MUKANDA WAMUCHIYEDI KUDI AKORINDA

1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, nidi hamu namanakwetu Timotewu,+ inakusonekela chipompelu chaNzambi chidi muKorinda wunu mukanda, kushilahu niakakujila ejima adi muAkaya nami:+

2 Luwi lwasweja nikuwunda kwafumaña kudi Tata yetu Nzambi nikudi Mwanta Yesu Kristu kwiikali nanenu.

3 Kulema kwiikali kudi Nzambi nawa Tata yaMwanta wetu Yesu Kristu,+ Tata wasweja luwi+ nawa Nzambi wakukundeja kwejima,+ 4 owu watukundejaña* mukweseka* kwejima kutwamonaña,+ kulonda ninetu tutweshi kukundeja antu amakwawu+ mukweseka* kwejima kwamonañawu kuhitila mukuyikundeja nakukundeja kutwatambwilaña kudi Nzambi.+ 5 Muloña neyi chavula makabi etu kukoola Kristu,+ dichavula nikukundeja kutwatambwilaña kuhitila mudi Kristu. 6 Dichi neyi tumona kweseka,* chumichi chikuyikundeja nikuyaamwina; nawa neyi anakutukundeja, ninenu anakuyikundeja, kukundeja kwayikwashaña kuumika makabi wowamu itunakumona ninetu. 7 Nawa twayikuhwelela chikupu, nanochu chituneluki netu, neyi chimunakumona makabi hamu nanetu, dichakayikundejawu hamu nanetu.+

8 Muloña etu hitunakukeña enu anakwetu mubuli kwiluka lukadi lutwamweni kukabeta kaAsiyaku.+ Hayina mpinji twakabakeni nankashi, hitwatwesheli kuumika nañovu jetu etu aweniku, chakwila twelukili wanyi neyi tukuhanda hela nehi.+ 9 Kafwampi, twamweni netu anatusompesheli dehi kukufwa. Chumichi chamwekeni kulonda tubuli kudikuhwelela etu aweni, ilaña tukuhweleli mudi Nzambi+ wasañulaña afu. 10 Watupulwishili muniwu wubanji wakufwa nawa wukutupulwisha, tunamukuhweleli cheñi netu wukutwalekahu nakutupulwisha.+ 11 Ninenu nawa munateli kutukwasha mukulomba kwenu kwakulembelela,+ kulonda antu amavulu atulombeleñaku nakulomba kwakusakilila, muloña wakuwaha kwatutiyañayi Nzambi nanochu chakulañayi kulomba kwawantu amavulu.+

12 Muloña chuma chitwadisambilañahu dichenichi, chinleji chetu chamuchima chatulejaña nawu tunamwekeshi kujila nikwikala namuchima wawuwahi wakufuma kudi Nzambi hampinji yitudi nawantu mukaayi, nawa sweje-e neyi tudi hamu nanenu. Hitunashindameni hamaana amukaayiku,+ ilaña tunashindameni haluwi lwaNzambi lwasweja. 13 Muloña hitunakuyisonekela yuma yacheñiku, chiña yuma yimwatela kutaña* nikutiyisha, nawa nakuhweleli nami mukutwalekahu kutiyisha yumiyi chikupu,* 14 neyi chimunatiyishi enu nenu etu yetu tunakuyiletesha kudisamba, neyi chimukatuletesha ninetu kudisamba mwifuku daMwanta wetu Yesu.

15 Dichi, muloña wakukuhwelela mwenimu, nafwilileña nami nisambili kwinza kudi enu, kulonda mwakazañalali kamuchiyedi;* 16 muloña nafwilileña kuyihempula hakuya kuMasidoniya, nikufunta cheñi kudi enu hakufuma kuMasidoniya, kuhiñahu, mukanshinjikijiku hakuya kuYudeya.+ 17 Hela chochu, chinafuukwileña mwenimu, komana naleteleña hohu maleñu tahindi? Indi kwiji nafuukulaña yuma kwesekeja nayitoñojoka yawuntu chakwila nakuminaña dakuhosha nami, “Eña, eña,” kuhiñahu cheñi nami, “Inehi, inehi,” tahindi? 18 Ilaña tunateli kumukuhwelela Nzambi, dichi mazu itunakuyileja hiyanateli kwikala “eña,” hampinji yoyimu cheñi netu “inehiku.” 19 Muloña Mwana kaNzambi, Yesu Kristu, ashimwininiwu mukachi kenu kuhitila mudi etu, dikwila nawu kuhitila mudi ami niSilivanusi* niTimotewu,+ hekalili “eña,” hampinji yoyimu cheñi “inehiku,” ilaña yena wekala “eña” mpinji yejima. 20 Muloña hela yikaninu yaNzambi yikuvula ñahi, mpinji yejima yekalaña “eña” muloña wayena.+ Dichi, kuhitila mudi yena cheñi dimutwahoshelaña netu “Ameni” kudi Nzambi,+ nawa chumichi chaleteshaña amulemeshi kuhitila mudi etu. 21 Ilaña owu wunayileji enu ninetu nindi tudi antu jaKristu nawa wunatuwayishi etu, hiNzambi.+ 22 Cheñi nawa natulamiki chilamiku chindi+ nawa watwinka chinjikijilu chayuma yakenza, dikwila nawu, spiritu+ munyichima yetu.

23 Ichi inakusanyika* kudi Nzambi ekali chinsahu chami* nami, chuma chinaleteshi nibuli kwinza kuKorinda hayinu mpinji, nalondi nami niyaamwini kuchineñi. 24 Chumichi, hichinatalishi mukwila nawu tudi anyanta achikuhwelelu chenuku,+ ilaña tudi akakukalakala hamu nanenu kulonda muzañalaleña, muloña chikuhwelelu chenu dichinakuyiletesha mwimani chakola.

2 Muloña nafuukulihu kubula kuyineñesha hinakenza nakuyihempula cheñi. 2 Neyi niyineñesha enu mwantiyishaña kuwaha, hinyi wakantiyisha cheñi kuwaha? 3 Nasonekeli yuma yinakoñeli kulonda chinakenza, akabuli kunneñesha kudi antu atela kuntiyisha kuwaha, muloña neluki chikupu nami yuma yanzañaleshaña ami yayizañaleshaña wejima wenu nawa. 4 Muloña walukadi lwasweja nichineñi chasweja chidi mumuchima wami, nayisonekeleli namadilu amavulu, bayi neyi nalondeli nami niyineñeshiku,+ ilaña nami mwiluki nenu nayikeña chikupu.

5 Ilaña neyi kudi muntu wunaneñeshi akwawu,+ hananeñeshi amiku, ilaña naneñeshi enu ejima kushika hachipimu chimu. Ilaña hinnakukeña kuhosha yuma yayivulu haniyi nsañuku. 6 Kuzuwila kukuzuwilawu muntu wamuchidiwu kudi antu amavulu kunateleli; 7 ilaña mwatela kumwanakena nikumukundeja muntu wamuchidiwu,+ kulonda abuli kusweja kuneña.+ 8 Dichi inakuyilembelela nami mumumwekesheli kukeña kwenu.+ 9 Muloña ichi dichuma chinaleteshi cheñi niyisonekeli enu: kulonda nimoni neyi mukwovwahila muyuma yejima. 10 Neyi mwanakena muntu hachuma chinakoñiyi, ninami namwanakeni. Kafwampi, chuma chejima chinnanakeni (neyi nanakeni chuma chidi chejima), neli mwenimu muloña wanenu kumesu aKristu, 11 kulonda abuli kutwimika mushindu* kudi Satana,+ muloña hitwayamba tufuta twindiku.*+

12 Chinashikili muTirowasi+ nakushimwina nsañu yayiwahi hadi Kristu nichañenzunwininiwu chenzelu chakuzata nyidimu mudi Mwanta, 13 naneñeli nankashi muloña hinamuwanini manakwami Titusaku.+ Dichi nayishalishili nawa nayili kuMasidoniya.+

14 Ilaña tumusakililenu Nzambi, watulombolaña mpinji yejima muchendu chakushindila hamu naKristu, nawa wataandishaña ivumba dadiwahi dakumwiluka yena mumaluña ejima kuhitila mudi etu! 15 Muloña etu kudi Nzambi, tudi neyi ivumba dadiwahi nankashi daKristu hakachi kawantu anakwamwinawu nihakachi kawantu anakujilumuka; 16 kudi anakujilumuka tudi ivumba* dakufwa datwalaña kukufwa,+ kudi anakupulwishawu tudi ivumba dawumi datwalaña kuwumi. Nawa hinyi wunashikihu kuzata iwu mudimu? 17 Etu tunashikihu, muloña hitudi akakulandisha* izu daNzambi+ neyi chelañawu antu amavuluku, ilaña twahoshaña mwalala chineli tudi antu atemeshawu kudi Nzambi, eña, adi kumesu aNzambi nawa adikunda naKristu.

3 Komana tunatachiki kudihameka etu aweni cheñi? Indi kwiji tunakukeña nyikanda yakutuhameka yakuyinka enu hela yakutwinka etu neyi chelañawu antu amakwawu? 2 Enu yenu mukanda wetu,+ wasonekawu hanyichima yetu, welukawu nawa wunakutañawu antu ejima. 3 Muloña enu anayimwekeshi kwikala mukanda waKristu wasonekawu kudi etu akakukalakala,+ wasonekawu bayi nawulombuku, ilaña wasonekawu naspiritu yaNzambi wamumi, hiyawusoneka hamalola awubasaku,+ ilaña hawubasa wamujimba, hanyichima.+

4 Tukweti iku kukuhwelela mudi Nzambi kuhitila mudi Kristu. 5 Bayi neyi etu aweni yetu tunadilishi kwikala ashikahu chikupu kuzata iwu mudimuku, ilaña Nzambi diyi wunatwilishi kwikala ashikahu chikupu,+ 6 wunatwilishi kwikala akakukalakala ashikahu chikupu achitiyañenu chachiha,+ bayi neyi anshimbi jasonekawuku,+ ilaña jakuspiritu; muloña nshimbi jasonekawu jasompeshelaña muntu kukufwa,+ ilaña spiritu yahandishaña.+

7 Dichi neyi nshimbi jatwalaña muntu kukufwa nawa jabazililiwu hamalola+ jenjili nakulema chakwila anyana kaIsarela akañenyi nikushinshika kumesu aMosi muloña wakulema kwadiña kumesu indi,+ oku kwateleleli kujishawu, 8 Muloñadi mudimu waspiritu+ chiwatela kubulila kwikala nakulema kwabadika?+ 9 Muloña neyi nshimbi jasompeshelaña muntu kukufwa+ jadiña nakulema+ kwamuchidiwu, dikwila nawu kuloña kukabadika kulema nankashi!+ 10 Kafwampi, nichuma chalemesheliwu nankashi hakusambila anachihukuli kulema, muloña wakulema kunachibadiki.+ 11 Muloña neyi chuma chateleleli kujiya achileteli nakulema,+ dikwila nawu chuma chakashala chakabadika kulema nankashi.+

12 Chineli tukweti iku kuchiñeja,+ tunakuhosha nakukasunuka chikupu, 13 nawa hitwelaña neyi chelileñayi Mosi hadibutileñayi kadihina kumesu indi+ kulonda anyana kaIsarela akañanyi kushinshika chikupu chuma chateleleli kujiyaku. 14 Ilaña yitoñojoka yawu yachinchikili.+ Muloña kushika nikwifuku dalelu kadihina kokamu dikachidi kakubuta nihampinji yinakutañawu chitiyañenu chachikulu,+ muloña anateli kukifumishahu hohu nawukwashu waKristu.+ 15 Kafwampi, kushika nikwifuku dalelu, mpinji yejima yinakutañawu nsañu yasonekeliyi Mosi,+ aka kadihina saña kabutila hanyichima yawu.+ 16 Ilaña neyi muntu abalumukila kudi Yehova,* aka kadihina akibutununañahu.+ 17 Yehova* hiSpiritu,+ nawa kwejima kudi spiritu yaYehova,* kwekala kusubuka.+ 18 Nawa wejima wetu kumesu etu kwakubuta kadihina wanyi, tudi neyi yibanjilu yinakumwekesha kulema kwaYehova.* Hampinji yitunakwila mwenimu, anakutubalumuna kwikala neyi chifwanisha chindi, nakumwekesha chikupu kulema neyi chakumwekeshañayi Yehova* owu wekala Spiritu.*+

4 Dichi, chineli tukweti iwu mudimu wunatukunjikiwu muloña waluwi lwatutiyililiwu, hitwazeyañaku. 2 Ilaña tunakaani yuma yaletaña nsonyi, yakujinda, hitwendaña munjila yakudimbana hela kuheñesha izu daNzambiku;+ ilaña mukumwekesha chalala hatooka, tunakudihameka etu aweni kuyinleji yawantu ejima kumesu aNzambi.+ 3 Kafwampi, neyi nsañu yayiwahi yitwashimwinaña ayibuta, yinabutewi kudi antu anakujilumuka, 4 kudi antu abula kwitiya anaputishiwu yitoñojoka+ kudi nzambi wanshakaminu yamakonu,*+ kulonda chejeji chakulema kwansañu yayiwahi yahosha hadi Kristu, owu wekala chifwanisha chaNzambi,+ chibuli kuyitoñekela.+ 5 Muloña hitunakushimwina hadi etu aweniku, ilaña tunakushimwina hadi Yesu Kristu netu diyi Mwanta nawa etu aweni netu tudi anduñu jenu kukoola Yesu. 6 Muloña Nzambi diyi wahosheli nindi: “Chejeji chitoñeki mumwidima,”+ nawa natoñeki munyichima yetu kulonda tuyitoñekeli wena+ nakulema kwakumwiluka Nzambi kuzatisha kumesu aKristu.

7 Hela chochu, tukweti idi iheta+ munsaba jamawumba+ kulonda ñovu yabadika hañovu jawantu yifumi kudi Nzambi, bayi kudi etuku.+ 8 Anatushintakeshi mumbadi jejima, hela chochu, hitunakañanyi nihakudinyinkeshelaku; tunaluwankani, ilaña hitunakañanyi mwakwililaku;*+ 9 anakutukabisha, ilaña hiyanatushiyi chisayikilaku;+ anatudimbwishi hamaseki, ilaña hiyanatujilumuniku.+ 10 Mpinji yonsu twomikaña wubanji wakufwa neyi cheliliyi Yesu,+ kulonda chihandilu chaYesu chimwekeni nimumujimba wetu. 11 Muloña etu tunakuhanda, mpinji yonsu tunakutalañana nakufwa mesu-namesu+ kukoola Yesu, kulonda chihandilu chaYesu chimwekeni nimumujimba wetu wafwaña. 12 Dichi kufwa kunakuzata mudi etu, ilaña wumi wudi mudi enu.

13 Ichi dichasonekawu nawu: “Nakuhweleleli, dichakojejeli nihoshi.”+ Ninetu nawa twamwekeshaña netu tukweti chikuhwelelu chochimu, ichi dichakojejaña tuhosheña, 14 nanochu chituneluki netu Owu wamusañwili Yesu, wakatusañula ninetu neyi chamusañwiliyi Yesu nawa wakatuleta hamu nanenu kumesu indi.+ 15 Muloña yuma yejimiyi yinamwekani kukoola enu, kulonda kuvula kwaluwi lwasweja kuyeña hohu nakuvulilaku muloña antu amakwawu amavulu anakulomba nakusakilila nakumulemesha Nzambi.+

16 Dichi hitwazeyañaku, ilaña hela chakwila wuntu wetu wahanji wunakunoña, mwamweni, wuntu wetu wamukachi anakuwubalumuna kwikala wawuha hefuku-hefuku. 17 Hela chakwila lukadi* lutwamonaña lwakapinji kantesha nawa lwapepela, lwatuleteshaña twiikali nakulema kwabadika chikupu* nawa kwahaya nyaaka;+ 18 dichi hitwashinshikaña mesu etu hayuma yamwekanañaku, chiña hayuma yabulaña kumwekana.+ Muloña yuma yamwekanaña yakapinji kantesha, hakwila yuma yabulaña kumwekana yahaya nyaaka.

5 Muloña tuneluki netu neyi itala detu dahanu hamaseki, idi itenti, adilemuna,*+ tukekala netala dafumaña kudi Nzambi, itala dakubula kutuña namakasa,+ dahaya nyaaka mwiwulu. 2 Muloña chalala munidi itala* twaabaña, nakufwila nankashi kuvwala odu itala detu dafumaña mwiwulu,*+ 3 kulonda neyi tunadivwali dehi, hiyakatuwana nzekesiku. 4 Kafwampi, etu tudi munidi itenti twaabaña, twatiyaña kulema, muloña hitwakeñaña kudivuula idi itentiku, ilaña tunakukeña kuvwala dikwawu,+ kulonda wumi wahaya nyaaka wuminyi mujimba wafwaña.+ 5 Muloña Nzambi diwatuloñesheleli iwu wumi,+ watwinkeli spiritu yajila yiikali chinjikijilu chayuma yakenza.*+

6 Dichi mpinji yonsu twekalaña ahamuka chikupu nawa tweluka netu chineli tuchidi namukala wetu mumujimba, hitudi hamu naMwantaku,+ 7 muloña tunakwenda nachikuhwelelu, bayi namesuku. 8 Ilaña etu twekala ahamuka chikupu nawa tukutiya kuwaha kwikala namukala wetu naMwanta kubadika muniwu mujimba.+ 9 Dichi, hichikweti muloña nakutwashakamañaku, chili nayena hela nehi, tunakuzata nañovu kulonda twikaleña etejewa kudi yena. 10 Muloña wejima wetu twatela kumwekena kumbidi yachitwamu chakusompela chaKristu, kulonda muntu-himuntu akamufweti kwesekeja nayuma yakoñeleñayi hadiñayi mumujimba, chili yayiwahi hela yatama.*+

11 Dichi, chineli tweluka netu twatela kumutiya Mwanta woma, twatwalekañahu kushinjila antu, ilaña etu atwiluka chiwahi* kudi Nzambi. Hela chochu, nakuhweleli nami niyinleji yenu niyena yatwiluka chiwahi. 12 Hitunakudihameka cheñi etu aweni kudi enuku, ilaña tunakuhosha mwenimu kulonda tuyikoleshi mudisambileña hadi etu, kulonda mutweshi kwakula antu adisambilaña hammwekenu yawuntu wahanji,+ bayi hayuma yidi mumuchimaku. 13 Muloña neyi tuzaluka,+ twazalukaña kukoola Nzambi; ilaña neyi tunakutoñojoka mwamaana, tunakwila mwenimu kukoola enu. 14 Kukeña kukwetiyi Kristu kwatusañumunaña, muloña ichi dichitunakunkululi netu, muntu wumu wafwilili antu ejima;+ dichi ejima afwili. 15 Nawa wafwilili antu ejima kulonda antu anakuhanda abuli kudihandila awenawu,+ ilaña amuhandili owu wayifwilili nawa asañwiliwu.

16 Dichi kufuma dalelu hitunelukihu muntu kwesekeja nammwenu yawuntuku.+ Hela chakwila kunyima twamwilukili Kristu kwesekeja nawuntu, chayinu mpinji hidichitwamwilukaku.+ 17 Dichi, neyi muntu wadikunda naKristu, hichileñaleña chachiha;+ yuma yayikulu yahita dehi; talenu! ichi kunekali dehi yuma yayiha. 18 Ilaña yuma yejima yafuma kudi Nzambi, owu watunuñañesheli cheñi kudi yomweni kuhitila mudi Kristu+ nawa watwinkeli mudimu wakunuñañesha cheñi antu,+ 19 dikwila nawu, kuhitila mudi Kristu, Nzambi wakundamishili cheñi kaayi kudi yomweni+ chakadi kwanuka yiluwa yaku,+ nawa watukunjikili nsañu yakunuñañesha cheñi antu.+

20 Dichi, tudi añimeni+ emenañaku Kristu,+ neyi kwiji Nzambi nakuyilembelela enu kuhitila mudi etu. Chineli tudi añimeni aKristu, tunakulemba netu: “Dinuñañeshenu cheñi naNzambi.” 21 Muntu wabulili kukoñahu nshidi,+ Nzambi wamwilishili kwikala mulambu wanshidi jetu, kulonda kuhitila mudi yena tutweshi kwikala aloña kumesu aNzambi.+

6 Chineli tunakukalakala hamu nindi,+ tunakuyilembelela cheñi netu mwiteji luwi lwaNzambi lwasweja nawa bayi mukañanya kwiluka nkeñelu yaluku.+ 2 Muloña yena wahosha nindi: “Mumpinji yatelela nakutiyili, nawa nakukwashili mwifuku dawamwinu.”+ Talenu! Yinu diyi mpinji yatelela. Talenu! Dinu didu ifuku dawamwinu.

3 Hitunakukoñahu chuma hela chimu chakuhukesha nachu antuku, kulonda mudimu wetu abuli kuwana hakuwutenena kutama;+ 4 ilaña muyuma yejima tunakudihameka etu aweni kwikala akakukalakala aNzambi,+ kuhitila mukuumika muyuma yayivulu yidi neyi, mulukadi, mumpinji yakukaankila, mukukala,+ 5 mukutweta, mutuleya,+ mumapumba, mukuzata nañovu, mukubula kukaama, mumpinji yakubula yakuda;+ 6 mukuhanda chihandilu chakadi majilu, mukukoña yuma kwesekeja namwaya kwiluka, mukudiwunjika+ nimukumwekesha luwi,+ mukwiteja spiritu yajila kulombola mawumi etu, mukumwekesha kukeña kwakadi wunfwikiji,+ 7 mukuhosha yuma yalala, mukushindamena hañovu yaNzambi;+ muyitwa yakuloña+ yidi muchikasa chachidiilu* nimuchachimunswa,* 8 mukulema nimukusawuka. Antu atuhoshaña yuma yatama niyayiwahi, atumonaña nawu tudi akakudimbana, henohu twahoshaña yuma yalala, 9 atumonaña neyi antu abula kwilukawu, henohu twelukewa, atumonaña neyi antu anakufwa,* ilaña talenu! tudi amomi,+ hela chakwila atubabesheli, hitwafwiliku,+ 10 twamwekanaña wushona, ilaña twazañalalaña mpinji yejima, twamwekanaña wuzweñi, ilaña twaheteshaña amavulu, twamwekanaña neyi hitukweti yumaku, ilaña tukweti yuma yayivulu.+

11 Enu aKorinda, tunaasami kanwa ketu kulonda tuhoshi* nanenu, nawa tunenzununi chikupu muchima wetu. 12 Etu tunakasunuki kuyimwekeshela enu kukeña,+ ilaña enu himunakasunuki kutumwekeshela etu kukeñaku. 13 Dichi, inakuyileja neyi inakuleja anyanami nami, ninenu enzununenu chikupu nyichima yenu.*+

14 Bayi mudikasa* mumpaanda nawantu abula kwitiyaku,+ muloña himpaanda yacheñi. Indi kuloña nayuma yatama jinateli kutiyañana ñahi?+ Hela chejeji namwidima, jinateli kutiyañana ñahi?+ 15 Kubombelahu cheñi, komana Kristu naBeliyali* anateli kutiyañana?+ Hela muntu wetiya* nateli kwesekana ñahi nawabula kwitiya?+ 16 Nawa tembeli yaNzambi yikutiyañana ñahi nawankishi?+ Muloña etu tudi tembeli yaNzambi wamumi;+ neyi chahoshayi Nzambi nindi: “Nakashakama hakachi kawu+ nikwenda hakachi kawu, nakekala Nzambi yawu nawa wena akekala antu jami.”+ 17 “‘Dichi, fumenu mukachi kawu nawa daambulenu,’ dichinahoshiyi Yehova,* ‘nawa lekenu kukwata chuma chamajilu’”;+ “‘ninami nakayitambwila.’”+ 18 “‘Nawa nakekala tata yenu,+ enu mwakekala anyanami awamayala niawambanda,’+ dichinahoshiyi Yehova,* Wañovu Jejima.”

7 Dichi enu akwetu itwakeña, chineli atushika iyi yikaninu,+ tuditookeshenu kuyuma yejima yatamishaña mujimba nispiritu,+ kulonda tusweji kwikala ajila hampinji yitunakumutiya Nzambi woma.

2 Tutambwilenu munyichima yenu.+ Hitunakoñihu muntu hela wumu chatamaku, hitunakatishihu muntu hela wumuku, hitunadimbihu muntu hela wumu kulonda tuhetelimuku.+ 3 Hinnahoshi mwenimu kulonda niyifwishi namuloñaku. Muloña nahoshahu dehi nami enu mudi munyichima yetu kulonda mufwili hamu nanetu nikuhandila hamu nanetu. 4 Inakuhosha nanenu nakukasunuka chikupu. Nadisambilaña chikupu mudi enu. Ankundejaña chikupu; nidi namuzañalu chikupu mumakabi etu ejima.+

5 Kafwampi, chitwashikili muMasidoniya,+ nyijimba* yetu yanookelihu wanyi, ilaña twatwalekelihu kukabakana mumbadi jejima, hanji hadiña madombu, mukachi mwadiña jakutiyisha woma. 6 Ilaña Nzambi wakundejaña antu anadihombi,+ watukundejeli kuhitila mukutuhempula* kudi Titusa; 7 nawa bayi neyi kutuhempula kwindi hohuku, ilaña nimukukundeja kwatambwililiyi muloña wanenu, chatulejeliyi nindi munakuntalila nankashi, chineñi chenu nimuchima* wakufwila kunkwasha; nazañaleli chikupu.

8 Hela chakwila nayineñesheli mumukanda wunayisonekeleli,+ hinnakuditoñeshaku. Hela chakwila hatachi naditoñesheli, (chinamweni nami mukanda wayineñesheli, hela chakwila hakapinji kantesha), 9 ichi nazañalali, bayi neyi nachimwaneñeliku, ilaña muloña kuneña kwenu kwaletesheli mubalumuki munyichima. Muloña kuneña kwenu kunesekani nankeñelu yaNzambi nawa chumichi dichayikwashili enu. Ichi dichuma chinaleteshi mubuli kumona yuma yatama muloña wayuma yitwahosheli kudi enu. 10 Muloña kuneña kwesekeja nankeñelu yaNzambi kwaleteshaña muntu kubalumuka mumuchima, kubalumuka mumuchima kwatwalaña kuwamwinu waleteshaña muntu kubula kuditoñesha;+ ilaña kuneña kwamukaayi kwaletaña kufwa. 11 Muloña talenu yuma yinafumi mukudikita kwenu kwakuneña kwesekeja nankeñelu yaNzambi, munafumi kudiyiñisha kuyiluwa, kutiya kutama, kutiya woma, kufwila kubalumuka mumuchima, kwikala neyena, kwolola yilwilu yatama!+ Muyuma yejima mwadimwekesheli kwikala akadi majilu* muniyi nsañu. 12 Hela chakwila nayisonekeleli, hinayisonekeleli muloña wamuntu waluwañesheli+ hela muloña wamuntu aluwañesheliwuku, ilaña kulonda kudikita kwenu kumunakutudikitila etu kumwekani hatooka mukachi kenu kumesu aNzambi. 13 Ichi dichuma chinaleteshi atukundejeña.

Ilaña kubombela hakutukundeja, twazañaleli chikupu muloña wamuzañalu waTitusa, chineli wejima wenu mwazañalesheli muchima windi. 14 Muloña neyi nadisambi kudi yena hadi enu, hiyanantiyishi nsonyiku; ilaña neyi yuma yejima yitwayilejeli chiyekala yalala, dichi kudisamba kwetu kudi Titusa nikwena kwalala. 15 Cheñi, kukeña kwindi kwayikeñayi enu kwabadika nankashi nanochu chanukañayi kwovwahila kwenu wejima wenu,+ ninochu chimwamutambwilili nawoma nikuzaala. 16 Nazañalali nankashi hakwiluka nami nateli kuyikuhwelela* muyuma yejima.

8 Enu anakwetu, ichi dinu tunakukeña mwiluki luwi lwaNzambi lwasweja lunatiyiliyi yipompelu yamuMasidoniya.+ 2 Hayesekeliwu chikupu namakabi, muzañalu wawu wasweja chikupu niwuzweñi wawu wasweja, waletesheli ekali namuchima wakuhana chikupu. 3 Muloña ahanineña kwesekeja nayuma yadiñawu nayu,+ inakuyileja nami, ahanineña kubadika nihayuma yadiñawu nayu,+ 4 nawa adiña nakutulembelela chikupu awenawu kulonda ekali nakukooleka kwakuhanaña yawaana yaluwi nikuzataku mudimu wakukwasha akakujila.+ 5 Nawa akoñeli yuma yabadikili hayuma yitwakuhweleleli, muloña chatachi adihanini awenawu kudi Mwanta nikudi etu kuhitila munkeñelu yaNzambi. 6 Dichi twamukolesheli Titusa+ netu amanishi mudimu weniwu wakupompesha yawaana yenu yaluwi, chineli diyi watachikili iwu mudimu mukachi kenu. 7 Hela chochu, neyi chimunakwila chiwahi muyuma yejima, muchikuhwelelu nimumazu nimukwiluka nimukudikita chikupu nimukukeña kutwayikeña, ninenu hanenuña chikupu yawaana yaluwi.+

8 Hinnakuhosha chumichi kulonda niyikanjikijiku, ilaña nalondi mwiluki chinakudikitawu antu amakwawu, nawa niyeseki neyi kukeña kwenu kwalala. 9 Muloña mweluka luwi lwasweja lwaMwanta wetu Yesu Kristu lwakwila nawu, hela wadiña waheta, wekalili kazweñi kukoola enu,+ kulonda mwiikali aheta muwuzweñi windi.

10 Nawa inakuyileja mwinnatoñojoki+ nami: Chumichi chikuyikwasha, muloña chaaka chinamani himwadiña hohu atachi kwila chumichiku, ilaña mwamwekesheli nimuchima wakufwila kuchikoña. 11 Dichi, manishenu mudimu wumwatachikili, kulonda mudimu wumwafuukwili, muwuzati kwesekeja nayuma yimukweti. 12 Nzambi wetejaña hohu chawaana chahanañayi muntu kufuma hamuchima, muloña yena wakeñaña muntu kuhana chuma chikutweshayi,+ bayi chikubula kutweshayiku. 13 Muloña hinnakukeña nami chiyikalili enu ilaña kudi antu acheñi chiikali chaswayiku; 14 ilaña inakukeña nami, kwiikali kwesekana, yuma yimukweti yinasompokihu hayinu mpinji, ayibombeli hayuma yantesha yikwetiwu antu amakwawu, kulonda niwena yuma yikwetiwu yinasompokihu, ayibombeli hayuma yantesha yimukweti kulonda mwesekani. 15 Neyi chasonekawu nawu: “Muntu wadiña nayuma yayivulu, hadiña nayayivulu nankashiku, nimuntu wadiña nayuma yantesha, hadiña nayantesha nankashiku.”+

16 Dichi tunakumusakilila Nzambi hakumukwasha Titusa+ kwikala namuchima wowumu wakuyakamena, 17 muloña yena neteji mazu etu akumukolesha, ilaña, chineli yena nakufwila kuzata, wukudinjila yomweni kudi enu. 18 Ilaña tunakumutemesha hamu namanakwetu anahamekiwu muyipompelu yejima hayuma yinakukoñayi muloña wansañu yayiwahi. 19 Kubombelahu cheñi, amutondeli nikudi yipompelu kulonda ekali mukakwenda hamu nanetu hampinji yitunakuzata mudimu wakwanzañana iyi yawaana yaluwi kulonda tumulemeshi Mwanta nikumwekesha netu tudi namuchima wakukwashana. 20 Tuneli mwenimu kuchiina muntu wudi wejima kutwinka muloña hamudimu wutunakuzata wakwanzañana yawaana.+ 21 Muloña ‘twakamenaña yuma yejima nakashinshi, bayi neyi kumesu aYehova* hohuku, ilaña nikumesu awantu.’+

22 Kubombelahu, tunakuyitemesha hamu namanakwetu ituneseki kakavulu nawa itunawani netu wadikita muyuma yayivulu, ilaña chayinu mpinji, kudikita kwindi kunasweji muloña wayikuhwelela enu chikupu. 23 Neyi munakumujinoka Titusa, himukwetu mutwazatilaña nyidimu kulonda kuyikwasha enu; nawa neyi munakuyijinoka amanakwetu, hiyapostolu ayipompelu nawa kulema kwaKristu. 24 Dichi yimwekeshelenu kukeña kwenu+ nawa lejenu yipompelu chuma chatuletesheli tudisambileña mudi enu.

9 Dichi kutalisha hamudimu wawakakujila,+ hichinakukeñeka ami kuyisonekelaku, 2 muloña neluki kudihana kwenu oku kunadisambilaña kudi akaMasidoniya nami, akaAkaya adiloñesheleli chadimu nawa hanahiti dehi chaaka chimu, cheñi nawa, iyena denu dinasañumuni antu amavulu mukachi kawu. 3 Ilaña inakutemesha anakwetu kulonda kudisamba kwetu hadi enu haniyi nsañu kubuli kwikala kwamukunkulwayi nawa mudiloñeshi, neyi chinahosheli nami dichimwakekala. 4 Muloña neyi akaMasidoniya akenza nanami nawa tukawani munadiloñeshi wanyi, enu nanetu twakatiya nsonyi hakuyikuhwelela. 5 Dichi natoñojokeli nami chachiwahi kukolesha anakwetu enzeñahu dehi kudi enu nakupompeshela chadimu yawaana yenu yimwakanini, kulonda twakawani iyi yawaana yakudikeñela yidi dehi kwoku, nawa bayi yakukanjikijaku.

6 Ilaña kutalisha hachumichi, muntu wejima wakuwaña yantesha, wamunaña yantesha, nawa muntu wejima wakuwaña yayivulu wamunaña yayivulu.+ 7 Dichi muntu-himuntu eli kwesekeja nachinafuukuliyi mumuchima windi, bayi nakuneña* hela chakumukanjikijaku,+ muloña Nzambi wakeña muntu wahanaña namuzañalu.+

8 Kubombelahu, Nzambi nateli kuyivulishila luwi lwindi lwasweja kulonda mpinji yejima mwikaleña nayuma yimunakukeña muyuma yejima nikwikala nayuma yayivulu yamumudimu wejima wawuwahi.+ 9 (Neyi chasonekawu nawu: “Nahani chikupu;* nayinki atuzweñi. Kuloña kwindi kwatwalekañahu haya nyaaka.”+ 10 Dichi Owu wahanaña nankashi mbutu niyakuda kudi mukakukuwa, wakayinka nikuyivulishila mbutu yakutumba nawa wakayikwasha kwaañula yayiwahi munyidimu yenu yakuloña.) 11 Anakuyihetesha muyuma yejima kulonda muhaneña yuma yayivulu, yaleteshaña antu amusakilileña Nzambi muloña wayawaana yenu yitukwinkaña antu amakwawu; 12 muloña iwu mudimu wakuzatila antu, bayi neyi wakukwasha hohu akakujila+ muyuma yinakaankiliwuku, ilaña wakukwasha niantu kulonda amusakilileña Nzambi chikupu. 13 Muloña wawunsahu wafumaña muniwu mudimu wakukwasha, amulemeshaña Nzambi muloña wanenu mwovwahilaña nsañu yayiwahi yahosha hadi Kristu, neyi chimwayishimwinini kudi antu, nawa muloña wakwila mwahanaña yawaana kudi wena nikudi antu ejima chakufuma kumuchima.+ 14 Nawa wena hakuyilembelelaku, amwekeshaña kukeña kwayikeñawu muloña waluwi lwaNzambi lwasweja nawa lwabadika lwayitiyilañayi enu.

15 Tumusakililenu Nzambi hachawaana chindi chabadika chikupu chakukañanya nimwakuchilumbulwila.

10 Dichi ami Pawulu, inakuyilembelela nakwovwaha niluwi lwaKristu,+ hela chakwila namwekanaña kuzeyazeya neyi nidi hakachi kenu,+ Ilaña nahoshaña nanenu chakadi woma neyi nidi kwacheñi.+ 2 Mwamweni inakufwila nami, neyi nidi nanenu nibuli kwikala wahamuka nakubabesha ana atumonaña nawu twamwekeshaña yilwilu yamukaayi. 3 Hela chakwila twendaña kwesekeja namwaya mujimba wawuntu, hitwalwaña njita kwesekeja nachitwekala mumujimba wawuntuku. 4 Muloña yitwa yetu yanjita hiyekala neyi yitwa yakumujimbaku,+ ilaña hiyitwa yahanañayi Nzambi yikweti ñovu+ yakubalumuna yuma yashimata chikupu. 5 Muloña tunakubalumuna yitoñojoka yawantu yatama niyuma yejima yakañeshaña antu kumwiluka Nzambi,+ nawa tunakutwala yitoñojoka yejima yatama muwuduñu kulonda yimwovwahileña Kristu; 6 nawa tunadiloñeshi kubabesha antu ejima atwalekañahu kudikaña,+ neyi munamwekeshi dehi kwovwahila chikupu.

7 Mwamonaña yuma kwesekeja nachiyamwekanaña kumesu. Neyi kudi muntu wuneluki chikupu nindi wekala kukabadi kaKristu, atoñojoki chikupu cheñi hachumichi: Neyi chekalayi kukabadi kaKristu, ninetu dichitwekala. 8 Muloña hela ami nadisambi kakavulu kutalisha hawuswa watwinkeliwu kudi Mwanta wakuyituña enu, bayi neyi wakuyizeyeshaku,+ chumichi hichikuntiyisha nsonyiku. 9 Muloña hinnakukeña kumwekana neyi inakuyitiyisha woma nanyikanda yamiku. 10 Muloña ahoshaña nawu: “Nyikanda yindi yalema nawa yikweti ñovu, ilaña neyi wudi nanetu, wamwekanaña kuzeya nimazu indi amukunkulwayi.” 11 Muntu wamuchidiwu, eluki nindi yuma yitwahoshaña* munyikanda hitunabuli kwikalahu, diyuma yitwakakoña* nihitwakekalahu.+ 12 Muloña etu hitwadishaña hachifulu hela kudesekeja nawantu adihamekaña awenawuku.+ Ilaña neyi adipima aweni mulwawu nawa adesekeja aweni mulwawu, hiyakweti maanaku.+

13 Etu tukudisamba, hela chochu, bayi neyi tukubadika hitwatela kukuminaku. Tukudisamba hohu nayuma yitunateli kuzata mumudimu watwinkayi Nzambi. Iwu mudimu wabombelamu ninenu nawa.+ 14 Chalala, hitunakubadika hitwatela kukumina neyi kwiji hitwenjilihu nikudi enuku, muloña yetu adiña atachi kuyishimwina nsañu yayiwahi yahosha hadi Kristu.+ 15 Etu tunakudisambila hanyidimu yitunakuzata, bayi hanyidimu yinakuzata antu acheñiku. Tunakuhweleli netu chikuhwelelu chenu chikutohelañaku kulonda muhamekeña chikupu nyidimu yitunazati. Chumichi chikuletesha tusweji kuzata nañovu, 16 kulonda tushimwini nsañu yayiwahi kumatuña adi kwakulehi nanenu, hakwila nawu tubuli kudisambila munyidimu yinakoñiwu dehi mwiluña damuntu wacheñi. 17 “Ilaña muntu wadisambaña, yadisambileña mudi Yehova.”*+ 18 Muloña muntu wadihamekaña yomweni, hidiyi atiyañawu kuwahaku,+ chiña muntu ahamekañawu kudi Yehova.*+

11 Nukutiya kuwaha neyi mukuñiiteja mukubula maana kwami kwantesha. Hela chochu, munañiteji dehi! 2 Muloña nayitiyilaña mukawu neyi mukawu* watiyañayi Nzambi, chineli nayikanini kuyisumbwisha kudi iyala wumu yowu Kristu nawa inakukeña kuyitwala kudi yena neyi mujiki* wadihemba.*+ 3 Ilaña inakutiya woma, nami neyi chamudimbiliwu Eva kudi kapela namakudi indi,+ hamwaha yitoñojoka yenu anateli kuyiluwañesha nakuyifumisha kukashinshi nikukudihemba kwatelela Kristu.*+ 4 Muloña neyi chochichidi, neyi muntu wacheñi enza nakushimwina Yesu waambuka nanowu itwashimwininihu, hela neyi mutambwila spiritu yaambuka nanoyu yimwatambwilili, indi kwiji ayishimwina nsañu yayiwahi yaambuka nanoyu yimwatambwilili,+ owu muntu mwamwitejaña swayi. 5 Muloña ami natoñojoki nami, apostolu enu imwamonaña nenu abadika kulema, hiyambadika muchuma hela chimuku.+ 6 Hela chakwila hineluka kuhosha chiwahiku,+ ilaña Nzambi yena namwiluka; mwamweni, twayilejeli hatooka iyi nsañu munjila jejima nawa muyuma yejima.

7 Indi kwiji nakoñeli nshidi hakudizoza kulonda enu ayitoheshi nanochu chinayishimwinini nsañu yayiwahi yaNzambi chakadi kuyifwetesha?+ 8 Natambwili* yuma yayipompelu* yikwawu kulonda niyikalakeli enu.+ 9 Ilaña, hinadiña nanenu nawa hinadiña mukukaankila, hinekalilihu chiteli kudi muntu hela wumuku, muloña anakwetu afumini kuMasidoniya anyinkeli yuma yejima yinakaankilili.+ Chalala, muyuma yejima hinakeñeleña kwikala chiteli kudi enuku nawa nukutwalekahu kubula kwikala chiteli kudi enu.+ 10 Chineli chalala chaKristu chidi mudi ami, nakaleka wanyi iku kudisamba kunadisambilaña+ mumaluña amuAkaya. 11 Muloñadi? Muloña hinayikeñaku? Nzambi weluka nindi nayikeña.

12 Ilaña yuma yinnakukoña, nukutwalekahu kuyikoña+ kulonda antu adifwikijaña neyi hiyapostolu abuli hakudisambila nihakuhoshela nawu mudimu wutwazataña dimudimu wazatañawu. 13 Muloña antu amuchidiwu hiyapostolu akutwamba, hiyakakukalakala akudimbana, adifwikijaña neyi hiyapostolu aKristu.+ 14 Chumichi hichakuhayamaku, muloña Satana yomweni wadifwikijaña neyi hikañelu kachejeji.+ 15 Dichi chakuhayamisha wanyi neyi akakukalakala indi niwena atwalekahu kudifwikija neyi hiyakakukalakala akuloña. Ilaña kukuma kwawu kwakashindamena hanyidimu yawu.+

16 Inakuhosha cheñi nami: Bayi kwikala muntu wukutoñojoka nindi hinikweti maanaku. Ilaña neyi mukutoñojoka mwenomu, komana ñiitejenu neyi muntu wabula maana kulonda ninami nawa nidisambi chantesha. 17 Awa mazu inukuhosha, hinnakulondela chahoshaña Mwantaku, ilaña inakuhosha neyi chinateli kuhosha muntu wabula maana, nakudisamba nikudikuhwelela yomweni. 18 Chineli amavulu anakudisamba kwesekeja namwaya mujimba wawuntu,* ninami nukudisamba. 19 Chineli enu “mukweti maana nankashi,” mwazañalalaña nakwiteja antu abula maana. 20 Kafwampi, mwetejaña muntu wejima wayikwataña wuduñu, wejima wabuwaña maheta enu, wejima wahukulaña yuma yimukweti, wejima waditoheshaña hadi enu niwejima wayetaña kumesu.

21 Nahoshi mwenimu kulonda tudisawishi etu aweni, muloña chikumwekana neyi tunakoñi mwenimu muloña wakuzeyazeya kwetu.

Ilaña neyi antu amakwawu amwekesha kuhamuka, ninami nukumwekesha kuhamuka, inakuhosha neyi muntu wabula maana. 22 Komana hiyaHeberu tahindi? Ninami nidi kaHeberu.+ Komana hiyaIsarela tahindi? Ninami nidi kaIsarela. Komana hiyanyana* kaAbarahama tahindi? Ninami nidi mwana kaAbarahama.+ 23 Komana hiyakakukalakala aKristu tahindi? Inakwakula neyi muntu wazaluka, ami nayibadika wejima wawu: Nazati nyidimu yayivulu,+ anankasi kakavulu mukaleya,+ anañeti kakavulu nawa kakavulu kwashalileña hanti nakufwa.+ 24 Mapampa atanu, añeteli yikoti 40 kudi aYudeya kufumishaku chimu,+ 25 añeteli mapampa asatu natubama,+ añasili malola kamu,+ mapampa asatu maatu asatu ashiyashana inakandaminimu akisikili,+ najiñilili hakaluñalwiji mwaana niwufuku; 26 kakavulu nadiña hawenyi, nahitileña muwubanji wahatuloña, akeñeleña kunjaha kudi atupondu, akeñeleña kunjaha kudi antu jami,+ akeñeleña kunjaha kudi nyuza,+ nahitileña muwubanji mumusumba,+ muwubanji mwisaña, muwubanji hakaluñalwiji, akeñeleña kunjaha kudi anakwami akutwamba, 27 mukuzata nyidimu yakola nimukukabakana, mukubula kukaama kakavulu,+ munzala nimumpwila,+ mukubula yakuda yayivulu,+ mumpinji yachishika nimuwuvu.*

28 Kubombela hayuma yejimiyi, kudi nawa chuma chikwawu chankabishaña* hefuku-hefuku: chumichi hikwakamena yipompelu yejima.+ 29 Hinyi wunazeyi kubadika chinnazeyi ami? Hinyi wunahukani chakadi ami kutiya kutama?

30 Neyi nukudisamba, nukudisambila hayuma yamwekeshaña kuzeyazeya kwami. 31 Nzambi nawa Tata yaMwanta Yesu, Owu atela kulemeshañawu haya nyaaka nanyaaka, neluki nindi inakutwamba wanyi. 32 MuDamakasa, nguvulu wamwanta Aretasi wahembeleña musumba wawaDamakasa kulonda ankwati, 33 ilaña anshili muchimpaaya* nakuñidishila muwindu* yambañu yamusumba+ nakunzenzumwina heshina, nawa napulukili mumakasa indi.

12 Natela kudisamba, dichi nukuhosha hayimwenu yakuhayamisha+ yammwekesheleliyi Mwanta+ ninsañu yanyinkeliyi hela chakwila kwila mwenimu kukunkwasha wanyi. 2 Neluka muntu wadikunda naKristu owu ahukwiliwu nakumutwala mwiwulu damuchisatu yaaka 14 yinahitihu, kwiji dinu amuhukwilili mumujimba, indi kwiji mumujimba wanyi, neluki wanyi; Nzambi diwuneluki. 3 Mwamweni, namwiluka iwu muntu—kwiji dinu amuhukwilili mumujimba, indi kwiji mumujimba wanyi, neluki wanyi; Nzambi diwuneluki— 4 ahukwiliwu nakumutwala muparadisa nawa watiyili mazu akukañanya kuhosha nawa abula kwitejawu muntu kuhosha. 5 Nukudisambila hadi muntu wamuchidiwu, ilaña hinukudisambila hadi ami aweniku, chiña hohu mukuzeyazeya kwami. 6 Hela chakwila inakukeña kudisamba, hinukwikala muntu wabula maanaku, muloña nukuhosha chalala. Ilaña natondolweli kwila mwenimu kulonda kubuli kwikala muntu hela wumu wukunlemesha nankashi kubadika yuma yamonañayi mudi ami hela yatiyañayi kudi ami, 7 muloña wayuma yabadika yammwekesheleliwu.

Hakwila nibuli kuditohesha chikupu, anshili mwiña mumujimba,+ kañelu kaSatana kulonda añeteña jimbañala kuchiina nakenda kaditohesha chikupu. 8 Namulembeleli Mwanta mapampa asatu nami, iwu mwiña wunfumi. 9 Ilaña yena wanlejeli nindi: “Luwi lwami lwasweja lunakuwanini, muloña mukuzeyazeya kweyi dimunakulumbulukila ñovu jami.”+ Dichi, nukuzañalala chikupu kudisambila mukuzeyazeya kwami kulonda ñovu jaKristu jitwalekihu mudi ami neyi itenti. 10 Dichi natiyaña kuwaha mukuzeyazeya, mumatuka, mumpinji yakukaankila, mumakabisha nimukukala kukoola Kristu. Muloña neyi nazeyi, dihinekalaña nañovu.+

11 Nekali wakadi maana. Yenu munankojeji niikali ñana, muloña yenu mwateleleli kunhameka. Muloña apostolu enu imwamonaña nenu abadika kulema, hiyambadikili muchuma hela chimuku, hela chakwila nidi wamukunkulwayi.+ 12 Eñañi, nadimwekesheli kudi enu nami nidi kapostolu kuhitila mukuumika kwami,+ muyinjikijilu, muyihayamisha* nimunyidimu yañovu.+ 13 Chuma chaletesheli enu mwaambuki nayipompelu yikwawu, chidi chakwila nawu ami nekalili chiteli kudi enu wanyi.+ Mwani ñanakenenuku hanichi chiluwa.

14 Tiyenu! Aka dikapampa kamuchisatu kinnakwinza kudi enu nawa nukwikala chiteli kudi enu wanyi. Muloña ami hinnakukeña yuma yenuku,+ ilaña inakukeña enu; muloña anyana+ hiyatela kuhembela anvwali jawu yumaku, ilaña anvwali diwu atela kuhembela anyanawu yuma. 15 Muloña, ami nakahana yuma yami yejima namuzañalu nikudihana ami aweni kukoola enu.*+ Neyi chakwila ami nayikeña enu nankashi, komana enu mwatela kunkeña ami chantesha? 16 Hela chochu, ami nekalilihu chiteli kudi enu wanyi.+ Ilaña, mwahoshaña nenu ami “nadiña wababala” nawa nenu nayidimbili “kuhitila mukuzatisha tufuta.” 17 Komana ami nayidiilili yuma yenu kuhitila mudi antu inayitemesheleli tahindi? 18 Namukolesheli Titusa kwinza kudi enu nawa namutemesheli hamu namanakwetu. Komana Titusa wayidiililihu yuma yenu tahindi?+ Komana hitwadiña nayitoñojoka yoyimuku, tahindi? Nawa hitwelileña yuma yoyimuku, tahindi?

19 Komana mpinji yejimiyi mwadiña nakutoñojoka nenu tunakudihakwilaku etu aweni hanyiloña yimunakutwinka tahindi? Tunakuhosha kumesu aNzambi nanochu chitwadikunda naKristu. Ilaña enu akwetu itwakeña, yuma yejima yitwakoñaña twayikoñaña kulonda yiyituñi enu. 20 Muloña inakutiya woma nami hadaha chinakashika oku, yilwilu yenu yakaambuka nanoyu yinakakeña, nawa yilwilu yami yakaambuka nanoyu yimwakakeña, ilaña, hekwawu nakawana kudi yikonkojola, ichima, kuzuwa, kudaambola, matuñu, tushawushawu, kudinka wanta nimapumba. 21 Hamwaha chinakenza cheñi, Nzambi yami wakantiyisha nsonyi hamesu enu, nawa nakenda kadila antu amavulu akoñeli nshidi kunyima anabuli kubalumuka munyichima nakuleka yilwilu yawu yawuzondu, wuvumbi* niyilwilu yawu yawukapwa nsonyi* yakoñeleñawu.

13 Aka dikapampa kamuchisatu kinnakwinza kudi enu. “Muloña wejima akuwusompa hohu neyi awushimuna* kudi ayinsahu ayedi hela asatu.”+ 2 Hela chakwila nidi nanenu wanyi, chidi neyi nidi nanenu kamuchiyedi, nawa inakusoñamishila chadimu antu akoñeli nshidi kunyima niantu ejima nami, neyi nenzi cheñi nakayileka wanyi, 3 chineli munakukeña kwiluka neyi Kristu owu wabula kuzeya kudi enu ilaña wakola kudi enu, chalala nakuhoshela mudi ami. 4 Mwamweni, amujahilili hamutondu muloña wakuzeya, ilaña ichi wamumi muloña wañovu jaNzambi.+ Chalala, ninetu twazeyela hamu nayena, ilaña twakashakama hamu nayena+ muloña wañovu jaNzambi jinakuzata mudi enu.+

5 Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.+ Indi kwiji, mweluka wanyi nenu Yesu Kristu wadikunda nanenu? Chiña hohu neyi anayikaani. 6 Nakuhweleli chikupu nami mukwiluka nenu etu hiyatukaanaku.

7 Ichi tunakulomba kudi Nzambi netu mubuli kukoña chuma chatama, bayi neyi tunalondi netu atumoneña nawu atwitejaku, ilaña netu mwili yuma yayiwahi, hela chakwila tunateli kumwekana neyi hiyatwitejaku. 8 Muloña hitunateli kwila chuma chinateli kukañesha chalalaku, chiña hohu chinateli kukwasha chalala. 9 Twazañalalaña chikupu mpinji yejima neyi enu mwikala nañovu ilaña etu tuzeya. Nawa ichi dichuma chitunakulomba netu, mwololi cheñi yitoñojoka yenu. 10 Dichinaleteshi nisoneki iyi yuma hela chakwila nidi kwakulehi nanenu, kulonda neyi nenzi kudi enu, nakabuli kuyizuwila kuzatisha wuswa wanyinkayi Mwanta+ wakuyikolesha, bayi wakuyizeyeshaku.

11 Nkumininaku, enu anakwetu, twalekenuhu nakuzañalala, kwiteja kuyolola, kuyikundeja,+ kwikala nayitoñojoka yoyimu+ nikushakama mukuwunda;+ Nzambi wakukeña nawa wakuwunda+ wukwikalaña nanenu. 12 Mudimushi wumu namukwawu nakudifufwa kwajila. 13 Akakujila ejima anayimushi.

14 Luwi lwasweja lwaMwanta wetu Yesu Kristu nikukeña kwaNzambi nispiritu yajila yitwekala nayu wejima wetu yiikali nanenu ejima.