itala danyanya dikushala kwanswadi.+
12 Komana tuwalu tunateli kutemuka helola?
Hela muntu nateli kudimahu nañombi?
Muloña enu munabalumuni wuñanji wunekali mutondu wawulembi,
13 Mwazañalalaña nayuma yamukunkulwayi,
Nawa mwahoshaña nenu, “Komana hitunakoli* muloña wañovu jetuku?”+
14 Dichi, enu amwitala daIsarela, nakayiletela muza wakayilukuka,’+ dichinahoshiyi Yehova Nzambi wamazaza,
‘Nawa akayikabisha enu kutachikila kuLebo Hamati*+ ndo-o nikuMuhoñi* waAraba.’”
7 Ichi dichuma chammwekesheleliwu kudi Yehova Mwanta Wabadika: Namweni napompeshi mukanka watuboola hampinji yatachikili kumena mbutu yakukumishaku.* Iyi yadiña mbutu yakukumishaku hanyima yakukesa matahu amwanta akudiisha yimuna. 2 Chelili tuboola tumanishi kuda yuma yamenaña mwituña, nahosheli nami: “Eyi Yehova Mwanta Wabadika, mwani anakenaku!+ Indi Yakoba nateli kupuluka ñahi?* Muloña yena wazeya!”+
3 Dichi Yehova wahimpili mwafuukwiliyi* hachumichi.+ Yehova wahosheli nindi, “Chumichi hichakamwekanaku.”
4 Ichi dichuma chammwekesheleliwu kudi Yehova Mwanta Wabadika: Namweni Yehova Mwanta Wabadika natambiki wunsompeshi wakesi. Komishili manyiñi, nawa kwocheli chibalu chetuña. 5 Kuhiñahu, nahosheli nami: “Eyi Yehova Mwanta Wabadika, mwani bayi wila chumichiku.+ Indi Yakoba nateli kupuluka ñahi?* Muloña yena wazeya!”+
6 Dichi Yehova wahimpili mwafuukwiliyi* hachumichi.+ Yehova Mwanta Wabadika wahosheli nindi, “Chumichi nichena hichakamwekanaku.”
7 Ichi dichuma chammwekesheleliyi: Namweni Yehova nemani hampwembu yatuñiliwu namwonji wakwolola nachu, nawa muchikasa chindi mwadiña mwonji wakwolola nachu. 8 Dichi Yehova wañihwili nindi: “Amosi, chumanyi chiwunamoni?” Naakwili nami: “Mwonji wakwolola nachu.” Kufumahu, Yehova wahosheli nindi: “Ichi inakusha hakachi kawantu jami aIsarela mwonji wakwolola nachu. Nukuyanakena cheñi wanyi.+ 9 Yinañanaña yaIsaka+ yakashala mahembi, nawa maluña ajila aIsarela akayikisañana.+ Nakenza nakulukuka amwitala daYerobowami nampoku yakabali.”+
10 Amaziya kapristu wakuBeteli+ watemesheli awa mazu kudi Mwanta Yerobowami+ wakuIsarela nindi: “Amosi nakukukasila kafuta mukachi kawantu amwitala daIsarela.+ Antu amwituña hiyakutwesha kuumika namazu ejima anakuhoshayiku.+ 11 Muloña ichi dichinakuhoshayi Amosi nindi, ‘Yerobowami wukufwa kumpoku yakabali, nawa chakadi nikujina, Isarela wukufuma mwituña dindi nakuya muwunkoli.’”+
12 Dichi Amaziya wamulejeli Amosi nindi: “Eyi mukakumona yimwenu, yaña, temukilaku kwituña daYuda, wakakeñeli yakuda yeyi* kwenoku nawa wakaprofweteli kwenoku.+ 13 Bayi wuprofwetela muBeteli cheñiku,+ muloña hiiluña dajila damwanta+ nawa hiitala dawanta.”
14 Kuhiñahu, Amosi wamwakwili Amaziya nindi: “Hinadiña kaprofwetu hela mwana kakaprofwetuku; ilaña nadiña kabiña,+ nawa nakameneneña nyitondu yayikuyu yanyisikamo.* 15 Ilaña Yehova wanfumishili kumudimu wakulondela mukanka wayimuna, nawa Yehova wanlejeli nindi, ‘Yaña, kaprofweti kudi antu jami aIsarela.’+ 16 Ichi dinu tiyaku izu daYehova: ‘Eyi wunakuhosha neyi, “Bayi wuprofweta yuma yikumumwekena Isarelaku,+ nawa bayi wushimwina wunsompeshi+ wakusompesha amwitala daIsakaku.” 17 Dichi, Yehova nahoshi nindi: “Ñodeyi wukwikala chivumbi mumusumba, nawa anyaneyi awamayala niawambanda akufwa kumpoku yakabali. Ituña deyi akudanzañana namwonji wakupima nachu, ilaña eyi aweni wukufwila mwituña damajilu; nawa chakadi nikujina, Isarela wukufuma mwituña dindi nakuya muwunkoli.”’”+
8 Ichi dichuma chammwekesheleliwu kudi Yehova Mwanta Wabadika: Namweni chimpaaya* mwadiña nyikaabu yamunooña. 2 Kuhiñahu, wañihwili nindi, “Amosi, wunamoni chumanyi?” Naakwili nami, “Chimpaaya* mudi nyikaabu yamunooña.” Dichi Yehova wanlejeli nindi: “Kukuma kwawantu jami aIsarela kunashiki. Nukuyanakena cheñi wanyi.+ 3 ‘Tumina twahatembeli twakabalumuka makumbu hanodu ifuku,’+ dichinahoshiyi Yehova Mwanta Wabadika. ‘Kwakekala yibimbi yayivulu yakanatolawu kwejima,+ chakwila kwakamwena kwanzo-o.’
4 Tiyenu chumichi enu mwadatolaña atuzweñi
Nawa mwajiyishaña antu amwovu mwituña,+
5 Mwahoshaña nenu, ‘Indi chawija chakakweji kakaha chakamana+ mpinjinyi, kulonda tulandishi mbutu jetu?
Nawa Sabata+ yakamana mpinjinyi, kulonda tulandishi mbutu jetu?
Kulonda tukeheshi chipimu chaifa*
Nikutohesha chipimu chalushekeli,*
Nakubalumuna masikelu etu ekali akudimbana;+
6 Kulonda muntu wakaankila tumulandi nasiliva
Nikazweñi nankwabilu jiyedi,*+
Nawa tulandishi mbutu yabula kulumbuluka.’
Komana hidakenzala neyi Nile,
Nakubwankañila nikuuma neyi Nile wamuEjipituku?’+
9 Yehova Mwanta Wabadika nahoshi nindi, ‘Hanodu ifuku,
Nakahumisha itena iku dichidi mwiwulu,
Nawa nakeyilisha ituña namwaana wetenda.+
Nakavwika yisasa mumbunda jejima nawa nyitu yejima nakayilisha mabala;
Nakakojeja chumichi chakekali neyi kudila kwakudila mwana weyala wumu hohu,
Nawa kukuma kwachu kwakekala neyi ifuku datama.’
11 Yehova Mwanta Wabadika nahoshi nindi, ‘Tiyenu! Mafuku anakwinza,
Hinakatemesha nzala yakapwelendendi mwituña,
Bayi neyi hinzala yayakuda hela mpwila yamenjiku,
Ilaña yakutiya mazu aYehova.+
12 Akatedañila kufuma kukaluñalwiji kamu nakuya kukaluñalwiji kakwawu
Nawa kufuma kukabeta kakuchimunswa nakuya kumusela.*
Akakimboka nakukeñakeña izu daYehova, ilaña hiyakadiwanaku.
13 Hanodu ifuku, ambanda alubanji ajiki* akahwidila,
Nianyikwenzi, muloña wampwila;
14 Owu asanyikaña nanshidi yaSamariya+ nakuhosha nawu,
“Eyi Dani,+ kwesekeja nachahandayi nzambi yeyi!”
Nawa nawu, “Kwesekeja nachahanda njila yaBeyerisheba!”+
Akadimbuka, nawa hiyakanyamuka cheñiku.’”+
9 Namweni Yehova+ nemani hewulu dakameña, nawa wahosheli nindi: “Etaku kunyitu yayishimi kulonda mawiñililu akanki. Yiketuli nyitu, nawa anashalihu ami nukuyijaha nampoku yakabali. Kwosi niwumu wukutwesha kutemukaku, nawa kwosi niwumu wunakukeña kutemuka wukupulukaku.+
2 Neyi apunda nakwiñila Mwijamu,*
Nukuyifumishamu nachikasa chami;
Nawa neyi aya mumawulu,
Nukuyifuntisha hamaseki.
3 Nawa neyi akuswama hewulu daKarimeli,
Nukuyikeñakeña nakuyifumishahu.+
Neyi akunswama kwishina dakaluñalwiji,
Kwenoku nukuleja kapela kayisumi.
4 Nawa neyi ayitwala muwunkoli kudi ayilumbu jawu,
Kwenoku nakaleja mpoku yakabali, nawa yakayijaha;+
Nakayishinshika nakuyila chatama, bayi chachiwahiku.+
5 Muloña Mwanta Wabadika, Yehova wamazaza, diyi wakwataña ituña,*
Kulonda disuñunuki,+ dichi antu ejima ashakamañamu akudila;+
Nawa dejima dikwinzala neyi Nile,
Nikuuma neyi Nile wamuEjipitu.+
6 ‘Owu watuñaña mankenka indi mumawulu
Nawa washimatishaña itala dindi hamaseki;
Watambikaña menji amukaluñalwiji,
Nakuyiichila hewulu deseki,+
Ijina dindi diyi Yehova.’+
7 ‘Enu antu jaIsarela, komana himudi neyi anyana kawaKushi kudi amiku?’ dichinahoshiyi Yehova.
8 ‘Tiyenu! Mesu aYehova Mwanta Wabadika adi hawanta wanshidi,
Nawa wakawujiyisha mwituña.+
Ilaña amwitala daYakoba hinakayijiyisha ejimaku,’+ dichinahoshiyi Yehova.
9 ‘Muloña tiyenu! Inakuhana lushimbi,
Nukunyinkesha amwitala daIsarela munyuza yejima,+
Neyi muntu chanyinkeshañayi sefwa,
Chakwila kwosi kadilola kaholokaña hamasekiku.
10 Antu jami ejima akanshidi, akufwa kumpoku yakabali,
Owu anakuhosha nawu, “Yihuñu hiyakenza kwakwihi nanetu hela kutuwanaku.”’
11 ‘Hadina ifuku nakanyamuna chisolu* chaDavidi+ chaholoka,
Nakajika nyaji,
Nawa nakawahisha hakisika;
Nakachituñulula neyi chichadiña kumafuku akunyaaka oko-o,+
12 Kulonda akatambuli yuma yinashali muEdomi,+
Ninyuza yejima yatenañawu nejina dami,’ dichinahoshiyi Yehova, wunakukoña chumichi.
13 Yehova nahoshi nindi, ‘Tiyenu! Mafuku anakwinza,
Mukakudima hakamuwanayi mukakwaañula,
Nimukakudatola nyivinyu hakamuwanayi wunasendi mbutu;+
Nawa mapidi akavwa vinyu yatowala,+
Nawa yakapwapumuka kutupidi twejima.+
14 Nakafuntisha antu jami aIsarela adi muwunkoli,+
Nawa akatuñulula nyisumba yashala mahembi nakutachika kushakamamu;+
Akatumba matempa anyivinyu nakunwa vinyu yawu,+
Nawa akadima maha nakuda nyikaabu yawu.’+
15 ‘Nakayitumba mwituña dawu,
Nawa hiyakayibwitahu cheñi
Mwituña dawu dinnayinkiku,’+ dichinahoshiyi Yehova Nzambi yenu.”
Daya mukwila nawu, “Kwikala Chiteli” hela “Kusenda Chiteli.”
Hela “Wubanji.”
MuchiHeberu, “wunakwati nkuunyi.”
MuchiHeberu, “wunakwati nkuunyi.”
Hela “Wubanji.”
MuchiHeberu, “nsompeshi.”
Dikwila nawu, yakuchidiilu niyakuchimunswa.
Hela “tembeli.”
Hela “chakadi kudishiika?”
Hela “mwenzi wamutupa weyala.”
Hela hekwawu, “wakadi ndisha?”
Hela “kajindilu kindi.”
Hela “Yitwamu yakuDamakasa.”
Hela “shimunenu wunsahu hadi.”
Hela “wubanji.”
Hela hekwawu, “amavulu.”
Hela “ankaaka.”
Hela “nakudikaña.”
Hela “hinayinkelihu yakuda kulonda mudiiku.”
Hela “kamina kakudila nachu.”
Iwu himumbanda wabula kukaamahu dehi neyala.
Hela hekwawu, “wakekala chuma chakulumbisha.”
Hela “kulula.”
Hadaha hitutumbwa twaPiliyadisi twekala mumukanka watutumbwa twaTawurusi.
Hadaha himukanka watutumbwa twaOriyoni.
Hela “wubanji.”
Hela “mali awupwapoki.”
Awa anzambi ayedi anateli kutalisha kupulaneti yaSaturn, iyadifukwileñaku nawu hinzambi.
Hela “adishindamena.”
Chakadi nikujina, anakutena wanta waYuda niwaIsarela.
MuchiHeberu, “chitwamu.”
Hela “anyana kañombi ayizamba.”
Hela “chisanji chanyonji.”
MuchiHeberu, “hiyakatili.”
MuchiHeberu, “Mana kwatata yindi.”
Hela “kulula.”
MuchiHeberu, “hitunadisendeli jinseñu etu aweni.”
Hela “kuchiisu chaHamati.”
Talenu Kulumbulula.
Dikwila nawu, muJanuary nimuFebruary.
MuchiHeberu, “nyamukaku.”
Hela “waditoñesheli.”
MuchiHeberu, “nyamukaku.”
Hela “waditoñesheli.”
MuchiHeberu, “kuda mankendi.”
Hela “mukakukunkula yikuyu yanyisikamo.”
Hela “basiketi.”
Hela “Basiketi.”
Talenu Nsañu Jikwawu B14.
Talenu Nsañu Jikwawu B14.
Dikwila nawu, yakuchidiilu niyakuchimunswa.
Hela “iseki.”
Hela “tumina twakudila nachu.”
Hela “kwaselelaña itena.”
Awa hiyambanda abula kukaamahu dehi neyala.
Hela “Shelu,” dikwila nawu, ijamu dawantu ejima. Talenu Kulumbulula.
Hela “iseki.”
Hela “itenti; nkunka.”