KUDI AFWILIPI
1 Ami Pawulu niTimotewu, anduñu jaKristu Yesu, tunayisonekeli enu akakujila ejima mwadikunda naKristu Yesu, enu mudi muFwilipi+ hamu nawakulumpi niankoñi akuzatila:+
2 Luwi lwasweja nikuwunda kwafumaña kudi Tata yetu Nzambi nikudi Mwanta Yesu Kristu kwiikali nanenu.
3 Namusakililaña Nzambi yami mpinji yejima neyi niyanuka 4 mukulomba kwakulembelela kwejima kunayilombelañaku wejima wenu. Nalombaña kulomba kwejima kwakulembelela namuzañalu,+ 5 muloña wamudimu wumunazati wakutwala nsañu yayiwahi hambidi kufuma hefuku datachi kushika nihayinu mpinji. 6 Muloña nakuhweleli chumichi nami, owu watachikili mudimu wawuwahi mudi enu wakatwalekahu kuwuzata nakuwumanisha+ kushika nikwifuku daKristu Yesu.+ 7 Chinanteleli ami kutoñojoka muniyi njila hadi enu ejima, chineli nayanukaña mumuchima wami, enu atutiyilañawu hamu luwi lwasweja hampinji yinekalaña mumaleñi+ nihakuhakwilaku nikufwila kutambula wuswa wakushimwina nsañu yayiwahi kwesekeja nanshimbi.+
8 Muloña Nzambi diyi chinsahu chami wuneluki chinnakufwila kwikala hamu nanenu ejima muloña nayikeña neyi chayikeñayi Kristu Yesu. 9 Nawa chumichi dichinalombaña mpinji yejima nami, kukeña kwenu kusweji nankashi+ nakwiluka kwalala+ nikashinshi kakeni;+ 10 nami mwiluki yuma yalema nankashi,+ kulonda mubuli hakuyinkela muloña nikubula kuhukesha akwenu+ kushika tuhu nikwifuku daKristu; 11 nawa mwinzali nanyikaabu yaloña, yimunateli kusoña kuhitila mudi Yesu Kristu,+ kulonda amulemeshi Nzambi nikumuhameka.
12 Dichi enu anakwami, inakukeña mwiluki nenu, yuma yinakummwekena yinaleteshi nsañu yayiwahi kuyilaku hambidi, 13 chakwila kunkasa kunankasiwu mumaleñi+ kukoola Kristu anakwiluki kudi Akakuhemba Mwanta ejima niantu ejima.+ 14 Ichi anakwetu amavulu adikunda naMwanta anakoli muloña wakunkasa mumaleñi nawa anakumwekesha kuhamuka chikupu hakuhosha izu daNzambi chakadi woma.
15 Chalala, antu amakwawu anakushimwina nsañu yaKristu muloña wechima niyikonkojola, ilaña amakwawu namuchima wawuwahi. 16 Antu akweti muchima wawuwahi anakushimwina nsañu yaKristu muloña amukeña, muloña eluka nawu anantondi kulonda nihakwileñaku nsañu yayiwahi;+ 17 ilaña akweti ichima niyikonkojola ashimwinaña muloña wantaadi, bayi neyi namuchima wawuwahiku, muloña anakufwila kunletela kukala mumaleñi mwankasawu. 18 Yumanyi yafumañamu? Mwejima mwashimwinañawu antu, hela mwakutwamba hela mwalala, Kristu anakumushimwina nawa chumichi chanzañaleshaña. Ninami nukuzañalalaña, 19 muloña neluki nami chumichi chikañaamwina kuhitila mukulomba kwenu kwakulembelela+ niwukwashu waspiritu yaYesu Kristu.+ 20 Chumichi chinesekani nayuma yinatalilaña nankashi niyinachiñejaña nami nakabuli kutiya nsonyi hela chanti, ilaña muloña wakwikala wakasunuka hakuhosha, ichi dinu Kristu, neyi chichekalaña mpinji yejima, akumutuumbakeshaña muloña wamujimba wami, hela inakuhanda hela nafwi.+
21 Ilaña ami neyi inakuhanda, nahandaña muloña waKristu+ nawa neyi nafwi, kudi ami hiwufwetu.+ 22 Dichi neyi nitwalekahu kuhanda mumujimba, chumichi hinyikaabu yamudimu wami; ilaña chuma chinukutonda, hinachishimunaku. 23 Ami nakasiki naniyi yuma yiyedi, muloña inakufwila chikupu kunkasununa kulonda nidikundeña naKristu,+ muloña chumichi chinabadiki kuwaha nankashi.+ 24 Hela chochu, chinanteleli ami kutwalekahu kuhanda muloña wanenu. 25 Dichi, muloña wakukuhwelela chumichi, neluki nami nukutwalekahu kuhanda nikwikala hamu nanenu ejima kulonda mupamineñaku nikwikala namuzañalu muloña wachikuhwelelu chenu, 26 kulonda kudisamba kwenu kusweji chikupu mudi Kristu Yesu muloña wanami hampinji yinakekala cheñi nanenu.
27 Ikalenuña nayilwilu* yatelela nsañu yayiwahi yaKristu+ kulonda hela neyi nakenza hela hinakenza nakuyitalaku, nakatiyi nikwiluka nawu munemani akola mbe-e kuspiritu, nawumi wumu,*+ iku wejima wenu munakudikitila hamu kulonda mwiikali nachikuhwelelu chansañu yayiwahi, 28 nikubula kuyitiyisha woma kudi ayilumbu jenu. Kudi wena, chumichi hichinjikijilu chakuyijilumuna,+ ilaña kudi enu hiwamwinu;+ nawa chumichi chafuma kudi Nzambi. 29 Muloña enu anayinki iku kukooleka kulonda mwimeneñaku Kristu, bayi neyi kumukuhwelela hohuku, ilaña nikukabakana kukoola yena.+ 30 Muloña enu munakulwisha nakukala neyi kumwamweni ami nakuhitamu,+ oku kumunakutiya nawu nihanu nichidi kuhitamu.
2 Neyi munakudikolesha mudi Kristu, neyi munakudikundeja mukukeña, neyi munakudikunda kuspiritu,* neyi munakudikeña nikuditiyila wushona, 2 nzañaleshenuña chikupu kuhitila mukwikala nayitoñojoka yoyimu, nikukeña kwokumu, nikunuñañana chikupu,* nikutoñojoka mwomumu.+ 3 Bayi mukoña chuma hela chimu nantaadi+ hela nakudivwimba kwamukunkulwayiku,+ ilaña dizozenuña nakumona akwenu nenu ayibadika,+ 4 iku munakufwila yuma bayi yayitiyishaña hohu enu kuwahaku,+ chiña yuma yatiyishaña niakwenu kuwaha.+
5 Ikalenuña nayitoñojoka niyilwilu neyi yadiña naKristu Yesu,+ 6 hela chakwila wadiña muchifwanisha chaNzambi,+ hadiña nayitoñojoka yakwila nindi watela kwesekana naNzambiku.+ 7 Inehi, helili mwenimuku, ilaña yena washiyili yuma yejima yadiñayi nayu nakudibalumuna neyi nduñu,+ nawa wekalili muntu.*+ 8 Chabadika hachumichi dichenichi nawu, chenjiliyi neyi muntu,* wadizozeli nawa wovwahilili kushika nikukufwa,+ kwafwiliyi hamutondu wakuyandishila.*+ 9 Muloña wachumichi, Nzambi wamutuumbakesheli nakumwinka chifulu chahewulu+ niijina dabadika majina ejima,+ 10 kulonda kuhitila mwijina daYesu manuñu ejima akafukami, manuñu anowu adi mwiwulu, nianowu adi hamaseki, nianowu adi kwishina deseki,+ 11 nimadimi ejima aketeji hatooka nawu Yesu Kristu diyi Mwanta+ kulonda kulema kwakekali kudi Nzambi Tata.
12 Dichi enu akwetu inakeña, neyi chimwovwahilaña mpinji yejima, bayi neyi hampinji yinidi nanenu hohuku, ilaña sweje-e dinu nihampinji yinabulaña kwikala nanenu, ikalenuña nawoma nikuzaala hampinji yimunakufwila kutambwila wamwinu. 13 Muloña Nzambi diyi wayikoleshaña kuhitila mukuyinka muchima wakufwila kukoña yuma niñovu yakwilamu, kwesekeja nanochu chatiyañayi kuwaha. 14 Ilenuña yuma yejima chakadi kutooba+ nikutaadeka,+ 15 kulonda mwiikali akadi hakuyinkela muloña nawa ashinshika, anyana kaNzambi+ akadi ihuji mwikiñu datama dabulaña kukoña yuma yaloña,+ mumunakutoñekela neyi yejeji mukaayi,+ 16 iku munakwatishi chikupu kumazu ahanaña wumi.+ Kuhiñahu dinu niikali nahakuzañalela mwifuku daKristu, nachinneluki nami hinatemukili chamukunkulwayi hela kudikita chamukunkulwayiku. 17 Dichi, hela chakwila anakunhuñununa neyi mulambu wavinyu+ hamulambu+ wamudimu wajila* wumunakuzata muloña wachikuhwelelu chenu, natiyi kuwaha nikuzañalela hamu nanenu wejima wenu. 18 Munjila yoyimu, ninenu mwatela kutiya kuwaha nikuzañalela hamu nanami.
19 Dichi nakuhweleli mudi Mwanta Yesu kuyitemeshela Timotewu+ katataka, kulonda nakakoleshewi neyi nitiya chimunakuhanda. 20 Muloña hinukwetihu muntu mukwawu wudi namuchima neyi yena wukwakamena chikupu yuma yinakuyakamishaku. 21 Muloña akwawu ejima anakufwila hohu yuma yakuditiyisha aweni kuwaha, bayi yuma yaYesu Kristuku. 22 Ilaña enu muneluki wunsahu wadishimwininiyi yomweni nindi, neyi mwana+ wunakukalakela hamu natata yindi, niyena dichakalakeliyi hamu nanami hakutwala nsañu yayiwahi hambidi. 23 Dichi, yeniwu diyi innakukeña kuyitemeshela katataka hampinji yinichidi kutalila yuma chiyikwikala kudi ami. 24 Eñañi, nakuhweleli mudi Mwanta nami, ninami nawa katataka ninzi.+
25 Ilaña hayinu mpinji, namoni nami chidi chiwahi kuyitemeshelaku manakwami Epafwaditu, mukwetu mutwakalakelaña, mukwetu ishidika, ntemesha yenu nawa ñamba yami wayuma yinakaankilaña,+ 26 chineli nakufwila chikupu kuyimona wejima wenu nawa naneñi muloña mwatiyili nenu wakata. 27 Chalala, wakatili nankashi kwakwihi nakufwa; ilaña Nzambi wamutiyilili luwi, kafwampi, bayi neyi yena hohu diyi atiyililiwu luwiku, ilaña ninami nawa, kulonda nibuli kwikala nachineñi chasweja. 28 Dichi, inakumutemesha swayi-swayi, kulonda chimukumumona muzañalali cheñi, ninami nawa nileki kusweja kwakama. 29 Dichi, mutambwilenu neyi chimwatambwilaña akakumulondela Mwanta namuzañalu wasweja, nawa lemeshenuña chikupu antu adi neyi awa,+ 30 muloña yena wadiña kwakwihi nakufwa* kukoola mudimu waKristu, kusha wumi windi muwubanji* kulonda anzatili mudimu wumwateleleli kunzatila enu chineli himwadiña kunuku.+
3 Nkumininaku, enu anakwami, twalekenuhu kuzañalela mudi Mwanta.+ Ami hinikweti kukala kuyisonekela yuma yoyimuku, muloña chumichi chakuyikiña enu.
2 Babalenu nawatuwa; babalenu nawantu elaña yuma yatama; babalenu nawantu alemeshaña kwalama.*+ 3 Muloña etu yetu aalamishawu chalala,+ etu anakukalakala mudimu wajila naspiritu yaNzambi nikudisambila mudi Kristu Yesu+ nawa etu abula kukuhwelela muyuma yakumujimba, 4 hela chochu, neyi kudi muntu wukweti yuma yikumuletesha kukuhwelela muyuma yakumujimba, yami.
Neyi kudi muntu wunakutoñojoka nindi wukweti yuma yikumuletesha kukuhwelela muyuma yakumujimba, ami namubadiki: 5 añalamishili hefuku damu 8,+ nidi wakumuza waIsarela, nidi wakumuchidi waBenjamini, nidi kaHeberu wavwalika kudi aHeberu;+ kwesekeja nanshimbi nidi kaFwarisi;+ 6 kuhosha heyena, nadiña neyena dakukabisha chipompelu;+ kutalisha kukuloña kwashindamena hanshimbi, nadiña wakadi hakunyinkela muloña. 7 Ilaña, yuma yanhetesheleña, ichi nayinati* muloña waKristu.+ 8 Sweje-e dinu, namonaña cheñi yuma yejima nami yamukunkulwayi muloña wakuwaha kwasweja kwakumwiluka Kristu Yesu Mwanta wami. Kukoola yena, nanati yuma yejima nawa nayimonaña nami hinswadi* hohu, kulonda niheti Kristu 9 nawa akanwani inakudikunda nindi, bayi neyi hamuloña wakuloña kwami kwakwovwahila Nshimbiku, ilaña muloña wakuloña kwenzaña kuhitila mukukuhwelela+ mudi Kristu,+ kuloña kwafumaña kudi Nzambi kwashindamena hachikuhwelelu.+ 10 Inakufwila kumwiluka niñovu yakusañuka kwindi+ nikukabakena hamu mumakabi indi,+ nikufwa neyi chafwiliyi,+ 11 kulonda nimoni neyi chakwila nateli kwikala hakusañuka kwakusambila mudi afu.+
12 Hichinatalishi mukwila nawu natambwili dehi chumichi hela nami anambalumuni dehi kwikala wawaninaku, ilaña inakufwila chikupu+ kulonda nimoni neyi nukutwesha kutambwila chuma chaletesheli Kristu Yesu antondi.*+ 13 Enu anakwami, ami hinnakudimona nami natambwili dehi chumichiku, ilaña kudi chuma chimu chinelaña: Navulamenaña yuma yakunyima+ nakufwila yuma yidi kumbidi,+ 14 inakutemuka lufuchi kulonda nakatambwili wufwetu+ wamutambi wamwiwulu+ waNzambi kuhitila mudi Kristu Yesu. 15 Dichi etu ejima apama kuspiritu,+ twikaleña naniyi yitoñojoka niyilwilu, ilaña neyi munakutoñojoka mwambukaku, Nzambi wakayisolwela iyi yitoñojoka niniyi yilwilu. 16 Hela chochu, kwesekeja nakupama kwejima kutunapaminiku, tutwalekenuhu kwenda chiwahi muniyi njila yoyimu.
17 Enu anakwami, dinuñenu hamu nakuñimbujola+ nawa shinshikenu mesu enu hadi antu anakulondela chakutalilahu chetu chitwayishilili. 18 Muloña kudi antu amavulu anakudiwula kufwa kwaKristu kwafwiliyi hamutondu wakuyandishila.* Nayiteneneña kakavulu, hidimuku? Ilaña ichi inakuyitena namadilu. 19 Kukuma kwawu hikujilumuka, ivumu dawu diyi nzambi yawu, adisambilaña muyuma yinateli kuyitiyisha nsonyi nawa atoñojokaña hayuma yahamaseki.+ 20 Ilaña wenimbu wetu+ wamwiwulu,+ nawa tunakutalila chikupu chamwinu wakafuma mwiwulu, Mwanta Yesu Kristu,+ 21 wakabalumuna nyijimba yetu yazeya kulonda yakekali* neyi mujimba windi walema+ kuzatisha ñovu yindi yabadika yamukwashaña kwovwahisha yuma yejima kudi yomweni.+
4 Dichi enu anakwami inakeña nawa inafwilaña kumona, enu muzañalu wami nawa chibaaba chami,+ imanenu akola mbe-e+ chochenichi mudi Mwanta, enu akwetu inakeña.
2 Inakumulembelela Eyodiya nawa inakulembelela niSintiki nami ekali nayitoñojoka yoyimu mudi Mwanta.+ 3 Chalala, inakukulembelela nineyi nawa mukwetu washinshika mutwakalakelaña,* nami wutwalekihu kukwasha awa ambanda anadikitili* hamu nanami mumudimu wansañu yayiwahi, niKelementa niakwetu ejima akalakelaña hamu nanetu akweti majina awu adi mumukanda wawumi.+
4 Zañalelenuña mpinji yejima mudi Mwanta. Nukuhosha cheñi nami, Zañalalenuña!+ 5 Mwekeshenu kwovwaha kwenu+ kudi antu ejima. Mwanta wudi kwakwihi. 6 Bayi mwakama chuma hela chimuku,+ ilaña muyuma yejima, mukulomba nimukulomba kwakulembelela nimukusakilila, mulejenuña Nzambi yuma yejima yimunakukeña;+ 7 nawa kuwunda+ kwaNzambi kwabadika kwiluka kwejima kwakahemba nyichima yenu+ niyitoñojoka yenu kuhitila mudi Kristu Yesu.
8 Nkumininaku, enu anakwami, toñojokenuña* hayumiyi, yuma yejima yalala, yuma yejima yalema, yuma yejima yaloña, yuma yejima yakadi majilu,* yuma yejima yasañumunaña kukeña, yuma yejima yatenañawu antu nawu yayiwahi, yuma yejima yayiwahi niyuma yejima yahamekañawu.+ 9 Yuma yimwadizili niyimwetejeli, nawa yimwatiyili nikumona kudi ami, yilenuña,+ nawa Nzambi wakuwunda wukwikalaña nanenu.
10 Nazañalali chikupu mudi Mwanta hakwiluka nami ichi munatachiki cheñi kuñakamena.+ Hela chakwila mwadiña nakuñakamena, ilaña hakapinji kantesha mwakañenyi kwikala nampinji yakwila mwenimu. 11 Bayi neyi inakuhosha mwenimu muloña wakukaankilaku, muloña nadidizishi kuzañalela muyuma yinukweti, hichikweti muloña nachidi chihandilu chamiku.+ 12 Neluka chikupu chakuhanda nayuma yantesha+ nichakuhanda nayuma yayivulu. Muyuma yejima nimukuhanda kwejima, nadidizishi dehi chakwikuta nichakwikala nanzala, chakwikala nayuma yayivulu nichakubula kwikala nayuma. 13 Nikweti ñovu yakuhita muyuma yejima muloña wanowu wanyinkaña ñovu.+
14 Hela chochu, mwelili chiwahi himwankwashili mulukadi lwami. 15 Kafwampi, enu aFwilipi mweluka cheñi nenu, chelili munadizi dehi nsañu yayiwahi hampinji yinafumini kuMasidoniya, kwosi chipompelu hela chimu chazatilili hamu nanami kutalisha kunsañu yakuhana hela kutambwilaku, chiña enu hohu;+ 16 muloña hinadiña muTesalonika, mwantemesheleli yuma yinakaankilili, bayi kamu hohuku, ilaña kayedi. 17 Bayi neyi inakukeña nami munyinki chawaanaku, ilaña inakukeña nami mukoñeña nyidimu yayiwahi yinateli kuyihetesha nankashi. 18 Hela chochu, nikweti yuma yejima yinnakukeña, nawa yayivulu. Hinnakukaankila chuma hela chimuku, chineli natambwili yuma yimwatemesheli naEpafwaditu,+ yikweti ivumba dadiwahi,+ wowu mulambu wetejewa, watiyañayi Nzambi kuwaha. 19 Kuhitila mudi Kristu Yesu, Nzambi yami wakayinka yuma yejima yimunakukaankila+ kwesekeja nakuvula kwakulema kwindi. 20 Ichi dinu kudi Nzambi yetu nawa Tata, kwiikali kulema haya nyaaka nanyaaka. Ameni.
21 Muñimushiliku akakujila ejima adikunda naKristu Yesu. Anakwetu inidi nawu anayimushi. 22 Akakujila ejima anayimushi, sweje-e dinu amwitala daKesari.+
23 Luwi lwasweja lwaMwanta Yesu Kristu lwiikali nanenu muloña waspiritu yimwamwekeshaña.
Hela “neyi enimbu.”
Hela “namuchima wumu.”
MuchiGiriki, “kwanzañana spiritu.”
Hela “kudinuña hamu muwumi.”
MuchiGiriki, “wadifwanini nawantu.”
MuchiGiriki, “chamuwaniniwu nakumwekana neyi muntu.”
Talenu Kulumbulula.
Hela “mudimu wakuzatila antu.”
Hela hekwawu, “mudimu waMwanta.”
Hela “kusha wumi windi hakatoña.”
MuchiGiriki, “aketulaña nyijimba yawu.”
Hela hekwawu, “nayishiyi chisayikila mukudikeñela.”
Hela “majilu.”
MuchiGiriki, “kunnañika makasa.”
Talenu Kulumbulula.
MuchiGiriki, “yakesekani.”
MuchiGiriki, “mukwetu walala mutwekalila mumpaanda yimu.”
Hela “analwishili chikupu.”
Hela “kutoñojoka chikupu.”
Hela “yitooka.”