MUKANDA WAYAKOBA

1 Ami Yakoba,+ nduñu yaNzambi niyaMwanta Yesu Kristu, kudi nyichidi 12 yapalañenamu:

Nayimushi!

2 Enu anakwami, zañalalenuña himunakuhita mukweseka kwashiyashana,+ 3 nanochu chimuneluki nenu chikuhwelelu chenu chinesekiwu muniyi njila, chikukolesha chikupu ñovu jenu jakuumika.+ 4 Ilaña, itejenu kuumika kumanishi mudimu waku, kulonda mwiikali awanina nawa alumbwa muyuma yejima, chakadi kukaankila chuma hela chimu.+

5 Dichi, neyi hakachi kenu hadi muntu wunabuli maana, atwalekihu kulomba kudi Nzambi,+ nawa wukumwinka,+ muloña wahanaña kudi antu ejima namuchima wumu chakadi kuhoshola.+ 6 Ilaña atwalekihu kulomba nachikuhwelelu+ chakadi kujinoka hela chanti,+ muloña muntu wajinokaña wudi neyi dinkanda dahakaluñalwiji dinakulelulawu kudi mpepela nawa dinakubwankañila. 7 Kafwampi, muntu wamuchidiwu bayi akuhwelela kutambwila chuma hela chimu kudi Yehovaku;* 8 muntu yeniwu himukanyichima yiyedi,+ hemanaña chakola munjila jindi jejimaku.

9 Ilaña manakwetu wabula kulema,* azañalali nanochu chinamutuumbakeshiwu,+ 10 nawa manakwetu waheta, niyena azañalali nanochu chinamuzozeshiwu,+ muloña wakakisika neyi nkenu yamwisaña. 11 Muloña neyi chaselaña itena nankanza yadu nakuumisha mutondu, ninkenu yawu hiyikuhuluka nilubanji lwawu hilukumana, dichakamumwekena nisamaheta, wakafwa henohu wuchidi kufwila maheta.+

12 Wudi namuzañalu yowu muntu watwalekañahu kuumika hanakuhitayi mukweseka,+ muloña neyi Nzambi amutiya kuwaha, wakatambwila chibaaba chawumi+ chakanayi Yehova* antu atwalekañahu kumukeña.+ 13 Muntu wudi mukweseka, hatela kuhosha nindi: “Anakuñeseka kudi Nzambiku.” Muloña Nzambi hiyamwesekaña nayuma yatamaku, hela yena yomweni hesekaña muntu hela wumuku. 14 Ilaña muntu wejima amwesekaña kuhitila mukumukokola nikumudimbeka* nakufwila kwindi yomweni.+ 15 Kufumahu, neyi kufwila kusweja chikupu,* kwaleteshaña muntu kukoña nshidi;* nawa hanyima yakwila nakoñi dehi nshidi, mwafumaña kufwa.+

16 Enu anakwami inakeña, bayi ayidimbaku. 17 Chawaana chejima chachiwahi nichawaana chejima chabadika kuwaha,* chafumaña mwiwulu,+ chenzaña hamaseki kufuma kudi Tata yetu wayejeji yamwiwulu,*+ wabulaña kubalumoka neyi chabalumokaña nyevulu.*+ 18 Chineli yadiña hinkeñelu yindi, watuvweli nezu dachalala+ kulonda twiikali nyikaabu yatachi yahayuma yaleñeliyi.+

19 Enu anakwami inakeña, ilukenu chumichi: Muntu wejima anyakaleña kutiya, alabeña kuhosha,+ alabeña kuzuwa,+ 20 muloña kuzuwa kwamuntu, hikwaletaña kuloña kwaNzambiku.+ 21 Dichi, lekenu kwila yuma yawuzondu yejima niyuma yatama* yejima,+ nawa itejenu namuchima wawovu izu dinakutumbawu mudi enu dinateli kuyamwina.

22 Hela chochu, ikalenu akakwila mwaya izu,+ bayi mwikala akakutiya hohu nakudidimba enu aweni nayitoñojoka yakutwambaku. 23 Muloña neyi muntu himukakutiya hohu izu, ilaña kwilamu nehi,+ iwu muntu wudi neyi muntu wunakuditala kumesu indi muchibanjilu. 24 Muloña waditalaña yomweni, kuhiñahu hakufumaku, nawa hohenohu hakulalamena chinakumwekanayi. 25 Ilaña muntu washinshikaña chikupu mulushimbi lwawanina+ lwakusubuka nakululondela, nekali mukakukalakala mudimu, bayi mukakutiya nakulalamenaku; nawa wukuzañalala nayuma yelañayi.+

26 Dichi neyi muntu wadimonaña nindi himukakudifukula kudi Nzambi, ilaña hayuulaña idimi dindiku,+ nakudimba muchima windi yomweni, nawa kudifukula kwindi kwamukunkulwayi. 27 Kudifukula kutooka nawa kwakadi majilu kwesekeja nachamonañayi Nzambi yetu nawa Tata, dikweniku: kuhemba chiwahi anyana anshona+ niambanda antuluwa+ anakumona lukadi+ nikudaambula kuyuma yatama yamukanu kaayi.+

2 Enu anakwami, komana munakukakela kuchikuhwelelu chaMwanta wetu wakulema Yesu Kristu, hampinji yoyimu munakumwekesha chaambu?+ 2 Neyi muntu wunavwali tuzeya twawuru kunyinu niyakuvwala yayiwahi nankashi eñila mumunapompeli nawa mwiñila nikazweñi nayakuvwala yamajilu, 3 komana mukulemeshaku wunavwali yakuvwala yayiwahi nankashi nakumuleja nenu, “Eyi shakamaku hanidi iluña hahawahi,” nawa kazweñi mumuleja nenu, “Eyi twalekakuhu kwimana” hela nenu, “Shakamaku hana hinadataña nyendu yami” tahindi?+ 4 Neyi dichimwelaña, komana himudi nachaambu hakachi kenuku,+ nawa himunekali ansompeshi afuukulaña mwatamaku?+

5 Tiyenu, enu anakwami. Komana Nzambi hatondeli antu amonañawu mukaayi nawu hiyatuzweñi kulonda aheti muchikuhwelelu+ nikwikala answana aWanta wakaniniyi antu amukeñaku?+ 6 Ilaña enu munasawuli atuzweñi. Komana akamaheta hidiwu ayikabishaña+ nakuyikokañeshela kuyota yanyiloñaku? 7 Komana hiyasawulaña ijina dadiwahi dimwemenañakuku? 8 Dichi, neyi mwalondelaña lushimbi lwawanta kwesekeja nansona, lwakwila nawu, “Watela kukeña mukwenu neyi chiwadikeña eyi aweni,”+ munakwila chiwahi. 9 Ilaña neyi mutwalekahu kumwekesha chaambu,+ munakuvulumuna nawa ilu lushimbi lunayifwishi namuloña nawu mudi akakufumpa nshimbi.+

10 Muloña neyi muntu ovwahila Nshimbi jejima, ilaña afumpahu lushimbi lumu, nekali mukakufumpa jejima.+ 11 Muloña owu wahosheli nindi, “Bayi wila wujilaku,”+ cheñi wahosheli nindi, “Bayi wujaha muntuku.”+ Dichi, neyi eyi hiwelaña wujilaku ilaña wajahanaña, wunekali mukakufumpa nshimbi. 12 Hoshenuña nikwila yuma neyi yelañawu antu akasompeshawu nalushimbi lwawantu asubuka.*+ 13 Muloña muntu wabulaña kutiyila akwawu luwi, akamusompesha chakadi kumutiyila luwi.+ Luwi lwemikaña mushindu wunsompeshi.

14 Enu anakwami, chumanyi chikuwaninamu muntu neyi ahosha nindi wukweti chikuhwelelu, ilaña hakweti nyidimuku?+ Chikuhwelelu chamuchidiwu hichikumwamwinaku, tahindi?+ 15 Neyi amanakwetu hela ahela adi nawuvu* nawa hiyakweti yakuda yashikila yanodu ifukuku, 16 ilaña wumu hakachi kenu hakuyila nindi, “Yaña mukuwunda; ikalenu neyena nawa ikutenu chikupu,” ilaña enu kuyinka yuma yinakaankili nyijimba yawu nehi, hanu dinu chikuyikwasha ñahi?+ 17 Chochimu, chikuhwelelu chakadi nyidimu, chafwa.+

18 Hela chochu, muntu wumu wukuhosha nindi: “Eyi wukweti chikuhwelelu, ami nikweti nyidimu. Nleji chikuhwelelu cheyi chakadi nyidimu, ninami nukukuleja chikuhwelelu chami nanyidimu yami.” 19 Eyi wakuhwelela neyi kwekala Nzambi wumu, hidimuku? Wunakwila chachiwahi. Andemoni niwena dichakuhwelelawu nawa azaalaña.+ 20 Eyi muntu wabula maana, hiwunakukeña kwiluka neyi chikuhwelelu chakadi nyidimu chamukunkulwayiku, tahindi? 21 Komana tata yetu Abarahama hiyamuteneni nawu waloña muloña wachuma cheliliyiku? Diimu, amuteneni nawu waloña hanyima yakusha mwanindi Isaka hakameña.+ 22 Wunamoni neyi chikuhwelelu chindi chendeleleña hamu nanyidimu yindi nawa chikuhwelelu chindi achiwanishili nanyidimu yindi+ 23 ninsona yashikijeweli, yahosha nawu: “Abarahama wamukuhweleleli Yehova* nawa amuteneni nawu waloña,”+ amuteneni cheñi nawu ibwambu daYehova.*+

24 Munamoni nenu muntu amutenaña kuloña muloña wanyidimu, bayi nachikuhwelelu hohuku. 25 Munjila yoyimu, komana Rahaba chivumbi niyena hiyamuteneni nawu waloña muloña wanyidimu yindi chelili atambwili antemesha nachisambu nakuyileja nindi afuntili munjila yacheñiku?+ 26 Chalala, neyi chafwa mujimba wakadi spiritu,*+ dichi nichikuhwelelu chakadi nyidimu chafwa.+

3 Enu anakwami, amavulu hakachi kenu hiyatela kwikala antañishiku, nanochu chituneluki netu akatusompesha chikupu.+ 2 Muloña wejima wetu twahukanaña* kakavulu.+ Neyi kudi muntu wabulaña kuhukana mumazu, himuntu wawanina, nawa nateli nikuyuula mujimba windi wejima. 3 Neyi tusha nyibulu* kutunwa twawatuwalu netu atwovwahileña, twateñululaña ninyijimba yawu yejima. 4 Toñojokenu cheñi hadi jimbopolu: Hela chakwila jamaneni nankashi nawa ajikumpulaña kudi mpepela yasweja, ajiteñululaña nachilapu chanyanya chikupu nakuya kwejima kunakukeña kuyayi mukakuteñulula.

5 Munjila yoyimu, idimi hichidi chamujimba chanyanya, ilaña dadivwimbaña nankashi. Toñojokenu kesi kantesha chikwochaña mpata yeneni chikupu! 6 Idimi nidena hikesi.+ Hakachi kayiidi yetu yamujimba, idimi demenañaku yuma yabula kuloña yejima, muloña datamishaña mujimba wejima+ nikwocha chihandilu chamuntu chejima,* nawa idimi nidena adochaña nakesi muGehena.* 7 Muloña nyichidi yejima yawanyama amwisaña, atuda, anyama asemaña mateta* niyileñaleña yamukaluñalwiji ayifwomonaña, nawa ayifwomonahu dehi kudi antu. 8 Ilaña kwosi muntu wunateli kufwomona idimiku. Dakala kwolola, dakatishanaña nawa denzala wulembi wafwana.+ 9 Nedimi dodimu, twamushimekaña Yehova,* Tata, nawa nedimi dodimu twashiñaña antu aleñawu “muchifwanisha chaNzambi.”+ 10 Mukanwa kokamu mwafumaña nkisu nikushiñana.

Enu anakwami, yuma hiyatela kwikalaña muniyi njilaku.+ 11 Komana kaseloki kokamu kanateli kuseluka menji amawahi* nialula? 12 Enu anakwami, komana mutondu wachikuyu wukutwesha kusoña nyiolivi, hela mutondu wamuvinyu wukutwesha kusoña nyikuyu?+ Hela tuhu menji amuñwa hiyanatweshi kufumisha menji amawahiku.

13 Hinyi wukweti maana nikwiluka hakachi kenu? Muntu yeniwu ekali nayilwilu yayiwahi yamwekeshaña nawu welaña yuma yejima namuchima wawovu wafumaña mukwikala namaana. 14 Ilaña neyi mudi nechima datama+ niyikonkojola*+ munyichima yenu, bayi mudisambaña+ nikutwambila chalalaku. 15 Awa bayi neyi himaana afumaña mwiwuluku; ilaña himaana ahamaseki,+ awunyama nawa awundemoni. 16 Muloña kwejima kudi ichima niyikonkojola,* dikwekalaña nikuluwankana niyuma yawuzondu yejima.+

17 Ilaña maana afumaña mwiwulu, chatachi atooka,+ kuhiñahu awunda,+ amwovu muchima,+ anyakalaña kwovwahila, enzala naluwi ninyikaabu yayiwahi,+ hiyakweti chaambu+ hela wunfwikijiku.+ 18 Kubombelahu, antu aletaña kuwunda,+ atumbaña mumpinji yakuwunda+ nawa añulaña nyikaabu yakuloña.

4 Indi majita nimadombu adi hakachi kenu anakufuma kudihi? Komana anakufuma muyuma yafwilaña mujimba wenu yazuñaña mukachi kenuku,* tahindi?+ 2 Mwafwilaña yuma, ilaña himwekalaña nayuku. Mwajahaña akwenu nikuyitiyila lwisu, ilaña yuma yimwafwilaña himwayitambulañaku. Mwazuñaña madombu ninjita.+ Himukweti yumiyiku, muloña himwalombañaku. 3 Neyi mulomba, himwatambwilañaku, muloña mwalombaña yumiyi nankeñelu yakuyizatisha munjila yatama, kulonda muyikisañeni kukufwila kwamujimba wenu.

4 Enu ayivumbi,* muneluki wanyi nenu kukwata wubwambu nakaayi hiwulumbu naNzambiku, tahindi? Dichi, muntu wejima wunakukeña kukwata wubwambu nakaayi, nakudilisha yomweni kwikala chilumbu chaNzambi.+ 5 Indi kwiji munakutoñojoka nenu nsona yahosha chamukunkulwayi nawu: “Spiritu yalwisu yashakamaña mudi etu yafwilaña yuma yashiyashana” tahindi?+ 6 Hela chochu, luwi lwasweja lwatutiyilañayi Nzambi lwabadika chikupu. Dichi nsona yahosha nawu: “Nzambi wadikañaña nawakakudivwimba,+ ilaña akakudizoza wayitiyilaña luwi lwasweja.”+

7 Dichi, mwovwahilenu Nzambi;+ ilaña dikañenu naDiyabolu,+ nawa wukuyitemuka.+ 8 Swinenu kwakwihi naNzambi, niyena wukuswina kwakwihi nanenu.+ Enu akanshidi, tookeshenu makasa enu,+ nawa enu akanyichima yiyedi,+ tookeshenu nyichima yenu. 9 Tiyenu kutama kumuchima, neñenu nawa dilenu.+ Kuseha kwenu kubalumuki kuneña, nawa muzañalu wenu wubalumuki kudihomba. 10 Dizozenu kumesu aYehova,*+ niyena wukuyitohesha.+

11 Dichi enu anakwami, lekenu kudihosha chatama wumu namukwawu.+ Muntu wejima wukumuhosha manakwindi chatama hela wukumusompesha manakwindi, dikwila nawu nakuhosha nshimbi chatama nawa nakusompesha nshimbi. Dichi neyi wusompesha nshimbi, hiwudi mukakwila mwaya nshimbiku, ilaña wudi nsompeshi. 12 Kwekala hohu Mukakuhana Nshimbi wumu niNsompeshi wumu,+ diyi wunatweshi kwamwina nikujilumuna.+ Ilaña eyi yeyinyi mwaka wusompeshi mukwenu?+

13 Tiyenu enu mwahoshaña nenu: “Dalelu hela kumadiki twakaya kuniwu musumba, twakashakamaku chaaka chimu nawa twakazata mudimu wakulanda nakulandulula kulonda twakawaninimu mali,”+ 14 kutoña himuneluki chakekala chihandilu chenu kumadikiku.+ Muloña enu mudi neyi mbundu yamwekanaña hakapinji kantesha, kuhiñahu yijimañana.+ 15 Ilaña mwatela kuhosha nenu: “Neyi Yehova* neteji,+ twakahanda nawa twakela ichi hela china.” 16 Ilaña ichi, munakudinka wanta mukudisamba kwenu kwamukunkulwayi. Kudisamba kwejima kwamuchidiwu, kwatama. 17 Dichi, neyi muntu weluka kwila mwaloña, ilaña kwilamu nehi, neli nshidi.+

5 Ichi dinu twayenu, enu akamaheta, dilenu nikutwa makumbu hamakabi anakwinza hadi enu.+ 2 Maheta enu anatoki dehi nawa yakuvwala yenu anayidii dehi kudi tububu.+ 3 Wuru yenu nisiliva yenu, yineli dehi kadala, nawa kadala kayu kakekala wunsahu wakuyifwisha namuloña nawa kakada nyijimba yenu. Yuma yimunadilumbikili yakekala neyi kesi mumafuku akukuminina.+ 4 Tiyenu! Wufwetu wumunabuli kuyifweta akakukalakala añwili maha enu, wunatwalekihu kubilela, nawa kubilela kwawakakumuna kwakukeña kuyikwasha kunashiki dehi kumatu aYehova* wamazaza.+ 5 Munashakami chihandilu chachiwahi nikuditiyisha kuwaha enu aweni hamaseki. Munanunishi nyichima yenu hefuku dakuyijaha.+ 6 Munafwishi namuloña; munajahi mukakuloña. Komana hanakudikaña nanenuku?

7 Dichi enu anakwetu, diwunjikenuña kushika nimpinji yakwikalahu kwaMwanta.+ Tiyenu! Ndimi watalilaña nyikaabu yayiwahi yahamaseki, wadiwunjikaña nakuhembelela nyikaabu sampu nvula yatachi niyakukumishaku yinashiki.+ 8 Ninenu nawa diwunjikenuña,+ koleshenuña nyichima yenu, muloña kwikalahu kwaMwanta kunaswini dehi kwakwihi.+

9 Enu anakwetu bayi muditoobeshaña* wumu namukwawuku, kulonda akabuli kuyisompesha.+ Tiyenu! Nsompeshi nemani dehi hayiisu. 10 Enu anakwetu, imbujolenuña chakutalilahu chakuumika yuma yatama+ nichakudiwunjika+ chawatuprofwetu ahosheleli mwijina daYehova.*+ 11 Tiyenu! Antu anomiki twayimonaña netu akweti muzañalu.*+ Munatiyi chomikiliyi Yoba+ nawa munamoni nkisu yamukiswililiyi Yehova,*+ nenu Yehova* wukweti wushona chikupu niluwi.+

12 Enu anakwetu, chuma chabadika hayuma yejima, lekenu kusanyika, chili kutena iwulu hela kutena iseki hela kutena chuma chidi chejima. Ilaña neyi muhosha nenu “Eña,” chiikali eña nawa “Inehi,” chiikali inehi,+ kulonda abuli kuyisompesha.

13 Hakachi kenu hadihu muntu wunakumona kukala? Atwalekihu kulomba.+ Hadihu muntu wunazañalali? Yembeña masamu.+ 14 Hakachi kenu hadihu muntu wakata? Atambiki akulumpi+ achipompelu kulonda amulombeliku nakumuwayisha manji+ mwijina daYehova.* 15 Nawa kulomba kwachikuhwelelu kukukolesha muntu wakata,* nawa Yehova* wukumuhindwisha. Cheñi, neyi nakoñi nshidi, akumwanakena.

16 Dichi, shimunenu nshidi jenu hatooka+ kudi wumu namukwawu nikudilombelaku wumu namukwawu kulonda ayuuki. Kulomba kwakulembelela kwamuntu waloña kwekala nañovu chikupu.*+ 17 Elija wadiña muntu watiyileña neyi chitwatiyaña etu, ilaña chalombeliyi chikupu nindi nvula bayi yinokaku, chalala nvula yanokeleli wanyi hamaseki hadi yaaka yisatu natukweji 6.+ 18 Kuhiñahu walombeli cheñi, nawa iwulu danokesheli nvula nawa iseki dedishili nyikaabu.+

19 Enu anakwetu, neyi wumu hakachi kenu anamusenwishi muchalala, nawa mukwawu yamufuntisha, 20 ilukenu nenu muntu wejima wunakwashi mukakukoña nshidi kufuma kuyuma yatama+ yinakoñiyi, wakaamwina wumi windi nawa akamwanakena nshidi jindi jajivulu.+