KUDI AEFWESESA

1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, kudi enu akakujila adi muEfwesesa+ nawa ashinshika adikunda naKristu Yesu:

2 Luwi lwasweja nikuwunda kwafumaña kudi Tata yetu Nzambi nikudi Mwanta Yesu Kristu kwiikali nanenu.

3 Nzambi nawa Tata yaMwanta wetu Yesu Kristu ashimekewi, muloña natukiswili nkisu jakuspiritu jejima mumaluña amwiwulu nanochu chitunakudikunda naKristu,+ 4 neyi chatutondeliyi kulonda tudikundeña nindi* henohu kanda aali chikuku chakaayi, kulonda twiikali ajila nawa akadi ihuji+ kumesu indi mukukeña. 5 Muloña yena watutondeleli chadimu+ kulonda twiikali anyanindi kuhitila mudi Yesu Kristu,+ kwesekeja namwatiyiliyi kuwaha ninamwaya nkeñelu yindi,+ 6 kulonda amushimeki muloña wakulema kwaluwi lwindi lwasweja+ lwatutiyililiyi chakudikeñela kuhitila mudi mwanindi akeñayi.+ 7 Kuhitila mudi yena, atukuula nefutu danyiloña damashi ayenowu,+ dikwila nawu kutwanakena nshidi jetu+ kwesekeja nakuvula kwaluwi lwindi lwasweja.

8 Watuvulishilili ilu luwi lwasweja hamu namaana ejima nikwiluka kwejima,* 9 nanochu chatulejeliyi yuma yajila+ yakujinda yankeñelu yindi. Kwesekeja nanomu mwatiyililiyi kuwaha, wafuukwilili chadimu 10 njila yakuyuulilamu yuma* yakashika hampinji jatoñolawu dehi, yakupompesha yuma yejima mudi Kristu, yuma yamumawulu niyuma yahamaseki.+ Eña, mudi yena 11 itwadikunda nindi nawa mwatwilishililiwu kwikala answana,+ nanochu chatutondeleliwu chadimu kwesekeja nakufuukula kwanowu wazataña yuma yejima kwesekeja nankeñelu yindi, 12 kulonda amushimeki nikumulemeshela mudi etu twasambilili kukuhwelela mudi Kristu. 13 Ilaña ninenu mwamukuhweleleli chelili mutiyi mazu achalala, nsañu yayiwahi yawamwinu wenu. Chimwakuhweleleli, ayilamikili+ kuhitila mudi yena naspiritu yajila yakaniniwu, 14 yekala chinjikijilu chawuswana wetu+ wakumbidi,* kulonda Nzambi akakuuli+ antu jindi* nefutu danyiloña+ kulonda akamushimeki nikumulemesha.

15 Chineli natiyi chikuhwelelu chenu chimukweti mudi Mwanta Yesu nikukeña kumwamwekeshelaña akakujila ejima, dichaleteshaña ninami 16 nibuleña kuleka kuyisakililaku. Nayitenaña mukulomba kwami mpinji yejima 17 nami, Nzambi yaMwanta wetu Yesu Kristu, Tata yakulema, ayinki spiritu yamaana niyakwiluka chikupu yuma yamwekeshañayi.+ 18 Natoneshi mesu amuchima wenu, kulonda mwiluki kuchiñeja kwayitambikililiyi nikulema kwasweja kwayihembelayi akakujila+ kwikala wuswana wawu, 19 nichabadika kutoha ñovu jindi jatumwekeshelañayi etu akakwitiya.+ Kutoha kwayu kwamwekenaña mumudimu wañovu jindi jabadika, 20 wazatiliyi hampinji yamusañwiliyi Kristu mudi afu nikumushakamisha kuchikasa chindi chachidiilu+ mumaluña amwiwulu, 21 abadika chikupu jinfulumendi jejima, wuswa, ñovu, mawanta antuumba nimajina ejima atenañawu,+ bayi neyi munshakaminu yamakonu* hohuku, ilaña nimunoyu yinakwinza. 22 Cheñi wovwahishili yuma yejima mwishina danyendu+ yindi nawa wamwilishili kwikala mutu wayuma yejima yakundama kuchipompelu,+ 23 chekala mujimba windi,+ chenzala nayena wenzeshaña yuma yejima mwejima.

2 Kubombelahu, Nzambi wayinkeli wumi hela chakwila mwadiña afu kuyuma yatama yimwakoñeleña nimunshidi,+ 2 mumwendeleña mpinji yimu kwesekeja nanshakaminu yamakonu yamukanu kaayi,+ nanochu chakeñañayi nyuuli wawuswa wampepela,+ spiritu+ yinakuzatika mudi anyana kakudikaña. 3 Mpinji yitwadiña mukachi kawu, wejima wetu twelileña yuma kwesekeja nakufwila kwamujimba wetu,+ nakwila munakukeña mujimba niyitoñojoka yetu,+ nawa kufuma tuhu hakuvwalika twadiña anyana kakuzuwa+ neyi chekala antu amakwawu. 4 Ilaña Nzambi, chineli wasweja luwi nankashi,+ muloña wakukeña kwindi kwabadika kwatukeñeliyi,+ 5 watwinkeli wumi hamu naKristu nihampinji yitwadiña afu kuyuma yatama yitwakoñeleña,+ ilaña enu nayamwini muloña waluwi lwindi lwasweja. 6 Cheñi nawa, watusañwili hamu nikutushakamisha hamu naKristu Yesu+ mumaluña amwiwulu, 7 kulonda munshakaminu yinakwinza* yakamwekeshi kuvula kwaluwi lwindi lwasweja kuhitila muwushona windi watumwekeshelañayi etu twadikunda naKristu Yesu.

8 Muloña wanilu luwi lwasweja anayamwini kuhitila muchikuhwelelu,+ bayi neyi hamuloña wakukeña kwenuku; ilaña hichawaana chaNzambi. 9 Inehi, bayi muloña wanyidimu yenuku,+ kulonda kubuli kwikala muntu wukudisamba. 10 Tudi mudimu wamakasa aNzambi,* nawa atuleñeli+ tudikundeña naKristu Yesu+ kulonda tukalakaleña nyidimu yayiwahi, yafuukwililiyi Nzambi chadimu nindi twendeñamu.

11 Dichi, anukenuña nenu mpinji yimu, enu antu akunyuza avwalika kumujimba, ayiteneneña nawu “abula kwalama” kudi antu atenañawu nawu “aalama,” owu aalamishawu kumujimba namakasa awantu. 12 Hayina mpinji himwamwilukili Kristuku, mwadiña aambuka namuza waIsarela, himwadiña muchitiyañenu chachikaninuku;+ himwadiña nakuchiñejaku nawa himwamwilukili Nzambi mukaayiku.+ 13 Ilaña ichi, muloña wakudikunda naKristu Yesu, enu mwadiña kwakulehi nankashi ichi anayiswiji dehi kwakwihi kuzatisha mashi aKristu. 14 Muloña yena diyi kuwunda kwetu,+ owu wabombeli mazanvu ayedi+ ekali dimu nawa wahumwini mbañu yadiña hakachi kawu.+ 15 Kuhitila mumujimba windi, wafumishilihu nkunyi, Nshimbi mwadiña mazu niyijila yakulondela, kulonda abombi mazanvu ayedi adikunda nayena kwikala muntu wumu wamuha+ nikuleta kuwunda, 16 nikukundamisha chikupu mazanvu ayedi awantu kudi Nzambi mumujimba wumu namutondu wakuyandishila,*+ muloña wakufwa kwindi,+ wafumishilihu nkunyi. 17 Nawa wenjili nakushimwina nsañu yayiwahi yakuwunda kudi enu mwadiña kwakulehi, nikuwunda kudi owu adiña mukamwihi, 18 muloña kuhitila mudi yena, etu mazanvu ayedi awantu, twakasunuka kumusolomoka Tata naspiritu yimu.

19 Dichi himuchidi cheñi antu acheñi hela añiinzaku,+ ilaña mudi enimbu+ hamu nawakakujila nawa mudi amwitala daNzambi,+ 20 nawa enu anayituñi hachikuku chawapostolu niatuprofwetu,+ hakwila Kristu Yesu diyi ilola damwiwombu dachikuku.+ 21 Muloña wakudikunda nayena itala dejima, anakudinuña hamu,+ dinakukula nakwikala tembeli yajila yaYehova.*+ 22 Muloña wakudikunda nayena, ninenu anakuyituñila hamu kulonda mwiikali iluña mwakushakama Nzambi naspiritu.+

3 Muloña wachumichi, ami Pawulu, kayili*+ kaKristu Yesu kukoola enu, antu akunyuza, 2 neyi chalala, munatiyi nsañu yawuñamba+ wanyinkeliyi Nzambi muloña waluwi lwindi lwasweja lwantiyililiyi kukoola enu, 3 yakwila nawu yuma yajila yakujinda ayimmwekesheleli, neyi chinayisonekeleli kunyima mumazu antesha. 4 Dichi neyi mutaña iyi nsañu, mukwiluka chinatiyisha chikupu yuma yajila yakujinda+ yaKristu. 5 Mumakiñu amakwawu, iyi nsañu yakujinda ayisolweleli wanyi anyana kawantu neyi chinayisolweliwu apostolu niatuprofwetu indi ajila naspiritu,+ 6 yakwila nawu mukudikunda naKristu Yesu nimunsañu yayiwahi, antu akunyuza atela kwikala answana hamu nanetu, akwetu mutwekalila yiidi yimu yamujimba+ nawa mutwakatambwila chikaninu. 7 Nekalili mukakukalakala waniyi nsañu kwesekeja nachawaana chaluwi lwaNzambi lwasweja lwanyinkeliyi kuhitila muñovu jindi.+

8 Ami wakehelamu nankashi hakachi kawakakujila+ ejima asweja kukeha, antiyilili luwi lwasweja+ kulonda nishimwini nsañu yayiwahi kunyuza yayuma yayiwahi yaKristu yakadi kutwesha kutiyishisha 9 nawa yatela kuletesha muntu wejima kumona chiyuulu chayuma yajila yakujinda,+ yinajindiwu hadi yaaka yayivulu kudi Nzambi, waleñeli yuma yejima. 10 Chumichi chadiña mwenimu kulonda akanfulumendi niakawuswa ekala mumaluña amwiwulu eluki maana aNzambi+ amwekenaña munjila jamboka-mboka, kuhitila muchipompelu.+ 11 Chumichi chinesekani nankeñelu yindi yahaya nyaaka yafuukwiliyi hadi Kristu,+ Yesu Mwanta wetu, 12 kuhitila mudi yena, tudi akasunuka hakuhosha nihakumusolomoka+ Nzambi muloña wakukuhwelela mudi yena. 13 Dichi nayilembeleli nami bayi muzeya muloña wamakabi inamonaña kukoola enuku, muloña yumiyi diyinateli kuyiletela kulema.+

14 Muloña wachumichi, nafukami nakulomba kudi Tata, 15 oku kwatambwila chisaka chejima chamwiwulu nichahamaseki ijina. 16 Nalombi nami akoleshi wuntu wenu wamukachi+ kuhitila mukuyinka ñovu naspiritu yindi, muloña kulema kwindi kwabadika chikupu, 17 nawa kuhitila muchikuhwelelu chenu, Kristu ekali munyichima yenu nakukeña.+ Mushimati+ nikutuñewa hachikuku chakola,+ 18 kulonda hamu nawakakujila ejima mutweshi kutiyisha chikupu mwatalisha wihi, kuleha, chiiminu nikukunama, 19 nikwiluka kukeña kwaKristu,+ oku kwabadika kwiluka kulonda mwiikali chikupu nayilwilu yaNzambi yahanañayi.

20 Kwesekeja nañovu jindi jinakuzatika mudi etu,+ yena nateli kukoña yuma yasweja kubadika chikupu yuma yitwamulombaña hela yitwatoñojokaña,+ 21 dichi kudi yena kwiikali kulema kuhitila muchipompelu nimudi Kristu Yesu kushika nikumakiñu ejima haya nyaaka nanyaaka. Ameni.

4 Dichi, ami kayili*+ mudi Mwanta, nayilembeleli nami mwendeña kwesekeja+ namutambi wayitambikiliwu, 2 nakudizoza+ chikupu nikwovwaha, nakudiwunjika+ nikuditiyilila wumu namukwawu mukukeña,+ 3 nakufwila chikupu kuhemba kunuñañana+ kwenu kumwekalaña naku naspiritu. 4 Kwekala mujimba wumu+ nispiritu yimu,+ neyi chayitambikiliwu kukuchiñeja+ kumu kwamutambi wenu; 5 kwekala Mwanta wumu,+ chikuhwelelu chimu, chipapatishu chimu; 6 niNzambi wumu nawa Tata yawantu ejima, wabadika ejima, wakalakelaña mudi ejima nawa wekala mudi ejima.

7 Dichi, wejima wetu hamuntu-hamuntu atutiyilili luwi lwasweja kwesekeja nachawaana+ chapiminiyi Kristu. 8 Muloña Nsona yahosha nawu: “Chakandukiliyi hewulu, wasendeli ankoli; wahanini amayala ekali yawaana.”+ 9 Indi izu dakwila nawu “chakandukiliyi,” komana hidatalisha mukwila nawu wasambilili kukunkumuka mumaluña amwishina, dikwila nawu hamasekiku, tahindi? 10 Owu wakunkumukili diyi cheñi wakandukili+ hewulu nankashi nakupandakana mawulu ejima,+ kulonda yashikiji yuma yejima.

11 Nawa amakwawu wayihanini kulonda ekali apostolu,+ amakwawu atuprofwetu,+ amakwawu akakushimwina,*+ amakwawu atubiña niantañishi,+ 12 nankeñelu yakwolola* akakujila kulonda akalakeleña akwawu nikutuña mujimba waKristu,+ 13 sampu wejima wetu tunadinuñi hamu muchikuhwelelu nawa tunamwiluki chiwahi Mwana kaNzambi, nakwikala muntu wapama nankashi,+ washika chikupu muchiiminu chaKristu. 14 Dichi, bayi twikala cheñi anyana anyanyaku, muloña muntu walondelaña ntañishilu yakutwamba yawantu adimbaña akwawu,+ wekala neyi chuma chalelujolañawu kudi mpepela nimankanda. 15 Ilaña muloña wakukeña, hitunakuhosha chalala, tupameña muyuma yejima mudi Kristu+ wekala mutu. 16 Kudi yena dikwanuñilawu hamu yiidi yamujimba+ wejima nawa chiidi-hichiidi chakwashaña chikwawu kwakamena mujimba. Neyi chiidi-hichiidi chizata mudimu wachu chiwahi, chumichi chakwashaña mujimba kukula chachiwahi kulonda mujimba wejima wudituñi mukukeña.+

17 Dichi inakuyileja chumichi nikushimuna wunsahu mudi Mwanta nami, bayi mwendeña cheñi neyi chendañawu+ akanyuza muyitoñojoka yawu+ yamukunkulwayiku. 18 Wena adi mumwidima muyitoñojoka nawa anadaambuli kuwumi waNzambi, muloña hiyakeñaña kumwilukaku, muloña wakuchinchika* kwanyichima yawu. 19 Chalekeliwu kutiya nsonyi, adihanini awenawu kuyilwilu yawukapwa nsonyi*+ nikwila yuma yawuzondu yejima nalwisu.

20 Ilaña enu mwadizili nikwiluka nenu Kristu dichekalayi wanyi, 21 neyi chalala mwamutiyili nawa ayidizishili kuhitila mudi yena, neyi chochidi chalala mudi Yesu. 22 Ayilejeli kuvuula wuntu wawukulu+ wesekana nayilwilu yenu yakunyima, wunakutamishawu nakufwila kwatama kwayiluwañeshaña.+ 23 Nawa mwatela kutwalekahu kubalumuka nakwikala amaha muyitoñojoka nimuyilwilu yenu,*+ 24 nikuvwala wuntu wawuha+ waleñeliwu kwesekeja nankeñelu yaNzambi mukuloña kwalala nimukashinshi.

25 Dichi, chineli munaleki dehi kudimbana, muntu wejima ahosheña chalala namukwawu,+ muloña tudi yiidi yamujimba wumu.+ 26 Zuwenu, ilaña bayi muvulumunaku;+ bayi muhumisha itena saña mwahililaku;+ 27 bayi mumushila Diyabolu hakwiñililaku.*+ 28 Muntu weyaña aleki kwiya, ilaña azati nañovu, akalakali mudimu wawuwahi namakasa indi+ kulonda ekali nayuma yakwinkahu muntu wunakaankili.+ 29 Mukanwa+ kenu bayi mwidika mazu atokaku, chiña amawahi hohu, anateli kutuña akwenu hampinji yinakukeñawu kuyikwasha kulonda atweshi kukwasha antiyilili.+ 30 Cheñi, bayi muneñeshaña spiritu yajila+ yaNzambiku, oyu yinayilamikiwu+ nachu kulonda akayikuuli nefutu danyiloña+ hefuku dakukuula.

31 Lekenu ndulu yejima,+ kuhila, kuzuwa, kuzazoka, nhoshelu yakasawuntu+ niyuma yejima yatama.+ 32 Ilaña ditiyilenuña luwi wumu namukwawu, wushona+ nikudanakena wumu namukwawu neyi chayanakeneniyi Nzambi kuhitila mudi Kristu.+

5 Dichi, mwimbujolenuña Nzambi+ chineli mudi anyana akeñayi, 2 nawa endenuña mukukeña+ neyi chatukeñeliyi*+ Kristu nikudihana yomweni kukoola etu* nakwikala mulambu wevumba dadiwahi kudi Nzambi.+

3 Wuvumbi,* niyuma yawuzondu yejima nilwisu bayi mujitenaña mukachi kenuku,+ muloña yumiyi hiyatelela akakujilaku;+ 4 hela yilwilu yansonyi, hela nhoshelu yawusupi, hela kusenseka kwawuzondu,+ hiyuma yabula kutelela, chiña kumusakililaña Nzambi.+ 5 Muloña enu aweni mweluka chikupu chumichi nenu, kwosi chivumbi,*+ hela muntu wamajilu, hela mukalwisu,+ dikwila nawu mukakupesha, wakaswana Wanta waKristu niwaNzambiku.+

6 Bayi kwikala muntu wukuyidimba namazu amukunkulwayiku, muloña hamuloña wayumiyi, kuzuwa kwaNzambi kunakwinza hadi anyana kakudikaña. 7 Dichi, bayi mudibomba nawuku; 8 muloña kunyima mwadiña mwidima, ilaña ichi mudi chejeji+ mudi Mwanta.+ Endenuña neyi anyana kachejeji, 9 muloña nyikaabu yachejeji yamwekeshaña kuwaha kwejima nikuloña nichalala.+ 10 Twalekenuhu kwiluka yuma yetejañayi+ Mwanta; 11 lekenu kukoña nyidimu yamukunkulwayi yamumwidima;+ ilaña, yisololenuña hatooka chiyekala. 12 Muloña yuma yelañawu mukujinda, yansonyi nihakuyitena. 13 Yuma yejima yinakusololawu,* anakuyisolola kudi chejeji, muloña yuma yejima yinakusololawu hatooka hichejeji. 14 Dichi, Nzambi wahosha nindi: “Eyi wunakaami tulu, tonaku, sañukaku+ mudi afu nawa Kristu wukukutoñekela.”+

15 Dichi ilukenu chimwendaña, bayi mwendeña neyi antu abula maanaku, ilaña neyi akamaana, 16 zatishenuña chiwahi mpinji yenu,*+ muloña anu himafuku atama. 17 Muloña wachumichi, lekenu kwikala abula maana, ilaña ilukenuña chidi nkeñelu yaYehova.*+ 18 Cheñi nawa, bayi musheteña vinyuku,+ muloña yakojejaña kubula kudiyuula, ilaña inzalenuña naspiritu. 19 Hanjekenuña wumu namukwawu* namasamu, nakumushimeka Nzambi ninatumina+ twakuspiritu, nakumwimbila Yehova*+ munyichima yenu natumina,+ 20 mpinji yejima nakumusakilila+ Nzambi yetu nawa Tata wayuma yejima mwijina daMwanta wetu Yesu Kristu.+

21 Ditiyililenuña wumu namukwawu+ muloña wakumutiya Kristu woma. 22 Ambanda ovwahileña anfumu jawu+ neyi chovwahilañawu Mwanta, 23 muloña iyala diyi mutu wañodindi+ neyi chekalayi Kristu mutu wachipompelu,+ chineli yena diyi chamwinu chaniwu mujimba. 24 Kafwampi, neyi chipompelu chichovwahilaña Kristu, ambanda niwena dichiyatela kwovwahilawu anfumu jawu muyuma yejima. 25 Enu amayala, keñenuña añodi jenu+ neyi chakeñeliyi Kristu chipompelu nikudihana yomweni kuchikoola,+ 26 kulonda yachijiliki nikuchitookesha kuhitila mukuchikosa namenji amazu aNzambi,+ 27 kulonda elishi chipompelu chiikali chalema kumesu indi, chakadi ihuji, nyiku* hela yuma yidi yejima yamuchidiwu,+ ilaña chiikali chajila nawa chakadi hakuchinkela muloña.+

28 Munjila yoyimu, amayala atela kukeña añodi jawu neyi chakeñawu nyijimba yawu aweni. Iyala wakeña ñodindi, wadikeña yomweni, 29 muloña kwosi muntu wahelahu dehi mujimba windiku, ilaña wawudiishaña nikuwuhemba chiwahi, neyi chahembañayi Kristu chipompelu, 30 muloña tudi yiidi yamujimba windi.+ 31 “Hamuloña wachumichi, iyala wakashiya tata yindi nimama yindi nakukakela* kudi ñodindi, nawa wejima wawu ayedi akekala mujimba wumu.”+ 32 Iyi yuma yajila yakujinda+ yalema nankashi. Ichi dinu, inakuhosha hadi Kristu nichipompelu.+ 33 Hela chochu, ninenu muntu-himuntu watela kukeña ñodindi+ neyi chadikeñayi yomweni; mumbanda niyena watela kwikala nakalemesha chikupu kudi nfumwindi.+

6 Enu anyana, ovwahilenuña anvwali jenu+ kwesekeja nachakeñañayi Mwanta, muloña chumichi dichaloña. 2 “Lemeshaku tata yeyi nimama yeyi,”+ dilushimbi lwatachi ludi nanichi chikaninu, nawu: 3 “Kulonda yuma yikuwahileña* nawa wushakami yaaka yayivulu hamaseki.” 4 Ninenu atata jawantu, bayi muhilishaña anyanenuku,+ ilaña yikulishenuña nakufumba+ nikukonkomwena* kwaYehova.*+

5 Enu anduñu, ovwahilenuña ankaaka jenu ahamaseki,+ nakuyitiya woma nikuyizaala nanyichima yayiwahi, neyi chimwovwahilaña Kristu, 6 bayi hanakuyimonawu hohu kulonda mutiyishi antu kuwahaku,*+ ilaña neyi anduñu jaKristu anakwila mwaya nkeñelu yaNzambi nawumi*+ wejima. 7 Zatenuña namuchima wawuwahi, neyi munakumuzatila Yehova*+ bayi antuku, 8 muloña mweluka nenu chuma chejima chachiwahi chazatañayi muntu wejima, akamufuntishilachu kudi Yehova,*+ hela hinduñu hela himuntu wasubuka. 9 Ninenu ankaaka jawu, yilenuña mwomumu nawa, bayi muyitiyisheña womaku, muloña mweluka nenu Nkaaka yawu nawa Nkaaka yenu ninenu, wudi mwiwulu,+ yena hekala nachaambuku.

10 Nkumininaku, tambulenuña ñovu+ mudi Mwanta nimuñovu jindi jabadika. 11 Dimanyekenu yitwa yanjita+ yejima yafuma kudi Nzambi kulonda mutweshi kwimana akola mbe-e kutufuta twaDiyabolu; 12 muloña tunakulwisha,+ bayi nawantu akweti nyisunyi nimashiku, ilaña najinfulumendi, nawakawuswa, nawanyuuli akaayi aniwu mwidima, namazaza awandemoni+ adi mumaluña amwiwulu. 13 Muloña wachumichi, dimanyekenu yitwa yanjita yejima yafuma kudi Nzambi,+ kulonda mutweshi kwimika mushindu mwifuku datama, nawa neyi munamanishi dehi yuma yejimiyi, mwimani akola mbe-e.

14 Dichi, imanenu akola mbe-e, iku munakasi mushipi wachalala mumbunda+ nawa munavwali chuma chakujika hantulu chakuloña,+ 15 nikuvwala nkwabilu kunyendu yenu yinakumwekesha nawu munadiloñeshi kushimwina nsañu yayiwahi yakuwunda.+ 16 Kubombela hayuma yejimiyi, nonenu nkebu yeneni yachikuhwelelu,+ yimukutwesha kujima nachu nyivu yakesi yejima yanowu watama.+ 17 Cheñi, tambulenu itepa dawamwinu,+ nawa sendenu mpoku yakabali yaspiritu, dikwila nawu mazu aNzambi,+ 18 iku munakulomba mpinji yejima kulomba+ kwamboka-mboka nikulomba kwejima kwakulemba kuhitila muspiritu.+ Nawa tonenuña mpinji yejima, iku munakulomba nakuyilembelaku akakujila. 19 Nlombelenuñaku ninami kulonda neyi naasami mukanwa kami, nitweshi kushimuna yuma yajila yakujinda yansañu yayiwahi+ chakadi woma, 20 oyu yanletesha niikali ñimeni+ akasawu mumaleñi,* kulonda nishimuni iyi nsañu nakuhamuka, neyi chinatela kuhosha.

21 Dichi hakwila mwiluki nihadi ami ninochu chinnakuzata, manakwetu Tikikusa+ itwakeña nawa mukakukalakala waMwanta washinshika, wukayileja yuma yejima.+ 22 Inakumutemesha kudi enu muloña waniyi nsañu, kulonda mwiluki chitunakuhanda nawa yakundeji nyichima yenu.

23 Kuwunda nikukeña hamu nachikuhwelelu kwafumaña kudi Nzambi Tata nikudi Mwanta Yesu Kristu kwiikali nawanakwetu. 24 Dichi, luwi lwasweja lwiikali nawantu ejima amukeña Mwanta wetu Yesu Kristu kukeña kwabulaña kumana.