Mukanda Kufuma Kwizanvu Dalombolaña

Kudi Ana Kwetu niAhela:

Hayaaka yantesha yinahituhu, muKaposhi Kakutalila kawantu amavulu atachikili kusonekamu chibaaba chachiha chakwila nawu “Imbujolenu Chikuhwelelu Chawu.” Kufuma tuhu hayina mpinji, asonekañamu chibaaba chamuchidiwu mumpinji mumpinji nawa chatuhizumwishaña.

Indi antañi ahosha nawudi haniyi yibaaba? Ntañi wumu chamanishiliyi kutaña chibaaba chahosheleña hadi Mata wasonekeli nindi: “Naseheli chinatañili, muloña nekala neyi Mata, mpinji yejima nafwilaña kutambwila enyi chiwahi nawa nekalaña nanyidimu yayivulu yakuzata chakwila nalalamenaña nikuhanjeka nawamabwambu.” Kankaña wumu wahosheli awa mazu amawahi hachibaaba chahosheleña hadi Esita nindi: “Chakubula kuhita mumbadi, tunateli kwiñija mutu chikupu munvwalilu nimafashoni akatataka. Twatela kuvwala chiwahi, ilaña hitwatela kuhambakeshaku.” Wabombeleluhu nindi: “Yehova watalaña chitwekala mukachi.” Chibaaba chahosheleña hadi kapostolu Petulu chamusañumwini muhela mukwaKristu kuhosha nindi: “Hampinji yinatañileña iyi nsañu, nashiluku muchima chikupu. Natiyileña neyi nadiñi kwoku hampinji yamwekeneña yuma. Natoñojokeleña chikupu kulonda niluki mwatalisha nsañu yabulili kulumbululawu.”

Awa antañi, niamakwawu amavulu asonekeli nakusakilila haniyi yibaaba, etejeli mazu asonekeliyi kapostolu Pawulu kunyama akwila nawu: “Yuma yejima yasonekeluwu hashankulu, ayisonekeli kulonda kutuleja nachu maana.” (Rom. 15:4) Eña, Yehova wasonekeli iyi nsañu muBayibolu kulonda yatudizishi yuma yalema. Wejima wetu tunateli kudizila kuniyi nsañu, hichikweti muloña nayaaka yitunashakami muchalalaku.

Tunayikoleshi chikupu netu mutañi wunu mukanda chakubula kumanisha mpinji. Wishenu haprogiramu yenu yaKudifukula kwaChisaka, anyana akuwukeña. Neyi chipompelu chinatachiki dehi kudiza wunu mukanda haKudiza Bayibolu haChipompelu, bayi mukajiñahu hela mulungu niwumuku. Wutañenuña nakanañachima nawa bayi muhitamu swayi-swayi hampinji yimukutañañaku. Fwikijenuña yuma, toñojokenuña hansañu yimunakutaña. Esekenu kutiya neyi chatiyileñawu antu atenawu muBayibolu, nikumona yuma yamwenuwu. Esekejenu cheliluwu hayuma yamwenuwu nichimwadi kwila.

Tunazañalali chikupu hakuyisonekela wunu mukanda. Tunakuhweleli netu wukuyikwasha nankashi enu nichisaka chenu. Tunayimushi chikupu,

Izanvu Dalombolaña dawaYinsahu jaYehova