ZEKARIYA
1 Mukakweji kamu 8 muchaaka chamuchiyedi chaDariyusi,+ izu daYehova denjili kudi kaprofwetu Zekariya*+ mwana kaBerekiya, Berekiya mwana kaIdo, nawu: 2 “Yehova wayihililili chikupu atata jenu.+
3 “Wuyileji neyi, ‘Yehova wamazaza nahoshi nindi: “Funtenu kudi ami,’ dichinahoshiyi Yehova wamazaza, ‘ninami nukufunta kudi enu,’+ dichinahoshiyi Yehova wamazaza.”’
4 “‘Bayi mwikala neyi atata jenuku, owu alejeliwu kudi atuprofwetu akusambila nawu: “Yehova wamazaza nahoshi nindi, ‘Mwani, balumukenu,* mufumi munjila jenu jatama nikunyidimu yenu yatama.’”’+
“‘Ilaña wena hiyatiyililiku, nawa hiyanshili maanaku,’+ dichinahoshiyi Yehova.
5 “‘Ichi atata jenu adi kudihi? Komana atuprofwetu ashakamini haya nyaaka? 6 Hela chochu, komana atata jenu hiyamweni kushikijewa kwamazu ami ninshimbi jami jinayilejeli ambuñami, atuprofwetuku?’+ Dichi afuntili kudi ami nakuhosha nawu: ‘Yehova wamazaza natwili kwesekeja nanjila jetu ninyidimu yetu, neyi chafwilileñayi kwila.’”+
7 Hefuku damu 24 dakakweji kamu 11, dikwila nawu, kakweji kaShebati,* muchaaka chamuchiyedi chaDariyusi,+ izu daYehova denjili kudi kaprofwetu Zekariya mwana kaBerekiya, Berekiya mwana kaIdo, nawu: 8 “Namweni chimwenu nawufuku. Namweni muntu wunakwendela hakawalu kachinana, wemeni kuka-a mukachi kanyitondu yayibuubu muchibukubuku; nawa kunyima yindi kwadiña tuwalu tuchinana, twachiluluka nitutooka.”
9 Dichi nehwili nami: “Eyi mwanta wami, anyi awa?”
Kañelu wahosheleña nanami waakwili nindi: “Nukukulejawu.”
10 Kufumahu, muntu wemeni kuka-a mukachi kanyitondu yayibuubu wahosheli nindi: “Awa diwu anatemeshiyi Yehova nakuhitañana mwahita iseki.” 11 Nawa amulejeli kañelu kaYehova wemeni mukachi kanyitondu yayibuubu nawu: “Tunahitañani mwahita iseki, nawa tiyaña! iseki dejima damwena nawa dawunda.”+
12 Dichi kañelu kaYehova wahosheli nindi: “Eyi Yehova wamazaza, Yerusalema ninyisumba yamuYuda,+ yiwunahilili hadi iyi yaaka 70, wukuleka kuyitiyila luwi kushika mpinjinyi?”+
13 Yehova wamwakwili kañelu wahosheleña nanami, namazu aluwi nawa akukundeja. 14 Kuhiñahu, kañelu wahosheleña nanami wanlejeli nindi: “Bidikaku neyi, ‘Yehova wamazaza nahoshi nindi: “Inakufwila chikupu kukiña Yerusalema niZiyona.+ 15 Nyuza yidi mukuwunda nayihilili chikupu,+ muloña nahilili nankashi wanyi,+ ilaña yena yabombeleliku kuyihuñu.”’+
16 “Dichi, Yehova nahoshi nindi: ‘“Nakafunta kuYerusalema naluwi,+ nawa itala dami akadituña mwenomu,”+ dichinahoshiyi Yehova wamazaza, “nawa Yerusalema akamupima namwonji wakupima nachu.”’+
17 “Bidikaku cheñi neyi, ‘Yehova wamazaza nahoshi nindi: “Nyisumba yami yakenzala cheñi nakuwaha; Yehova wakamukundeja cheñi Ziyona+ nawa wakamutonda cheñi Yerusalema.”’”+
18 Chinafumbwili mesu namweni nseñu jiwana.+ 19 Dichi namwihwili kañelu wahosheleña nanami, nami: “Iji nseñu jankahi?” Yena waakwili nindi: “Iji nseñu dijapalañesheli Yuda,+ Isarela+ niYerusalema.”+
20 Kufumahu, Yehova wammwekesheleli akawukalawenu awana. 21 Nehwili nami: “Indi awa anakwinza nakwiladi?”
Yena waakwili nindi: “Iji nseñu dijapalañesheli Yuda chakwila kwosi niwumu watwesheli kubandula mutu windiku. Awa amakwawu akenza nakuyitiyisha woma, nakunata heseki nseñu janyuza yanyamwinini ituña daYuda nseñu jayu, kulonda jimupalañeshi.”
2 Nawa chinafumbwili mesu namweni muntu wudi namwonji wakupima nachu+ muchikasa chindi. 2 Dichi namwihwili nami: “Wunakuya kudihi?”
Yena wañakwili nindi: “Nakupima Yerusalema kulonda nimoni chidiyi muwihi nimukuleha.”+
3 Nami nitali! kañelu wahosheleña nanami wedikili nakuya, nawa kañelu mukwawu wenjili nakumubulakana. 4 Kuhiñahu, wamulejeli nindi: “Yaku lufuchi wumuleji ona mukwenzi neyi, ‘“MuYerusalema akashakamamu+ neyi chashakamañawu munyikala,* muloña wawantu amavulu niayimuna adimu.+ 5 Nawa kudi yena nakekala mpwembu yakesi yinanyeñumuki,+ nawa nakekala kulema mukachi kindi,”’+ dichinahoshiyi Yehova.”
6 “Inzenu! Inzenu! Temukenu mwituña dakukabeta kakuchimunswa,”+ dichinahoshiyi Yehova.
“Muloña nayipalañesheleli kumpepela jiwana jamumawulu,”+ dichinahoshiyi Yehova.
7 “Eyi Ziyona, inzaku! Temukaku, eyi wunakushakama namwana kaBabiloni wamumbanda.+ 8 Muloña Yehova wamazaza, wuneli hanyima yakumulemesha* nantemeshi kunyuza yayipuupileña enu,+ nahoshi nindi: ‘Wejima wukuyikwata enu nakukwata hakantu kadisu* dami.+ 9 Muloña ichi nukuyizuyila chikasa chami, nawa akuyipuupa kudi anduñu jawu.’+ Chakadi nikujina, mukwiluka nenu Yehova wamazaza diyi wunantemeshi.
10 “Eyi mwana kaZiyona wamumbanda,+ dikuwi namuzañalu; muloña ami inakwinza,+ nawa nakashakama mukachi keyi,”+ dichinahoshiyi Yehova. 11 “Hanodu ifuku nyuza yayivulu yakadinuña kudi Yehova,+ nawa akekala antu jami. Ami nakashakama mukachi keyi.” Nawa eyi wakeluka neyi Yehova wamazaza diyi wunantemeshi kudi eyi. 12 Yehova wakatambula Yuda akekali wuswana windi wudi heluña dajila, nawa nakamutonda cheñi Yerusalema.+ 13 Enu antu ejima, mwenenu nzo-o kumesu aYehova, muloña kudi chuma chinakwililayi mwiluña dindi dajila mwashakamañayi.
3 Nawa wammwekesheleli Yoshuwa+ kapristu muneni nemani kumesu akañelu kaYehova, nawa kuchikasa chindi chachidiilu kwemeni Satana+ kulonda amukañesheña. 2 Kuhiñahu, kañelu kaYehova wamulejeli Satana nindi: “Eyi Satana,+ Yehova akuzuwili, eña, Yehova wunatondi Yerusalema,+ akuzuwili! Komana iwu hichishinji chinakuha chinahukuliwu mukesiku?”
3 Dichi Yoshuwa wavwalili yakuvwala yamajilu iku nemani kumesu akañelu. 4 Kañelu walejeli owu emeni kumesu indi, nindi, “Musubulenu yakuvwala yindi yamajilu.” Kufumahu, wamulejeli nindi, “Talaña, nakufumishi dehi chiluwa* cheyi nawa akukuvwika yakuvwala yayiwahi.”*+
5 Dichi nahosheli nami: “Muvwikenu chitambala chakadi majilu kumutu windi.”+ Nawa amuvwikili chitambala chakadi majilu kumutu niyakuvwala; nawa kañelu kaYehova wadiña wemana kwakwihi nayena. 6 Kañelu kaYehova wamubidikili Yoshuwa nindi: 7 “Yehova wamazaza nahoshi nindi, ‘Neyi wukwendaña munjila jami nikuzata nyidimu yinakwinki, wukwikala nsompeshi mwitala dami+ nawa wukuhembaña malubanza ami; nawa nukukwiteja kumona kumesu ami neyi chinakumonawu awa anemani aha.’
8 “‘Eyi Kapristu Muneni Yoshuwa, mwani, tiyaku, eyi niakwenu ashakamaña kumesu eyi, muloña awa amayala hichinjikijilu; tiyaña! inakuleta kambuñami+ Mutombu!+ 9 Talaña ilola dinnashi kumesu aYoshuwa! Helola dimu hadi mesu 7; nawa nukubazilahu nsona,’ dichinahoshiyi Yehova wamazaza, ‘nawa nakamanisha nshidi yadina ituña mwifuku dimu.’+
10 “Yehova wamazaza nahoshi nindi, ‘Hanodu ifuku, wejima wenu muntu-himuntu wakatambika mukwawu kwinza mwishina damutondu windi wamuvinyu nimwishina damutondu windi wachikuyu.’”+
4 Kañelu wadiña nakuhosha nanami wafuntili nawa wanhindwishili, neyi chahindwishañawu muntu wunakaami mutulu. 2 Kufumahu wañilili nindi: “Wunamonidi?”
Dichi nahosheli nami: “Namoni chakutentekahu manoñu chejima chawuru,+ hewulu dachu hadi cheña chakunama. Hadi manoñu 7,+ eña, 7, nawa manoñu adi hewulu dachu, akweti nyiyeñu 7. 3 Nawa kukamwihi nacheña kudi nyitondu yanyiolivi yiyedi,+ wumu kukabadi kachidiilu kacheña chakunama wukwawu kuchimunswa.”
4 Kuhiñahu, namwihwili kañelu wahosheleña nanami, nami: “Eyi mwanta wami, indi yumiyi yinatalishi mudihi?” 5 Dichi kañelu wahosheleña nanami wañihwili nindi: “Komana wuneluki munatalishi yumiyi wanyi?”
Ami namwakwili nami: “Inehi mwanta wami.”
6 Kufumahu wanlejeli nindi: “Idi didu izu daYehova dakumuleja Zerubabeli, nindi: ‘“Yumiyi yakamwekana, bayi namashidika hela nañovuku,+ ilaña naspiritu yami,”+ dichinahoshiyi Yehova wamazaza. 7 Eyi mpidi yeneni, yeyinyi? Kudi Zerubabeli+ wakekala iluña desekana.*+ Nawa wakedisha ilola dahewulu* iku anakubidika nawu: “Ochidawaha! Ochidawaha!”’”
8 Izu daYehova denjili cheñi kudi ami, nawu: 9 “Makasa aZerubabeli diwu anaali chikuku chanidi itala,+ nawa makasa indi diwu akadimanisha.+ Dihu himwakeluka nenu Yehova wamazaza diyi wunantemeshi kudi enu. 10 Hinyi wunadiwuli ifuku dantachikilu janyanya?*+ Muloña akazañalala nawa akamona mwonji wakwolola nachu* muchikasa chaZerubabeli. Awa 7 himesu aYehova anakutalatala mwahita iseki dejima.”+
11 Kufumahu, namwihwili nami: “Indi iyi nyitondu yiyedi yanyiolivi yidi kuchidiilu nikuchimunswa yachakutentekahu manoñu, yinatalishi mudihi?”+ 12 Namwihwili kamuchiyedi nami: “Indi iyi nyitayi* yanyiolivi yiyedi yinakuhuñunuka manji awuru munyiyeñu yawuru yiyedi, yinatalishi mudihi?”
13 Dichi wañihwili nindi: “Komana wuneluki munatalishi yumiyi wanyi?”
Ami namwakwili nami: “Inehi mwanta wami.”
14 Wanlejeli nindi: “Awa diwu awayishewa ayedi anemani kwakwihi naMwanta weseki dejima.”+
5 Chinafumbwili cheñi mesu, namweni muvuñilu wunakutuuka. 2 Yena wañihwili nindi: “Chumanyi chiwunamoni?”
Namwakwili nami: “Namoni muvuñilu wunakutuuka, mukuleha wudi makyubiti* 20 nawa muwihi makyubiti 10.”
3 Kufumahu, wanlejeli nindi: “Idi hiishiñu dinakuya mwahita iseki dejima, muloña muntu wejima weyaña,+ neyi chinasonekiwu kukabadi kamu, hiyanakumubabeshaku; nimuntu wejima wasanyikaña,+ neyi chasonekawu kukabadi kakwawu, hiyanakumubabeshaku. 4 Yehova wamazaza nahoshi nindi, ‘Naditemeshi, nawa dikwiñila mwitala dekombi nimwitala danowu wasanyikaña mwamakudi mwijina dami. Dichi dikushakama munodu itala nakudikisañana, kushilahu nimapulanga adu nimalola adu.’”
5 Kuhiñahu, kañelu wahosheleña nanami wenjili nakunleja nindi: “Mwani, fumbulaku mesu kulonda wumoni chuma chinakuya.”
6 Dichi nehwili nami: “Hichumanyi?”
Yena waakwili nindi: “Ichi hichimpaaya chaifa* chinakuya.” Watwalekelihu nindi: “Ichi dichinakumwekanawu mwahita iseki dejima.” 7 Kufumahu namweni chifwiku chansumbu chanjiñumuki anachinyamuni, nawa muchimpaaya mwadiña mumbanda washakama. 8 Dichi wahosheli nindi: “Iku diku Kutama.” Kuhiñahu, wamufuntishili muchimpaaya chaifa, hohenohu wabutilihu chifwiku chalema chansumbu.
9 Kufumahu, nafumbwili mesu nawa namweni ambanda ayedi anakwinza, anakulela mumpepela. Adiña nampuula neyi jakakumbikumbi. Anyamwini chimpaaya hakachi keseki newulu. 10 Dichi owu kañelu wahosheleña nanami namwihwili nami: “Anakutwala kudihi chimpaaya chaifa?”
11 Waakwili nindi: “Kwituña daShinari*+ nakumutuñila itala; nawa neyi anadiloñeshi dehi, akamutula kwenoku mwiluña dindi datelela.”
6 Kuhiñahu, chinafumbwili mesu namweni makalu anakwinza kufuma hakachi kampidi jiyedi, nawa mpidi jadiña jawuneñu. 2 Ikalu datachi dadiña natuwalu tuchinana nawa damuchiyedi dadiña natuwalu twiyila.+ 3 Ikalu damuchisatu dadiña natuwalu tutooka nawa ikalu damuchiwana dadiña natuwalu twamabeña-mabeña nitwamantoma-ntoma.+
4 Namwihwili kañelu wahosheleña nanami nami: “Eyi mwanta wami, wenawa hiyanyi?”
5 Kañelu wañakwili nindi: “Awa hiyaspiritu awana+ amumawulu anakuya hanyima yakwila anemani dehi kumesu aMwanta weseki dejima.+ 6 Dikweti tuwalu twiyila dinakuya kwituña dakukabeta kakuchimunswa;+ tutooka tunakuya kwishinadi dakaluñalwiji; nawa twamabeña-mabeña tunakuya kwituña dakukabeta kakuchidiilu. 7 Nawa twamantoma-ntoma twafwilileña kuya nakuhitañana mwahita iseki dejima.” Kufumahu, wahosheli nindi: “Yenu, kahitañanenu mwahita iseki dejima.” Dichi twatachikili kuhitañana mwahita iseki dejima.
8 Kuhiñahu, wambidikili nakuñila nindi: “Talaña, otu tunakuya kwituña dakukabeta kakuchimunswa tunakojeji spiritu yaYehova kwikala mwituña dakukabeta kakuchimunswa.”
9 Izu daYehova denjili cheñi kudi ami, nawu: 10 “Tambulaku kudi Helidayi, Tobiya niYedaya yuma yaleteliwu kufuma kudi antu adi muwunkoli. Nawa hanodu ifuku, wakayi kwitala daYosiya mwana kaZefwaniya hamu nanawa anafumi kuBabiloni. 11 Watela kunona siliva niwuru kulonda wutuñimu chibañula* nawa wumuvwikichu Yoshuwa kumutu+ mwana kaYehozadaki, kapristu muneni. 12 Nawa wumuleji neyi,
“‘Yehova wamazaza nahoshi nindi: “Iwu diyi iyala wejina daMutombu.+ Wakamenena mwiluña dindi yomweni, nawa wakatuña tembeli yaYehova.+ 13 Diyi wakatuña tembeli yaYehova, nawa diyi wakatambwila wukeleñi. Wakashakama hetanda dindi nakuyuula, wakekala cheñi kapristu hetanda dindi,+ nawa hakekala kunuñañana hakachi kayifulu yejima yiyedi.* 14 Nawa chibañula* chakekala chanukishu kudi Helemi, Tobiya, Yedaya+ niHeni mwana kaZefwaniya, mutembeli yaYehova. 15 Nawa owu adi kwakulehi akenza nakutuñaku tembeli yaYehova.” Dihu himwakeluka nenu Yehova wamazaza diyi wunantemeshi kudi enu. Nawa chumichi chakamwekana, neyi mwovwahila izu daYehova Nzambi yenu.’”
7 Nawa muchaaka chamuchiwana chaMwanta Dariyusi, izu daYehova denjili kudi Zekariya+ hefuku damuchiwana dakakweji kamu 9, dikwila nawu, kakweji kaKisilevi.* 2 Antu akuBeteli atemesheli aSharezeri naRegemi Meleki niantu jindi kulonda ayi nakulemba nawu ayitiyili luwi* kudi Yehova, 3 nakuleja atupristu amwitala* daYehova wamazaza niatuprofwetu nawu: “Komana natela kudila mukakweji kamuchitanu+ nikuleka kuda, neyi chinneli hadi yaaka yayivulu?”
4 Izu daYehova wamazaza denjili cheñi kudi ami, nawu: 5 “Yili antu ejima amwituña niatupristu neyi, ‘Chimwashakamineña chakadi kuda nikudila makumbu mukakweji kamuchitanu nimukakweji kamu 7+ hadi yaaka 70,+ komana mwalala mwashakaminineña ami chakadi kuda? 6 Nawa chimwadiileña nikunwa, himwadidiilileña nikudinwina enu aweniku? 7 Komana kwila mwovwahila mazu aYehova abidikiliyi kuzatisha atuprofwetu akunyima,+ hampinji yashakamineñawu antu mukuwunda muYerusalema nimunyisumba yamunyeñumukili nihiyashakamineñawu antu muNegebi nimuShefela nehi?’”
8 Izu daYehova wamazaza denjili cheñi kudi Zekariya, nawu: 9 “Yehova wamazaza nahoshi nindi, ‘Sompeshenuña nawuñanji waloña,+ nawa dimwekeshelenuña wumu namukwawu kukeña kwakashinshi+ niluwi. 10 Bayi mwiyila ntuluwa hela mwana wabula tata yindi,*+ ñiinza+ hela kazweñiku.+ Nawa bayi mudikasila kafuta wumu namukwawu munyichima yenuku.’+ 11 Ilaña wena akaanineña kushaku muchima,+ achinchikili nakufutalelaku,+ nawa ajikili mumatu awu kulonda abuli kutiya.+ 12 Akolesheli nyichima yawu neyi dayimani*+ nawa hiyovwahilileña nshimbi* nimazu atemesheliyi Yehova wamazaza kuzatisha spiritu yindi kuhitila mudi atuprofwetu akunyimaku.+ Dichi Yehova wamazaza wahilili nankashi.”+
13 “Yehova wamazaza nahoshi nindi, ‘Neyi chabulili kuntiyililawu hampinji yinatambikili,+ ninami hinatiyilili hampinji yantambikiliwuku.+ 14 Dichi nayipalañesheleli munyuza yejima yabulili kwilukawu+ nampepela yasweja, nawa ituña dawu adishili kwamahembi, chakadi muntu wakuhitamu hela kufuntamu;+ muloña abalumwini ituña dadiwahi kwikala chuma chakuhayama chikupu.’”
8 Izu daYehova denjili cheñi kudi ami, nawu: 2 “Yehova wamazaza nahoshi nindi, ‘Inakufwila chikupu kumukiña Ziyona,+ inakufwila chikupu kumukiña nakuzuwa kwasweja.’”
3 “Yehova nahoshi nindi, ‘Nukufunta muZiyona+ nawa nukushakama muYerusalema.+ Dichi Yerusalema akamutena nawu musumba wachalala,*+ nawa mpidi yaYehova wamazaza nawu mpidi yajila.’”+
4 “Yehova wamazaza nahoshi nindi, ‘Akulumpi awamayala niawambanda akashakama cheñi mumalubanza aYerusalema, muntu-himuntu namukombu windi muchikasa muloña wakukula.*+ 5 Nawa mumalubanza amusumba mwakenzala atwansi awamayala niawambanda anakuhema.’”+
6 “Yehova wamazaza nahoshi nindi, ‘Hela chakwila hanowu mafuku chikamwekana kukala nankashi kudi ashalahu hadi awa antu, komana chikamwekana kukala nankashi nikudi ami?’ dichinahoshiyi Yehova wamazaza.”
7 “Yehova wamazaza nahoshi nindi, ‘Inakupulwisha antu jami kumatuña akumusela nikumujika.*+ 8 Dichi nakayileta nawa akashakama muYerusalema.+ Akekala antu jami, ninami nakekala Nzambi yawu+ muchalala* nimukuloña.’”
9 “Yehova wamazaza nahoshi nindi, ‘Koleshenu makasa enu,*+ enu munakutiya awa mazu mutunwa twawatuprofwetu,+ mazu ahosheliwu hefuku daaliliwu chikuku chetala daYehova wamazaza kulonda atuñi tembeli. 10 Muloña henohu yina mpinji kanda, hikwadiña wufwetu wamuntu hela wakanyamaku.+ Nawa hichadiña chaswayi kwinza hela kuyaku, muloña wamukankunyi, muloña nakojejeli antu ejima kudibalumukila wumu namukwawu.’
11 “Yehova wamazaza nahoshi nindi, ‘Ilaña ichi ashalahu hadi awa antu hinukuyila neyi chinelili mumafuku akunyimaku.+ 12 Muloña akatumba mbutu yakuwunda; muvinyu wakasoña nyikaabu yawu nawa iseki dakamenesha yakuda,+ mawulu akanokesha wuumi; nawa nakakojeja ashalahu hadi awa antu akaswani yuma yejimiyi.+ 13 Nawa neyi chimwekalili chuma chakushiña mukachi kanyuza,+ enu amwitala daYuda ninenu amwitala daIsarela, mwakekala nkisu+ muloña nakayipulwisha. Bayi mutiya womaku!+ Koleshenu makasa enu.’*+
14 “Muloña Yehova wamazaza nahoshi nindi, ‘“Neyi chinafwilileña kuyiletela yihuñu muloña wanochu chanhilishiliwu ankakulula jenu,” dichinahoshiyi Yehova wamazaza, “nawa hinaditoñesheliku,+ 15 dichi hayinu mpinji cheñi inakufwila kumwilila Yerusalema chuma chachiwahi+ niamwitala daYuda.+ Bayi mutiya womaku!”’
16 “‘Iyi diyuma yimwatela kwilaña: Hoshenuña mwalala muntu namukwawu,+ nawa neyi himukusompesha muyiisu yanyisumba yenu, musompeña mwalala nawa muleteña kuwunda.+ 17 Bayi mudikasila kafuta wumu namukwawu munyichima yenuku,+ nawa bayi mukeña kusanyika kwejima kwakutwambaku;+ muloña yuma yejimiyi diyinahela,’+ dichinahoshiyi Yehova.”
18 Izu daYehova wamazaza denjili cheñi kudi ami, nawu: 19 “Yehova wamazaza nahoshi nindi, ‘Kushakama chakadi kuda kwamukakweji kamuchiwana,+ kushakama chakadi kuda kwamukakweji kamuchitanu,+ kushakama chakadi kuda kwamukakweji kamu 7,+ nikushakama chakadi kuda kwamukakweji kamu 10+ yakekala himpinji yakudikuwa nikuzañalala kudi amwitala daYuda,+ hiyawija yakuzañalala. Dichi keñenu chalala nikuwunda.’
20 “Yehova wamazaza nahoshi nindi, ‘Chakadi nikujina, mpinji yinakwinza yakenzawu antu ashiyashana niashakamaña munyisumba yayivulu; 21 nawa antu amumusumba wumu akaya kudi akwawu amumusumba wukwawu nakuyila nawu: “Mwani tuyenu twakalembi kulonda atutiyili luwi* kudi Yehova nikumukeñakeña Yehova wamazaza. Ninami inakuya.”+ 22 Nawa antu amavulu ashiyashana ninyuza yañovu akenza nakumukeñakeña Yehova wamazaza muYerusalema+ nawa akalemba nawu ayitiyili luwi* kudi Yehova.’
23 “Yehova wamazaza nahoshi nindi, ‘Munowu mafuku amayala 10 kufuma kumadimi ejima amunyuza+ akakwata, eña, akakwata chikupu kumunkukumba* wakaYudeya,* nakuhosha nawu: “Tunakukeña kuya nenu,+ muloña tunatiyi nawu Nzambi wudi nanenu.”’”+
9 Mazu awunsompeshi:
“Izu daYehova dakwimakena ituña daHadiraki,
Nawa dinakumushikena* Damakasa,+
Muloña mesu aYehova adi hadi antu+
Nihanyichidi yejima yaIsarela,
2 Nihadi Hamati,+ wadikumashanayi nindi,
3 Tira wadituñilili mpwembu.
Wadilumbikilili siliva neyi lunkuñu
Niwuru neyi majilu amunyikwakwa.+
4 Tiyenu! Yehova wakamutambula maheta indi,
Wakatapila amashidika indi mukaluñalwiji;*+
Nawa wakasukuma nakesi.+
5 Ashikeloni wakachimona nawa wakatiya woma;
Gaza wakamona yihuñu yasweja,
NiEkironi, muloña chuma chakinkayi manuñu anachitiyishi nsonyi.
Mwanta wakajiya muGaza,
Nawa muAshikeloni hiyakashakamamuku.+
6 Mwana wamuwujila wakashakama muAshidodi,
Nawa nakamanisha kudivwimba kwawaFilisitinu.+
7 Nakafumisha mukanwa kindi yuma yinalambankani mashi
Niyuma yawuzondu kumazewu indi,
Nawa wakashala waNzambi yetu;
Nawa wakekala neyi ntwamina* wamuYuda,+
NiEkironi neyi mwini Yebusi.+
8 Nakatuñila itala dami chilombu kulonda nakadihembeña,*+
Kulonda kwakabuli hela wumu wakuhitilahu hela wakufunta;
Nawa kwosi mukulumpi wamudimu* wakahitilahu cheñiku,+
Muloña ichi nadimweni ami aweni chumichi* namesu ami.
9 Eyi mwana kaZiyona wamumbanda, zañalalaku chikupu.
Eyi mwana kaYerusalema wamumbanda, dikuwi namuzañalu.
Tiyaña! Mwanta weyi nakwinza kudi eyi.+
10 Nakafumisha ikalu danjita muEfuremu,
Nikawalu muYerusalema.
Wuta wamukunji wanjita akawusenda.
Nawa wakabidika kuwunda kunyuza;+
Chiyuulu chindi chakafuma kukaluñalwiji kamu nakushika kukaluñalwiji kakwawu
11 Hakwila eyi mumbanda, nachitiyañenu cheyi chamashi,
12 Enu atuyili* akweti kuchiñeja,+ funtenu kumpwembu.
Dalelu inakukuleja nami,
‘Eyi mumbanda, nakakufweta maseka ayedi.+
13 Muloña nakamwevula* Yuda neyi wuta wami wamukunji.
Muwuta wamukunji nakashamu Efuremu,*
Nawa nakahindwisha anyaneyi, eyi Ziyona,
Nakemakena anyaneyi, eyi Girisi,
Nawa nakakubalumuna neyi mpoku yakabali yachilobu.’
14 Yehova wakamwekesha nindi wudi nawena,
Nawa muvu windi wakaya neyi nzaji.
Yehova Mwanta Wabadika wakavumisha luseñu,+
Nawa wakaya nampepela yeneni yakukabeta kakuchidiilu.
15 Yehova wamazaza wakayikiña,
Nawa akakisañana nikushinda malola akwasa nachu.+
Akanwa nawa akazañalala, neyi kwiji ananwi vinyu;
Akenzala neyi cheña chakunama,
Neyi mawombu akameña.+
16 Yehova Nzambi yawu wakayamwina hanodu ifuku
Neyi mukanka wawantu jindi;+
Muloña akekala neyi malola alema wuseya akuchibañula anakukejima heseki dindi.+
17 Kuwaha kwindi ochikwabadika,+
Nilubanji lwindi ochilwasweja!
10 “Mulombenu Yehova anokeshi nvula mumpinji yanvula yakukumishaku.
Yehova diyi welishaña mavu anvula yeneni,
Diyi wanokeshelaña antu nvula,+
Nawa diyi wenkaña ejima yuma yamenaña hamaseki.
Ashimunaña yilota yamukunkulwayi,
Nawa akundejaña mwamukunkulwayi.
Dichakaletesha akakimboki neyi nyikoku.
Akakabakana, muloña hikudi kabiñaku.
3 Atubiña nakayizuwila,
Nawa anlomboli* awukatu nakayibabesha;
Muloña Yehova wamazaza nabalumukili kudi mukanka windi,+ kudi amwitala daYuda,
Nawa nayibalumuni neyi kawalu kindi kalema kunjita.
4 Kudi yena dikwafumaña ntwamina,*
Kudi yena dikwafumaña nyuuli wakwashanaña,*
Kudi yena dikwafumaña wuta wamukunji wanjita;
Kudi yena dikwafumaña kalama* wejima, wejima wawu hamu.
5 Nawa akekala neyi ayilobu,
Akadatola malowa munyikwakwa kunjita.
6 Nakelisha amwitala daYuda akekali abadika,
Nawa amwitala daYosefu nakayamwina.+
Nakayifuntisha,
Muloña nakayitiyila luwi;+
Nawa akekala neyi kwiji hinayihañiluhuku;+
Muloña yami Yehova Nzambi yawu, nawa nakayakula.
7 Eni Efuremu atela kwikala neyi mushidika wañovu,
Nawa muchima wawu wakazañalala neyi kwiji anafumi nakunwa vinyu.+
Anyanawu akamona chumichi nawa akazañalala;
Muchima wawu wakazañalela mudi Yehova.+
8 ‘Nakayitambika namuloji nikuyipompesha hamu;
Muloña nakayikuula,+ akekala amavulu,
Nawa akatwalekahu kuvula.
9 Hela chakwila nayipalañesheli neyi mbutu mukachi kawantu,
Akañanuka kumaluña akwakulehi;
Wena nawanyanawu akekala cheñi nañovu nawa akafunta.
10 Nakayifuntisha kufuma kwituña daEjipitu
Nawa nakayipompesha kufuma kuAsiriya;+
Nakayileta kwituña daGiliyadi+ nidaLebanoni,
Nawa iluña dakayikehela.+
Kudivwimba kwaAsiriya akakumanisha,
Ninkuunyi yaEjipitu yakaya.+
12 Nakayibalumuna mudi Yehova akekali abadika,+
Nawa akendaña mwijina dindi,’+ dichinahoshiyi Yehova.”
11 “Eyi Lebanoni, enzununaku yiisu yeyi,
Kulonda kesi kwochi nyisida yeyi.
2 Dilaku makumbu, eyi munjunga, muloña musida naholoki;
Nyitondu yamaneni yalubanji yinakisiki!
Dilenu makumbu, enu nyikula yakuBashani,
Muloña ivunda dajika dinakisiki!
3 Tiyenu! Atubiña anakudila makumbu,
Muloña wukeleñi wawu anawukisañani.
Tiyenu! Nyenzi yanyitupa* yinakubuluma,
Muloña ivunda dashinka dekala kumukulishu waYodani anadikisañani.
4 “Yehova Nzambi yami nahoshi nindi, ‘Biñenu mukanka afuukwilawu kujaha,+ 5 ajahañawu+ kudi owu ayilandaña ilaña hiyayinkaña muloñaku. Nawa ayilandishaña+ ahoshaña nawu, “Yehova ashimekewi, muloña nukuheta.” Nawa hiyayitiyilaña wushona kudi atubiña twawuku.’+
6 “Yehova nahoshi nindi, ‘Muloña antu ashakamaña mwituña hinakayitiyila wushonaku. Dichi muntu wejima nakamuhana muchikasa chamukwawu nichamwanta windi. Akakisañana ituña nawa hinakayamwina muchikasa chawuku.’”
7 Nawa natachikili kubiña mukanka afuukwilawu kujaha,+ kukoola enu, enu anakukabishawu hamukanka. Dichi nanoneli nyikombu yiyedi nawa wumu nawutuumbili nami Kuwaha, wukwawu nami Kunuñañana,+ nawa natachikili kubiña mukanka. 8 Nawa nahañili atubiña asatu mukakweji kamu, muloña ami* hinadiwunjikili nawenaku, niwena* antiyili kutama. 9 Nawa nahosheli nami: “Nukutwalekahu kuyibiña wanyi. Owu wunakufwa afwi, nawa wunakujiya ajiyi. Hakwila anashali, eli iwu ada mukwawu, iwu ada mukwawu.” 10 Dichi nanoneli mukombu wami wunatuumbili nami Kuwaha,+ nawa nawukotweli, nakufumpa chitiyañenu chami chinatiyañeni nawantu ejima. 11 Dichi, chamanini hadodina ifuku, nawa owu akabishileñawu hamukanka antalileña, elukili nawu dadiña izu daYehova.
12 Kuhiñahu nayilejeli nami: “Neyi munamoni nenu chachiwahi, nyinkenu wufwetu wami; neyi munakaani, lekenu.” Dichi anfweteli* wufwetu wami, yikunku yasiliva 30.+
13 Kufumahu Yehova wanlejeli nindi: “Yinatili mwiluña mwakuhembela maheta, hiwufwetu wantesha wamwekesheli chanlemesheliwu.”+ Dichi nanoneli yikunku yasiliva 30 nakuyinatila mwiluña mwakuhembela maheta hetala daYehova.+
14 Kuhiñahu, nakotweli mukombu wami wamuchiyedi wunatuumbili nami Kunuñañana,+ nakumanisha wumana kwamuntu wadiña hakachi kaYuda naIsarela.+
15 Nawa Yehova wanlejeli nindi: “Ichi nonaku yozelu yakabiña wamukunkulwayi.+ 16 Muloña inakuyinyamwina kabiña mwituña. Hakahemba anyikoku anakujiyaku;+ hakakeñakeña anyana hela kuuka anadikatishi+ hela kudiisha anakutwesha kwimanaku. Ilaña, wakadaña mbiji yanowu anuna+ nikuhatula yikwa yanyikoku.+
17 Oyihuñu yikumona kabiña+ kami wamukunkulwayi, wunakushiya mukanka chisayikila!+
Mpoku yakabali yakatapa chikasa nidisu dindi dakuchidiilu.
Chikasa chindi chakoma chawu-u,
Nawa disu dindi dakuchidiilu dakaputa chikupu.”*
12 Mazu awunsompeshi:
“Izu daYehova kutalisha hadi Isarela,” dichinahoshiyi Yehova,
Watandumwini mawulu,+
Waalili chikuku cheseki,+
Nawa watuñili spiritu* yidi mudi muntu.
2 “Ichi inakumubalumuna Yerusalema ekali kaapu* kakojejaña antu ejima amboka-mboka amunyeñumuka kutedañila; nawa Yuda niYerusalema+ akayikuchika. 3 Hanodu ifuku nakamubalumuna Yerusalema kwikala ilola dalema kudi antu ejima ashiyashana. Ejima akadinyamuna akadikatisha chikupu;+ nawa nyuza yejima yahamaseki yakapompa nakumwimakena.+ 4 Hanodu ifuku,” dichinahoshiyi Yehova, “Nakakojeja kawalu kejima kululuta nawa mukakwendelahu nakamuzalwisha. Nakashinshikaña mesu ami hadi amwitala daYuda, ilaña nakaputisha tuwalu twejima twawantu ashiyashana. 5 Nawa antwamina* amuYuda akahosha munyichima yawu nawu, ‘Antu ashakamaña muYerusalema diwu ankoleshaña kuhitila mudi Yehova wamazaza Nzambi yawu.’+ 6 Hanodu ifuku nakabalumuna antwamina amuYuda akekali neyi kesi kadi munyitondu nawa neyi chimunyi chakesi chidi muyiita yambutu yinamuniwu,+ akwocha antu ejima ashiyashana anyeñumuka adi kuchidiilu nikuchimunswa.+ Nawa muYerusalema akashakamamu cheñi mwiluña dindi,* mwomuYerusalema.+
7 “Nawa Yehova wakasambila kwamwina matenti aYuda, kulonda lubanji lwawantu amwitala daDavidi nilubanji lwawantu amuYerusalema lwakabuli kubadika lwaYuda. 8 Hanodu ifuku Yehova wakakiña antu ashakamaña muYerusalema.+ Hanodu ifuku muntu wahukanaña* mukachi kawu wakekala neyi Davidi, nawa amwitala daDavidi akekala neyi Nzambi, neyi kañelu kaYehova watwaminañaku hambidi yawu.+ 9 Nawa hanodu ifuku nakajilumuna nyuza yejima yakenza nakumwimakena Yerusalema.+
10 “Nakahuñununa spiritu yaluwi niyakulemba hadi amwitala daDavidi nihadi antu ashakamaña muYerusalema, nawa akatala kudi owu apwikiliwu.+ Akamudila makumbu neyi chadilañawu mwana weyala wumu hohu; nawa akamudila chikupu neyi chadilañawu mwana weyala wawedi. 11 Hanodu ifuku makumbu akadilawu muYerusalema akasweja neyi makumbu adililiwu kuHadadirimoni muChana chaMegido.+ 12 Nawa ituña dakadila makumbu, chisaka-hichisaka nkawachu; chisaka chaamwitala daDavidi nkawachu, ambanda nkawawu; chisaka chaamwitala daNatani+ nkawachu, ambanda nkawawu; 13 chisaka chaamwitala daLevi+ nkawachu, ambanda nkawawu; chisaka chaamwitala daweni Shimeyi+ nkawachu, ambanda nkawawu; 14 niyisaka yejima yinashali, chisaka-hichisaka nkawachu, nawa ambanda nkawawu.
13 “Hanodu ifuku amwitala daDavidi niantu ashakamaña muYerusalema akayipundila ishima dakutookesha nachu nshidi nimajilu.”+
2 Yehova wamazaza nahoshi nindi: “Hanodu ifuku, nakajima majina awankishi mwituña,+ nawa hiyakayanukahu cheñiku; nakafumisha niatuprofwetu+ mwituña nispiritu yamajilu. 3 Nawa neyi kwikala muntu wakaprofweta cheñi, tata yindi nimama yindi amuvwala, akamuleja nawu, ‘Wukuhanda wanyi, muloña wunahoshi mwamakudi mwijina daYehova.’ Dichi tata yindi namama yindi amuvwala akamupwika nzwa-a nanochu chinaprofwetiyi.+
4 “Hanodu ifuku neyi kaprofwetu wudi wejima aprofweta, wakatiya nsonyi nachimwenu chindi; nawa hiyakavwala chakuvwala chawuprofwetu chamavuji+ kulonda adimbaniku. 5 Nawa wakahosha nindi, ‘Ami nidi kaprofwetu wanyi. Nidi mukakudima hohu, muloña kudi muntu wanlandili hinachidiña kansi.’ 6 Nawa neyi muntu amwihula nindi, ‘Indi iyi yilonda yidi hakachi kamafwiji* eyi yinafumi kudihi? yena wakaakula nindi, ‘Iyi yilonda ankatishili mwitala dawamabwambu jami.’”*
7 “Eyi mpoku yakabali, hindukilaku kabiña kami,+
Hindukilaku ibwambu dami,” dichinahoshiyi Yehova wamazaza.
“Tapaku kabiña,+ nawa mukanka* wupalañani;+
Nawa nukunyamuna chikasa chami nakwimakena antu abula kulema.”
8 Yehova nahoshi nindi: “Nawa mwituña dejima,
Yibalu yiyedi yawantu adimu akafwa nawa akajiya;
Chibalu chamuchisatu chakashala mwenomu.
9 Chibalu chamuchisatu nakachihitisha mukesi;
Nakayitookesha neyi chatookeshañawu siliva,
Nawa nakayeseka neyi chesekañawu wuru.+
Akatambika hejina dami,
Ami nakayitiya.
Nakahosha nami, ‘Hiyantu jami,’+
Niwena akahosha nawu, ‘Yehova hiNzambi yetu.’”
14 “Tiyaña! Ifuku dinakwinza, hiifuku dambala daYehova, hakanzañanawu yuma yeyi* yakupuupa mukachi keyi. 2 Nakapompesha nyuza yejima yakazuñi njita naYerusalema. Musumba akawutambula nawa matala akayipuupa niambanda akayikaama chakukanjikija. Nawa chibalu chimu chamusumba chakaya muwunkoli, ilaña antu anashali hiyakayifumisha mumusumbaku.
3 “Yehova wakaya nakuzuña njita nanoyu nyuza+ neyi chazuñañayi mwifuku danjita.+ 4 Hanodu ifuku nyendu yindi yakadata haMpidi yaNyiolivi,+ yekala kumusela waYerusalema; dichi Mpidi yaNyiolivi yakabaluka hakachi, kufuma kumusela* kushika nikumujika,* hakachi hakekala chinekineki cheneni nankashi. Chibalu chimu champidi chakaya kukabeta kakuchimunswa, nawa chibalu chikwawu chakaya kukabeta kakuchidiilu. 5 Mwakatemukila kuchinekineki chamapidi ami, muloña chinekineki chamapidi chakashika kuAzeli. Mwakatemuka neyi chimwatemukili muloña wamutentanshi wadiñaku mumafuku aMwanta Uziya waYuda.+ Yehova Nzambi yami wakenza, nawa ajila ejima akekala hamu nindi.+
6 “Hanodu ifuku hikwakekala chejeji chakatoñekaku,+ dichi yuma yakadikwata.* 7 Nawa dakekala ifuku dimu delukawu nawu hiifuku dambala daYehova.+ Hidakekala mwaana hela wufukuku; nawa namelela kwakekala chejeji. 8 Hanodu ifuku menji awumi+ akapwapumuka kufuma muYerusalema,+ amu akaya kukaluñalwiji kakumusela*+ nawa amakwawu akaya kukaluñalwiji kakumujika.*+ Chumichi chakamwekana munooña nimumayinza. 9 Nawa Yehova wakekala Mwanta mwahita iseki dejima.+ Hanodu ifuku Yehova wakekala+ wumu niijina dindi dimu.+
10 “Ituña dejima dakekala neyi Araba,+ kutachikila kuGeba+ nakushika kuRimoni+ kukabeta kaYerusalema kakuchidiilu. Wakanyamuka nawa mwiluña dindi+ akashakamamu, kutachikila kuChiisu chaBenjamini+ nakushika kwiluña dakuChiisu chaKusambila, ndo-o nikuChiisu Chewombu, nawa kufuma kuKaposhi kaHananeli+ nakushika kumawukamwinu avinyu amwanta. 11 Antu akashakama mudi yena; nawa himwakekalahu cheñi ishiñu dakujilumukaku,+ antu akashakama muYerusalema mukuwunda.+
12 “Nawa ichi dichipupu chakaletayi Yehova hadi antu ejima azuñaña njita naYerusalema:+ Nyijimba yawu yakatoka iku emana, mesu awu akatokela muñoma jamesu awu, nawa madimi awu akatokela mutunwa twawu.
13 “Hanodu ifuku Yehova wakayiluwañesha chikupu mukachi kawu; muntu-himuntu wakakwata kuchikasa chamukwawu, nawa chikasa chindi chakemakena chikasa chebwambu dindi.*+ 14 Yuda niyena wakazuñaku iyi njita kuYerusalema; nawa maheta anyuza yejima yanyeñumuka akayipompesha, wuru yayivulu, siliva yayivulu niyakuvwala.+
15 “Nawa chipupu chadifwana nachina chipupu chakashikena atuwalu, ayingongavalu, angameli, ayimbuulu niayimuna ejima adi munoyu yilombu.
16 “Muntu wejima wakashala munyuza yejima yenzaña nakumwimakena Yerusalema wakayaña hachaaka-hachaaka+ nakudibuka* kudi Mwanta, Yehova wamazaza,+ nikwikala naChawija chaYisolu.*+ 17 Ilaña neyi muntu wumu muyisaka yahamaseki abula kuya kuYerusalema nakudibuka kudi Mwanta, Yehova wamazaza, hiyakamonahu nvulaku.+ 18 Nawa neyi chisaka chakuEjipitu chibula kukanduka nakwiñila, hiyakamonahu nvulaku. Ilaña, akayishikena kudi chipupu chakaletayi Yehova hanyuzu yabulaña kuya nakwanakana Chawija chaYisolu. 19 Iku dikubabesha kwakenza hadi Ejipitu nihanyuza yejima yabulaña kukanduka nakuya nakwanakana Chawija chaYisolu, muloña kwila mwenimu hinshidi.
20 “Hanodu ifuku mazu akwila nawu ‘Kujila kwambala kwaYehova!’+ akayisoneka hangezu jawatuwalu. Nawa madehu*+ adi mwitala daYehova akekala neyi yeña yakunama+ yidi kukameña. 21 Nawa ndehu* yejima yidi muYerusalema nimuYuda yakekala yajila nawa yambala yaYehova wamazaza, ejima anakulambula akenza nakuzatishahu amu kutelekelamu. Hanodu ifuku mwitala daYehova wamazaza himwakekalahu cheñi mwini Kenaniku.”*+
Daya mukwila nawu, “Yehova Naanuki.”
Hela “funtenu.”
Talenu Nsañu Jikwawu B15.
Dikwila nawu, chakadi mpwembu janyeñumukaku.
MuchiHeberu, “hanyima yakulema.”
Hela “hadisu.”
Hela “muloña.”
Hela “nyinkukumba yahachawija.”
Hela “chana.”
Hela “ilola damumutu.”
Hela “yuma yanyanya?”
MuchiHeberu, “ilola; wufoyu.”
Dikwila nawu, nyitayi yamutondu yikweti nyikaabu yayivulu.
Kyubiti yimu yesekeni namasentimita 44.5. (mainchi 17.5). Talenu Nsañu Jikwawu B14.
MuchiHeberu, “ifa,” ahanu yinakwimenaku chimpaaya chazatishileñawu kupiminaku ifa. Ifa yesekeni namalita 22 (makwati 20 oma). Talenu Nsañu Jikwawu B14.
Dikwila nawu, Babiloniya.
Hela “chibañula cheneni.”
Dikwila nawu, hakachi kachifulu chindi chawunyuuli nachawupristu.
Hela “chibañula cheneni.”
Talenu Nsañu Jikwawu B15.
Hela “ovwahishi kumesu.”
Hela “amutembeli.”
Hela “nshona.”
Hela hekwawu, “ilola dakola,” chidi neyi ilola daemeri.
Hela “kuleja.”
Hela “wakashinshi.”
MuchiHeberu, “muloña wakuvula kwamafuku.”
Hela “kwituña kwaselelaña itena nikwituña kwahuminaña itena.”
Hela “mukashinshi.”
Hela “Ikalenu ahamuka.”
Hela “Ikalenu ahamuka.”
Hela “tukwovwahishi kumesu.”
Hela “ovwahishi kumesu.”
Hela “kwakumina chakuvwala.”
MuchiHeberu, “iyala kaYudeya.”
MuchiHeberu, “iluña dakunookela.”
Hela hekwawu, “hakaluñalwiji.”
Iwu ntwamina wadiña mwanta wamuchidi.
Hela “chilombu chamashidika.”
Hela “mukakukabishana.”
Chakadi nikujina, kukabakana kwawantu jindi.
Hela “nawa nashindi; nawa naamwini.”
Hela “Hachimbuulu wachizamba.”
Dikwila nawu, Yufurati.
Antu akasawu mukaleya.
Antu akasawu mukaleya.
MuchiHeberu, “kudatola.”
Dikwila nawu, neyi muvu.
Awa hiyambanda abula kukaamahu dehi neyala.
Hela “anzambi achisaka; ankishi.”
Hela “yuma yakulumbisha.”
MuchiHeberu, “ampembi ayizamba.”
MuchiHeberu, “kaposhi kahewombu,” kwimenaku muntu waya mpuhu hela walema; mwanta.
MuchiHeberu, “mpopu,” kwimenaku muntu wakwashanaña; nyuuli.
Hela “mukulumpi wamudimu.”
Hela “nyenzi yanyitupa yawamayala.”
Hela “wumi wami.”
Hela “nimawumi awu.”
MuchiHeberu, “ampiminini.”
MuchiHeberu, “dakeyila bwi-i.”
Hela “muuya.”
Hela “cheña chakunama.”
Awa antwamina adiña anyanta anyichidi.
Hela “mwiluña dindi datelela.”
Hela “wazeya chikupu.”
MuchiHeberu, “hakachi kamakasa.” Dikwila nawu, hantulu hela munyima.
Hela “danowu ankeña.”
Hela “nyikoku.”
Dikwila nawu, musumba anateniwu muvasi 2.
Hela “kwaselelaña itena.”
MuchiHeberu, “kukaluñalwiji.”
Hela “akayilekesha kwenda,” neyi kwiji yinadikwati namashika.
Dikwila nawu, Kaluñalwiji Kafwa.
Dikwila nawu, Kaluñalwiji kaMeditereniyani.
Hela “nawa muntu wumu wakalukuka mukwawu.”
Hela “nakudifukula.”
Hela “Nyinkanda.”
Hela “madehu amaneni.”
Hela “ndehu yeneni.”
Hela hekwawu, “mukakulanda nakulandulula.”