MUKANDA WAMUCHIYEDI KUDI TIMOTEWU

1 Ami Pawulu, kapostolu kaKristu Yesu atondeliwu nankeñelu yaNzambi kwesekeja nachikaninu chawumi kuhitila mudi Kristu Yesu,+ 2 kudi Timotewu, mwana wakeñewa:+

Luwi lwasweja niwushona nikuwunda kwafumaña kudi Nzambi Tata nikudi Kristu Yesu Mwanta wetu kwiikali naneyi.

3 Namusakilili Nzambi inakuzatila mudimu wajila nachinleji chamuchima chitooka neyi chamuzatililiwu ankakulula jami, chakubula kuleka kukwanuka mukulomba kwami kwakulemba wufuku nimwaana. 4 Chinanukaña madilu eyi, nafwilaña kukumona kulonda nisweji kuzañalala. 5 Muloña nanukaña chikuhwelelu+ cheyi chakadi wunfwikiji chasambilili kwikala mudi nkaaka yeyi Lowisi nimudi mama yeyi Yunisi, nawa nakuhweleli nami nineyi dichiwukweti.

6 Muloña wachumichi, inakukwanukishaku nami chawaana chaNzambi chidi mudi eyi chiwatambwilili hinakunañikili makasa ami,+ wuchisañumuni neyi kesi. 7 Muloña Nzambi hatwinkeli spiritu yawomaku,+ ilaña watwinkeli yañovu+ niyakukeña niyakutoñojoka mwamaana. 8 Dichi bayi wutiya nsonyi kushimwina wunsahu hadi Mwanta+ wetu hela hadi ami, kayili* kukoola yenaku, ilaña kuminaku dakukabakana+ kukoola nsañu yayiwahi nakushindamena hañovu jaNzambi.+ 9 Watwamwinini nikututambika namutambi wajila,+ bayi hamuloña wanyidimu yetuku, ilaña hamuloña wankeñelu yindi niluwi lwindi lwasweja.+ Lwatutiyililiyi kushankulu mudi Kristu Yesu, 10 ilaña ichi analumwekeshi hatooka nanochu chinamusololiwu Chamwinu chetu Kristu Yesu,+ wafumishilihu kufwa+ nikutusolwela hatooka chakwikala nawumi+ nimujimba wabulaña kutoka+ kuhitila munsañu yayiwahi,+ 11 yantondeleliwu kulonda niikali mukakushimwina, kapostolu nawa ntañishi.+

12 Ichi dichinakuletesha nikabakaneña ñana,+ ilaña hinnakutiya nsonyiku.+ Muloña neluka Owu wunetiya nawa nakuhweleli nami nateli kuhemba chuma chinnamwinki kushika nikunodu ifuku.+ 13 Londelaña mwaya mazu amawahi*+ iwatiyili kudi ami nachikuhwelelu nikukeña kwenzaña muloña wakudikunda naKristu Yesu. 14 Hembaña ichi chuma chalema chakukunjikiliwu naspiritu yajila, yashakama mudi etu.+

15 Eyi weluka chumichi neyi, antu ejima akukabeta kaAsiya+ ananshiyi, kushilahu niaFwigelu naHemoni. 16 Mwanta atiyili luwi amwitala daOnesifwolu,+ muloña kakavulu diyi wankolesheleña nawa hatiyili nsonyi muloña wakunkasa mumaleñiku.* 17 Ilaña hadiñayi muRoma, wankeñakeñeli chikupu nawa wanwanini. 18 Mwanta Yehova* akamutiyili luwi lwindi hanodu ifuku. Nawa eyi weluka chiwahi nyidimu yejima yazatiliyi muEfwesesa.

2 Dichi eyi mwanami,+ twalekakuhu kwikala nañovu muluwi lwasweja ludi mudi Kristu Yesu; 2 nawa yuma yiwatiyili kudi ami yetejeliwu kudi ayinsahu amavulu,+ kunjikaku yumiyi kudi antu ashinshika, akwikala ashikahu kudizisha antu amakwawu yumiyi nawa. 3 Chineli wudi ishidika wamuwahi+ waKristu Yesu, kuminaku dakukabakana chikupu.+ 4 Kwosi ishidika wadiñijaña* mumudimu wakulanda nakulandululaku,* kulonda amutiyi kuwaha kudi muntu wamwiñijili wushidika. 5 Dichichekala nimuyisela, muntu wejima wahemaña yisela, hiyamuvwikaña chibañula neyi yakañanya kulondela nshimbiku.+ 6 Ndimi wadikita diyi watela kwikala watachi kuda nyikaabu. 7 Toñojokaña hayuma yinnakuhosha; Mwanta wukukukwasha kutiyishisha* yuma yejima.

8 Anukaku neyi Yesu Kristu amusañwili mudi afu+ nawa wadiña mwana*+ kaDavidi, kwesekeja nansañu yayiwahi yinashimwinaña,+ 9 yinnakukabakena nawa yinakunkasilawu neyi mbanji.+ Hela chochu, mazu aNzambi hiyanayikasiku.+ 10 Muloña wachumichi, natwalekañahu kuumika yuma yejima kukoola atondewa,+ kulonda niwena akayamwini muloña wakudikunda naKristu Yesu nawa akekali nakulema kwahaya nyaaka. 11 Awa mazu atelela kuyikuhwelela: Neyi chalala tufwila hamu nindi, twakahandila cheñi hamu nindi;+ 12 neyi tutwalekahu kuumika, tukayuulila nawa hamu nindi neyi anyanta;+ ilaña neyi tumukaana, niyena wakatukaana;+ 13 neyi tubula kwikala ashinshika, yena wekalaña washinshika, muloña kwila yadikaana yomweni nehi.

14 Twalekakuhu nakuyanukisha yumiyi nikuyidizisha* kumesu aNzambi kulonda abuleña kutaadeka hamazu, chuma chikubula kuyikwasha, muloña chakuminaña dakukatisha* anakutiyilila. 15 Zataku nañovu jeyi jejima kulonda akutiyeña kuwaha kudi Nzambi, wiikali mukakukalakala wakadi chuma chakutiyilahu nsonyi, walumbululaña chiwahi mazu achalala.+ 16 Ilaña tondolwelaña nhoshelu yamukunkulwayi yajilolaña yuma yajila,+ muloña yakojejaña kubula kumwakama Nzambi chikupu, 17 nawa mazu awu ataandaña neyi iboñola. Hakachi kanawa antu hadi niaHimenusa naFwiletu.+ 18 Awa amayala anafumi muchalala, anakuhosha nawu kusañuka kwawafu kunahiti dehi,+ nawa anakuzeyesha chikuhwelelu chawantu amakwawu. 19 Hela chochu, chikuku chakola chaNzambi saña chakolela ngu-u, nawa chikweti ichi chinjikijilu nawu, “Yehova* weluka antu jindi,”+ nawa nawu, “Muntu wejima wunakutambika hejina daYehova*+ atondolweli yuma yabula kuloña.”

20 Mwitala deneni himwekalaña yuma* yawuru nisiliva hohuku, ilaña mwekalaña niyanyitondu niyamawumba, yimu yamudimu walema, yikwawu yamudimu wabula kulema. 21 Dichi neyi muntu adaambula kuniyi yuma yabula kulema, wukwikala chozelu* chamudimu walema, chajilikawu, chakuzatisha kudi mwinichu, chinaloñesheliwu nyidimu yayiwahi yejima. 22 Dichi temukaku kufwila kwawukwenzi, ilaña fwilaña kuloña, chikuhwelelu, kukeña, kuwunda nikudinuña hamu nawantu atambikaña Mwanta nanyichima yitooka.

23 Kubombelahu, wukaaneña kutaadeka kwawusupi+ nawa kwamukunkulwayi, chineli weluka neyi mwafumaña ndombu. 24 Muloña nduñu yaMwanta hatela kuzuñaku, ilaña watela kwikala wamwovu* kudi antu ejima,+ washikahu kutañisha, wadiwunjikaña neyi anamuvulumuni,+ 25 wadizishaña namuchima wamwovu antu adikañaña.+ Hadaha Nzambi wukuyikwasha kubalumuka munyichima* kulonda eluki chalala chikupu,+ 26 nawa atachiki kutoñojoka cheñi chiwahi nikusopoka mumuhetu waDiyabolu, chelukawu nawu anayikwati amomi kudi yena kulonda eleña nkeñelu yindi.+

3 Ilaña ilukaku chumichi neyi, mumafuku akukuminina+ mwakekala mpinji jakala. 2 Muloña antu akekala akakudikeña awenawu, akeña mali, akakudinka wanta, akakuditohesha, akakasawuntu, abulaña kwovwahila anvwali, abulaña kusakilila, abula kushinshika, 3 abula kukeña akwawu, abulaña kukeña kutiyañana nawakwawu, akakutwambila akwawu, abulaña kudiyuula, asweja kuzuwa, abula kukeña yuma yayiwahi, 4 akakufukejela akwawu, achinchika, akakudivwimba, akeña jakuzañalesha chatela akeñi Nzambi, 5 amwekanaña neyi amwakama Nzambi, ilaña akaanaña ñovu yaniku kwakama;+ dichi ambukaku kudi antu amuchidiwu. 6 Mukachi kanawa antu dimwafumaña antu ayaña mumatala mukubabala nakukokola ambanda azeya akweti nshidi jajivulu, alumbukila mukufwila kweñi-nakweñi, 7 adizaña mpinji yejima ilaña hiyatweshaña kwiluka chalala chikupuku.

8 Dichi neyi aYanesa naYamberesa chadikañiliwu naMosi, awa antu niwena adikañaña nachalala. Awa antu aluwankana chikupu muyitoñojoka nawa ayikaanaña kutalisha kuchikuhwelelu. 9 Hela chochu, kwosi kwakayawuku, muloña wusupi wawu wakamwekana kudi antu ejima neyi chichadiña kudi ana amayala ayedi.+ 10 Ilaña eyi wunalondeli chikupu ntañishilu yami, chihandilu chami,+ nkeñelu yami, chikuhwelelu chami, kudiwunjika kwami, kukeña kwami, kuumika kwami, 11 mumakabisha nimumakabi adi neyi inahitilimu muAntiyoki,+ muIkoniyumu+ nimuLisitira.+ Nomikili awa makabisha nawa Mwanta wampulwishili muyuma yejimiyi.+ 12 Kafwampi, ejima afwilaña kuhanda kwesekeja nakumwakama Nzambi muloña wakudikunda naKristu Yesu, niwena akayikabisha.+ 13 Ilaña antu atama niakakudimbana, akataminañaku hohu nawa akaluwañeshaña niwena akayiluwañeshaña.+

14 Ilaña eyi, twalekakuhu kulondela yuma yiwadizili niyuma yakushinjililiwu kulonda witiyi,+ muloña wuneluki antu akudizishiliyu 15 nawa kufuma kuwukeki+ wuneluki nsona jajila+ jinateli kukukwasha kwikala namaana kulonda akakwamwini kuhitila mukukuhwelela mudi Kristu Yesu.+ 16 Nsona yejima ayonena kudi Nzambi+ nawa yayiwahi kudizisha nachu,+ kuzuwila nachu, kwolola* nachu nikubabesha nachu mukuloña,+ 17 kulonda muntu waNzambi ekali washikilamu chikupu, wadiloñesha chikupu kuzata nyidimu yayiwahi yejima.

4 Nakukonkomweni kumesu aNzambi niaKristu Yesu wakasompesha+ amomi niafu,+ hakasolokayi+ nihakenzayi muWanta windi,+ nami: 2 Shimwinaku mazu,+ yishimwineña swayi-swayi mumpinji yayiwahi niyakala; zuwilaku,+ soñamishaku, konkomwenaku, nakudiwunjika chikupu nikutañisha chiwahi.+ 3 Muloña kwakenza mpinji yakakaanawu antu ntañishilu yayiwahi,*+ ilaña kwesekeja nakufwila kwawu aweni, akadivulishila antañishi akahoshaña* yuma yakeñañawu kutiya namatu awu.+ 4 Akaleka kutiyilila kuchalala nakusha maana kumpanji jakutwamba. 5 Ilaña eyi, hembaña yitoñojoka yeyi muyuma yejima, umikaku kukala,+ kalakalaña mudimu wamukakushimwina,* zataku chikupu mudimu weyi.+

6 Muloña anatachiki dehi kunhuñununa neyi mulambu wavinyu,+ nawa mpinji yami yakukasunuka+ yinashiki mukamwihi. 7 Ami nazuñi njita yayiwahi,+ natemuki lufuchi ndo-o nikumufunda,+ nawa nahembi chikuhwelelu. 8 Kufuma hayinu mpinji, ananhembeli chibaaba chakuloña+ chakanyinkayi Mwanta, nsompeshi waloña+ hanodu ifuku kwikala wufwetu wami,+ hela chochu, hakenka ami hohuku, ilaña ninowu ejima akeña kusoloka kwindi.

9 Zataku nañovu winzi swayi kudi ami. 10 Muloña Demasi+ nanshiyi muloña nakeñi nshakaminu yamakonu* nawa nayi kuTesalonika, Kereseni nayi kuÑalija, Titusa niyena nayi kuDalamatiya. 11 Nashali hohu naLuka. Wakenzi naMaku kunu, muloña yena wankwashaña chikupu mumudimu. 12 Ilaña Tikikusa+ namutemeshi kuEfwesesa. 13 Chiwakenzaña, wakansendeli kahuma kinashiyili kuTirowasi kudi Karapu ninyivuñilu, sweje-e yayitembi.

14 Alesanderi muchiji wawuneñu wankoñeli yuma yatama nankashi. Yehova* wakamufweta kwesekeja nanyidimu yindi.+ 15 Nineyi watela kubabala nindi, muloña wadikañili chikupu namazu etu.

16 Hakudihakwilaku kwatachi, kwosi wadiña kukabadi kamiku, ilaña ejima wawu anshiyili. Dichi bayi ayinka muloñaku. 17 Hela chochu, Mwanta wemeni kukabadi kami nawa wanyinkeli ñovu kulonda mudimu wakushimwina wuzatiki chikupu kuhitila mudi ami nikuwutiya kunyuza yejima;+ nawa ampulwishili kukanwa kamutupa.+ 18 Mwanta wakampulwisha kunyidimu yatama yejima nikuñamwina kulonda nakekali muWanta windi wamwiwulu.+ Kudi yena kwiikali kulema haya nyaaka nanyaaka. Ameni.

19 Wuñimushiliku aPrisika naAkwila+ niamwitala daOnesifwolu.+

20 Erasitusi+ washalili muKorinda, ilaña Tirofwimusa+ namushiyili wakata kuMiletusa. 21 Zataku nañovu jeyi jejima kulonda wushiki kunu henohu chishika kanda.

Anakwimushi kudi Ebulusa niPudensa niLinusa niKulodiya nianakwetu ejima.

22 Mwanta ekali naspiritu yiwamwekeshaña. Luwi lwindi lwasweja lwiikali nanenu.