MUKANDA WAMUCHISATU WAYOWANU

1 Ami mukulumpi,* inakukusonekela eyi Gayusi wakeñewa, inakeña nankashi.

2 Eyi mukwetu inakeña, inakulomba nami muyuma yejima wutwalekihu kwila chiwahi nikwikala wakola kumujimba, neyi chiwunakwila.* 3 Muloña nazañaleli chikupu chenjiliwu amanakwetu nakushimuna wunsahu hachalala chiwukweti, chiwunakutwalekahu kwenda muchalala.+ 4 Kwosi chuma chanzañaleshaña* nankashi kubadika ichi: chakutiya nawu anyanami anatwalekihu kwenda muchalala.+

5 Eyi mukwetu inakeña, wamwekeshaña kashinshi keyi muyuma yiwakalakelaña amanakwetu hela chakwila hiyenyi.+ 6 Anashimuni kukeña kweyi kuchipompelu. Mwani wakayifuntishi kwesekeja namwatiyañayi Nzambi kuwaha.+ 7 Muloña ayili nakushimwina hejina dindi, nawa hiyatambwilihu chuma+ kunyuzaku. 8 Dichi tukweti mudimu wakumwekeshela chisambu antu amuchidiwu,+ kulonda twiikali akakukalakala hamu nawu muchalala.+

9 Kudi nsañu yinasonekeleli chipompelu, ilaña Diyotefwesi, owu wakeñaña kwikala watachi mukachi kawu,+ hetejaña nakalemesha yuma yitwahoshañaku.+ 10 Dichakaletesha neyi nenzi, nakasololi nyidimu yinakukoñayi yakutaandisha nsañu yamakudi hadi etu.*+ Hakuminaña dakwila mwenimuku, ilaña wakaanaña nikutambwila amanakwetu+ nakalemesha; nawa owu akeñaña kuyitambwila, wayikaanishaña nikuyihaña muchipompelu.

11 Eyi mukwetu inakeña, bayi wimbujola yuma yatamaku, ilaña imbujolaña yayiwahi.+ Muntu welaña yuma yayiwahi wekala kukabadi kaNzambi.+ Wakoñaña yuma yatama hamumona Nzambiku.+ 12 Ejima anamushimuni chiwahi Demeterusa nichalala nichena chinamwekeshi chumichi. Kafwampi, ninetu tunakushimuna wunsahu hadi yena, nineyi weluka neyi wunsahu wutwashimunaña walala.

13 Nadiña nansañu yayivulu yakukusonekela, ilaña hinnakukeña kutwalekahu kukusonekela nansonekeshu* ninawulombuku.* 14 Hela chochu, nakuhweleli kukumona katataka nawa twakahanjeki mesu-namesu.

Kuwunda kwiikali naneyi.

Amabwambu anakwimushi. Wuñimushiliku amabwambu hejina-hejina.