MALAKI

1 Mazu awunsompeshi:

Izu daYehova dakuleja Isarela kuhitila mudi Malaki:*

2 “Enu antu nayimwekesheli kukeña,”+ dichinahoshiyi Yehova.

Ilaña enu nenu: “Wunatumwekesheli ñahi kukeña?”

“Komana Esawu hadiña mana kwaYakobaku?”+ dichinahoshiyi Yehova. “Ilaña nakeñeliku Yakoba, 3 nawa Esawu namuheleli.+ Mapidi indi nayibalumwini mahembi+ nawa wuswana windi nawuhanini kudi anyumbu amwisaña.”+

4 “Edomi nahoshi nindi, ‘Anatuchiki, ilaña tukufunta nakutuñulula yuma yinakisiki,’ ichi dichinahoshiyi Yehova wamazaza, ‘Akatuña, ilaña ami nakahumuna, nawa akayitena nawu “iluña dakutama” nawa “antu akamonañayi Yehova kutama haya nyaaka.”+ 5 Mesu enu akadimwena chumichi, nawa mwakahosha nenu: “Yehova amulemeshi mwiluña daIsarela.”’”

6 “‘Mwana walemeshaña tata yindi,+ nawa ñamba walemeshaña nkaaka yindi. Dichi neyi nidi tata yenu,+ muloñadi chimwabulilaña kunlemesha?+ Nawa neyi nidi nkaaka yenu,* muloñadi chimwabulilaña kuntiya woma?’* Ami Yehova wamazaza dichinnayileji enu atupristu mwadiwulaña ijina dami.+

“‘Ilaña mwahoshaña nenu: “Tunadiwuli ñahi ijina deyi?”’

7 “‘Nanochu chimwahanaña yakuda* yakujilola hakameña kami.’

“‘Nawa mwahoshaña nenu: “Tunakujiloli ñahi?”’

“‘Nanochu chimwahoshaña nenu: “Mesa yaYehova+ hichuma chatela kudiwulawu.” 8 Neyi mulambula chimuna waputa mesu, mwahoshaña nenu: “Kukala kwosi.” Nawa neyi mulambula chimuna wachifwayi hela wakata mwahoshaña nenu: “Kukala kwosi.”’”+

“Mwani, esekenu kuyihana kudi nguvulu wenu. Komana wukuyitiya kuwaha hela kuyitambwila chiwahi?” dichinahoshiyi Yehova wamazaza.

9 “Dichi mwani, lembenu kudi* Nzambi nenu atutiyili luwi. Naniyi nyilambu yimunakulambula, komana hakachi kenu hadihu wukutambwilayi chiwahi?” dichinahoshiyi Yehova wamazaza.

10 “Nawa hinyi hakachi kenu wadihanaña kwenzela yiisu?*+ Muloña himwabutulaña nikesi hakameña kami chakadi kuyifwetaku.+ Hinayitiyaña kuwahaku,” dichinahoshiyi Yehova wamazaza, “nawa hinatiyaña kuwaha namulambu wachawaana chimwalambulañaku.”+

11 “Muloña kufuma kwaselelaña itena nakushika kudahuminaña,* ijina dami dakekala dabadika mukachi kanyuza.+ Mumaluña ejima akwochaña nyilambu, nawa ijina dami akadilambulaña nyilambu, chawaana chitooka; muloña ijina dami dakekala dabadika mukachi kanyunza,”+ dichinahoshiyi Yehova wamazaza.

12 “Ilaña munakudijilola*+ nanochu chimunakuhosha nenu, ‘Mesa yaYehova anayijiloli, nawa nyikaabu yidihu, dikwila nawu, yakuda yidihu, akuyidiwula.’+ 13 Mwahoshaña cheñi nenu, ‘Talenu! Chinatuzeyeshi!’ nawa mwadiwulaña mesa nanochu chimwatamishaña kumesu,” dichinahoshiyi Yehova wamazaza. “Nawa mwaletaña ayimuna akwiya, ayifwayi niakata. Eña, mwaletaña yumiyi nenu hichawaana! Komana nateli kuchitambula kumakasa enu?”+ dichinahoshiyi Yehova.

14 Yehova nahoshi nindi, “Washiñewa muntu wadimbanaña, welaña wukweti chimuna wachizamba wakadi ihuji mwiyinda dindi, ilaña yasanyika nakulambula wukweti ihuji kudi Yehova. Muloña ami nidi Mwanta wabadika,+ nawa ijina dami akaditiya woma munyuza.”+

2 “Dichi enu atupristu, ilu lushimbi lwenu.+ 2 Neyi mukaana kutiya nawa mubula kushaku muchima kukulemesha ijina dami,” dichinahoshiyi Yehova wamazaza, “nakayitemeshela ishiñu+ nawa nakabalumuna nkisu jenu kwikala mashiñu.+ Eña, nabalumuni nkisu kwikala mashiñu, muloña munakushaku muchima wanyi.”

3 “Tiyenu! Nakakisañana* mbutu jenu jakutumba dehi muloña wayuma yimwelaña,+ nawa nakayiputa tuji kumesu enu, tuji twayimuna yanyilambu yahayawija yenu; nawa dikwakayitwalawu.* 4 Dihimwakeluka nenu nayinki ilu lushimbi kulonda chitiyañenu chami chinatiyañeni naLevi chitwalekihu,”+ dichinahoshiyi Yehova wamazaza.

5 “Chitiyañenu chami chinatiyañeni nindi chadiña chawumi nikuwunda, namwinkeli yumiyi kulonda yatiyeña woma.* Wantiyili woma, eña, watiyili woma ijina dami. 6 Nshimbi* yachalala yadiña mukanwa kindi,+ nawa kunyivumbu yindi hikwadiñahu kubula kuloñaku. Wendeli nanami mukuwunda nimukwoloka,+ nawa wabalumwini antu amavulu kufuma kuyuma yatama. 7 Muloña nyivumbu yakapristu yatela kuhemba maana, nawa antu atela kukeñela nshimbi* kukanwa kindi,+ muloña diyi ntemesha yaYehova wamazaza.

8 “Ilaña enu munafumi munjila. Munahukeshi antu amavulu nanshimbi.*+ Munakisañani chitiyañenu chaLevi,”+ dichinahoshiyi Yehova wamazaza. 9 “Dichi, nukuyikojeja antu ejima ayidiwuleña nawa ayimoneña nawu mwakehelamu, muloña himwendeli munjila jamiku, ilaña mwamwekesheli chaambu hakuzatisha nshimbi.”+

10 “Komana wejima wetu hitukweti tata wumuku?+ Hiyatuleñeli kudi Nzambi wumuku? Hanu dinu mwadikwatilañadi makasu wumu namukwawu,+ nakujilola chitiyañenu chawankakulula jetu? 11 Yuda nakwati makasu, nawa muIsarela nimuYerusalema anakoñimu chuma chawuzondu. Muloña Yuda najiloli kujila* kwaYehova,+ kwakeñayi, nawa Yuda nasumbuli mwana kanzambi wakwacheñi.+ 12 Mumatenti aYakoba, Yehova wakakisañanamu muntu wejima welaña chumichi, hela himuntu wamuchidinyi,* hela walambulaña mulambu wachawaana kudi Yehova wamazaza.”+

13 “Nawa kudi chuma chikwawu* chimwelaña, chakojejaña kameña kaYehova kubutika namadilu, nakudila ninakudishishimona, kulonda aleki kusha muchima kumulambu wenu wachawaana hela kutiya kuwaha chuma chejima chimunakuhana.+ 14 Nawa mwahoshaña nenu, ‘Muloñadi?’ Muloña Yehova nekali chinsahu hakachi kaneyi nañodeyi wahawukwenzi weyi, iwunakwatili makasu, hela chakwila himukwenu nawa hiñodeyi wachitiyañenu.*+ 15 Ilaña kudi wumu wabulili kwila chumichi, muloña wadiña naspiritu yashalilihu. Nawa yenowu muntu wakeñeleñadi? Anyana* kaNzambi. Hembenu yitoñojoka* yenu, nawa bayi hekala muntu wukukwatila makasu ñodindi wahawukwenzi windiku. 16 Muloña nahela* kudiseña,”+ dichinahoshiyi Yehova Nzambi yaIsarela, “nimuntu wadiñijaña mumadombu,”* dichinahoshiyi Yehova wamazaza. “Nawa hembenu yitoñojoka* yenu, nawa bayi mudikwatila makasuku.+

17 “Munamuzeyeshi Yehova namazu enu.+ Ilaña mwahoshaña nenu, ‘Tunamuzeyeshi ñahi?’ Nanochu chimwahoshaña nenu, ‘Muntu wejima welaña yuma yatama amumonaña chiwahi kudi Yehova, nawa wamutiyaña kuwaha,’+ hela nanochu chimwahoshaña nenu, ‘Indi Nzambi wawuñanji wudi kudihi?’”

3 “Tiyenu! Ami nukutemesha ntemesha yami, wukunloñeshela chadimu njila.+ Nawa Mwanta walala, wumunakukeñakeña, wakenza mutembeli yindi+ mukukasumwisha. Ntemesha yachitiyañenu wakenza, wumwatiyaña kuwaha. Tiyenu! Mwamweni wakenza,” dichinahoshiyi Yehova wamazaza.

2 “Hinyi wakatwesha kuumika ifuku dakwinza kwindi, nawa hinyi wakatwesha kwimana neyi namwekani? Muloña wakekala neyi kesi kamukakweñununa nawa neyi mawuti amenji*+ awakakukosa yakuvwala. 3 Wakekala mukakweñununa nimukakuwahisha siliva+ nawa wakawahisha nianyana kaLevi. Wakayitookesha* neyi wuru nisiliva, chakadi nikujina, akekala antu akamulambulaña Yehova mulambu wachawaana mukuloña. 4 Nawa mulambu wachawaana waYuda niwaYerusalema wakamutiyishaña kuwaha* Yehova, neyi chichadiña mumafuku akunyaaka oko-o nikuyaaka yakushankulu.+

5 “Nakenza kwakwihi nanenu nakusompa, nawa nakekala chinsahu wakunyakala kufwisha namuloña akakupanda,+ akawujila, akakusanyika mwamakudi,+ eyilaña muntu eñijawu mudimu,+ ntuluwa nimwana wabula tata yindi,*+ ninowu akaanaña kukwasha* ñiinza.+ Awa antu hiyantiyaña womaku,” dichinahoshiyi Yehova wamazaza.

6 “Muloña ami yami Yehova; nahimpaña wanyi.*+ Nawa enu mudi anyana kaYakoba; kanda mujiyi. 7 Kufuma tuhu kumafuku awankakulula jenu munashiyi nshimbi jami nawa munaleki kujihemba.+ Funtenu kudi ami, ninami nukufunta kudi enu,”+ dichinahoshiyi Yehova wamazaza.

Ilaña mwahoshaña nenu: “Tukutwesha ñahi kufunta?”

8 “Komana muntu nateli kumubuwa Nzambi? Ilaña enu munakumbuwa.”

Nawa mwahoshaña nenu: “Twakubuwaña ñahi?”

“Muyamwikumi nimuyawaana. 9 Chalala mwashiñewa, muloña munakumbuwa, eña, muza wejima dichiwunakwila. 10 Letenu yamwikumi yejima munkalaña,+ kulonda mwitala dami mwiikali yakuda;+ mwani ñesekenu hachumichi, kulonda mumoni neyi nukubula kuyenzunwina yenzelu yadibaji yamumawulu+ nikuyihuñunwina* nkisu yakwila himwakabulahu chuma hela chimuku,”+ dichinahoshiyi Yehova.

11 “Nawa owu wadaña* nakayikisañenayi, hakakisañana nyikaabu yamwituña denuku, nawa muvinyu wamwiha denu hiwakakañanyahu kusoña nyikaabuku,”+ dichinahoshiyi Yehova wamazaza.

12 “Nyuza yejima yakayila nawu mudi namuzañalu,+ muloña mwakekala ituña dikweti muzañalu,” dichinahoshiyi Yehova wamazaza.

13 “Mwanhosholaña namazu ankalu,” dichinahoshiyi Yehova.

Nawa mwahoshaña nenu: “Tunakuhosholi ñahi hakachi ketu?”+

14 “Mwahoshaña nenu, ‘Kumukalakela Nzambi kwamukunkulwayi.+ Yumanyi yitunawaninimu mukulondela nshimbi jindi nimukwenda nakudihomba kumesu aYehova wamazaza? 15 Ichi tunakumona antu adivwimba adi namuzañalu. Cheñi, antu elaña yuma yatama yuma yinakuyiwahila.+ Amwesekaña Nzambi nawa kwosi chayimwekenañaku.’”

16 Hayina mpinji antu amutiyileña Yehova woma ahanjekeleña wumu namukwawu, muntu nebwambu dindi, muntu nebwambu dindi, dichi Yehova washiliku muchima nawa watiyilileña. Nawa mukanda wachanukishu wanowu amutiyaña Yehova woma ninowu atoñojokañahu chikupu* hejina dindi+ awusonekeli kumesu indi.+

17 Yehova wamazaza nahoshi nindi: “Nawa akekala ami+ mwifuku dinakayilisha akekali iheta dadimena.*+ Nakayitiyila wushona neyi muntu chatiyilañayi wushona mwanindi wamukalakelaña.+ 18 Nawa mwakamona cheñi chaambu hakachi kamuntu waloña nawabula kuloña,+ nihakachi kamuntu wamukalakelaña Nzambi nawabulaña kumukalakela.”

4 “Muloña tiyenu! ifuku dinakwinza, dinakubutuka neyi luteñu,+ hakekalawu antu ejima adivwimba niejima akoñaña yuma yatama neyi matahu oma. Idi ifuku dinakwinza mwamweni dakayikisañana,” dichinahoshiyi Yehova wamazaza, “nawa hidakayishilahu muji hela mutayiku. 2 Ilaña enu mwalemeshaña* ijina dami, itena dakuloña dakayitoñekela, nakuuka munyiteeta* yadu; nawa mwakakiloka neyi anyana kañombi anuna.”

3 “Nawa mwakadatola atama mwishina damadatilu, muloña akekala neyi lunkuñu mwishina damadatilu akunyendu yenu hefuku dinakelamu,” dichinahoshiyi Yehova wamazaza.

4 “Anukenu Nshimbi jakambuñami Mosi, joju nshimbi niwunsompeshi wunamulejeli kuHorebi kulonda aleji aIsarela ejima ovwahileña.+

5 “Tiyenu! Inakuyitemeshela kaprofwetu Elija+ henohu ifuku daYehova deneni nawa dakutiyisha woma kanda dinzi.+ 6 Nawa wakabalumwina nyichima yawatata jawantu kudi anyanawu,+ ninyichima yawanyana kudi atata jawu, kulonda nakabuli kwinza nakweta iseki, nakudikisañana.”

(Nsona jachiHeberu nijachiAramayiki dihijinakumini, hakulondela Nsona jawakaKristu jachiGiriki)