KUDI AÑALIJA

1 Ami Pawulu, kapostolu, hiyantondeli kudi antu hela kuhitila mudi muntuku, ilaña antondeli kudi Yesu Kristu+ niNzambi Tata yetu,+ wamusañwili mudi afu, 2 ami nianakwami ejima inidi nawu hamu, tunasonekeli yipompelu yamuÑalija:

3 Luwi lwasweja nikuwunda kwafumaña kudi Tata yetu Nzambi nikudi Mwanta Yesu Kristu kwiikali nanenu. 4 Wadihanini yomweni kukoola nshidi jetu+ kulonda yatukuuli kunshakaminu yamakonu yatama*+ kwesekeja nankeñelu yaNzambi yetu nawa Tata,+ 5 kudi yena kwiikali kulema haya nyaaka nanyaaka. Ameni.

6 Nahayami chimunanyakali kumushiya* Owu wayitambikili naluwi lwasweja lwaKristu nanochu chimunakulondela nsañu yayiwahi yacheñi.+ 7 Bayi neyi kudi nsañu yikwawu yayiwahiku; ilaña kudi antu anakuyiletela enu+ kukala kulonda aluwañeshi nsañu yayiwahi yahosha hadi Kristu. 8 Hela chochu, neyi etu hela kañelu wukufuma mwiwulu nakuyileja nsañu yayiwahi yinaambuki nayitwayishimwinini, ekali washiñewa. 9 Neyi chitunahoshi dehi, inakuhosha cheñi nami, Muntu wejima wunakuyishimwina nsañu yayiwahi yinaambuki nayimwatambwilili, ekali washiñewa.

10 Komana inakukeña kushinjila antu tahindi Nzambi? Indi kwiji inakukeña kutiyisha antu kuwaha? Neyi nachidiña kutiyisha antu kuwaha, hinadi kwikala nduñu yaKristuku. 11 Enu anakwami, inakukeña mwiluki nenu, nsañu yayiwahi yinayishimwinini hiyafumini kudi antuku;+ 12 nawa hinayitambwili kudi muntu hela kunlejayuku, ilaña kuhitila muyuma yammwekesheleliwu kudi Yesu Kristu.

13 Chakadi nikujina, mwatiyili yilwilu yinadiña nayu mukwitiya kwawaYudeya+ nenu, natwalekelihu* nakukabisha chikupu chipompelu chaNzambi nikuchikisañana;+ 14 nawa nadiña nakupaminaku chikupu mukwitiya kwawaYudeya kubadika antu amavulu amumuza wetu mutwesekeneneña, muloña nadiña neyena chikupu mutushidikilu twawankakulula jami.+ 15 Ilaña Nzambi wankojejeli kusemuka mwivumu damama yami nawa wantambikili naluwi lwindi lwasweja,+ wamweni nindi chachiwahi 16 kusolola Mwanindi kuhitila mudi ami kulonda nishimwini kunyuza+ nsañu yayiwahi yahosha hadi yena. Hela chochu, hinashikeneni kwihula muntu hela wumuku;* 17 nawa hinayili kuYerusalema kudi antu adiña apostolu henohu ami kandaku, ilaña nayili kuArabiya, kuhiñahu nafuntili kuDamakasa.+

18 Chimwahitili yaaka yisatu, nayili kuYerusalema+ nakuhempula Kefasi*+ nawa nashakamini nindi mafuku 15. 19 Ilaña hinadimwenihu nawapostolu amakwawuku, chiña hohu Yakoba+ mana kwaMwanta. 20 Kutalisha hayuma yinnakuyisonekela, inakuyileja chalala kumesu aNzambi nami, inakutwamba wanyi.

21 Kuhiñahu, nayili mumaluña amuSiriya nimuSilisiya.+ 22 Ilaña hiyañilukili kuyipompelu yamuYudeya yadikundileña naKristuku. 23 Atiyileña hohu nawu: “Muntu watukabishileña kunyima,+ ichi nakushimwina nsañu yayiwahi yayuma yitwakuhwelela yakisañeneñayi kunyima.”+ 24 Dichi atachikili kumulemesha Nzambi muloña wanami.

2 Kufumahu, chimwahitili yaaka 14 nayili cheñi kuYerusalema hamu naBaranaba+ niTitusa.+ 2 Nayili muloña wayuma yammwekesheleliwu, nawa nayilumbulwilili nsañu yayiwahi yinnakushimwina mukachi kanyuza. Hela chochu, antu amweneñawu nawu alema, nayilumbulwilili chumichi kumbadi kulonda abuli kumona nawu natemukileña hela natemukili chamukunkulwayi. 3 Hela tuhu Titusa+ wadiña hamu nanami hiyamukanjikijili kwalamaku,+ hela chakwila wadiña kaGiriki. 4 Ilaña iyi nsañu yekaliliku muloña wawanakwetu akutwamba aleteli iyi nsañu mukuswamujoka,+ owu enjili nakumona kuwunda+ kutwadiluñishaña muloña wakudikunda naKristu Yesu, kulonda atubalumuni chikupu twiikali anduñu.+ 5 Hitwayovwahilili+ hela chanteshaku,* kulonda chalala chansañu yayiwahi chitwalekihu nanenu.

6 Ilaña kutalisha kudi antu amweneñawu nawu alema,+ hela chakwila adiña antu amuchidinyi, hiyambadikiliku, muloña Nzambi hatalaña muntu kumesuku. Wenowu amayala alemesheliwu chikupu hiyandizishilihu chuma chachihaku. 7 Ilaña, chamweniwu nawu anankunjiki mudimu wakushimwina nsañu yayiwahi kudi antu abula kwalama,+ neyi chamukunjikiliwu Petulu mudimu wakushimwina nsañu yayiwahi kudi antu aalama, 8 muloña owu wamwinkeli Petulu ñovu yakwikala kapostolu kudi antu aalama, diyi wanyinkeli ninami ñovu yakwikala kapostolu kudi antu akunyuza,+ 9 nawa chelukiliwu luwi lwasweja lwantiyililiwu,+ aYakoba+ naKefasi* niYowanu amwekeneña kwikala yishimi, atwimushili ami naBaranaba+ nachikasa chachidiilu nakumwekesha nawu twadinuña* hamu, kulonda etu tuyi kunyuza, ilaña wena ayi kudi antu aalama. 10 Atulejeli hohu nawu twanukeña anakwetu atuzweñi, nawa chumichi dichinafwilaña chikupu kwila.+

11 Hela chochu, Kefasi*+ chenjiliyi kuAntiyoki,+ namulejelimu chakadi kumuhita mumbadi, muloña welili chuma chatama.* 12 Muloña amayala amakwawu afumini kudi Yakoba+ henohu kanda ashiki, wadiilileña hamu nawantu akunyuza;+ ilaña chashikiliwu, walekeli nawa wadaambwili nawu muloña watiyili woma antu adiña aalama.+ 13 NiaYudeya ashalilihu niwena adibombeli hamu nindi muniwu wunfwikiji, chakwila niBaranaba niyena wahuñumukili nawunfwikiji wawu. 14 Ilaña chinamweni nami hiyanakwenda mwaya chalala chansañu yayiwahiku,+ namwihwili Kefasi* hamesu awantu ejima nami: “Neyi eyi kaYudeya, wunakushakama neyi antu akunyuza bayi neyi chashakamañawu aYudeyaku, wunateli kushinjila ñahi antu akunyuza kushakama kwesekeja nayaaku yawaYudeya?”+

15 Etu twela kuchisemwa tudi aYudeya, bayi neyi akanshidi akunyuzaku, 16 tweluka netu muntu hiyamutenaña kuloña muloña wanyidimu yanshimbiku, chiña hohu neyi akuhwelela+ mudi Yesu Kristu.+ Dichi tunamukuhweleli Kristu Yesu kulonda atuteni kuloña nanochu chitunamukuhweleli Kristu, bayi nanyidimu yanshimbiku, muloña kwosi muntu* akatenawu kuloña muloña wanyidimu yanshimbiku.+ 17 Neyi etu tunakufwila netu atuteni kuloña kuhitila mudi Kristu, atuwana nawu tudi akanshidi, komana Kristu diyi mukakukoña nshidi tahindi? Inehi! 18 Neyi yuma yinahumwini niyituña cheñi, nukumwekesha nami nidi mukakufumpa nshimbi. 19 Muloña wakwovwahila nshimbi nafwilili munshimbi,+ kulonda niikali wamumi kudi Nzambi. 20 Anampopeli hamutondu hamu naKristu.+ Hiyami inakuhandaku,+ ilaña Kristu wadikunda nanami diyi wunakuhanda. Chalala, chihandilu chinahandaña hayinu mpinji mumujimba wawuntu, nahandaña muloña wakukuhwelela mudi Mwana kaNzambi,+ wankeñeli nawa wadihanini yomweni kukoola ami.+ 21 Hinakaanaña* luwi lwaNzambi lwaswejaku,+ muloña neyi kuloña kwenzaña kuhitila munshimbi, dikwila nawu Kristu wafwili chamukunkulwayi.+

3 Enu aÑalija abula maana! Hinyi wunayiluwañeshi ñana+ henohu ayimwekesheleli Yesu Kristu hatooka iku anamupopeli hamutondu?+ 2 Inakukeña kuyihulaku* ichi chuma chimu nami: Mwatambwilili spiritu yajila nanyidimu yanshimbi tahindi muloña wakukuhwelela yuma yimwatiyili?+ 3 Mwamweni himukweti maanaku? Hakutachika mwendeleña munjila yakuspiritu,* hanu kumakumishilu munakukeña kwenda munjila yakumujimba?*+ 4 Komana mwamweni makabi amavulu chamukunkulwayi? Namoni nami himwakabakeni hohu chamukunkulwayiku. 5 Dichi, owu wayinkaña spiritu nawa wakoñaña nyidimu yañovu+ mukachi kenu, welaña mwenimu muloña wanyidimu yenu yanshimbi tahindi muloña wachikuhwelelu chenu muyuma yimwatiyili? 6 Neyi Abarahama “chamukuhweleleliyi Yehova* nawa amuteneni nawu waloña.”+

7 Chalala mweluka nenu, antu akweti chikuhwelelu diwu anyana kaAbarahama.+ 8 Dichi nsona, yamwekesheleli chadimu nawu Nzambi wakatena antu akunyuza nindi aloña muloña wachikuhwelelu, yashimwinini chadimu nsañu yayiwahi kudi Abarahama nawu: “Nyuza yejima akayikiswila kuhitila mudi eyi.”+ 9 Dichi antu akweti chikuhwelelu anakuyikiswila hamu naAbarahama wadiña nachikuhwelelu.+

10 Ejima ashindamena hanyidimu yanshimbi ashiñewa, muloña chasonekewa nawu: “Muntu wejima wabulaña kwovwahila nikwila yuma yejima yasonekawu mumuvuñilu waNshimbi, washiñewa.”+ 11 Kubombelahu, chakadi nikujina, kwosi akutenawu kuloña kudi Nzambi+ muloña wanshimbiku, muloña “muntu waloña wakahanda muloña wachikuhwelelu.”+ 12 Dichi, Nshimbi hiyashindamena hachikuhweleluku. Ilaña “muntu wejima wahembaña Nshimbi wakahanda muloña wakuyihemba.”+ 13 Kristu watulandili+ nakutukuula+ kwishiñu daNshimbi nanochu chetejeliyi kumushiña chatela etu tushiñewi, muloña chasonekewa nawu: “Washiñewa yowu muntu akukudikawu hamutondu.”+ 14 Chadiña mwenimu kulonda nkisu yaAbarahama yakenzi hanyuza kuhitila mudi Kristu Yesu,+ kulonda tukatambwili spiritu yajila+ yatukaniniwu muloña wachikuhwelelu chetu.

15 Enu anakwami, inakuhosha nachakutalilahu chawuntu nami: Neyi chitiyañenu anachikoleshi, hela tuhu kudi muntu wumu, kwosi watela kuchikasununa hela kubombelaku nsañu yikwawuku. 16 Iyi yikaninu amukanini Abarahama nimwanindi.*+ Nsona hiyahosha nawu, “nikudi anyaneyi,”* neyi kwiji adiña amavuluku. Ilaña, yahosha nawu, “nikudi mwaneyi,”* dikwila nawu wumu hohu, yowu Kristu.+ 17 Kubombelahu, nahoshi nami: Nshimbi yenjili nakwikalaku hanyima yayaaka 430,+ hiyinahimpi chitiyañenu chakasiliyi Nzambi kunyima kulonda yijiyishi chikaninuku. 18 Muloña neyi wuswana washindamena hanshimbi, dikwila nawu hiwashindamena hachikaninuku; ilaña Nzambi mukudikeñela wawuhanini kudi Abarahama kuhitila muchikaninu.+

19 Hanu dinu Nshimbi yekalilaku kwodi? Ayibombeleliku kulonda nshidi yimwekani,+ sampu mwana* akaniniwu muchikaninu nashiki dehi;+ nawa ayihanini kuhitila mudi añelu+ muchikasa chehaku.+ 20 Dichi hikunateli kwikala ihaku neyi hadi hohu muntu wumuku, ilaña Nzambi wudi hohu nkawindi. 21 Komana Nshimbi yadikañaña nayikaninu yaNzambi? Inehi! Muloña neyi ahanini lushimbi lunateli kuhana wumi, dikwila nawu kuloña kwadi kwikalaku nanshimbi. 22 Ilaña Nsona yatwalili yuma yejima mukaleya kanshidi, kulonda chikaninu chashindamena hakumukuhwelela Yesu Kristu, achihani kudi antu akuhwelela.

23 Hela chochu, henohu chikuhwelelu kanda chishiki, atuhembeleña nanshimbi, atutwalileña mukaleya nakuhembelela chikuhwelelu chadiña kwakwihi nakusololawu.+ 24 Dichi Nshimbi yekalili nhembi* yetu ndo-o nichenjiliyi Kristu+ kulonda atuteni kuloña muloña wachikuhwelelu.+ 25 Ilaña chineli chikuhwelelu chinashiki dehi,+ hituchidi cheñi mumakasa anhembiku.*+

26 Kafwampi, wejima wenu mudi anyana kaNzambi+ muloña wachikuhwelelu chenu mudi Kristu Yesu.+ 27 Muloña wejima wenu apapatishiliwu mudi Kristu, mwamuvwala Kristu.+ 28 Kwosi kaYudeya hela kaGirikiku,+ kwosi nduñu hela muntu wasubukaku,+ kwosi iyala hela mumbandaku,+ muloña wejima wenu mudi wumu mukudikunda naKristu Yesu.+ 29 Kubombelahu, neyi mudi antu jaKristu, dikwila nawu mudi anyana* kaAbarahama chikupu,+ answana+ kwesekeja nachikaninu.+

4 Dichi inakuhosha nami nswana neyi wuchidi mwana wanyanya, haambukaña nanduñu hela hantiku, hela chakwila diyi mwanta wayuma yejima, 2 ilaña amuyuulaña kudi atupitawu nikudi añamba kushika niifuku datoñolawu kudi tata yindi. 3 Chochimu ninetu, hitwachidiña anyana anyanya, twadiña muwuduñu wayuma yawansi yamukaayi.+ 4 Ilaña mpinji chiyashikilili chikupu, Nzambi watemesheli Mwanindi avweliwu kudi mumbanda+ nawa wadiña munshimbi,+ 5 kulonda akuuli antu adi munshimbi kuhitila mukuyilanda,+ hakwila atwiteji twiikali anyana.+

6 Chineli mudi anyana, Nzambi natemeshi spiritu+ yaMwanindi munyichima yetu,+ nawa yabidikaña nawu: “Aba,* Tata!”+ 7 Dichi wejima wenu muntu-himuntu hachidi nduñuku, ilaña himwana; nawa neyi himwana, dikwila nawu hinswana nawa kuhitila mudi Nzambi.+

8 Hela chochu, hampinji yimwabulili kumwiluka Nzambi, mwadiña anduñu kudi anzambi akutwamba. 9 Ilaña ichi, chineli munamwiluki dehi Nzambi, hela netu chinayilukiwu dehi kudi Nzambi, muloñadi chimunakufuntila kuyuma yazeya+ nikuyuma yawansi yamukunkulwayi nakukeña kwikala cheñi anduñu ayumiyi?+ 10 Munakuhemba chikupu mafuku nitukweji+ niyilaaka niyaaka. 11 Inakwakamena nami hadaha nakisañani hohu ñovu jami hadi enu chamukunkulwayi.

12 Enu anakwami, nayilembeleli, ikalenu neyi ami, muloña ninami nadiña neyi enu.+ Himwankoñelihu katamaku. 13 Ilaña mweluka nenu chikatu chami dichanletesheli niwani njila yakuyishimwina enu nsañu yayiwahi katachi. 14 Hela chakwila chikatu chami chadiña hikweseka kudi enu, himwansawili hela kummona neyi chuma chawuzonduku;* ilaña mwantambwilili neyi kañelu kaNzambi, neyi Kristu Yesu. 15 Indi muzañalu wumwadiña nawu wunayi kudihi? Muloña inakuyileja chalala nami, neyi chadi kutwesheka, mutenowu mwadi kufumisha mesu enu nakuyinyinkawu.+ 16 Dichi dinu, komana nekali chilumbu chenu muloña nayileji chalala? 17 Anakufwila chikupu kuyikokola enu, ilaña bayi neyi nankeñelu yayiwahiku; anakukeña kuyifumisha kudi ami kulonda mufwileña kuyilondela wena. 18 Hela chochu, mpinji yejima chachiwahi muntu kufwila chikupu kuyikokola nankeñelu yayiwahi nawa bayi neyi hinidi hamu nanenu hohuku, 19 enu anyana anyanya,+ innakutiyila cheñi nyisoñu yakuvwala sampu munamwekeshi yilwilu yaKristu. 20 Inakutoña nami kachi nadiña hamu nanenu katatakichi kulonda nihoshi nenu munjila yaambukaku, muloña neluki wanyi chinatela kuyila enu.

21 Nlejenu, enu munakukeña kwikala munshimbi, Komana himwatiyaña Nshimbiku? 22 Chakutalilahu, chasonekewa nawu Abarahama wadiña nawanyana awamayala ayedi, wumu wamuvweli nañamba wamumbanda,+ mukwawu namumbanda wasubuka.+ 23 Mwana wavweliyi nañamba wamumbanda, wavwalikili neyi chavwalikaña antu ejima,*+ ilaña wavweliyi namumbanda wasubuka, wavwalikili kwesekeja nachikaninu.+ 24 Iyi yuma hichinjikijilu chayuma yikamwekana; muloña awa ambanda ayedi emenañaku yitiyañenu yiyedi, chimu chakuMpidi yaSinayi,+ chavwalaña anyana awuduñu, nawa diyi Haga. 25 Dichi Haga hiSinayi,+ mpidi yamuArabiya nawa makonu wemenañaku Yerusalema, muloña wudi muwuduñu hamu nawanyanindi. 26 Ilaña Yerusalema wamwiwulu wasubuka, nawa diyi mama yetu.

27 Muloña chasonekewa nawu: “Zañalalaku eyi mumbanda nshinta wabulaña kuvwala anyana; eyi mumbanda wabulahu dehi kutiya nyisoñu yakuvwala, bulaku nyiñula* namuzañalu; muloña anyana kamumbanda ashiyawu kudi iyala amavulu kubadika amumbanda wukweti iyala.”+ 28 Dichi enu anakwami, mudi anyana achikaninu neyi chadiñayi Isaka.+ 29 Ilaña neyi chichadiña namwana wavwalikili neyi chavwalikaña antu ejima,* watachikili kukabisha mwana wavwalikili nañovu yaspiritu,+ dichichidi nimakonu.+ 30 Hela chochu, nsona yahosha nawudi? Nawu, “Muhañi ñamba wamumbanda nimwanindi, muloña mwana kañamba wamumbanda hakekala nswana namwana kamumbanda wasubukaku.” + 31 Dichi enu anakwami, tudi anyana kaniwu mumbanda wasubuka bayi anyana kaniwu ñamba wamumbandaku.

5 Kristu watusubwili kulonda twiikali naniku kusubuka. Dichi, imanenu mbe-e+ nawa bayi mudikasila cheñi mumpaanda yawuduñuku.+

2 Tiyenu! Ami Pawulu inakuyileja nami, neyi mukwalama, himwakamwenamu yuma yayiwahi mudi Kristuku.+ 3 Inakuleja cheñi iyala wejima akwalamishawu nami, watela kwovwahila Nshimbi jejima.+ 4 Enu munakufwila nenu ayiteni kuloña muloña wakwovwahila nshimbi, munadaambuli kudi Kristu;+ munafumi kuluwi lwindi lwasweja. 5 Ilaña etu, muloña waspiritu tunakutalila chikupu kuchiñeja kwakwikala aloña muloña wachikuhwelelu. 6 Kudi antu adikunda naKristu Yesu, kwalama hela kubula kwalama kwalema wanyi,+ ilaña chikuhwelelu chazatikaña nakukeña, dichalema.

7 Mwatemukileña chiwahi.+ Hanu dinu hinyi wayikañesheli kutwalekahu kwovwahila chalala? 8 Iku kushinjila hikunafumi kudi Owu wunakuyitambikaku. 9 Iluñi dantesha davuvumwishaña chikanka chejima.+ 10 Nakuhweleli chikupu nami, enu mwadikunda naMwanta+ himwakatoñojoka mwacheñiku; ilaña muntu wunakuyikabisha,+ hela himuntu wamuchidinyi, akamusompesha wunsompeshi wamutelela. 11 Enu anakwami, neyi nichidi kushimwina nsañu yakwalama, hanu dinu muloñadi chiyanatwalekelihu kunkabisha? Neyi chidi muniyi njila, dikwila nawu chuma chakuhukesha chamutondu wakuyandishila*+ anachifumishihu. 12 Chikuwaha neyi amayala anakuyileja nawu mwalami, adalamishi* awenawu.

13 Enu anakwami, ayitambikili kulonda mwiikali asubuka; ilaña bayi muzatisha iku kusubuka nakufwila yuma yafwilaña mujimbaku,+ ilaña dikalakelenuña wumu namukwawu muloña wakukeña.+ 14 Muloña Nshimbi yejima yinashikijeweli* munilu lushimbi lwakwila nawu: “Watela kukeña mukwenu neyi chiwadikeña eyi aweni.”+ 15 Dichi, neyi mutwalekahu nakudisumona nikudiida wumu namukwawu,+ babalenu kulonda mubuli kudijiyisha wumu namukwawu.+

16 Ilaña inakuyileja nami, Endenuña naspiritu,+ nawa himukukoñaña yuma yafwilaña mujimbaku.+ 17 Muloña yuma yafwilaña mujimba yaambuka nayuma yafwilaña spiritu, spiritu niyena yaambuka namujimba; nawa yumiyi hiyatiyañanañaku, kulonda mubuli kwila yuma yimunakukeña kwila.+ 18 Kubombelahu, neyi anakuyilombola kudi spiritu, dikwila nawu himudi munshimbiku.

19 Dichi nyidimu yakumujimba yamwekanaña hatooka, nawa diyeniyi, wuvumbi,*+ wuzondu, yilwilu yawukapwa nsonyi,*+ 20  kudifukula kudi ankishi, kupesha,*+ kuhelañana, yikonkojola, ichima, kuzuwa, kubula kutiyañana, kudaambola, chaambu, 21 lwisu, kusheta,+ yidika yatama,* niyuma yafwana iyi.+ Inakuyisoñamishila chadimu hayumiyi neyi chinayisoñamishili dehi nami, antu akoñaña yuma yamuchidiwu hiyamba kaswana Wanta waNzambiku.+

22 Ilaña nyikaabu yaspiritu hikukeña, muzañalu, kuwunda, kudiwunjika, luwi, kuwaha,+ chikuhwelelu, 23 kwovwaha, kudiyuula.+ Kwosi lushimbi lwalekeshaña yumiyiku. 24 Kubombelahu, antu jaKristu Yesu apopela mujimba hamutondu hamu nayuma yakeñaña mujimba niyafwilañayi.+

25 Neyi tunakuhanda nawunlomboli waspiritu, dichi nawa twendeña chiwahi nawunlomboli waspiritu.+ 26 Bayi twikalaña akakudivwimba kwamukunkulwayi,+ kusañumuna kudibecha+ nikuditiyila lwisuku.

6 Enu anakwami, hela tuhu muntu nafuukuli kukoña chuma chatama henohu yomweni kanda eluki, enu mwapama kuspiritu fwilenu kumwolola muntu wamuchidowu naspiritu yakwovwaha.+ Ilaña babalenuña,+ kuchiina ninenu akenda kayeseka.+ 2 Disendelenuñaku yiteli wumu namukwawu,+ nawa neyi mwila mwenimu, mukushikija lushimbi lwaKristu.+ 3 Muloña neyi muntu nakutoñojoka nindi walema henohu wamukunkulwayi,+ nakudidimba yomweni. 4 Ilaña muntu-himuntu ashinshiki yilwilu yindi yomweni,+ kuhiñahu dinu azañaleli muyuma yindi yomweni, bayi kudesekeja namukwawuku.+ 5 Muloña muntu-himuntu wakadisendela chisenda chindi yomweni.*+

6 Kubombelahu, muntu wejima anakulejawu mazu,* amwinkihu yuma yejima yayiwahi wunakumuleja oyu ntañishilu.*+

7 Bayi ayiluwañeshaku: Nzambi hiyamusupishañaku. Muloña chuma chinakukuwayi muntu, dichakamunayi;+ 8 muloña muntu wunakukuwa kumujimba, wakamuna kutoka kumujimba windi, ilaña muntu wunakukuwa kuspiritu, wakamuna wumi wahaya nyaaka kuspiritu.+ 9 Dichi, bayi tuleka kwila yuma yayiwahiku, muloña mumpinji yatelela tukamuna neyi tubula kuzeya.*+ 10 Neyi twikala nampinji yakwila mwenimu,* dichi twilileña antu ejima yuma yayiwahi, sweje-e dinu kudi akwetu akakwitiya.

11 Talenu iwu mukanda wukweti nsona jamaneni winnayisonekeli nachikasa chami.

12 Ejima akeñaña kudimwekesha nawu ekala chachiwahi kumujimba,* diwu afwilaña kuyikanjikija nawu mwalami, elaña mwenimu kuchiina kuyikabisha muloña wamutondu wakuyandishila* waKristu. 13 Muloña niantu anakwalama hiyahembaña Nshimbiku,+ ilaña anakukeña nawu enu mwalami kulonda adisambileña hanyijimba yenu. 14 Ilaña ami hinatela kudisambaku, chiña kudisambila hamutondu wakuyandishila* waMwanta wetu Yesu Kristu,+ muloña kuhitila mudi yena kaayi anakijahi* muloña wanami, ninami muloña wakaayi. 15 Muloña kwalama nikubula kwalama hikwalemaku,+ ilaña chalema hikuleñewa chachiha.+ 16 Hakwila antu ejima endaña mukuloña kwesekeja nanilu lushimbi lwayilwilu, kuwunda kwiikali hadi wena niluwi, eñañi, hadi Isarela waNzambi.+

17 Kufuma dalelu, bayi kwikala muntu wukunletela kukalaku, muloña nidi nayibata hamujimba yinakumwekesha nawu nidi nduñu yaYesu.+

18 Enu anakwami, luwi lwasweja lwaMwanta wetu Yesu Kristu lwiikali naspiritu yimwamwekeshaña. Ameni.