MUKANDA WAMUCHIYEDI WAPETULU

1 Ami Shimona Petulu, nduñu nawa kapostolu kaYesu Kristu, inakusonekela antu ejima anekali nachikuhwelelu chalema neyi chetu kuhitila mukuloña kwaNzambi yetu niChamwinu chetu Yesu Kristu:

2 Luwi lwasweja nikuwunda kuyivulili enu kuhitila mukwiluka kwalala kwakumwiluka+ Nzambi niYesu Mwanta wetu, 3 muloña ñovu jaNzambi jinatwinki* yuma yejima yatukwashaña mukuhanda kwetu nimukumwakama Nzambi kuhitila mukwiluka kwalala kwaNowu watutambikili+ nakulema kwindi nikuwaha kwindi. 4 Muyumiyi, natwinki* chikaninu chalema nawa chasweja kutoha,+ kulonda mwiikali nayilwilu neyi yaNzambi+ kuhitila muyumiyi, chineli munapuluki kukutoka kwamukaayi kwenzaña nakufwila kwatama.*

5 Muloña wachumichi, zatenu nañovu chikupu+ kulonda kuchikuhwelelu chenu mubombeliku kuwaha,+ kukuwaha kwenu mubombeliku kwiluka,+ 6 kukwiluka kwenu mubombeliku kudiyuula, kukudiyuula+ kwenu mubombeliku kuumika, kukuumika kwenu mubombeliku kumwakama Nzambi,+ 7 kukumwakama Nzambi kwenu mubombeliku kukeña kwakukeña anakwenu, kukukeña kwenu kwakukeña anakwenu mubombeliku kukeña.+ 8 Muloña neyi iyi yilwilu yiikala mudi enu nawa yivula nankashi, yikuyiletesha mubuli kwikala azeya hela mubuli kuleka kusoña nyikaabu+ kutalisha kukwiluka kwalala kwakumwiluka Mwanta wetu Yesu Kristu.

9 Muloña muntu wejima wukubula kwikala naniyi yilwilu, himputamesu, nabuti hamesu indi kuchiina kumona chejeji,*+ nawa navulameni kutookesha kwamutookesheliwu kunshidi jindi+ jakoñeliyi kunyima. 10 Dichi enu anakwami, zatenu nañovu kulonda mukwatishi kukukooleka kwenu kwakuyitambika+ nikwakuyitonda, muloña neyi mutwalekahu kubombelaku iyi yilwilu, chakadi nikujina mwakakañanya wanyi.+ 11 Kafwampi, neyi mwila mwenimu, akayikiswila chikupu nawa akayiteja kwiñila muWanta wahaya nyaaka waMwanta+ wetu nawa Chamwinu chetu Yesu Kristu.+

12 Muloña wachumichi, mpinji yejima nakeñaña kuyanukisha hayumiyi, hela chakwila mwayiluka dehi nawa mwashimata dehi chikupu muchalala chidi mudi enu. 13 Ilaña namoni nami, chachiwahi kuyanukisha cheñi hayumiyi hinichidi muniyi tabanaka,*+ 14 nanochu chinneluki nami katataka nishiyi iyi tabanaka, neyi chanlejeliyi Mwanta wetu Yesu Kristu chakadi kuhita mumbadi.+ 15 Mpinji yejima nukuzataña nañovu jami jejima kulonda neyi nayi dehi, mwakatweshi kwanuka* iyi yuma enu aweni.

16 Chitwayilejeli hañovu nikwikalahu kwaMwanta wetu Yesu Kristu, hitwashindameneni hampanji jakutwamba jahosheleñawu antu mukubabala kwawuku, ilaña twekalili ayinsahu amweni kulema kwindi kwabadika.+ 17 Muloña yena watambwilili kulema nikalemesha kudi Nzambi Tata, hamulejeliwu awa mazu* nakulema kwabadika nawu: “Iwu diyi Mwanami, inakeña, inatiyaña kuwaha.”+ 18 Chalala, awa mazu twayitiyili anakufuma mwiwulu hitwadiña nindi hampidi yajila.

19 Dichi tukweti izu dawuprofwetu dalala chikupu, nawa enu munakwila chiwahi nankashi chimunakushaku maana neyi kwinoñu+ dinakutoñekela mwiluña mudi mwidima (sampu nichikukucha nawa nichikusela ntanda wakumacha+) munyichima yenu. 20 Muloña enu munasambili kwiluka chumichi nenu, kwosi wuprofwetu wamuNsona wadilumbulwilañawu antu awenawuku. 21 Muloña kwosi wuprofwetu wenjili kwesekeja nankeñelu yamuntuku,+ ilaña antu ahosheleña jafumineña kudi Nzambi kwesekeja nachayilombweliwu* naspiritu yajila.+

2 Hela chochu, mukachi kanawa antu mwafumini niatuprofwetu akutwamba, neyi chimukafuma nimukachi kenu+ antañishi akutwamba. Wenawa akaleta tumazanvu mukuswamujoka twajilumunaña, nawa akamukaana niyomweni wayilandili,+ nakudiletela awenawu kujilumuka swayi-swayi. 2 Kubombelahu, antu amavulu akalondela yilwilu yawu yawukapwa nsonyi,*+ nawa muloña wawena, njila yachalala akayitena kutama.+ 3 Cheñi nawa, muloña walwisu lwawu akayidimba enu namazu akutwamba. Ilaña wunsompeshi wawu wayifuukwililiwu kushankulu,+ hiwunakulabaku, nawa kujilumuka kwawu, chalala kunakwinza.+

4 Chakadi nikujina, Nzambi wababesheli añelu avulumwini+ nakuyinatila muTatarusi*+ nakuyikasa mumaleñi* amwidima wasweja chikupu nakuyihemba kulonda akayisompeshi.+ 5 Nawa wababesheli nikaayi+ kakushankulu, ilaña wahandishili Nowa mukakushimwina kuloña+ hamu nawantu amakwawu 7+ haleteliyi dibaji mukaayi mwadiña antu abulileña kumwakama Nzambi.+ 6 Nawa wayifwishili namuloña+ kuhitila mukwocha nyisumba yaSodoma naGomora yejima, chumichi chekala chakutalilahu kudi antu abulaña kumwakama Nzambi kutalisha hayuma yinakwinza.+ 7 Nawa wapulwishili Loti+ muntu waloña, owu waneñeli chikupu muloña wayilwilu yawukapwa nsonyi* yawantu akoñaña yatama, 8 eña, ona iyala waloña, henohu nakushakama hakachi kanowu antu atama nankashi, wamweneña chashakamineñawu nawa watiyileña yuma yahosheleñawu, dichi waneñeleña hefuku-hefulu. 9 Dichi, Yehova* weluka chakupulwisha antu amwakamaña adi mukweseka,+ ilaña antu abula kuloña ayihemba kulonda akayijilumuni* hefuku dawunsompeshi,+ 10 sweje-e dinu, antu adiñijaña muyilwilu yawuvumbi nawakwawu+ kulonda atamishi akwawu nawa adiwulaña akawuswa.*+

Chineli ahamuka nawa akeñaña kwila munakeñi nyichima yawu, hiyatiyaña woma kuhosha antu alema mazu atamaku, 11 ilaña añelu, hela chakwila akweti ñovu chikupu niwuswa kubadika awa antu, hiyayifwishaña namuloña namazu awu akasawuntuku, muloña wakumulemesha Yehova.*+ 12 Ilaña awa antu asawulaña yuma yabula kwilukawu,+ akayijilumuna muloña wayilwilu yawu yatama, neyi anyama abulaña kutoñojoka alombolewaña namaana asemukañawu nawu,* nawa asemukaña kulonda ayikwati nikuyijilumuna, 13 makabi akekala wufwetu wayilwilu yawu yatama.

Wena amonaña nawu chachiwahi kudiñija muchihandilu chakudiluñisha,+ hela tuhu mumpinji yamwaana. Adi neyi mabeña ahachakuvwala nimahuji akumesu muntañishilu yawu yamakudi iku anakudiila hamu nanenu.+ 14 Mesu awu enzala wujila,+ hiyatweshaña kuleka kukoña nshidiku, nawa akokolaña antu* azeya muchikuhwelelu.* Akweti nyichima yadizishawu lwisu. Hiyanyana ashiñewa. 15 Anayisenwishi muloña wakushiya njila yoloka. Analondeli njila yaBalami+ mwana kaBeyori, owu wakeñeli wufwetu wayilwilu yatama,+ 16 ilaña amuzuwilili muloña wafumpili nshimbi jaloña.+ Kanyama wabulaña kuhosha wasendaña yiteli wahosheli nezu damuntu, wakañesheli yilwilu yakuzaluka yaniwu kaprofwetu.+

17 Awa antu hituseloki twakadi menji, himbundu yalelulañawu nampepela yasweja, nawa anayihembeli mwidima wasweja chikupu.+ 18 Ahoshaña yuma yatiyakanaña neyi yalema nankashi, ilaña yamukunkulwayi. Kuhitila mukufwila yuma yafwilaña mujimba+ niyilwilu yawukapwa nsonyi,* anakokoli antu anafumi tuhu nakutemuka mudi antu akoñaña yuma yatama.+ 19 Anakuyishiika kwikala asubuka, kutoña awenawu hiyanduñu akutoka;+ muloña neyi muntu wejima amwimika mushindu kudi mukwawu, dikwila nawu nekali nduñu yindi.*+ 20 Chalala, neyi hanyima yakwila anatemuki dehi kukuditamisha kwamukaayi+ kuhitila mukwiluka kwalala kwakumwiluka Mwanta nawa Chamwinu Yesu Kristu, ilaña adiñija cheñi muyumiyi nawa yiyimika mushindu, dikwila nawu chihandilu chawu chakukuminina chinatami chikupu kubadika chakusambila.+ 21 Chadi kuwaha neyi abulili kwiluka chikupu njila yakuloña, kubadika hanyima yakwiluka iyi njila, hiyakuleka kulondela lushimbi lwajila lwatambwililiwu.+ 22 Dichi chishimu chalala chinashikijewi kudi wena, chahosha nawu: “Kawa nafunti cheñi kumasanjila indi, ningulu* anaweleshiwu nafunti cheñi nakudivuba mumalowa.”+

3 Enu akwetu itwakeña, iwu dimukanda wamuchiyedi winnakuyisonekela wakusañumuna wuswa wenu wakutoñojoka chiwahi kuhitila mukuyanukisha nsañu jimu,+ neyi chinayisonekeleli mumukanda wami watachi, 2 nami mwanukeña yuma yahosheliwu dehi* atuprofwetu ajila nilushimbi lwaMwanta nawa Chamwinu, lwayinkeliwu kuhitila mudi apostolu enu. 3 Chatachi, ilukenu chumichi nenu, mumafuku akukuminina mwakenza akakuseha yuma yayiwahi nawa akakoña yuma yatama yafwilañawu awenawu,+ 4 nakuhosha nawu: “Indi chikaninu chakwikalahu kwindi chakanawu chidi kudihi?+ Muloña kufuma tuhu mpinji yafwiliwu ankakulula jetu, yuma yejima yinatwalekihu kwikala neyi chiyadiña kufuma haleñeliwu yuma.”+

5 Muloña adiwulaña mumushikila ichi chikuma chalala chakwila nawu, mawulu adiña kwoku kushankulu nawa iseki adaambwili kufuma kumenji nimukachi kamenji nezu daNzambi;+ 6 nawa muloña wayumiyi, kaayi kadiñaku yina mpinji kajilumukili hampinji yikenzeli menji.+ 7 Ilaña kuhitila mwizu dodimu, mawulu nimaseki adiku hayinu mpinji, anayihembeli kesi nawa anakuyihemba kushika nikwifuku dawunsompeshi nawa dakujilumuna antu abulaña kumwakama Nzambi.+

8 Hela chochu, enu akwetu itwakeña, bayi mudiwula ichi chikuma chalala chakwila nawu kudi Yehova* ifuku dimu desekana nayaaka 1,000 nawa yaaka 1,000 yesekana nefuku dimuku.+ 9 Yehova* halabaña kushikija chikaninu+ chindi neyi chatoñojokañawu amakwawuku, ilaña wadiwunjika nanenu muloña hakeñaña muntu hela wumu akakisikiku, ilaña wakeñaña antu ejima abalumuki munyichima.+ 10 Ilaña ifuku daYehova*+ dakenza neyi chenzañayi ikombi,+ dichi hefuku denodu mawulu akahita+ nalushindu lwasweja, ilaña yuma yamwiwulu yakasuñunuka muloña wakutata chikupu neyena, nawa iseki ninyidimu yadu akayisolola hatooka.+

11 Chineli yuma yejimiyi yikasuñunuka chochichi, toñojokenu muchidi wawantu imwatela kwikala. Mwatela kwikala antu akweti yilwilu yakujila nawa kalakalenuña nyidimu yakumwakama Nzambi, 12 hampinji yimunakuchiñilila nikwanuka* chikupu kwikalahu kwefuku daYehova,*+ mwakajilumwinawu+ mawulu nanyizuzu yakesi, nawa yuma yamwiwulu niyahamaseki yikasuñunuka neyena dasweja chikupu! 13 Ilaña kudi mawulu amaha niiseki dadiha jitwatalilaña kwesekeja nachikaninu+ chindi, nawa mwenimu dimwakekalaña kuloña.+

14 Dichi, enu akwetu itwakeña, chineli munakutalila yumiyi, zatenu nañovu jenu jejima kulonda akayiwani akadi ihuji, akadi hakuyinkela muloña nawa akayiwani mukuwunda.+ 15 Kubombelahu, monenuña kudiwunjika kwaMwanta wetu nenu hiwamwinu, neyi chasonekeliyi nimanakwetu itwakeña Pawulu kwesekeja namwaya maana amwinkeliwu.+ 16 Kafwampi, yena wasoneka kutalisha hayumiyi munyikanda yindi yejima. Hela chochu, yuma yikwawu yidi muniyi nyikanda yakala kutiyishisha nawa yumiyi anakuyiheñesha kudi akwakuyamba* nikudi antu azeya muchikuhwelelu,* neyi chelañawu naNsona jikwawu nakudiletela awenawu kujilumuka.

17 Dichi enu akwetu itwakeña, chineli munelukili chadimu yumiyi, dihembenuña kulonda abuleña kuyiluwañesha kudi akakuyamba niantu azeya muchikuhwelelu nayiluwa yawantu akoñaña yuma yatama nakuyiletesha enu kubula kwimana chakola mbe-e munjila yaloña.+ 18 Ilaña twalekenuhu kupama muluwi lwasweja nimukwiluka kwakumwiluka Mwanta wetu nawa Chamwinu Yesu Kristu. Kudi yena kwiikali kulema hayinu mpinji nihaya nyaaka nanyaaka. Ameni.